Category: news_sub

පූර්ව ළමාවිය අධ්‍යාපනයේ ගුණාත්මකභාවය තහවුරු කිරීමේ වගකීම රජයක් ලෙස අප භාර ගන්නවා – අගමැති…..

දරුවකුගේ ඉදිරි අධ්‍යාපන ගමනේ මඟ තීරණය කරන ප්‍රධානතම සන්ධිස්ථානය පෙරපාසල් අධ්‍යාපනය වන බැවින් එහි ගුණාත්මකභාවය තහවුරු කිරීමේ වගකීම රජයක් ලෙස භාරගන්නා බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය පවසයි.

එමෙන්ම සියලු පළාත් ආවරණය වන පරිදි පූර්ව ළමාවිය අධ්‍යාපන කටයුතු නිවැරදි අධීක්ෂණයකට ලක් කළ යුතු බව ද ඇය වැඩිදුරටත් පැවසීය.

කුරුණෑගල දිස්ත්‍රික්කය තුළ සිදු කළ අධ්‍යාපන නිරීක්ෂණ චාරිකාව අතරතුර වයඹ පෙරපාසල් ගුරු පුහුණු විද්‍යාලයේ 2023/2024 වර්ෂය සඳහා වූ පෙරපාසල් ගුරු පුහුණු ඩිප්ලෝමාධාරිනියන්ට සහතික පත්‍ර ප්‍රදානය කිරීම සඳහා අද (05) පැවති උත්සවයකට එක්වෙමින් අග්‍රාමාත්‍යවරිය මේ බව පැවසුවාය.

පෙරපාසල් ගුරු පුහුණු ඩිප්ලෝමා ප්‍රදානය කිරීමේ උත්සවය පෙරපාසල් අධ්‍යාපන සංවර්ධන අධිකාරිය සහ වයඹ පළාත් සභාව එක්ව සංවිධානය කර තිබුණි.

එමෙන්ම මෙහි පැමිණ සිටි ආරාධිතයින් විසින් පූර්ව ළමාවිය සංවර්ධනය සඳහා වූ රජයේ ස්ථාවරය පිළිබඳව නව ඩිප්ලෝමාධාරිනියන් දැනුවත් කිරීමට කටයුතු කළේය.

එහිදී අදහස් දැක්වූ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය මෙනවිය,

”ඉදිරි අවුරුදු කිහිපය තුළ පූර්ව ළමාවිය අධ්‍යාපනයේ ස්ථාවරත්වයක් ඇති කිරීමට අප සැලසුම් කරමින් සිටිනවා. ඒ සඳහා ජාතික අධ්‍යාපන කොමිසම, කාන්තා හා ළමා කටයුතු අමාත්‍යාංශය සහ අධ්‍යාපන අමාත්‍යාංශය යන ආයතනයන් සමඟ එක්ව ඒ පිළිබඳ ප්‍රතිපත්ති, ගුරු පුහුණුවට අවශ්‍ය නිර්ණායක සහ ඒවා අධීක්ෂණය කිරීමට අවශ්‍ය රෙගුලාසි සම්පාදනය කිරීම සඳහා අප වැඩකටයුතු සකස් කරමින් සිටිනවා. මෙම වසරේදී පෙරපාසල් ගුරු පුහුණු කටයුතු ආරම්භ කිරීමට සැලසුම් සකස්කරමින් තිබෙනවා. ඒ හරහා 2027 වන විට අප බලාපොරොත්තු වෙනවා එකම විෂය මාලාවක් රට පුරා පෙරපාසල් සඳහා ක්‍රියාත්මක කරන්න. ඒ වගේම පෙරපාසල් අධ්‍යාපනය පිළිබඳ නිවැරදි මතයක් සමාජගත කිරීමද වැදගත් වෙනවා.

පෙරපාසල් අධ්‍යාපනය ඔස්සේ සිදුකළ යුත්තේ දරුවාගේ ඉදිරි ප්‍රාථමික අධ්‍යාපනයට හොඳ සූදානමක් ලබාදීමයි. එමනිසා දරුවන්ගේ චාලක කුසලතා වැනි දේවල් වර්ධනය කිරීමටයි පෙරපාසල් අධ්‍යාපනය ඔස්සේ ඉලක්කගත විය යුත්තේ. දෙමාපියන්, වැඩිහිටියන් හැටියට අපේ වගකීමක් තමයි දරුවාට අනවශ්‍ය බරක් නොදැනෙන ලෙස සමාජශීලීත්වය සහ දැනුම වයසට සුදුසු ආකාරයට වර්ධනය කරගැනීමට ඉඩසැලැස්වීම. විශේෂයෙන්ම පෙරපාසල් ගුරුවරුන් ලෙස පූර්ව ළමාවිය අධ්‍යාපනයෙන් අප බලාපොරොත්තු වන්නේ කුමක්ද කියන ඒ පණිවිඩය සමාජයට ලබාදීමට ඔබට විශාල කාර්යභාරයක් පැවරී තිබෙනවා”

රු. කෝටි 3.5 කොල්ලයට සහකාර කළමනාකරු සහ ආරක්ෂක නිලධාරියාගේ නිවාස පරීක්ෂා කිරීමට සෝදිසි වරෙන්තුවක්….

