හිටපු අමාත්ය ජොන්ස්ටන් ප්රනාන්දු මහතාගේ පුතුන් දෙදෙනාට සහ සතොස හිටපු ක්රියාකාරි අධ්යක්ෂකවරයාට හා හිටපු ප්රවාහන කළමනාකරුට මීගමුව මහාධිකරණය මගින් ඇප ලබා දී තිබේ.
Category: politics_sub
කොළඹ සහ කොළොන්නාව නගර සභා ජනතාවගේ මූලික අයිතිවාසිකම් උල්ලංඝනය කර ඇතැයි ශ්රේෂ්ඨාධිකරණයෙන් තීන්දුවක්….
නීතියට පටහැනි ලෙස මීතොටමුල්ල “පොතුවිල් කුඹුර” නමැති භූමියේ කැලිකසළ බැහැර කිරීම තුළින් කොළඹ මහ නගර සභාව සහ කොළොන්නාව නගර සභාව එම ප්රදේශයේ පදිංචිකරුවන්ගේ මූලික අයිතිවාසිකම් උල්ලංඝනය කර ඇතැයි ශ්රේෂ්ඨාධිකරණය තීන්දු කළේය.
නීතිඥ නුවන් බෝපගේ ඇතුළු අදාළ ප්රදේශයේ පදිංචිකරුවන් පිරිසක් විසින් ගොනු කළ මූලික අයිතිවාසිකම් පෙත්සමක තීන්දුව දෙමින් ශ්රේෂ්ඨාධිකරණය මේ බව තීන්දු කළේය.
අගවිනිසුරු ප්රීති පද්මන් සූරසේන, යසන්ත කෝදාගොඩ සහ ප්රියන්ත ප්රනාන්දු යන මහත්වරුන්ගෙන් සමන්විත ත්රී පුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් විභාගයට ගැනුණි.
තීන්දුව ප්රකාශයට පත් කරමින් විනිසුරු යසන්ත කෝදාගොඩ මහතා ප්රකාශ කළේ මීතොටමුල්ල පොතුවිල් කුඹුර නමැති භූමියේ කොළඹ නගරයේ රැස්වන කැලිකසළ බැහැර කිරීමට කොළඹ මහ නගර සභාව පියවර ගත් බවය.
නීතියට පටහැනි ලෙස මෙම කැලිකසළ බැහැර කිරීම නිසා 2017 වසරේ අදාළ කුණු කන්ද පිපිරියාමෙන් විශාල ඛේදවාචකයක් හටගත් බවත් තීන්දුවේ සඳහන් වේ.
ඒ අනුව 2009 වසරේ සිට 2017 වසර දක්වා කාලසීමාව තුළ අදාළ ප්රදේශයේ නීතියට පටහැනි ලෙස කැලි කසළ බැහැර කිරීම තුළින් කොළඹ මහ නගර සභාව සහ කොලොන්නාව නගර සභාව ආණ්ඩුක්රම ව්යවස්ථාවේ 12(1) ව්යවස්ථාව මඟින් සහතික කර තිබෙන මූලික මිනිස් අයිතිය උල්ලංඝනය කර තිබෙන බවත් ශ්රේෂ්ඨාධිකරණ තීන්දුවේ සඳහන් වේ.
ඊට අමතරව අදාළ ප්රදේශයේ අක්කර දෙකක පමණ භූමි භාගයක කැලි කසළ බැහැර කිරීම සඳහා කොළඹ මහනගර සභාවට සහ කොළොන්නාව නගර සභාවට අවසර දීම තුළින් නාගරික සංවර්ධන අධිකාරිය මූලික මිනිස් අයිතිවාසිකම් උල්ලංඝනය සිදුකර ඇති බවත් තීන්දුවේ ප්රකාශ විය.
