Breaking News
ජාතික පාරිසරික සංශෝධන පනත් කෙටුම්පත දෙවෙනිවර කියවීම පාර්ලිමේන්තුවේදී අද (24) සම්මත විය.
කෙටුම්පතට පක්ෂව ඡන්ද 113ක් ලැබුණු අතර, ඊට විරුද්ධව ලැබුණේ ඡන්ද 10ක් පමණි.
ඒ අනුව ජාතික පාරිසරික සංශෝධන පනත් කෙටුම්පත දෙවෙනිවර කියවීම වැඩි ඡන්ද 103කින් සම්මත විය.
Update – 06.00PM
ඉන්පසුව කාරකසභා අවස්ථාව පැවැත්වීමෙන් අනතුරු සංශෝධන සහිතව තෙවනවර කීයවීම සම්මත විය.
මැතිවරණවලදී ඡන්දය පාවිච්චි කළ බවට තහවුරු කිරීමට ඇඟිල්ලේ තීන්ත ආලේපනය කිරීම අහෝසි කිරීමෙන් මැතිවරණයකදී රුපියල් මිලියන 100ක පමණ මහජන මුදල් ඉතිරිකිරීමේ හැකියාව ලැබෙන බව ‘පැෆ්රල්’ සංවිධානයේ විධායක අධ්යක්ෂ රෝහණ හෙට්ටිආරච්චි මහතා පැවසීය.
මෙම තීරණය සෑම අතින්ම ඉතාම හොඳ තීරණයක් බව ද ‘පැෆ්රල්’සංවිධානයේ විධායක අධ්යක්ෂවරයා සඳහන් කළේය.
‘පැෆ්රල්’සංවිධානයේ ප්රධාන කාර්යාලයේදී අද (24) පැවැති විශේෂ මාධ්ය හමුවකට එක් වෙමින් ඔහු මෙම අදහස් පල කළේය.
මෙම යෝජනාව හදිසියේ මතුවූ එකක් නොව, වසර ගණනාවක් තිස්සේ මැතිවරණ ක්ෂේත්රයේ, දේශපාලන පක්ෂ සහ සිවිල් සංවිධාන අතර සාකච්ඡාවට ලක් වූ කරුණක් බවත් මෙම ක්රමවේදය ඉවත් කිරීමෙන් තීන්ත ආනයනය කිරීම, බෙදා හැරීම සහ ඒ සඳහා අවශ්ය පරිපාලන ක්රියාවලිය සඳහා වැයවන මුදල සැළකිය යුතු ප්රමාණයකින් අඩුවී මැතිවරණ වියදම් අඩු කිරීමෙන් මහජන මුදල්ද ඉතිරි කරගත හැකි බවත් ඔහු පැවසීය.
ඡන්දය ප්රකාශ කිරීමේදී අනන්යතාපත්රය අනිවාර්යය කර තිබීම හේතුවෙන් ඡන්දදායකයාගේ අනන්යතාව තහවුරු කිරීම දැඩි කෙරෙන අතර එම නිසා වෙනත් පුද්ගලයෙකු වෙනුවෙන් ඡන්දය භාවිතා කිරීමේ අවස්ථාද සැලකිය යුතු ලෙස අවම වී ඇත.
මේ හේතුමත නොමැකෙන තීන්ත ආලේප කිරීමේ අවශ්යතාවය පෙරමෙන් දැඩි ලෙස නොපවතින බවට අදහස කාලයක සිට ඉදිරිපත්ව තිබූ බවත් ඒ මහතා සඳහන් කළේය.
ඡන්ද දායකයෙකු ඡන්දය භාවිතා කළ බව තහවුරු කිරීම සඳහා ඇඟිල්ලේ නොමැකෙන තීන්ත ආලේප කිරීම දශක ගණනාවක් සිට ශ්රී ලංකාවේ මැතිවරණ ක්රියාවලියේ කොටසක් බවත් ඡන්ද ලේඛන සකස් කිරීමට තාක්ෂණය භාවිත කිරීමත් සමග හොර ඡන්ද භාවිතා කිරීමට වර්තමානය වන විට අවස්ථාවක් නොමැති බවත් රෝහණ හෙට්ටිආරච්චි මෙහිදී වැඩිදුරටත් පැවසීය
රට තුළ ආන්දෝලනයක් මතුකළ භෞත චිකිත්සකවරියගේ මරණය සම්බන්ධයෙන් කරුණු රැසක් අනාවරණය කරගැනීමට පොලිසියට හැකිව තිබේ.