හොරණ රාජ්‍ය බැංකුවක පරිශ්‍රය තුළදී රුපියල් කෝටි තුනහමාරක මුදලක් කොල්ලකෑමේ සිද්ධිය සම්බන්ධයෙන් අත්අඩංගුවට ගත් එම බැංකුවේ සහකාර කළමනාකාරවරයාට සහ ආරක්ෂක නිලධාරියාට එරෙහිව හෙට (06) දිනයේදී රැඳවුම් නියෝග ලබා ගන්නා බව පෑලියගොඩ උතුර අපරාධ කොට්ඨාසය පවසයි.

අදාළ සිදුවීම සම්බන්ධව මේ දක්වා සිදුකළ විමර්ශනයේදී අනාවරණය වී ඇත්තේ සහකාර කළමනාකාරවරයා විසින් නිරූපිකාවන් ඇතුළු කාන්තාවක් රැසක් ඇසුරු කරමින් මුදල් වියදම් කර ඇති බවය.

මේ හේතුවෙන් ඔහු අධික ලෙස ණය වි ඇති බවත් එම විමර්ශනයේදී අනාවරණය කර ගැනීමට නිලධාරීන්ට හැකිව තිබේ.

පසුගිය 03 වැනි දින මෙම සිදුවීම සිදුව ඇති අතර සිද්ධිය සම්බන්ධ විමර්ශන පොලිස්පතිවරයා විසින් පෑලියගොඩ උතුර අපරාධ කොට්ඨාසය වෙත යොමු කෙරිණි.

සිදුවීම සිදුවන දින එහි ආරක්ෂක නිලධාරීන් දෙදෙනෙකු කළමනාකරු හමුවට පැමිණ සහකාර කළමනාකරු සේවා මධ්‍යස්ථාන දෙකක් කරා රැගෙන යාමට බැංකුවෙන් පිටතට රැගෙන ගිය මුදල් මළු බැංකු පරිශ්‍රය තුළදී පා ගමනින් පැමිණි පුද්ගලයෙකු විසින් කොල්ල කා පලා ගොස් ඇති බවට දැනුම් දී තිබේ.

ඒ අනුව ක්‍රියාත්මක වී ඇති කළමනාකරු කඩිනමින් බැංකු පරිශ්‍රයෙන් පිටතට පැමිණ පරීක්ෂා කර බලා කිසිදු සැක කටයුතු පුද්ගලයෙකු හඳුනාගැනීමට නොහැකි වී ඇති බැවින් කඩිනමින් 119 පොලිස් හදිසි ඇමතුම් අංශය අමතා සිද්ධිය සම්බන්ධව දැනුවත් කිරීමට පියවර ගෙන තිබුණි.

එහිදී සහකාර කළමනාකරු විසින් බැංකුවෙන් පිටතට රැගෙන යන මුදල්වල වටිනාකම සම්බන්ධයෙන් පරීක්ෂා කිරීමේදී රුපියල් 5000 නෝට්ටුවලින් මෙම කෝටි තුනහමාරක මුදල අඩංගු එම බැංකුවේ ලාංඡනය සහිත රෙදි මළු දෙකක් කොල්ල කා ඇති බවට තහවුරු කර ගැනීමට නිලධාරීන්ට හැකිව තිබේ.

අදාළ කොල්ලය සිදුවීමෙන් අනතුරුව මුදල් මළු දෙක භාරව සිටි සහකාර කළමනාකරු පොලිසිය වෙත රැගෙන විත් දිගින් දිගටම සිදුකළ ප්‍රශ්න කිරීමෙන් කිසිදු වැදගත් හෝඩුවාවක් අනාවරණය කර ගැනීමට නොහැකි වීමෙන් අනතුරුව පොලිස්පතිවරයා විසින් මෙහි විමර්ශන කටයුතු පෑලියගොඩ උතුර අපරාධ කොට්ඨාසය වෙත යොමු කෙරිණි.

ඒ අනුව එහි පැමිණි අදාළ කොට්ඨාසයේ නිලධාරීන් විසින් CCTV දර්ශන පරීක්ෂා කිරීමේදී සහකාර කළමනාකරු එදින පෙරවරුවේ බැංකුවේ සේප්පුවෙන් මුදල් ලබා ගන්නා අයුරු බැංකුව තුළ සවිකර තිබූ කැමරාවල සටහන් වී ඇති බවට අනාවරණය කරගෙන තිබුණි.

