Category: news_sub

ඩො.මි 2.5ක රජයේ මුදලක් අස්ථානගතවෙලාද ?

අමෙරිකානු ඩොලර් මිලියන 22.9ක ණය මුදලක් ගෙවීමට තිබූ රටකට, ණය පියවීමක් ලෙස මහා භාණ්ඩාගාරය විසින් ගෙවූ අමෙරිකානු ඩොලර් මිලියන 2.5ක මුදලක් කිසියම් පරිගණක හැකර්වරයෙකුට ගොස් ඇති බව වාර්තා වී තිබේ.

අද (22) පැවති කැබිනට් තීරණ දැනුම්දීමේ මාධ්‍ය සාකච්ඡාවේදී ඒ සම්බන්ධයෙන් මාධ්‍යවේදීන් ප්‍රශ්න කළේය.

එහිදි පිලිතුරු දෙමින් කැබිනට් ප්‍රකාශක අමාත්‍ය නලින්ද ජයතිස්ස මහතා පැවසුවේ ජනාධිපති නීතිඥ මෛත්‍රි ගුණරත්න මහතා විසින් මෙම කරුණු සම්බන්ධයෙන් යම් ලිපියක් කතානායකවරයාට ඉදිරිපත් කර ඇති බවය.

ඒ අනුව අදාළ කරුණු සම්බන්ධයෙන් සොයාබැලීමක් සිදුකර, විමර්ශනයක් සිදුකරනවද නැද්ද යන්න කතානායකවරයා විසින් තීන්දුවක් ගනු ඇති බව අමාත්‍යවරයා වැඩිදුරටත් පැවසීය.

ප්‍රශ්නය – ඩො.මි 2.5ක රජයේ මුදලක් අස්ථානගතවෙලාද ? විශේෂ තොරතුරක් ලැබිලා තියෙනවා රජයේ මුදල් අස්ථානගත වීමක් සම්බන්ධයෙන්. ඒකට අනුව ශ්‍රී ලංකා රජය 2025 සැප්තැම්බර් මාසේ අග වනවිට ඩොලර් මිලියන 22.9ක ණය මුදලක් ගෙවීමට තිබූ රටකට, ණය පියවීමක් ලෙස ඩොලර් මිලියන 2.5ක ණය මුදලක් මහා භාණ්ඩාරය 2025 දෙසැම්බර් සිට 2026 ජනවාරි 31 දක්වා කාලය තුල පියවලා තියෙනවා. 

හැබැයි මේ මුදල ගිහිල්ලා තියෙන්නේ අදාළ ණයකරුට නෙමෙයි. කිසියම් පරිගණක හැකර්වරයෙකුට. එතකොට මේ සම්බන්ධයෙන් දැන් මුදල් අමාත්‍යාංශයේ විදේශ විනිමය සම්පත් දෙපාර්තමේන්තුව විසින් පරීක්ෂණ කමිටුවකුත් පත් කරලා තියෙනවා මේ සම්බන්ධයෙන් හොයන්න.මුදල් අමාත්‍යාංශය සහ මහා භාණ්ඩාගාරය වගේ රටේ ආර්ථික වශයෙන් ඉතාමත් වැදගත් ආයතනයක මේ වගේ දෙයක් වුණේ කොහොමද? මේ සම්බන්ධයෙන් මුදල් යම් පාර්ශවයකට ගෙවන්න, මහා භාණ්ඩාගාර ලේකම්ගේ අනුමැතිය ලැබුනද?

පිළිතුර – “මම හිතන්නේ ඔබ කතා කරන්නේ ඔය ජනාධිපති නීතීඥ මෛත්‍රී ගුණරත්න මහතා, කතානායකතුමාට ඉදිරිපත් කරපු ලිපිය පදනම් කරගෙන වෙන්නට ඕනේ. මේ සම්බන්ධයෙන් මුදල් අමාත්‍යාංශය පැහැදිලි කිරීමක් කරයි. දැනට මේ ගැන තොරතුරු අපිට වාර්තා වෙලා නැහැ. මේ ලිපිය පමණයි මේකට පදනම් වෙලා තිබෙන්නේ. ඒ සම්බන්ධයෙන් ඉතාම ඉක්මනට මුදල් අමාත්‍යාංශය කරුණු පැහැදිලි කිරීමක් කරයි.”

