Category: news_sub

මගී ප්‍රවාහන බස් රථයක මත්ද්‍රව්‍ය ඇති බවට ඔත්තුවක්…..

සිරිපුර සිට මහනුවර බලා ධාවනය වූ පුද්ගලික බස් රථයක රිය සහයක සන්තකයේ මත්ද්‍රව්‍ය තිබෙන බවට ලද තොරතුරක් මත ඊයේ (13) ගිරාදුරුකෝට්ටේ පොලිස් ස්ථානයේ නිලධාරීන් එම බස් රථය පොලිස් ස්ථානය ඉදිරිපිටදීම නවත්වා පරීක්ෂාවට ලක්කර ඇත.

එහිදී මදන මෝදක ලෙස හදුන්වන මත්ද්‍රවය ගුලි 05ක් එම සහයක සන්තකයේ තිබී සොයාගැනීමට පොලීසියට හැකිව තිබේ.

ඒ් හේතුවෙන් එම බස් රථයේ සිටි මගීන් බස්සවා වෙනත් බස් රථයකට යොමුකර ඇත.

ඉන් අනතුරුව රියදුරු සහ සහයක වෛද්‍ය පරීක්ෂණයක් සඳහා මහියංගනය මූලික රෝහල වෙත යොමුකර තිබේ.

එහිදී අනාවරණය වී ඇත්තේ මත්ද්‍රව්‍ය ගුලි සන්තකයේ තබාගෙන සිටි රිය සහයක මත්ද්‍රව්‍ය භාවිතා කර නොමැති බවත්, බස් රථයේ රියදුරුගේ ශරීරයේ ගංජා මත්ද්‍රව්‍ය අන්තර්ගතව ඇති බවත්ය.

ඒ අනුව ඔවුන් දෙදෙනා අත්අඩංගුවට ගෙන මහියංගනය මහෙස්ත්‍රාත් අධිකරණයවෙත ඉදිරිපත් කරනු ලැබීය.

තවද එම ගුලි නිකුත්කළ ඔසුසලක් සම්බන්ධවද පොලීසිය විසින් විමර්ශනයක් ආරම්භකර ඇත.

හිස, දෙඅත් සහ කකුල් නොමැති මළ සිරුරක් හමුවෙයි…..

මාරවිල මූදු කටුව වෙරළ තීරයට මළ සිරුරක් ගොඩ ගසා ඇති බවට අද පැමිණිල්ලකට අනුව මාරවිල පොලීසිය විමර්ශනයක් ආරම්භ කර තිබේ.

එම මළ සිරුරේ හිස, දෙඅත් සහ කකුල් තිබී නොමැති අතර නිල් පැහැති කොට කලිසමක් සහිත ශරීරයේ එක් කොටසක් පමණක් ඉතිරිව තිබූ බව පොලීසිය පැවසුවේය.

පොලීසිය සැක පළ කරන්නේ අදාළ මළ සිරුර පිරිමි පුද්ගලයෙකුගේ මළ සිරුරක් විය හැකි බවය.

කෙසේ වෙතත් මාරවිල වැඩබලන මහේස්ත්‍රාත්වරයා විසින් මූලික පරීක්ෂණ සිදු කිරීමට නියමිත අතර මාරවිල පොලීසිය වැඩිදුර විමර්ශන සිදු කරයි.

මිලියන 210ක රන් බිස්කට් සමග ගුවන්තොටුපොළ සේවකයෙක් කොටුවෙයි…..

රුපියල් මිලියන 210කට අධික වටිනාකමකින් යුත් රන් බිස්කට් තොගයක් තම පාදවල සඟවා අද (14) උදෑසන කටුනායක ගුවන්තොටුපොළින් පිට කර ගෙන යමින් සිටි ගුවන් තොටුපොළ ආරක්ෂක නිලධාරීවරයෙකු රේගු නිලධාරීන් විසින් අත්අඩංගුවට ගෙන තිබේ.