නමුත් ඔහු මුදල් රැගන පිටවීමට සූදානම් වන්නේ ඊටත් පැය කිහිපයකට පසු පස්වරුවේ වන අතර බැංකුව අභ්‍යන්තරයේ කැමරා සවිකර ඇතත් බැංකු පරිශයෙන් පිටවන දොර එහි පැත්තක පිහිටා ඇති බැවින් එම පෙදෙසට බැංකුවෙන් CCTV කැමරා සවිකර නොමැති බවද සැකකටයුතු පුද්ගලයෙකු මුදල් මළු දෙකක් රැගෙන යන ආකාරයක් අවට පිහිටි CCTV කැමරාවල සටහන් වී නොමැති බවද අනාවරණය වී ඇත.

එහිදී සිදුකළ වැඩිදුර විමර්ශනයේදී අනාවරණය වී ඇත්තේ සැකකාර සහකාර කළමනාකරු ආරක්ෂක නිලධාරියාද සම්බන්ධ කරගනිමින් ඉතා සැලසුම් සහගතව මෙකී මුදල් කොල්ල කෑ බවට රංගනයක් සිදුකර ඇති බවය.

ඒ අනුව අදාළ සිද්ධිය සම්බන්ධයෙන් සැකකාර සහකාර කළමනාකරු සහ ආරක්ෂක නිලධාරියෙකු අද (05) අත්අඩංගුවට ගැනීමට නිලධාරීන් විසින් කටයුතු කළේය.

මේ අතර සැකකාර කළමනාකාරවරයා සහ ආරක්ෂක නිලධාරියාගේ දුරකතන විශ්ලේෂණ වාර්තා ලබා ගැනීමටත්, නිවාස පරීක්ෂා කිරීම සඳහා සෝදිසි වරෙන්තුවක් නිකුත් කිරීමටත් හොරණ ප්‍රධාන මහේස්ත්‍රාත් ලක්මිණි විධානගමගේ මහත්මිය නියෝග කර තිබේ.

බස්නාහිර පලාත් උතුරු අපරාධ කොට්ඨාසය විසින් කළ ඉල්ලීමක් සලකා බැලීමෙන් අනතුරුව මහේස්ත්‍රාත්වරිය මෙම නියෝගය නිකුත් කළාය.

සිද්ධිය සම්බන්ධයෙන් අත්අඩංගුවට ගෙන ඇත්තේ වෑවල, ගංගොඩ ප්‍රදේශයේ පදිංචි 54 හැවිරිදි බැංකුවේ සහකාර කළමනාකරු සහ බුලත්සිංහල ප්‍රදේශයේ පදිංචි 43 හැවිරිදි ආරක්ෂක නිලධාරිවරයෙකි.

සැකකරුවන් දෙදෙනා මේ වන විට බස්නාහිර පළාත් උතුර අපරාධ කොට්ඨාශයේ රඳවා සිටින අතර සිද්ධිය සම්බන්ධයෙන් වැඩිදුර විමර්ශන සිදු කෙරේ.

රාජ්‍ය සේවය ඩිජිටල්කරණය කිරීමේ වැඩපිළිවෙල ඇරඹේ…..

ශ්‍රී ලංකාව ඩිජිටල් ආර්ථිකයක් කරා ගෙන යාමේ අරමුණින්, සමස්ත රාජ්‍ය සේවය ඩිජිටල්කරණය කිරීම සහ රාජ්‍ය නිලධාරීන්ගේ තාක්ෂණික කුසලතා වර්ධනය කිරීම සඳහා වන ජාතික වැඩපිළිවෙලේ මූලික පියවර ආරම්භ කර තිබේ.

ඒ සඳහා වූ විශේෂ සාකච්ඡාවක් ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා සහ පළාත් සභා හා පළාත් පාලන නියෝජ්‍ය අමාත්‍ය රුවන් සෙනරත් මහතාගේ ප්‍රධානත්වයෙන් ඊයේ (03) පැවැත්විණි.

ගෝලීය තාක්ෂණික ප්‍රවණතා සමඟ රාජ්‍ය සේවයේ කාර්යක්ෂමතාව ඉහළ නැංවීම, සේවා ප්‍රමාදයන් අවම කිරීම සහ නිලධාරීන්ගේ තාක්ෂණික දැනුම වර්ධනය කිරීම මෙම වැඩසටහනේ ප්‍රධාන අරමුණු ලෙස හඳුනාගෙන ඇත.

රාජ්‍ය සේවය පුද්ගලයන් මත පදනම් වූ ක්‍රමවේදයකින් පද්ධති මත පදනම් වූ නවීන සේවා සැපයුම් ක්‍රමවේදයකට පරිවර්තනය කිරීමේ අවශ්‍යතාව ද මෙහිදී අවධාරණය කෙරිණි.

විශේෂයෙන් ජ්‍යෙෂ්ඨ නිලධාරීන්ගේ තාක්ෂණික භීතිය අවම කරමින් ඩිජිටල් කුසලතා වර්ධනය කිරීම සහ සයිබර් ආරක්ෂාව පිළිබඳ දැනුවත්භාවය ඉහළ නැංවීම වැඩපිළිවෙළේ ප්‍රමුඛතාවක් වනු ඇත.

