Breaking News
කළුතර, කටුකුරුන්ද වෙරළ තීරයේ අද (3) ප.ව. 5.30ට පමණ දියනෑමට පැමිණි පුද්ගලයෙකු අතුරුදන් වී ඇති බව කළුතර දකුණ පොලිසිය ප්රකාශ කළේය.
මෙලෙස අතුරුදන් වී ඇත්තේ, කටුකුරුන්ද ප්රදේශයේම පදිංචි 55 හැවිරිදි විවාහක පුද්ගලයෙකු බව සඳහන්ය.
ඔහු සිය දරුවන් සහ පවුලේ ඥාතීන් සමග දිය නාමින් සිටි අවස්ථාවේ, එකවර දිය වැලකට හසුව ගසාගෙන ගොස් ඇති බව මූලික විමර්ශනවලදි අනාවරණය වී තිබේ.
රුපියල් 129,600 ක මුදලක් අල්ලස් වශයෙන් ඉල්ලා ලබාගැනීමේ චෝදනාව මත අනුරාධපුර, පණ්ඩුලගම යුද හමුදා කඳවුරේ සේවය කරන ලාන්ස් කෝප්රල්වරයෙකු අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගෙන තිබේ.
අත්අඩංගුවට ගෙන ඇත්තේ දිසානායක මුදියන්සේලාගේ සජිත් සමීර දිසානායක නැමති හමුදා සේවකයාය.
අල්ලස් කොමිෂන් සභාවට ලැබුණු පැමිණිල්ලකට අනුව සිදුකළ විමර්ශනයකදී අනාවරණය වී ඇත්තේ, යුද හමුදාවෙන් විශ්රාම ලබා සිටින පුද්ගලයෙකුට ඔහුගේ විශ්රාම ණය මුදල් පියවීමට උදව් කළ හැකි බව පවසා සැකකරු මෙම වංචාව සිදුකර ඇති බවය.
පැමිණිලිකරුගේ ණය විස්තර ලබාගෙන ඇති සැකකරු, රුපියල් ලක්ෂ 25 ක ආධාර මුදලක් ලබා දෙන බව පවසා ඇත.
එම ආධාරය ලබා ගැනීමට පෙර ගෙවිය යුතු මුදල් ලෙස පවසමින් අවස්ථා තුනකදී අල්ලස් වශයෙන් රුපියල් 129,600ක් මුදලක් බැංකු ගිණුමකට බැර කරවාගෙන තිබේ.
අනතුරුව, ලේඛන ගාස්තු වශයෙන් තවත් රුපියල් 13,457ක මුදලක් අල්ලස් ලෙස ඉල්ලා ඇති බව විමර්ශනවලදී හෙළි වී තිබේ.
අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් සැකකරු පසුගිය (30) වෙනිදා අත්අඩංගුවට ගෙන ඇත.
අත්අඩංගුවට ගත් සැකකරු කොළඹ ප්රධාන මහෙස්ත්රාත් අධිකරණය වෙත ඉදිරිපත් කිරීමෙන් අනතුරුව එළැඹෙන 08 වෙනිදා දක්වා රක්ෂිත බන්ධනාගාරගත කිරීමට නියෝග කර ඇත.
භික්ෂූන් වහන්සේ ඉදිරියේ දී විදේශගත වනවා නම්, උන් වහන්සේගේ ගුරු හාමුදුරුවෝ, ප්රදේශීය නායක හාමුදුරුවෝ සහ එම නිකායේ මහනායක හාමුදුරුවන්ගේ නිර්දේශය ලබාගැනීම මින් ඉදිරියට අනිවාර්ය කර තිබේ.
මෙම නීතිය මීට පෙර පනවා තිබුණත්, පසුගිය කාලයේ එය ක්රියාත්මක නොවූ බව බුද්ධශාසන, ආගමික සහ සංස්කෘතික කටයුතු නියෝජ්ය අමාත්ය ගමගෙදර දිසානායක මහතා පැවසීය.
ඒ අනුව ජනාධිපතිවරයා සමග ලේඛකාධිකාරී හිමිවරු පැවැත්වූ සාකච්ඡාවකින් පසු මින් ඉදිරියට එය අත්යවශ්ය කාරණයක් බවත්, ඒ පිළිබඳ මහානායක හිමිවරුන්ද දැනුම්වත් කළ බවත් හෙතෙම පැවසීය.
මත්ද්රව්ය රැගෙන ආ චීවරධාරීන් 22 සම්බන්ධයෙන් රජයේ මතය ප්රකාශයට පත්කරමින් නියෝජ්ය අමාත්යවරයා මෙම කරුණු අනාවරණය කළේය.