මීගමුව, කඳවල ප්‍රදේශයේ පදිංචි 54 හැවිරිදි අයෙකු වන සැකකරු සිවිල් ගුවන් ආරක්ෂක සේවා සංවිධානයේ සභාපතිවරයා ලෙසද කටයුතු කරන අයෙකු බවද වාර්තා වේ.

ඔහු කැරට් 24 රන් බිස්කට් 51ක් තම පාදවල සඟවල විශේෂ වෙළුම්පටිවලින් ඔතා  ඒවා යළි සිය මේස්වලින් වසා ගෙන කටුනායක ගුවන් තොටුපොළින් පිටව යාමට ඇති විශේෂ කවුළුවෙන් පිටව යමින් සිටියදී සැකකරු අද උදෑසන 6.50ට පමණ රේගු නිලධාරීන් විසින් අත්අඩංගුවට ගෙන ඇත.

මෙම රන් බිස්කට් තොගය කිලෝ ග්‍රෑම් 05 ග්‍රෑම් 941ක බරකින් යුතු අතර මෙම රන් බිස්කට් තොගය කිසියම් පුද්ගලයෙකු මොහුට ගුවන් තොටුපළින් පිට කර දීම සඳහා භාර දෙන්න ඇතැයිද සැකකරු දීර්ඝ කාලයක් මෙම ජාවාරම සිදුකරන ගෙන යන්නට ඇතැයිද රේගු නිලධාරීන් සැක පළ කරති.

සිද්ධිය සම්බන්ධව කටුනායක ගුවන් තොටුපොළ රේගු නිලධාරීන් සැකකරු සිය අත්අඩංගුවේ තබාගෙන මේ පිළිබඳ වැඩිදුර විමර්ශන කටයුතු සිදුකරමින් සිටින බවද වාර්තා වේ.

2026 වර්ෂය තුළ අනුගමනය කළ යුතු පාසල් වාර සටහන මෙන්න….

2026 වර්ෂය තුළ අනුගමනය කළ යුතු පාසල් වාර සටහන අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් නිකුත් කර තිබේ.

ඒ අනුව, සිංහල හා දෙමළ පාසල් සඳහා පළමු වාරයේ පළමුවන අදියර ආරම්භ වන්නේ, 2026.01.01 බ්‍රහස්පතින්දා සිට 2026.02.13 සිකුරාදා තෙක්ය.

පළමු වාරයේ පළමු වන අදියරයේ නිවාඩු ලබාදෙනු ලබන්නේ 2026.02.14 සිට 2026.03.02 වනදා තෙක් බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් නිකුත් කළ පාසල් වාර සටහනේ දැක්වෙයි.

ඉන් අනතුරුව පළමු වාරයේ දෙවන අදියරය 2026.03.03 අඟහරුවාදා සිට 2026.04.10 සිකුරාදා තෙක් පැවැත්වෙයි.

පළමු වාරයේ දෙවන අදියරය සඳහා නිවාඩු ලබාදෙනු ලබන්නේ, 2026.04.11 සිට 2026.04.19 වනදා තෙක්ය.

දෙවන පාසල් වාරය 2026.04.20 සඳුදා සිය 2026.07.24 සිකුරාදා තෙක් පැවැත්වෙයි.

තෙවන පාසල් වාරයේ පළමු වන අදියර 2026.07.27 සඳුදා සිට 2026.08.07  සිකුරාදා තෙක් පැවැත් වෙන බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සඳහන් කරයි.

තෙවන පාසල් වාරයේ පළමු වන අදියර සඳහා නිවාඩු ලබාදෙනු ලබන්නේ, 2026.08.08 සිට 2026.09.06 වන දින තෙක් නිවාඩු ලබාදෙනු ලැබේ.

තෙවන පාසල් වාරයේ දෙවන වන අදියර 2026.09.07 සඳුදා සිට 2026.12.04 සිකුරාදා තෙක් පැවැත්වෙන බව  අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සඳහන් කරයි.

බස් රථවල සැරසිලිවලට අවසර ලබාදී තිබූ චක්‍රලේඛය අවලංගු කෙරේ….

