Breaking News
අසර්බයිජානයේ දී අත්අඩංගුවට ගනු ලැබූ මෙරට සංවිධානාත්මක අපරාධකරුවෙකු වන මනෝජ් සුරංග නොහොත් ‘බටුවත්තේ චාමර’ අද (10) රාත්රියේ දිවයිනට රැගෙන එනු ලැබීය.
සැකකරු ඉන්දියාව හරහා මෙරටට රැගෙන ආ බව වාර්තා වේ.
ඔහු රැගෙන ඒම සඳහා මෙරට පොලිස් කණ්ඩායමක් පසුගිය 7වනදා දිවයිනෙන් පිටත්ව ගොස් ඇති බව සඳහන්ය.
රජය විසින් විදුලි බිල වැඩි කිරීමට ගත් තීරණය බාල ගල්අඟුරු ජාවාරමේ බර මෙරට විදුලි පාරිභෝගිකයින්ගේ කරපිට පැටවීමක් බව විපක්ෂනායක සජිත් ප්රේමදාස මහතා පවසයි.
විදුලි ගාස්තු ඉහළ දැමීම සම්බන්ධයෙන් විශේෂ ප්රකාශයක් සිදුකරමින් විපක්ෂනායකවරයා සඳහන් කරනුයේ මෙම ගල්අඟුරු ජාවාරමේ බර මෙරට විදුලි පාරිභෝගිකයින් පිට පැටවීම සිදු නොකරන ලෙසට ඉල්ලා සිටියද මහජන උපයෝගීතා කොමිසම සහ රජය 18%කින් විදුලි බිල වැඩි කිරීමේ යෝජනාව ක්රියාත්මක කර ඇති බවය.
එමෙන්ම මෙම විදුලි බිල වැඩි කිරීම ව්යාපාරිකයින් සහ කර්මාන්තකරුවන්ගෙන් රජය විසින් ගනු ලැබූ කප්පමක් බවටද චෝදනා කළ විපක්ෂනායකවරයා සඳහන් කරනුයේ ඒකක 180ට වැඩි විදුලි ඒකක සඳහා මෙම නව විදුලි ගාස්තු අය කිරීම හේතුවෙන් ඉහළ මධ්යම පන්තිය, ව්යාපාරිකයින්, කර්මාන්තකරුවන් සහ ව්යවසායකයින් දැඩි පීඩාවකට පත්ව ඇති බවය.
එහිදී වැඩිදුරටත් අදහස් දැක්වූ විපක්ෂනායක සජිත් ප්රේමදාස මහතා,
“සරළව කතා කළොත් ඉහළ මධ්යම පන්තියත්, ඒ වගේම ව්යාපාරික ප්රජාවත්, කර්මාන්තකරුවනුත්, ව්යවසායකයනුත් අද මේ විදුලි බිල වැඩිවීමට ලක්වෙලා තියෙනවා. ඇත්ත වශයෙන්ම මේ 18% විදුලි බිල වැඩිවීම අපි දකින්නේ රජය ගත්තු කප්පමක් හැටියට. 18%කින් විදුලි බිල වැඩිකරලා රජය කප්පම් ගන්නේ රටේ ඉහළ මධ්යම පන්තියෙන්, කර්මාන්තකරුවන්ගෙන්, ව්යවසායකයින්ගෙන් සහ ව්යාපාරිකයින්ගෙන්. කුමක් සඳහාද ? බාල ගල්අඟුරු ව්යාපෘතියේ ඒ අලාභය මගහරවාගන්න. බාල ගල්අඟුරු ගේනවායි කියලා මුළ ඉඳලාම කිව්වා. මුළ ඉඳලාම රජය කිව්වා එහෙම දෙයක් නෑ කියලා. ඊට පස්සේ කියනවා ගල්අඟුරු නම් බාලයි හැබැයි වංචාවක් දූෂණයක් නෑ කියලා. අපි පැහැදිව කියනවා බාල ගල්අඟුරු ගෙන්වීම තුළ, ඉන්ධන විදුලි ජනනය වෙත යොමුවන්නට රජයට සිදුවුණා. ඒකෙන් විදුලිය නිෂ්පාදනය කිරීමේ පිරිවැය වැඩිවුණා. ඒ නිසාම මේ පිරිවැය වැඩිවීමත් බාල ගල්අඟුරු වංචාවේ වන්දිය ගෙවන්නත් අද සිදුවෙලා තිබෙන්නේ ඒකක 180ට වැඩියෙන් පරිභෝජනය කරන අපේ රටේ ඉහළ මධ්යම පන්තියටත්, ව්යාපාරිකයින්ටත්, කර්මාන්තකරුවන්ටත්. අපේ රටේ ආර්ථිකයට සුවිසාල දායකත්වයක් ලබා දෙන 52%ක දායකත්වයක් ලබා දෙන ක්ෂුද්ර කුඩා මධ්ය පරිමාණ කර්මාන්තකරුවන්ටත් සිද්ධ වෙනවා මේ දූෂිත ගල්අඟුරු ජාවාරමේ වන්දිය ගෙවන්න.”