මේ අතර ලේඛකාධිකාරී හිමිවරු, නීතිපතිවරයා සහ බුද්ධ ශාසන අමාත්යාංශ නිලධාරීන් ඊයේ (29) පුළුල් සාකච්ඡාවක් පැවැත්වූ බවත්, එහිදී විහාර දේවාලගම් ආඥාපනත කඩිනමින් සංශෝධනය කිරීම සඳහා අවදානය යොමුවූ බවද ඔහු පැවසීය.
ඒ අනුව එම පනතේ 41, 42 වගන්තිය ප්රකාරව මෙවැනි අවස්ථාවන්හි කටයුතු කිරීමේ බලය, මහානායක හිමිවරු ප්රමුඛ කරගත් මණ්ඩලයකට ලබාදීම සඳහා වැඩිදුරටත් සාකච්ඡා කළ බවද සඳහන් කළේය.
‘දිට්වා’ සුළි කුණාටුවෙන් හානි වූ මාවිල්ආරු සොරොව්ව තාවකාලිකව පිළිසකරකර, ගොවීන් සඳහා ජලය නිකුත් කිරීම අද (30) සිදු කළේය.
ඒ අනුව ගොවි සංවිධාන 47කට අයත් ගොවි පවුල් 14,000කට, අක්කර 25,000කට වැඩි ප්රමාණයක වී වගා කටයුතු සිදුකිරීමට යළි අවස්ථාව උදාවිය.
මාවිල්ආරු සොරොව්වේ ආරක්ෂක බැම්ම කි.මී. 5ක් පමණ දිගින් යුතුව ඇති අතර, සුළි කුණාටුව හේතුවෙන් එය ස්ථාන 12කින් කි.මී. 1.5ක පමණ ප්රමාණයකින් හානි සිදුවිය.
ඒ අනුව එහි ප්රතිසංස්කරණ කටයුතු මේ වනවිට ආරම්භකර ඇති අතර, එතෙක් යල කන්නයේ වගා සඳහා තාවකාලික බැම්මක් ඉදිකර මෙලෙස අවශ්ය ප්රමාණයට ජලය රඳවා ගැනීමට වාරිමාර්ග දෙපාර්තමේන්තුව කටයුතු කර ඇත.
මාවිල්ආරු ජලාශයෙන් කල්ලාරු, දෙහිවත්ත, නීලපොල, ඊචලාම්පත්තු, සේරුනුවර යන ගම්මාන සඳහා මෙලෙස ජලය නිකුත් කරනු ලැබීය.
මෙම අවස්ථාවට විදේශ කටයුතු සහ විදේශ රැකියා නියෝජ්ය අමාත්ය අරුන් හේමචන්ද්ර මහතා ඇතුළු පිරිසක් සහභාගි වූහ.
2022 වසරේදී උප පොලිස් පරීක්ෂකවරයෙකුට අමානුෂික ලෙස පහරදීමේ සිද්ධිය සම්බන්ධයෙන් එම නිලධාරියාගේ මූලික මිනිස් අයිතිවාසිකම් උල්ලංඝනය කර ඇති බවට ශ්රේෂ්ඨාධිකරණය තීන්දු කර තිබේ.
ඒ අනුව, මෙම පහරදීම සිදු කළ පොලිස් පරීක්ෂකවරුන් තිදෙනා විසින් පෙත්සම්කරුට රුපියල් ලක්ෂ 15ක වන්දියක් සිය පෞද්ගලික මුදල්වලින් ගෙවිය යුතු බවට අධිකරණය නියෝග කර ඇත.
එම මුදලින් රුපියල් ලක්ෂ 5 බැගින් පහරදීම සිදු කළ පොලිස් පරීක්ෂකවරුන් තිදෙනා විසින් ගෙවිය යුතු බව සඳහන් වේ.
තවද, සිද්ධියෙන් අනතුරුව පෙත්සම්කරුගේ වැඩ තහනම් කිරීමට ගනු ලැබූ තීරණය නීතිවිරෝධී බවත්, එමඟින්ද මූලික අයිතිවාසිකම් උල්ලංඝනය වී ඇති බවත් අධිකරණය තීරණය කර ඇත.
ඒ අනුව එවක ගම්පහ සහකාර පොලිස් අධිකාරීවරයා විසින්ද රුපියල් 50,000ක වන්දියක් සිය පෞද්ගලික මුදල්වලින් ගෙවිය යුතු බවට නියෝග කර ඇත.
