සැප්තැම්බර් මස මුලදී ත්රස්තවාදය වැළැක්වීමේ පනත අහෝසි කරන කෙටුම්පත ගැසට් කිරීමට කටයුතු කරන බව විදේශ අමාත්ය විජිත හේරත් මහතා පවසයි.
අද (22) පාර්ලිමේන්තුවේදී අදහස් දක්වමින් ඔහු මේ බව සඳහන් කළේය.
“ත්රස්තවාදය වැළැක්වීමේ පනත අහෝසි කරනවා කියන එක අපේ ප්රතිපත්ති ප්රකාශයේ පැහැදිලිව සඳහන් වෙන දෙයක්. සැප්තැම්බර් මුල වෙනකොට ත්රස්තවාදය වැළැක්වීමේ පනත අහෝසි කරන කෙටුම්පත ගැසට් කරන්න අපි කටයුතු කරනවා.”
වර්ජනයේ නිරත තැපැල් සේවකයින්ට මෙම මස වැටුප් නොගෙවන බව තැපැල්පති රුවන් සත්කුමාර මහතා පවසයි.
ලිපියක් යොමුකරමින් වර්ජනයේ නිරත සේවකයින්ට ඔහු දන්වා ඇත්තේ, මාසික වැටුප අවශ්යනම් වහාම සේවයට වාර්තා කරන ලෙසය.
වර්ජනයේ නිරත වෘත්තීය සමිති ද ලිඛිතව මේ සම්බන්දයෙන් දැනුම්වත් කළ බව හෙතෙම වැඩිදුරටත් පැවසීය.
මේ අතර තැපැල්පති රුවන් සත්කුමාර මහතා පවසා සිටියේ, වර්ජනය හේතුවෙන් රුපියල් මිලියන 140ක පමණ පාඩුවක් මේ වනවිට සිදුව ඇති බවය.
කෙසේ වෙතත් මධ්යම තැපැල් හුවමාරුවේ ගොඩගෑසී තිබූ තැපැල් මලු බෙදාහෑරීමේ කටයුතු සිදුකරන බව ඔහු පවසයි.
වැඩිදුරටත් අදහස් දැක් වූ තැපැල්පති රුවන් සත්කුමාර මහතා,
“වැටුප් ගෙවීමට මහා භාණ්ඩාගාරයෙන් අපට මුදල් ලැබෙන්න ඕන. මට දැනුම්දී තිබෙනවා වර්ජනය කරන අතර තුර වැටුප් ගෙවීම සඳහා මුදල් නිකුත්කිරීමක් සිදුවෙන්නේ නැතිවෙයි කියලා.
ඒ නිසා සේවයට වාර්තා කල අයට විතරක් මුදල් ලැබෙන්න ඉඩ තියෙනවා. වර්ජනය කරන අයටත් දැනුම්දුන්නා අද සේවයට වාර්තා කරන්න කියලා” යනුවෙන් පැවසීය.
හම්බන්තොට සූරියවැව වැවේගම කැළෑබද ප්රදේශයකදී STF නිලධාරීන් සමග සිදුවූ වෙඩි හුවමාරුවකදී සැකකරුවෙකු මියගොස් තිබේ.
අදාළ සැකකරු වෙඩිවැදීමෙන් තුවාල ලබා රෝහල්ගත කිරීමේදී මෙලෙස මියගොස් ඇති බව වාර්තා වෙයි.
වෙඩි හුවමාරුවේදී තුවාල ලැබූ STF නිලධාරියෙකු ද සූරියවැව රෝහලට ඇතුළත් කර තිබේ.
අදාළ ස්ථානයේ සැකකරුවන් දෙදෙනෙකු රැඳීසිට ඇති අතර වෙඩි හුවමාරුව අතරතුර එක් සැකකරුවෙකු පලාගොස් ඇති බවද වාර්තා වෙයි.
වෙඩි හුවමාරුව අතරතුර සැකකරුවන් විසින් අත්බෝම්බයක් ද නිලධාරීන් දෙසට එල්ලකර තිබේ.
වෙඩිවැදීමෙන් මියගිය සැකකරු පසුගියදා කොස්ගොඩදී සිදුකළ වෙඩිතැබීමේ සැකකරුවෙකු බවට පොලීසිය සැක පළකරයි.
