මහනුවර නගරයට පිවිසෙන ප්රධාන පිවිසුම් මාර්ගවලින් එකක් වන මහනුවර – යාපනය මාර්ගයේ මහයියාව උමං මාර්ගයේ ඉදිකිරීම් කටයුතු ආරම්භ කිරීම ජනාධිපති අනුර කුමාර දිසානායක මහතාගේ ප්රධානත්වයෙන් අද (06) පෙරවරුවේ සිදු විය.
මාර්ග සංවර්ධන අධිකාරිය යටතේ රුපියල් මිලියන 699.6ක වියදමින් ඉදි කෙරෙන මෙම උමං මාර්ගයේ ඉදිකිරීම් අද සිට දින 273ක් ඇතුළත අවසන් කිරීමට නියමිතය.
උමං මාර්ගයේ සැලැස්ම නිරීක්ෂණය කරමින් නිලධාරින් සමග කෙටි සාකච්ඡාවක නිරත වූ ජනාධිපතිවරයා එම ස්ථානයට රැස්වී සිටින ජනතාව සමඟ ද සුහද කතා බහක නිරත විය.
සූරියකන්ද පොලිසියේ හිටපු ස්ථානාධිපතිවරයා සහ කොස්තාපල්වරයෙකු මධ්යම අපරාධ විමර්ශන කාර්යංශය විසින් අත්අඩංගුවට ගෙන තිබේ.
ගෝනෙකු ඝාතනය කිරීමේ සිද්ධියක් සම්බන්ධයෙන් වන චෝදනාවකට අදාළව මොවුන් අත්අඩංගුව ගෙන ඇති බව පොලිස් මාධ්ය ප්රකාශක සහකාර පොලිස් අධිකාරි එෆ්.යූ වුට්ලර් මහතා සඳහන් කළේය.
වනජීවී ආඥා පනත උල්ලංඝනය කිරීමට එරෙහිව ඔවුන් මෙලෙස අත්අඩංගුවට ගෙන ඇති බව වාර්තා වේ.
වලාන දූෂණ මර්දන ප්රහාරක ඒකකයේ වැඩබලන අධ්යක්ෂ ධුරයේ වැඩබැලීම සඳහා ජ්යෙෂ්ඨ පොලිස් අධිකාරි කේ.සී ආරියවංශ මහතා පත් කර තිබේ.
අසනීප තත්ත්වයක් හේතුවෙන් මේ වනවිට රාජකාරි නිවාඩු ලබාගෙන සිටින සහකාර පොලිස් අධිකාරි රොහාන් ඕලුගල මහතා යළි රාජකාරි කටයුතු සඳහා පැමිණෙන තෙක් කේ.සී ආරියවංශ මහතා එම ධුරයේ වැඩබැලීමට පත් කර ඇත.
ජ්යෙෂ්ඨ පොලිස් අධිකාරි කේ.සී ආරියවංශ මහතා මධ්යම මේ වනවිට අපරාධ විමර්ශන කාර්යාංශයේ අධ්යක්ෂ ධුරයේ රාජකාරී කරනු ලබයි.
දිවයිනේ ජාතික හා පළාත් පාසල්වල පවතින සිංහල, දෙමළ හා ඉංග්රීසි මාධ්ය ගුරු පුරප්පාඩු සඳහා රජ්ය සේවයේ නියුතු උපාධිධාරීන් හා අනෙකුත් උපාධිධාරීන් ගුරු සේවයට බඳවා ගැනීම සඳහා අයදුම්පත් කැඳවීම සම්බන්ධව අධ්යාපන, උසස් අධ්යාපන සහ වෘත්තිය අධ්යාපන අමාත්යාංශය නිවේදනයක් නිකුත් කර තිබේ.
එමගින් අමාත්යාංශය සඳහන් කර ඇත්තේ අංක 2474/18 හා 2026.02.02 දිනැති අති විශේෂ ගැසට් නිවේදනය මඟින් 2023.02.10 දිනට රාජ්ය සේවයේ නියුතුව මේ වන විටත් රාජ්ය සේවයේ සිටින 2023.02.10 දිනට වයස අවුරුදු 45ට නොවැඩි සහ එදිනට උපාධි සුදුසුකම් සම්පූර්ණ කරන ලද අයදුම්කරුවන්ට මේ සඳහා අයදුම් කිරීමට අවස්ථාව ලබා දී ඇති බවය.
