Category: news_sub

අවසරයකින් තොරව ඩ්‍රෝන පියාසර කිරීම තහනම්….

ශ්‍රී ලංකාව තුළ දේශීය හා විදේශීය පුද්ගලයින් විසින් නිසි අවසරයකින් තොරව ඩ්‍රෝන යානා පියාසර කිරීම තහනම් බව ශ්‍රී ලංකා ගුවන් හමුදාව විසින් මහජනතාවට දැනුම් දී තිබේ.

ඒ අනුව, මීට පෙරද අධි ආරක්ෂිත කලාපයන් තුළ අවසර රහිතව ඩ්‍රෝන යානා ක්‍රියාත්මක කළ පුද්ගලයින්ට නීත්‍යානුකූල ක්‍රියාමාර්ග ගෙන ඇති බවද සඳහන් වේ.

එබැවින්, ශ්‍රී ලංකාව තුළ ඩ්‍රෝන යානා පියාසර කිරීමට අදහස් කරන සියලු පුද්ගලයින් අදාළ නීති හා රෙගුලාසි පිළිපදිමින්, නිසි අවසර ලබාගෙන පමණක් එම ක්‍රියාකාරකම් සිදුකරන ලෙස ශ්‍රී ලංකා ගුවන් හමුදාව අවධාරණය කරයි.

මෙම දැනුම්වත් කිරීම, ජාතික ආරක්ෂාව තහවුරු කිරීම සහ ඩ්‍රෝන යානා භාවිතාකරුවන්ට ඇතිවිය හැකි නීතිමය ගැටලු හා අපහසුතා වළක්වා ගැනීම අරමුණු කරගෙන සිදුකරනු බව ගුවන් හමුදාව වැඩිදුරටත් සඳහන් කරයි.

QR ලියාපදිංචියට WhatsApp අංකයක්….

ජාතික ඉන්ධන බලපත්‍රය හෙවත් QR ඛේතය ලබා ගැනීම සදහා ලියාපදිංචි කිරීමට සහයක් ලෙස විශේෂ WhatsApp අංකයක් හඳුන්වාදීමට ඩිජිටල් ආර්ථික අමාත්‍යාංශය කටයුතු කර තිබේ.

ලිංයාපදිංචි වීමේදී ගැටලු පවතින පුද්ගලයින්ට  076 000 19 19 යන WhatsApp අංකය වෙත වාහනයේ අංකය යොමු කිරීමෙන් පවතින ගැටළු නිරාකරණය කර ගත හැකි බව සඳහන්ය.

ඒ සමගම ජාතික හැඳුනුම්පත, රියදුරු බලපත්‍රය හෝ විදේශ ගමන් බලපත්‍රයේ ඡායාරූපයක් වලංගු ආදායම් බලපත්‍රය සහ වාහන ලියාපදිංචි සහතිකය ද යොමු කර යුතු වෙයි.

මේ සඳහා ඉල්ලුම් කිරීමට වාහනයේ ලියාපදිංචි හිමිකරු පමණක් සුදුසුකම් ලබන අතර ලබා දෙන සියලුම තොරතුරු සහ පෞද්ගලික දත්ත, 2022 අංක 9 දරණ පෞද්ගලික ආරක්ෂන පනතට අනුකූලව ආරක්ෂා කරන බව ඩිජිටල් ආර්ථික අමාත්‍යාංශය වැඩිදුරටත් සඳහන් කළේය.

සංචාරක කර්මාන්තය සඳහා ඉන්ධන නිකුත් කිරීම ගැන දැනුම්දීමක්….

සංචාරක කර්මාන්තය සඳහා ඉන්ධන අවශ්‍යතා වෙනුවෙන් ලියාපදිංචි විය යුතු ආකාරය සම්බන්ධයෙන් විදේශ කටයුතු, විදේශ රැකියා සහ සංචාරක අමාත්‍යාංශය නිවේදනයක් නිකුත් කර තිබේ.

