Category: gossip_sub

කළුතර සහ ඕමන්තේ ඝාතන දෙකට ආධාර අනුබල දුන් 5ක් අල්ලයි…..

මනුෂ්‍ය ඝාතන සිද්ධීන් දෙකකට ආධාර අනුබල ලබා දුන් සැකකරුවන් පස්දෙනෙකු පොලීසිය විසින් අත්අඩංගුවට ගෙන තිබේ.

සැකකරුවන් ඊයේ (07) දින අත්අඩංගුවට ගෙන ඇත්තේ කළුතර දිසා අපරාධ කොට්ඨාසය සහ ඕමන්ත පොලිසිය විසිනි.

ඒ අනුව පසුගිය මැයි 28 වැනි දින කළුතර දකුණ පොලිස් වසමේ වෙට්ටුටකය කලිල් ප්‍රදේශයේදී මෝටර් රථයකින් පැමිණි පිරිසක් විසින් යතුරුපැදියක සිටි පුද්ගලයෙකුට වෙඩි තබා ඝාතනය කෙරුණි.

එම සිද්ධිය සම්බන්ධව කළතුර දිසා අපරාධ කොට්ඨාසය විසින් ආරම්භ කර තිබූ විමර්ශනයක් අනුව ඊයේ උදෑසන වැලිපැන්න පොලිස් වසමේ වලගෙදර ප්‍රදේශයේදී අපරාධයට ආධාර අනුබල ලබා දුන් සැකකරුවෙකු කළුතර දකුණ පොලීසිය විසින් අත්අඩංගුවට ගෙන තිබේ.

අත්අඩංගුවට ගෙන ඇත්තේ 36 හැවිරිදි හම්බන්තොට ප්‍රදේශයේ පදිංචිකරුවෙකි.

සැකකරු සම්බන්ධයෙන් සිදුකරන ලද වැඩිදුර විමර්ශනයේදී අනාවරණය වී ඇත්තේ මතුගම, කළුතර, තිස්සමහාරාමය, වලස්මුල්ල සහ මොරවක මහේස්ත්‍රාත් අධිකරණ මගින් සැකකරුට එරෙහිව වරෙන්තු නිකුත්ව තිබූ බවය.

මේ අතර පසුගිය 6 වැනි දින රාත්‍රී කාලයේදී ඕමන්ත පොලිස් වසමේ නාවට්කුලම් ප්‍රදේශයේදි පුද්ගලයෙකුට තියුණු ආයුධයකින් පහරදී ඝාතනය කිරීමේ අපරාධය සම්බන්ධයෙන් ආධාර අනුබල දුන් සැකකරුවන් දෙදෙනකු හා සැකකාරියන් දෙදෙනෙකු ඕමන්ත පොලීසිය විසින් අත්අඩංගුවට ගෙන තිබේ.

අත්අඩංගුවට ගෙන ඇත්තේ අවුරුදු 17 හා 27 වයස්වල පසුවන පිරිමි පුද්ගලයින් දෙදෙනෙකු සහ 20 සහ 23 වයස්වල පසුවන සැකකාරියන් දෙදෙනෙකි.

ඔවුන් නාවට්කුලම්, ඕමන්ත ප්‍රදේශයේ පදිංචිකරුවන් බවද පොලීසිය සඳහන් කළේය.

සිද්ධීන් සම්බන්ධව කළුතර දකුණ පොලිස් ස්ථානය සහ ඕමන්ත පොලිස් ස්ථානය විසින් වැඩිදුර විමර්ශන පවත්වති..

හිටපු ඇමති චන්ද්‍රානිට එරෙහි නඩුවක වැඩිදුර සාක්ෂි විභාගයට දිනයක්…..

දූෂණ චෝදනාවක් සම්බන්ධයෙන් හිටපු අමාත්‍යවරියක වන චන්ද්‍රානි බණ්ඩාර මහත්මියට එරෙහිව අල්ලස් කොමිසම විසින් ගොනු කර තිබූ නඩුව අද (08) කොළඹ මහාධිකරණය හමුවේ කැඳවා තිබේ.