මෙම නීති විරෝධී කැලි කසළ බැහැර කිරීමේ ක්රියාවලිය සම්බන්ධයෙන් සිය ව්යවස්ථාපිත වගකීම ඉටුකිරීම පැහැර හැරීම තුළින් බස්නාහිර පළාත් අපද්රව්ය කළමනාකරණ අධිකාරිය මූලික මිනිස් අයිතිවාසිකම් උල්ලංඝනය කර තිබෙන බවත් තීන්දුවේ සඳහන් වේ.
එහෙත් මෙම කැලි කසළ කන්ද පිපිරියාමින් සිදුවූ ඛේදවාචකයෙන් වින්දිතයින් බවට පත් වූ පුද්ගලයින්ට වග උත්තරකරුවන් විසින් දැනටමත් රුපියල් 908, 314,020.70 ක් වන්දි වශයෙන් ගෙවා ඇති නිසා මෙම නඩුකරවලට අදාළව වන්දි ගෙවන ලෙස වග උත්තරකරුවන්ට නියෝග නිකුත් නොකරන බවත් තීන්දුවේ සඳහන් වේ.
කොළඹ මහනගර සභාව ඇතුළු වග උත්තරකරුවන්ගේ අසාර්ථක ක්රියා කලාපය හේතුවෙන් මෙවැනි බරපතළ තත්ත්වයක් උද්ගත වූ අතර ඒ සම්බන්ධයෙන් ඔවුන් පසුතැවිලි විය යුතු බව සඳහන් කළ අධිකරණය මෙවැනි තත්ත්වයන් මතු සිදු නොවීමට වගබලා ගත යුතු බවත් වැඩිදුරටත් සඳහන් කර තිබේ.
මෙම නඩු තීන්දුවේ 116 වන පරිච්ඡේදයේ විනිසුරු යසන්ත කෝදාගොඩ මහතා විසින් ඉදිරිපත් කරන නිරීක්ෂණ සම්බන්ධයෙන් තමන්ට එකඟ විය නොහැකි බවත් අගවිනිසුරු ප්රීති පද්මන් සූරසේන ප්රියන්ත ප්රනාන්දු යන විනිසුරුවරු සිය නඩු තීන්දුවේ සඳහන් කර ඇත.
නිල සංචාරයක් සඳහා රුසියානු නියෝජ්ය විදේශ කටයුතු ඇමති දිවයිනට…..
රුසියානු රජයේ නියෝජ්ය විදේශ කටයුතු පිළිබද අමාත්ය අන්ද්රේ රුඩෙන්කෝ ශ්රී ලංකාවේ නිල සංචාරයක් සදහා අද (31) දින පස්වරුවේ කටුනායක ගුවන් තොටුපොළ වෙත පැමිණියේය.
ඒ මහතා සමග එරට විදේශ කටයුතු අමාත්යංශයේ උසස් නිලධාරීවරයෙකු ද දූත පිරිස ලෙස පැමිණ සිටියහ.
ඔවුන් අද දින සවස 04.20 ට ඉන්දියාවේ නවදිල්ලි නුවර සිට ඉන්දීය ගුවන් සේවයේ ඒ.අයි.- 281 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියහ.
ඔවුන් පිළිගැනීම සදහා වරාය සහ සිවිල් ගුවන් සේවා නියෝජ්ය අමාත්ය ඉංජිනේරු ජනිත රුවන් කොඩිතුවක්කු , ශ්රී ලංකාවේ රුසියානු තානාපති ලෙවාන් ජගාරෙයාන් මහතා ඇතුළු පිරිසක් කටුනායක ගුවන් තොටුපොළ විශේෂ අමුත්තන්ගේ මැදිරිය වෙත පැමිණ සිටියහ.
දිවයිනට පැමිණි ඔවුන් දින 05ක් මෙරට රැදී සිටීමටද නියමිතය.
මාලිමා මන්ත්රී පැදවූ මෝටර් රථය තාප්පයක ගැටෙයි…..
