Category: news_sub

ශානිට DIG දෙන්න නිර්දේශයක්……

අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යෙෂ්ඨ පොලිස් අධික‍ාරී ශානි අබේසේකර මහතා නියෝජ්‍ය පොලිස්පති තනතුරට උසස් කිරීමට පරිපාලන අභියාචනා විනිශ්චයාධිකාරය නියෝග කර තිබේ.

ඒ අනුව මේ පිළිබඳව අද (13) ජාතික පොලිස් කොමිෂන් සභාව වෙත දැනුම් දී ඇත.

2026 වසරේ අගෝස්තු මස 25 දින සිට බලපැවැත්වෙන පරිදි මෙම උසස්වීම් ලබා දී ඇති අතර වැඩ තහනමට ලක් වූ දින සිට මේ දක්වා ඔහුට අහිමි වූ සියලුම හිඟ වැටුප් සහ දීමනා ගෙවීමටද තීන්දුව ලබා දී තිබේ.

ශ්‍රී ලංකා පොලිස් ඉතිහාසයේ කීර්තිමත් නිළධාරියෙකු ලෙස සැළකෙන ශානි අබේසේකර මහතා මෙරට මෑත ඉතිහාසයේ සිදුවූ සංකීර්ණ අපරාධ පරීක්ෂණ රැසක් මෙහෙය වූ දක්ෂ නිළධාරියෙකු ලෙස සැලකේ.

2020 වසරේ ජූලි මාසයේදී ශානි අබේසේකර මහතා අත්අඩංගුවට ගැණුනු අතර මාස 11ක වැනි දීර්ඝ කාලයක් රක්ෂිත බන්ධනාගාර ගතව සිටීමටද ඔහුට සිදුවිය.

පසුව අභියාචනාධිකරය විසින් ඔහු ඇප මත මුදා හරින ලදී.

කෙසේ වෙතත් 2024 වසරේදී 3/2018 චක්‍ර ලේකයේ ප්‍රතිපාදන අනුව යලි සේවයේ පිටවූ ශානි අබේසේකර මහතා අනතුරුව අපරාධ පරීක්ෂණ දෙපාර්තමේන්තුවේ අධ්‍යක්ෂවරයා ලෙස පත් කරනු ලැබීය.

‘ඩුබායි අසිතට’ අයත් වත්කම් රැසකට අධිකරණයෙන් තහනමක්….

මහා පරිමාණ මත්ද්‍රව්‍ය ජාවාරම්කරුවකු ලෙසින් සැලකෙන ‘ඩුබායි අසිතට’ නමැත්තාට අයත් බව පැවසෙන රන් පවුම් 105ක් පානදුර මහෙස්ත්‍රාත් අධිකරණය විසින් තහනම් කර තිබේ.

මධ්‍යම අපරාධ විමර්ශන කාර්යාංශයේ නීතිවිරෝධි වත්කම් විමර්ශන ඒකකය සිදුකළ කරුණු දැක්වීමකින් අනතුරුව මෙම නියෝගය ක්‍රියාත්මක කර ඇත.

එමෙන්ම ඔහුට අයත් රුපියල් ලක්ෂ 70ක් පමණ වටිනා වෑන් රථයක් හා රුපියල් ලක්ෂ 10ක මුදලක්ද තහනම් කිරීමට අධිකරණය කටයුතු කර තිබේ.

මෙම මුදල් හා රන් භාණ්ඩ ‘ඩුබායි අසිත’ නමැත්තා සිය ඥාතීන්ගේ නම්වලින් මිලදීගෙන තිබූ බව මූලික විමර්ශනවලදී අනාවරණය කරගෙන ඇත.

අධි අවදානම් තැනින් ඉවත්ව වෙනත් තැනක පදිංචි වීමේ අවසන් තීරණයට ජුනි 15 තෙක් කල් දෙයි…..

දිට්වා සුළි කුණාටුව හේතුවෙන් පීඩාවට පත් බදුල්ල දිස්ත්‍රික්කයේ ජන ජීවිතය යථා තත්ත්වයට පත් කිරීම සහ යටිතල පහසුකම් සංවර්ධනය කිරීමේ ප්‍රගතිය සමාලෝචනය කිරීම සඳහා වූ විශේෂ දිස්ත්‍රික් සම්බන්ධීකරණ කමිටු රැස්වීම ජනාධිපති අනුර කුමාර දිසානායක මහතාගේ ප්‍රධානත්වයෙන් අද (13) පස්වරුවේ බදුල්ල දිස්ත්‍රික් ලේකම් කාර්යාලයේදී පැවැත්විණි.