ඒ අනුව එම මරණය සම්බන්ධයෙන් සිදුකළ පශ්චාත් මරණ පරීක්ෂණයේදී හෙළි වී ඇත්තේ, ගෙල සිරකිරීමෙන් එම මරණය සිදුව ඇති බවය.
ප්රධාන සැකකරු හා ඔහුගේ බිරිඳ පොලිසිය විසින් අද (24) යාපනයේදී අත්අඩංගුවට ගැනීමත් සමග තවත් කරුණු අනාවරණය කරගැනීමට හැකිව ඇත.
සිද්ධියේ පසුබිම සහ මළ සිරුර සොයාගැනීම
පසුගිය ජූනි 17 වැනිදා තෙල්දෙණිය ප්රදේශයේ නවතා තිබූ මෝටර් රථයක් තුළ තිබී කාන්තාවකගේ මළ සිරුරක් පොලිසිය විසින් සොයාගන්නා ලදී. මෙලෙස මියගොස් තිබුණේ අම්පාර රෝහලේ භෞතචිකිත්සකවරියක් ලෙස සේවය කළ 34 හැවිරිදි ශම්යා දර්ශනී නැමැති තැනැත්තියකි.
ඇයගේ පෙම්වතා විසින් ඇගේ සිරුර මෝටර් රථය තුළ දමා පලාගොස් තිබූ අතර, ඔහු සිරුර රැගෙන යන අයුරු CCTV දර්ශනවලද සටහන්ව තිබුණි.
පොලිස් විමර්ශන සහ සැකකරුවන් කොටුකර ගැනීම
දින 7ක් පුරා සැකකරු සෙවීම සඳහා පොලිස්පති ප්රියන්ත වීරසූරිය මහතාගේ උපදෙස් මත විශේෂ විමර්ශනයක් ආරම්භ කෙරුණි.
වලාන මධ්යම දූෂණ මර්දන ප්රහාරක ඒකකය සහ අපරාධ පරීක්ෂණ දෙපාර්තමේන්තුවේ (CID) තාක්ෂණික සහාය ඇතිව සිදුකළ මෙහෙයුමකදී සැකකරු වැල්වත්ත ප්රදේශයේ සිට යාපනය දෙසට ගමන් කරමින් සිටින බව අනාවරණය විය.
ඒ අනුව ක්රියාත්මක වූ යාපනය කොට්ඨාස අපරාධ විමර්ශන කාර්යාංශයේ නිලධාරීන්, සැකකරු ගමන් කරමින් සිටි බස් රථය චාවකච්චේරිය, කයිතඩි ප්රදේශයේදී වටලා සැකකරු, ඔහුගේ බිරිඳ සහ එක් දරුවකුව අත්අඩංගුවට ගත්තේය.
වෙස්වලාගෙන පලායාමේ උත්සාහය
අත්අඩංගුවට ගන්නා අවස්ථාවේදී සැකකරු තොප්පියක් සහ මුව ආවරණයක් පැලඳ සිටි අතර, ඔහුගේ බිරිඳ මුස්ලිම් කාන්තාවක ලෙස වෙස්වලාගෙන සිට ඇත.
සැකකරු නිතර භාවිත කළ බොරු කොණ්ඩයක්ද (Wig) ඔහු සතුව තිබී පොලිසිය විසින් සොයාගන්නා ලදී. ඔවුන් යාපනය හරහා ඉන්දියාවට පලායාමට සැලසුම් කර තිබූ බවට පොලිසිය සැකකරයි.
සැකකරුගේ ප්රකාශය
තමා මියගිය කාන්තාව නැවතී සිටි කාමරයට යන විට ඇය ගෙල වැළලාගෙන සිටි බවත්, බියට පත්ව සිරුර මෝටර් රථයේ දමා තෙල්දෙණියට රැගෙන ආ බවත් සැකකරු පවසයි.