ජාතික ජන බලවේගයේ පුත්තලම දිස්ත්රික් පාර්ලිමේන්තු මන්ත්රී මුහම්මද් ෆයිසාල් මහතා පැදවූ මෝටර් රථය හලාවත බණ්ඩාරවත්ත වංගුවේදී මාර්ගයෙන් ඉවතට පැන තාප්පයක ගැටීමෙන් අනතුරක් සිදුව තිබේ.
මෙම අනතුරින් මෝටර් රථයට හා තාප්පයට බරපතළ හානි සිදුව ඇති බවද වාර්තා වේ.
ඊයේ රාත්රී 11.45ට පමණ මෙම අනතුර සිදුව ඇති අතර එම අවස්ථාවේ අදාළ මන්ත්රීවරයා පමණක් මෝටර් රථයේ සිට ඇති බවද සඳහන්.
සිද්ධිය සම්බන්ධයෙන් හලාවත පොලිසිය වැඩිදුර පරීක්ෂණ පවත්වයි.
කෙහෙළිය සෞඛ්ය ඇමති සමයේ ඖෂධ මිලදීගැනීම් පිළිබඳව වෝහාරික විගණනයක් සිදුකරන බවට දැනුම්දීමක්….
හිටපු අමාත්ය කෙහෙළිය රඹුක්වැල්ල මහතා සෞඛ්ය අමාත්යවරයා වශයෙන් කටයුතු කළ කාලසීමාවේ සෞඛ්ය අමාත්යාංශය විසින් සිදුකළ ඖෂධ සහ වෛද්ය සැපයුම් මිලදී ගැනීමේ ප්රසම්පාදන කටයුතු ගැන රජයේ විගණකාධිපතිවරයා විසින් වෝහාරික විගණනයකට සිදුකරන බව නීතිපතිවරයා අද (30) ශ්රේෂ්ඨාධිකරණයට දැනුම් දී තිබේ.
ට්රාන්ස්පේරන්සි ඉන්ටර්නැෂනල් ශ්රී ලංකා සංවිධානය විසින් ඉදිරිපත් කර තිබූ මූලික අයිතිවාසිකම් පෙත්සමක් අද කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල්වරයා මෙම දැනුම් දීම සිදුකර තිබුණි.
හිටපු ජනපති ගෝඨාභයගේ මිරිහානේ නිවස අසල ඇති වූ සිද්ධිය ගැන නීතිපතිගෙන් දැනුම්දීමක්….
අරගලය පැවති සමයේ හිටපු ජනාධිපති ගෝඨාභය රාජපක්ෂ මහතාගේ මිරිහානේ පිහිටි නිවස අසල ඇතිවූ කලහාකාරී සිද්ධින් සම්බන්ධයෙන් තවදුරටත් විමර්ශන සිදු කරන බව නීතිපතිවරයා අද (30) ශ්රේෂ්ඨාධිකරණයට දැනුම් දී තිබේ.
එම සිද්ධියෙන් තමන් තුවාල ලැබූ බව සඳහන් කරමින් ධනබාල සිංහම් සුභාකරන් නමැති පුද්ගලයකු ඉදිරිපත් කළ මූලික අයිතිවාසිකම් පෙත්සමක් අද කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නීතිඥවරිය මේ බව දන්වා ඇත.
අගවිනිසුරු ප්රීති පද්මන් සූරසේන, අචල වෙංගප්පුලි සහ අර්ජුන ඔබේසේකර යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම කැඳවා තිබුණි.
එහිදී රජයේ නීතිඥවරිය අධිකරණය හමුවේ කරුණු දක්වමින් මෙම කලාකාරී සිද්ධියට අදාළව සැකකරුවන් 54 දෙනෙකු හඳුනාගෙන ඇති බවත් ඒ අතර මෙම පෙත්සම්කරු එක් සැකකරුවකු වශයෙන් නම්කර තිබෙන බවත් පවසා තිබේ.