බස් රථ අලංකරණය හා උපාංග සවිකිරීමට අදාළව නෛතික ප්‍රතිපාදන තුළ අවසර ලබා දෙමින් නිකුත් කර තිබු චක්‍රලේඛය අවලංගු කර තිබේ.

මෝටර් රථ ප්‍රවාහන කොමසාරිස් ජනරාල් කමල් අමරසිංහ මහතා සදහන් කළේ 2023 වසරේ ජුනි මස 02වන දිනැතිව නිකුත් කරන ලද අදාල චක්‍ර ලේඛය මේ මස 09 වන දින සිට බලපැවෙත්වෙන පරිදි අවලංගු කිරීමට පියවර ගෙන ඇති බවය.

බස් රථ අලංකරණය සදහා අවසර ලබා දෙන ලෙස විවිධ පාර්ශ්ව වලින් ලද ඉල්ලීම් සැළකිල්ලට ගනිමින් බස් රථවල සැරසිලි හා උපාංග සවිකිරීමට අදාළව කොන්දේසි කිහිපයකට යටත්ව මෙම චක්‍රලේඛය නිකුත් කර තිබුණි.

2

සූදු ක්‍රීඩා නියාමන අධිකාරී පනතේ බලතල නියෝජ්‍ය ඇමති පහදයි…

සූදු ක්‍රීඩා නියාමන අධිකාරී පනත මගින් සූදු ක්‍රීඩා නියාමනය සඳහා අධිකාරීයක් පිහිටුවීමට බලතල ලබාදෙන බව ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා පවසයි.

එම පනත පිළිබඳ විශේෂ පැහැදිලි කිරීමක් සිදුකරමින් නියෝජ්‍ය අමාත්‍යවරයා මේ බව පැවසීය.

එහිදී ඒ මහතා වැඩිදුරටත් පවසා සිටියේ, සූදු ක්‍රීඩා හේතුවෙන් සමාජයට ඇති විය හැකි අහිතකර තත්ත්වයන් අධ්‍යයනය කර ඒ පිළිබඳ විධි විධානයන් නිකුත් කිරීමට පනත විසින් අධිකාරියට බලතල ලබා දෙන බවය.

තවදුරටත් අදහස් දැක් වූ ආචාර්ය අනිල් ජයන්ත මහතා,

“සියලු නීති එක තැනකට ගෙනල්ලා අධිකාරියක් පිහිටුවන්න සූදූ ක්‍රීඩා නියාමන අධිකාරී පනතින් ප්‍රධාන වශයෙන් බලතල ලබාදෙනවා.

ඉන් අදහස් වෙන්නෑ එම අධිකාරිය කැසිනෝ, සූදු කරන්න ලයිසන් දෙක එකක් බව. මේකේ තියෙන්නේ නියාමනය. ඒ නියාමනයට සියලු දේ අන්තර්ගත වෙනවා.

එම නියාමනයේ දී කුමන සූදු ක්‍රීඩා සඳහාද අවසර දෙන්නේ, අවසර දෙනවානම් ඊට යටත් සීමාවන්. ඒ වගේම ලබාදුන් ලයිසන් එකක් ඉවත් කරන්න, තහනම් කරන්න යනාදි සියලු කාරණා මේ යටතේ කරන්න පුළුවන්.

සූදු ක්‍රීඩා සිදුකිරීමේ ඉන් සමාජයට මෙන්ම සංස්කෘතියට බලපෑම් තියෙනවා.

එනිසා සූදූ ක්‍රීඩා නියාමන අධිකාරීයේ තවත් වගකීමක් සූදු ක්‍රීඩා මගින් යම් ආර්ථිකම කාර්ය්‍යක් සිදුවෙන ගමන්ම, සමාජයට සංස්කෘතියට අහිරකර බලපෑමක් තියෙනවා නම් ඒ පිළිබඳවද අධ්‍යනය කර ඊට අදාළ විධි විධාන නිකුත් කිරීම.

ඒ සඳහා ප්‍රතිපාදන මෙහි තිබෙනවා.

