Author: Shashi Maduranga

සතුන් දඩයම් කිරීම සඳහා අටවා තිබූ බදින තුවක්කුවක් පත්තුවීමෙන් සිය තල හේනට ගිය පියෙකු අවසන් ගමන් යයි…..

තිරප්පනේ, උට්ටිමඩුව ප්‍රදේශයේදී වනසතුන් දඩයම් කිරීම සඳහා අටවා තිබූ බදින තුවක්කුවක් පත්තුවීමෙන්, සිය වගා බිමට යමින් සිටි පියෙකු අද (09) අලුයම් කාලයේදී ජීවිතක්ෂයට පත්ව ඇතැයි තිරප්පනේ පොලීසිය පවසයි.

මෙලෙස අවාසනාවන්ත ලෙස මියගොස් ඇත්තේ සිවලාකුලම, කුට්ටිකුලම ලිපිනයේ පදිංචි (54) හැවිරිදි විශ්‍රාමික හමුදා සෙබළකු වන තිදරු පියෙකි.

ඔහු ශ්‍රී ලංකා යුද හමුදාවේ සේවය කර විශ්‍රාම ලැබූ අයෙක් බව සඳහන් වෙයි.

මියගිය පුද්ගලයා අද අලුයම් කාලයේ උට්ටිමඩුව ප්‍රදේශයේ පිහිටි සිය තල හේන වෙත යමින් සිටියදී, මාර්ගය අසල වූ කුඩා කැලෑබද ප්‍රදේශයක වල් ගෝනුන් දඩයම් කිරීම සඳහා කිසියම් පිරිසක් විසින් අටවා තිබූ බදින තුවක්කුවකට මෙලෙස ගොදුරු වී තිබේ.

බදින තුවක්කුව පත්තුවන ශබ්දය ඇසී ඒ අසල සිටි පිරිසක් වහා එම ස්ථානයට ගොස් පරීක්ෂා කර ඇත. ඒ වන විටත් පපුව සහ ඉණ අතර ප්‍රදේශයට වෙඩි වැදී බරපතළ තුවාල ලබා බිම වැටී සිටි රත්නායක මහතා, එම පිරිස විසින් වහාම පයිරමඩුව රෝහලට ඇතුළත් කිරීමට පියවර ගෙන තිබුණි.

කෙසේ වෙතත් රෝහල් ගත කිරීමෙන් සුළු වේලාවකට පසු ඔහු මියගොස් ඇති බව රෝහල් ආරංචි මාර්ග සඳහන් කර තිබේ.

සිද්ධිය සම්බන්ධයෙන් මහෙස්ත්‍රාත් පරීක්ෂණය සහ පශ්චාත් මරණ පරීක්ෂණය අද (09) දින සිදු කිරීමට නියමිතව ඇත.

අදාළ බදින තුවක්කුවක් ඇටවූ සැකකරුවන් අත්අඩංගුවට ගැනීම සඳහා තිරප්පනේ පොලීසිය වැඩිදුර පරීක්ෂණ මෙහෙයවයි.

දේහය මේ වන විට පයිරමඩුව රෝහලේ මෘත ශරීරාගාරයේ තැන්පත් කර ඇති බව වැඩිදුර සඳහන් වෙයි.

හිටපු ජනපති මහින්දට අල්ලස් කොමිසමෙන් කැඳවීමක්……

එයාර් බස් ගනුදෙනුව සම්බන්ධයෙන් ප්‍රකාශයක් ලබාදීම සඳහා හිටපු ජනාධිපති මහින්ද රාජපක්ෂ මහතාට අල්ලස් හෝ දූෂණ චෝදනා විමර්ශන කොමිසම හමුවේ පෙනී සිටින ලෙසට කැඳවීමක් ලැබී තිබේ.

ඒ අනුව එළැඹෙන 12 වැනි දින අල්ලස් කොමිසම හමුවේ පෙනී සිටින ලෙස හිටපු ජනාධිපතිවරයාට ලිපියක් මගින් දැනුම් දී ඇත.

මෙම ලිපිය අද දින (09) දින තංගල්ලේ පිහිටි කාල්ටන් නිවස්ට භාරදී ඇති අතර පසුගිය සතියේ හිටපු ජනාධිපති මහින්ද රාජපක්ෂ මහතාට අල්ලස් කොමිසමෙන් කැඳවීමක් කර ඇති බවට මාධ්‍ය මගින් පැවසුවත් ලිපියක් භාරදී නොතිබිණි.