ලක්ෂ සංඛ්‍යාත රාජ්‍ය සේවකයන් පුහුණු කිරීම සඳහා ඊ-ඉගෙනුම් පද්ධතියක් භාවිත කිරීමටත්, ජංගම දුරකථන හරහා ලබාගත හැකි කෙටි වීඩියෝ පාඩම් මාලා මගින් Micro-learning ක්‍රමවේදයක් හඳුන්වා දීමටත් යෝජනා වී තිබේ.

මෙම ඩිජිටල් සාක්ෂරතා පාඨමාලා සම්පූර්ණ කිරීම රාජ්‍ය නිලධාරීන්ගේ වාර්ෂික කාර්යසාධන ඇගයීම් සහ උසස්වීම් සඳහා අනිවාර්ය අවශ්‍යතාවක් බවට පත් කිරීම පිළිබඳව ද සාකච්ඡා වී ඇත.

එමෙන්ම කාර්යාල සහ පාසල් පරිගණක විද්‍යාගාර පස්වරු කාලයේ පුහුණු කටයුතු සඳහා යොදා ගැනීම, Gamification ක්‍රමවේද සහ ඩිජිටල් අත්සන් සහිත සහතික හඳුන්වා දීම සම්බන්ධයෙන් ද එකඟතාව පළ විය.

මෙම වැඩසටහන දැනට සේවයේ නියුතු නිලධාරීන් පුහුණු කිරීම, නව බඳවා ගැනීම් සඳහා ඩිජිටල් සුදුසුකම් අනිවාර්ය කිරීම සහ පාසල් හා විශ්වවිද්‍යාල විෂයමාලා ඩිජිටල් ආර්ථිකයට ගැළපෙන ලෙස සංවර්ධනය කිරීම යන තෙවැදෑරුම් සැලැස්මක් යටතේ ක්‍රියාත්මක කිරීමට සැලසුම් කර ඇත.

මූලික අදියර ලෙස සයිබර් ආරක්ෂාව පිළිබඳ කෙටි දැනුවත් කිරීමේ පාඨමාලාවක් සහ රාජ්‍ය නිලධාරීන් සඳහා නිල විද්‍යුත් තැපෑල හා සහයෝගීතා මෙවලම් භාවිතය පිළිබඳ ප්‍රායෝගික පුහුණුවක් ලබාදීමට නියමිතය.

ඇහැලියගොඩ ‍පොලිස් ස්ථානාධිපතිට ඇප……

රත්නපුර කොට්ඨාස අපරාධ විමර්ශන කාර්යාංශය විසින් අත්අඩංගුවට ගෙන අධිකරණයට ඉදිරිපත් කළ ඇහැලියගොඩ ‍පොලිස් ස්ථානයේ ස්ථානාධිපතිවරයා ඇප මත මුදාහැර තිබේ.

ඔහු අවිස්සාවේල්ල මහෙස්ත්‍රාත් අධිකරණයට අද (4) ඉදිරිපත්කළ අවස්ථාවේදී මෙම නියෝගය ලබාදී ඇත.

ස්ථානාධිපතිවරයා ලක්ෂ 10 බැගින් වූ ශරීර ඇප 3ක් මත මුදාහැර ඇති අතර, විදෙස් ගමන් තහනමක්ද පනවා තිබේ. ඊට අමතරව පැමිණිලිකරුවන්ට බලපෑම් නොකරන ලෙසටද නියෝගය කර ඇත.

මැණික් ගලක් සොරාගැනීමක් සම්බන්ධයෙන් ලද පැමිණිල්ලක් විමර්ශනයේදී සාක්ෂිකරුවන් හා සැකකරුවන්ට අයත් මුදල් බලෙන් ලබාගෙන විමර්ශන කටයුතු සිදු නොකිරීමේ චෝදනාවකට අදාළව ඔහු ඊයේ (3) අත්අඩංගුවට ගනු ලැබීය.

ගිනිගැනීමට ලක්වූ සෙනෙහසේ කැදැල්ල ලියාපදිංචි නොකළ ආයතනයක්…..

අගුරුවාතොට, බටගොඩ ප්‍රදේශයේ දී ගිනිගැනීමට ලක්වූ  “මව්පිය සෙවන සෙනෙහසේ කැදැල්ල” රැඳවුම් මධ්‍යස්ථානය කිසිදු රාජ්‍ය ආයතනයක් යටතේ ලියාපදිංචි කර නොමැති බව සමාජ ආරක්ෂණ හා ප්‍රජා බලගැන්වීමේ අමාත්‍ය උපාලි පන්නිලගේ මහතා තහවුරු කර තිබේ.

සිදුකල කළ සොයාබැලීමක දී  අමාත්‍යවරයා ඒ බව තහවුරු කළේය.

අගුරුවාතොට, බටගොඩ ප්‍රදේශයේ පිහිටි මව්පිය සෙවන සෙනෙහසේ කැදැල්ල රැඳවුම් මධ්‍යස්ථානය සමාජ මාධ්‍ය ඔස්සේ ප්‍රසිද්ධියට පත්ව තිබූ ස්ථානයකි.