දේශීය අර්තාපල් අස්වැන්න සාධාරණ මිලකට මිලදී ගැනීමේ විශේෂ වැඩපිළිවෙළක් හෙට (10) සිට ක්රියාත්මක කිරීමට රජය තීරණය කර තිබේ.
ඒ, එම ගොවීන් මුහුණ දෙන අලෙවිකරණ ගැටළු සඳහා කඩිනම් විසඳුම් ලබාදෙමිනි.
ඒ අනුව දේශීය අර්තාපල් කිලෝවක් රුපියල් 220කට මිලදී ගැනීම නුවරඑළිය බ්ලැක්පූල් ප්රදේශයේ පිහිටි, සී/ස නුවරඑළිය කෘෂිකර්ම සමුපකාර සමිතියේ මිලදී ගැනීමේ මධ්යස්ථානයේදී ආරම්භ කරන බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යාංශය සඳහන් කළේය.
මෙලෙස මිලදී ගන්නා දේශීය අර්තාපල් ලංකා සතොස හරහා පාරිභෝගිකයාට සහන මිලකට ලබාදීමට කටයුතු යොදා ඇති බව සඳහන්ය.
එක් ගොවියෙකුගෙන් අර්තාපල් කිලෝ 1,000ක උපරිමයකට යටත්ව මෙම මිලදී ගැනීම සිදු කරන බව එම අමාත්යාංශය නිවේදනය කරයි.
ඒ අනුව ගොවීන්ට සිය අස්වැන්න සඳහා සාධාරණ මිලක් ලබාදීමටත්, පාරිභෝගිකයාට සහන මිලට දේශීය අර්තාපල් ලබාදීමටත් රජය සහ පෞද්ගලික අංශයේ වෙළෙඳ ජාලයන් ද එක්ව මෙම කටයුතු සිදු කරනු ඇත.
රතුගල නව ආදිවාසී නායකයා ලෙස දානිගල මහා බණ්ඩාරලාගේ නිශාන්ත කුමාර ඇත්තන් පත් කර තිබේ.
එම ඇත්තන් මියගිය ආදිවාසී නායක සුදාවන්නිල ඇත්තන්ගේ පුත්රයා ද වෙයි.
අසනීප තත්ත්වයෙන් පසු වූ සුදාවන්නිල ඇත්තන් පසුගියදා මිය ගිය අතර එම ඇත්තන්ගේ අවසන් කටයුතු චාරිත්රානුකූලව අද (09) රතුගලදී සිදු කරන ලදී.
සුදාවන්නිල ඇත්තන්ගේ දේහය තැන්පත් කරනු ලැබුවේ, එම ඇත්තන් ජීවත් වු ඉඩමේය.
දේහය භූමදානය කිරීමට පෙර දඹාන ආදිවාසී නායක ඌරුවරිගේ වන්නිල ඇත්තන් විසින් රතුගල ආදිවාසී නායක සුදා වන්නිල ඇත්තන් භාවිත කළ දුන්න සහ කෙටේරිය නව නායකයා වෙත ලබාදෙන ලදී.
