රුසියානු සමූහාණ්ඩුවේ විදේශ කටයුතු නියෝජ්ය අමාත්ය ඇන්ඩ්රි රුඩෙන්කෝ සංචාරයක් සඳහා මෙරටට පැමිණීමට නියමිතව තිබේ.
ලබන 31 වෙනිදා ඔහු දිවයිනට පැමිණෙනු ඇති බව විදේශ කටයුතු අමාත්යංශය සඳහන් කරයි.
රුසියානු නියෝජ්ය අමාත්යවරයා ශ්රී ලංකාව සහ රුසියාව අතර 11 වන ද්විපාර්ශ්වික දේශපාලන උපදේශන රැස්වීමට සහභාගීවීමට නියමිතය.
දූෂණ චෝදනාවක් සම්බන්ධයෙන් බලශක්ති අමාත්ය කුමාර ජයකොඩි මහතාට කොළඹ මහාධිකරණය හමුවේ අධි චෝදනා පත්ර භාර දී තිබේ.
කොළඹ මහාධිකරණ විනිසුරු රශාන්ත ගොඩවෙල මහතා ඉදිරියේ අද (27) මෙම චෝදනා භාරදීම සිදු වු බව “අද දෙරණ” අධිකරණ වාර්තාකරු පැවසීය.
මීට පෙර අධිකරණය විසින් නිකුත් කර තිබූ සිතාසියකට අනුව විත්තිකාර කුමාර ජයකොඩි මහතා අධිකරණය හමුවේ අද පෙරවරුවේ පෙනී සිටියේය.
චෝදනා භාරදීමෙන් අනතුරුව විත්තිකරු රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට නියම කළ විනිසුරුවරයා විත්තිකරුගේ ඇඟිලි සලකුණු ලබාගෙන වාර්තාවක් කැඳවන ලෙසත් නියම කර තිබේ.
අල්ලස් හෝ දූෂණ චෝදනා විමර්ශන කොමිෂන් සභාව විසින් ගොනු කර ඇති චෝදනාවට අනුව, 2016 දී ලංකා පොහොර සමාගමේ සේවය කරමින් සිටියදී ප්රසම්පාදන ක්රියාවලියකදී පුද්ගලික සමාගමකට වාසියක් සැලසීමෙන් රජයට රුපියල් 8,859,708 ක පාඩුවක් සිදුවූ බවට ඔහුට චෝදනා එල්ල වී ඇත.
එමඟින් අල්ලස් හෝ දුෂණ විරෝධී පනතේ 70 වැනි වගන්තිය යටතේ ‘දුෂණය’ නමැති වරද කළ බවටද විත්තිකරුට එරෙහිව අල්ලස් කොමිසම චෝදනා නඟා තිබේ.
මෙම නඩුව පූර්ව නඩු විභාග සම්මන්ත්රණය සඳහා මැයි 6 වනදා යළි කැඳවීමට නියම කර ඇත.
සේවක අර්ථසාධක අරමුදලේ ගනුදෙනුව සම්බන්ධව තොරතුරු දැනගැනීමේ අයිතිවාසිකම් පිළිබඳ කොමිෂන් සභාව ලබා දුන් තීරණය අහෝසි කරමින් අභියාචනාධිකරණය තීන්දුවක් නිකුත් කර තිබේ.
ඒ ශ්රී ලංකා බැංකුවේ ස්ථාවරය පිළිගනිමින්ය. වෙරිටේ රිසර්ච් ආයතනය විසින් තොරතුරු දැනගැනීමේ අයිතිවාසිකම් පනත යටතේ, රාජ්ය සුරැකුම්පත් ගනුදෙනුවලට අදාළ තොරතුරු ඉල්ලා තිබුණි.
එහිදී අදාළ ගනුදෙනුව සිදු කළ දිනයන්, ඵලදායිතාව, මිල ගණන් සහ ගනුදෙනුවලට අදාළ පාර්ශ්වයන් යනාදි සවිස්තරාත්මක වාර්තා සහිතව විස්තර ඉල්ලා සිටියේය.
මේ සම්බන්ධයෙන් ශ්රී ලංකා මහබැංකුව ඇතැම් පොදු තොරතුරු හෙළිදරව් කළ අතර වාණිජයම වශයෙන් සංවේදීවීම සහ 2016 අංක 12 දරන තොරතුරු දැනගැනීමේ අයිතිවාසිකම් පිළිබඳ පනතේ 5(1) වගන්තිය යටතේ දක්වා ඇති ව්යවස්ථාපිත ව්යතිරේඛයන් තුළට ඇතුළත්වීම යන පදනම මත ගනුදෙනු පිළිබඳ තොරතුරු හෙළිදරව් කිරීම ප්රතික්ෂේප කරන ලදී.