ඒ , එහි නේවාසිකයන් හා සේවාවන් පිළිබඳ නිරන්තරයෙන් පළ කෙරුණු වීඩියෝ නිසාවෙනි.

එම ස්ථානයේ හදිසි ගින්නක් හටගෙන තිබුණේ ඊයේ පස්වරු 5.10ට පමණය.

වහා ක්‍රියාත්මක වූ ප්‍රදේශවාසීන් හා හොරණ ගිනි නිවීමේ ඒකකයේ භටයින් එක්ව ගින්න මැඩ පැවැත්වීමට උත්සාහ කළේය.

ගින්න ඇති වන අවස්ථාවේ අදාළ මධ්‍යස්ථානය තුළ විවිධ වයස්වල මානසික ආබාධ සහිත පුද්ගලයින් 70 දෙනෙකු සිට තිබේ.

ඒ අතරින් 52 දෙනෙකු නිරුපද්‍රිතව මුදා ගැනීමට අසල්වාසීන් සහ පොලීසිය සමත් වී තිබුණි.

පිළිස්සුම් තුවාල සහිතව සිටියදී බේරාගැනුණු තවත් 8 දෙනකු එම අවස්ථාවේදීම රෝහල්ගත කෙරුණත් ඒ අතරින් දෙනෙකු පසුව මිය ගොස් තිබුණි.

ගින්නෙන් මෙම මධ්‍යස්ථානය සම්පූර්ණයෙන්ම විනාශ වූ අතර බේරාගැනීමට නොහැකි වූ 10 දෙනෙකුගේ පිළිස්සුණු මෘත දේහ ගින්න නිවාදැමීමෙන් පසු සොයාගැනුණි.

ඊයේ රාත්‍රියේදි ආරක්ෂක ලේකම් විශ්‍රාමික එයාර් වයිස් මාර්ෂල් සම්පත් තුයියකොන්තා මහතා , කළුතර දිස්ත්‍රික් ජාතික ජන බලවේගයේ පාර්ලිමේන්තු මන්ත්‍රිනි නිලන්ත කොට්ටහච්චි මහත්මිය හා නිලධාරීන් පිරිසක් ද එහි පැමිණ අනතුර නිරීක්ෂණය කළේය.

මධ්‍යස්ථානය තුළ සිට නිරුපද්‍රිතව බේරාගත් පිරිස ඊයේ රාත්‍රියේදීම බටගොඩ ප්‍රාථමික විද්‍යාලයේ රඳවා තැබීමට කටයුතු කෙරුණි.

ගින්න හටගත් ස්ථානයට අද පෙරවරුවේ පැමිණි හොරණ ප්‍රධාන මහේස්ත්‍රාත්වරිය එහි මහේස්ත්‍රාත් පරික්ෂණය සිදු කළ අතර රජයේ රස පරීක්ෂක දෙපාර්තමේන්තුවේ නිලධාරීන් ද එහි පැමිණියේය.

එම අවස්ථාවේදි මෙම රැඳවුම් මධ්‍යස්ථානය පවත්වාගෙන ගිය පුද්ගලයා ද පොලිස් අත්අඩංගුවට ගෙන එම ස්ථානයට රැගෙන විත් සිටි ආකාරය දක්නට ලැබුණි.

මෙහිදී ජල මෝටරය සහ එම ස්ථානයේ තිබූ මල්ටි ප්ලග් එකකින් විදුලිය කාන්දු වී ඇති බවට රස පරීක්ෂක දෙපාර්තමේන්තුවේ නිලධාරීන් හඳුනාගෙන ඇති බව වාර්තා වෙයි.

ඒ ආසන්නයේ මෙට්ට 80ක් පමණ ගොඩ ගසා තිබූ අතර එයට ගිනි ඇවිලි පැතීරි යන්නට ඇති බවට සැක පළ කෙරේ.

මේ අතර බටගොඩ ප්‍රාථමික විද්‍යාලයේ රඳවාගෙන සිටි මුදාගත් පිරිස අද පෙරවරුවේ යුද හමුදාවේ සහායෙන් ගල්පාත වෙනත් සුරැකුම් මධ්‍යස්ථානයක් වෙත යොමු කෙරුණි.

මේ අතර ගින්නට හසුවු රැඳවුම් මධ්‍යස්ථානයේ සිටි අයගේ ඥාතීන් ද අද එම ස්ථානයට පැමිණ සිටියේය.

සිද්ධිය සම්බන්ධයෙන් පොලිසිය වැඩිදුර විමර්ශන සිදුකරන අතර ඒ අනුව රැඳවුම් මධ්‍යස්ථානයේ සිසිටීවි දර්ශන ඇතුළත් DVR යන්ත්‍රය පොලිස් භාරයට ගැනුණි.