ශ්රී ලංකාව ආශ්රීතව පවතින පහළ වායුගෝලීය කැළඹිලි ස්වභාවය, මැයි මස 11 වෙනිදා පමණ වනවිට අඩු පීඩන කලාපයක් දක්වා වර්ධනය විය හැකි බව කාලගුණ විද්යා දෙපාර්තමේන්තුව පවසයි.
කෙසේ වෙතත් එය ඉදිරි දින 07 තුළ පීඩන අවපාතයක් දක්වා වර්ධනයවීමේ සම්භාවිතාව ඉතා අඩු බව එම දෙපාර්තමේන්තුව පෙන්වා දෙයි.
ඒ අනුව පළමු දින තුන තුළ එය පීඩන අවපාතයක් දක්වා වර්ධනය නොවනු ඇත.
පස්වන දිනයේදී පීඩන අවපාතයක් දක්වා වර්ධනයවීමේ සම්භාවිතාව අඩුව වූවත් හය වන දිනයේදී එම සම්භාවිතාව සාමාන්ය අගයක පවතින බව කාලගුණ විද්යා දෙපාර්තමේන්තුව සඳහන් කරයි.
කෙසේ වෙතත් හත් වන දිනයේදී එම සම්භාවිතාව ඉහළ බව එම දෙපාර්තමේන්තුව නිකුත් කළ නිවේදනයේ දක්වා තිබේ.
අද (09) දින ලබාගත් දත්ත මත මෙම කාලගුණ අනාවැකිකරණය සිදු කර ඇත.
මේ අතර දිවයිනට වඩා පවතින පීඩන අවපාතය හේතුවෙන් දැනට පවතින වැසි තත්ත්වය ඉදිරි දිනවල බලාපොරොත්තු විය හැකි බව කාලගුණ විද්යා දෙපාර්තමේන්තුව වැඩිදුරටත් පැවසීය.
යුරෝපා සංගම් බාහිර ක්රියාකාරී සේවයේ ඉන්දු – පැසිෆික් කලාපය සඳහා වූ යුරෝපා සංගම් විශේෂ නියෝජිත මාරියා කැස්ටිලෝ මහත්මිය විදේශ කටයුතු හා විදේශ රැකියා නියෝජ්ය අමාත්ය අරුන් හේමචන්ද්ර මහතා හමුව තිබේ.
මාරියා කැස්ටිලෝ මහත්මියගේ මෙරට නිල සංචාරය අතරතුර අද (09) දින නියෝජ්ය අමාත්යවරයා හමුවිය.
2925 නොවැම්බර් මාසයේදී බ්රසල්ස්හි පැවති 04 වන යුරෝපා සංගම් ඉන්දු-පැසිෆික් අමාත්ය සංසදයේදී ඇතිවූ සාකච්ඡා මත පදනම්ව, මෙම හමුවේදී දෙපාර්ශවය අතර අදහස් හුවමාරු විය.
මෙහිදී ඉන්දියානු සාගරය හා ඉන්දු-පැසිෆික් කලාපය තුළ ශ්රී ලංකාවේ උපායමාර්ගික වැදගත්කම, ගෝලීය සම්බන්ධතා, වෙළඳාම සහ සමුද්රීය ආරක්ෂාව සම්බන්ධයෙන් අවධානය යොමු කෙරිණි.
එමෙන්ම සමුද්රීය ආරක්ෂාව සහ නාවික ගමනාගමන කටයුතු ආරක්ෂා කිරීමේදී UNCLOS සම්මුතියේ වැදගත්කම නැවත තහවුරු කරමින්, CRIMARIO සහ IORIS වැනි කලාපීය මුලපිරීම් සඳහා ශ්රී ලංකාවේ සහභාගීත්වය පිළිබඳව ද සාකච්ඡා කෙරිණි.
බලශක්ති ආරක්ෂාව සහ ගෝලීය සම්බන්ධතාව ආරක්ෂා කිරීම පිළිබඳව ද දෙපාර්ශවය අදහස් හුවමාරු කරගත් අතර, මැදපෙරදිග වත්මන් තත්ත්වය සහ බලශක්ති ආරක්ෂාව, වෙළඳාම, සංචාරක ව්යාපාරය හා ආහාර සුරක්ෂිතභාවය කෙරෙහි ඇති බලපෑම් පිළිබඳව ද අවධානය යොමු විය.