කෙසේ වෙතත්, වෛද්ය වාර්තා මගින් මෙය ගෙල සිරකර මැරීමක් බව සනාථ කර ඇත. තවද ඇයගෙන් තමා මුදල් ලබාගත්තද එය රුපියල් කෝටි එකහමාරක් නොවන බවද ඔහු කියා සිටියි.
සැකකරුගේ බිරිඳගේ ප්රකාශය
සැකකරු විසින් රවටනු ලබන කාන්තාවන්ට තමා ඔහුගේ “වැඩිමහල් සහෝදරිය” ලෙස හඳුන්වා දී මෙම වංචාවලට සහාය දුන් බව පවසා ඇත.
තමන්ට සිටින දරුවන් තිදෙනාගෙන් දෙදෙනෙකු පසුගිය 21 වැනිදා නාරම්මල පිහිටි මහගෙදරට ඇරලවූ බවද ඇය පැවසුවාය.
පලායාමට උදව් කළ අයෙක් අත්අඩංගුවට
නුවරඑළිය කොට්ඨාසය භාර ජ්යෙෂ්ඨ පොලිස් අධිකාරී සමරකෝන් බණ්ඩා මහතාගේ මෙහෙයවීමෙන් සිදුකළ විමර්ශනවලදී සැකකරුට නවාතැන් සහ ප්රවාහන පහසුකම් සැපයූ කුණ්ඩසාලේ ප්රාදේශීය සභාවේ සේවකයෙකුද අත්අඩංගුවට ගැනුණි.
ඔහුගෙන් හෙළිවූ තොරතුරු
මරණය සිදුවූ 16 වැනිදා පස්වරුවේ ප්රධාන සැකකරු මළ සිරුර සහිත මෝටර් රථයෙන්ම කුණ්ඩසාලේ පිහිටි මෙම සේවකයාගේ නිවසට පැමිණ ඇත.
අනතුරුව සැකකරුගේ බිරිඳ සහ දරුවන් තිදෙනාද එම රථයෙන්ම කැඳවාගෙන විත් ප්රාදේශීය සභා සේවකයාගේ නිවසේ රැය පහන් කර තිබේ.
පසුදින සිරුර තෙල්දෙණියට රැගෙන යන විට ප්රාදේශීය සභා සේවකයා යතුරුපැදියකින් මෝටර් රථය පසුපසින් ගොස් ඇති අතර, සිරුර දැමීමෙන් පසු සැකකරුව නැවත යතුරුපැදියෙන් සිය නිවසට කැඳවාගෙන විත් ඇත.
පසුව මෙම පිරිස මාතලේ පිහිටි සැකකරුගේ මවගේ නිවසට ඇරලවීමටද ඔහු උදව් කර ඇත. සැකකරු මෙම සේවකයාගේ බිරිඳගෙන්ද රුපියල් ලක්ෂ 5ක මුදලක් වංචා කර තිබේ.
සැකකරුගේ ස්ත්රී වංචා ජාලය
පොලිස් විමර්ශනවලට අනුව ප්රධාන සැකකරු වයස අවුරුදු 30ට වැඩි, අවිවාහක කාන්තාවන් ඉලක්ක කර ගනිමින් විවාහ කරගන්නා බව පවසා රවටන මහා පරිමාණ වංචාකරුවෙකි.
මියගිය භෞතචිකිත්සකවරිය අම්පාර රෝහලේදී ඔහුට හමුව ඇත්තේ ඇයගෙන් ප්රතිකාර ලබාගැනීමට ගිය අවස්ථාවකය.
සැකකරු කාන්තාවන් රවටා ලබාගන්නා මුදල්වලින් සුඛෝපභෝගී ජීවිතයක් ගත කර ඇති අතර, ඔහු විවිධ කූඨ උපක්රම මගින් කාන්තාවන් රැවටූ සමස්ත මුදල රුපියල් කෝටි දෙකකට අධික බව අනාවරණය වී ඇත.