අභියාචනාධිකරණය විසින් ප්රකාශ කරන්න ලද්දේ, තොරතුරු දැනගැනීමේ අයිතිවාසිකම් පිළිබඳ පනතේ 5(1)(ඈ) වගන්තිය යටතේ දක්වා ඇති හෙළිදරව් කිරීම තුළින් තෙවන පාර්ශ්වයකට හානියක් විය හැකි වාණිජමය වශයෙන් රහසිගත තොරතුරු ආරක්ෂා පිළිබඳ ව්යතිරේඛය තුළට ඇතුළත් වන බවය.
සේවක අර්ථසාධක අරමුදලේ ගනුදෙනු පිළිබඳ සවිස්තරාත්මක තොරතුරු හෙළිදරව් කිරීම තුළින් අරමුදලේ උපායමාර්ගයන් නිරාවරණය වේ.
එමඟින් රාජ්ය සුරැකුම්පත් වෙන්දේසිවල වෙළඳපොල සහභාගී වන්නන්ට සිය ලංසු පිළිබඳ පුර්වාපේක්ෂණයන් කිරීමට සහ උපායශීලී ලෙස සිය ලංසු ඉදිරිපත් කිරීමට හැකි බව අභියාචනාධිකරණය නිරීක්ෂණය කර ඇත.
මේ හේතුවෙන් අවසාන වශයෙන් මිලියන ගණනක් වූ අරමුදලේ දායකයන්ට බලපෑමක් සිදු වන අයුරින් සේවක අර්ථසාධක අරමුදලේ තරගකාරී අවාසියකට සහ ප්රතිලාභ ලැබීම අවමවීමකට ලක්විය හැකි බව සිය අවධානයට යොමු කළ බව අධිකරණය පැවසීය.
සේවක අර්ථසාධක අරමුදලේ වත්කම් ආරක්ෂා කිරීම සම්බන්ධව මහබැංකුව වෙත පවතින භාරකාරීත්ව වගකීම එහිදී අධිකරණය විසින් අවධාරණය කරමින් අධිකරණය විසින් දක්වා සිටින ලද්දේ මෙවැනි සංවේදී මූල්ය තොරතුරු හෙළිදරව් කිරීම තුළින් අරමුදලේ වෙළඳපොල ස්ථාවරත්වයට හානි සිදුවිය හැකි බවය.
එම අරමුදලේ මෙහෙයුම්වල විනිවිදභාවය වාර්ෂික වාර්තා කිරීම, විගණකාධිපතිවරයා විසින් විගණනයට ලක්කිරීම සහ පාර්ලිමේන්තුවේ අධීක්ෂණය වැනි ව්යවස්ථාපිත ක්රියාමාර්ගයන් හරහා සුරක්ෂිත කර ඇති බව අධිකරණය පෙන්වාදෙයි.
මහජන සුබසිද්ධිය පිළිබඳ ගැටලුවෙහිදී, අධිකරණය විසින් නිගමනය කරන ලද්දේ මෙම හෙළිදරව්ව කිරීම තුළින් ලැබෙන ප්රතිලාභ, සේවක අර්ථසාධක අරමුදලට සහ එහි සාමාජිකයන්ට සිදුවිය හැකි හානිය ඉක්මවා යන බව පෙන්වාදීම වගඋත්තරකරු අපොහොසත්ව ඇති බවය.
2022 වසරේදී ඉන්දීය ණය යෝජනා ක්රමය යටතේ ලියාපදිංචි නොකළ සමාගමකින් ප්රසම්පාදන ක්රියාවලියෙන් පරිබාහිරව වෛද්ය සැපයුම් මිලදී ගැනීම තුළ හිටපු සෞඛ්ය අමාත්ය කෙහෙළිය රඹුක්වැල්ල ඇතුළු වගඋත්තරකරුවන් මූලික අයිතිවාසිකම් උල්ලංඝනය කර ඇති බවට ශ්රේෂ්ඨාධිකරණය අද (27) තීන්දු කළේය.
ඒ අනුව හිටපු සෞඛ්ය අමාත්ය කෙහෙළිය රඹුක්වැල්ලට රුපියල් කෝටි හත හමාරක් සහ සෙසු වගඋත්තරකරුවන් සිව්දෙනා රුපියල් කෝටි 5 බැගින් රජයට වන්දි ගෙවන ලෙසයි අධිකරණය නියෝග කළේ.
කෙහෙළිය රඹුක්වැල්ල සෞඛ්ය අමාත්යවරයා ලෙස කටයුතු කළ 2022 වර්ෂයේදී ආර්ථික අර්බුදයට මුවාවී ඉන්දීය ණය යෝජනා ක්රමය යටතේ ලියාපදිංචි නොකළ සමාගමකින් ප්රසම්පාදන ක්රියාවලියෙන් පරිබාහිරව වෛද්ය සැපයුම් මිලදී ගැනීම සම්බන්ධයෙන් චෝදනා එල්ල විය.