ආපදා තත්ත්වය හේතුවෙන් දිස්ත්‍රික්කයේ පවුල් 26,517කට අයත් පුද්ගලයන් 90,667ක් පීඩාවට පත්ව ඇති අතර, පූර්ණ හානි වූ සහ අධි අවදානම් සහිත නිවාස හේතුවෙන් පවුල් 3,434ක් නැවත පදිංචි කළ යුතුව තිබේ.

දැනට පෞද්ගලික සමාගම් සතු රජයේ ඉඩම් කඩිනමින් නිදහස් කරගෙන, ජනතාව පදිංචි කිරීමේ කටයුතු ආරම්භ කිරීමට ජනාධිපතිවරයා උපදෙස් දුන්නේය. වෙනත් ස්ථානයක පදිංචි වීම පිළිබඳ දෙගිඩියාවෙන් පසුවන්නන්ට තීරණයක් ගැනීම සඳහා ජුනි 15 දක්වා සහන කාලයක් ලබා දී ඇත.

මියගිය පුද්ගලයන් වෙනුවෙන් වන්දි, නිවාස කුලී, සුළු හා මධ්‍ය පරිමාණ ව්‍යාපාරික ස්ථාන සහ ජීවනෝපාය අහිමි වූවන් සඳහා වන්දි ගෙවීමේ ප්‍රගතිය පිළිබඳව ජනාධිපතිවරයා මෙහිදී කරුණු විමසීය.

වගා බිම්වල තැන්පත් වී ඇති වැලි සහ ගල් ඉවත් කිරීම සඳහා අක්කරයකට රුපියල් 25,000ක දීමනාවක් ලබා දීමටත්, ඒ සඳහා ගොවි සංවිධානවල දායකත්වය ලබා ගැනීමටත් තීරණය විය.

මාර්ග සංවර්ධන අධිකාරියට අයත් හානි වූ මාර්ග 21හි වැඩකටයුතු මේ වසර තුළ අවසන් කරන ලෙස නිලධාරීන්ට නියෝග කෙරිණි.

“ජන ජීවිතය යථා තත්ත්වයට පත් කිරීමේදී කිසිසේත් මුදල් බාධාවක් කර නොගන්න. මේ වසර තුළ පීඩාවට පත් ජනතාව සාමාන්‍ය තත්ත්වයට පත් කර, ලබන වසරේ සිට දිස්ත්‍රික් සංවර්ධන සැලසුම් යළි ආරම්භ කිරීමට සූදානම් වන්න.” යනුවෙන්ද  ජනාධිපති අනුර කුමාර දිසානායක මහතා නිලධාරීන්ට ප්‍රකාශ කළේය.

ජාතීන් අතර සහජීවනය ශක්තිමත් කිරීමට පරිණත ආගමික නායකත්වය අත්‍යවශ්‍යයි – අගමැති හරිනි….

සිංහල, දෙමළ සහ මුස්ලිම් ජනතාව සහෝදරත්වයෙන් වෙසෙන බහුසංස්කෘතික ප්‍රදේශවල ජාතීන් අතර සංහිඳියාව ශක්තිමත් කිරීම සඳහා පරිණත ආගමික නායකත්වයක මඟපෙන්වීම අත්‍යවශ්‍ය බව අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.

ඇය මේ බව සඳහන් කළේ ආණමඩුවේ ධර්මකීර්ති ශ්‍රී පඤ්ඤානන්ද නායක ස්වාමීන් වහන්සේ වෙත රාජවන්නි සහ කුමාරවන්නි දෙපළාතේ ප්‍රධාන සංඝනායක ධුරය පිරිනැමීම වෙනුවෙන් අද (13) ආණමඩුව සුදම්පායෙහි පැවති සන්නස් පත්‍ර පිළිගැන්වීමේ උත්සවය අමතමිනි.

නව සංඝනායක හිමියන් වසර 50ක පැවිදි දිවිය තුළත්, වසර 35ක ගුරු සේවය තුළත් ශාසනයට හා අධ්‍යාපනයට කළ මෙහෙවර අග්‍රාමාත්‍යවරිය ඇගයීමට ලක් කළාය.