මෙම නඩුව ගම්පහ පොලිසියේ සේවය කළ උප පොලිස් පරීක්ෂකවරයෙකු විසින් ඉදිරිපත් කළ මූලික අයිතිවාසිකම් පෙත්සමක් අනුව විභාග කර ඇති අතර, විනිසුරු මණ්ඩලයේ එකඟත්වයෙන් මෙම තීන්දුව ප්රකාශයට පත් කර ඇත.
මුදල් අමාත්යාංශය සතු අමෙරිකානු ඩොලර් මිලියන 2.5ක් අස්ථානගත වූ සිද්ධිය සම්බන්ධයෙන් වැඩතහනමට ලක්ව සිටි මහ භාණ්ඩාගාරයේ විදේශ සම්පත් දෙපාර්තමේන්තුවේ සහකාර අධ්යක්ෂ රංග රාජපක්ෂ මහතා සිය ගෙවත්තේදී සැකකටයුතු ලෙස මියගොස් තිබුණි.
වැඩතහනමට ලක්ව සිටින මහා භාණ්ඩාගාරයේ විදේශ සම්පත් දෙපාර්තමේන්තුවේ සහකාර අධ්යක්ෂ රංග රාජපක්ෂ මහතා සැකකටයුතු ලෙස මියගොස් ඇති බවට අද පස්වරුවේ කුලියාපිටිය පොලීසියට තොරතුරක් ලැබී ඇත.
පොලිසිය පැවසුවේ රාජපක්ෂ මහතා ගෙවත්තේ වැටී සිටි අයුරු දුටු දියණිය ඒ පිළිබඳව මවට දැනුම්දීමෙන් අනතුරුව ඇය විසින් පොලිසිය දැනුම්වත් කර ඇති බවය.
ඒ අනුව පොලිසිය කුලියාපිටිය, පහළ වීරඹේ ප්රදේශයේ පිහිටි රාජපක්ෂ මහතාගේ නිවසට ගොස් සිදුකළ පරීක්ෂාකිරීමේදී ගෙවත්තේ කෙසෙල් පඳුරක් අසල තරමක විශාල ලේ පැල්ලමක් තිබෙන අයුරු නිරීක්ෂණය කර තිබේ.
එමෙන්ම රාජපක්ෂ මහතාගේ පාදයක සහ අතක කැපුම් තුවාල තුනක් දක්නට ලැබෙන බව පොලීසිය සඳහන් කළේය.
එමෙන්ම ඔහු වැටී සිටි ස්ථානය ආසන්නයේ තිබී කුඩා ප්රමාණයේ පිහියක්ද හමුවී තිබේ.
ඒ අනුව මෙය සැකකටයුතු මරණයක් ලෙස සලකා පොලිසිය ඒ පිළිබඳව විමර්ශන ආරම්භ කළ අතර ඒ අනුව මෙය ඝාතනයක්ද නැතහොත් සියදිවි නසාගැනීමක්ද යන්න පිළිබඳව විමර්ශන ක්රියාත්මකය.
කුලියාපිටිය මහේස්ත්රාත්වරිය අද පස්වරුවේ එම ස්ථානයට පැමිණ මහේස්ත්රාත් පරීක්ෂණය සිදුකළේය.
මුදල් අමාත්යාංශය සතු අමෙරිකානු ඩොලර් මිලියන 2.5ක් අස්ථානගත වූ සිද්ධිය සම්බන්ධයෙන් සිදුකරන විමර්ශනවලට අදාළව ඔහු අවස්ථා තුනකදී අපරාධ පරීක්ෂණ දෙපාර්තමේන්තුව වෙත කැඳවා තිබුණි.
එලෙස ඔහුව කැඳවා ඇත්තේ, සේවයේ නිරතව සිටින සමයේ එක් අවස්ථාවකත් වැඩ තහනමට ලක්ව සිටින සමයේ අවස්ථා දෙකකදීත් ලෙසයි.
ඒ සෑම අවස්ථාවකදීම ඔහු පැමිණ විමර්ශන සඳහා සහාය ලබා දී ඇති බවත්, ඔහුගේ පරිගණකය ද අපරාධ පරීක්ෂණ දෙපාර්තමේන්තුව භාරයට ගෙන තිබූ බවත් විමර්ශන නිලධාරීන් සඳහන් කළේය.
මෙතෙක් සිදුකළ විමර්ශනවලදී හෙළිවී ඇත්තේ, හැකර්වරුන් විසින් ව්යාජ ඊ මේල් පණිවුඩය මගින් ලබාදුන් බැංකු ගිණුමට මුදල් බැරකිරීමේ මූලික පියවර මෙම නිලධාරියාගේ නොසැලකිල්ල මත සිදුව ඇති බවය.