මෙම ලිපිය ලැබී ඇත්තේ ශ්‍රී ලන්කන් හිටපු සභාපති කපිල චන්ද්‍රසේන අභිරහස් ලෙස මියගිය පසු පැය 24 ක් යන්නට මත්තෙනි.

2013 වසරේදී ශ්‍රී ලන්කන් ගුවන් සමාගමට එයාර්බස් A-330 ගුවන් යානා 06ක් සහ A- 350 වර්ගයේ ගුවන් යානා 08 ක් මිලට ගැනීමේදී, අමෙරිකානු ඩොලර් මිලියන 02ක මුදලක් අල්ලස් ලෙස ලබාගත්තේ යැයි එවක ශ්‍රීලන්කන් ගුවන් සේවයේ ප්‍රධාන විධායක නිලධාරී කපිල චන්ද්‍රසේනට සහ ඔහුගේ බිරිඳ වන නියෝමාලි විජේනායකට චෝදනා එල්ල වුණි.

විමර්ශන අතරතුර අල්ලස් කොමිසමේ නිලධාරින් අධිකරණයට පැවසුවේ මෙම ගනුදෙනුවේදී තමන්ට ලද අමෙරිකානු ඩොලර් මිලියන 02ක මුදලින් රුපියල් මිලියන 20ක් එවක සිවිල් ගුවන් සේවා අමාත්‍ය ප්‍රියංකර ජයරත්න මහතාටද, රුපියල් මිලියන 60ක් එවකට ජනාධිපති මහින්ද රාජපක්ෂ මහතාටද ලබාදුන් බව කපිල චන්ද්‍රසේන පැවසූ බවය.

නමුත් ඊට විරෝධය දැක්වූ ජනාධිපති නීතිඥ රියන්සි අර්සකුලරත්න මහතා අධිකරණයට දිවුරුම් ප්‍රකාශයක් ඉදිරිපත් කරමින් කියා සිටියේ අල්ලස් කොමිසමේ අධ්‍යක්ෂ ජනරාල්වරයා සිය සේවාදායකයාගෙන් තර්ජනය කර ප්‍රකාශ ලබාගෙන ඇති බවය.

කුරුණෑගල නි. නගරාධිපති රිමාන්ඩ්…..

රුපියල් ලක්ෂ 30ක අල්ලස් මුදලක් ලබාගැනීමට යාමේදී අල්ලස් කොමිසමේ නිලධාරින් විසින් අත්අඩංගුවට ගත් කුරුණෑගල මහනගර සභාවේ නියෝජ්‍ය නගරාධිපති මොහොමඩ් මොයුනුදීන් මහතා අද (09) අලුත්කඩේ මහේස්ත්‍රාත් අධිකරණයට ඉදිරිපත් කිරීමෙන් පසු එළඹෙන 21 දක්වා රක්ෂිත බන්ධනාගාරගත කර තිබේ.

සැකකරු මෙලෙස අත්අඩංගුවට ගැනුණේ කුරුණෑගල බස් නැවතුම්පොළ සහ පොදු වැසිකිළිය පිරිසිදු කිරීමේ ටෙන්ඩරය ලබාදීමට අදාළව අල්ලසක් ලබාගැනීමට යාමේදීය.

ජාතික ජන බලවේගයට බලය හිමි කුරුණෑගල මහනගර සභාවේ නියෝජ්‍ය නගරාධිපති මොහොමඩ් මොයුනුදීන් අල්ලස් කොමිසමේ නිලධාරීන් විසින් ඊයේ (08) බත්තරමුල්ල ප්‍රදේශයේදී අත්අඩංගුවට ගෙන තිබුණි.

ඒ, කුරුණෑගල බස් නැවතුම්පොළ සහ පොදු වැසිකිළිය පිරිසිදුකිරීමේ ටෙන්ඩරය ලබාදීම සඳහා අල්ලස් ලෙස රුපියල් ලක්ෂ 30ක මුදලක් සහ මාසිකව රුපියල් ලක්ෂ 5 බැගින් වූ මුදලක් ඉල්ලා ඉන් රුපියල් ලක්ෂ 30ක මුදල ලබාගැනීමට යෑමේදීයි.