ඒ අනුව සංචාරක කර්මාන්ත කටයුතු සඳහා අවශ්‍ය ඉන්ධන ලබාගැනීමට https://tourismfuel.sltda.gov.lk/  යන සබැඳිය ඔස්සේ තොරතුරු ලබා දිය යුතුයි.

පෝරමය පිරවීම සඳහා Gmail ගිණුමක් භාවිත කිරීම අනිවාර්ය වේ.

6 ශ්‍රේණියේ අධ්‍යාපන ප්‍රතිසංස්කරණය 2027දී ආරම්භ කිරීමට සියල්ල සූදානම්…..

6 ශ්‍රේණියේ අධ්‍යාපන ප්‍රතිසංස්කරණය 2027 ආරම්භ කිරීමට සූදානම් බවත් ඊට අදාළ සියලු මොඩියුල විශේෂ කමිටු හරහා ගැඹුරින් යළි සළකා බලමින් පවතින බවත් අධ්‍යාපන ප්‍රතිසංස්කරණය පිළිබඳ පාර්ලිමේන්තු අනු කමිටුවේ දී අවධාරණය කර තිබේ.

අධ්‍යාපන ප්‍රතිසංස්කරණය පිළිබඳ පාර්ලිමේන්තු අනු කමිටුව ඊයේ (17) පාර්ලිමේන්තුවේදී  අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන්  රැස්ව ඇති අතර එම අවස්ථාවේ දී මේ බව සාකච්ඡා කළ බව සඳහන් වේ.

එමෙන්ම නව අධ්‍යාපන ප්‍රතිසංස්කරණ ක්‍රියාවලියේ වත්මන් ප්‍රගතිය සහ ඉදිරි ක්‍රියාමාර්ග පිළිබඳ මෙහිදී සාකච්ඡා කර ඇත.

මේ අතර, 2026 වසරේ ආරම්භ කළ පළමු ශ්‍රේණිය නව අධ්‍යාපන ප්‍රතිසංස්කරණ ක්‍රියාවලිය ප්‍රගතිය පිළිබඳ අධික්ෂණය කිරීම ඉදිරියේදී සිදු කරන බව එහිදී නිලධාරීන් පවසා ඇත.

එමෙන්ම ඇගයීම් සහ තක්සේරු කිරීම් සම්බන්ධයෙන් නිර්දේශ ලබා ගැනීම සඳහා විදෙස් සම්පත්දායකයින්ගේ සහභාගීත්වයෙන් විශේෂ කමිටුවක් පත් කර ඇති අතර අදාළ සම්පත්දායකයින් ඉදිරියේදී ලංකාවට පැමිණිමට නියමිතව ඇත.

ජනාධිපතිවරයාගේ උපදෙස් මත අධ්‍යාපනය සම්බන්ධයෙන් ජාතික මෙහෙයුම් කමිටුව පත්කිරීමට අදාළ කැබිනට් පත්‍රිකාව මේ වනවිට අමාත්‍ය මණ්ඩලයට යොමු කර ඇති අතර දිස්ත්‍රික් සහ ප්‍රාදේශීය මට්ටමේ මෙහෙයුම් කමිටු පත්කිරීමට ඉදිරියේදී කටයුතු කරන බවද එහිදී අනාවරණය වී තිබේ.

තවද, පළමු ශ්‍රේණියේ දෙවන සහ තෙවන වාරය සඳහාවන ක්‍රියාකාරකම් පාදක පොත් මුද්‍රණය කිරීමට සුදානම් කර ඇති අතර දෙවන වාරය සඳහා වන ප්‍රායෝගික ක්‍රියාකාරකම් පොත් අප්‍රේල් පාසල් නිවාඩුවෙන් පසු දරුවන් වෙත ලබාදීමට සැලසුම් කර ඇති බවත් අධ්‍යාපන අමාත්‍යංශයේ ලේකම් නාලක කලුවැව මෙහිදී පවසා ඇත.