විශේෂයෙන් පුනර්ජනනීය බලශක්තිය, හරිත බලශක්තිය සහ සම්බන්ධතා ආශ්රිත ව්යාපෘති සඳහා ශ්රී ලංකාව තුළ යුරෝපා සංගම් ආයෝජන වැඩි කිරීමේ හැකියාව පිළිබඳවද මෙහිදී යුරෝපා සංගම් විශේෂ නියෝජිතවරිය සඳහන් කළාය. එමෙන්ම ගෝලීය අභියෝග හමුවේ හවුල්කාරිත්වයන් විවිධාංගීකරණය කිරීමේ වැදගත්කම ද ඒ මහත්මිය මෙහිදී අවධාරණය කළාය.
නව රෙගුලාසි යටතේ ශ්රී ලංකාව GSP+ යෝජනා ක්රමයට නැවත අයදුම් කිරීමට පෙර ත්රස්තවාදය වැළැක්වීමේ පනත සංශෝධනය කිරීමේ ක්රියාවලියේ වත්මන් තත්ත්වය පිළිබඳව නියෝජ්ය අමාත්යවරයා විසින් පැහැදිලි කළ අතර, නීතියේ ආධිපත්යය, යහපාලනය සහ මානව හිමිකම් සඳහා ශ්රී ලංකාවේ අඛණ්ඩ කැපවීම නැවත තහවුරු කළේය.
මැයි 9 වන දින සමරනු ලබන යුරෝපීය දිනය නිමිත්තෙන් විශේෂ නියෝජිතවරියට සහ ඇයගේ දූත පිරිසට සුබ පැතුම් ද මෙහිදී නියෝජ්ය අමාත්යවරයා විසින් එක් කරනු ලැබීය.
මෙම හමුව සඳහා ශ්රී ලංකාවේ යුරෝපා සංගම් තානාපතිනි කාමන් මොරෙනෝ මහත්මිය, කොළඹ යුරෝපා සංගම් නියෝජිත කණ්ඩායමේ ජ්යෙෂ්ඨ නිලධාරීන් සහ විදේශ කටයුතු, විදේශ රැකියා හා සංචාරක අමාත්යාංශයේ නිලධාරීන් ද සහභාගී වූහ.
මිය ගිය ශ්රී ලංකන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ සිරුරු කොටස් රජයේ රස පරීක්ෂක වෙත යොමු කර තිබේ.
ඒ, මරණයට හේතුව කුමක්ද යන්න පිළිබඳ නිශ්චිතව සොයාගැනීම සඳහාය.
එම වාර්තාව ඉදිරි දින කිහිපය තුළදී ලබාදීමට නියමිත බව පොලිසිය සඳහන් කළේය.
ශ්රී ලංකන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ මළ සිරුර කොල්ලුපිටිය ප්රදේශයේ නිවසක තිබියදී හමුවූයේ ඊයේ (08) උදෑසන හමුවිය.
ගෙල වැළලාගෙන මියයන්නට ඇතැයි සැක කෙරුණු මෙම මරණය සම්බන්ධයෙන් විමර්ශන මේ වන විට කොළඹ අපරාධ කොට්ඨාසයට භාරදී තිබේ.
මේ අතර චන්ද්රසේන මහතාගේ මෘත ශරීරය සම්බන්ධයෙන් වූ පශ්චාත් මරණ පරීක්ෂණය සිදු කිරීම සඳහා කොළඹ ප්රධාන විශේෂඥ අධිකරණ වෛද්ය නිලධාරී ශ්රියන්ත අමරරත්න මහතාගේ සභාපතිත්වයෙන් යුතු පංච පුද්ගල විශේෂඥ අධිකරණ වෛද්ය කමිටුවක් පත්කරනු ලැබීය.
ඒ කොටුව මහේස්ත්රාත් පසන් අමරසේන මහතා ඊයේ (08) ලබාදුන් නියෝගයට අනුවය.
ඒ අනුව පශ්චාත් මරණ පරීක්ෂණය කොළඹ අධිකරණ වෛද්ය හා විෂවේද ආයතනයේදී අද (09) පෙරවරුවේ සිදු කෙරුණි.