අංක 2474/19 හා 2026.02.02 දිනැති අති විශේෂ ගැසට් නිවේදනය මඟින් පහත සඳහන් කාණ්ඩ යටතේ උපාධි සුදුසුකම් සම්පූර්ණ කරන ලද අයදුම්කරුවන්ට අයදුම් කිරීමට අවස්ථාව ලබා දී ඇත.
2023.01.27 දින පලකරන ලද අංක 2317 දරණ ගැසට් නිවේදනය මඟින් දැනටමත් අයදුම්පත් යොමු කළ අය මේ වන විටත් රාජ්ය සේවයේ නිරත වන්නේ නම්, මෙම ගැසට් නිවේදනය පරිදි නැවත අයදුම් කිරීමට අවශ්යතාවයක් නොමැති බවත් හා එම පෙර අයදුම්කළ අයදුම් පත්රයේ සඳහන් දුරකථන අංකය, ජාතික හැදුනුම්පත් අංකය, ලිපි ලැබෙන ලිපිනය සංශෝධනය වී ඇත්නම් පමණක් විභාග දෙපාර්තමේන්තුව වෙත අදාළ යොමු ඔස්සේ ඉල්ලීම් ඉදිරිපත් කර එම සංශෝධන සිදු කිරීමටත් අයදුම්පත්රය භාගත කර ගැනීමටත් අවස්ථාව සලසා දී ඇති බව අමාත්යාංශය සඳහන් කළේය.
මෙම ගැසට් නිවේදන සම්බන්ධ වැඩිදුර විමසීම් සඳහා (සිංහල – 0112-784819/ 0112-785634/ Hotline 1988) – (දෙමළ – 0112-785634), (ඉංග්රීසි – 0112-785258/ 0112-784819/ 0112-787399) – (වැඩකරන දිනවල පෙ.ව. 9.00 සිට ප.ව. 4.00 දක්වා) ඇමතීමෙන් ලබා ගත හැකි බවද අමාත්යාංශය වැඩිදුරටත් සිය නිවේදනය මගින් සඳහන් කර තිබේ.
මහරගම නගර සභාවේ අද(06) පැවති රැස්වීම මාතෘකා දෙකක් යටතේ උණුසුම් තත්ත්වයක් හට ගෙන තිබේ.
නව රජය පත්වීමෙන් පසුව කොට්ටාව සහ තලවතුගොඩ යන ප්රදේශ දෙකට සුරාසැල් දෙකක් ආරම්භ කිරීමට විරෝධය පළ කරමින් මෙලෙස මහරගම නගර සභාව රැස්වීම උණුසුම් තත්ත්වයක් හට ගෙන තිබුණි.
එහිදී විපක්ෂයේ මන්ත්රීවරුන් විරෝධතා පුවරු ප්රදර්ශනය කරමින් උද්ඝෝෂණ පාඨ කියමින් සභාවාරය අතරතුරදී විරෝධතාවයේ නිරත වී ඇත.
මේ අතර, මහරගම නගර සභාවේ සභාපතිවරයාගේ පෞද්ගලික ලේකම්වරිය සභාපතිවරයා හමුවීමට පැමිණ මහජනයාට සැර පරුෂ ලෙස කතා කිරීම සහ මාලිමාවේ ලැයිස්තුවේ සිටි මන්ත්රීවරියක් මහරගම නල්ලවත්ත ප්රදේශයේ මාර්ගයක් අත්පත් කර ගැනීමට යාමේදී අපේ ජනාධිපති අපේ ආණ්ඩුව අපේ අගමැති හොඳින් හෝ නරතින් මේ පාර පළල් කරලා පවරගන්නවා යැයි පවසා තිබේ.
මෙම කරුණුවලට විරෝධය පළ කරමින් කළු පටියක් පැළඳ නාගරික මන්ත්රී දිනේෂ් අබේකෝන් මහතා අද මහරගම නගර සභාව රැස්වීමේ විරෝධතාවයක නිරත වී ඇත.
අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගෙන අධිකරණයට ඉදිරිපත් කළ හිටපු අමාත්ය කෙහෙළිය රඹුක්වැල්ල මහතාගේ වැඩිමහල් දියණිය වන චමිත්රි රඹුක්වැල්ල ඇප මත මුදාහැරීමට අධිකරණයට නියෝග කර තිබේ.
