Category: gossip_main

පොදු ප්‍රවාහනයේ යෙදෙන රියදුරු හා කොන්දොස්තරවරුන් සඳහා අහඹු ජංගම මත්ද්‍රව්‍ය පරීක්ෂාවක් අද (23) නාවින්න බස් නැවතුමේදී සිදුකර තිබේ.

ප්‍රවාහන, මහාමාර්ග සහ නාගරික සංවර්ධන අමාත්‍යාංශයේ මෙහෙයවීමෙන් ක්‍රියාත්මක කර ඇති පොදු ප්‍රවාහන සේවාව ආරක්ෂිත හා කාර්යක්ෂම කිරීමේ ජාතික වැඩසටහන යටතේ මෙය ක්‍රියාවට නැංවිණි.

ජාතික ප්‍රවාහන වෛද්‍ය ආයතනයේදී සංවිධානයෙන් පැවැති මෙම ජංගම පරීක්ෂාවට ලංකා ගමනාගමන මණ්ඩලයේ සහ බස්නාහිර පළාත් මාර්ගස්ථ මගී ප්‍රවාහන අධිකාරියේ බස්රථවල සේවාවේ යෙදෙන රියදුරු, කොන්දොස්තරවරුන්ගේ මුත්‍රා සාම්පල් ලබා ගනිමින් පරීක්ෂණයට ලක් කෙරෙිණි.

උදෑසන 9ට ආරම්භ කර දහවල් 12 වන විට රියදුරු සහ කොන්දොස්තරවරුන් 200 දෙනෙකුගේ මුත්‍රා සාම්පල මෙහිදී පරීක්ෂාවට ලක් කර ඇති අතර ඉන් 13 දෙනෙකු මත්ද්‍රව්‍ය භාවිත කර ඇති බවද මෙහිදී හෙළිවිය.

අමාත්‍යාංශය පැවසුවේ 2026 ජනවාරි සිට ජූනි 12 දක්වා කාලය තුළ රියදුරු, කොන්දොස්තරවරුන් 4,322කු ජංගම පරීක්ෂාවට ලක් කර ඇති අතර එහිදී 226 දෙනෙකු අයිස්, හෙරොයින්, ගංජා යන මත්ද්‍රව්‍යවලින් එක්වර්ගයක් හෝ කිහිපයක් භාවිත කර ඇතැයි අනාවරණය වී ඇති බවය.

පුද්ගලයෙකුට වෘත්තිකයෙකු වීම දුෂ්කර කටයුත්තක් බවත්, “සාර්ථක වෘත්තිකයෙකු” වීම යනු මුදල් සම්භාරයක් උපයා ගැනීම පමණක් නොවන බවත් අගවිනිසුරු ප්‍රීති පද්මන් සූරසේන මහතා පවසයි.

ඒ මහතා මේ බව කියා සිටියේ ශ්‍රේෂ්ඨාධිකරණයේ අද (22) පැවැති නව නීතිඥවරුන් දිවුරුම් දීමේ නිල උත්සවය අමතමිනි.

නීති ක්ෂේත්‍රයට අලුතින් එක්වූ නවක සාමාජිකයින් වෙත අධිකරණයේ උණුසුම් සුබ පැතුම් පිරිනමමින් අගවිනිසුරුවරයා පෙන්වා දුන්නේ, වෘත්තිය තුළින් ලබාගන්නා දැනුම සහ සේවාදායකයින් වෙනුවෙන් ලබාදෙන ගුණාත්මක සේවය වෘත්තීය සාර්ථකත්වය මනින ප්‍රධාන නිර්ණායක වන බවයි.

අද දින දිවුරුම් දුන් සියලුම නීතිඥවරුන් අධිකරණයේ නිලධාරීන් වශයෙන් පිළිගැනෙන බවත්, ඔවුන් ඉදිරිපත් කරන කරුණු මත විශ්වාසය තබා අධිකරණය කටයුතු කරන බවත් අගවිනිසුරුවරයා සිහිපත් කළේය.

හොඳ නිපුණතාවයක් සහ කීර්තියක් සහිත පුද්ගලයන් පමණක් නීතිඥවරුන් වශයෙන් බඳවා ගත යුතු බවට පනතේ පවා පැහැදිලිව සඳහන්ව ඇති බව හෙතෙම අවධාරණය කළේය.