ප්‍රසිද්ධ ආයතනවල නියෝජිතයන් ලෙස පෙනී සිටිමින් සිදුකරන අන්තර්ජාල මූල්‍ය වංචා….

ප්‍රසිද්ධ ආයතනයක නියෝජිතයන් ලෙස පෙනී සිටිමින්, අදාළ ආයතනයේ සේවාවන් ලබා ගැනීම සඳහා විශේෂ ජංගම යෙදවුමක් (App) ස්ථාපනය කළ යුතු බවට පවසමින් වංචනිකයින් විසින් සිදුකරන අන්තර්ජාල මූල්‍ය වංචා පිළිබඳව වාර්තා වන බව පොලීසිය පවසයි.

අන්තර්ජාලය සහ නවීන තාක්ෂණය භාවිතා කරමින් සිදු කරනු ලබන වංචනික ක්‍රියාවන් සහ මූල්‍ය අක්‍රමිකතා සම්බන්ධව ශ්‍රී ලංකා පොලීසිය විසින් නිරන්තරයෙන් ජනතාව දැනුවත් කලද මෙම වංචාවන් පිළිබඳ ලැබෙන පැමිණිලි සංඛ්‍යාව දෛනිකව ඉහළ යමින් පවතින බව පොලීසිය සඳහන් කරයි.

වංචාකරුවන් විසින් මහජනතාව මුලා කිරීම සඳහා,

*ප්‍රසිද්ධ ආයතනයක නියෝජිතයන් ලෙස පෙනී සිටිමින්, අදාළ ආයතනයේ සේවාවන් ලබා ගැනීම සඳහා විශේෂ ජංගම යෙදවුමක් (App) ස්ථාපනය කළ යුතු බවට ඔබව පොළඹවනු ඇත. එම යෙදවුම ස්ථාපනය කිරීම සඳහා සහාය වන බව පවසමින්, ඔබගේ දුරකථන තිරය ඔවුන් සමඟ හුවමාරු කර ගන්නා ලෙස (Screen Share) උපදෙස් ලබා දෙනු ලබයි.

*මෙහිදී සිදුවනුයේ, ජංගම දුරකථන තිරය හුවමාරු කර ගැනීම හරහා ඔබගේ දුරකථනයට දුරස්ථව ප්‍රවේශ වීමේ හැකියාව (Remote Access) වංචාකරුවන්ට ලැබීමයි. එමගින් ඔබගේ දුරකථනයේ ඇති බැංකු යෙදවුම් (Online Banking Apps) හරහා ගිණුම්වල ඇති මුදල් ඉතා සූක්ෂම ලෙස වෙනත් ගිණුම්වලට බැර කර ගැනීමට ඔවුන් කටයුතු සිදු කරයි.

*මහජනයාට පවතින තාක්ෂණික කරුණු පිළිබඳ අනවබෝධය මෙවැනි වංචා වලට හසු වීමට ප්‍රධාන හේතුවක් වී ඇති බවට පෙනී ගොස් ඇති අතර මෙවැනි වංචා වලින් ආරක්ෂා වීම සඳහා පහත සඳහන් කරුණු පිළිබඳව අවධානයෙන් කටයුතු කරන ලෙස පොලිසිය මහජනතාවගෙන් ඉල්ලා සිටියි.

*සමාජ මාධ්‍ය ඔස්සේ “විවිධ ආදායම් මාර්ග” හෝ ” වැඩි ලාභ ලබා දෙන ආයෝජන” ලෙස පළවන දැන්වීම් පිළිබඳව අතිශයින්ම සැලකිලිමත් විය යුතු අතර මුල් අවස්ථාවේදී සුළු ලාභයක් ලබා දී විශ්වාසය ගොඩනගාගනිමින් පසුව විශාල මුදල් ප්‍රමාණයක් වංචා කිරීම මොවුන්ගේ ස්වභාවයයි.