කොළඹ මහාධිකරණ විනිසුරු රවීන්ද්‍ර ප්‍රේමරත්න මහතා ඉදිරියේ මෙම නඩුව කැඳවා තිබුණි.

එහිදී නඩුවේ සාක්ෂි කාරියකගෙන් විත්තිය වෙනුවෙන් හරස් ප්‍රශ්න ඇසීම සිදුකර ඇත.

ඉන් අනතුරුව වැඩිදුර සාක්ෂි විභාගය ජුලි මස 09 වනදා දක්වා කල් තැබීමට අධිකරණය නියම කර තිබේ.

2019.01.14 වෙනිදා සහ 2019.01.31 කාලය අතර කාලසීමාව තුළ නිසි ක්‍රියාපටිපාටිය අනුගමනය නොකොට එච්.එම්. චන්ද්‍රවංශ නැමැතෙකුව වියළි කලාප සංවර්ධන අමාත්‍යාංශයේ ව්‍යාපෘති අධ්‍යක්ෂ ධූරයට පත් කිරීම සහ සිය හිතවතුන් පිරිසක් නීත්‍යානූකූල නොවන අකාරයට විවිධ තනතුරුවලට පත් කිරීම සඳහා එම අමාත්‍යංශයේ ලේකම්වරයා ඇතුළුව නිලධාරීන්ට බලපෑම් කිරීම තුළින් “දූෂණය” නමැති වරද සිදුකළේ යැයි චෝදනා කරමින් හිටපු අමාත්‍යවරියට එරෙහිව අල්ලස් කොමිසම විසින් මෙම අධි චෝදනා ගොනු කර තිබුණි.

තමන්ව අත්අඩංගුවට නොගන්නා ලෙස ඉල්ලා බුද්ධි අංශ සාමාජිකයෙකු ඉදිරිපත් කළ පෙත්සම කැඳවීමට දින දෙයි….

පාස්කු ඉරුදින ත්‍රස්ත ප්‍රහාරය සම්බන්ධයෙන් සිදු කරන විමර්ශනවලට අදාළව තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස රාජ්‍ය බුද්ධි සේවයේ හිටපු නිලධාරියකු වන කර්නල් කැලුම් මද්දුමගේ මහතා විසින් ඉදිරිපත් කර ඇති පෙත්සම වැඩිදුර සලකා බැලීම සඳහා ජුනි මස 22 වනදා කැඳවන ලෙස අභියාචනාධිකරණය අද (08) නියම කළේය.

මෙම පෙත්සම අද අභියාචනාධිකරණයේ සභාපති විනිසුරු රොහාන්ත අබේසූරිය සහ ප්‍රියන්ත ප්‍රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජෙනරාල් සුහර්ෂි හේරත් මහත්මිය විසින් මෙම පෙත්සම පවත්වාගෙන යාමට නොහැකි බව සඳහන් කරමින් මූලික විරෝධතා මතු කළාය.

ඉන් අනතුරුව අදාළ පෙත්සමේ වග උත්තරකරුවකු වශයෙන් නම්කර සිටි ජනාධිපති නීතිඥ උපුල් කුමරප්පෙරුම මහතා ද නීතිපතිවරයාගේ මූලික විරෝධතාව අනුමත කරමින් කරුණු ඉදිරිපත් කළේය.

ඉන් අනතුරුව මෙම මූලික විරෝධතාව පිළිබඳව පෙත්සම්කාර පාර්ශ්වයේ කරුණු දැක්වීම සඳහා මෙම නඩුකරය ජුනි මස 22 වනදා කැඳවන ලෙස අභියාචනාධිකරණය නියම කළේය.

ඉතියෝපියාවේදී පැහැරගැනුණු ලාංකිකයින් තිදෙනා නිරුපද්‍රිතව බේරා ගනියි….