හැකර්වරුන් විසින් එවන ලද පළමු ඊමේල් පණිවුඩයට ප්රතිචාර දක්වා ඇත්තේද මොහු විසින් බව වාර්තා වෙයි.
මොහුට අධිකරණය මගින් විදෙස්ගමන් තහනමක් ද පනවා තිබේ.
ඔහුගේ පසුබිම සම්බන්ධයෙන් සිදුකළ පරීක්ෂා කිරීමේදී ඔහු දූෂිත නිලධාරියෙකු නොවන බවට මූලික විමර්ශනවලදී හෙළි වූ බවත්, ඔහු අත්අඩංගුවට ගැනීමට තරම් කරුණු වාර්තාවීමක් නොවූ බවද විමර්ශන නිලධාරීන් පවසයි.
කෙසේවෙතත්, වැඩ තහනමට ලක්වීමෙන් පසුව ඔහු සිත්තැවුලෙන් සිට ඇති බවද වාර්තාවෙයි.
රාජපක්ෂ මහතාගේ මරණය විමර්ශනවලට දැඩි බාධාවක් බව උසස් පොලිස් නිලධාරියෙක් සඳහන් කළේය.
රජය ඩිජිටල්කරණය ප්රවර්ධනයට සෑම විටම කටයුතු කරන බව මුදල් ක්රම සම්පාදන නියෝජ්ය අමාත්ය ආචාර්ය අනිල් ජයන්ත මහතා පවසයි.
අමාත්යවරයා මේ බව ප්රකාශ කළේ, බහාලුම් මුදා හැරීම ඇතුළු ක්ෂේත්ර කිහිපයක කටයුතු ඩිජිටල්කරණයට ලක් කිරීමේ අවස්ථාවට අද (30) එක්වෙමිනි.
මෙම ක්රියාවලිය තුළින් නිලධාරීන්ට සිය අභිමතය පරිදි බහාලුම් මුදාහැරීමට හැකි වටපිටාවක් වෙනුවට සියලුම ආනයනකරුවන්ට එකම ක්රමවේදයක් යටතේ වේගවත්ව සේවාවන් ලබාදීමට හැකිවනු ඇත.
අල්ලස දූෂණය සඳහා ඇති අවස්ථා ද මෙමගින් අවම වන බව අමාත්යවරයා වැඩිදුරටත් ප්රකාශ කළේය.
මෙම ඩිජිටල්කරණ ක්රියාවලිය මඟින් වෙළෙඳ ප්රජාව වෙත වඩාත් කාර්යක්ෂම සහ විනිවිදභාවයෙන් යුතු සේවාවක් ලබාදීම සිදු කෙරෙනු ඇති බව මුදල් අමාත්යාංශ නිවේදනය කළේය.
බහාලුම මුදා හැරීම, ආනයන කටයුතු සඳහා මුදල් වැය කිරීම, භාණ්ඩ ප්රවාහන නෞකාවලින් ගාස්තු අයකිරීම යන කටයුතු ඩිජිටල්කරණයට ලක් කිරීම අද (30) සිදු කෙරුණි.
ඒ අනුව මෙතෙක් දින කිහිපයක් ගත කරමින් භෞතිකව ලියකිවිලි රැසක් ඔස්සේ කළ ඇතැම් කටයුතු සිය කාර්යලයේ සිටම විනාඩි කිහිපයකින් සිදු කිරීමට නාවික සමාගම්වලට අවස්ථාව උදාවන බව මුදල් අමාත්යාංශය වැඩිදුරටත් සඳහන් කරයි.
කැප්පෙටිපොළ සහතික කල පිරිමි පාසලේ සිටි දරුවන් පිරිසකට හිංසාකාරි ලෙස බටවලින් හා පොලුවලින් පහරදුන් එහි අධීක්ෂණ නිලධාරියෙකු ඇතුළු සිව්දෙනෙකු වැලිමඩ පොලිසිය විසින් අද (30) අත්අඩංගුවට ගෙන තිබේ.
මෙලෙස අත්අඩංගුවට ගෙන ඇති පිරිස අතර එම පාසලේ දරුවන්ට වෘත්තීය මගපෙන්වීම ලබාදුන් අරක්කැමියෙකු, විදුලි කාර්මිකයෙකු හා පෙදරේරු උපදේශකයකු ද සිටින බව සඳහන්ය.