“හියුමන් ඉමියුනෝග්ලොබියුලින්” සහ “රිටොක්සිමැබ්” යන ප්රමිතියෙන් තොර එන්නත් සිද්ධි පිළිබඳ ඇරඹි විමර්ශන ද එහි එක් අවස්ථාවකි.
අදාළ ප්රමිතියෙන් තොර එන්නත් සම්බන්ධයෙන් මාළිගාකන්ද මහේස්ත්රාත් අධිකරණය හමුවේ නීති කෘත්යයක් ආරම්භ කෙරුණු අතර ඊට අදාළව හිටපු සෞඛ්ය අමාත්ය කෙහෙළිය රඹුක්වැල්ල ඇතුළු විත්තිකරුවන් 12 දෙනෙකු රක්ෂිත බන්ධනාගාරගත කර පසුව ඇප මත මුදා හැරුණි.
අනතුරුව මෙම සිදුවීමට අදාළව රජයේ මුදල් රුපියල් ලක්ෂ 1,444ක් සාපරාධී සාවද්ය පරිහරණය ඇතුළු චෝදනා සම්බන්ධයෙන් නීතිපතිවරයා විසින් හිටපු සෞඛ්ය අමාත්යවරයා ඇතුළු විත්තිකරුවන් 12 දෙනාට එරෙහිව අධිචෝදනා ගොනුකරනු ලැබීය.
ඒ අනුව එම නඩුව මේ වනවිට කොළඹ ස්ථිර ත්රිපුද්ගල මහාධිකරණ විනිසුරු මඩුල්ලක් ඉදිරියේ දිනපතා විභාග වෙමින් පවතියි.
ඒ අතර ඉන්දියානු ණය යෝජනා ක්රමය යටතේ ලියාපදිංචි නොකළ සමාගමකින් ප්රසම්පාදන ක්රියාවලියෙන් බැහැරව වෛද්ය සැපයුම් මිලදී ගැනීමේ සිද්ධියට අදාළව, ඒ හරහා ආණ්ඩුක්රම ව්යවස්ථාවේ මූලික අයිතිවාසිකම් උල්ලංඝනය කළේ යැයි හිටපු සෞඛ්ය අමාත්ය කෙහෙළිය රඹුක්වැල්ල ඇතුළු වගඋත්තරකරුවන් පිරිසකට එරෙහිව ට්රාන්ස්පේරන්සි ඉන්ටර්නැෂනල් ශ්රී ලංකා ආයතනය ඇතුළු පාර්ශ්ව දෙකක් ශ්රේෂ්ඨාධිකරණයට මූලික අයිතිවාසිකම් පෙත්සම් ගොනුකර තිබුණි.
ඒ අනුව එම පෙත්සම් සම්බන්ධයෙන් සිදුකළ දීර්ඝ නඩු විභාගයකින් අනතුරුව කුමුදුනි වික්රමසිංහ සහ ජනක් ද සිල්වා යන ශ්රේෂ්ඨාධිකරණ විනිසුරුවරුන්ගේ එකඟත්වය ඇතිව අගවිනිසුරු ප්රීති පද්මන් සූරසේන මහතා එහි තීන්දුව අද (27) ප්රකාශයට පත් කළහ.
අගවිනිසුරුවරයා සඳහන් කළේ “සේවොරිට් ෆාමසූටිකල් ප්රයිවට් ලිමිටඩ්” නමැති සමාගමකින් වෛද්ය සැපයුම් මිලදී ගැනීම සඳහා 2022 වසරේ සැප්තැම්බර් 26 වනදා අමාත්ය මණ්ඩලයට ඉදිරිපත් කළ සංදේශය සකස් කර ඇත්තේ වගඋත්තරකාර හිටපු සෞඛ්ය ලේකම් ජනක ශ්රී චන්ද්රගුප්ත බවය.
අනතුරුව කෙහෙළිය රඹුක්වැල්ල හිටපු අමාත්යවරයා ඊට අමාත්ය මණ්ඩල අනුමැතිය ලබාගෙන ඉන්දිය ණය යෝජනා ක්රමය යටතේ වගඋත්තරකාර සමාගමෙන් එම වෛද්ය සැපයුම් මිලදී ගැනීමට ක්රියාකොට ඇතැයි තීන්දුවේ සඳහන් විය.
එමෙන්ම මෙම වෛද්ය සැපයුම් මිලදී ගෙන ඇත්තේ ජාතික ඖෂධ නියාමන අධිකාරිය යටතේ ලියාපදිංචි නොකළ සමාගමකින් බවත් එම අධිකාරියේ වගඋත්තරකාර නිලධාරින් දැන දැනම ප්රසම්පාදන මාර්ගෝපදේශ හා ජාතික ඖෂධ නියාමන අධිකාරි පනතේ ප්රතිපාදන උල්ලංඝනය කර මෙම වෛද්ය සැපයුම් මිලදී ගැනීම සඳහා අනුමැතිය ලබාදී තිබෙන බවත් නඩු තීන්දුව තුළ සඳහන්ය.