එහිදී ඔහුගේ සිරුරු කොටස් රසායනාගාර පරීක්ෂණ සඳහා ලබාගෙන ඇති බවයි පොලිසිය සඳහන් කළේය.
මේ සඳහා රජයේ රස පරීක්ෂකවරයා ද එක්ව තිබේ.
ඒ අනුව චන්ද්රසේන මහතාගේ මරණයට හේතුව කුමක් ද යන්න පිළිබඳව ඉදිරි දින කිහිපය තුළ රසායනික පරීක්ෂණවලින් අනතුරුව ලබාදීමට නියමිත බවට තොරතුරු වාර්තා වෙයි.
කපිල චන්ද්රසේන මහතා සැකකටයුතු ලෙස ඊයේ (08) මියගොස් තිබුණේ ඔහු අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්රධාන මහේස්ත්රාත් අධිකරණයෙන් වරෙන්තුවක් නිකුත් කර තිබූ පසුබිමකය.
2013 වසරේ ප්රශ්නගත එයාර්බස් ගනුදෙනුවේදී අමෙරිකානු ඩොලර් මිලියන 02ක් අල්ලස් ගැනීම සම්බන්ධයෙන් වූ නඩුවට අදාළව දින 54ක් රක්ෂිත බන්ධනාගාරගත කර සිටි චන්ද්රසේන මහතා ඉකුත් මැයි 05 වනදා අධිකරණය විසින් මුදාහැරුණේ රුපියල් ලක්ෂ 5ක මුදල් ඇපයක් සහ ළඟම ඥාතීන් තිදෙනෙකුගේ රුපියල් ලක්ෂ 100ක ශරීර ඇප තබන ලෙස කොන්දේසි පනවමිනි.
එහිදී අධිකරණයට වාර්තා වූයේ කපිල චන්ද්රසේන මහතා ඇප කොන්දේසි සම්පූර්ණ කිරීම සඳහා ඥාතීන් බවට ව්යාජ ලෙස අඟවමින් පුද්ගලයින් දෙනෙකු ඉදිරිපත් කර ඇති බවය.
අධිකරණයේ විශ්වාසය කඩකිරීම සම්බන්ධයෙන් කපිල චන්ද්රසේන මහතා නඩු විභාගය අවසන් වනතුරු රක්ෂිත බන්ධනාගාරගත කරන ලෙස අල්ලස් කොමිසම කළ ඉල්ලීම සලකා බැලු මහේස්ත්රාත්වරයා සැකකරුට යළි වරෙන්තු නිකුත් කළේය.
චන්ද්රෙස්න මහතා මියගොස් තිබුණේ එම වරෙන්තුව අනුව ඊයේ (08) ඔහු අධිකරණය හමුවේ පෙනී සිටීමට නියමිතව තිබුණු පසුබිමකය.
මුදල් විශුද්ධිකරණය වැළැක්වීමේ පනත යටතේ හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ මහතාට එරෙහිව ගොනුකර තිබෙන නඩුවේ මූලික විරෝධතා පිළිබඳ නියෝගය, එළැඹෙන 14 වැනිදා ප්රකාශයට පත් කරන බව කොළඹ මහාධිකරණය අද (8) දැනුම්දුන්නේය.
අදාළ නඩුව කොළඹ මහාධිකරණ විනිසුරු උදේශ් රණතුංග මහතා ඉදිරියේ කැඳවනු ලැබූ අවස්ථාවේදී මේ බව දැන්වීය.
එහිදී යෝෂිත රාජපක්ෂ මහතා වෙනුවෙන් පෙනී සිටි ජනාධිපති නීතිඥ සම්පත් මැන්ඩිස් මහතා අධිකරණය හමුවේ කරුණු දක්වමින්, මෙම නඩුවේ පළමුවන ‘කුමන්ත්රණය’ නමැති චෝදනාවෙන් විත්තිකාරියක වශයෙන් නම්කර සිටි ඩේසි ෆොරස්ට් මේ වන විට නිදහස් කර ඇති නිසා තම සේවා දායකයාට එරෙහිව එම චෝදනාව පවත්වාගෙන යාමට නොහැකි බව සඳහන් කළේය.