ප්‍රශ්නය- මේ වෙනකොටත් මුදල් අමාත්‍යාංශය මේ සම්බන්ධයෙන් විමර්ශනයක් කරලා අධ්‍යක්ෂකවරුන් දෙදෙනෙක් සහ පරිගණක ක්‍රියාකරුවෙක් සහ තවත් කෙනෙක් වැඩතහනම් කරලා තියෙනවා. මෛත්‍රී ගුණරත්න මහතා ඉල්ලලා තියෙනවා විශේෂ පාර්ලිමේන්තු කමිටුවක් හරහා මේ සම්බන්ධව විමර්ශනයක් කරන්න කියලා. ඉල්ලීමක් කරලා තියෙනවා කථානායකවරයාගෙන්. මේ ඉල්ලීමට මොකක්ද රජයේ ප්‍රතිචාරය?

පිළිතුර – “මේ පිළිබඳ කරුණු හොයලා බලලා තමයි කතානායකවරයා තීන්දුව ගන්නේ. ඉතින් කතානායකවරයා තමයි ඒකට උත්තර දෙන්න ඕනේ.
පාර්ලිමේන්තුව හැටියට ඒ සම්බන්ධයෙන් විමර්ශනයක් කරනවද නැද්ද කියන එක. තවමත් තිබෙන්නේ මේ ලිපිය පමණයි මගේ අතේ. මේ පිළිබඳ වැඩි විස්තර මගේ ළඟ නැහැ.

මෙරට සර්වඥ ධාතූන් වහන්සේලා අමෙරිකාවට……

මෙරට බෞද්ධ ජනතාවගේ ඉමහත් ගෞරවයට හා වන්දනාමානයට පාත්‍ර වී ඇති ශ්‍රී සර්වඥ ධාතූන් වහන්සේලා කිහිපනමක්, අමෙරිකාවේ ටෙක්සාස්හි මහා විපස්සනා භාවනා මධ්‍යස්ථානය වෙත වැඩම කරවා වන්දනාමාන කිරීම හා ප්‍රදර්ශනය කිරීම සඳහා කැබිනට් අනුමැතිය හිමිව තිබේ.

ඒ අනුව ක්‍රි.පූ. 1-2 සියවස්වලට අයත් අම්පාර, ලාහුගල ප්‍රාදේශීය ලේකම් කොට්ඨාසයේ පිහිටා ඇති නීලගිරි ස්ථූප කැනීමෙන් අනාවරණ කර ගත් ධාතුන් වහන්සේලා,  තායිලන්තයෙන් ප්‍රදානය කළ ගංගාරාම විහාරස්ථානයේ තැන්පත් කර ඇති කේශ ධාතුන් වහන්සේලා හා මහියංගන රජමහා විහාරයේ තැනපත් කර ඇති සර්වඥ ධාතුන් වහන්සේලා මෙලෙස වැඩම කරවීමට නියමිතය.

එම සර්වඥ ධාතූන් වහන්සේලා මැයි 2වැනිදා සිට මැයි 10වැනිදා දක්වා ප්‍රදර්ශනය කිරීමට හා වන්දනාමාන කිරීමට කටයුතු සංවිධානය කර තිබේ.

ටෙක්සාස්හි මහා විපස්සනා භාවනා මධ්‍යස්ථානයේ රතනගුණ ස්වාමීන් වහන්සේ සහ පඤ්ඤාකර ස්වාමීන් වහන්සේ විසින් කරන ලද ඉල්ලීමකට අනුව, බුද්ධ ශාසන, ආගමික සහ සංස්කෘතික කටයුතු අමාත්‍යවරයා විසින් අදාළ යෝජනාව අමාත්‍ය මණ්ඩලය වෙත ඉදිරිපත් කර තිබුණි.

ත්‍රිකුණාමලය – මඩකලපුව මාර්ගයේ බස් රථයක් ගසක ගැටී අනතුරක්…..