ඉතියෝපියාවේදී පැහැරගැනීමකට ලක්වුණු ශ්‍රී ලාංකිකයින් තිදෙනෙකු සාර්ථකව බේරා ගැනීමට හැකිව තිබේ.

මෙම ලාංකිකයින් තිදෙනා රැකියා අවස්ථා සඳහා ඉතියෝපියාවට පැමිණ තිබුණු අතර එහිදී පැහැර ගැනීමකට ලක් තිබුණි.

එහිදී ශ්‍රී ලංකා තානාපති කාර්යාලය විසින් මෙම පැහැර ගැනීම සම්බන්ධව එරට බෝලේ හී උප නගර පොලිස් දෙපාර්තමේන්තුව වෙත වාර්තා කිරීමෙන් අනතුරුව පසුගිය මැයි 26 වැනි දින මේ සම්බන්ධව විමර්ශන ආරම්භ විය.

එහිදී අනාවරණය වී ඇත්තේ මෙම ශ්‍රී ලාංකිකයින් තිදෙනා අතුරුදන් වීමට දින කිහිපයකට පෙර ඉතියෝපියාවට පැමිණ ඇති බවය.

එහිදී පොලීසිය සියුම් නිර්ක්ෂණයන් සහ සිදුකර ඇති විමර්ශනවල ප්‍රතිඵලයක් ලෙස අදාළ ශ්‍රී ලාංකිකයින් ගුවන් තොටුපළින් රැගෙන ගොස් ඇති වාහනයක් පිළිබඳව තොරතුරු අනාවරණය කරගෙන තිබේ.

ඒ සම්බන්ධව වැඩිදුර විමර්ශනයේදී ඉතියෝපියාවේ ඔරොමියා කලාපයේ පිහිටි නගරයක් වන ෂෂෙමේන් හී නේවාසික නිවාසයක රඳවා ඇති බව අනාවරණය කරගෙන තිබේ.

ඒ අනුව සිදුකළ වැටලීමේදී මෙම ශ්‍රී ලාංකිකයින් තිදෙනා සාර්ථකව මුදා ගැනීමට එරට ආරක්ෂක අංශ සමත්වී ඇති අතර වැටලීමෙන් ඉතියෝපියානු ජාතිකයින් දෙදෙනෙකු සහ පාකිස්තාන ජාතිකයින් සිව් දෙනෙකු ඇතුළු සැකකරුවන් 6 දෙනෙකුද අත්අඩංගුවට ගෙන තිබේ.

මේ අතර මෙම ශ්‍රී ලාංකිකයින් නිදහස් කර ගැනීම සඳහා සැකකරුවන් පිරිස එක් අයෙකුගෙන් ඩොලර් 30,000 බැගින් ඩොලර් 90,000ක මුදලක්ද ඉල්ලා තිබුණි.

ඉතියෝපියානු ජාතික බුද්ධි හා ආරක්ෂක සේවය, ෆෙඩරල් පොලීසිය, තොරතුරු ජාල ආරක්ෂක පරිපාලනය සහ ඔරොමියා ප්‍රාදේශීය පොලීසිය විසින් සිදුකරන ලද ඒකාබද්ධ උත්සාහයකින් මෙම ලාංකිකයින් තිදෙනා නිරුපද්‍රිතව බේරා ගැනීමට හැකිව තිබේ.

රු. කෝටි 21 වටින ව්‍යාජ ඩොලර් නෝට්ටු තොගයක් සමඟ කාන්තාවක් අත්අඩංගුවට….

විදේශ රටකදී මුද්‍රණය කරන ලද ව්‍යාජ ඩොලර් 100 නෝට්ටු මිටි 60ක් (ඩොලර් 700000) සමඟ ශ්‍රී ලාංකික කාන්තාවක් මධ්‍යම අපරාධ විමර්ශන කාර්යාංශය විසින් අත්අඩංගුවට ගෙන තිබේ.