කුරුණෑගල මහ නගර සභාවේ බලය පිහිටුවීමේදී කිසිදු පක්ෂයකට බහුතරයක් ලබාගැනීමට නොහැකි වූ අතර, අවසානයේදී ජාතික ජන බලවේගය වෙනත් පාර්ශ්වයන්ගේ සහාය ඇතිව බලය තහවුරු කර ගනු ලැබීය.
‍
එහිදී ජාතික ජන බලවේගයට බලය පිහිටුවීමට රිෂාඩ් බදියුදීන් මහතාගේ සමස්ත ලංකා මහජන කොංග්‍රසය නියෝජනය කළ මොහොමඩ් මොයුනුදීන් මහතාද සහාය පළ කළ අතර ඔහු සභාවේ නියෝජ්‍ය නගරාධිපති ධුරයට පත්කෙරුණේ ඒ අනුවය.

අල්ලස් ලබාගැනීමේ චෝදනාව යටතේ අත්අඩංගුවට ගනු ලැබූ කුරුණෑගල මහනගර සභාවේ නි.නගරාධිපති මොහොමඩ් මොයුනුදීන් මහතාගේ පක්ෂ සාමාජිකත්වය වහාම ක්‍රියාත්මක වන පරිදි අත්හිටුවීමට සමස්ත ලංකා මහජන කොංග්‍රසය තීරණය කර තිබුණි.

රජයේ මහජන සේවා සැපයීම් කාර්යක්ෂම කිරීමට ‘PIC-Net’ බළකායක්…….

“මහජන සේවා ප්‍රශස්තකරණය සඳහා බලපෑම් කළ හැකි ආයතනික නියමු ජාලය” (Public Impact Champions Network PIC-Net) ස්ථාපිත කිරීමට සැලසුම් කර තිබේ.

ඒ, රජයේ ඩිජිටල් ආර්ථික සැලැස්මේ ප්‍රධාන අංගයක් ලෙස, රාජ්‍ය අංශය තුළ ආයතනික මට්ටමින් ඩිජිටල් පරිවර්තනයක් ඇති කිරීම සඳහාය.

රාජ්‍ය අංශයේ කාර්යක්ෂමතාව ඉහළ නංවා මහජනතාවට වඩාත් ගුණාත්මක සේවාවක් සැපයීම මෙහි අරමුණ වන බව ජනාධිපති මාධ්‍ය අංශය නිවේදනය කරයි.

මේ පිළිබඳව ජනාධිපති ලේකම් ආචාර්ය නන්දික සනත් කුමානායක මහතා විසින්  චක්‍රලේඛයක් මගින් සියලු අමාත්‍යාංශ ලේකම්වරුන්, පළාත් ප්‍රධාන ලේකම්වරුන්, දෙපාර්තමේන්තු අධ්‍යක්ෂ ජනරාල්වරුන්, කොමසාරිස් ජනරාල්වරුන්, රාජ්‍ය සංස්ථා, ව්‍යවස්ථාපිත මණ්ඩල සහ රජය සතු සමාගම්වල සභාපතිවරුන් දැනුවත් කර ඇත.

PIC-Net වැඩසටහන යටතේ, තෝරාගත් සෑම රාජ්‍ය ආයතනයක්ම ඩිජිටල් යුගයේ සේවා විශිෂ්ටත්වය ප්‍රවර්ධනය සඳහා සාමුහිකව වගකියන නියමුවන් සිව් දෙනෙකුගෙන් යුත් කණ්ඩායමක් සමස්ත සේවක පිරිස අතරින් තෝරා පත්කර ගත යුතුය.

තාක්ෂණික භාවිතය, සේවා අත්දැකීම්, ක්‍රියාවලි කාර්යක්ෂමතාව සහ ආයතනික වෙනස්කම් යන අංශ ඒකාබද්ධව හා මනා සම්බන්ධීකරණයකින් වැඩිදියුණු කිරීමට මෙම කණ්ඩායම සාමුහිකව කටයුතු කරනු ඇත.

මෙම නියමුවන් ඔවුන්ගේ ආයතන තුළ ක්‍රියාවට නැංවෙන ඩිජිටල් පරිවර්තන ක්‍රියාවලියෙහි කේන්ද්‍රීය බලවේගය ලෙස කටයුතු කරනු ඇති අතර, මෙම වැඩසටහන මගින් රාජ්‍ය අංශය පුරා විසිරුණු 400 දෙනෙකුගෙන් පමණ සමන්විත ඩිජිටල් පරිවර්තන නියමුවන්ගේ ජාතික කණ්ඩායමක් නිර්මාණය වේ.