මෙම සිද්ධියට අදාළ විමර්ශන තව දුරටත් සිදුකරන බව කියා සිටි රජයේ නීතිඥවරිය එම විමර්ශනවලට අදාළ ඇතැම් ගොනු පොලීසිය විසින් නීතිපති දෙපාර්තමේන්තුවට ඉදිරිපත් කර තිබෙන බව දන්වා තිබේ.
කෙසේවෙතත් මෙම විමර්ශනවල ප්රගතිය දැනුම් දීම සඳහා දිනයක් ලබාදෙන ලෙසත් ඇය අධිකරණයෙන් ඉල්ලීමක් කර තිබේ.
මෙහිදී පෙත්සම්කාර පාර්ශවය වෙනුවෙන් පෙනී සිටි නීතිඥ හර්මිසා ටීගල් මහත්මිය අධිකරණයට දැනුම් දුන්නේ මෙම පෙත්සම විභාගයට ගැනීම සඳහා ශ්රේෂ්ඨාධිකරණය විසින් දැනටමත් අවසර දී තිබෙන බවය.
කෙසේ වෙතත් මෙම පෙත්සම යළි සැප්තැම්බර් මස 25 වනදා කැඳවන ලෙස නියම කළ ත්රිපුද්ගල ශ්රේෂ්ඨාධිකරණ විනිසුරු මඩුල්ල එදින අදාළ කටයුතුවල ප්රගතිය අධිකරණයට දැනුම් දෙන ලෙසත් රජයේ නීතිඥවරියට නියම කර තිබේ.
ශ්රීලන්කන් ගුවන් සමාගමේ සභාපති සරත් ගණේගොඩ ඉල්ලා අස්වෙයි…..
ශ්රීලන්කන් එයාර්ලයින්ස් සහ ශ්රීලන්කන් කේටරින් යන සමාගම්වල සභාපතිවරයා ලෙස කටයුතු කළ සරත් ගණේගොඩ මහතා එම තනතුරුවලින් ඉල්ලා අස්වී තිබේ.
මෙම ඉල්ලා අස්වීම 2026 මාර්තු 31 දින සිට ක්රියාත්මක වන පරිදි ඉදිරිපත් කර ඇති බව සඳහන් වේ.
මහා භාණ්ඩාගාරයේ ලේකම්වරයා විසින් ස්ථිර සභාපතිවරයෙකු පත් කරන තෙක්, එම සමාගම් දෙකෙහිම වැඩබලන සභාපතිවරයා ලෙස ඒ. කේ. ඩී. ඩී. ඩිමාල් අරන්දර මහතා කටයුතු කරනු ඇති.
අධ්යක්ෂ මණ්ඩල සාමාජිකයෙකු වූ රොහාන් ගුණතිලක මහතා ද සිය ධුරයෙන් ඉල්ලා අස්වී තිබේ.
සරත් ගණේගොඩ සහ රොහාන් ගුණතිලක යන මහත්වරුන් සිය සේවා කාලය තුළ ලබාදුන් දායකත්වය අධ්යක්ෂ මණ්ඩලය සහ කළමනාකාරීත්වය විසින් අගය කර ඇත.
ප්රජාශක්ති ජාතික වැඩසටහනේ ප්රගතිය සොයා බැලීමේ සාකච්ඡාවක්…..
“ප්රජාශක්ති” ජාතික වැඩසටහනේ ප්රගතිය විමසා බැලීමේ සාකච්ඡාවක් ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ අමාත්ය උපාලි පන්නිලගේ මහතාගේ ප්රධානත්වයෙන් ජනාධිපති ලේකම් කාර්යාලයේදී අද (30) පස්වරුවේ පැවැත්විණි.