ජනතා සුබසාධනය සඳහා වෙන්කර තිබෙන රාජ්ය අරමුදල් මෙමගින් ඔවුන් අවභාවිත කරමින් එම මුදල් ජනතාවට අහිමි කොට ඇති බවයි අගවිනිසුරුවරයා කියා සිටියේය.
මහජනතාවට සේවය කිරීමට වගඋත්තරකරුවන් බැඳී සිටින අතර එම බැඳීම්වල වගකීම ඔවුන් තේරුම් නොගන්නේ නම් එය මතක්කර දීමට අධිකරණය බැඳී සිටින බවත් තීන්දුවේ සඳහන්වේ.
එබැවින් කෙහෙළිය රඹුක්වැල්ල ඇතුළු වගඋත්තරකරුවන් මෙරට උත්තරීතර ආණ්ඩු ක්රම ව්යවස්ථාවේ 12 (1) ව්යවස්ථාව යටතේ සහතික කර තිබෙන “නීතිය ඉදිරියේ සමාන සැලකිලි ලැබීමට ඇති සර්ව සාධාරණත්වයේ අයිතිවාසිකම”උල්ලංඝනය කර ඇති බව ත්රිපුද්ගල විනිසුරු මඩුල්ල සිය අවසන් තීන්දුව තුළින් ප්රකාශ කළහ.
ඒ අනුව හිටපු සෞඛ්ය අමාත්ය කෙහෙළිය රඹුක්වැල්ල සිය පෞද්ගලික මුදලින් රුපියල් මිලියන 75ක මුදලක් රජයට ගෙවිය යුතු බවයි විනිසුරු මඩුල්ල නඩු නියෝග කර සිටියහ.
ඊට අමතරව එවක සෞඛ්ය ලේකම් ජනක ශ්රී චන්ද්රගුප්ත සහ ජාතික ඖෂධ නියාමන අධිකාරියේ හිටපු සභාපති මහාචාර්ය එස්.ඩී. ජයරත්න රුපියල් මිලියන 50 බැගින් වූ මුදලක් වන්දි වශයෙන් රජයට ගෙවිය යුතු බව නියෝගයේ සඳහන් විය.
එසේම ජාතික ඖෂධ නියාමන අධිකාරියේ හිටපු ප්රධාන විධායක නිලධාරී වෛද්ය විජිත් ගුණසේකර සහ වෛද්ය සැපයුම් අංශයේ හිටපු අධ්යක්ෂ වෛද්ය තුසිත සුදර්ශන ද රුපියල් මිලියන 50 බැගින් රජයට වන්දි ගෙවිය යුතු බව ත්රිපුද්ගල ශ්රේෂ්ඨාධිකරණ විනිසුරු මඩුල්ල නියෝග කර සිටියහ.
මේ අතර මෙම ප්රශ්නගත වෛද්ය සැපයුම් මිලදී ගැනීමේ ක්රියාවලිය තුළින් අල්ලස් පනත යටතේ කිසියම් ප්රතිපාදනයක් උල්ලංඝනය වී ඇත්නම් ඊට අදාළව අවශ්ය විමර්ශන මෙහෙයවීමට කරුණු සලකා බලන ලෙස විනිසුරු මඩුල්ල අල්ලස් හෝ දූෂණ චෝදනා විමර්ශන කොමිෂන් සභාවට නියෝග කළහ.
ශ්රී ලංකාවේ ඉරාන තානාපති අලිරේසා ඩෙල්කෝෂ් මහතා සහ හිටපු ජනාධිපති මෛත්රීපාල සිරිසේන මහතා අතර හමුවක් සිදුව තිබේ.
ඊයේ (25) ඉරාන තානාපති කාර්යාලයේ දී මෙම හමුව සිදු වූ බව සඳහන් වේ.
මැදපෙරදිග කලාපයේ පවතින යුදමය වාතාවරණය සම්බන්ධයෙන්ම මෙන්ම, ඉරාන සහ ශ්රී ලංකාව අතර පවතින සුහදත්ව වර්ධනය කරගැනීම සඳහා මෙම හමුව පවත්වා තිබූ බව වාර්තා විය.
නීතිවිරෝධී අයුරින් ඉන්ධන රැස්කර ඇති ස්ථාන කොන්දේසි විරහිතව වටලන ලෙසට මහජන ආරක්ෂක නියෝජ්ය අමාත්ය නීතිඥ සුනිල් වටගල මහතා පොලීසියට උපදෙස් ලබාදී තිබේ.
නියෝජ්ය අමාත්යවරයා මේ බව ප්රකාශ කළේ, තිඹිරිගස්යාය ප්රාදේශීය සම්බන්ධීකරණ රැස්වීමට එක්වෙමිනි.