තෝරාගනු ලබන නියමුවන්ට ඩිජිටල් පරිවර්තනය, සේවා ප්‍රතිසැලසුම්කරණය, ක්‍රියාවලි වැඩිදියුණු කිරීම, වෙනස්කම් කළමනාකරණය ආදී කරුණු පිළිබඳ ප්‍රායෝගික කුසලතා ගොඩනැංවීම සඳහා විධිමත් පුහුණුවක් ලබා දීම, ප්‍රායෝගික වැඩමුළු පැවැත්වීම සහ විශේෂඥ මගපෙන්වීම් ලබා දීම ආදිය සිදු කෙරෙනු ඇත.

මෙම නියමුවන් ඩිජිටල් පරිවර්තනය සඳහා වන ආයතනික කේන්ද්‍රීය නිලධාරීන් ලෙස වැඩසටහනේ ක්‍රියාත්මක කාල සීමාවෙන් ඔබ්බට ක්‍රියා කරමින්, ආයතන තුළ සහ ආයතන අතර දැනුම් හා අත්දැකීම් බෙදා ගැනීම හා අඛණ්ඩව වර්ධනය සඳහා ද සක්‍රියව සහාය වනු ඇතැයි අපේක්ෂා කෙරේ.

මෙම සමස්ත ක්‍රියාවලිය තුළ අවශ්‍ය මඟපෙන්වීම සහ සම්බන්ධීකරණ සහාය ජනාධිපති ලේකම් කාර්යාලය, ඩිජිටල් ආර්ථික අමාත්‍යාංශය සහ GovTech Sri Lanka ආයතනය එක්ව ලබා දෙනු ඇත.

ආසියානු සංවර්ධන බංකුවේ (ADB) සහාය ඇතිව වැඩසටහනේ කළමනාකරණ උපදේශකයින් පත් කරනු ලැබ ඇති අතර ආයතන ප්‍රධානීන් විසින් යෝජනා කරනු ලබන නියමුවන් තේරීමේ ක්‍රියාවලිය සඳහාද ඔවුන් සහාය වනු ඇති බව ජනාධිපති මාධ්‍ය අංශය වැඩිදුරටත් පැවසීය.

විදුලි බිල වැඩිවීම රජය ගත්තු කප්පමක් – සජිත්……

රජය විසින් විදුලි බිල වැඩි කිරීමට ගත් තීරණය බාල ගල්අඟුරු ජාවාරමේ බර මෙරට විදුලි පාරිභෝගිකයින්ගේ කරපිට පැටවීමක් බව විපක්ෂනායක සජිත් ප්‍රේමදාස මහතා පවසයි.

විදුලි ගාස්තු ඉහළ දැමීම සම්බන්ධයෙන් විශේෂ ප්‍රකාශයක් සිදුකරමින් විපක්ෂනායකවරයා සඳහන් කරනුයේ මෙම ගල්අඟුරු ජාවාරමේ බර මෙරට විදුලි පාරිභෝගිකයින් පිට පැටවීම සිදු නොකරන ලෙසට ඉල්ලා සිටියද මහජන උපයෝගීතා කොමිසම සහ රජය 18%කින් විදුලි බිල වැඩි කිරීමේ යෝජනාව ක්‍රියාත්මක කර ඇති බවය.

එමෙන්ම මෙම විදුලි බිල වැඩි කිරීම ව්‍යාපාරිකයින් සහ කර්මාන්තකරුවන්ගෙන් රජය විසින් ගනු ලැබූ කප්පමක් බවටද චෝදනා කළ විපක්ෂනායකවරයා සඳහන් කරනුයේ ඒකක 180ට වැඩි විදුලි ඒකක සඳහා මෙම නව විදුලි ගාස්තු අය කිරීම හේතුවෙන් ඉහළ මධ්‍යම පන්තිය, ව්‍යාපාරිකයින්, කර්මාන්තකරුවන් සහ ව්‍යවසායකයින් දැඩි පීඩාවකට පත්ව ඇති බවය.