නීතිඥවරයෙකු ලෙස තමන්ගේ ප්‍රමිතිය උසස් මට්ටමක පවත්වාගෙන යාමට සැමට වගකීමක් ඇති බවත්, අද දින දිවුරුම් දුන් පිරිස දිගුකාලීනව මෙම උතුම් වෘත්තියේ ප්‍රමිතීන් ආරක්ෂා කර ගැනීමට කටයුතු කරනු ඇතැයි තමන් අපේක්ෂා කරන බවත් අගවිනිසුරුවරයා සඳහන් කළේය.

වෘත්තීය මෙන්ම වෘත්තීය නොවන බාහිර ජීවිතයේදී ද අවංකභාවය පවත්වා ගැනීම ඉතා වැදගත් බවත්, වෘත්තියේ ගරුත්වය රැඳී පවතින්නේ ඔවුන් හැසිරෙන ආකාරය මත බවත් ඒ මහතා පෙන්වා දුන්නේය.

මන්නාරම ප්‍රදේශයේ සිට දන්කොටුව බලා අධික වේගයෙන් ධාවනය වෙමින් තිබූ මෝටර් රථයක් අරච්චිකට්ටුව, සෙන්ගල්ඔය පාලම අසලදී පාරෙන් ඉවතට පැන වෙළෙඳසැලක ගැටීමෙන් සිදු වූ දරුණු අනතුරකින් වෙළෙඳසැල් හිමියා එම ස්ථානයේදීම ජීවිතක්ෂයට පත්ව තිබේ.

මෙම අනතුරින් අවාසනාවන්ත ලෙස මියගොස් ඇත්තේ ආරච්චිකට්ටුව ප්‍රදේශයේ පදිංචිව සිටි රාමසාමි ගෝවින්දසාමි නමැති පුද්ගලයෙකි.

අද (21) පස්වරුවේ මෙම අනතුර සිදුව ඇති අතර, අනතුර සිදුවන අවස්ථාවේදී මෝටර් රථය තුළ පුද්ගලයන් තිදෙනෙකු ගමන් කර ඇත.

ඔවුන් තිදෙනාම එම අවස්ථාවේදී අධික ලෙස බීමතින් සිටි බව අනතුර ඇසින් දුටු ප්‍රදේශවාසීන් ප්‍රකාශ කර තිබේ.

අනතුරින් වෙළෙඳසැල් හිමියා මියයාමත්, මෝටර් රථයේ සිටි පිරිස බීමතින් සිටීමත් හේතුවෙන් එම ස්ථානයට රැස්වූ ප්‍රදේශවාසීන් මෝටර් රථයේ සිටි පුද්ගලයන් තිදෙනාට පහර දී ඇති බව වාර්තා වේ.

පහරකෑමට ලක්ව තුවාල ලැබූ මෝටර් රථයේ සිටි පුද්ගලයන් තිදෙනා ප්‍රතිකාර සඳහා හලාවත මහා රෝහලට ඇතුළත් කර තිබේ.

සිද්ධිය සම්බන්ධයෙන් අරච්චිකට්ටුව පොලිස් ස්ථානයේ නිලධාරීන්  වැඩිදුර විමර්ශන කටයුතු සිදුකරනු ලබයි.

අම්පාර මහ රෝහලේ භෞත චිකිත්සකවරියගේ මරණය ගෙල සිරවීමකින් සිදුවූ මරණයක් බවට විමර්ශන නිලධාරින් සැක පළ කරයි.

මේ අතර මෙම ඝාතනය සිදුකළ බවට සැක කෙරෙන ඇයගේ පෙම්වතා සෙවීම සඳහා පොලිසිය මහජන සහාය පතන අතර තවමත් සැකකරු සොයාගැනීමට නොහැකිවී තිබේ.

කෙසේවෙතත් සැකකරු සම්බන්ධයෙන් තොරතුරු රැසක් අනාවරණ කරගැනීමට විමර්ශන නිලධාරින් සමත්ව ඇත.

ඒ අනුව මෙම සැකකරු මෙම තරුණිය ඉදිරියේ දිනෙත් දිසානායක නමින් පෙනී සිට ඇතත් ජාතික හැඳුනුම්පතේ සඳහන් ඔහුගේ සත්‍ය නම ජයසුන්දර මුදියන්සේලාගේ චම්පික ශ්‍රියාන් ජයසුන්දර බවත් ඔහු නාරම්මල ප්‍රදේශයේ පදිංචිකරුවෙකු බවත් පොලිසිය සඳහන් කරයි.

එසේම මෙම සැකකරු බොරු කොණ්ඩයක් පැලඳ සිය සත්‍ය පෙනුම වසන් කරගෙන සිට ඇති අතර ඔහුට තරුණියන් රැසක් සමඟ සම්බන්ධතා පැවති බවත් කාන්තාවන් රවටා මුදල් ලබාගැනීමේ සිද්ධි රැසකට මොහු සම්බන්ධ බවට ද තොරතුර වාර්තා වෙයි.