රට තුළ ඉන්ධන අරපිරිමැස්මෙන් භාවිත කළ යුතු බවත් ජනාධිපතිවරයාගේ සිට සෑම කෙනෙකුම එම ආදර්ශය ලබාදී ඇති බවත් ඔහු වැඩිදුරටත් කීය.
කිසිදු විද්යාත්මක පදනමකින් තොරව සහ දේශපාලනික අවශ්යතා මත දුෂ්කර සේවා ස්ථාන ලැයිස්තුව ස්ථාන 393 සිට 260 දක්වා අඩු කර ඇති බව රජයේ වෛද්ය නිලධරින්ගේ සංගමය පවසයි.
නිවේදනයක් නිකුත් කරමින් එම සංගමය පෙන්වා දෙන්නේ, එම ස්ථානවල ඇති දුෂ්කරතාවයන් තවමත් අඩුනොවී එලෙසම පවතින බවය.
මෙය තුළින් වෛද්යවරුන්ට දැඩි අසාධාරණයක් සිදුව ඇති අතර මෙම ලැයිස්තුවෙන් කප්පාදු කරන ලද සේවා ස්ථාන වැසියාමේ තර්ජනය තවදුරටත් උග්රවනු ඇති බව එහි දැක්වෙයි.
මෙරට තුළ ඉතාමත්ම දුෂ්කර සේවා ස්ථාන ගණනාවක් හදුනාගෙන ඇති අතර ඒ්වායේ රාජකාරි කිරීමට යොමුවන වෛද්යවරුන් හට ලබාදෙන එකම දිරිගැන්වීම වන්නේ සේවා කාලය වසරකින් පසු ලබා දෙන විශේෂ ‘දුෂ්කර සේවා ස්ථානමාරු ලැයිස්තුවක්’ මඟින් ස්ථාන මාරුවක් ලබාගැනීමට අවස්ථාව සලසා දීමය.
මෙම දිරිගැන්වීම කිසිදු සාකච්ඡාවකින් හෝ පාර්ශවකරුවන්ගේ එකඟතාවයකින් තොරව නීතිවිරෝධී ලෙස වසර 02ක් දක්වා දිගු කිරීමට කටයුතු කර ඇති බව රජයේ වෛද්ය නිලධාරින්ගේ සංගමය සඳහන් කරයි.
මෙම ක්රියාව තුලින් වෛද්යවරුන් දැඩි අසාධාරණයකට ලක් වන අතර එසේ කරන්නේ නම් විශේෂ ස්ථානමාරු ලැයිස්තුවක් පැවතීමේ අවශ්යතාවය ද ප්රශ්නසහගත වේ.
මන්දයත්, සේවා කාලය වසර 02කින් පසු වාර්ෂික ස්ථානමාරු සඳහා ද ඉල්ලුම් කළ හැකි බැවින් මෙය හුදු දේශපාලනික අවශ්යතාවයක් උදෙසා වෛද්යවරුන් අවභාවිතා කිරීමට ලබා ගන්නා ලද තීරණයක් බව රජයේ වෛද්ය නිලධාරින්ගේ සංගමයේ කීය.
මේ අතර 2025 වාර්ෂික ස්ථානමාරු ලැයිස්තුවේ පුරප්පාඩු 78ක් නීත්යානුකූල නොවන ලෙස අධ්යක්ෂ, වෛද්ය සේවා විසින් අත්තනෝමතිකව සහ නීත්යානුකූල නොවන ලෙස ඉවත් කර ඇති බව රජයේ වෛද්ය නිලධාරින්ගේ සංගමය අනාවරණ කරයි.
මේ හේතුවෙන් එම වසරේ වාර්ෂික ස්ථාන මාරු ලැයිස්තුවේ සිටින වෛද්යවරුන් විශාල ප්රමාණයකට තමන්ට හිමිවිය යුතු රාජකාරි ස්ථාන අනුපිළිවෙල අනුව ස්ථානමාරු අවස්ථාව ලැබීම අහිමිවී ඇති බව ද එම සංගමය පෙන්වා දෙයි.
මෙම ක්රමවේදය 2026 වාර්ෂික ස්ථාන මාරු ලැයිස්තුව සම්බන්ධයෙන් ද බලාත්මක කිරීමට සෞඛ්ය අමාත්යංශ බලධාරින් සුදානම් වන බවට ඔවුන් අනාවරණය කළේය.
තෝරාගත් පිරිසකට පමණක් ස්ථානමාරු ක්රියාත්මක කිරීම සහ පලිගැනීමේ චේතනාවෙන් එම ස්ථානමාරු කටයුතු සිදු කිරීම හේතුවෙන් වෛද්යවරුන් විශාල ප්රමාණයකට දැඩි අසාධාරණයකටත් අපහසුතාවයකටත් මුහුණ පා ඇති බව රජයේ වෛද්ය නිලධාරින්ගේ සංගමය අවධාරණය කරයි.