ඒ අනුව සිය සේවාදායකයාට එරෙහිව කුමන්ත්රණ චෝදනාව පවත්වාගෙන යාමට නොහැකි බව ජනාධිපති නීතිඥවරයා සිය මූලික විරෝධතාවලින් සඳහන් කර ඇත.
එම මූලික විරෝධතාවලට අදාළ ලේඛන ද ජනාධිපති නීතිඥවරයා විසින් අධිකරණයට භාරදී තිබේ.
ඊට ප්රතිචාර දක්වමින් පැමිණිල්ල වෙනුවෙන් පෙනී සිටි නියෝජ්ය සොලිසිටර් ජනරාල් ජනක බණ්ඩාර මහතා අධිකරණය හමුවේ කරුණු දක්වමින්, මෙම නඩුවේ දෙවන විත්තිකාර ඩේසි ෆොරස්ට් නමැත්තිය නඩුවෙන් මුදාහරිනු ලැබුවේ ඇයගේ අයහපත් සෞඛ්ය තත්ත්වය නිසා බව පැවසීය.
එම තත්ත්වය විත්තිය විසින් සඳහන් කරන කරුණට අදාළ නොවන බව නියෝජ්ය සොලිසිටර් ජනරාල්වරයා දැනුම්දී ඇත.
කෙසේ වෙතත් මෙම මූලික විරෝධතාව පිළිබඳ සිය ස්ථාවරය දැනුම් දීම සඳහා මෙම නඩුව ලබන සඳුදා කැඳවන ලෙස නියෝජ්ය සොලිසිටර් ජනරාල්වරයා ඉල්ලා තිබේ.
ඒ අනුව නීතිපතිවරයාගේ ස්ථාවරය ඉදිරිපත් කිරීම සඳහා මෙම නඩුව ලබන සඳුදා කැඳවීමට නියම කළ විනිසුරුවරයා, ඊට අදාළ විත්තියේ ස්ථාවරය අඟහරුවාදා ඉදිරිපත් කරන ලෙසත් නියම කළේය.
ඉන් අනතුරුව මූලික විරෝධතා පිළිබඳ නියෝගය ලබන 14 වනදා ප්රකාශයට පත් කරන බව විනිසුරුවරයා පැවසීය.
ඉදිකිරීම් සහ ගොඩනැගිලි අපද්රව්ය කළමනාකරණය සඳහා වූ ප්රතිචක්රීකරණ මධ්යස්ථානය අද (08) පෙරවරුවේ ඒකල කාර්මික ජනපදයේදී විවෘත කර තිබේ.
නිවේදනයක් නිකුත් කරමින් ජනාධිපති මාධ්ය අංශය සඳහන් කළේ, ක්ලීන් ශ්රී ලංකා ජාතික වැඩසටහනට සමගාමීව මෙය ස්ථාපිත කර ඇති බවය.
ක්ලීන් ශ්රී ලංකා ලේකම් කාර්යාලය මෙම ව්යාපෘතිය වෙනුවෙන් රුපියල් මිලියන 200ක් වෙන් කර ඇත.
නිවාස ඉදිකිරීම් හා ජලසම්පාදන අමාත්යාංශය යටතේ ඇති රාජ්ය ඉංජිනේරු සංස්ථාවට අයත් පෙරසවි අංගන පරිශ්රයේ ස්ථාපිත මෙම ව්යාපෘතිය, මෙරට ඉදිකිරීම් ක්ෂේත්රයේ තිරසාර පාරිසරික පරිවර්තනයක් කරා තැබූ සුවිශේෂී පියවරක් ලෙස හැඳින්විය හැකිය.
ලෝකයේ සමස්ත අපද්රව්ය ප්රමාණයෙන් 40%ක් සහ කාබන් විමෝචනයෙන් 25%ක් ජනනය කරනු ලබන්නේ ඉදිකිරීම් කර්මාන්තයෙන් වන අතර, අප රටේ බස්නාහිර පළාතෙන් පමණක් දිනකට එවැනි අපද්රව්ය ටොන් 300ක් පමණ එකතු වේ.