ත්‍රිකුණාමලය – මඩකලපුව ප්‍රධාන මාර්ගයේ උප්පාරු ගඟ පාලම අසලදී පෞද්ගලික බස් රථයක් මාර්ගයෙන් ඉවතට පැන ගසක ගැටී අද (22) පස්වරුවේ අනතුරක් සිදුව තිබේ.

ත්‍රිකුණාමලයේ සිට මුතූර් දක්වා පොදු ප්‍රවාහනයේ යෙදී සිටි බස්රථයක්, ත්‍රිකුණාමලයේ සිට මුතූර් දක්වා ගමන් කරමින් සිටියදී මෙම අනතුර සිදුව ඇත.

අනතුරෙන් තුවාල ලැබූ මගීන් 20කට ආසන්න සංඛ්‍යාවක් මුතූර් මූලික රෝහලට ඇතුළත් කර ඇත.

ඔවුන්ගෙන් බරපතළ තුවාල ලැබූ සිව්දෙනෙකු ත්‍රිකුණාමලය මහ රෝහල ඇතුළත්කර ඇති අතර, ඉන් තිදෙනෙකු දැඩි සත්කාර ඒකකයට ඇතුළත් කර ඇති බව වාර්තාවේ.

තුවාල ලැබූ මගීන් තවත් කිහිප දෙනෙකු කින්නියා සහ මුතූර් රෝහල්වල ප්‍රතිකාර ලබන බව පොලීසිය පැවසීය.

අනතුර හේතුවෙන් පැය කිහිපයක් ගමනාගමනයට බාධා එල්ල වී තිබුණි.

සිද්ධිය සම්බන්ධයෙන් කින්නියා පොලීසිය වැඩිදුර පරීක්ෂණ පවත්වනු ලබයි.

සාම පාගමනේ ගමන් මග…..

අද (21) මෙරටට වැඩම කළ ‘Walk for Peace Program in Sri Lanka’ සාම පාගමනට නායකත්වය දුන් පූජ්‍ය පඤ්ඤාකර ස්වාමීන් වහන්සේ‌ ප්‍රමුඛ භික්ෂූන්වහන්සේ අද (21) පස්වරු 3.00ට ඓතිහාසික අනුරාධපුර ජය ශ්‍රී මහා බෝ සමිඳුන් අභියසදී මෙම සාම පා ගමනට ආශිර්වාද ලබා ගැනීම සිදු කෙරේ.

එහිදී අටමස්ථානාධිපති හිමියන් ප්‍රමුඛ මහා සංඝරත්නය විසින් ශ්‍රී මහා බෝධි අංකුරයක් පූජ්‍ය පඤ්ඤාකර ස්වාමීන් වහන්සේ‌ ප්‍රමුඛ භික්ෂූන්වහන්සේ වෙත පූජා කිරීමට නියමිතය.

එමෙන්ම, අද (21) පස්වරු 4.00ට ඓතිහාසික රුවන්වැලි මහා සෑය අභියස විශේෂ ආගමික වතාවත් සිදු කෙරේ.

අප්‍රේල් 22වන දා උදෑසන සංඝගත දක්ෂිණාවෙන් අනතුරුව දඹුල්ල පූජා නගරයෙන් ආරම්භ වන සාම පාගමන නාඋල, මාතලේ, මහනුවර, කඩුගන්නාව, කෑගල්ල, තෝලංගමුව, කජුගම, යක්කල, මහර, කැලණිය හරහා අප්‍රේල්  28වන දින නිදහස් චතුරස්‍රය වෙත ළඟා වීමට නියමිතය.

මෙම සාම පාගමනට එක්ව ලොව පුරා ආදරයට පත් ‘ආලෝකා’ (Aloka) සුනඛයා ද ඔවුහු සමග සිටියි.

සාම පාගමනේ නිමාව සනිටුහන් කරමින් එහි වැඩම කරවන ලද ශ්‍රී මහා බෝධීන්වහන්සේගේ අංකුරය ජනාධිපති අනුර කුමාර දිසානායක මහතා අතින් රාජ්‍යතාන්ත්‍රික වශයෙන් අමෙරිකාවේ සිට වැඩම කළ මහා සංඝරත්නය වෙත පූජා කිරීමට නියමිතය.