අද (08) පෙරවරුවේ කොටිකාවත්ත ප්‍රදේශයේ පිහිටි වයස අවුරුදු 53ක් වන සැකකාරියගේ නිවසේදී මෙලෙස අත්අඩංගුවට ගෙන තිබේ.

මෙම මුදල් තොගයේ රුපියල් වටිනාකම රුපියල් කෝටි 21ක් බව සඳහන් වේ.

මේ අතර මෙම මුදල් නෝට්ටු පිටරටකදී මුද්‍රණය කර මෙරටට ගෙන්වා ඇති බවට පොලීසිය සැකපළ කරන අතර මෙම ජාවාරමට පකිස්ථාන ජාතිකයෙකුද සම්බන්ධ බව පොලීසිය පවසයි.

මෙම ව්‍යාජ මුදල් නෝට්ටු ඩොලරයක් රුපියල් 284ක මුදලකට හුවමාරු කිරීමට සූදානම්ව සිට ඇති අතර මෙරට ව්‍යාපාරිකයන් රවටා මෙම ඩොලර් නෝට්ටු හුවමාරු කර ඇති බවද පොලීසිය පවසයි.

අත්අඩංගුවට ගත් සැකකාරිය හෙට (09) අලුත්කඩේ මහෙස්ත්‍රාත් අධිකරණය වෙත ඉදිරිපත් කිරීමට නියමිතය.

විමල්ගේ නඩුවක සාක්ෂිකරුවන්ගෙන් සාක්ෂි සටහන් කර ගනියි…..

අමාත්‍යවරයකු වශයෙන් කටයුතු කරමින් සිය නිත්‍යානුකූල ආදායම ඉක්මවා රුපියල් මිලියන 75කට අධික වත්කම් අයතා ලෙස අත්පත් කර ගැනීම සම්බන්ධයෙන් හිටපු අමාත්‍ය විමල් වීරවංශ මහතාට එරෙහිව අල්ලස් කොමිසම විසින් ගොනු කර තිබෙන නඩුව අද (08) කොළඹ මහාධිකරණය හමුවේ යළි විභාගයට ගත්තේය.

කොළඹ මහාධිකරණ විනිසුරු මොහොමඩ් මිහායිල් මහතා ඉදිරියේදී එම නඩුව කැඳවූ බව “අද දෙරණ” වාර්තාකරු පැවසීය.

මෙහිදී අල්ලස් කොමිසම වෙනුවෙන් පෙනී සිටි අතිරේක සොලිසිටර් ජෙනරාල් අසාද් නවාවී මහතාගේ මෙහෙයවීම යටතේ පැමිණිල්ලේ සාක්ෂිකරුවන් ගෙන් සාක්ෂි සටහන් කර ගැනීම සිදු වුණි.

ඉන් අනතුරුව වැඩිදුර සාක්ෂි විභාගය ජූනි මස 25 වනදා දක්වා කල් තැබුණි.

2010 වසරේ සිට 2014 වසර දක්වා කාලසීමව තුළ සිය නිත්‍යානුකූල ආදායම අභිබවා රුපියල් මිලියන 75කට අධික වත්කම් අත්පත් කර ගැනීම තුළින් අල්ලස් පනත යටතේ වරදක් සිදුකළ බවට චෝදනා කරමින් හිටපු අමාත්‍ය විමල් වීරවංශ මහතාට විරුද්ධව ඉකුත් යහපාලන රජය සමයේ අල්ලස් කොමිසම විසින් මෙම නඩුව ගොනුකර තිබුණි

බස් ගාස්තු ගැන ගැමුණුගෙන් අනාවැකියක්…..

ඉහළ ගිය ඉන්ධන මිල හේතුවෙන් දිවයින පුරා පෞද්ගලික බස් රථ ධාවනය බරපතළ අර්බුදයකට ලක්ව ඇති බවත්, බස් හිමියන්ගේ පාඩුව අවම කරගැනීම සඳහා ගමන් වාර සීමා කිරීමට පියවර ගනිමින් සිටින බවත් ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි.