*බැංකු ගිණුම් අංක, මුරපද (Passwords), හෝ ජංගම දුරකථනයට ලැබෙන OTP කේතකිසිදු හේතුවක් මත බාහිර පුද්ගලයන් සමඟ හුවමාරු කර නොගත යුතු අතර කිසිදු පිළිගත් බැංකුවක් හෝ ආයතනයක් පාරිභෝගිකයන්ගෙන් දුරකථනය හරහා එවැනි තොරතුරු විමසීම් නොකරන බවට දැනුවත් විය යුතුය.

*නාඳුනන පුද්ගලයන් විසින් යොමු කරනු ලබන සබැඳි (Links) මත ක්ලික් කිරීමෙන් හෝ ඔවුන් ලබාදෙන යෙදවුම් (Apps) ස්ථාපනය කිරීම නොකල යුතු අතර විශේෂයෙන්ම ඔබගේ දත්ත වෙත ප්‍රවේශ වීමට අවසර (Access Permissions) ඉල්ලා සිටින විට එය ලබා දීමට පෙර ඉතා සැලකිලිමත් විය යුතුය.

*එබැවින් නාඳුනන පුද්ගලයන්ගේ උපදෙස් මත ඔබගේ ජංගම දුරකථන තිරය හුවමාරු (Screen Share) කිරීමෙන් ඔබගේ දුරකථන තිරය ඔවුන්ට පෙන්වීමෙන් වැළකිය යුතුය.

*කිසියම් හේතුවක් මත මෙවැනි මූල්‍ය වංචාවකට ඔබ හසුවී නම් පළමුව අදාළ බැංකුව හෝ මූල්‍ය ආයතනය දැනුවත් කර ඔබගේ ගිණුම් ආරක්ෂා කර ගැනීමට කටයුතු කල යුතුය.

‘රටම එකට’ ජාතික මෙහෙයුමෙන් 124,412ක් අත්අඩංගුවට….

‘රටම එකට’ ජාතික මෙහෙයුම පසුගිය වසරේ ඔක්තෝබර් 30වනදා ආරම්භ කළ දින සිට මේ දක්වා කාලය තුළ අත්අඩංගුවට ගැනීම් 124,412ක් සිදුකර තිබෙන බව ජනාධිපති මාධ්‍ය අංශය පවසයි.

විෂ මත්ද්‍රව්‍ය ව්‍යසනය මුලිනුපුටා දැමීම සඳහා වූ ‘රටම එකට’ ජාතික මෙහෙයුම් සභාව ජනපති ප්‍රධානත්වයෙන් අද (18) රැස්වූ අවස්ථාවේ දී මෙම කරුණු අනාවරණය විය.

ඒ සම්බන්ධයෙන් නිවේදනයක් යොමුකරමින් ජනාධිපති මාධ්‍ය අංශය සඳහ් කළේ, අත්අඩංගුවට ගත් පිරිස අතර පිරිමි දරුවන් 1772ක් සහ ගැහැණු දරුවන් 81ක් සිටින බවය.

එමෙන්ම සමාජයේ විවිධ තරාතිරම්වල පුද්ගලයන්ද ඒ අතර සිටින බවත් අදාළ නිවේදනයේ සඳහන්ය.

මෙම අත්අඩංගුවට ගත් පිරිස අතර නීතිවිරෝධි වත්කම් පිළිබද සැකකරුවන් 196ක්, රැඳවුම් නියෝග මත 2,268ක් සිටින අතර, තවත් 1,840ක් පුනරුත්ථාපනය සඳහා යොමුකර තිබේ.

මේ අතර මෙම මෙහෙයුම යටතේ අත්අඩංගුවට ගැනීම්වලට අමතරව ගංජා කිලෝ 4,520ක්, හෙරොයින් කිලෝ 1,066යි ග්‍රෑම් 352ක් සහ නීතිවිරෝධී දුම්වැටි 558,300ක්, අයිස් කිලෝ 1,930ක් සහ කොකේන් කිලෝ 270ක් මෙන්ම මත්පෙති 983,143ක් පොලීසිය සිය භාරයට ගෙන ඇති බවය.