පසුගිය වසරේ ‘දිට්වා’ සුළි කුණාටුවෙන් පීඩාවට පත් පුත්තලම දිස්ත්‍රික් ජනතාවට සහන සැලසීමේදී උන්වහන්සේ දැක්වූ ක්‍රියාකාරී නායකත්වය මෙහිදී විශේෂයෙන් සිහිපත් කෙරිණි.

පරමාකන්ද රජමහා විහාරය ඇතුළු ඓතිහාසික පුණ්‍යස්ථාන ප්‍රතිසංස්කරණය කරමින් අනාගත පරපුර වෙනුවෙන් සුරක්ෂිත කිරීමට උන්වහන්සේ ගන්නා උත්සාහය ප්‍රශංසනීය බව ඇය පැවසුවාය.

සහකම්පනයෙන් පිරි ජනතාවක් වෙසෙන නව පුනරුද යුගයක් කරා රට මෙහෙයවීමේදී මෙවැනි ප්‍රායෝගික ආගමික නායකයින්ගේ ආශිර්වාදය රජයට මහත් ශක්තියක් බවද ඇය වැඩිදුරටත් සඳහන් කළාය.

මෙම උත්සවයේදී සංඝනායක ධුරය පිළිබඳ සන්නස් පත්‍රය අග්‍රාමාත්‍යවරිය විසින් පිළිගන්වන ලද අතර, විජිනිපත පිළිගැන්වීම විපක්ෂ නායක සජිත් ප්‍රේමදාස මහතා විසින් සිදු කරන ලදී.

මල්වතු විහාර පාර්ශ්වයේ අනුනායක නියංගොඩ විජිතසිරි නාහිමියන්ගේ ප්‍රධානත්වයෙන් පැවති මෙම පුණ්‍යෝත්සවයට වයඹ පළාත් ආණ්ඩුකාරවරයා, අමාත්‍ය චන්දන අබයරත්න, දියවඩන නිලමේ ප්‍රමුඛ මැති ඇමතිවරුන් සහ රාජ්‍ය නිලධාරීන් පිරිසක් සහභාගී වූහ.

ඉදිරි පැය 36 සඳහා කාලගුණ අනාවැකිය…..

ශ්‍රී ලංකාවට ඊසාන දෙසින් පිහිටා ඇති අඩු පීඩන කලාපය තවදුරටත් පවතින බව කාලගුණවිද්‍යා දෙපාර්තමේන්තුව පවසයි.

එම දෙපාර්තමේන්තුව අද (12) පස්වරු 4ට නිකුත් කළ නිවේදනයේ මේ බව සඳහන්.

ඒ අනුව මෙම පද්ධතිය ඉදිරි දින කිහිපය තුළ ආසන්නව උතුරු දෙසට ගමන් කිරීමට ඉඩ ඇති බව සඳහන් වෙයි.

මෙම පද්ධතියේ බලපෑම හේතුවෙන් දිවයිනේ දැනට පවතින වැසි සහිත තත්ත්වය ඉදිරි දින කිහිපය තුළත් පවතිනු ඇතැයි අපේක්ෂා කරන බවද නිවේදනයේ සඳහන් වෙයි.

ඒ අනුව, බස්නාහිර, සබරගමුව, මධ්‍යම, වයඹ සහ උතුරු පළාත්වලත් අනුරාධපුර, ත්‍රිකුණාමලය, ගාල්ල සහ මාතර දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති වේ.

දිවයිනේ අනෙකුත් ස්ථානවල පස්වරු 1.00න් පසු වැසි හෝ ගිගුරුම් සහිත වැසි ඇති වේ.

බස්නාහිර, සබරගමුව, මධ්‍යම, වයඹ සහ ඌව පළාත්වල සහ අම්පාර, මඩකලපුව, ගාල්ල සහ මාතර දිස්ත්‍රික්කවල ඇතැම් ස්ථානවලට මිලිමීටර් 100ට වැඩි තද වැසි ඇති විය හැකිය.

ගිගුරුම් සහිත වැසි සමඟ ඇති විය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුව ජනතාවගෙන් ඉල්ලා සිටිනු ලබයි.

පසුගිය වසරට සාපේක්ෂව ඩෙංගු රෝගීන්ගේ වැඩිවීමක්……

පසුගිය වසරට සාපේක්ෂව ඩෙංගු රෝගීන්ගේ වර්ධනයක් පෙන්නුම් කරන බව ජාතික ඩෙංගු මර්දන ඒකකයේ ප්‍රජා වෛද්‍ය විශේෂඥ ප්‍රසිලා සමරවීර මහත්මිය පවසයි.