අනතුරුව ගෞරවනීය ස්වාමීන් වහන්සේලා පෙරහැරකින් ගංගාරාම විහාරස්ථානය වෙත වැඩම කරවන අතර එහිදී ජාතික මෝස්තර මධ්‍යස්ථානය විසින් පවත්වනු ලබන ‘ We are the Design’ වැඩසටහන ආරම්භ කිරීමට කටයුතු යොදා තිබේ.

ජනාධිපති ලේකම් කාර්යාලය, ක්ලීන් ශ්‍රී ලංකා ලේකම් කාර්යාලය, බුද්ධශාසන, ආගමික සහ සංස්කෘතික කටයුතු අමාත්‍යාංශය , රාජ්‍ය පරිපාලන, පළාත් සභා සහ පළාත් පාලන අමාත්‍යාංශය,  සහ රජයේ ප්‍රවෘත්ති දෙපාර්තමේන්තුව, ශ්‍රී ලංකා පොලිසිය  සහ ත්‍රිවිධ හමුදාව, ජාතික මෝස්තර මධ්‍යස්ථානය ඇතුළු රාජ්‍ය සහ පෞද්ගලික ආයතනයන්හි  පූර්ණ අනුග්‍රහය යටතේ මෙම සාම පා ගමන සංවිධානය කෙරේ.

ඉන්දීය යුද නෞකාවක් කොළඹට…..

ඉන්දීය නාවික හමුදාවට අයත් ‘INS NIREEKSHAK’ යුද නෞකාව ‘මිශ්‍ර වායු කිමිදුම් පුහුණු’ (Mixed Gas Diving Training) වැඩසටහනක් පැවැත්වීම සඳහා අද ( 21) උදෑසන කොළඹ වරායට පැමිණි ඇත.

ශ්‍රී ලංකා නාවික හමුදාව විසින් එම නෞකාව, නාවික හමුදා සම්ප්‍රදායානුකුලව පිළිගැනීම සිදුකර තිබුණි.

මෙලෙස කොළඹ වරායට පැමිණි Diving Support Vessel වර්ගයට අයත් ‘INS NIREEKSHAK’ නෞකාවේ අණදෙන නිලධාරී ලෙස කොමාණ්ඩර් Sailesh Kumar Tyagi කටයුතු කරනු ලබයි.

මෙම යුද නෞකාව දිවයිනේ රැඳී සිටින කාලය තුළ, ශ්‍රී ලංකා නාවික හමුදාව සමඟ එක්ව මිශ්‍ර වායු කිමිදුම් පුහුණු වැඩසටහනක් පැවැත්වීමට නියමිතය.

එමඟින් දෙරටේහි කිමිදුම් අංශයන්ගේ අත්දැකීම් හුවමාරුව සහ ශක්‍යතා වර්ධනය සඳහා අවස්ථාව සැලසීම අපේක්‍ෂා කෙරේ.

එමෙන්ම, එහි නැව් මුළුව දෙරටේ නාවික හමුදා අතර සුහදත්වය හා සහයෝගිතාව වර්ධනය කිරීම අරමුණින් සංවිධානය කර ඇති වැඩසටහන් කිහිපයකට සහභාගී වීමටත්, සංස්කෘතික වශයෙන් වැදගත් ස්ථාන කිහිපයක් නැරඹීම සඳහා සංචාරයන්හි නිරත වීමටත් නියමිතය.

2026 රාජ්‍ය වෙසක් උත්සවයේ නිල වැඩසටහන නිකුත් කෙරේ…..

2026 රාජ්‍ය වෙසක් උත්සවයේ නිල වැඩසටහන රාජ්‍ය පරිපාලන,ත පළාත් සභා සහ පළාත් පාලන අමාත්‍යාංශය විසින් නිකුත් කර තිබේ.