මෙම පනතින් සිදුකරන දේ සරළව ගත්තොත් එන් සිදුකළේ සූදු ක්‍රීඩා හා සියලු කටයුතු එක් නීතියක් එක් ස්වාධීන අධිකාරියක් යටතේ කටයුතු කිරීම විධිමත් කිරීම” යැයි පැවසීය.

සහස්පුර ද්විත්ව ඝාතනයේ සැකකාර වෙඩික්කරු අත්අඩංගුවට…

බොරැල්ල පොලිස් වසමේ සහස්පුර සිරිසර උයන ක්‍රීඩාංගණයේදී වෙඩි තබා පුද්ගලයින් දෙදෙනෙකු ඝාතනය කිරීමේ සිද්ධියේ වෙඩික්කරු බවට සැකකරන පුද්ගලයෙකු අත්අඩංගුවට ගෙන තිබේ.

පොලීසිය සඳහන් කළේ, අයිස් මත්ද්‍රව්‍ය ග්‍රෑම් 10යි මිලිග්‍රෑම් 710ක් සහ යතුරුපැදියක් සමග එම සැකකරු අත්අඩංගුවට ගෙන දමන පොලිස් ස්ථානය වෙත ඉදිරිපත් කර ඇති බවය.

2025.08.07 වන දින බොරැල්ල පොලිස් වසමේ සහස්පුර සිරිසර උයන ක්‍රීඩාංගණයේදී වෙඩි තබා පුද්ගලයින් දෙදෙනෙකු ඝාතනය කර තවත් පුද්ගලයින් තිදෙනෙකුට තුවාල සිදුකිරීමේ අපරාධය සම්බන්ධයෙන්  ජයවර්ධනපුර පොලිස් විශේෂ කාර්ය බළකා විශේෂ වැටලීම් ඒකකය මඟින් විමර්ශන ආරම්භ කර තිබුණි.

ඒ අනුව ඊයේ (12) දහවල් කාලයේ එම ඒකකයේ නිලධාරීන් කණ්ඩායමක් විසින් දමන පොලිස් වසමේදී මෙම අපරාධයේ වෙඩික්කරු බවට සැකකරන පුද්ගලයාව මෙලෙස අත්අඩංගුවට ගෙන තිබුණි.

සැකකරු වයස අවුරුදු 34ක් වන දමන, අම්පාර ප්‍රදේශයේ පදිංචිකරුවෙකි.

සැකකරු මීට පෙර ශ්‍රී ලංකා යුද හමුදාවේ රාජකාරි කර 2015 වර්ෂයේ යුද හමුදාවෙන් පලාගොස් ඇති බවට දැනට සිදුකරන ලද විමර්ශනයේදී අනාවරණය වී ඇත.

දමන පොලීසිය සිද්ධිය පිළිබඳ වැඩිදුර විමර්ශන සිදුකරයි.

මේ අතර 2025.08.24 වන දින බොරලැස්ගමුව පොලිස් වසමේ මාලනී බුලත්සිංහල මාවතේදී ත්‍රිරෝද රථයකින් පැමිණි නාඳුනන පුද්ගලයෙකු විසින් පුද්ගලයෙකුට වෙඩි තබා ඝාතනය කිරීමේ අපරාධයට අධාර අනුබල දුන් සැකකරුවෙකු අයිස් මත්ද්‍රව්‍ය ග්‍රෑම් 11ක් සමග අත්අඩංගුවට ගෙන ඇත.

ඒ, බස්නාහිර පළාත දකුණ දිසා අපරාධ කොට්ඨාසය මගින් සිදුකරන විමර්ශනවලට අනුවය.

ඊයේ (12) උදෑසන කාලයේ එම කොට්ඨාසයේ නිලධාරීන් කණ්ඩායමක් විසින් පිළියන්දල පොලිස් වසමේ පැලැන්වත්ත ප්‍රදේශයේදී සැකකරු අත්අඩංගුවට ගෙන ඇත.

සැකකරු වයස අවුරුදු 35ක් වන දෙහිවල ප්‍රදේශයේ පදිංචිකරුවෙකි.