අද (12) සෞඛ්‍ය අමාත්‍යාංශයේ පැවැති මාධ්‍ය හමුවකදි අදහස් දක්වමින් වෛද්‍යවරිය පැවසුවේ මෙම වසරේ ඊයේ (11) දිනය වන විට මෙරටින් ඩෙංගු රෝගීන් 27,754ක් වාර්තා වූ බවත් එම රෝගීන් අතුරින් මරණ 14ක්ද සිදුව ඇති බවත්ය.

මෙම රෝගීන් අතුරින් වැඩිම රෝගීන් සංඛ්‍යාවක් වාර්තා වී ඇත්තේ බස්නාහිර පළාතෙන් වන අතර මීට අමතර කොළඹ, ගම්පහ, මාතර, ගාල්ල, රත්නපුර, කළුතර සහ නුවර දිස්ත්‍රික්කවලින්ද රෝගීන් වැඩි වශයෙන් වාර්තා වී තිබේ.

කෙසේ නමුත් දිස්ත්‍රික්ක 25න්ම රෝගීන් වාර්තා වීම සිදුවන බවත් පෙන්වා දුන් වෛද්‍යවරිය පැවසුවේ මෝසම් වැසි සක්‍රීය වීමත් සමගම රෝගීන්ගේ වර්ධනයක් සිදුවීමේ ප්‍රවණතාවයක්ද පවතින බවය.

මේ හේතුවෙන් මදුරුවන් බෝ වන ස්ථාන විනාශ කර ප්‍රදේශ සහ පරිශ්‍ර පිරිසිදුව පවත්වා ගැනීම සිදුකළ යුතු බවද වෛද්‍යවරිය මෙහිදි පෙන්වා දුන්නාය.

උණ සමග මස්පිඩු වේදනාව, හිසරදය, වමනය, ඔක්කාරය, ශරීරයේ රතු පැහැති ළප හටගැනීම, වැනි රෝග ලක්ෂණ හෝ මෙවැනි රෝග ලක්ෂණ අවම වශයෙන් දෙකක් හෝ පවතින්නේ නම් වහාම සුදුසුකම් ලත් වෛද්‍යවරයෙකු මුණ ගැසී තමන්ගේ රෝග ලක්ෂණ සම්බන්ධව වෛද්‍යවරයා දැනුවත් කිරීමට පියවර ගන්නා ලෙසත් වෛද්‍යවරිය මෙහිදී මහජනතාවගෙන් ඉල්ලීමක්ද සිදු කළාය.

වෛද්‍යවරිය පැවසුවේ නිවෙස්වලට සාපේක්ෂව පාසල්, වැඩබිම්, ආගමික ස්ථාන, රාජ්‍ය සහ පෞද්ගලික ආයතවල මදුරුවන් බෝවීම ඉහළ ගොස් ඇති බැවින් ඉතා නොසැලකිමත් ලෙස මදුරුවන් බෝ විය හැකි ස්ථාන දිගින් දිගටම පවත්වාගෙන යන්නේ නම් නීතිමය පියවර ගැනීම සඳහා සෞඛ්‍ය වෛද්‍ය නිලධාරී කාර්යාල වෙත අවශ්‍ය බලතල ලබා දී ඇති බවය.

මදුරුවන් බෝ වන ස්ථාන සඳහා වැඩිවශයෙන්ම බලපාන හේතුවක් බවට පත්ව ඇත්තේ නිසි පරිදි කසළ බැහැර නොකිරීම බැවින් ඒ පිළිබඳව දැඩි අවධානය යොමු කර මදුරුවන් බෝ වන ස්ථාන විනාශ කර දැමීම සියලු පාර්ශවයන්ගේ වගකීමක් බවද වෛද්‍යවරිය මෙහිදී වැඩිදුරටත් අදහස් දක්වමින් සඳහන් කළාය.

2026 අප්‍රේල් මස විදේශ විනිමය ප්‍රේෂණ සියයට 19කින් ඉහළට……

2026 වසරේ අප්‍රේල් මස වන විට ශ්‍රී ලාංකික විදේශගත ශ්‍රමිකයින් විසින් උපයා ඇති විදේශ ප්‍රේෂණ ප්‍රමාණය අමෙරිකානු ඩොලර් මිලියන 767.9 ක ඉහළ අගයක් වාර්තා කර ඇති බව ශ්‍රී ලංකා විදේශ සේවා නියුක්ති කාර්යාංශය පවසයි.