ශ්‍රී සම්බුදු තෙමඟුල සිහිකරමින් පැවැත්වෙන වෙසක් පුණ්‍යමහෝත්සවය මුල්කරගනිමින් මැයි 27 වැනි දින සිට ජුනි මස 02 දක්වා වෙසක් සතිය වශයෙන් පසුගිය මාර්තු 30 වැනි දින අමාත්‍ය මණ්ඩලය මගින් ප්‍රකාශයට පත් කෙරෙිණි.

ඒ අනුව සමස්ත ලංකා ශාසනාකරක්ෂක මණ්ඩලයේ මග පෙන්වීම අනුව බුද්ධශාසන ආගමකි හා සංස්කෘති කටයුතු අමාත්‍යාංශය හා බෞද්ධ කටයුතු පිළිබඳ දෙපාර්තමේන්තුව, දිස්ත්‍රික් ලේකම් කාර්යාලය හා ප්‍රාදේශීය ලේකම් කාර්යා ඇතුළු රාජ්‍ය හා රාජ්‍ය නොවන ආයතනවල සහය ඇතිව වෙසක් උත්සවය උත්කර්ෂවත් අයුරින් දිවයින පුරා පැවැත්වීමට කටයුතු යොදා තිබේ.

ශ්‍රී ලංකාවට දැවැන්ත ඖෂධ හිඟයක අවදානමක් – ශ්‍රී ලංකා ඖෂධ කර්මාන්ත මණ්ඩලය…..

ශ්‍රී ලංකාවේ අත්‍යවශ්‍ය සහ ජීවිතාරක්ෂක ඖෂධ සැපයුම බරපතළ අනතුරකට ලක්ව ඇති බවත්, එය වළක්වා ගැනීමට වහාම ප්‍රායෝගික පියවර ගන්නා ලෙසත් ශ්‍රී ලංකා ඖෂධ කර්මාන්ත මණ්ඩලය (SLCPI) රජයෙන් සහ අදාළ බලධාරීන්ගෙන් ඉල්ලීමක් කරයි.

ගෝලීය සහ දේශීය ආර්ථික සාධක රැසක් හේතුවෙන් ඖෂධ සැපයුම් දාමය මත එල්ල වී ඇති පීඩනය තවදුරටත් දරාගත නොහැකි මට්ටමකට පැමිණ ඇති බව එම මණ්ඩලය අවධාරණය කරයි.

ඉන්ධන මිල 38% කින් සහ භාණ්ඩ ප්‍රවාහන ගාස්තු 40% කට වඩා ඉහළ ගොස් ඇති බැවින් ඖෂධ අමුද්‍රව්‍යවල ගෝලීය මිල ඇතැම් අවස්ථාවල 70% දක්වා ඉහළ ගොස් ඇති බව සඳහන් වේ.

රුපියල අවප්‍රමාණය වීම නිසා ආනයන පිරිවැය දැඩි ලෙස ඉහළ ගොස් ඇති බව ඔවුන් පෙන්වා දෙයි.

ආනයන බලපත්‍ර අලුත් කිරීමේ ප්‍රමාදය සහ මිල සමාලෝචන ක්‍රියාවලියේ පවතින ගැටලු හේතුවෙන් ඖෂධ නියමිත වේලාවට වෙළෙඳපොළට නිකුත් කිරීමට නොහැකි වී ඇති බව සඳහන් වේ.

මෙය හුදෙක් කර්මාන්තයට පමණක් සීමා වූ ගැටලුවක් නොව ජාතික ආරක්ෂාව පිළිබඳ ප්‍රශ්නයක් බව මණ්ඩලය පවසයි.

වහාම පියවර නොගතහොත්, රජයේ සහ පෞද්ගලික රෝහල්වල ඖෂධ හිඟය උග්‍ර වනු ඇති අතර රෝගීන්ට අත්‍යවශ්‍ය ප්‍රතිකාර ප්‍රමාද වීම හෝ අඩාල වීම සිදුවනු ඇති බව සඳහන් වේ.

ඖෂධ සැපයුම ස්ථාවර කිරීම සඳහා SLCPI පහත පියවර වහාම ගන්නා ලෙස යෝජනා කර තිබේ.