එහිදී වැඩිදුරටත් අදහස් දැක්වූ විපක්ෂනායක සජිත් ප්‍රේමදාස මහතා,

“සරළව කතා කළොත් ඉහළ මධ්‍යම පන්තියත්, ඒ වගේම ව්‍යාපාරික ප්‍රජාවත්, කර්මාන්තකරුවනුත්, ව්‍යවසායකයනුත් අද මේ විදුලි බිල වැඩිවීමට ලක්වෙලා තියෙනවා. ඇත්ත වශයෙන්ම මේ 18% විදුලි බිල වැඩිවීම අපි දකින්නේ රජය ගත්තු කප්පමක් හැටියට. 18%කින් විදුලි බිල වැඩිකරලා රජය කප්පම් ගන්නේ රටේ ඉහළ මධ්‍යම පන්තියෙන්, කර්මාන්තකරුවන්ගෙන්, ව්‍යවසායකයින්ගෙන් සහ ව්‍යාපාරිකයින්ගෙන්. කුමක් සඳහාද ? බාල ගල්අඟුරු ව්‍යාපෘතියේ ඒ අලාභය මගහරවාගන්න. බාල ගල්අඟුරු ගේනවායි කියලා මුළ ඉඳලාම කිව්වා. මුළ ඉඳලාම රජය කිව්වා එහෙම දෙයක් නෑ කියලා. ඊට පස්සේ කියනවා ගල්අඟුරු නම් බාලයි හැබැයි වංචාවක් දූෂණයක් නෑ කියලා. අපි පැහැදිව කියනවා බාල ගල්අඟුරු ගෙන්වීම තුළ, ඉන්ධන විදුලි ජනනය වෙත යොමුවන්නට රජයට සිදුවුණා. ඒකෙන් විදුලිය නිෂ්පාදනය කිරීමේ පිරිවැය වැඩිවුණා. ඒ නිසාම මේ පිරිවැය වැඩිවීමත් බාල ගල්අඟුරු වංචාවේ වන්දිය ගෙවන්නත් අද සිදුවෙලා තිබෙන්නේ ඒකක 180ට වැඩියෙන් පරිභෝජනය කරන අපේ රටේ ඉහළ මධ්‍යම පන්තියටත්, ව්‍යාපාරිකයින්ටත්, කර්මාන්තකරුවන්ටත්. අපේ රටේ ආර්ථිකයට සුවිසාල දායකත්වයක් ලබා දෙන 52%ක දායකත්වයක් ලබා දෙන ක්ෂුද්‍ර කුඩා මධ්‍ය පරිමාණ කර්මාන්තකරුවන්ටත් සිද්ධ වෙනවා මේ දූෂිත ගල්අඟුරු ජාවාරමේ වන්දිය ගෙවන්න.”

දේශීය අර්තාපල් කිලෝවක් රුපියල් 220කට රජය මිලදී ගනී……

දේශීය අර්තාපල් අස්වැන්න සාධාරණ මිලකට මිලදී ගැනීමේ විශේෂ වැඩපිළිවෙළක් හෙට (10) සිට ක්‍රියාත්මක කිරීමට රජය තීරණය කර තිබේ.

ඒ, එම ගොවීන් මුහුණ දෙන අලෙවිකරණ ගැටළු සඳහා කඩිනම් විසඳුම් ලබාදෙමිනි.

ඒ අනුව දේශීය අර්තාපල් කිලෝවක් රුපියල් 220කට මිලදී ගැනීම නුවරඑළිය බ්ලැක්පූල් ප්‍රදේශයේ පිහිටි, සී/ස නුවරඑළිය කෘෂිකර්ම සමුපකාර සමිතියේ මිලදී ගැනීමේ මධ්‍යස්ථානයේදී ආරම්භ කරන බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යාංශය සඳහන් කළේය.

මෙලෙස මිලදී ගන්නා දේශීය අර්තාපල්  ලංකා සතොස හරහා පාරිභෝගිකයාට සහන මිලකට ලබාදීමට කටයුතු යොදා ඇති බව සඳහන්ය.

එක් ගොවියෙකුගෙන් අර්තාපල් කිලෝ 1,000ක උපරිමයකට යටත්ව මෙම මිලදී ගැනීම සිදු කරන බව එම අමාත්‍යාංශය නිවේදනය කරයි.

ඒ අනුව ගොවීන්ට සිය අස්වැන්න සඳහා සාධාරණ මිලක් ලබාදීමටත්, පාරිභෝගිකයාට සහන මිලට දේශීය අර්තාපල් ලබාදීමටත් රජය සහ පෞද්ගලික අංශයේ වෙළෙඳ ජාලයන් ද එක්ව මෙම කටයුතු සිදු කරනු ඇත.