එය පසුගිය වසරට සාපේක්ෂව 19% ක වර්ධනයක් වන අතර, 2025 වර්ෂයේ අප්‍රේල් මාසයේ මෙරටට ලැබුණු විදේශ විනිමය ප්‍රේෂණ ප්‍රමාණය අමෙරිකානු ඩොලර් මිලියන 646ක් බව සඳහන් වේ.

ශ්‍රී ලංකා මහ බැංකු දත්ත වාර්තාවලට අනුව 2026 වසරේ මුල් මාස හතර තුළ පමණක් අමෙරිකානු ඩොලර් මිලියන 3,062.8 ක විදේශ විනිමය ප්‍රේෂණ ප්‍රමාණයක් මෙරටට හිමිව ඇත.

ශ්‍රී ලංකා රජය විසින් ගෙන ඇති විදේශ ප්‍රතිපත්ති අනුව විදේශ රටවල් සමග අවබෝධතා ගිවිසුම් ඇති කර ගැනීම, පුහුණු ශ්‍රමිකයින්ට නව රැකියා වෙළෙඳපොළ හඳුන්වා දීම සහ විදේශ ශ්‍රමිකයන් හට සුභසාධන ප්‍රතිලාභ ක්‍රියාත්මක කිරීම වැනි ක්‍රමවේදයන් හරහා ලාංකික ශ්‍රමිකයන් වැඩි වශයෙන් විදෙස් රැකියාවල නිරත වීමට පෙළඹී ඇත.

ඒ අනුව 2026 මුල් මාස හතර තුළ විදේශ ගත වූ රැකියා නියුක්තිකයන්ගේ ප්‍රමාණය 79,954 ක් වන අතර එයින් වැඩි පිරිසක් එක්සත් අරාබි එමීර් රාජ්‍යයේ රැකියාව සඳහා පිටත්ව ගිය පිරිස බව සඳහන් වේ.

එම පිරිස 17,012 ක් බව ශ්‍රී ලංකා විදේශ සේවා නියුක්ති කාර්යාංශය සඳහන් කරයි.

එමෙන්ම අමෙරිකානු ඩොලර් බිලියන 8කට අධික වූ ශ්‍රී ලංකා ඉතිහාසගත වැඩිම විදේශ විනිමය ප්‍රේෂණ ප්‍රමාණයක් 2025 වර්ෂය තුළ වාර්තාවීමද සුවිශේෂි කරුණක් බව පැවසේ.

මෙරට පාකිස්තාන මහ කොමසාරිස් නියෝජ්‍ය ආරක්‍ෂක ඇමති හමුවෙයි……

මෙරට පාකිස්තාන ඉස්ලාමීය ජනරජයේ මහ කොමසාරිස් මේජර් ජෙනරල් විශ්‍රාමික Nayyar Naseer HI මහතා ඊයේ (11) විශ්‍රාමික නියෝජ්‍ය ආරක්ෂක අමාත්‍ය මේජර් ජෙනරල් අරුණ ජයසේකර කොළඹ පිහිටි නියෝජ්‍ය ආරක්ෂක අමාත්‍ය කාර්යාලයේදී හමුවී තිබේ.

මෙහිදී නියෝජ්‍ය ආරක්ෂක අමාත්‍යවරයා මහ කොමසාරිස්වරයා වෙත ශ්‍රී ලංකාවේ සිය රාජ්‍ය තාන්ත්‍රික සේවාව සාර්ථකව කරගෙන යාමට සුබ පැතුම් එක් කළේය.

දෙපාර්ශ්වය අතර පැවැති මෙම සුහද සාකච්ඡාවේදී අන්‍යොන්‍ය වශයෙන් වැදගත් වන කරුණු පිළිබඳව අදහස් හුවමාරු කරගෙන ඇති අතර, දෙරට අතර පවතින ද්විපාර්ශ්වික සබඳතා තවදුරටත් වර්ධනය කර ගැනීමේ වැදගත්කම අවධාරණය කළේය.

ආරක්ෂක සහයෝගීතාව, පුහුණු අවස්ථා සහ කලාපීය ආරක්ෂක සම්බන්ධීකරණය ශක්තිමත් කිරීම පිළිබඳව මෙහිදී දෙපාර්ශවය අදහස් හුවමාරු කර ගෙන ඇත.