“ප්රජාශක්ති” වැඩසටහන සමාජය සවිබල ගැන්වීම සහ ආර්ථික ප්රතිලාභ සමාජය තුළ සාධාරණව බෙදී යාම සහතික කිරීම සඳහා වත්මන් රජය විසින් ක්රියාත්මක කරනු ලබයි.
ප්රජාශක්ති වැඩසටහනේ 2026 වර්ෂයේ වත්මන් ප්රගතිය, ඊට අදාළ ධාරිතා සංවර්ධන වැඩසටහන් මෙන්ම 2027 වර්ෂයේ ක්රියාත්මක කළ යුතු වැඩසටහන් සම්බන්ධයෙන්ද මෙහිදී දීර්ඝ ලෙස සාකච්ඡා වූ බව ජනාධිපති මාධ්ය අංශය පවසයි.
විශේෂයෙන්ම, එළැඹෙන වසරේ අයවැය යෝජනා සකස් කිරීම පිළිබඳවත් මෙහිදී සාකච්ඡා වූ අතර, මේ පිළිබඳව තීන්දු තීරණ ගැනීමට ප්රජාශක්ති මෙහෙයුම් කමිටුවේ සාකච්ඡාවක් ලබන 6 වනදා පැවැත්වීමට තීරණය කෙරිණි.
රජයේ ප්රතිපත්ති ප්රකාශය අනුව යමින්, බහුවිධ ප්රවේශයක් සහිත සමාජය සවිබල ගැන්වීමේ වැඩසටහනක් ලෙස ප්රජාශක්ති වැඩසටහන ක්රියාත්මක කෙරෙන අතර, රජය යටතේ ක්රියාත්මක කරන ජාතික මට්ටමේ වැඩසටහන් 03 අතරින් ආර්ථික සංවර්ධනයේ ප්රතිලාභ සමාජයේ සියලුම ජන කොටස් අතර සාධාරණව බෙදී යාම සහතික කිරීමත්, ඉලක්කගත සංවර්ධනයක් ඔස්සේ ග්රාමීය ප්රදේශ පරිපූර්ණ සංවර්ධනයක් කරා ගෙන යාමත් මෙම වැඩසටහනෙහි අරමුණයි.
ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීම් අමාත්යාංශයේ ලේකම් සම්පත් මන්ත්රීනායක, ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීම් අමාත්යාංශයේ අතිරේක ලේකම් එච්. එම්. එම්. යූ. බී. හේරත් යන මහත්වරුන්, ග්රාමීය සංවර්ධන කාර්යාංශයේ අධ්යක්ෂක මණ්ඩලය ඇතුළු අදාළ ආයතනවල මහත්ම මහත්මීහු පිරිසක් මෙම අවස්ථාවට එක්ව සිටියහ.
දරුවන්ට නව තාක්ෂණික අවස්ථාවන් හිමිවන අධ්යාපන ක්රමයක් නිර්මාණය කිරීම රජයේ අරමුණ බව අගමැතිනිය කියයි…
දිවයිනේ සෑම ප්රදේශයකම සිටින දරුවන්ට නව තාක්ෂණික අවස්ථාවන් හිමිවන අධ්යාපන ක්රමයක් නිර්මාණය කිරීම රජයේ අරමුණ බව අග්රාමාත්ය ආචාර්ය හරිනි අමරසූරිය පවසයි.
අග්රාමාත්යවරිය මේ බව ප්රකාශ කළේ, ශ්රී ලංකාවේ තරුණ පරපුරේ තාක්ෂණික නිපුණතා ජාත්යන්තර මට්ටමට ඔසවා තබන ලෝක රොබෝ ඔලිම්පියාඩ් (WRO) ජාතික තරගාවලියේ සමාරම්භක අවස්ථාවට එක්වෙමිනි.
මෙවර තරගාවලිය සඳහා දිවයින පුරා පාසල්වලින් කණ්ඩායම් 66ක් සහභාගී විය.
එය පසුගිය වසරට සාපේක්ෂව තෙගුණයක වර්ධනයක් බව අග්රාමාත්ය කාර්යලය සඳහන් කරයි.