රතුගල නව ආදිවාසී නායකයා ලෙස නිශාන්ත කුමාර ඇත්තන් පත් කරයි……

රතුගල නව ආදිවාසී නායකයා ලෙස දානිගල මහා බණ්ඩාරලාගේ නිශාන්ත කුමාර ඇත්තන් පත් කර තිබේ.

එම ඇත්තන් මියගිය ආදිවාසී නායක සුදාවන්නිල ඇත්තන්ගේ පුත්‍රයා ද වෙයි.

අසනීප තත්ත්වයෙන් පසු වූ සුදාවන්නිල ඇත්තන් පසුගියදා මිය ගිය අතර එම ඇත්තන්ගේ අවසන් කටයුතු චාරිත්‍රානුකූලව  අද (09) රතුගලදී සිදු කරන ලදී.

සුදාවන්නිල ඇත්තන්ගේ දේහය තැන්පත් කරනු ලැබුවේ, එම ඇත්තන් ජීවත් වු ඉඩමේය.

දේහය භූමදානය කිරීමට පෙර දඹාන ආදිවාසී නායක ඌරුවරිගේ වන්නිල ඇත්තන් විසින් රතුගල ආදිවාසී නායක සුදා වන්නිල ඇත්තන් භාවිත කළ දුන්න සහ කෙටේරිය නව නායකයා වෙත ලබාදෙන ලදී.

දිවයින අවට අඩු පීඩන කලාපයක් – වැස්ස ගැන අවවාදාත්මක නිවේදනයක්….

ශ්‍රී ලංකාව ආශ්‍රීතව පවතින පහළ වායුගෝලීය කැළඹිලි ස්වභාවය, මැයි මස 11 වෙනිදා පමණ වනවිට අඩු පීඩන කලාපයක් දක්වා වර්ධනය විය හැකි බව කාලගුණ විද්‍යා දෙපාර්තමේන්තුව පවසයි.

කෙසේ වෙතත් එය ඉදිරි දින 07 තුළ පීඩන අවපාතයක් දක්වා වර්ධනයවීමේ සම්භාවිතාව ඉතා අඩු බව එම දෙපාර්තමේන්තුව පෙන්වා දෙයි.

ඒ අනුව පළමු දින තුන තුළ එය පීඩන අවපාතයක් දක්වා වර්ධනය නොවනු ඇත.

පස්වන දිනයේදී පීඩන අවපාතයක් දක්වා වර්ධනයවීමේ සම්භාවිතාව අඩුව වූවත් හය වන දිනයේදී එම සම්භාවිතාව සාමාන්‍ය අගයක පවතින බව කාලගුණ විද්‍යා දෙපාර්තමේන්තුව සඳහන් කරයි.

කෙසේ වෙතත් හත් වන දිනයේදී එම සම්භාවිතාව ඉහළ බව එම දෙපාර්තමේන්තුව නිකුත් කළ නිවේදනයේ දක්වා තිබේ.

අද (09) දින ලබාගත් දත්ත මත මෙම කාලගුණ අනාවැකිකරණය සිදු කර ඇත.

මේ අතර දිවයිනට වඩා පවතින පීඩන අවපාතය හේතුවෙන් දැනට පවතින වැසි තත්ත්වය ඉදිරි දිනවල බලාපොරොත්තු විය හැකි බව කාලගුණ විද්‍යා දෙපාර්තමේන්තුව වැඩිදුරටත් පැවසීය.

මෙරට තුළ යුරෝපා සංගම් ආයෝජන වැඩි කිරීමේ හැකියාව කෙරෙහි අවධානය…..

යුරෝපා සංගම් බාහිර ක්‍රියාකාරී සේවයේ ඉන්දු – පැසිෆික් කලාපය සඳහා වූ යුරෝපා සංගම් විශේෂ නියෝජිත මාරියා කැස්ටිලෝ මහත්මිය විදේශ කටයුතු හා විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා හමුව තිබේ.

මාරියා කැස්ටිලෝ මහත්මියගේ මෙරට නිල සංචාරය අතරතුර අද (09) දින නියෝජ්‍ය අමාත්‍යවරයා හමුවිය.

2925 නොවැම්බර් මාසයේදී  බ්‍රසල්ස්හි පැවති  04 වන යුරෝපා සංගම් ඉන්දු-පැසිෆික් අමාත්‍ය සංසදයේදී ඇතිවූ සාකච්ඡා මත පදනම්ව, මෙම හමුවේදී දෙපාර්ශවය අතර අදහස් හුවමාරු විය.