මේ හේතුවෙන් පීඩාවට පත්ව සිටින බස් හිමියන්ට සහනයක් සැලසීමට රජය අපොහොසත් වුවහොත්, ලබන මාසයේ ක්‍රියාත්මක වීමට නියමිත වාර්ෂික බස් ගාස්තු සංශෝධනයේදී බස් ගාස්තු 20% කට ආසන්න ප්‍රමාණයකින් ඉහළ යා හැකි බවත්, එහිදී අවම බස් ගාස්තුව රුපියල් 35 ඉක්මවා යනු ඇති බවත් ඔහු පෙන්වා දෙයි.

බස් ධාවනය සම්බන්ධීකරණය කරනු ලබන්නේ පළාත් බද මාර්ගස්ථ මගී ප්‍රවාහන අධිකාරීන් මඟින් බැවින්, පවතින තත්ත්වය මත ගමන් වාර සංශෝධනය කිරීම සඳහා එම අධිකාරීන්ට සහ පළාත් සභාවලට ලිඛිතව දැනුම් දීමට කටයුතු කරමින් සිටින බව ගැමුණු විජේරත්න මහතා පවසයි.

මේ වන විටත් උතුරු සහ නැගෙනහිර පළාත් බලධාරීන්ට අදාළ ලිපි භාරදීමට කටයුතු සූදානම් කර ඇති බව ඒ මහතා වැඩිදුරටත සඳහන් කළේය.

අධිවේගයේ පින්නදූවෙන් පිටවෙන්න ගිය බස්රථය කණුවක ගැටි 10ක් රෝහලේ…..

දක්ෂිණ අධිවේගී මාර්ගයේ පින්නදුව පිවිසුම අසලදී අද (08) සවස සිදු වූ බස් රථ අනතුරකින් පුද්ගලයන් දස දෙනෙකු පමණ තුවාල ලබා තිබේ.

කොළඹ සිට ගාල්ල දෙසට ධාවනය වෙමින් තිබූ බස් රථයක්, පින්නදුව පිවිසුමේ ආරක්ෂිත ගේට්ටුවක් ද කඩාගෙන ගොස් අසල තිබූ කණුවක ගැටීමෙන් මෙම අනතුර සිදුව ඇත.

පොලීසිය සහ අධිවේගී මාර්ගයේ සේවක පිරිස එක්ව තුවාල ලැබූවන් කඩිනමින් ගාල්ල කරාපිටිය ශික්ෂණ රෝහලට ඇතුළත් කිරීමට පියවර ගෙන තිබේ.

අනතුරට හේතුව මෙතෙක් අනාවරණය වී නොමැති අතර, පින්නදුව අධිවේගී මාර්ග පොලීසිය මේ පිළිබඳව වැඩිදුර විමර්ශන සිදුකරයි.

නුවරඑළිය මහ නගර සභාවේ සිදුවූ මිලියන ගණනක ඩීසල් වංචාවක් ගැන හෙළිදරව්වක්……

පසුගිය දිට්වා ව්‍යසන කාලසීමාව තුළ ආපදා කළමනාකරණ කටයුතු වෙනුවෙන් කුලී පදනම මත ලබාගත් වාහනවලට ඩීසල් ලබා ගැනීම සඳහා මුදල් වෙන් කිරීමේදී රුපියල් මිලියන 9.2ක දැවැන්ත මූල්‍ය වංචාවක් සිදුවී ඇති බව එක්සත් ජාතික පක්ෂ නාගරික මන්ත්‍රී සුසන්ත ප්‍රියලාල් පලිහවඩන මහතා සහ නුවරඑළිය සුරැකීමේ සංවිධානය නියෝජනය කරමින් දිනේෂ් ලංකා ගීගනගේ මහතා පවසා තිබේ.