සිද්ධිය සම්බන්ධයෙන් ඉදිරි විමර්ශන ක්රියාත්මකය.
හිටපු ජනාධිපති රනිල් වික්රමසිංහ මහතා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.
ඒ අපරාධ පරීක්ෂණ දෙපාර්තමේන්තුව විසින් ඒ මහතා සම්බන්ධයෙන් සිදුකරන විමර්ශනයකට අදාළව ප්රකාශයක් ලබාදීම සඳහා අද (22) පෙරවරුවේ අපරාධ පරීක්ෂණ දෙපාර්තමේන්තුවට පැමිණි අවස්ථාවේ දීය.
හිටපු ජනාධිපති රනිල් වික්රමසිංහ මහතා සිය ධුර කාලයේදී රජයේ මුදල් භාවිත කරමින් පෞද්ගලික සංචාරයක් ලෙස සිය බිරිඳ වන මහාචාර්ය මෛත්රී වික්රමසිංහ මහත්මියගේ උපාධි ප්රදානෝත්සවයක් සඳහා සහභාගි වීමට ලන්ඩනයට යාම සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබුණි.
ඊට අදාළව අපරාධ පරීක්ෂණ දෙපාර්තමේන්තුව කොටුව මහෙස්ත්රාත් අධිකරණයට කරුණු දක්වනු ලැබුවේ, ජුනි 24 වෙනි දා ය.
අනතුරුව එම විමර්ශනයට අදාළව හිටපු ජනාධිපති රනිල් වික්රමසිංහ මහතාගේ පෞද්ගලික ලේකම් ලෙස කටයුතු කළ සැන්ඩ්රා පෙරේරා මහත්මියගෙන් ද, හිටපු ජනාධිපති ලේකම් සමන් ඒකනායක මහතාගෙන් ද අපරාධ පරීක්ෂණ දෙපාර්තමේන්තුව ප්රකාශ සටහන් කර ගත්තේය.
එවැනි පසුබිමක එම විමර්ශනයට අදාළව ප්රකාශ ලබාගැනීමට හිටපු ජනාධිපති රනිල් වික්රමසිංහ මහතා අද අපරාධ පරීක්ෂණ දෙපාර්තමේන්තුවට කැඳවා තිබූ අතර පෙරවරු 9යට පමණ ඔහු එම ස්ථානයට පැමිණියේය.
ඇපල් සමාගම විසින් iPhone 17 Pro Max ජංගම දුරකථනය සැප්තැම්බර් මස මුලදී වෙළෙඳපොළට නිකුත් කිරීමට නියමිත බව විදෙස් වාර්තා සඳහන් කරයි.
ගෙවුණු වසරේ iPhone 16 දුරකථන මාලාව නිකුත් කිරීමෙන් පසුව, මෙම iPhone 17,iPhone 17 Pro සහ iPhone 17 Pro Max ඇතුළු iPhone 17 මාලාව ඉක්මනින් වෙළෙඳපොළට නිකුත් කිරීම ආරම්භ කෙරුණි.
මෙම iPhone 17 Pro Maxහි ඇති විශේෂාංග පිළිබඳව නිල වශයෙන් තවමත් සඳහන් කර නොමැත.
මේ අතර ඇපල් සමාගමේ iPhone 17 මාදිලිය ඉන්දියාව තුළ එකලස් කිරීමට නියමිත බව ද විදෙස් මාධ්ය වාර්තා කරයි.
ඒ වෙනුවෙන් ඉන්දීය කර්මාන්ත ශාලා 5ක් සුදානමින් ඇති බවත්, මෙය ඉන්දියාව තුළ iPhone නිෂ්පාදනයක් ලෙස එක්ලස් කිරීමේ කටයුතු සිදුකරන පළමු අවස්ථාව ලෙසත් විදෙස් මාධ්ය පෙන්වා දෙයි.
ජාතික පොලිස් කොමිෂන් සභාවේ සාමාජික ධුරයක ඇතිවී තිබෙන පුරප්පාඩුව පිරවීම සඳහා සුදුසුකම් ලත් තැනැත්තන්ගෙන් අයැදුම්පත් කැඳවීම ආරම්භ කර තිබේ.