ඒ, කොළඹ ප්රධාන මහේස්ත්රාත්වරයාගේ නිල මැදිරියට අද (06) පස්වරුවේ ඉදිරිපත් කිරීමෙන් අනතුරුවය.
එහිදී ඉදිරිපත් වූ කරුණු සලකා බැලූ මහේස්ත්රාත්වරයා, සැකකාරිය රුපියල් මිලියන 5 බැගින් වූ ශරීර ඇප දෙකක් මත මුදාහරින්නැයි නියෝග කළ බව අද දෙරණ අධිකරණ වාර්තාකරු පැවසුවේය.
හිටපු අමාත්ය කෙහෙළිය රඹුක්වැල්ල විසින් අයථා ලෙස උපයන ලද මුදල් විශුද්ධීකරණය කිරීමට සහය සහ ආධාර අනුබල ලබාදීමේ චෝදනාවට අදාළව ඔහුගේ වැඩිමහල් දියණිය අත්අඩංගුවට ගෙන තිබුණි.
නව ජාතික ඛනිජ ප්රතිපත්තිය හඳුන්වා දෙන තෙක් බර ඛනිජ කැණීම් බලපත්ර නිකුත් කිරීම තාවකාලිකව අත්හිටුවීමට තීරණය කර ඇති බව කර්මාන්ත සහ ව්යවසායකත්ව සංවර්ධන අමාත්ය සුනිල් හඳුන්නෙත්ති මහතා පවසයි.
අමාත්යවරයා මේ බව ප්රකාශ කළේ, අද (06) දින කර්මාන්ත සහ ව්යවසායකත්ව සංවර්ධන අමාත්යාංශයේ පැවැති විශේෂ මාධ්ය සාකච්ඡාවකදීය.
නව ජාතික ඛනිජ ප්රතිපත්තිය කැබිනට් අනුමැතිය ලබාගෙන පාර්ලිමේන්තුව හරහා සම්මත කර ක්රියාත්මක කිරීමට බලාපොරොත්තු වන බව හෙතෙම කීය.
ඒ දක්වා ඉදිකිරීම් ක්ෂේත්රයට අදාළ ද්රව්ය හැර අනෙකුත් සියලුම ඛනිජ කැණීම් බලපත්ර නිකුත් කිරීම තාවකාලිකව අත්හිටුවීමට රජය තීරණය කර ඇති බව අමාත්යවරයා කියා සිටියේය.
නිවාස සහ ඉදිකිරීම් ක්ෂේත්රයට අත්යවශ්ය වැලි සහ ගල් වැනි ද්රව්ය සඳහා මෙම තහනම බල නොපාන බව මෙහිදී අමාත්යවරයා පෙන්වා දුන්නේය.
කෙසේ වෙතත්, ඉල්මනයිට්, රූටයිල්, සර්කෝන් සහ ගානට් වැනි බර ඛනිජ සඳහා වන සියලුම ගවේෂණ සහ කැණීම් බලපත්ර ලබාදීම නව ප්රතිපත්තිය එළිදක්වන තෙක් අත්හිටුවා ඇත.
රටේ ඛනිජ සම්පත්වලින් ජාතියට උපරිම ප්රතිලාභ ලබාගැනීම අරමුණු කරගත් නව ජාතික ප්රතිපත්තියක් මේ වන විට සකස් කර කැබිනට් මණ්ඩලයට ඉදිරිපත් කර තිබේ.
එළඹෙන මාර්තු මාසය අවසන් වීමට පෙර ඊට අදාළ මාර්ගෝපදේශ ගැසට් පත්රයක් මගින් ප්රකාශයට පත් කර පාර්ලිමේන්තුවට ඉදිරිපත් කිරීමට නියමිතය.
පුද්ගල අභිමතය මත තීරණ ගැනීම වැළැක්වීම සහ විනිවිදභාවය තහවුරු කිරීම සඳහා සමස්ත බලපත්ර ක්රියාවලිය ඩිජිටල්කරණය කිරීමට ද රජය පියවර ගනිමින් සිටියි.