ආනයන බලපත්‍ර ක්‍රියාවලියේ පවතින ප්‍රමාදයන් වහා විසඳීම.

පිරිවැය ඉහළ යාමට සාපේක්ෂව විනිවිදභාවයකින් යුත් මිල සමාලෝචන ක්‍රමවේදයක් සකස් කිරීම.

සැපයුම් දාමයේ අඛණ්ඩතාව රැක ගැනීම සඳහා නියාමකයන් සහ ප්‍රතිපත්ති සම්පාදකයන් එක්ව කටයුතු කිරීම.

“අද පවතින මෙම පීඩනය හෙට ජාතික ඖෂධ හිඟයකට හැරෙන්නට පෙර, සියලුම අදාළ පාර්ශව මෙම ගැටලුව උපරිම හදිසිතාවයකින් සලකා බැලිය යුතුයි,” යනුවෙන් SLCPI සිය නිවේදනය මගින් අවසන් වශයෙන් අවධාරණය කර සිටී.

අප්‍රේල් ගෙවුණු දින 19ට සංචාරකයින් 88,211ක් මෙරටට ඇවිත්……

අප්‍රේල් මාසයේ මුල් දින 19 තුළදී ශ්‍රී ලංකාවට සංචාරකයින් 88,211ක් පැමිණ ඇති බව ශ්‍රී ලංකා සංචාරක සංවර්ධන අධිකාරිය පවසයි.

නිකුත් කළ නවතම දත්ත අනුව, එම කාලය තුළ ඉන්දියාවෙන් සංචාරකයින් 25,634ක් පැමිණ ඇති අතර, එය සමස්තයේ 29%ක් වේ.

එමෙන්ම, රුසියාවෙන් 4,682ක්, ජර්මනියෙන් 4,030ක්, එක්සත් රාජධානියෙන් 7,672ක්, චීනයෙන් 6,333ක් සහ ඔස්ට්‍රේලියාවෙන් 7,351ක් ද මෙම කාලය තුළ ශ්‍රී ලංකාවට පැමිණ ඇත.

තවද, 2026 ජනවාරි 01 සිට අප්‍රේල් 19 දක්වා සමස්ත සංචාරක පැමිණීම් සංඛ්‍යාව 828,845ක් ලෙස වාර්තා වී තිබේ.

ඒ අතරින් ඉන්දියාවෙන් 172,907ක්, රුසියාවෙන් 70,600ක් සහ එක්සත් රාජධානියෙන් 86,092ක් සංචාරකයින් පැමිණ ඇති බවද එම අධිකාරිය සඳහන් කළේය.

නීතිවිරෝධීව මෙරට රැඳී සිටි විදේශිකයින් 50ක් අත්අඩංගුවට…..

ව්‍යාපාරික වීසා බලපත්‍ර යටතේ මෙරටට පැමිණ එම වීසා කල් ඉකුත් වූ පසුද නීති විරෝධීව මෙරට රැඳී සිටි විදේශිකයින් 50 දෙනෙකු ආගමන විගමන දෙපාර්තමේන්තුවේ විමර්ශන අංශයේ නිලධාරීන් පිරිසක් විසින් අද (21) පස්වරුවේ අත්අඩංගුවට ගෙන තිබේ.

එම විදෙස් ජාතිකයින් අතරට චීන ජාතිකයින් 47, මැලේසියානු ජාතිකයින් 02 සහ එක් ඉන්දීය ජාතිකයෙකුද අයත් වේ.

මොවුන් මීගමුව ප්‍රදේශයේ නිවසක රැඳී සිටියදී ආගමන විගමන දෙපාර්තමේන්තුවේ බුද්ධි ඒකකයට ලද තොරතුරක් මත ආගමන විගමන පාලක ජනරාල්වරයාගේ උපදෙස් මත සැකකරුවන් පිරිස අත්අඩංගුවට ගෙන ඇත.

අත්අඩංගුවට ගත් විදේශිකයින් පිරිස මේ වන විට වැලිසර රැඳවුම් මධ්‍යස්ථානයේ රඳවා තබා ඇති අතර ඔවුන් කඩිනමින් මෙරටින් පිටුවහල් කිරීමටද නියමිතය.

