මොරගහහේන ප්රදේශයේදී රතිඤ්ඤා ශබ්දය තම නිවෙසෙහි සුනඛයින්ට පීඩාවක් බැවින් එය නවත්වන ලෙස ඉල්ලීමක් කළ අසල්වැසි කාන්තාවකට අමානුෂික ලෙස පහර දෙන විඩියෝ දර්ශන පෙළක් සමාජ මාධ්ය ඔස්සේ සංසරණය වෙමින් තිබුණි.
මෙම සිදුවිම සම්බන්ධයෙන් විමර්ශනයක් ඇරඹූ මොරගහහේන පොලිසිය පහර කෑමට ලක්වූ කාන්තාවගේ ප්රකාශ සටහන් කිරීමෙන් අනතුරුව සිද්ධියට සම්බන්ධ සැකකරු අත්අඩංගුවට ගෙන ඇත.
සැකකරු වයස අවුරුදු 54ක් වන වැල්මිල්ල ප්රදේශයේ පදිංචිකරුවෙකි.
සැකකරු ඊයේ (17) හොරණ ගරු මහෙස්ත්රාත් අධිකරණයට ඉදිරිපත් කිරීමෙන් අනතුරුව එළැඹෙන 24 වැනිදා දක්වා රක්ෂිත බන්ධනාගාර ගතකර තිබේ.
ගොකරැල්ල මැදලන්ද හංදිය අසළදී ද කිසියම් පිරිසක් විසින් කාන්තාවකට පහර දී තිබේ.
මේ සම්බන්ධයෙන් සිදුකළ සොයාබැලීමකදී අනාවරණය වූයේ පෞද්ගලික ආරවුලක් මත ඇයගේ පුතුන් දෙදෙනා ඇතුළු පිරිසක් විසින් මෙම පහරදීම සිදුකර ඇති බවය.
අදාළ සැකකරුවන් ප්රදේශයෙන් පලාගොස් ඇති අතර ඔවුන් අත්අඩංගුවට ගැනීම සඳහා විමර්ශන ආරම්භ කර ඇති බව ගොකරැල්ල පොලීසිය පැවසීය.
මේ අතර රාගම ප්රදේශයේ වෙළඳසැලකට පැමිණි කාන්තාවක් භාණ්ඩ සොරකම්කල බවට චෝදනා කරමින් වෙළඳසැල් සේවකයන් අදාළ කාන්තාවකගේ හිසකෙස් කපා දමන ආකාරය දැක්වෙන වීඩියෝ පටයක් පසුගියදා සමාජ මාධ්යයේ සංසරණය විය.
එහි දැක්වෙන්නේ අදාළ කාන්තාය සිය කෙස් කපා නොදමන ලෙස බැගෑපත්ව ඉල්ලා සිටියදීත් අදාළ වෙළෙඳසැල් සේවකයන් එය නොතකමින් කටයුතු කරන ආකාරය වේ.
සිද්ධිය සම්බන්ධයෙන් විමර්ශනයක් ඇරඹූ රාගම පොලිසිය, වින්දිත කාන්තාවගෙන් ප්රකාශ සටහන් කර ගැනීමෙන් අනතුරුව ඇයව වෛද්ය පරීක්ෂණ සඳහා රාගම ශික්ෂණ රෝහල වෙත යොමු කර තිබුණි.
පොලිසිය ප්රකාශ කළේ එම සිද්ධියට සම්බන්ධ ප්රධාන සැකකාරිය ඇතුළු පස්දෙනෙකු ඊයේ (17) අත්අඩංගුවට ගත් බවය.
ප්රධාන සැකකාරිය අවුරුදු 27ක් වන රාගම ප්රදේශයේ පදිංචිකාරියක් වන අතර සෙසු සැකකරුවන් අවුරුදු 20, 21, 22 සහ 23 වයස්වල පසුවන රාජාංගනය, කඩවත, රාගම, ත්රිකුණාමලය, චිනවරාය ප්රදේශයේ පදිංචිකරුවන් වේ.