ඔහු කටුගස්තොට ප්රදේශයේ රෙදිපිළි වෙළඳසැලක්ද ආරම්භ කර ඇති අතර, එහි සේවය කළ තරුණියකගෙන්ද රුපියල් ලක්ෂ 10ක මුදලක් ලබාගැනීමට සූදානමින් සිට ඇත.
ප්රධාන සැකකරු සහ ඔහුගේ බිරිඳ වැඩිදුර විමර්ශන කටයුතු සඳහා දැනට නුවරඑළිය පොලිසිය වෙත භාරදී තිබේ.
ඉන්දීය රජයේ ආධාර යටතේ මෙරට මලෛගම් ජනතාව වෙනුවෙන් ආරම්භ කර ඇති නිවාස 4,700ක් ඉදිකිරීමේ ව්යාපෘතියෙහි ප්රගතිය විමසා බැලීමේ විශේෂ සාකච්ඡාවක් අද (24) පස්වරුවේ ජනාධිපති කාර්යාලයේදී පැවැත්විණි.
ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති මහතාගේ ප්රධානත්වයෙන් මෙම සාකච්ඡාව කැඳවා තිබුණි.
මෙම නිවාස ව්යාපෘතියේ කටයුතු සැලසුම් සහගතව සහ කඩිනමින් අවසන් කිරීම සඳහා එහිදී ආයතන කිහිපයකටම විශේෂ උපදෙස් මාලාවක් නිකුත් කෙරිණි.
මෙම නිවාස වැඩපිළිවෙළ යටතේ නිවාස ලබාදීම ප්රධාන කොටස් දෙකක් යටතේ සිදු කෙරේ.
ජාතික ගොඩනැගිලි පර්යේෂණ ආයතනය (NBRO) විසින් ආපදා අවදානම් සහිත ප්රදේශ ලෙස හඳුනාගත් ස්ථානවල වෙසෙන පවුල් වෙත නිවාස 2,026ක් ලබා දීමට නියමිතය.
ඉතිරි නිවාස සංඛ්යාව හඳුනාගත් වතුකරයේ වැඩකරන ජනතාව වෙනුවෙන් වෙන් කෙරේ.
ඒ අනුව, ප්රාදේශීය වැවිලි සමාගම් 22ක්, රාජ්ය වැවිලි සංස්ථාව, ජනවසම සහ ඇල්කඩුව වැවිලි සමාගමට අයත් වතුවල පදිංචි මලෛගම් ජනතාව වෙනුවෙන් මෙම නිවාස හිමි වනු ඇත.
මෙම නිවාස ව්යාපෘතිය ද්විපාර්ශ්වික මූල්ය දායකත්වයෙන් ක්රියාත්මක වන අතර එක් නිවසක් වෙනුවෙන් වැය කෙරෙන මුදල මෙසේය.
ඉන්දීය රජයේ දායකත්වය – රුපියල් ලක්ෂ 28ක්
ශ්රී ලංකා රජයේ දායකත්වය – රුපියල් ලක්ෂ 4ක්
එහිදී ප්රභාත් චන්ද්රකීර්ති මහතා අවධාරණය කළේ නිවාස ව්යාපෘතියේ සියලු කටයුතු මේ වසර අවසන් වීමට පෙර නිම කළ යුතු බවය.
නිවාස ඉදිකිරීමට යෝජිත ඉඩම් කඩිනමින් නිදහස් කිරීමට පියවර ගන්නා ලෙසත්, ජාතික ගොඩනැගිලි පර්යේෂණ ආයතනය විසින් සුදුසු ඉඩම් හඳුනා ගැනීමට අදාළ වාර්තා කඩිනමින් ලබා දිය යුතු බවත් ඒ මහතා වැඩිදුරටත් උපදෙස් දුන්නේය.
වැවිලි සහ ප්රජා යටිතල පහසුකම් අමාත්යාංශය, නිවාස සංවර්ධන අධිකාරිය, රාජ්ය ඉංජිනේරු සංස්ථාව සහ වැවිලි මානව සංවර්ධන භාරය (PHDT) ඒකාබද්ධව මෙම ව්යාපෘතිය ක්රියාත්මක කරනු ලබයි.