මෙම මෙහෙයුම ආරම්භ කිරීමත් සමග මත්ද්‍රව්‍ය පිළිබඳ තොරතුරු විශාල වශයෙන් ‘1818’ යන දුරකථන අංකය ඔස්සේ පොලීසියට ලැබෙමින් තිබෙන බවත්, ඊට අදාළ මෙහෙයුම් පිළිබඳ නිරන්තරයෙන් ප්‍රගතිය සමාලෝචනය කෙරෙන බවත් ජනාධිපති මාධ්‍ය අංශය නිකුත්කළ නිවේදනයේ දැක්වේ.

දකුණු මුහුදේ දී මත්ද්‍රව්‍ය සමඟ අත්අඩංගුවට ගත් 5කට රැඳවුම් නියෝග….

දිවයිනට දකුණු දෙසින් වූ මුහුදේ, බහුදින යාත්‍රාවකදී මත්ද්‍රව්‍ය කිලෝග්‍රෑම් 654ක් සමඟ අත්අඩංගුවට ගත් සැකකරුවන් දසදෙනා අද (18) අලුත් කඩේ මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව එයින් පස්දෙනෙකුව රැඳවුම් නියෝග මත රඳවාගෙන ප්‍රශ්න කිරීමට අවසර ලබා දී තිබේ.

ඉතිරි සැකකරුවන් 5දෙනාට මෙම මස 31 වෙනිදා දක්වා රක්ෂිත බන්ධනාගාර ගත කරන ලෙසට ද නියෝග කර ඇත.

ශ්‍රී ලංකා නාවික හමුදාව විසින් පසුගියදා දිවයිනට දකුණු දෙසින් වූ මුහුදේ දී බහුදින ධීවර යාත්‍රවක ගමන් කරමින් සිටි මෙම සැකකරුවන් මත්ද්‍රව්‍ය කිලෝග්‍රෑම් 654ක් සමඟ අත්අඩංගුවට ගෙන තිබුණි.

අදාළ මත්ද්‍රව්‍ය තොගය සමග ධීවර යාත්‍රාව පසුගිය 12 වෙනිදා පෙරවරුවේ දික්ඕවිට ධීවර වරායෙන් ගොඩබිමට රැගෙන ආවේය.

එහි සිදුකළ විමර්ශන වලදී බහුදින ධීවර යාත්‍රාවේ තිබී මත්ද්‍රව්‍ය අඩංගු උර 48ක් සොයාගැනීමට හැකිවිය.

ඉන් කිලෝග්‍රෑම් 478ක් අයිස් බවත්, ඉතිරි කිලෝග්‍රෑම් 176 හෙරෙයින් බවත් පොලීසිය පැවසීය.

මෙම මත්ද්‍රව්‍ය තොගයේ වටිනාකම රුපියල් බිලියන 10කට අධික බව වාර්තා වේ.

මත්ද්‍රව්‍ය තොගයට අමතරව පිස්තෝල වර්ගයේ ගිනිඅවි 8ක්, ඒවාට යොදන මැගසින්, T56 වර්ගයේ ගිනිඅවි 2ක් සහ M16 වර්ගයේ ගිනිඅවියක් සොයාගත් අතර, එය මහ මුහුදේදි නාවික හමුදාව සිය භාරයට ගත් වැඩිම ගිනිඅවි තොගයද විය.

නීතිවිරෝධී ඉන්ධන නිකුත් කිරීම්වලට එරෙහිව දැඩි ක්‍රියාමාර්ග…..

ඉන්ධන නිකුත් කිරීම සම්බන්ධයෙන් නියමිත උපදෙස්වලට පරිබාහිරව කටයුතු කරන ඉන්ධනහල් හිමියන්ට එරෙහිව නීතිමය ක්‍රියාමාර්ග ගැනීමට පියවරගෙන ඇත.