අත්අඩංගුවට ගෙන අධිකරණයට ඉදිරිපත් කෙරුණු මෙම රැඳවුම් මධ්‍යස්ථානයේ අධ්‍යක්ෂ ලෙස කටයුතු කරමින් එය පවත්වාගෙන ගිය පුද්ගලයා ජුනි 11 දක්වා රක්ෂිත බන්ධනාගාරගත කිරීමට හොරණ මහේස්ත්‍රාත් අධිකරණය අද පස්වරුවේ නියම කළේය.

ආහාර ද්‍රව්‍ය ආනයනකරුවෙකුට අයත් ගබඩා 4ක් මුද්‍රා තබයි……

නුගේගොඩ, පාගොඩ ප්‍රදේශයේ පිහිටි ප්‍රධාන පෙළේ ආහාර ද්‍රව්‍ය ආනයනකරුවෙකුට අයත් ගබඩා පරිශ්‍රයක පාරිභෝගික කටයුතු පිළිබඳ අධිකාරියේ නිලධාරීන් විසින් හදිසි වැටලීමක් සිදුකර තිබේ.

ඊයේ (03) සිදුකළ මෙම වැටලීමේදී පාරිභෝගික නීති උල්ලංඝනය කරමින් සිදුකර ඇති බවට සැක කෙරෙන අක්‍රමිකතා රැසක් අනාවරණය වීමත් සමඟ අදාළ ගබඩා හතරක් සම්පූර්ණයෙන්ම මුද්‍රා තැබීමට නිලධාරීන් පියවර ගෙන ඇත.

විමර්ශනවලදී අනාවරණය වී ඇත්තේ මෙම ගබඩා මඟින් දිවයිනේ ප්‍රධාන පෙළේ හෝටල් සහ වෙළෙඳපොළ වෙත චීස්, බටර්, චොකලට්, කොකෝවා කුඩු, ටින් කළ පළතුරු හා එළවළු, පැස්ටා, මස් වර්ග සහ බේකරි නිෂ්පාදන සඳහා යොදාගන්නා අමුද්‍රව්‍ය ඇතුළු ආහාර ද්‍රව්‍ය තොග වශයෙන් බෙදාහැර ඇති බවය.

පිළිබඳ අධිකාරියේ  නිලධාරීන් පෙන්වා දෙන්නේ ගබඩා කර තිබූ බොහෝ නිෂ්පාදනවල ආනයනකරු පිළිබඳ තොරතුරු සඳහන් කර නොතිබූ බවය.

එමෙන්ම මුල් ඇසුරුම්වල තිබූ නිෂ්පාදිත දිනය, කල් ඉකුත්වන දිනය ඇතුළු අත්‍යවශ්‍ය තොරතුරු ඉවත් කර වෙනත් ඇසුරුම්වලට භාණ්ඩ නැවත ඇසුරුම් කිරීමේ ක්‍රියාවලියක්ද සිදුකර ඇති බව අනාවරණය වී ඇත.

මීට අමතරව, හෝටල් සහ වෙළෙඳපොළ වෙත නිකුත් කිරීමට සූදානම් කර තිබූ කල් ඉකුත් වූ ආහාර නිෂ්පාදන තොගයක් ද සොයාගෙන ඇති බව පිළිබඳ අධිකාරිය පවසයි.

මෙම තත්ත්වය පාරිභෝගික ජනතාවගේ සෞඛ්‍යයට බරපතළ අවදානමක් එල්ල කළ හැකි බැවින්, සිද්ධිය සම්බන්ධයෙන් පුළුල් විමර්ශනයක් ආරම්භ කර ඇති බව පාරිභෝගික කටයුතු පිළිබඳ අධිකාරිය සඳහන් කරයි.

වැඩිදුර විමර්ශන අවසන් වන තෙක් අදාළ ගබඩා මුද්‍රා තබා ඇති අතර, වගකිව යුතු පාර්ශ්වයන්ට එරෙහිව පාරිභෝගික කටයුතු පිළිබඳ අධිකාරී පනත යටතේ නීතිමය ක්‍රියාමාර්ග ගැනීමට නියමිතය.

ජනාධිපති කාර්ය මණ්ඩල ප්‍රධානී සහ UN නියෝජිතයන් අතර හමුවක්…..

ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති සහ එක්සත් ජාතීන්ගේ සංවිධානයේ ශ්‍රී ලංකාවේ නේවාසික සම්බන්ධීකාරක මාර්ක්-ඇන්ඩ්‍රේ ෆ්‍රැන්චේ යන මහත්වරුන් අතර හමුවක් ජනාධිපති කාර්යාලයේදී අද (04) පෙරවරුවේ පැවැත්විණි.

ශ්‍රී ලංකාව සහ එක්සත් ජාතීන්ගේ සංවිධානය අතර පවතින දිගුකාලීන මානුෂීය සහයෝගීතාව තවදුරටත් ශක්තිමත් කර ගැනීම සම්බන්ධව මෙහිදී සාකච්ඡා විය.

දිට්වා සුළිකුණාටුවෙන් පසුව රජය ගෙන යන ‘Rebuilding Sri Lanka’ වැඩසටහනට සමගාමීව සිදු කෙරෙන පුනරුත්ථාපන කටයුතු සම්බන්ධව මෙන්ම, 2025 දෙසැම්බර් සිට 2026 අප්‍රේල් දක්වා කාලය ආවරණය වන පරිදි ප්‍රකාශයට පත් කරන ලද මානුෂීය ප්‍රමුඛතා සැලැස්මේ (Humanitarian Priorities Plan – HPP) ඉදිරි කටයුතු සිදු කරන ආකාරය සම්බන්ධව මෙහිදී දීර්ඝ ලෙස සාකච්ඡා කළ බව ජනාධිපති මාධ්‍ය අංශය පවසයි.

එක්සත් ජාතීන්ගේ සංවිධානයේ නියෝජිතයන් වන අසාම් බාකීර් මාකර් (Azam Bakeer Marker, වගීෂ පෙරේරා, TCMNRT Cooray යන මහත්වරුද මෙම අවස්ථාවට එක්ව සිටියහ.

මොනරාගල දිස්ත්‍රික් මහ රෝහලේ නව පස් මහල් මාතෘ හා ශල්‍ය වාට්ටු සංකීර්ණය ජනතා අයිතියට……

මොනරාගල දිස්ත්‍රික් මහ රෝහලේ අභිනවයෙන් ඉදිකරන ලද පස් මහල් මාතෘ හා ශල්‍ය වාට්ටු සංකීර්ණය සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් අද (04) ජනතා අයිතියට පත් කෙරිණි.

වාට්ටු සංකීර්ණය විවෘත කිරීමෙන් අනතුරුව අමාත්‍යවරයා රෝහලේ බාහිර රෝගී අංශය, සායන පරිශ්‍ර, රෝගී වාට්ටු, ඖෂධාගාර, හදිසි ප්‍රතිකාර ඒකක, රසායනාගාර, ලේ බැංකුව ඇතුළු අංශ රැසක් නිරීක්ෂණයට ලක් කළේය.

සෞඛ්‍ය අමාත්‍යාංශය මගින් රුපියල් මිලියන 857කට අධික මුදලක් වැය කර ඉදිකර ඇත.

මෙම පස් මහල් ගොඩනැගිල්ලේ බිම් මහල සහ පළමු මහල මාතෘ වාට්ටු සඳහාත්, දෙවන හා තෙවන මහල් කාන්තා ශල්‍ය වාට්ටු සඳහාත් වෙන් කර ඇත.

සිව්වන මහලේ අති නවීන වෛද්‍ය උපකරණවලින් සමන්විත ශල්‍යාගාර හතරක් ස්ථාපිත කිරීමට ද සැලසුම් කර තිබේ.

මෙම සමස්ත ව්‍යාපෘතිය සඳහා රුපියල් මිලියන 2,900කට අධික මුදලක් වැය කිරීමට අපේක්ෂා කරන බවද සෞඛ්‍ය අමාත්‍යාංශය සඳහන් කරයි.

උත්සවයේදී අදහස් දැක්වූ අමාත්‍ය වෛද්‍ය නලින්ද ජයතිස්ස මහතා පැවසුවේ මොණරාගල, බදුල්ල සහ අම්පාර දිස්ත්‍රික්කවල වෙසෙන ලක්ෂ 28කට ආසන්න ජනතාවට කාර්යක්ෂම සෞඛ්‍ය සේවාවක් ලබාදීම සඳහා අම්පාර මහ රෝහල, බදුල්ල ශික්ෂණ රෝහල සහ මොණරාගල දිස්ත්‍රික් මහ රෝහල ඒකාබද්ධ සෞඛ්‍ය පද්ධතියක් ලෙස සංවර්ධනය කිරීමට සැලසුම් කර ඇති බවය.

2019 වසරේ ආරම්භ කළ මෙම ගොඩනැගිල්ලේ ඉදිකිරීම් අතරමඟ නතර වී තිබූ අතර, ඒවා නැවත ආරම්භ කිරීම සඳහා අවශ්‍ය ප්‍රතිපාදන වෙන් කර කඩිනමින් අවසන් කිරීමට කටයුතු කළ බවද අමාත්‍යවරයා සඳහන් කළේය.

තවද මේ වනවිට රුපියල් මිලියන 1,400ක මුදලක් ගෙවා අවසන් කර ඇති අතර, මෙම වසර තුළ ශල්‍යාගාර හතරේ ඉදිකිරීම් අවසන් කිරීමට අපේක්ෂා කරන බවද හෙතෙම පැවසීය.

සෞඛ්‍ය ක්ෂේත්‍රයේ අතරමඟ නතර වී ඇති ව්‍යාපෘති 69ක් හඳුනාගෙන ඇති බව සඳහන් කළ අමාත්‍යවරයා, ඒවා නිසි වේලාවේ අවසන් නොකිරීම හේතුවෙන් රජයට අමතර මූල්‍ය බරක් දරා ගැනීමට සිදුව ඇති බවද පෙන්වා දුන්නේය.

ගොඩනැගිලි ඉදිකිරීම පමණක් නොව ඒවා සඳහා අවශ්‍ය වෛද්‍ය උපකරණ සහ සෞඛ්‍ය කාර්ය මණ්ඩලය ද ලබාදීම සඳහා විශේෂ වැඩපිළිවෙළක් ක්‍රියාත්මක කර ඇති බව ද අමාත්‍යවරයා ප්‍රකාශ කළේය.

එමෙන්ම ලබන වසර තුළ මොනරාගල දිස්ත්‍රික් මහ රෝහලට නවීන CT ස්කෑන් යන්ත්‍රයක් ලබාදීමටත්, රුපියල් මිලියන 317ක සංවර්ධන ව්‍යාපෘති ක්‍රියාත්මක කිරීමටත් සැලසුම් කර ඇති බවද අනාවරණය කෙරිණි.

මෙම අවස්ථාවේදී මොනරාගල දිස්ත්‍රික් මහ රෝහලේ නිල වෙබ් අඩවිය ද එළිදැක්වීම අමාත්‍යවරයාගේ ප්‍රධානත්වයෙන් සිදු විය.

2026 Miss Aura International තරගාවලියෙන් ශ්‍රී ලංකාවට කිරුළක්……

තුර්කියේ පැවැති ‘Miss Aura International 2026’ ලෝක රූ රැජින තරගාවලියේදී “Best in National Costume” හිමි කිරුළ දිනාගත් ශ්‍රී ලංකා වේ වෛද්‍ය දෙවීනා නවීක්ෂි මෙනවිය අද (25) උදෑසන කටුනායක ගුවන් තොටුපොළෙන් දිවයිනට පැමිණියාය.

ලෝකයේ රටවල් 40 ක රූ රැජිනියන්ගේ සහභාගීත්වයෙන් මෙවර තරගාවලිය මැයි 10 වන දින සිට මැයි 22 වන දින දක්වා තුර්කියේ අන්තාලියා නුවරදී අතිඋත්කර්ෂවත් අන්දමින් පැවැත්විණි.

එහිදී ශ්‍රී ලංකාව නියෝජනය කළ දෙවීනා නවීක්ෂි මෙනවිය ප්‍රථමයෙන් තරගාවලියේ අවසන් 20 දෙනාගේ වටය දක්වා සුදුසුකම් ලැබූ අතර, අනතුරුව ශ්‍රී ලාංකීය අනන්‍යතාව විහිදුවමින් ඉදිරිපත් කළ ජාතික ඇඳුම වෙනුවෙන් මෙලෙස විශිෂ්ට ජයග්‍රහණයක් අත්කර ගැනීමට සමත් වූවාය.

ඇය වෘත්තියෙන් වෛද්‍යවරියක වන අතර දැනට ගාල්ල කරාපිටිය ශික්ෂණ රෝහලේ සේවයේ නියුතුව සිටින්නීය.

අද (25) උදෑසන 08:25 ට එමිරේට්ස් ගුවන් සේවයට අයත් EK-650 දරන ගුවන් යානයෙන් ඇය කටුනායක ගුවන් තොටුපොළ වෙත ළඟා වූවාය.

ජාත්‍යන්තර කීර්තියක් මෙන්ම මව්බිමට අභිමානයක් ගෙන දුන් වෛද්‍ය දෙවීනා නවීක්ෂි මෙනවිය පිළිගැනීම සඳහා ඇයගේ දෙමාපියන්, නෑදෑ හිතවතුන් ඇතුළු පිරිසක් ගුවන් තොටුපොළ පැමිණීමේ පර්යන්තය වෙත පැමිණ සිටියහ.

වසරේ මේ දක්වා සංචාරක පැමිණීම 990,000 පනී……

මේ වසරේ ගත වු කාලය තුළ සංචාරකයින් 990,000 වැඩි පිරිසක් දිවයිනට පැමිණ ඇති බව ශ්‍රී ලංකා සංචාරක සංවර්ධන අධිකාරිය පවසයි.

ඒ අනුව ජනවාරි පළමු දින සිට මැයි 24 දක්වා කාලය තුළ සංචාරකයින් 990,032ක් දිවයිනට පැමිණ ඇති බව එම අධිකාරිය සඳහන් කළේය.

ඉන් වැඩි දෙනෙකු ඉන්දීය ජාතිකයින් වන අතර එම සංඛ්‍යාව 236,916ක් වේ.

එමෙන්ම බ්‍රිතාන්‍ය, රුසියාව, ජර්මනිය සහ චීනය ඇතුළු රටවලින් ද සංචාරකයින් වැඩි පිරිසක් දිවයිනට පැමිණ තිබේ.

මේ අතර මැයි මස පළමු දින සිට 24 වන දින දක්වා කාලය තුළ සංචාරකයින් 113,755දෙනෙකු දිවයිනට පැමිණ ඇති බව ශ්‍රී ලංකා සංචාරක සංවර්ධන අධිකාරිය සඳහන් කළේය.