වවුනියාව නගරාධිපතිවරයා සහ චාවකච්චේරි නගර සභාවේ උප සභාපතිවරයා වහාම ක්රියාත්මක වන පරිදි ඔවුන් දැරූ ධුරවලින් ඉවත් කිරීමට උතුරු පළාත් ආණ්ඩුකාරවරයා පියවර ගෙන තිබේ.
උතුරු පළාත් ආණ්ඩුකාර නාගලිංගම් වේදනායගම් මහතා විසින් සිදුකළ විශේෂ විමර්ශනයකින් අනතුරුව මෙම තීරණය ගෙන ඇති අතර, ඊට අදාළ විශේෂ ගැසට් නිවේදනයද මේ වන විට නිකුත් කර ඇත.
ආණ්ඩුකාරවරයාගේ මෙම නියෝගයත් සමග, වවුනියාව නගරාධිපති ලෙස කටයුතු කළ සුන්දරලිංගම් කන්දීබන් මහතාට ඔහුගේ නගරාධිපති ධුරය මෙන්ම සභික ධුරයද අහිමි වී තිබේ.
එමෙන්ම, චාවකච්චේරි නගර සභාවේ උප සභාපති ලෙස කටයුතු කළ ඥානප්රගාසම් කිෂෝර් මහතාටද ඔහුගේ උප සභාපති ධුරය සහ සභික ධුරය වහාම ක්රියාත්මක වන පරිදි අහිමි වී ඇති බව එම ගැසට් නිවේදනයේ සඳහන් වේ.
පාස්කු ඉරුදින ත්රස්ත ප්රහාර සිද්ධිය සම්බන්ධයෙන් සිදුකරන විමර්ශනවලට අදාළව තමා අත්අඩංගුවට ගැනීම වැළැක්වීමේ නියෝගයක් නිකුත් කරන්නැයි ඉල්ලා හිටපු ජනාධිපති ගෝඨාභය රාජපක්ෂ මහතා ඉදිරිපත් කළ රිට් පෙත්සමේ වැඩිදුර කරුණු දැක්වීම් ජූලි මස 06 වනදා දක්වා කල් තැබුණි.
ඒ, එම පෙත්සම දෙවැනි දිනටත් අභියාචනාධිකරණය හමුවේ අද (24) සලකා බැලුණු අවස්ථාවේදීය.
මෙම සලකා බැලුණේ අභියාචනාධිකරණයේ සභාපති විනිසුරු රොහාන්ත අබේසූරිය සහ සරත් දිසානායක යන මහත්වරුන්ගෙන් සමන්විත විනිසුරු මඩුල්ල ඉදිරියේදීය.
ගෝඨාභය රාජපක්ෂ මහතා වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා කරුණු දක්වමින් එහිදී සඳහන් කළේ, පාස්කු ඉරිදා ත්රස්ත ප්රහාරය පිළිබඳව සොයා බැලීමට පත්කළ ශේෂ්ඨාධිකරණ විනිසුරු ජනක් ද සිල්වා මහතාගේ ප්රධානත්වයෙන් යුත් කොමිසම, හිටපු මහාධිකරණ විනිසුරු ජයකී ද අල්විස් කොමිසම මෙන්ම ප්රහාරය පිළිබඳ සොයා බැලූ පාර්ලිමේන්තු තේරීම් කාරක සභාව ඉදිරිපත් කර තිබෙන වාර්තාවල කිසිදු ස්ථානයක ගෝඨාභය රාජපක්ෂ මහතාගේ නම සදහන් කර නොමැති බවය.
ඊට අමතරව පාස්කු ප්රහාරයේ රාජකාරි පැහැරහැරීම සම්බන්ධයෙන් ඉදිරිපත් වූ මූලික අයිතිවාසිකම් පෙත්සම් විභාගකළ සත් පුද්ගල ශ්රෙෂ්ඨාධිකරණ විනිසුරු මඩුල්ල විසින් ලබාදී ඇති නඩු තීන්දුවේද හිටපු ජනාධිපති ගෝඨාභය රාජපක්ෂ මහතා සම්බන්ධයෙන් එක් වචනයක් හෝ සඳහන් කර නොතිබූ බවද නීතිඥවරයා පෙන්වා දුන්නේය.