රජයේ ප්‍රවෘත්ති දෙපාර්තමේන්තුව අද (18) පස්වරුවේ නිවේදනයක් නිකුත්කරමින් සඳහන් කළේ, අදාළ තොරතුරු ලබාදීම සඳහා ලංකා ඛනිජ තෙල් නීතිගත සංස්ථාව විසින් විශේෂ දුරකථන අංකයන් ස්ථාපිත කර ඇති බවය.

ඒ අනුව පහත අංක වෙත අදාළ තොරතුරු ලබාදෙන ලෙස මහජනතාවගෙන් කාරුණිකව ඉල්ලා සිටී.

දුරකථන අංක : 0112106767 / 0117296130

නොරොච්චෝලේ විදුලිය ගැන ආන්දෝලනාත්මක කතාබහක්….

නොරොච්චෝලේ බලාගාරයේ විදුලිය නිෂ්පාදන ධාරිතාව ප්‍රමිතියෙන් තොර ගල්අඟුරු භාවිත කිරීම හේතුවෙන් පහත බැස ඇති බවට ආන්දෝලනාත්මක කතාබහක් ඇති වී ඇති පසුබිමක, ගල්අඟුරු විදුලි ජනන ධාරිතාව පහත බැස ඇති බවට වන දත්ත ශ්‍රී ලංකා මහ බැංකුව නිකුත්කරන දිනපතා ආර්ථික දර්ශක වාර්තාවලින් අනාවරණ වේ.

ඒ අනුව ඉකුත් මාර්තු 03 වැනිදා ගල්අඟුරු දහනයෙන් ගිගාවොට් 34.2ක විදුලි ප්‍රමාණයක් ජාතික පද්ධතියට එක්කර ඇති අතර, එම අගය ඊයේ දිනයේදී එනම්, මාර්තු  17 වැනිදා ගිගාවොට් 26.2ක් දක්වා පහළ ගොස් තිබේ.

කෙසේ නමුත් එම වාර්තාවලට අනුව මාර්තු 03 වැනිදා ඩීසල් බලාගාර මගින් ගිගාවොට් 18.7ක විදුලි ධාරිතාවක් උත්පාදනය කර ඇති අතර, එම අගය මාර්තු මස 17 වැනිදා ගිගාවොට් 26ක් දක්වා ඉහළ ගොස් තිබීම විශේෂත්වයක්.

ඉන්ධන සම්බන්ධයෙන් ගැටලුකාරී තත්ත්වයක් පවතින පසුබිමක විදුලි උත්පාදනයටත් මෙලෙස ඩීසල් බලාගාර වැඩි දායකත්වයක් ලබාදීම අඛණ්ඩ විදුලි සැපයුමට බාධා එල්ල කරනු ඇති බවට විශේෂඥයන්ගේ මතය වී තිබේ.

අල්ලස් ගත් අඩවි වන නිලධාරීන් ඇතුළුව 05ක් අත්අඩංගුවට….

අල්ලස් ඉල්ලා ලබාගැනීමේ චෝදනා මත දෙහිඕවිට අඩවි වන කාර්යාලයේ නිලධාරීන් තිදෙනෙකු, නිලධාරිනියක් සහ සිවිල් පුරවැසියෙකු අල්ලස් හෝ දූෂණ චෝදනා විමර්ශන නිලධාරීන් විසින් ඊයේ (17) අත්අඩංගුවට ගෙන ඇත.

මීගමුව ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට මෙම සැකකරුවන් අත්අඩංගුවට ගෙන තිබේ.

එහි පළමු සැකකරු ලී මෝලක හිමිකරුවෙක්ය. ඔහු,

පැමිණිලිකරු විසින් ගෝනවල, කැලණිය ප්‍රදේශයේ ඉදිකරමින් පවතින නිවසෙහි උළුවහු, ජනෙල් සකස්කර ගැනීමට මිලදී ගත් දැව, ඉදිකරනු ලබන නිවසට ප්‍රවාහනය කිරීමට අවශ්‍ය රාජකාරි කටයුතු ඉටුකර දීම සඳහා එම දැව මිල දී ගත් ලී මෝලේ හිමිකරුවන පළමු සැකකරු විසින් දෙහිඕවිට අඩවි වන කාර්යාලයේ නිලධාරීන්ගේ දැනුම්දීම මත එම නිලධාරීන්ට ලබාදීම සඳහා තුටු පඬුරක් ලෙස රු.10,000ක මුදලක් අල්ලස් වශයෙන් ඉල්ලා ලබා ගැනීම.

දෙවන සැකකරු වන ක්ෂේත්‍ර සහකාර (කාර්යාලය) නිලධාරියෙක්ය. ඔහු,

පැමිණිලිකරු විසින් උළුවහු, ජනෙල් සකස්කිරීම සඳහා ලී මෝලෙන් ගෙන මිල දී ගෙන ඇති කොස් දැව ප්‍රවාහනය කිරීමට අවශ්‍ය බලපත්‍ර සකස් කර දීමේ රාජකාරී කටයුතු සඳහා සහය වීම් වෙනුවෙන් තුටු පඬුරක් ලෙස රු.1,000ක මුදලක් අල්ලස් වශයෙන් ඉල්ලා ලබාගැනීම.

තෙවන සැකකරු වන ක්ෂේත්‍ර සහකාර (කරවනැල්ල) නිලධාරියෙක්ය. ඔහු,

ලී මෝලෙන් ගෙන මිල දී ගෙන ඇති කොස් දැව ප්‍රවාහනය කිරීමට අවශ්‍ය බලපත්‍ර සකස් කරදීමේ රාජකාරි කටයුතු සඳහා රු.10,000ක මුදලක් අල්ලස් වශයෙන් පැමිණිලිකරුගෙන් මුලින් ඉල්ලා පසුව, 2026.03.17 වන දින ලී මෝල වෙත පිටව ගොස් එම දැව කඳන් පරීක්ෂා කර ප්‍රවාහන බලපත්‍ර ලබාදීමට අවශ්‍ය රාජකාරී කටයුතු ඉටු කර දීම වෙනුවෙන් පළමු සැකකරුගෙන් තුටු පඬුරක් ලෙස රු. 3,000ක මුදලක් අල්ලස් වශයෙන් භාර ගැනීම

හතරවන සැකකරු බිට්ටු වන (දැරණියගල) නිලධාරීයෙක්ය. ඔහු,

බලපත්‍රයට නිර්දේශය ලබාදීම වෙනුවෙන් පළමු සැකකරුගේ තුටු පඬුරක් ලෙස රු.3,000ක මුදලක් අල්ලස් වශයෙන් භාරගැනීම.

පස්වන සැකකාරිය වන ක්ෂේත්‍ර සහකාර (කාර්යාලය) නිලධාරිනියක්ය. ඇය,

බලපත්‍ර සකස් කරදීමේ රාජකාරී කටයුතු සඳහා සහාය වීම වෙනුවෙන් තුඩු පඬුරක් ලෙස රු.1,000ක මුදලක් පළමු සැකකරුගෙන් අල්ලස් වශයෙන් භාර ගැනීම.

ඒ අනුව අදාළ සැකකරුවන් පිළිවෙළින් ඊයේ (17) පිළිවෙළින් ප.ව. 3.20, ප.ව. 3.42, ප.ව. 4.05, ප.ව. 4.32 සහ ප.ව 5.02ට පමණ පළමු සැකකරු, ඔහුගේ නමින් ඇති ලී මෝල තුල දී සහ අනෙක් සැකකරුවන් දෙහිඕවිට අඩවි වන කාර්යාලය තුළදී ද අත්අඩංගුවට ගන්නා ලදී.

අත්අඩංගුවට ගත් සැකකරුවන් අවිස්සාවේල්ල මහේස්ත්‍රාත් අධිකරණය වෙත ඉදිරිපත් කිරීමට නියමිතව ඇත.