ඒ සඳහා වූ අයදුම්පත්ර, ශ්රී ලංකා පාර්ලිමේන්තු වෙබ් අඩවියෙහි www.parliament.lk ‘ජාතික පොලිස් කොමිෂන් සභාවේ සාමාජික ධුරයට පත්කිරීම’ නමැති ක්ෂණික සබැඳි යටතේ පළකර ඇත.
එම ආකෘතිය අනුව සකස් කර, සම්පූර්ණ කරන ලද අයදුම්පත්ර 2025 සැප්තැම්බර් 04 දින හෝ එදිනට පෙර යොමුකළ යුතු බව පාර්ලිමේන්තු මහ ලේකම් කාර්යාලය පවසයි.
අදාළ අයැදුම්පත්ර,ආණ්ඩුක්රම ව්යවස්ථා සභාවේ වැඩබලන මහ ලේකම්, ආණ්ඩුක්රම ව්යවස්ථා සභා කාර්යාලය, ශ්රි ලංකා පාර්ලිමේන්තුව, ශ්රි ජයවර්ධනපුර, කෝට්ටේ, යන ලිපිනයට ලියාපදිංචි තැපෑලෙන් හෝ constitutionalcouncil@parliament.lk යන විද්යුත් ලිපිනයට යොමු කළ යුතු බව පාර්ලිමේන්තු මහ ලේකම් කාර්යාලය සඳහන් කරයි.
ලියුම් කවරයේ ඉහළ වම් කෙළවරේ/ විද්යුත් ලිපියෙහි විෂය වශයෙන් ‘ජාතික පොලිස් කොමිෂන් සභාවේ සාමාජික ධුරයට පත්කිරීම’ යනුවෙන් සඳහන් කළයුතුය.
සබැඳිය: https://www.parliament.lk/si/secretariat/advertisements/view/336
සමාජ මාධ්ය වල සිදු කරනවා කියන අසත්ය ප්රචාර පිලිබදව හිටපු ජනපති මහින්ද රාජපක්ෂ වෙනුවෙන් ඔහුගේ මාධ්ය ප්රකාශක නීතිඥ මනෝජ් ගමගේ මහතා විශේෂ ප්රකාශක් නිකුත් කරයි…
වැව් බැඳි රටේ ලෙංගතු මිනිසුන්ගේ කෘතවේදීත්වය අසීමිතව වින්දෙමි. මහින්ද රාජපක්ෂට ජනතාවගේ ආදරය මිස අන් කිසිවක් අවශ්ය නැත. ග්රාමීයව හැදී වැඩුණු අපට මෙම පුරුදු හුරුය. අප අස්වැනේ මුල් කොටස පූජා කරන්නේ බුදුන්ට, දෙවියන්ටය. අසල්වැසියන් අතරේද තම මුල් අස්වැන්නෙන් කොටසක් බෙදා ගන්නේ සුහදතාව වර්ධනය කර ගැනීමටය. ගෙවත්තේ ඇති ගසේ එලදාවෙන් කොටසක් හිතවතුන් සමඟ බෙදා ගන්නේ ද ලෙංගතුකම නිසාය. අතීත ශ්රේෂ්ඨ රාජධානියක ගෞරවනීය කෘෂි ජනතාවගේ සමීපතමයෙක් වීමට ලැබීම මට මහත් ගෞරවයකි. ජනතා නායකයෙක් ලෙස ජනතාවගේ ආදරය තරම් වටිනා වෙනත් දෙයක් නැත. ලෙංගතු මිනිසත්කමින් පොහොසත් එම ජනතාව සෙනෙහසින් සිහිපත් කරමි. සැමදා සවියක් වූ අපේ ස්වාමීන් වහන්සේලාව ද ගෞරව පූර්වකව සිහිපත් කරමි.