මේ අතර, ආපදා කළමනාකරණය ජාතික ආරක්ෂාවේ අනිවාර්ය අංගයක් බවට පත්ව ඇති බව දෙපාර්ශවයම පිළිගෙන ඇති අතර, දේශගුණික විපර්යාස හේතුවෙන් සිදුවන ආපදාවන්ගේ වර්ධනය සැලකිල්ලට ගනිමින්, ක්‍රියාකාරී මනා සම්බන්ධීකරණයකින් යුත් සහ තාක්ෂණය පදනම් කරගත් ප්‍රතිචාර දැක්වීමක ඇති වැදගත්කම ද මෙහිදී තවදුරටත් පෙන්වා දී ඇත.

එමෙන්ම, දේශ සීමා ඉක්මවා යන සමුද්‍රීය අපරාධ, විශේෂයෙන් මත්ද්‍රව්‍ය ජාවාරම් සම්බන්ධයෙන් මතුවෙමින් පවතින තර්ජනයන් පිළිබඳව ද අවධානය යොමු වී තිබේ.

මෙම අභියෝග සඳහා සාර්ථකව මුහුණ දීම සඳහා තවදුරටත් තාක්ෂණික සහ සහයෝගීතා සහාය අවශ්‍ය බව දෙපාර්ශවයම පිළිගෙන ඇති බව සඳහන් වෙයි.

මෙම අවස්ථාවට ශ්‍රී ලංකාවේ පාකිස්තාන ආරක්ෂක උපදේශකවරයා ද සහභාගී වී තිබේ.

අන්තරායකර මත්ද්‍රව්‍ය භාවිත කරන රියදුරන් වැටලීම් අඛණ්ඩව ඉදිරියට……

පොදු ප්‍රවාහනයේ යෙදෙන රියදුරන් ඉලක්ක කරගත් විශේෂ අන්තරායකර මත්ද්‍රව්‍ය පරීක්ෂණ වැඩසටහනක් ක්‍රියාත්මක කිරීමට ප්‍රවාහන, මහාමාර්ග හා නාගරික සංවර්ධන අමාත්‍යාංශය තීරණය කර තිබේ.

අමාත්‍යාංශය පැවසුවේ පොදු ප්‍රවාහනයේ ගුණාත්මකභාවය ඉහළ නැංවීම සහ මගී ජනතාවගේ ජීවිත ආරක්ෂාව තහවුරු කිරීමේ අරමුණින් මෙම තීරණය ගෙන ඇති බවය.

විෂයභාර අමත්‍ය බිමල් රත්නායක මහතාගේ සංකල්පයකට අනුව ප්‍රවාහන, මහාමාර්ග හා නාගරික සංවර්ධන අමාත්‍යාංශය යටතේ සකස් කෙරෙන මාර්ග ආරක්ෂණ සැලැස්ම යටතේ ක්‍රියාවට නැංවෙන මෙම ක්‍රියාවලියේ තවත් එක් පියවරක් අද (12) පෙරවරුවේ කඩවත බස් නැවතුම්පොළ භූමියේදී ක්‍රියාත්මක කෙරෙිණි.

මෙම අහඹු පරීක්ෂණ වෙනුවෙන් ජාතික ප්‍රවාහන වෛද්‍ය ආයතනයේ වෛද්‍ය නිලධාරී වෛද්‍ය ලයනල් මුහන්දිරම්ගේ මහතා ප්‍රමුඛ කණ්ඩායමක් සහභාගී වූ අතර එම ආයතනයේ ජංගම පරීක්ෂණාගාර බස් රථය තුළ මෙම පරීක්ෂණ සිදු කෙරිණි.

මෙම පරීක්ෂණය සඳහා කඩවත බස් නැවතුම්පොළේ ගාල් කෙරෙන බස් රථවල රියදුරන් සහ රිය සහායකයින් 148 දෙනෙකු පමණ යොමු කර තිබූ අතර ඉන් 07 දෙනෙකු අන්තරායකර ඖෂධ භාවිත කර ඇති බවට තහවුරු විය.

පසුගිය කාලසීමාව තුළ සිදුවූ රිය අනතුරු සහ මාර්ග විනය පිරීහීමට බලපා තිබෙන හේතු සාධක සැලකිල්ලට ගනිමින් අන්තරායකර මත්ද්‍රව්‍ය භාවිතයෙන් තොර විනයගරුක රියදුරු පිරිසක් බිහි කිරීම මෙම වැඩසටහනේ මූලික අපේක්ෂාව බව වෛද්‍ය ලයනල් මුහන්දිරම්ගේ මහතා මෙහිදී අවධාරණය කළේය.

තවද ප්‍රවාහන අමාත්‍යාංශය, ශ්‍රී ලංකා පොලීසිය සහ ජාතික ප්‍රවාහන වෛද්‍ය ආයතනයේ පූර්ණ සහාය ඇතිව ක්‍රියාත්මක වන මෙම වැඩසටහන සඳහා ජංගම බස් රථයක් ද සූදානම් කර ඇති බවත් මගීන්, පදිකයින් මෙන්ම රියදුරන්ගේ ජීවිත ආරක්ෂාව වෙනුවෙන් මෙම වැඩසටහන දීප ව්‍යාප්තව ක්‍රියාත්මක කරන බවත් ඔහු වැඩිදුරටත් පැවසීය.

එසේම මෙම පරීක්ෂණ තුලින් අන්තරායකර මත්ද්‍රව්‍ය භාවිත කළ රියදුරන් හඳුනාගතහොත් ඔවුන්ට ආයතනික නීති පද්ධතිය යටතේ උපරිම දඬුවම් ලබා දීමටත් රටේ පොදු නීතිය යටතේ ද නීතිමය ක්‍රියාමාර්ග ගැනීමට කටයුතු සූදානම් කර තිබේ.

උමා ඔය ඉඩම් ගැටලුවට කැබිනට් අනුකමිටුවෙන් විසඳුම්……

දීර්ඝ කාලයක් පුරාවට උමා ඔය ව්‍යාපෘතිය හේතුවෙන් වැලිමඩ, ඌව පරණගම, හාලිඇළ යන ප්‍රදේශීය ලේකම් කොට්ඨාසයන් හී ජනතාව මුහුණ දුන් ඉඩම් ගැටලුව සඳහා කැබිනට් අනුකමිටුව මැදිහත් වී ස්ථීර විසඳුම් ලබා දීමට පියවර ගෙන තිබේ.

ඒ අනුව මීට පෙර පැවැති තක්සේරු කිරීම් සම්බන්ධයෙන් ජනතාව දැක්වූ විරෝධතාව සලකා බලා විද්‍යාත්මක තක්සේරුකරණයකට අනුව වන්දි පිරි නැමීමට රජය තීරණය කර ඇත.

මෙම ක්‍රියාවලියේ පළමු අදියර ලෙස උමා ඔය ව්‍යාපෘතියේ ජලාශ ඉදිකිරීමේදී ඉඩම් අහිමි වු පුද්ගලයින් 246 දෙනෙකු වෙනුවෙන් රුපියල් මිලියන 300කට අධික ප්‍රතිපාදන වෙන් කර තිබේ.

එහි මූලික පියවරක් ලෙස රුපියල් ලක්ෂ 12 බැගින් වූ වන්දි චෙක්පත් ඌව පරණගම සහ වැලිමඩ ප්‍රාදේශීය ලේකම් කොට්ඨාසයේ පවුල් 73ක් වෙනුවෙන් ප්‍රධානය කිරීම අද (12) බදුල්ල දිස්ත්‍රික් ලේකම් කාර්යාලයේදී සිදුවිය.

කැබිනට් අනුකමිටුව ප්‍රදේශයේ සිදුකළ නිරීක්ෂණ චාරිකාවෙන් අනතුරුව මෙම තීන්දු ලෙන ඇති අතර මේ වන විටත් ප්‍රතිලාභීන් විශාල පිරිසක් තමන්ට හිමි වන්දි මුදල් සම්බන්ධයෙන් එකඟතාව පළකර අත්සන් තබා ඇති බවත් වාර්තා වේ.

මේ අතර මෙම වැඩපිළිවෙල හරහා උමා ඔය ව්‍යාපෘතිය හේතුවෙන් වැලිමඩ, ඌව පරණගම, හාලිඇළ යන ප්‍රාදේශීය ලේකම් කොට්ටාසයන් ඉඩම් හිමිකම් සහ වන්දි සම්බන්ධ ගැටලු රැසක් කඩිනමින් විසඳීමටද රජය අපේක්ෂා කර තිබේ.