“Robots Meet Culture” (රොබෝ තාක්ෂණයේ සහ සංස්කෘතියේ හමුව) යන තේමාව යටතේ පැවැත්වුණු මෙම තරගාවලියට සිසුන් 500කට අධික පිරිසක් සහභාගී වූ අතර දේශීය සංස්කෘතිය සහ නවීන ඉංජිනේරු විද්යාව මුසු වූ නිර්මාණ ඉදිරිපත් කර තිබුණි.
මෙහිදී වැඩිදුරටත් අදහස් දක්වමින් අග්රාමාත්ය ආචාර්ය හරිනි අමරසූරිය ප්රකාශ කළේ, වර්තමාන වේගයෙන් වෙනස් වන ලෝකය තුළ විද්යාව, තාක්ෂණය, ඉංජිනේරු විද්යාව සහ ගණිතය (STEM) යන ක්ෂේත්ර කෙරෙහි අවධානය යොමු කිරීම රටක ජාතික ප්රමුඛතාවක් විය යුතු බවය.
ලෝක රොබෝ ඔලිම්පියාඩ් වැනි අවස්ථාවන් හරහා අපේ තරුණ පරපුරට තර්කානුකූල චින්තනය, නවෝත්පාදනය සහ සහයෝගීතාව වැනි අත්යවශ්ය කුසලතා ප්රගුණ කිරීමට මහඟු අවස්ථාවක් ලැබෙන බව ඇය පෙන්වා දුන්නාය.
2025 වසරේදී ශ්රී ලංකාව ප්රථම වතාවට සිංගප්පූරුවේ පැවති ජාත්යන්තර රොබෝ ඔලිම්පියාඩ් තරගාවලියට කණ්ඩායම් දෙකක් ඉදිරිපත් කිරීමෙන් මෙරට දරුවන්ට ඉතා වැදගත් අත්දැකීමක් ලැබිණ.
දිවයිනේ සෑම ප්රදේශයකම සිටින දරුවන්ට මෙවැනි තාක්ෂණික අවස්ථාවන් හිමිවන අධ්යාපන ක්රමයක් නිර්මාණය කිරීම රජයේ අරමුණ බව ද අග්රාමාත්ය ආචාර්ය හරිනි අමරසූරිය වැඩිදුරටත් අවධාරණය කළාය.
සියලු අමාත්යාංශ සම්බන්ධීකරණයට ඛනිජ තෙල් නීතිගත සංස්ථාවෙන් නිලධාරීන් පස් දෙනෙක්…..
ඉන්ධන ගැටලු පිළිබඳව සොයා බැලීමට සහ අවශ්ය මැදිහත්වීම් සිදු කිරීමට සියලු අමාත්යාංශ ආවරණය වන පරිදි ඛනිජ තෙල් නිතීගත සංස්ථාවෙන් නිලධාරීන් පස් දෙනෙක් පත් කිරීමට අත්යවශ්ය භාණ්ඩ බෙදාහැරීම් අධීක්ෂණය සඳහා පත් කළ කමිටුවේදි තීරණය විය.
සෑම අමාත්යාංශයක්ම යටතේ පවතින ආයතනවල මතුවන ඉන්ධන ගැටලු පිළිබඳව සොයා බලා සංස්ථාව සමඟ සම්බන්ධීකරණය පවත්වා ගනිමින් විසඳුම් ලබා දීමට මැදිහත් වීම මෙම නිලධාරීන්ගේ වගකීම බවද එහිදී සාකච්ඡා කෙරිණි.
ප්රවාහන මහාමාර්ග සහ නාගරික සංවර්ධන අමාත්ය බිමල් රත්නායක මහතාගේ ප්රධානත්වයෙන් අත්යවශ්ය භාණ්ඩ බෙදාහැරීම් අධීක්ෂණය සඳහා පත් කළ කමිටුව ඊයේ (27) පස්වරුවේ ජනාධිපති ලේකම් කාර්යාලයේදී රැස් වූ අවස්ථාවේදී මේ පිළිබඳ කරුණු සාකච්ඡා විය.