මේ රටේ වැඩිහිටි පරම්පරාව වන අපට ටයර් පිළිස්සුණු ගඳත්, බෝම්බ බියත් අමතක කළ නොහැක. ටයර් සෑයවල් දැවෙද්දී තරුණ දරුවන් වෙනුවෙන්, මවුපියන් වෙනුවෙන්, ජීවත් වීමේ අයිතිය වෙනුවෙන් මම සටන් කර ඇත්තෙමි. බෝම්බ දුමාරය නැගෙද්දී ත්රස්තවාදය අවසන් කිරීමට නායකත්වය දුන්නෙමි. යුද්ධය අවසන් කිරීම පිළිබඳ මා තුළ ඇති එකම පසුතැවීම නම් මෙයටත් පෙර ත්රස්තවාදය අවසන් කිරීමට නොහැකි වීම පමණි.
උතුරු නැගෙනහිර ජනතාව ත්රස්තවාදය හේතුවෙන් බොහෝ පීඩාවට පත්වූහ. මායිම් ගම්මාන වල වැසියන් ඉලක්ක කර ගනිමින් ත්රස්තවාදීන් නිරන්තරයෙන් ප්රහාර එල්ල කළහ. බොහෝ ගම් වැසියන් ගම් බිම් අතැර දමා යාමට සූදානම් වෙද්දී අපේ ගමේ ස්වාමින් වහන්සේලා ගමින් ගමට වැඩම කරමින් ගම්වල රැඳී සිටීමට ගම්වැසියන් ධෛර්යමත් කළහ. ගම්බිම්වලට ප්රහාර එල්ල කරද්දී ජනතාව පන්සලට ගෙන ගොස් ආරක්ෂා කර ගත්හ. හමුදා නිල දරුවන් ද, ස්වාමීන් වහන්සේලා ද පන්සල ආරක්ෂා කළහ. මායිම් ගම්මානවල බොහෝ ජනතාව රැය පහන් කළේ පන්සලේ හෝ හමුදා කඳවුරු තුළය.
නොච්චියාගම, මැදවච්චිය, හොරොව්පතාන වැනි ගම් රැසක් නියෝජනය කරමින් අද මා හමුවීමට පැමිණි ඇතැම් තැනැත්තන්ට ඇතේද මෙවැනි අත්දැකීම්ය. මේ පිරිස අතර කිසිදා මට අමතක නොවන මුහුණක් ද මම දුටුවෙමි. කැබිතිගොල්ලෑව ක්ලේමෝ බෝම්බ ප්රහාරයේදී ජීවිතක්ෂයට පත් තම දරුවාගේ සිරුර මට පෙන්වමින් කෑ ගසා හැඩූ ඒ තාත්තා මම දුටුවෙමි. යුද්ධය අවසන් වී බොහෝ කාලයක් ගතව ඇත. ප්රියන්ත මහතා සිනහවෙන් සිටිය ද තම දරුවා අහිමිවීමේ වේදනා පියෙකුට අමතක කළ නොහැකි බව මම දනිමි. මෙවන් දෙමාපියන් තව කොතරම් ප්රමාණයක් සිටීදැයි මා දන්නේ නැත. ත්රස්තවාදයේ වේදනාත්මක මතක බර දරාගෙන තවමත් විඳවමින් ජීවත්වන පිරිසක් මේ රටේ සිටිනා බව මම හොඳින් දනිමි. එහෙත්, ඔවුන්ට ද මට ද ඇත්තේ එක සැනසීමකි. ඒ යලි කිසි දිනක එවන් වේදනාවකට මුහුණ දීමට මේ රටේ මව්වරුන්ට හෝ පියවරුන්ට සිදු නොවන බවට ඇති විශ්වාසයයි. මේ රටේ දරුවන්ගේ ජීවිත උදුර ගැනීමට යලි කිසිවෙකුට නොහැකිය. යුද්ධය සැබවින්ම දුටු අප පරම්පරාව ත්රස්තවාදයේ වේදනාත්මක බර දරාගෙන දිනක සමු ගනු ඇත. සුරක්ෂිත මාතෘ භූමියක් පමණක් ඉතිරිවනු ඇත. දේශපාලකයා ඊළඟ මැතිවරණය අරමුණු කර ගනු ලබද්දී මාතෘ භූමියට ආදරය කරන ජනතා නායකයෙක් ලෙසත් පියෙකු ලෙසත් මා අරමුණු කර ගත්තේ මේ රටේ ඊළඟ පරම්පරාවයි. රණවිරු දරුවනුත්, ඔබත්, මමත් එක්ව තැනූ ඒකීය මෙන්ම නිදහස් මාතෘ භූමියක අපේ දරුවන් සැමදා සුරක්ෂිතය.