පාස්කු ප්රහාරයට නායකත්වය දුන් සහරාන් හෂීම්ගේ අන්තවාදී ක්රියාකාරකම් පිළිබඳව 2017 වසරේ සිට බුද්ධි අංශ දැනුවත් කිරීම් සිදුකර තිබූ අතර සහරාන් හෂීම්ගේ අන්තවාදී ක්රියාකාරකම් පිළිබඳව විමර්ශන ගොනුවක් පොලීසිය නීතිපති දෙපාර්තමේන්තුවට ඉදිරිපත් කර තිබූ බව පෙන්වා දුන් නීතිඥවරයා කියා සිටියේ ඊට අදාළව කිසිදු විමර්ශනයක් සිදු කර නොමැති බවය.
එසේ වගකීම් විරහිතව කටයුතු කළ අය වර්තමානයේ ගෝඨාභය රාජපක්ෂ මහතා අත්අඩංගුවට ගැනීමට සූදානම් වන බවට ඔහු චෝදනා කළේය.
එමෙන්ම පිල්ලෙයාන් සහ කරුණා යන පාර්ශ්ව සමඟ සිය සේවාදායකයා දේශපාලන කටයුතු වල නිරතවූ බව සඳහන් කළ ජනාධිපති නීතිඥවරයා දේශපාලන රැස්වීමකදී ඔවුන් සමඟ ගත් ඡායාරූප පෙන්වමින් එමගින් පෙත්සම්කරු පාස්කු ප්රහාරයට සම්බන්ධ යැයි සැක කළ නොහැකි බව පැවසීය.
නීතිපති දෙපාර්තමේන්තුව එම ඡායාරූප ඉදිරිපත් කළේ මුළුමනින්ම ද්වේෂ සහගතව මෙන්ම වංක චේතනාවකින් බවත් ජනාධිපති නීතිඥවරයා වැඩිදුරටත් චෝදනාකර සිටියේය.
අසාද් මවුලානා යනු දේශපාලන රැකවරණ පතා ස්විට්සර්ලන්තයේ පලාගොස් ජීවත්වන පුද්ගලයෙකූ වන අතර ඔහු බ්රිතාන්යයේ චැනල් ෆෝ නාලිකාවට සිදුකළ ප්රකාශයෙන් මෙරට අධිකරණ පද්ධතිය පහළ සිට ඉහළටම දූෂිත බවට බරපතළ චෝදනාවක් එල්ලකර තිබූ බවත් ජනාධිපති නීතිඥවරයා පෙන්වා දුන්නේය.
නීතිඥවරයා ප්රශ්න කළේ එම පුද්ගලයා, ලසන්ත වික්රමතුංග මරාදැමීම , මිනීමැරුම්, පැහැරගෙන යාම් වැනි අපරාධ සියල්ල රාජපක්ෂවරු මත පැටවිමට ක්රියාකර ඇති අතර එවැනි පුද්ගලයෙකු ලබාදී ඇති ප්රකාශ මත පදනම්ව සිය සේවාදායකයා අත්අඩංගුවට ගන්නේ කෙසේද යන්නය.
ඉන්පසුව පෙත්සමේ වැඩිදුර කරුණු දැක්වීම් ජූලි මස 06 සහ 09 යන දිනවලට කල් තැබුණි.
‘දිට්වා’ ආපදාවලට ලක්වූ ජනතාව වෙත බෙදා හැරීම සඳහා වෙන්කර තිබූ අත්යවශ්ය සහන ද්රව්ය තොගයක් බෙදා නොහැර, ගම්පොළ උඩුපළාත ප්රාදේශීය ලේකම් කාර්යාලය තුළම කල් ඉකුත් වී විනාශ වී තිබේ.
ප්රාදේශීය ලේකම් කාර්යාල පරිශ්රයේ සිදුකළ නිරීක්ෂණයකදී ජාතික විගණන කාර්යාලයේ නිලධාරීන්ට දැකගැනීමට හැකිවී ඇත්තේ, එහි කාමර තුනක් පුරා මෙලෙස ජනතාවට ලබා නොදුන් වියළි ආහාර ද්රව්ය ඇතුළු සහන ද්රව්ය විශාල ප්රමාණයක් ගොඩගසා තිබෙන අයුරුය.