කර්මාන්තකරුවන්ට තමන්ගේ නිෂ්පාදන රට පුරා බෙදාහැරීම සඳහා වාහනවලට දැනට ලබා දී ඇති ඉන්ධන කෝටාව ප්රමාණවත් නොවන බවට ඉල්ලීම් ඉදිරිපත්ව ඇති බවද, ඒ ඉල්ලීම් නොසලකා හැරියහොත් භාණ්ඩ මිල ඉහළ දැමීමේ ඉඩකඩක් පවතින බවද, එසේ වුවහොත් උත්සව සමයේ ජනතාව දැඩි අසීරුතාවයකට පත්විය හැකි බවටද මෙහිදි වැඩි අවධානයකින් සාකච්ඡාවට ගනු ලැබීය.
කර්මාන්ත, සතොස ඇතුළු අත්යවශ්ය ආහාර ද්රව්ය බෙදා හරින රාජ්ය සහ පෞද්ගලික ආයතන, තොග ආනයනකරුවන්, සංචාරක ක්ෂේත්රයේ සේවා ආයතන හෝ හෝටල් සඳහාත් වෙනත් සේවා සැපයුම් ආයතන සඳහාත් ඉන්ධන නිකුත් කිරීම පිළිබඳවද මෙම කමිටුවේදි සාකච්ඡා විය.
ඒ අනුව, එම ආයතනවලින් ඉදිරිපත් වන ඉන්ධන කෝටාවන් පිළිබඳ ඉල්ලීම් සළකා බලා අවශ්ය ක්රියාමාර්ග කඩිනමින් ගැනීමටත්, එම ඉල්ලීම් අදාල අමාත්යාංශ මගින් බලශක්ති අමාත්යාංශයට ඉදිරිපත් කළ යුතු බවටත් මෙහිදී සාකච්ඡා කෙරිණි.
කෘෂිකර්මය, ධීවර කර්මාන්තය ඇතුළු වෙනත් ක්ෂේත්ර සඳහා කෘෂිකර්ම පර්යේෂණ නිලධාරීන් ඇතුළු ඒ ඒ ක්ෂේත්රවලට අදාල රාජ්ය නිලධාරීන්ගේ නිර්දේශ මත නිකුත් කළ ලිපියකට ඉන්ධන ලබා දීම වෙනුවට QR කේත ක්රමයක් භාවිතා කිරීමේ වැඩපිළිවෙළ කඩිනම්ව ක්රියාත්මක කිරීමටද මෙහිදී අවධානය යොමු විය.
එළඹෙන සිංහල හින්දු අලුත් අවුරුදු සමයේදී ජනතාවට හිඟයකින් තොරව භාණ්ඩ සැපයීම මෙන්ම භාණ්ඩ මිල අධික ලෙස ඉහළ යාම වළක්වා ගැනීම ඉලක්ක කර ගනිමින් ඉන්ධන සැපයුම අඛණ්ඩව හා නිසි කළමණාකරණයකින් පවත්වාගෙන යාම කෙරෙහි අවධානය යොමු කළ යුතු බවද බිමල් රත්නායක අමාත්යවරයා මෙහිදී අවධාරණය කළේය.
වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ, ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක, බලශක්ති නියෝජ්ය අමාත්ය අර්කම් ඉල්යාස් යන මහත්වරු සහ ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, ඛනිජ තෙල් නීතිගත සංස්ථාවේ සභාපති ඩී. ජේ. රාජකරුණා යන මහත්වරු ඇතුළු රාජ්ය නිලධාරීහු පිරිසක් මෙම සාකච්ඡාවට එක්ව සිටියහ.