මෙම දුෂ්කර සේවා ස්ථාන ලැයිස්තුව සහ පශ්චාත් සීමාවාසික වෛද්යවරුන් අනුයුක්ත කිරීමේ ලැයිස්තුව යන ලැයිස්තුන් දෙකම නිසි ක්රමවේදයෙන් බැහැරට ගොස් තාක්ෂණික උපදෙස් අත්හැර දමමින් දේශපාලනිකරණයට ලක් කර ඇති බව අදාළ නිවේදනයේ දැක්වේ.
පෙර කිසි දිනක සිදු නොවු ලෙස කැබිනට් මණ්ඩල අනුමැතියකින් යුතුව ප්රකාශයට පත්කිරීමේ සුදානමක් ඇති බව තමන්ට මාධ්ය මඟින් තොරතුරු වාර්තාවී ඇති බව ද රජයේ වෛද්ය නිලධාරින්ගේ සංගමය පෙන්වා දෙයි.
විශේෂඥ, පරිපාලන සහ ශ්රේණි යන කාණ්ඩ තුනෙහි වෛද්යවරුන්ගේ ස්ථානමාරු ආයතන සංග්රහය, කාර්ය පටිපාටි රෙගුලාසි අනුව සෞඛ්ය අමාත්යංශ ස්ථානමාරු මණ්ඩල මඟින් සාකච්ඡා කර තීරණය කිරීමෙන් අනතුරුව රාජ්ය සේවා කොමිෂන් සභාවේ අනුමැතිය ලබාගැනීමෙන් පසුව ප්රකාශයට පත් කිරීම පිළිගත් නීත්යානුකූල ක්රමවේදය වේ.
කෙසේ වෙතත් අවාසනාවන්ත ලෙස ක්රමවේද ආරක්ෂා කිරීම ප්රඥප්තිය කරගත් රජයක සෞඛ්ය අමාත්යවරයා ප්රමුඛ සෞඛ්ය අමාත්යංශය ක්රමවේද කඩා බිඳ දමමින් ඉතා උද්දච්ච ලෙස ක්රමවේද සියල්ල දේශපාලනීකරණය කරමින් කැබිනට් මණ්ඩලය වෙත බලය ලබා ගැනීමේ ක්රියාවලියක නිරතවී ඇති බව රජයේ වෛද්ය නිලධරින්ගේ සංගමය වැඩිදුරටත් අවධාරණය කරයි.
ජාතික නාමල් උයන ‘ශ්රී ලංකාවේ ජාතික උරුමයක්’ ලෙස ප්රකාශයට පත් කිරීම ජනාධිපති අනුර කුමාර දිසානායක මහතාගේ ප්රධානත්වයෙන් අද (26) පස්වරුවේ ජනාධිපති කාර්යාලයේදී සිදු විය.
ඒ, බුද්ධශාසන, ආගමික සහ සංස්කෘතික කටයුතු අමාත්යාංශය යටතේ මෙරට ජාතික උරුමයන් හඳුනා ගැනීම, සංරක්ෂණය කිරීම සහ අනාගත පරපුරට දායාද කිරීමේ අරමුණින්ය.
ජාතික නාමල් උයන හඳුන්වාදී වසර 35ක් පිරිම සැමරීමට සමගාමීව මෙය සිදු කෙරුණු බව ජනාධිපති මාධ්ය අංශය නිවේදනය කරයි.
අනුරාධපුර දිස්ත්රික්කයේ පලාගල ප්රාදේශීය ලේකම් කොට්ඨාසයට අයත් හෙක්ටයාර 602ක් පුරා විහිදුණු ජාතික නාමල් උයන ජාතික, ආගමික, පාරිසරික සහ භූගෝලීය වටිනාකම් රැසක් එක්වී ඇති අද්විතීය ස්ථානයකි.
එහි නිර්මාතෘ පූජ්ය වනවාසී රාහුල හිමියන්ගේ ඉල්ලීම මත, බුද්ධශාසන, ආගමික සහ සංස්කෘතික කටයුතු අමාත්යාංශයේ මැදිහත්වීමෙන් ජාතික නාමල් උයන ශ්රී ලංකාවේ ජාතික උරුමයක් ලෙස නිල වශයෙන් ප්රකාශයට පත් කිරීම සනිටුහන් කරමින් සමරු ඵලකය නිරාවරණය කිරීම මාර්ගගත තාක්ෂණය ඔස්සේ මෙහිදී ජනාධිපතිවරයා අතින් සිදු කෙරිණි.
මෙහිදී අදහස් දැක් වූ ජනාධිපති අනුර කුමාර දිසානායක මහතා සඳහන් කළේ, මෙම සුවිශේෂී පරිසර උරුමය සුරක්ෂිත කරමින් මතු පරපුර වෙත දායාද කිරීමේ ජාතික වගකීම සියලුදෙනා වෙත පැවරී ඇති බවයි.