බණ්ඩාරගම, තුන්බෝධිය පාලම අසන්නයේ සිදුකළ වෙඩිතැබීමකි පුද්ගලයෙක් ජීවිතක්ෂයට පත්ව තිබේ. යතුරුපැදියකින් පැමිණි පුද්ගලයින් දෙදෙනකු මෝටර් රථයක ගමන් කරමින් සිටි පුද්ගලයෙකු ටී 56 ගිනඅවියකින් මෙම වෙඩිතැබීම සිදුකර ඇති බව වාර්තා වෙයි.
වර්ජනය අත්හැර කිසිදු සාකච්ඡාවකට තැපැල් වෘත්තීය සමිති සූදානම් නොමැති බව තැපැල් වෘත්තීය සමිති පෙරමුණේ සම කැඳවුම්කරු චින්තක බණ්ඩාර පැවසීය.
අඛණ්ඩව ක්රියාත්මක වන තැපැල් වර්ජනය සම්බන්ධයෙන් ‘අද දෙරණ’ සිදුකළ විමසීමකට පිළිතුරු දෙමින් ඔහු මේ බව සඳහන් කළේය.
මේ දක්වාත් විෂය භාර අමාත්යවරයා ඒ සම්බන්ධයෙන් සාකච්ඡාවක් ලබාදී නොමැති බව සඳහන් කළ චින්තක බණ්ඩාර මහතා පෙන්වා දෙන්නේ, වෘත්තීය සමිති ක්රියාමාර්ග අත්හැර සාකච්ඡාවකට පැමිණෙන ලෙස තැපැල්පතිවරයා සහ විෂය භාර අමාත්යවරයා ඉල්ලීමක් සිදුකර ඇති බවය.
කෙසේවෙතත් වෘත්තීය සමිති ක්රියාමාර්ගය අත්හැර කිසිඳු සාකච්ඡාවක් සිදුකිරීමට තැපැල් වෘත්තීය සමිති සූදානම් නොමැති බව තැපැල් වෘත්තීය සමිති පෙරමුණේ සම කැඳවුම්කරු චින්තක බණ්ඩාර සඳහන් කළේය.
මේ වනවිටත් ලක්ෂ 17කට ආසන්න තැපැල් මලු ප්රමාණයක් තැපැල් ස්ථාන ආශ්රිතව ගොඩගැසී ඇති බවද ඔහු පැවසීය.
නොතීසි නිකුත් කර ඇති හිටපු අමාත්ය රාජිත සේනාරත්න මහතා තවමත් සොයා ගැනීමට නොහැකි වීම හේතුවෙන් අද (21) අල්ලස් කොමිසමේ නිලධාරීන් විසින් ඔහුගේ මාලඹේ පිහිටි නිවසට ගොස් දැන්වීම් අලවනු ලැබීය.
ඒ අධිකරණයේ පෙනීසිටින ලෙස දන්වමින්.
කිරින්ද ධීවර වරායේ වැලි ඉවත්කිරීමේ ව්යාපෘතියක් අවිධිමත්ව සිදුකිරීමෙන් රජයට රුපියල් ලක්ෂ 262ක පාඩුවක් සිදුකිරීම සම්බන්ධයෙන් වූ නඩුවට අදාළව මෝසමක් මගින් අල්ලස් කොමිසම කළ කරුණු දැක්වීම සලකා බැලීමෙන් අනතුරු ඔහුට නොතීසි නිකුත් කෙරුණි.
අත්අඩංගුවට ගැනීමට වරෙන්තු නිකුත් වී ඇති හිටපු අමාත්ය රාජිත සේනාරත්න මහතාට එළඹෙන අගෝස්තු 29 වනදා අධිකරණය හමුවේ පෙනීසිටින ලෙස කොළඹ ප්රධාන මහේස්ත්රාත් අධිකරණය ඊයේ (20) නොතීසි නිකුත් කළේය.