මිරිජ්ජවිල ප්රදේශයේ ඛනිජ වැලි ඉවත් කිරීම සඳහා කිසිදු පෞද්ගලික ආයතනයකට වත්මන් රජය යටතේ අවසර ලබාදී නොමැති බව අමාත්යවරයා එහිදී අවධාරණය කළේය.
2024 සැප්තැම්බර් මස නිකුත් කර ඇත්තේ ප්රවාහනයට අදාළ ලිපියක් පමණක් බවත්, එය ගවේෂණයට හෝ කැණීමට ලබා දුන් වලංගු බලපත්රයක් නොවන බවත් සුනිල් හඳුන්නෙත්ති මහතා අනාවරණ කළේය.
ඒ අනුව, සමාජ මාධ්ය ඔස්සේ පැතිර යන අසත්ය වාර්තා ඔහු තරයේ ප්රතික්ෂේප කළේය.
පසුගිය කාලසීමාව තුළ දේශපාලන බලය අනිසි ලෙස භාවිත කරමින් සිදු කළ නීතිවිරෝධී කැණීම් හේතුවෙන් රටට අහිමි වූ සම්පත් ප්රමාණය අතිවිශාලය.
රාජ්ය භාගය නොගෙවීම සහ නීතිවිරෝධී කැණීම් සම්බන්ධයෙන් දැනටමත් නඩු විශාල සංඛ්යාවක් පවතින අතර, ඉදිරියේදී මෙවැනි ජාවාරම් මැඩලීම සඳහා “ක්ෂණික වැටලීම් ඒකකයක්” ස්ථාපිත කිරීමට ජනාධිපතිවරයාගේ අනුමැතිය හිමිවී ඇති බව ද අමාත්යවරයා වැඩිදුරටත් සඳහන් කළේය.
ජනතා විමුක්ති පෙරමුණේ ලේකම් ටිල්වින් සිල්වා මහතා ඇතුළු මෙරට නියෝජිත පිරිසක් සහ ඉන්දීය විදේශ කටයුතු අමාත්ය එස්. ජයශංකර් මහතා අතර නිල හමුවක් නව දිල්ලි නුවරදී පවත්වා තිබේ.
මෙම සාකච්ඡාවේදී දෙරට අතර පවතින ද්විපාර්ශ්වික සබඳතා තවදුරටත් ශක්තිමත් කර ගැනීම, අනාගත වර්ධන අවස්ථා ගවේෂණය කිරීම සහ සමාජ සුබසාධන වැඩසටහන් පිළිබඳව විශේෂ අවධානයක් යොමු කර ඇත.
ශ්රී ලංකාව වෙනුවෙන් ඉන්දියාව සැමවිටම විශ්වාසවන්ත සහ සැබෑ සහකරුවෙකු ලෙස පෙනී සිටින බව ද එහිදී ඔහු වැඩිදුරටත් සඳහන් කර තිබේ.
කෙසේවෙතත් මෙම හමුව සම්බන්ධයෙන් X සමාජ මාධ්ය ජාලයේ සටහනක් තබමින් ඉන්දීය විදේශ අමාත්යවරයා සඳහන් කළේ, ජනතා විමුක්ති පෙරමුණේ නියෝජිත පිරිස සමඟ ඉතා සුහදශීලී සහ ඵලදායී අදහස් හුවමාරුවක නිරත වූ බවය.
දෙරට අතර පවතින ගැඹුරු සබඳතා තවදුරටත් වර්ධනය කර ගැනීමට මෙම සාකච්ඡාව මනා පිටිවහලක් වූ බව ද ඔහු එහි දක්වා ඇත.
හදිසි නීතිය දීර්ඝ කිරීම යළි ගොඩනැඟිමේ වැඩපිළිවෙළ වේගවත් කිරීමට පමණක් බවත් එය කිසිසේත් මර්දනීය උපකරණයක් ලෙස භාවිත නොකරන බවත් ජනාධිපති අනුර කුමාර දිසානායක මහතා පවසයි.