එදා මෙදා තුර ජාතික නාමල් උයන ආරක්ෂා කර ගනිමින් එය සංවර්ධනය කිරීමට පූජ්ය වනවාසී රාහුල හිමියන් විසින් සිදු කරනු ලබන කැපවීම මෙහිදී ජනාධිපතිවරයා කෘතවේදීව අගය කළේය.
ජාතික නාමල් උයන 35 වන සංවත්සරය වෙනුවෙන් ශ්රී ලංකා තැපැල් දෙපාර්තමේන්තුව විසින් නිකුත් කරන ලද මුල් දින කවරයද, ‘ජාතික නාමල් උයන ශාස්ත්රීය සංග්රහයද’ පුජ්ය වනවාසී රාහුල හිමියන් විසින් මෙහිදී ජනාධිපතිවරයා වෙත පිළිගන්වන ලදී.
මෙහිදී විශේෂ අනුශාසනාවක් සිදු කළ ජාතික නාමල් උයන නිර්මාතෘ පූජ්ය වනවාසී රාහුල හිමියන් සඳහන් කළේ, මෙම අවස්ථාව වත්මන් රජය ඉටු කළ විශිෂ්ටතම පාරිසරික සේවාව ලෙස ඉතිහාසයට එක්වන බවය.
මෙම වැඩසටහන හෙට (27) ජාතික නාමල් උයන පරිශ්රයේදී පැවැත්වීමට නියමිතව තිබුණද රට තුළ උද්ගතව ඇති තත්ත්වය හමුවේ එය ජනාධිපති කාර්යාලයේදී සිදු කිරීමට ජනාධිපතිවරයා ගත් තීරණය ඉතා අගය කරන බවද උන්වහන්සේ පෙන්වා දුන්හ.
රට ගොඩනැඟීමට ජනාධිපති අනුර කුමාර දිසානායක මහතා තුළ ඇති වුවමනාව මේ රටේ ජනතාවද පිළිගෙන ඇති බව පෙන්වා දුන් උන්වහන්සේ සියලුදෙනා ඒකරාශී කර ගනිමින් මේ වන විට රට හමුවේ මතුව ඇති අභියෝගයට විසඳුම් සෙවිය යුතු බවද පෙන්වා දුන්හ.
“1991 මාර්තු මස 28වන දා මම ජාතික නාමල් උයන කියන සුන්දර වනස්පතියට ගොස් ඉතා දුෂ්කර ජීවිතයක් ගත කරමින් විශාල කැපකිරීමකින් යුතුව කටයුතු කළා. ප්රදේශයේ හාමුදුරුවරු සහ ජනතාව මට විවිධ චෝදනා එල්ල කරමින් අපහාස කළා. මට විරුද්ධව පත්තර පිටු ගණන් ලිව්වා. නමුත් මම සැලුණේ නැහැ.
හැබැයි චන්ද්රිකා කුමාරතුංග මැතිනියගේ සමයේ බර්ට් ප්රේමලාල් දිසානායක මහත්තයා මට උදව් කළා. අද විදුලිය ලැබිලා තිබෙන්නේ එතුමා නිසා. ඒ වගේම චන්ද්රිකා මැතිනියගෙන් පසු බලයට පත්වූ සියලු ජනාධිපතිවරුන්ගෙන් මට උදව් ලැබුණා. මම ඒ කිසිවෙකුගෙන් කිසි දෙයක් ඉල්ලලා නැහැ. හැබැයි මට ඕන තැනකට යන්න දොරවල් විවෘත වෙලා තිබෙනවා. මොකද මම කාටවත් වැරදි කරන්නේ නැහැ.
අද ඔබතුමාගේ සේවා කාලය තුළ ජාතික නාමල් උයන පිහිටි ප්රදේශයේ මාර්ග හොඳින් සංවර්ධනය කර තිබෙනවා.ඒ පිළිබඳ සියලුදෙනාට මම පිං දෙනවා. ඒ වගේම ජාතික නාමල් උයන ශ්රි ලංකාවේ ජාතික උරුමයක් බවට පත් කිරිමට කැපවීමෙන් කටයුතු කළ වෛද්ය නලින්ද ජයතිස්ස ඇමතිතුමාට සහ නියෝජ්ය අමාත්ය ගමගෙදර දිසානායක මහත්තයාට මම කෘතවේදීත්වය පිරිනමනවා. ඒ වගේම රෝෂන් ගමගේ මහත්තයා ඇතුළු නිලධාරින් එම කටයුතු හොඳින් කළමනාකරණය කර දුන්නා. එමෙන්ම මෙම කටයුත්ත සඳහා විද්යුත් සහ මුද්රිත මාධ්ය පුළුල් ප්රචාරණ දායකත්වයක් ලබා දුන්නා. එය මම ඉතා අගය කරනවා.