ඔවුන් මේ බව පවසා ඇත්තේ, නුවරඑළිය මහ නගර සභාව මගින් ඉන්ධන සඳහා මුදල් වෙන් කරමින් රුපියල් මිලියන 9.2ක මහා පරිමාණ මූල්‍ය වංචාව පිළිබඳ විධිමත් පරීක්‍ෂණයක් සිදු කරන ලෙස විගණකාධිපතිවරයාගෙන් සහ නුවරඑළිය දිස්ත්‍රික් පළාත් පාලන සහකාර කොමසාරිස් කාර්යාලයට ලිඛිතව පැමිණිලි කිරීමෙන් පසු මාධ්‍ය වෙත අදහස් දක්වමිනි.

සිද්ධිය පිළිබඳ වැඩිදුර අදහස් දැක්වූ නුවරඑළිය මහ නගර සභාවේ ඒකාබද්ධ විපක්ෂයේ නියෝජනය කරන එක්සත් ජාතික පක්ෂයේ නාගරික මන්ත්‍රී සුසන්ත ප්‍රියලාල් පලිහවඩන මහතා පවසා ඇත්තේ, පසුගිය වසර අගභාගයේදී ඇති වූ දිට්වා මගින් හානියට පත්වූ නුවරඑළිය නගරය මැදින් ගලා බසින තලගලඔය සංවර්ධන කටයුතු සඳහා බැකෝ ඇතුළු යන්ත්‍ර සූත්‍ර කුලී පදනම මත ලබා ගැනීමට සහ ඒවාට ඉන්ධන සැපයීමට නුවරඑළිය ප්‍රාදේශීය ලේකම්වරයාගේ අධීක්ෂණය යටතේ නුවරඑළිය මහ නගර සභාව විසින් සිදුකළ බවයි.

එහිදී රුපියල් ලක්ෂ විස්සක මුදලක් ප්‍රාදේශීය ලේකම්වරයා විසින් මහ නගර සභාවේ නිල බැංකු ගිණුම වෙත යොමු කර ඇති බවත් එම මුදල හැරුණු කොට අනෙක් මුදල් සියල්ලම වියදම් කර ඇත්තේ නුවරඑළිය මහ නගර සභාවේ මුදල්වලින් බවත් එම මුදල් වියදම් කිරීමට ආවරණ අනුමැතිය ලබා දී ඇත්තේ නුවරඑළිය මහ නගර සභාවේ නගරාධිපති උපාලි වනිගසේකර මහතාගේ මැදිහත්වීමෙන් බව ද ඔහු පවසා ඇත.

මෙලෙස යෙද වූ මුදල්වලින් මහා පරිමාණ මූල්‍ය වංචාවක් සිදුවී ඇති බවත්, ලක්ෂ අනූ දෙකකට වැඩි මුදලක් ඉන්ධන සඳහා වෙන්කලද ඒ මුදලට සරිලන පරිදි වැඩ කටයුතු සිදුවී නොමැති බවත් ඔහු පවසා තිබේ.

මේ අතර, ටෙන්ඩර් පටිපාටියකින් තොරව වාහන ලබාගෙන ඒ සඳහා අක්‍රමික ලෙස ඉන්ධන ලබාදීම පිළිබඳව අපක්ෂපාති විධිමත් පරීක්ෂණයක් සිදුකරන ලෙස ඔවුන් ඉල්ලා සිටින ලෙසද වැඩිදුර සඳහන් වෙයි.

විනිසුරුවරුන්ගේ විශ්‍රාම වයස ඉහළ නැංවීම සම්බන්ධයෙන් ශ්‍රී ලංකා නිදහස් නීතිඥ සංගමයෙන් නිවේදනයක්….

ආණ්ඩුක්‍රම ව්‍යවස්ථා සංශෝධනය මගින් අභියාචනාධිකරණ හා ශ්‍රේෂ්ඨාධිකරණ විනිසුරුවන්ගේ විශ්‍රාම වයස ඉහළ නැංවීමේ උත්සාහය සම්බන්ධයෙන් ශ්‍රී ලංකා නිදහස් නීතිඥ සංගමය නිවේදනයක් නිකුත් කර තිබේ.

අදාළ නිවේදනය මගින් ඔවුන් සඳහන් කර ඇත්තේ රජයේ මෙම යෝජනාවට සිය බලවත් විරෝධය සහ අප්‍රසාදය පළ කරන බවය.

ශ්‍රී ලංකා ආණ්ඩුක්‍රම ව්‍යවස්ථාව මගින් අභියාචනාධිකරණ හා ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස පිළිවෙළින් අවුරුදු 63 සහ 65 යවන සීමාව ව්‍යවස්ථා සංශෝධනයක් මගින් තවත් වසර දෙක බැගින් දීර්ඝ කිරීමට රජය ගන්නා උත්සාහය පිළිබඳව නිදහස් නීතීඥ සංගමයේ දැඩි අවධානයට යොමුව ඇති බවත් අදාළ නිවේදනයේ සඳහන් වේ.

අද වන විටත් ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවන් 08 දෙනෙකුගේ පුරප්පාඩු පවතින බවත් මෙම පුරප්පාඩු පිරවීම ජනාධිපතිවරයා විසින් දීර්ඝ කාලයත් පුරාවට පැහැර හැර ඇති බවත් නිදහස් නීතිඥ සංගමය චෝදනා කර තිබේ.

තමා වෙත ආණ්ඩුක්‍රම ව්‍යවස්ථාවෙන් පැවරී ඇති ව්‍යවස්ථාමය වගකීම පැහැර හැරීම ජනාධිපතිවරයාට එරෙහිව දෝශාභියෝග යෝජනාවක් ගෙන ඒමට පාදක කරගත හැකි බරපතළ ව්‍යවස්ථාමය වගකීමක් බවද පෙන්වා දෙන එම නීතිඥ සංගමය සඳහන් කර ඇත්තේ මේ වන විට ශ්‍රේෂ්ඨාධිකරණයේ සහ අභියාචනාධිකරණයේ නඩු රාශියක් ගොඩගැසී ඇති බවත් යුක්තිය පසඳලීම සඳහා විශේෂයෙන් නඩු කටයුතු ඉක්මන් කිරීම සඳහා අධිකරණයන්ට යටිතල පහසුකම් සැපයීම පුළුල් කළ යුතුවා සේම විනිශ්චයකාරවරුන්ගේ පුරප්පාඩු පුරවා නඩු විභාග කිරීම්ද කඩිනම්ක කළ යුතු බවය.

කෙසේ නමුත් මෙම ක්‍රියාමාර්ගයන් අමතක කර ශ්‍රේෂ්ඨාධිකරණ සහ අභියාචනාධිකරණ විනිශ්චයකාරවරුන්ගේ සේවා කාලය දිගු කිරීමෙන් නඩු ප්‍රමාද වීම වළක්වාලීමට නොහැකි බවද එම නීතිඥ සංගමය නිකුත් කළ නිවේදනයේ සඳහන් වේ.

මෙලෙස කළ යුතු කරුණු තිබියදී රජය විසින් විනිශ්චයකාරවරුන්ගේ විශ්‍රාම ගන්නා කාල සීමාව දීර්ඝ කිරීමට කටයුතු කිරීම යම් යටි අරමුණක් සහිතව කරනු ලබන ක්‍රියාවක් බවට බලවත් සැකයක් මතුවන බවත් පෙන්වා දෙන ශ්‍රී ලංකා නිදහස් නීතිඥ සංගමය සඳහන් කරනුයේ මේ තුළින්ම අධිකරණයේ ස්වාධීනතාවය පිළිබඳව ප්‍රශ්නාර්ථයක් නැගීමට මෙම ක්‍රියාව හේතුවන බවය.