මෙහිදී ඉන්දියානු සාගරය හා ඉන්දු-පැසිෆික් කලාපය තුළ ශ්‍රී ලංකාවේ උපායමාර්ගික වැදගත්කම, ගෝලීය සම්බන්ධතා, වෙළඳාම සහ සමුද්‍රීය ආරක්ෂාව සම්බන්ධයෙන් අවධානය යොමු කෙරිණි.

එමෙන්ම සමුද්‍රීය ආරක්ෂාව සහ නාවික ගමනාගමන කටයුතු  ආරක්ෂා කිරීමේදී UNCLOS සම්මුතියේ වැදගත්කම නැවත තහවුරු කරමින්, CRIMARIO සහ IORIS වැනි කලාපීය මුලපිරීම් සඳහා ශ්‍රී ලංකාවේ සහභාගීත්වය පිළිබඳව ද සාකච්ඡා කෙරිණි.

බලශක්ති ආරක්ෂාව සහ ගෝලීය සම්බන්ධතාව ආරක්ෂා කිරීම පිළිබඳව ද දෙපාර්ශවය අදහස් හුවමාරු කරගත් අතර, මැදපෙරදිග වත්මන් තත්ත්වය සහ  බලශක්ති ආරක්ෂාව, වෙළඳාම, සංචාරක ව්‍යාපාරය හා ආහාර සුරක්ෂිතභාවය කෙරෙහි ඇති බලපෑම් පිළිබඳව ද අවධානය යොමු විය.

විශේෂයෙන් පුනර්ජනනීය බලශක්තිය, හරිත බලශක්තිය සහ සම්බන්ධතා ආශ්‍රිත ව්‍යාපෘති සඳහා ශ්‍රී ලංකාව තුළ යුරෝපා සංගම් ආයෝජන වැඩි කිරීමේ හැකියාව පිළිබඳවද මෙහිදී යුරෝපා සංගම් විශේෂ නියෝජිතවරිය සඳහන් කළාය. එමෙන්ම ගෝලීය අභියෝග හමුවේ හවුල්කාරිත්වයන් විවිධාංගීකරණය කිරීමේ වැදගත්කම ද ඒ මහත්මිය මෙහිදී අවධාරණය කළාය.

නව රෙගුලාසි යටතේ ශ්‍රී ලංකාව GSP+ යෝජනා ක්‍රමයට නැවත අයදුම් කිරීමට පෙර ත්‍රස්තවාදය වැළැක්වීමේ පනත සංශෝධනය කිරීමේ ක්‍රියාවලියේ වත්මන් තත්ත්වය පිළිබඳව නියෝජ්‍ය අමාත්‍යවරයා විසින් පැහැදිලි කළ අතර, නීතියේ ආධිපත්‍යය, යහපාලනය සහ මානව හිමිකම් සඳහා ශ්‍රී ලංකාවේ අඛණ්ඩ කැපවීම නැවත තහවුරු කළේය.

මැයි 9 වන දින සමරනු ලබන යුරෝපීය දිනය නිමිත්තෙන් විශේෂ නියෝජිතවරියට සහ ඇයගේ දූත පිරිසට සුබ පැතුම් ද මෙහිදී නියෝජ්‍ය අමාත්‍යවරයා විසින් එක් කරනු ලැබීය.

මෙම හමුව සඳහා ශ්‍රී ලංකාවේ යුරෝපා සංගම් තානාපතිනි කාමන් මොරෙනෝ මහත්මිය, කොළඹ යුරෝපා සංගම් නියෝජිත කණ්ඩායමේ ජ්‍යෙෂ්ඨ නිලධාරීන් සහ විදේශ කටයුතු, විදේශ රැකියා හා සංචාරක අමාත්‍යාංශයේ නිලධාරීන් ද සහභාගී වූහ.

මිය ගිය කපිලගේ සිරුරේ කොටස් රජයේ රස පරීක්ෂක වෙත යොමු කරයි…..

මිය ගිය ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන මහතාගේ සිරුරු කොටස් රජයේ රස පරීක්ෂක වෙත යොමු කර තිබේ.

ඒ, මරණයට හේතුව කුමක්ද යන්න පිළිබඳ නිශ්චිතව සොයාගැනීම සඳහාය.

එම වාර්තාව ඉදිරි දින කිහිපය තුළදී ලබාදීමට නියමිත බව පොලිසිය සඳහන් කළේය.

ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන මහතාගේ මළ සිරුර කොල්ලුපිටිය ප්‍රදේශයේ නිවසක තිබියදී හමුවූයේ ඊයේ (08) උදෑසන හමුවිය.

ගෙල වැළලාගෙන මියයන්නට ඇතැයි සැක කෙරුණු මෙම මරණය සම්බන්ධයෙන් විමර්ශන මේ වන විට කොළඹ අපරාධ කොට්ඨාසයට භාරදී තිබේ.

මේ අතර චන්ද්‍රසේන මහතාගේ මෘත ශරීරය සම්බන්ධයෙන් වූ පශ්චාත් මරණ පරීක්ෂණය සිදු කිරීම සඳහා කොළඹ ප්‍රධාන විශේෂඥ අධිකරණ වෛද්‍ය නිලධාරී ශ්‍රියන්ත අමරරත්න මහතාගේ සභාපතිත්වයෙන් යුතු පංච පුද්ගල විශේෂඥ අධිකරණ වෛද්‍ය කමිටුවක් පත්කරනු ලැබීය.

ඒ කොටුව මහේස්ත්‍රාත් පසන් අමරසේන මහතා ඊයේ (08) ලබාදුන් නියෝගයට අනුවය.

ඒ අනුව පශ්චාත් මරණ පරීක්ෂණය කොළඹ අධිකරණ වෛද්‍ය හා විෂවේද ආයතනයේදී අද (09) පෙරවරුවේ සිදු කෙරුණි.

එහිදී ඔහුගේ සිරුරු කොටස් රසායනාගාර පරීක්ෂණ සඳහා ලබාගෙන ඇති බවයි පොලිසිය සඳහන් කළේය.

මේ සඳහා රජයේ රස පරීක්ෂකවරයා ද එක්ව තිබේ.

ඒ අනුව චන්ද්‍රසේන මහතාගේ මරණයට හේතුව කුමක් ද යන්න පිළිබඳව ඉදිරි දින කිහිපය තුළ රසායනික පරීක්ෂණවලින් අනතුරුව ලබාදීමට නියමිත බවට තොරතුරු වාර්තා වෙයි.

කපිල චන්ද්‍රසේන මහතා සැකකටයුතු ලෙස ඊයේ (08) මියගොස් තිබුණේ ඔහු අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්‍රධාන මහේස්ත්‍රාත් අධිකරණයෙන් වරෙන්තුවක් නිකුත් කර තිබූ පසුබිමකය.

2013 වසරේ ප්‍රශ්නගත එයාර්බස් ගනුදෙනුවේදී අමෙරිකානු ඩොලර් මිලියන 02ක් අල්ලස් ගැනීම සම්බන්ධයෙන් වූ නඩුවට අදාළව දින 54ක් රක්ෂිත බන්ධනාගාරගත කර සිටි චන්ද්‍රසේන මහතා ඉකුත් මැයි 05 වනදා අධිකරණය විසින් මුදාහැරුණේ රුපියල් ලක්ෂ 5ක මුදල් ඇපයක් සහ ළඟම ඥාතීන් තිදෙනෙකුගේ රුපියල් ලක්ෂ 100ක ශරීර ඇප තබන ලෙස කොන්දේසි පනවමිනි.

එහිදී අධිකරණයට වාර්තා වූයේ කපිල චන්ද්‍රසේන මහතා ඇප කොන්දේසි සම්පූර්ණ කිරීම සඳහා ඥාතීන් බවට ව්‍යාජ ලෙස අඟවමින් පුද්ගලයින් දෙනෙකු ඉදිරිපත් කර ඇති බවය.

අධිකරණයේ විශ්වාසය කඩකිරීම සම්බන්ධයෙන් කපිල චන්ද්‍රසේන මහතා නඩු විභාගය අවසන් වනතුරු රක්ෂිත බන්ධනාගාරගත කරන ලෙස අල්ලස් කොමිසම කළ ඉල්ලීම සලකා බැලු මහේස්ත්‍රාත්වරයා සැකකරුට යළි වරෙන්තු නිකුත් කළේය.

චන්ද්‍රෙස්න මහතා මියගොස් තිබුණේ එම වරෙන්තුව අනුව ඊයේ (08) ඔහු අධිකරණය හමුවේ පෙනී සිටීමට නියමිතව තිබුණු පසුබිමකය.