මේ ජාතික නාමල් උයන මගේ දේපොළක් නෙවෙයි. මම මෙහි මුරකාරයෙක් පමණයි. ඒ නිසා මගෙන් පසුව මෙය මධ්යම සංස්කෘතික අරමුදලට භාර දීමට මම කල්පනා කළා. එම වැඩකටයුතු හොඳින් කරගෙන යනවා. ඒ වගේම මෙම ස්ථානය ගංගාරාමයට සම්බන්ධ කර ජනාධිපති ලේකම්තුමා, වන සංරක්ෂණ අමාත්යාංශයේ ලේකම්තුමා, බුද්ධශාසන අමාත්යාංශයේ ලේකම්තුමා ආදී නිලයන් මට්ටමින් මෙම කටයුතු ඉදිරියට පවත්වාගෙන යාමට මම කල්පනා කළා. නැත්නම් මම නැති කාලයක මෙය විනාශ විය හැකියි.
මම මේ රට වෙනුවෙන් යමක් කළා. මම මේ රටට, ජාතියට ණය නැහැ. මගෙන් ඉටුවිය යුතු උපරිම කාර්යභාරය වන්නේ මෙහි සුරක්ෂිතතාව සහතික කර දීමයි. අනුරාධපුර දිස්ත්රික්කයේ අල්ලපු ගමේ ජන්මලාභය ලැබූ කෙනෙක් ලෙස අද ඔබතුමා අතින් මෙය ජාතික උරුමයක් ලෙස ප්රකාශයට පත් කිරිමට ලැබිම ගැන මම ඉතාමත් සතුටු වෙනවා.
ඒ වගේම පලාගල ප්රදේශීය ලේකම් කොට්ඨාසයේ පාසල් දෙකක් සහ රෝහල් දෙකක් තිබෙනවා. එම අහිංසක ජනතාව වෙනුවෙන් එම එක් පාසලක් සහ රෝහලක් අංග සම්පූර්ණ පාසලක් සහ රෝහලක් ලෙස පරිවර්තනය කර දෙන්න කියා මම ඔබතුමාගෙන් ගෞරවයෙන් ඉල්ලා සිටිනවා.”
මෙරටට නිල සංචාරයක් සඳහා පැමිණි රුසියානු බලශක්ති නියෝජ්ය අමාත්ය රෝමන් මර්ෂවින් සහ කම්කරු අමාත්ය සහ කම්කරු සහ මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත මහතා අතර හමුවක් අද (26) පවත්වා තිබේ.
එහිදී දෙරට අතර බලශක්ති ක්ෂේත්රයේ ද්වීපාර්ශ්වික සහයෝගීතාව ශක්තිමත් කිරීම, ආයෝජන අවස්ථා විමසා බැලීම සහ තාක්ෂණික සහාය වර්ධනය කිරීම සම්බන්ධයෙන් සාකච්ඡා කර තිබේ.
එමෙන්ම, බලශක්ති අර්බුද විසඳාගැනීම පිණිස කෙටි කාලීන විසඳුම් අවශ්යතා මෙන්ම රටවල් දෙකක් අතර බලශක්ති සබඳතා තර කර ගැනීම පිළිබඳව ද එහිදී සාකච්ඡා විය.
බොරතෙල් සැපයුම මෙන්ම පෙට්රල්, ඩීසල් හා ගුවන්යානා ඉන්ධන වැනි පිරිපහදු කළ ඉන්ධන සැපයීම ඇති හැකියාවත් සෙසු අවශ්යතාවයන් පිළිබඳවත් රටවල් දෙක අතර දිගුකාලීන බලශක්ති සබඳතා තර කර ගැනීම පිළිබඳවත් මෙහිදී එහිදී අදහස් හුවමාරු කරගෙන ඇත.
මෙම අවස්ථාවට ශ්රී ලංකාවේ රුසියානු තානාපති Levan Dzhagaryan ද එක්ව සිටියේය.
මහත් ආන්දෝලනයකට තුඩු දුන් දෙමළ ජාතික සන්ධානයේ හිටපු පාර්ලිමේන්තු මන්ත්රී නඩරාජා රවිරාජ් ඝාතන සිද්ධිය සම්බන්ධයෙන් චෝදනා ලබා සිටි නාවික හමුදා සාමාජිකයින් ඇතුළු විත්තිකරුවන් පස් දෙනෙකු නිදොස් කොට නිදහස් කරමින් කොළඹ මහාධිකරණය දුන් තීන්දුවක් ඉවත දැමූ අභියාචනාදීකරණය එම නඩුව යළි විභාග කරන ලෙස නියෝගයක් නිකුත් කළේය.
අදාළ විත්තිකරුවන් නිදොස් කොට නිදහස් කරමින් කොළඹ මහාධිකරණය විසින් ලබාදුන් තීන්දුව අභියෝගයට ලක් කරමින් නීතිපතිවරයා ඉදිරිපත් කළ අභියාචනයක් විභාග කිරීමෙන් අනතුරුව සශී මහේන්ද්රන් සහ අමල් රණරාජා යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල මෙම තීන්දුව ලබා දුනි.