මෙතෙක් කලක් අවිධිමත් ලෙස බැහැර කිරීම නිසා පාංශු දූෂණය, ජල දූෂණය සහ ගංවතුර අවදානම් ඇති කළ මෙම සුන්බුන්, මෙම ව්යාපෘතිය යටතේ නව තාක්ෂණය ඔස්සේ වටිනා අමුද්රව්ය බවට පත් කෙරේ.
මෙමගින් ස්වාභාවික සම්පත් ක්ෂය වීම අවම වන අතර ඉදිකිරීම් පිරිවැය ද සැලකිය යුතු ලෙස අඩු කර ගැනීමට හැකි වනු ඇති බව ජනාධිපති මාධ්ය අංශය නිකුත් කළ නිවේදනයක දැක්වේ.
රාජ්ය ඉංජිනේරු සංස්ථාවේ පූර්ණ මැදිහත්වීමෙන් ක්රියාත්මක වන මෙම මධ්යස්ථානය සඳහා රුපියල් මිලියන 350ක් වටිනා යන්ත්ර සූත්ර සහ භූමිය වෙන් කර තිබේ.
පැයකට මෙට්රික් ටොන් 200ක ධාරිතාවයකින් යුත් මෙම ප්රතිචක්රීකරණ යන්ත්රාගාරයට අමතරව, නවීන විද්යාගාරයක් සහ පරිපාලන ගොඩනැගිල්ලක් ද ඉදිකර ඇත.
“Clean Sri Lanka” වැඩසටහන යටතේ රුපියල් මිලියන 200ක ප්රතිපාදන වෙන් වී ඇති අතර ඉන් රුපියල් මිලියන 150ක් දැනටමත් නිදහස් කර තිබේ.
ඉදිරියේදී මෙම වැඩපිළිවෙළට රාජ්ය විශ්වවිද්යාලවල ඉංජිනේරු පීඨ සම්බන්ධ කර ගනිමින් පර්යේෂණ කටයුතු පුළුල් කිරීමට ද සැලසුම් කර ඇති බව සඳහන්ය.
ස්වාභාවික සම්පත් අනාගත පරපුර උදෙසා සුරක්ෂිත කරමින් ඉදිකිරීම් ක්ෂේත්රය තුළ චක්රීය ආර්ථිකයක් ගොඩනැගීමට සියලුම ඉදිකිරීම් කොන්ත්රාත්කරුවන්ගේ සහ පාර්ශ්වකරුවන්ගේ දායකත්වය බලාපොරොත්තු වන ජනාධිපති මාධ්ය අංශය වැඩිදුරටත් පැවසීය.
ප්රදේශ දෙකකදී සිදු වූ පුද්ගල ඝාතනවලින් කාන්තාවක් ඇතුළු පුද්ගලයින් දෙදෙනෙකු මියගොස් තිබේ.
පිටිගල, හොරංගල්ල ප්රදේශයේදී තියුණු ආයුධයකින් පහරදී 60 හැවිරිදි පුද්ගලයෙකු ඝාතනය කර ඇති බව පොලිසිය පැවසීය.
දෙදෙනෙකු අතර ඇති වූ ආරවුලක් දුරදිගයාමෙන් මෙම ඝාතනය සිදුව ඇති අතර එහිදි තුවාල ලැබු සැකකරු අත්අඩංගුවට ගෙන ඇල්පිටිය රෝහල වෙත ඇතුළත් කර ඇති බව සඳහන් වේ.
එමෙන්ම තිස්සමහාරාම, ගැමුණුපුර ප්රදේශයේ නිවසක් තුළ දී ද කාන්තාවක් ඝාතනය කර ඇත.
අදාළ කාන්තාවගේ සිරුරේ කැපුම් තුවාල නිරීක්ෂණය වී ඇති අතර ඝාතනය සිදු කළ සැකකරුවන් මෙතෙක් හඳුනාගෙන නොමැති බව සඳහන්.
මෙලෙස මියගොස් ඇත්තේ 88 හැවිරිදි ගැමුණුපුර ප්රදේශයේ පදිංචිව සිටි කාන්තාවකි.