ජනාධිපති අනුර කුමාර දිසානායක මහතා මේ බව සඳහන් කළේ දිට්වා සුළි කුණාටුවෙන් පූර්ණ ලෙස නිවාස හානිවූ පවුල් සහ නායයෑම් අධි අවදානම් ලෙස හඳුනාගෙන ඇති පවුල් නැවත පදිංචි කිරීම වෙනුවෙන් ‘Rebuilding Sri Lanka’ වැඩසටහන යටතේ ඉඩම් ලබාදීම සහ නිවාස ඉදිකරගැනීම වෙනුවෙන් මූල්ය ප්රදානයන් සිදු කිරීමේ අවස්ථාවට අද (06) පස්වරුවේ නියංගොඩ පාසල් ක්රීඩා පිටියේදී එක් වෙමිනි.
වැඩිදුරටත් අදහස් දැක්වූ ජනාධිපති අනුර කුමාර දිසානායක මහතා,
“දිට්වා සුළි කුණාටුවෙන් අපේ රටේ ජනතාවටත්, ආර්ථිකයටත් විශාල බලපැමක් ඇති වුණා. මෙවැනි විශාල ව්යසනයක් ඇති වූ විට රට යළි ගොඩනැඟීමේ ක්රියාවලියේදී සාමාන්ය නීතිය ප්රමාණවත් වන්නේ නැහැ.විශේෂ නීතියක් අවශ්යයයි.”
“ආණ්ඩුක්රම ව්යවස්ථාවේ විශේෂ නීති පැනවීම සඳහා අවශ්ය බලතල ලබා දී තිබෙනවා. මහජන ආරක්ෂක පනත තුළ විශේෂ නීති පැනවීම සඳහා අවස්ථාව ලබාදී තිබෙනවා. මෙවැනි ව්යසනයකදී ගොඩ ඒමට විශේෂ අධිකාරි බලය සහිත නීති අවශ්යයි. ඒ සඳහා තමයි අපි හදිසි නීතිය පණවනු ලැබුවේ. එහෙත් ඉතිහාසයේ හදිසි නීතිය බොහෝ විට උපයෝගී කර ගත්තේ වෘත්තීය සමිති ව්යාපාර අඩපණ කිරීම, මාධ්ය මර්දනය වැනි කටයුතු සඳහා. අපි හදිසි නීතිය ඒ වෙනුවෙන් උපයෝගි කරගෙන නැහැ. තවමත් මෙම ගොඩනැඟීමේ ක්රියාවලිය අවසන් කර නැති නිසා මූලික කටයුතු සම්පූර්ණ කරගන්නා තෙක් අපි හදිසි නීතිය ක්රියාත්මක කරනවා.”
“එය කිසිසේත්ම මර්දන අවියක් ලෙස උපයෝගි කර නොගන්නා බවට මම සහතික වෙනවා. ඒ නිසා ප්රසම්පාදන ක්රියාවලිය, මිලදී ගැනීමේ, ඉඩම් අත්පත් කර ගැනීමේ ක්රියාවලිය වේගවත් කිරීම මෙන්ම, රාජ්ය නිලධාරින්ට අවශ්යය ආරක්ෂාව ලබාදීම වෙනුවෙන් අපි හදිසි නීතිය නැවත දීර්ඝ කිරීමට කටයුතු කළා. මේ දිට්වා කුණාටුවෙන් විපතට පත් වූ, ඉතා වේගයෙන් ගොඩනැගිය යුතු ප්රදේශවලට අවශ්ය නීතිමය රැකවරණය අපි ලබා දෙනවා. එය කිසිසේත් මර්දනීය උපකරණයක් ලෙස භාවිතා කරන්නේ නැහැ.”
අද (06) මධ්යම රාත්රියේ සිට ක්රියාත්මක වනපරිදි ලාෆ්ස් ගෑස් මිල ගණන් සංශෝධනය කර තිබේ.
ඒ අනුව කිලෝග්රෑම් 12.5 ලාෆ්ස් ගෘහස්ථ ගෑස් සිලින්ඩරයක මිල රුපියල් 80කින් ඉහළ දමා තිබේ.
මිල සංශෝධනයට අනුව රුපියල් 4,250ක් ව පැවැති 12.5kg ලාෆ්ස් ගෘහස්ථ ගෑස් සිලින්ඩරයක නව මිල 4,330ක් වෙයි.
එමෙන්ම කිලෝග්රෑම් 5 ගෑස් සිලින්ඩරයක මිල රුපියල් 32කින් ඉහළ දමා ඇති අතර, එහි නව මිල රුපියල් 1,742ක් වෙයි.