සැකකරුට එරෙහිව ගම්පහ, අලුත්කඩේ, තිස්සමහාරාමය සහ පාදුක්ක යන මහේස්ත්‍රාත් අධිකරණවල නඩු පවතින බවත් ඔහු පිළිබඳ අපරාධ පරීක්ෂණ දෙපාර්තමේන්තුවට ද  කාන්තාවන් රවටා මුදල් ලබාගැනීම් සම්බන්ධව පැමිණිලි ලැබී ඇති බව පැවසේ.

43 හැවිරිදි තිදරු පියෙක් වන සැකකරුගේ මෙම අපරාධ සඳහා ඔහුගේ බිරිඳ ද අධාර අනුබල දීම් සිදුකරන බවට පොලිසිය සැක පළ කරයි.

එමෙන්ම මෙම සැකකරු සැබැවින්ම මෘදුකාංග ඉංජිනේරුවරයෙක් ද යන්නත් සැක සහිත බවත් තරුණියන් රැවටීම සඳහා එවැන්නක් පවසන්නට ඇතැයි සැකකරන බව විමර්ශන නිලධාරින් කියයි.

සැකකරු සම්බන්ධයෙන් මේවන විට නුවරඑළිය කොට්ඨාසය භාර ජ්‍යෙෂ්ඨ පොලිස් අධිකාරී සමරකෝන් බණ්ඩා මහතාගේ සෘජු අධීක්ෂණය යටතේ කණ්ඩායම් තුනක් මගින් විමර්ශන ක්‍රියාත්මකය.

ලංකාව තුළ ඩෙංගු රෝගය ව්‍යාප්ත වන්නේ ඊඩිස් ඊජිප්ටයි සහ ඊඩිස් ඇල්බොපික්ටස් යන මදුරු විශේෂ දෙකෙන් පමණක් බව ජාතික ඩෙංගු මර්ධන ඒකකයේ කීට විද්‍යාඥ සකුන්තලා ජානකී මහත්මිය පවසයි.

ඉන් ඩෙංගු රෝගය ව්‍යාප්ත කරන ප්‍රධාන වාහකයා ඊඩිස් ඊජිප්ටයි බවත්, රට තුළ ඩෙංගු වසංගත තත්ත්වයක් ඇති වීමට පෙර සෑම විටම පාහේ මෙම මදුරු විශේෂයේ වර්ධනයක් නිරීක්ෂණය වූ බවද ඇය සඳහන් කළාය.

ඊඩිස් ඊජිප්ටයි මදුරු විශේෂයට දෂ්ඨ කිරීමේ ආවේණිකත්වයක් ඇති අතර, එය බහුවාර්ය භෝජන ලෙස හඳුන්වයි.

සාමාන්‍යයෙන් ගැහැණු මදුරුවෙකු තම ජීවන චක්‍රය ක්‍රියාත්මක කරවා ගැනීම සඳහා එක් අයෙකුගේ රුධිරය උරා බොනු ලැබූවද, ඊඩිස් ඊජිප්ටයි මදුරුවාගේ තත්ත්වය මීට වෙනස්ය.

කුඩා මිනිස් කණ්ඩායම් ගැවසෙන ප්‍රදේශවලදී, තමන්ට අවශ්‍ය රුධිර වේල සම්පූර්ණ කර ගැනීම සඳහා කෙටි කාලයක් ඇතුළත පුද්ගලයින් කිහිප දෙනෙකුගෙන් රුධිරය උරා බොන්න ඊඩිස් ඊජිප්ටයි මදුරුවා පෙළඹේ.

මෙම සුවිශේෂී හැසිරීම හේතුවෙන්, යම් හෙයකින් ඩෙංගු වෛරසය ආසාදනය වූ ඊඩිස් ඊජිප්ටයි මදුරුවෙකුට කෙටි කාලයක් තුළ පුද්ගලයින් කිහිප දෙනෙකුටම රෝගය සම්ප්‍රේෂණය කිරීමේ හැකියාවක් ඇත.

ඩෙංගු රෝග ව්‍යාප්තිය පාලනය කිරීමේදී මෙම තත්ත්වය ඉතා වැදගත් වන බැවින්, ඊඩිස් ඊජිප්ටයි මදුරුවාගේ ව්‍යාප්තිය පිළිබඳ නිරන්තරයෙන් දැඩි සැලකිල්ලක් දැක්විය යුතුවේ.