සමාජ ආරක්ෂණ දායකත්ව බදු (සංශෝධන) පනත් කෙටුම්ප තෙවනවර කියවීම සංශෝධන සහිතව සම්මත වී තිබේ.
මේ අතර සමාජ ආරක්ෂණ දායකත්ව බද්ද (සංශෝධන) පනත් කෙටුම්පත රජයේ මුදල් පිළිබඳ කාරක සභාවේදී සලකා බලා අනුමත කර ඇත.
මෙම කාරක සභාව පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් සහ නියෝජ්ය අමාත්යවරුන් වන චතුරංග අබේසිංහ, (ආචාර්ය) කෞෂල්යා ආරියරත්න, නිශාන්ත ජයවීර, පාර්ලිමේන්තු මන්ත්රීවරයන් වන රවී කරුණානායක, නීතිඥ ලක්මාලි හේමචන්ද්ර යන පිරිසගේ සහභාගීත්වයෙන් පසුගිය 02 වනදා පාර්ලිමේන්තුවේදී රැස්වූ අවස්ථාවේදීය.
2026 අයවැය යෝජනා අනුව, 2022 අංක 25 දරන සමාජ ආරක්ෂණ දායකත්ව බදු පනතට මෙම සංශෝධන ඉදිරිපත් කර ඇත. ඒ අනුව, 2026 ජූලි 01 සිට බද්දට ලියාපදිංචි වීමට අදාළ වාර්ෂික පිරිවැටුම් සීමාව රු. මිලියන 60 සිට රු. මිලියන 36 දක්වා අඩු කර ඇත.
තවද, 2026 මැයි 01 සිට වාහන ආනයනයේදී හෝ නිෂ්පාදනයෙන් විකිණීමේදී සමාජ ආරක්ෂණ දායකත්ව බද්ද අය කිරීමටත්, තොග හා සිල්ලර වෙළඳාම එම බද්දෙන් නිදහස් කිරීමටත් තීරණය කර ඇත.
මෙහිදී අදහස් දක්වමින් කාරක සභා සභාපති හර්ෂ ද සිල්වා මහතා පෙන්වා දුන්නේ සමාජ ආරක්ෂණ දායකත්ව බද්ද සහ එකතු කළ අගය මත බද්ද (VAT) සංශෝධනය කර එක් බදු ක්රමයක් ලෙස පවත්වාගෙන යාමේ අවශ්යතාවයයි. එමෙන්ම, දැනට පවතින බදු ආදායම පවත්වාගෙන යාමට අවශ්ය පියවර ගනිමින් ඉදිරියේදී බදු ව්යුහය සංශෝධනය කිරීමට බලාපොරොත්තු වන බවද නිලධාරීහු සඳහන් කළහ.
මෙයට අමතරව, 2023 අංක 16 දරන ශ්රී ලංකා මහ බැංකු පනතට අදාළව, අපනයනකරුවන්ට දේශීය ඩොලර් බැඳුම්කරවල ආයෝජනය කිරීමට පහසුකම් සැලසීම සඳහා නව රීතිවලටද කාරක සභා අනුමැතිය හිමිව ඇත.
ඒ අනුව, පෙර තිබූ රීති අනුව ශ්රී ලංකා සංවර්ධන බැඳුම්කර (SLDBs) වලට පමණක් සීමා වූ ආයෝජන අවස්ථාව ඉවත් කරමින්, නව සංශෝධන මගින් අපනයනකරුවන්ට තම ආදායමෙන් 10%ක් දක්වා රජය විසින් නිකුත් කරන විදේශ මුදල් නිරූපිත ණය සුරැකුම්වල ආයෝජනය කිරීමට ඉඩ ලබා දී ඇත.