එම නිලධාරීන් පෙන්වා දෙන්නේ මෙලෙස ගොඩගසා ඇති වියළි ආහාර ද්රව්ය බොහොමයක් මේ වන විටත් පරිභෝජනයට ගත නොහැකි පරිදි කල් ඉකුත්වී ඇති බවය.
රාජ්ය සේවක වැටුප් හා විශ්රාම වැටුප් සම්බන්ධ ගැටලු නිරාකරණය කිරීම සඳහා ජනාධිපතිවරයා විසින් සාමාජිකයින් 15 දෙනෙකුගෙන් යුත් වැටුප් හා විශ්රාම වැටුප් කොමිෂන් සභාවක් පත් කරමින් ගැසට් නිවේදනයක් නිකුත් කර තිබේ.
තෙල්ගේ අශෝක පීරිස් මහතා සභාපතිත්වයෙන් මෙම කොමිෂන් සභාව පත් කර තිබේ.
රාජ්ය නිලධරයන්ගේ සහ විශ්රාමිකයන්ගේ වැටුප් හා විශ්රාම වැටුප් පිළිබඳ පවතින ගැටලු වලට විසදුම් ලබා දීම රාජ්ය සේවකයන්ගේ වෘත්තීයභාවය ඉහළ නැංවීම හා නව තාක්ෂණික ප්රවණතා සහ ගෝලීය ප්රවණතා අනුව රාජ්ය සේවය කුමන ආකාරයකට ව්යූහාත්මක ප්රතිසංස්කරණයක් සිදු විය යුතු ද යන්න සඳහා නිර්දේශ ලබාගැනීම මෙම කොමිෂන් සභාව පිහිටුවීමේ අරමුණ බව සඳහන් වේ.
ශ්රී ලංකා ආණ්ඩුක්රම ව්යවස්ථාවේ 33 වන ව්යවස්ථාවෙන් ජනාධිපතිවරයා වෙත පැවරී ඇති බළතල ප්රකාරව මෙම පත් කිරීම සිදු කර ඇත.
ඩෙංගු මදුරු කීටයන්ගේ ඝනත්වය මනින ජාත්යන්තර ඒකකයක් වන බ්රිටෝ දර්ශකය සැලකීමේදී බොහෝ ප්රදේශවල එම අගය විශාල ලෙස ඉහළ ගොස් ඇතැයි සෞඛ්ය කීට විද්යා සංගමය අද අනාවරණ කළේය.
ඩෙංගු මදුරු කීටයන්ගේ ඝනත්වය මනින ජාත්යන්තර ඒකකයක් ලෙස බ්රිටෝ දර්ශකය භාවිත කරයි.
එහිදී සලකා බැලෙන්නේ ඩෙංගු වෛරසය වැඩියෙන්ම ව්යාප්ත කරන ඊඩිස් ඊජිප්ටයි මදුරු ගහනය කෙතරම් ප්රමාණයක් සිටිනවාද යන්නයි.
ලෝක සෞඛ්ය සංවිධාන නිර්දේශවලට අනුව යම් රටක, යම් ප්රදේශයක ඊඩිස් ඊජිප්ටයි මදුරුවන්ගේ ඝනත්වය 3කට අඩු අගයකින් පවත්වාගත යුතුයි.
නමුත් සෞඛ්ය කීට විද්යා සංගමය අද අනාවරණ කළේ මෙරට බොහෝ ප්රදේශවල බ්රිටෝ දර්ශකයේ අගය ඉහළ අගයක පවතින බවයි.
සෞඛ්ය කීට විද්යා සංගමය සභාපති නජිත් සුමනසේන මහතා,
“බොහෝ ප්රදේශවල මේ වෙනකොට බ්රිටෝ දර්ශකයේ අගය 20ට වඩා ඉහළ අගයක පවතිනවා. මේ තත්ත්වය හොඳ තත්ත්වයක් නොවේ. ගිය අවුරුදුවලට වