Category: gossip_main

ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරි කපිල චන්ද්‍රසේන මහතා  සැකකටයුතු ලෙස මිය ගොස් සිටි හිටපු ක්‍රිකට් ක්‍රීඩක අරවින්ද ද සිල්වා මහතාට අයත් නිවසේ ආරක්ෂ කැමරා පද්ධතියේ දත්ත ගබඩාවී නොමැති බව කොළඹ අපරාධ කොට්ඨාස අද (14) කොටුව මහේස්ත්‍රාත් අධිකරණය දැනුම්දී තිබේ.

ඒ පිළිබඳ කරුණු වාර්තා කරමින් විමර්ශන නිලධාරීන් කියා සිටියේ, එම නිවසේ ආරක්ෂක කැමරා පද්ධතිය ක්‍රියාත්මක තත්ත්වයේ පැවතියද, එහි දත්ත ගබඩාවීමක් සිදුනොවන බව විමර්ශනයේදී අනාවරණය වූ බවය.

සැකකටයුතු ලෙස මරණයට පත්වූ ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරි කපිල චන්ද්‍රසේන මහතාගේ මරණය සම්බන්ධයෙන් සිදුකෙරෙන මහේස්ත්‍රාත් පරීක්ෂණයේ සාක්ෂි විමසීම අද (14) දෙවැනි දිනටත් කොටුව මහේස්ත්‍රාත් අධිකරණයේදී සිදු කෙරිණි.

සිදුකෙරෙමින් පවතින විමර්ශන සම්බන්ධයෙන් කොළඹ අපරාධ කොට්ඨාසය කොටුව මහේස්ත්‍රාත් පසන් අමරසේන මහතාට වැඩිදුර වාර්තාවක් ඉදිරිපත් කර තිබේ.

මියගිය කපිල චන්ද්‍රසේන මහතාගේ බිරිඳට අයත් නිවසක් අධිකරණයෙන් ලබාගත් නියෝගයකට අනුව ඉකුත් 12 වැනිදා සෝදිසියට ලක්කළ බවත්, එම නිවසෙහි තිබී Laptop පරිගණක 02ක් සහ ලිපිගොනු කිහිපයක් නඩු භාණ්ඩ ලෙස සිය භාරයට ගත් බවත් එම නිලධාරීන් මහේස්ත්‍රාත්වරයාට දැනුම් දුන්නහ.

එහිදී “මරණකරු මියගොස් සිටි නිවසේ සියලු CCTV කැමරා දර්ශන මේ වනවිට විමර්ශන නිලධාරීන් භාරයට ගෙන ඇත්ද” යන්න මහේස්ත්‍රාත්වරයා විමර්ශන නිලධාරින්ගෙන් ප්‍රශ්න කර සිටියේය.

ඊට පිළිතුරු දෙමින් විමර්ශන නිලධාරියා සඳහන් කළේ, අදාළ නිවසේ CCTV කැමරා පද්ධතිය ක්‍රියාත්මක තත්ත්වයේ පැවතියද, එහි දත්ත ගබඩාවීමක් සිදුනොවන බව සිදුකළ විමර්ශනයේදී අනාවරණ වූ බවය.

එබැවින් එම නිවසට අදාළව විමර්ශනයට යොදාගත හැකි CCTV දර්ශන  හමුනොවූ නමුත්, ආසන්න නිවාස 02ක CCTV කැමරා පද්ධතිවලින් 2026 මැයි 06 වැනිදා සිට මැයි 08 වැනිදා දහවල් දක්වා වූ කාලයට අදාළව ඉදිරිපස හා පැති දර්ශන ඇතුළත් CCTV දර්ශන සිය භාරයට ගෙන ඇති බව විමර්ශන නිලධාරියා ප්‍රකාශ කළේය.

එහිදී “මරණකරු රැඳීසිටී නිවසේ ප්‍රවේශ දොරටු කීයක් තිබේද?” යන්න මහේස්ත්‍රාත්වරයා යළි විමසා සිටියේය.

අදාළ නිවසට ප්‍රවිෂ්ටවීමට එක් ප්‍රවේශ දොරටුවක් පමණක් ඇති බවට පිළිතුරු දුන් විමර්ශන නිලධාරියා සඳහන් කළේ, නිවසට ඇතුල්වන සහ පිටවන පුද්ගලයින් සම්බන්ධයෙන් වූ දර්ශන දැනට සිය භාරයට ගෙන ඇති CCTV දත්ත පද්ධතිය තුළ ඇතුළත් බවය.

අනතුරුව සැකකටයුතු ලෙස මියගොස් සිටි ශ්‍රී ලන්කන් ගුවන් සේවයේ හිටපු ප්‍රධාන විධායක නිලධාරි කපිල චන්ද්‍රසේනගේ මරණය සම්බන්ධයෙන් වූ මහේස්ත්‍රාත් පරික්ෂණයේ දෙවැනි දින සාක්ෂි විමසීම ආරම්භ විය.

එහිදි අරවින්ද සිල්වා මහතාගේ නිවසේ කාමරයක් තුළ කපිල චන්ද්‍රසේන මහතා මියගොස් සිටී දර්ශනය මුලින්ම දැක තිබූ නීතිඥ ප්‍රියන්ත අමරසිංහ මහතා සාක්ෂි ලබා දුන්නේය.

” ස්වාමිනි, 2026 මැයි මස 08 වැනිදා මම අරවින්ද සිල්වා මහතාගේ නිවසට ගියේ ඊට පෙර දින රාත්‍රියේ ජනාධිපති නීතිඥ රියන්සි අර්සකුලරත්න මහතා කරපු දැනුම් දීමකට අනුව. පෙර දින රාත්‍රී 9.30ට විතර රියෙන්සි සර් මට කතා කරලා කිව්වා,”කපිල චන්ද්‍රසේනව අධිකරණයට ඉදිරිපත් කරන්න තියෙනවා. සර්ගේ චේම්බර් එකේ මෝෂන් එක හදලා තියෙන්නේ. උදේම ගිහිල්ලා මෝෂන් එක දාලා සර් එනකල් නඩුව Keep Down කරන්න” කියලා. ඒ වගේම “කපිල රිමාන්ඩ් වෙයි කියලා බයේ ඉන්නේ, ගිහින් කපිලව හම්බවෙලා මේ මෝසම දාන්නේ වරෙන්තුව ආපසු කැඳවන්න කියන එක පැහැදිළි කරන්න” කියලාත් කිව්වා. පස්සේ එදා රෑ 11ට විතර Mr. රියෙන්සි කතා කරන්න කිව්වා කියලා අරවින්ද ද සිල්වා මට කතා කළා. ඒ වෙලාවේ කපිලත් එතන ඉන්නවා කියලා  අරවින්ද මට කිව්වා. “31 ද 21 ද මන්දා Section එකක් ගැන කපිල හැමවෙලේම කියවනවා, ඒක කියකිය රිමාන්ඩ් වෙයි කියලා බයේ ඉන්නේ” කියලත් අරවින්ද මට කිව්වා. පස්සේ මම අරවින්දට කිව්වා “පහුවෙනිදා උදේ 7.15ට විතර එයාගේ නිවසට එන්නම්” කියලා. පහුවෙනිදා උදේ 7.15ට විතර නිවසට ගිහිල්ලා Call කරපුවාමයි අරවින්ද ඇහැරුණේ. මම නිවස ඇතුළට ගියාම අරවින්ද උඩ තට්ටුවේ ඉඳලා පහළට බහින ගමන් කියාගෙන ආවා “මම කපිලට Call කළා Answer කරන්නේ නැහැ” කියලා. පස්සේ මම කිව්වා “දොරට තට්ටු කරලා බලන්න” කියලා. අරවින්ද උඩට ගිහින් දොරට තට්ටු කරලා ඇවිල්ලා කිව්වා “දොර අරින්නේ නැහැ” කියලා. පස්සේ මමයි, අරවින්දයි, බිරිඳයි උඩට ගියා. අරවින්ද Wash Room එකට ගියාම මම ඔහුගේ බිරිඳගෙන් ඇහැව්වා “Master Key එකක් තියෙනවාද” කියලා. බිරිඳ Master Key එක ගෙනල්ලා දොර ඇරියා. එතකොට 7.35 වගේ වෙන්න ඇති. දොර අරද්දිම මම දැක්කා ඇඳේ ඇතිරිල්ල ගුලිවෙලා වගේ තියෙනවා. කවුරුත් ඇඳේ නැති නිසා වම්පස බැලුවා. එහි දොරක උඩ ටයි පටියක් වගේ එකක් එල්ලිලා තිබුණා. ඊට පහළ බිම නිල්පාට වගේ පුටුවක් උඩ තට්ටය සහිත ඔළුවක් දැක්කා. දොර උඩ තිබ්බ පටියේ කොටසක් බෙල්ලෙත් තියනවා නිරීක්ෂණය කළා. පස්සේ මම අරවින්දගේ නෝනාව අතින් පිටිපස්සට කරගෙන කාමරයෙන් එළියට ආවා. ඒ වෙලාවේ අරවින්ද එතනට ආවා. මම අරවින්දට කිව්වා “මැරිලා වගේ, දන්න ඩොක්ටර් කෙනෙක්ට කතා කරන්න” කියලා. ඒක අහපුගමන් ඔහුත් බියට පත්වුණ බව මම දුටුවා. පස්සේ ඔහු Call ගද්දිත් කලබලවෙලා කියලා මට පේන්න තිබුණා “

අනතුරුව සැකකටයුතු ලෙස මියගොස් සිටී කපිල චන්ද්‍රසේන මහතාගේ දේහය මුල්වරට පරික්ෂා කළ පෞද්ගලික රෝහලක වෛද්‍ය යශෝදා ලක්ෂානි ලියනගේ ද මරණ පරීක්ෂණයට අදාළව සාක්ෂි ලබාදුන්නාය.

” මැයි 08 වැනිදා උදේ 7.45ට විතර අපේ රෝහලේ හදිසි ප්‍රතිකාර ඒකකයට ලද ඇමතුමකට අනුව කාර්ය මණ්ඩලයේ කිහිපදෙනෙක් සමඟින් මම 7.50ට විතර එම ස්ථානයට ගියා. Lawyer කෙනෙක් කියලා හඳුන්වාදුන්න කෙනෙක් අපිව එක්කගෙන ගියා නිදන කාමරයකට. ඇඳ හිස්ව තිබුණේ. වම් පස කොණේ දොරක් තිබුණා. දොර ඉදිරිපස පුටුවක් දොර පැත්තට හරවලා තිබුණා. එතැන පුද්ගලයෙක් වැටිලා හිටියා. පස්සේ මම ඒ පුද්ගලයාගේ ජීවය තියෙනවාද දැනගන්න “Signs of Life” පරික්ෂා කළා. හුස්මගැනීම නතරවෙලා මුහුණේ පැත්තක් පුටුවට තදවෙලා තිබුණේ. නාඩි වැටීමත් නැවතිලා තිබුණා. මගේ පැත්තට වැටිලා තිබුණ දකුණු අත මම උස්සලා බලනකොට බාගෙට ගල්වෙලා තිබුණා. දකුණු ඇසේ කළු ඉංගිරියාව විශාලවෙලා ස්ථිරව නොසෙල්වී තිබුණා. ඒ කියන්නේ මම පරික්ෂා කරනවිටත් ඒ පුද්ගලයා මැරිලා හිටියේ.” 

වෛද්‍යවරිය මරණකරු පරික්ෂාවට ලක්කළ මොහොත හා බැලීමේදී ඊට කොපමණ වේලාවකට පෙර මරණය සිදුවී තිබුණේද යන්න මෙහිදී සාක්ෂි මෙහෙයවූ පොලිස් නිලධාරියා විමසා සිටියේ ය.

ඊට පිළිතුරු දුන් වෛද්‍යවරිය ” පැයක් – දෙකක් ඇතුළත වෙන්න ඕනේ ” යැයි සඳහන් කළාය.

අනතුරුව අධිකරණය ඉදිරියේ සාක්ෂි ලබාදුන් කපිල චන්ද්‍රසේන මහතාගේ නිවසේ සේවය කළ සේවකයෙකු වන මනතුංග මුදියන්සේලාගේ සෝමදාස නැමැත්තෙකු මහේස්ත්‍රාත්වරයා ඇසූ ප්‍රශ්නයකට පිළිතුරු දෙමින් කියා සිටියේ, කපිල චන්ද්‍රසේන මහතා ඇප ලබා මැයි මස 06 වැනිදා බාන්ස් ප්‍රදේශයේ නිවසට පැමිණි මොහොතේ සිට මැයි මස 07 වැනිදා යළි අරවින්ද ද සිල්වා මහතාගේ නිවසට පිටව යන මොහොත දක්වා ඔහු හමුවීමට කිසිවකු නිවසට නොපැමිණි බවය.

අනතුරුව කපිල චන්ද්‍රසේන මහතාගේ බාන්ස් පෙදෙසේ පිහිටි නිවසේ සේවය කළ සේවිකාවක් වන සුබ්‍රහිම් ප්‍රමිලා නම් තැනැත්තියද සාක්ෂි ලබාදුන්නාය.

” මැයි 06 වැනිදා කපිල සර් නිවසට ආවේ සවස 05ට විතර. රෑ 08.30ට විතර කෑම කාලා අපි සනීපෙන් ඉන්නවාද, බල්ලන්ට කන්න දුන්නාද වගේ දේවල් පොඩ්ඩක් කතා කරලා ඇඟට අමාරුයි කියලා ගිහින් නිදාගත්තා. පහුවෙනිදා සවස 3.30ට විතර සර් කාර් එකෙන් ගෙදරින් ගියාට ආයේ ගෙදරට ආවේ නැහැ. අරවින්ද සර්ගේ Driver නැවත කාර් එක ගෙනැල්ලා අපේ ගෙදර දාලා මට යතුර දුන්නා. කපිල සර් රෑ 11.30ට විතර මට Call කළා. ඉස්සෙල්ලාම කිව්වේ “රෑට අදින්න ඇඳුමක් බෑග් එකකට දාන්න” කියලා. පස්සේ දෙවැනි පාර ආයෙත් Call කරලා “කන්නාඩි කුට්ටම් 02යි, බෙහෙත් ටිකයි, නිල්පාට බෙල්ට් එකකුයි දාන්න” කිව්වා. “සරම යට නිල්පාට බෙල්ට් එක තියෙනවා” කිව්වා. ඒක සර් Exercise කරන්න පාවිච්චි කරන බෙල්ට් එකක්. සර් ඒක ගන්න වාහනයක් එවනවා කිව්වා. පස්සේ වාහනයක දෙන්නෙක් ආවා. මම ඔවුන්ට එක දුන්නා. පසුදින සර් ආපු නැති නිසා මම උදේ 6.40ට විතර Call කළා. එත් සර් Answer කළේ නැහැ. සර් උසාවියට යන්න ඕන කිව්ව නිසයි මම Call කළේ. “

කපිල චන්ද්‍රසේන උසාවියට යන්න අවශ්‍ය බව පැවසුවේ කිනම් අවස්ථාවකද යන්න මෙහිදී මහේස්ත්‍රාත්වරයා ප්‍රශ්න කර සිටියේය.

පෙර දින ඇඳුම් ඇතුළු භාණ්ඩ ගෙන්වාගැනීමට ඇමතූ අවස්ථාවේදී “මට හෙට උසාවි යන්න තියෙනවා. සුදු ඇඳුමක් අයන් කරලා තියන්න” යැයි පැවසූ බවට ඇය පිළිතුරු දුන්නාය.

මෙහිදී වැඩිදුරටත් සාක්ෂි ලබාදෙමින් සේවිකාව සඳහන් කළේ, මැයි මස 08 වැනිදා උදෑසන 7.25ට පමණ CID යැයි කියමින් පැමිණි 05 දෙනෙකුගෙන් යුත් පිරිසක් නිවස පරික්ෂාකිරීමේ සෝදිසි වරෙන්තුවක් පෙන්වා නිවස පරික්ෂා කළ බවය.

එහිදී “සර්, ගෙදර ඉන්නවා නේද, බොරු කියන්න එපා, ඔයාවත් ගෙනියනවා” යනුවෙන් පැවසූ බවද සේවිකාව කියාසිටියාය.

පෙ.ව. 8.15ට පමණ ඔවුන් පිටවයාමෙන් පසු තමන් කපිල චන්ද්‍රසේන මහතා මියගොස් ඇතැයි දැනගත් බවද එම සේවිකාව අධිකරණය හමුවේ සඳහන් කළාය.

මෙහිදී කපිල චන්ද්‍රසේන මහතාගේ නිවසේ සිට අරවින්ද සිල්වා මහතාගේ නිවසට කපිල චන්ද්‍රසේන මහතාගේ ඇඳුම්, බෙහෙත් සහ බෙල්ට් පටිය ඇතුළත් බෑගය රැගෙන ගිය අරවින්ද ද සිල්වා මහතාගේ රියදුරන් දෙදෙනාගෙන්ද සාක්ෂි සටහන් කරගන්න ලදී.

වැඩිදුර සාක්ෂි විමසීම මැයි 19 වැනිදා දක්වා කල් තැබුණි.

ඇප ලබා පැමිණි කපිල චන්ද්‍රෙස්න මහතා ඇපකරුවන්ගේ ප්‍රශ්නයක් හේතුවෙන් යළි සිරගත වීමට සිදුවතිබීම සම්බන්ධයෙන් දැඩි අකමැත්තකින් පසුවූ බව ඔහුගේ ඥාති සොහොයුරු හිටපු ක්‍රිකට් ක්‍රීඩක අරවින්ද ද සිල්වා මහතා කොටුව මහේස්ත්‍රාත් අධිකරණය හමුවේ සඳහන් කළේය.

ඒ මියගිය කපිල චන්ද්‍රෙස්න මහතාගේ මරණය සම්බන්ධයෙන් මහේස්ත්‍රාත් පරීක්ෂණයේදී සාක්ෂි ලබාදෙමින්ය.

සැකකටයුතු ලෙස මියගිය ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන මහතාගේ මරණය සම්බන්ධයෙන් සිදුකෙරෙන විමර්ශන පිළිබඳ කොළඹ අපරාධ කොට්ඨාසය අද මුල්වරට කොටුව මහේස්ත්‍රාත් අධිකරණයට කරුණු වාර්තා කළේය.

එහිදි එම කොට්ඨාසයේ නිලධාරීන් කියාසිටියේ මේ වනවිට ප්‍රශ්නගත මරණය සම්බන්ධයෙන් වූ විමර්ශන කටයුතු කොළඹ අපරාධ කොට්ඨාසයට භාර දී ඇති බවය.

ඒ අනුව කපිල චන්ද්‍රසේනගේ මරණය සම්බන්ධයෙන් මෙතෙක් සිදුකළ විමර්ශන සම්බන්ධයෙන් වූ වැඩිදුර වාර්තාවක් සහ පශ්චාත් මරණ පරීක්ෂණයට අදාළ ඇමිණුම් දෙකක්ද විමර්ශන නිලධාරීන් අධිකරණයට ඉදිරිපත් කළේය.

එසේම අපරාධ ස්ථානයේ සිදුකළ විමර්ශනයට අදාළව තම භාරයට ගත් ඖෂධ වර්ග කිහිපයක්, මරණකරුගේ රුධිර සාම්පල දෙකක් නඩු භාණ්ඩ ලෙස අධිකරණයට ඉදිරිපත් කරන බව විමර්ශන නිලධාරීන් කියා සිටියේය.

මෙහිදී මහේස්ත්‍රාත් පසන් අමරසේන මහතා ප්‍රශ්න කළේ මරණකරුගේ ගෙලබැදි පටිය රජයේ රස පරීක්ෂකවරයාට යොමු කළේද යන්නයි.

ඊට පිළිතුරු දුන් විමර්ශන නිලධාරීන් කියා සිටියේ එයද නඩු භාණ්ඩයක් ලෙස නම්කර අද දින රජයේ රස පරික්ෂකවරයාට යොමු කිරීමට නියමිත බවය.

එහිදී මහේස්ත්‍රාත්වරයා පෙරළා ප්‍රශ්න කළේ මරණකරු එල්ලුණේ යැයි සැකකෙරෙන දොරෙහි ඉහළ පෘෂ්ඨයේ පළුදුවීමක් තිබුණේද යන්නයි.

ඊට පිළිතුරු දුන් විමර්ශන නිලධාරීන් කියා සිටියේ එවැනි පළුදුවීමක් දක්නට නොලැබුණු අතර එම පෘෂ්ඨය පරික්ෂා කිරීමේදී කෙදි සාම්පල කිහිපයක් ලබාගත් බවයි.

මරණකරුගේ IPhone 16 Pro Max වර්ගයේ දුරකථනය අධි ආරක්ෂිත දුරකථනයක් බැවින් මෙතෙක් එය විවෘත කරගැනීමට නොහැකි වූ බවද විමර්ශන නිලධාරීන් සඳහන් කළේය.

එහි ඇත්තේ මුහුණු ප්‍රවේශ ආරක්ෂිත ක්‍රමවේදයක් බවත්, මරණකරුගේ මෘත ශරීරයේ මුහුණට ලංකර එය විවෘත කිරීමට උත්සාහ කළද එය ආසාර්ථක වූ බවද විමර්ශන නිලධාරීන් කියාසිටියේය.

එබැවින් අදාළ දුරකථනය එහි මව් සමාගමට හෝ සුදුසු ආයතනයකට යොමුකර විවෘත කරවාගැනීමේ නියෝගයක් ලබාදෙන ලෙස විමර්ශන නිලධාරීන් අධිකරණයෙන් ඉල්ලීමක් කළේය.

ඒ අනුව කපිල චන්ද්‍රසේන මහතාගේ මරණය සම්බන්ධයෙන් වූ මහේස්ත්‍රාත් පරීක්ෂණයට අදාළව පළමුව සාක්ෂි ලබාදුන්නේ කපිල චන්ද්‍රසේන මහතාගේ බිරිඳ වන ප්‍රියංගා නියෝමාලි විජේනායකගේ වැඩිමහල් සොහොයුරිය වන ප්‍රියංගි අනුෂ්කා විජේනායකයි.

“ස්වාමිනි, මගේ සොහොයුරියයි, ඇගේ ස්වාමිපුරුෂයායි වෙන්වෙලා හිටියේ. නංගි ගිය අවුරුද්දේ අන්තිම කාලයේ වගේ ඉදලා දරුවන් දෙදෙනා එක්ක ඔස්ට්‍රේලියාවේ ඉන්නේ. කපිල අපේ නිවසට නිතරම යන එන කෙනෙක් නෙමෙයි. අවුරුදු 10ක වගේ කාලයක් තුළ 04 පාරක් වගේ අපේ නිවසට ඇවිල්ලා තියෙනවා. මට මතක විදිහට 2026 මැයි 06 බදාදා කපිල ඇප ලබාගෙන කෙළින්ම අපේ ගෙදරට ආවා. මට ‘හලෝ අනුෂ්කා’ කිව්වා. මම කාලද කියලා අහපුවාම නැහැ කිව්ව නිසා මම ආහාර ලබාදුන්නා. වෝටර් මෙලන් ජූස් 02ක්, වතුර වීදුරුවක් දුන්නාට පස්සේ ලම්ප් රයිස් බත් පැකට් එකක් කන්න දුන්නා. පස්සේ කිරී කෝපි එකකුත් හදලා දුන්නා. ඊට පස්සේ ගෙදර ගියා. පස්සේ ඊළඟ දවසේ සවස 04ට විතර කාර් එකෙන් ආයෙත් අපේ ගෙදරට ආවා. එයාගේ කාර් එකේ යතුර දුන්නා මට රියදුරුට කියලා ඒක එයාගේ ගෙදරට ගිහින් දාන්න කියලා. අරවින්ද ඒ වෙලාවේ ගෙදර හිටියේ නැහැ. පස්සේ එයත් ගෙදර ආවා. පස්සේ අරවින්දයි, මමයි ඇප තියන්න ආපු කිහිපදෙනත් එක්ක Lawyer හම්බෙන්න ගියා. අපි යද්දි කපිල අපේ ගෙදර පළවෙනි තට්ටුවේ පුටුවක හිටියේ. රෑ 10ට විතර අපි ආයෙත් ගෙදර ආපුවාම කපිල උඩ තට්ටුවේ ඉදලා පල්ලෙහාට බැස්සා. කපිල රෑට කෑවේ නැහැ. රාත්‍රී 11ට විතර මම පුතාත් එක්ක නිදාගන්න යන්න හදනකොට අරවින්ද මට කිව්වා කපිලට ඉන්න කාමරයක් ලෑස්ති කරලා දෙන්න කියලා. මම ගෙදර වැඩ කරන කෙනෙක්ට කියලා පළමු මහලේ ලොකු පුතාගේ කාමරය ලෑස්ති කරලා දුන්නා. පසුදින උදෑසන 7ට විතර මහත්තයා කිව්වා Lawyer ඇවිල්ලා ඉන්නේ තේ එකක් හදලා දෙන්න කියලා. මහත්තයා කපිලට කෝල් කරාට එයා Answer කරලා තිබුණේ නැහැ. පස්සේ දොරට තට්ටු කළාටත් ප්‍රතිචාරයක් තිබිලා නැහැ. පස්සේ ප්‍රියන්ත කියන Lawyer එක්ක මම උඩට ගිහින් දොර විවෘත කරන්න හැදුවා. නොඇරුණ නිසා ගෙදර වෙන තැනක තිබුණ  Master Key එක අරගෙන දොර ඇරියා. මම Lock එක ඇරියාට ඉස්සෙල්ලාම ඇතුළට ගියේ Lawyer. මම එක අඩියයි දොරෙන් ඇතුළට තිබ්බේ. ඇඳේ කවුරුත් හිටියේ නැහැ. කාමරේ තිබුණ පුටුව බාත් රූම් එක පැත්තට හරවලා තිබුණා. Lawyer කිව්වා අපි එළියට යමු කියලා.”

අනතුරුව මරණ පරීක්ෂණයට අදාළව සාක්ෂි ලබාදුන්නේ මියගිය කපිල චන්ද්‍රසේනගේ බිරිඳගේ සහෝදරියගේ සැමියා වූ අරවින්ද ද සිල්වා මහතායි.

“ඇප ලැබුණ දවසේ කපිල මට කතා කරලා කිව්වා ‘ලෝයර්ට කතා කරලා ඇප තියන්න මුදල් ලෑස්ති කරන්න’ කියලා. ඒ වගේම ‘එක් ඇපකරුවෙක් ඉන්නවා,තව දෙන්නෙක් අවශ්‍යයි’ කියලා. කොහොමහරි ‘ඉදිරිපත්කරපු ඇපකරුවන් දෙදෙනාට ග්‍රාමසේවා සහතික නැහැ’ කිව්වාට පස්සේ මම මට සමීප කපිලවත් දන්න තවත් ඇපකරුවන් දෙදෙනෙක් ඉදිරිපත් කරලා පසුදිනයේ ඇප ගත්තා. 07 වැනිදා උදේ කපිල මට Call කරලා ‘බොහෝම ස්තූතියි,කවුරුත් නැති වේලාවක ඕගොල්ලෝ විතරයි හිටියේ’ කිව්වා. පස්සේ මට දෙතුන් දෙනෙක් Msg දාලා තිබ්බා කපිලට ආයෙත් ප්‍රශ්නයක් කියලා. මම ආයෙත් කපිලට Call කරපුවාම කිව්වා ‘ආයෙත් උසාවි කේස් එකක්’ කියලා.  මම කිව්වා ‘අපේ ගෙදරට එන්න, ඇවිල්ලා Lawyer Mr. රියෙන්සි එක්ක කතා කරලා මොකක්ද කරන්න පුළුවන් බලමු’ කියලා. පස්සේ හවස අපි Lawyer ට කතා කරපුවාම ඔක්කෝම විස්තරය දැනගන්න ඕන නිසා ‘කපිලව ගෙදර තියලා ඇවිල්ලා හම්බෙන්න’ කිව්වා. අපි කපිලව අපේ ගෙදර තියලා Lawyerව හම්බෙන්න ගියා.  ඒ වෙද්දි කපිලව අත්අඩංගුවට ගැනීමට වරෙන්තුවක් නිකුත් වෙලයි තිබුණේ. Mr. රියෙන්සි කිව්වා ‘ඊළඟ දිනයේ කපිලව අධිකරණයට ඉදිරිපත් කරන්න අවශ්‍යයි. ප්‍රියන්ත කියලා Lawyer කෙනෙක්ව උදේට ගෙදරට එවන්නම්’ කියලා Number එක දුන්නා. මම ගෙදර ඇවිල්ලා lawyer ප්‍රියන්තට Call කළා. එයා කිව්වා ‘උදේ කපිලව එක්කගෙන යන්න එනවා. ඒ නිසා ගෙදර නොයා එයාට අපේ ගෙදරම ඉන්න කියන්න’ කියලා. ඊට පස්සේ කපිල මගේ ඉස්සරහාම එයාගේ ගෙදර වැඩකරන කෙනාට Call කළා. ‘බෙහෙත් වගයකුයි ඇඳුම් වගයකුයි ගෙන්නගන්න ඕනේ’ කිව්වා. තව ‘ජිම් මැට් එකක් තියෙනවා, ඒකත් එවන්න’ කිව්වා. ‘මම ඇහුවා කොහෙද මචං මේ වෙලාවේ ජිම් යන්න හදන්නේ?’ කියලා. එයා කිව්වා ‘නැහැ ඇඳුම් එල්ලගන්න ඕනේ’ කියලා. මම මගේ Driver ට කපිලගේ ගෙදරට ගිහින් ඒ ටික අරන් එන්න කිව්වා. මගේ Driver බඩු ටික ගෙනල්ලා මේසේ උඩ තිබ්බා. පස්සේ අපි දෙන්නා ටිකක් කතා කරකර හිටියා එතකොට කපිල කිව්වා ‘මම එළියට ඇවිල්ලා දවසයි, ආයෙත් මෙයාලා මාව ඇතුළට දාන්න හදනවා’ කියලා. ඇතුළට යන්න විශාල අකමැත්තක් ඔහුගෙන් මට තේරුණා. මම කිව්වා ‘වොරි වෙන්න එපා, අපි මේක ශෝට්අවුට් කරගමු’ කියලා. පස්සේ මම උඩට ගිහිල්ලා එයාට කාමරය පෙන්නුවා. AC එකත් දාලා මම කිව්වා ‘දැන් හොඳට රිලැක්ස් එකේ නිදාගන්න. අපි හෙට මේකට මුහුණ දෙමු’ කියලා. ඔය ඔක්කෝම වෙලා ඉවරවෙද්දි රෑ 12.30ට වගේ ඇති. උදේ 7යි ගාණකට Lawyer ගෙදරට ඇවිල්ලා Call කරද්දි මම ඇහැරුණා. කපිලට දෙපාරක් Call කළාට Answer කළේ නැහැ. කාමරයට ගිහින් දොරට තට්ටු කළා, එහා පැත්තේ කාමරයෙන් ගිහින් බාත් රූම් එක පැත්තෙනුත් තට්ටු කළා. එත් ප්‍රතිචාරයක් තිබුණේ නැහැ. පස්සේ මම පහළට ඇවිල්ලා Lawyer ට කිව්වා ‘කපිල ලෑස්තිවෙනවා ඇති’ කියලා. Wife ට කිව්වා ‘කපිලව ඇහැරවලා ඉක්මනට Lawyer එක්ක යවන්න’ කියලා. පස්සේ කපිලගෙන් ප්‍රතිචාරයක් නැති නිසා Wife සහ Lawyer Mastee Key එකෙන් දොර ඇරලා බලද්දි තමයි මේක දැකලා තියෙන්නේ”. 

මරණය සම්බන්ධයෙන් මහේස්ත්‍රාත් පරීක්ෂණයේ වැඩිදුර සාක්ෂි විමසීම ලබන 14 වනදා යළි පැවැත්වීමට නියමිතයි.

මේ අතර කපිල චන්ද්‍රසේන මහතාට ඇප තැබීම සඳහා ව්‍යාජ ඇපකරුවන් දෙදෙනෙකු සොයාදූන් බව කියන පුද්ගලයින් දෙදෙනෙකු අද කෙසෙල්වත්ත පොලිසිය මගින් කොළඹ මහේස්ත්‍රාත් අධිකරණය හමුවට ඉදිරිපත් කෙරුණි.

ඔවුන් දෙදෙනා හෙට දිනය දක්වා රක්ෂිත බන්ධනාගාරගත කිරීමටත්,එක් සැකකරුවකු හඳුනාගැනීමේ පෙරෙට්ටුවක් සඳහා ඉදිරිපත් කිරීමටත් මහේස්ත්‍රාත්වරයා නියෝග කළේය.

අසර්බයිජානයේ දී අත්අඩංගුවට ගනු ලැබූ මෙරට සංවිධානාත්මක අපරාධකරුවෙකු වන මනෝජ් සුරංග නොහොත් ‘බටුවත්තේ චාමර’ අද (10) රාත්‍රියේ දිවයිනට රැගෙන එනු ලැබීය.

සැකකරු ඉන්දියාව හරහා මෙරටට රැගෙන ආ බව වාර්තා වේ.

ඔහු රැගෙන ඒම සඳහා මෙරට පොලිස් කණ්ඩායමක් පසුගිය 7වනදා දිවයිනෙන් පිටත්ව ගොස් ඇති බව සඳහන්ය.