එක්සත් රාජධානියේ මහ කොමසාරිස් සහ ඇමති අරුණ කරුණාතිලක අතර සාකච්ඡාවක්…..

එක්සත් රාජධානියේ මහ කොමසාරිස් ඇන්ඩෘ පැට්‍රික් මහතා සහ වරාය, සිවිල් ගුවන්සේවා සහ බලශක්ති අමාත්‍ය අනුර කරුණාතිලක මහතා අතර විශේෂ සාකච්ඡාවක් පවත්වා තිබේ.

මෙම සාකච්ඡාවේදී වරාය සහ ගුවන්තොටුපළ සංවර්ධන කටයුතු සඳහා රාජ්‍ය මෙන්ම පෞද්ගලික හවුල්කාරීත්වය ලබා දීමට මහ කොමසාරිස්වරයා එකඟතාව පළ කර ඇත.

එමෙන්ම ගුවන්තොටුපළ මෙහෙයුම් සඳහා නවීන තාක්ෂණික උපකරණ, ගුවන් අවකාශ කළමනාකරණය ආදී අත්‍යවශ්‍ය කරුණු වෙනුවෙන් විදේශ ආයෝජන සහ විශේෂඥ සහාය ලබා දීමටද හැකි බව ඔහු මෙහිදී පවසා තිබේ.

මෙහිදී අදහස් දක්වමින් අමාත්‍ය අනුර කරුණාතිලක මහතා පැවසුවේ වරාය කටයුතු ගැන සැලකීමේදී දැනටමත් වරාය පර්යන්ත කිහිපයක් පෞද්ගලික හවුල්කාරිත්වය ඇතිව මෙහෙයුම් කටයුතු සිදුකරගෙන යන බවය.

එමෙන්ම හම්බන්තොට වරාය ද වෙනස් ආකෘතියකින් පවත්වාගෙන යන බවත් ඉදිරි අලුත් පර්යන්ත මෙහෙයුම් සඳහා පෞද්ගලික හවුල්කාරීත්වය සොයමින් සිටින බවද අමාත්‍යවරයා මෙහිදී සඳහන් කළේය.

එහිදී මහකොමසාරිස්වරයා පවසා ඇත්තේ කොළඹ වරාය ලෝක මට්ටමේ සම්පත් තිබෙන ස්ථානයක් බවත්, දැනට තිබෙන වසර 15ක ඉදිරි සැලසුම් ඉතා ආකර්ෂණීය බවත්ය. එමෙන්ම ගුවන්තොටුපළ සඳහා ද ඇති සංවර්ධන ව්‍යාපෘති දිගුකාලීන සැලැස්මකට අනුව සිදුවන බැවින් ඊට සිය සතුට පළකරන බව ද ප්‍රකාශ කළේය.

තවද කොළඹ වරාය වාණිජ වරායක් වූවද සංචාරක කර්මාන්තයක් ලෙස සංවර්ධනය කිරීමට උදව් කළ හැකි බව ද මහකොමසාරිස්වරයා මෙහිදී පෙන්වා දුන්නේය.

සාකච්ඡාව අවසානයේ අමාත්‍යවරයා යුරෝපීය රටවල් ඇතුළු විදේශ ආයෝජකයින් සමඟ හවුල්කාරීත්වය වැඩි කර ගැනීමට සූදානම් බවත් එමඟින් ජාත්‍යන්තර සහයෝගීතාවයන් වැඩි දියුණුව ද වඩා හොඳ ආර්ථක ප්‍රතිලාභයන් ලබා ගැනීමට ද ඉලක්කය වන බවද සඳහන් කළේය.

මෙම සාකච්ඡාව සඳහා එක්සත් රාජධානියේ නියෝජ්‍ය මහ කොමසාරිස් තෙරේසා ඕ මහෝනි  (Theresa O Mahany) මහත්මිය ද, වරාය සහ සිවිල් ගුවන්සේවා නියෝජ්‍ය අමාත්‍ය ජනිත රුවන් කොඩිතුවක්කු මහතා ද සහභාගී වූහ.