මේ අතර 2025.09.06 වන දින මරදාන පොලිස් වසමේ කෝවිල්වත්ත ප්‍රදේශයේදී ත්‍රිරෝද රථයකින් පැමිණි නාඳුනන පුද්ගලයෙකු විසින් පුද්ගලයෙකුට වෙඩි තබා ඝාතනය කිරීමේ අපරාධය සම්බන්ධයෙන් කොළඹ මධ්‍යම කොට්ඨාස අපරාධ විමර්ශන කාර්යංශය මගින් විමර්ශන ආරම්භ කර තිබුණි.

මෙම අපරාධයට අත්අඩංගුවට ගත් සැකකරුවෙකුගෙන් අනාවරණය වූ තොරතුරු මත ඊයේ (12) උදෑසන කාලයේ එම කොට්ඨාසයේ නිලධාරීන් කණ්ඩායමක් විසින් කෙසෙල්වත්ත පොලිස් වසමේ ශාන්ත සෙබස්තියන් මාවතේදී මෙම අපරාධය සිදු කිරීමට ආධාර අනුබලදීම, අපරාධයට රැකවරණයදීම හා කුමන්ත්‍රණය කිරීමේ චෝදනාවට සැකකරුවෙකු අත්අඩංගුවට ගෙන ඇත.

සැකකරු වයස අවුරුදු 46 ක් වන කොළඹ 12 ප්‍රදේශයේ පදිංචිකරුවෙකි.

කොළඹ මධ්‍යම කොට්ඨාස අපරාධ විමර්ශන කාර්යංශය සිද්ධිය පිළිබඳ වැඩිදුර විමර්ශන සිදුකරයි.

UDA හිටපු අධ්‍යක්ෂ ජනරාල් සහ ඉඩම් පිළිබඳ හිටපු අධ්‍යක්ෂ අත්අඩංගුවට….

නාගරික සංවර්ධන අධිකාරියේ හිටපු අධ්‍යක්ෂ ජනරාල් සුමේධ රත්නායක සහ නාගරික සංවර්ධන අධිකාරියේ ඉඩම් පිළිබඳ හිටපු අධ්‍යක්ෂ අල්ලස් කොමිසම විසින් අත්අඩංගුවට ගෙන තිබේ.

පද්මේ සමඟ සබඳතා පැවැත්වූ උප පොලිස් පරීක්ෂකවරයෙක් අත්අඩංගුවට….

සංවිධානාත්මක අපරාධ කල්ලි සාමාජික කෙහෙල්බද්දර පද්මේ සමග සමීප සබඳතා පැවැත්වීමේ චෝදනා මත උප පොලිස් පරීක්ෂකවරයෙකු අත්අඩංගුවට ගෙන තිබේ.

අපරාධ පරීක්ෂණ දෙපාර්තමේන්තුවේ නිලධාරීන් විසින් සැකකරු අත්අඩංගුවට ගෙන ඇති බව පොලිස් මාධ්‍ය ප්‍රකාශක සහකාර පොලිස් අධිකාරී එෆ්. යු. වුට්ලර් මහතා පැවසුවේය.

‍අදාළ උප පොලිස් පොලිස් පරීක්ෂකවරයා ගම්පහ කොට්ඨාශ අපරාධ විමර්ශන අංශයට අනුයුක්තව සේවය කරන අයෙකු බව පොලිස් මාධ්‍ය ප්‍රකාශකවරයා සඳහන් කළේය.

ඉන්දුනීසියාවේ දී අත්අඩංගුවට ගනු ලැබු කෙහෙල්බද්දර පද්මේ ඇතුළු  අපරාධ කල්ලි සාමාජිකයින් පස් දෙනෙකු පසුගියදා දිවයිනට රැගෙන ඒමෙන් අනතුරුව අපරාධ පරීක්ෂණ දෙපාර්තමේන්තුව විසින් මේ වන විට ඔවුන් රඳවාගෙන ප්‍රශ්න කිරීම් සිදුකරනු ලබයි.

එලෙස සිදුකළ ප්‍රශ්න කිරීම්වලදී හෙළි වු තොරතුරු මත මෙම සැකකාර උප පොලිස් පරීක්ෂකවරයා අත්අඩංගුවට ගෙන ඇති බව වාර්තා වේ.

අමාත්‍යවරු ඇතුළු රජයේ පාර්ශව කිහිපයකට නොතීසි…..

මෙරට ඉඩම් කළමනාකරණය කිරීම සඳහා ජාතික වැඩපිළිවෙළක් සකස් කරන ලෙස නියෝගයක් නිකුත් කරන මෙන් ඉල්ලා ගොනුකර තිබෙන පෙත්සමක් සම්බන්ධයෙන් නොවැම්බර් මස 28 වනදා අධිකරණය හමුවේ කරුණු දක්වන ලෙස දන්වා අභියාචනාධිකරණය විසින් ඉඩම් අමාත්‍යවරයා, පරිසර අමාත්‍යවරයා ඇතුළු පාර්ශව කිහිපයකට නොතීසි නිකුත් කර තිබේ.

පරිසර යුක්ති කේන්ද්‍රය විසින් මෙම පෙත්සම ඉදිරිපත් කර තිබුණි.

මෙම පෙත්සම අද (11) ධම්මික ගනේපොල සහ ආදිත්‍ය පටබැඳිගේ යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී පෙත්සම්කාර පාර්ශ්වය වෙනුවෙන් පෙනී සිටි නීතීඥ රවීන්ද්‍රනාන් දාබරේ මහතා අධිකරණය හමුවේ කරුණු දක්වමින් මෙරට තුළ ඉඩම් කළමනාකරණය පිළිබඳ ජාතික සැලැස්මක් ක්‍රියාත්මක නොවීම නිසා ගැටලු රාශියක් උද්ගත වී තිබෙන බව පෙන්වා දී ඇත.

මෙරට තුළ  කෘෂිකාර්මික කටයුතු, වනාන්තර, වගුරු බිම්, ජනාවාස යනාදී අංශ සඳහා වෙන් කළයුතු ඉඩම් මෙන්ම ඒවායේ සීමාවන් නිසි පරිදි හඳුනාගෙන වෙන්කර නොමැතිවීම නිසා පාරිසරික මෙන්ම අනෙකුත් අර්බුද රාශියක් මතු වී තිබෙන බවත් නීතිඥවරයා පෙන්වා දී තිබේ.

ඒ නිසා මෙරට ඉඩම්වලින් නිසි ප්‍රයෝජන ලබාගැනීමට නොහැකි තත්ත්වයක්ද උද්ගත වී තිබෙන බව නීතිඥවරයා පෙන්වා දී ඇත.

දූපත් රාජ්‍යයක් වන ශ්‍රී ලංකාවට හිමිවී තිබෙන ඉඩම් වලින් උපරිම ප්‍රයෝජන ලබාගැනීම අත්‍යවශ්‍ය කටයුත්තක් බවත් විධිමත් ඉඩම් කළමනාකරණ සැලැස්මක් නොමැතිවීම හේතුවෙන් නිසි ඵලදායිතා ඉලක්කවලට ළඟාවීමට නොහැකි තත්ත්වයක් උද්ගතව තිබෙන බවත් නීතිඥවරයා පෙන්වා දී තිබේ.

ඉදිරිපත් වූ කරුණු සලකා බැලූ අභියාචනාධිකරණ විනිසුරුමඬුල්ල මෙම සම්බන්ධයෙන් එහි වගඋත්තරකරුවන් වශයෙන් නම්කර සිටින ඉඩම් අමාත්‍යවරයා, පරිසර අමාත්‍යවරයා, වන ජීවී අධ්‍යක්ෂ ජෙනරාල් ඇතුළු පාර්ශ්ව කීපයකට නොවැම්බර් මස 28 වනදා අධිකරණය හමුවේ කරුණු දක්වන ලෙස දන්වා නොතීසි නිකුත් කරන ලෙස නියෝග කළේය.