විවිධ වැරදි සම්බන්ධයෙන් වරදකරුවන් වූ වයස 13 -18 අතර දරුවන්ව පුනුරුත්තාපනය කිරීම සඳහා මෙම පාසල පවත්වාගෙන යනු ලබන්නක්ය.
එසේ නමුත් එහි දරුවන් පිරිසකට හිංසාකාරි ලෙස සිදුකරන පහරදීම් දරාගැනීමට නොහැකිව, එම දරුවන් ඒ බව ජාතික ළමා ආරක්ෂක අධිකාරිය ට දුරකතනයෙන් දැනුම්දී තිබේ.
ඉන් පසු ක්රියාත්මක වූ බණ්ඩාරවෙල පොලිස් කොට්ඨාස ළමා කාර්යංශය හා පළාත් ළමා ආරක්ෂක නිලධාරින් වැලිමඩ පොලිස් නිලධාරීන් එක්ව අදාළ සහතික කළ පාසලට පැමිණ ඇත.
එහිදී ළමුන් ලබාදුන් කටඋත්තර මත මෙම පිරිස අත්අඩංගුවට ගෙන අධිකරණයට ඉදිරිපත් කර තිබේ.
එහිදී මහෙස්ත්රාත්වරයා විසින් සැකකරුවන්ව දින 14ක් රක්ෂිත බන්ධනාගාරගත කිරීමට නියෝග කර ඇත.
දේශීය ආදායම් දෙපාර්තමේන්තුවේ කලුතර ප්රාදේශීය කාර්යාලයේ අද (30) රාත්රියේ ගින්නක් හටගෙන තිබේ.
අප වාර්තාකරු සඳහන් කළේ, කාර්යාලයේ දෙවන මහලේ පිහිටි පරිගණක දත්ත පද්ධතිය ඇතුළත් කොටසේ මෙම ගින්න ආරම්භ වී ඇති බවයි.
ගින්නට හේතුව හෝ සිදුවූ හානිය පිළිබඳව මෙතෙක් නිශ්චිත තොරතුරු අනාවරණය වී නොමැත.
කළුතර නගර සභාවේ ගිනි නිවීමේ ඒකකය විසින් මේ වනවිට ගින්න පාලනය කිරීම සඳහා ක්රියාමාර්ග ගනිමින් සිටී.
මුදල් අමාත්යාංශය සතු අමෙරිකානු ඩොලර් මිලියන 2.5ක් අස්ථානගතවූ සිද්ධිය සම්බන්ධයෙන් වැඩ තහනමට ලක්ව සිටි නිලධාරීන් සිව් දෙනාගෙන් විදේශ සම්පත් දෙපාර්තමේන්තුවේ සහකාර අධ්යක්ෂවරයා ලෙස කටයුතු කළ රංග රාජපක්ෂ මහතා අබිරහස් ලෙස මියගොස් තිබේ.
ඔහුගේ මළසිරුර කුලියාපිටිය ප්රදේශයේ පිහිටි නිවසේ තිබී හමුවී ඇති අතර පසුව ඒ සම්බන්ධයෙන් පවුලේ ඥාතීන් විසින් පොලිසිය දැනුවත් කර තිබේ.
ඒ අනුව මේ වනවිට පොලිසිය අදාළ ස්ථානය වෙත ගොස් මූලික විමර්ශන ආරම්භ කර ඇත.
කෙසේවෙතත් කවුරුන් විසින් හෝ මොහුව ඝාතනය කළේද ? එසේ නොමැතිනම් සියදිවි හානි කරගත්තේද ? හෝ අත්වැරදීමකින් පාදයේ නහරයක් කැපී යෑම හේතුවෙන් මියගියේද ? යන්න සම්බන්ධයෙන් මේ වනතෙක් නිශ්චිත තොරතුරු අනාවරණය වී නොමැත.
අමෙරිකානු ඩොලර් මිලියන 2.5ක මුදලක් හැකර්වරුන් අතට පත්වීමේ සිද්ධිය සම්බන්ධයෙන් මොහු ඇතුළු නිලධාරීන් සිව් දෙනෙකුගේ වැඩ තහනම් කිරීමට පසුගියදා මුදල් අමාත්යාංශය පියවර ගෙන තිබුණි.
රංග රාජපක්ෂ මහතා කුලියාපිටිය මධ්ය මහා විද්යාලයේ ආදි ශිෂ්යයෙකු සහ ශ්රී ජයවර්ධනපුර විශ්වවිද්යාලයේ ආදි විද්යාර්ථයෙකුද වනවා.
සිද්ධිය සම්බන්ධයෙන් කුලියාපිටිය පොලිසිය වැඩිදුර විමර්ශන සිදුකරයි
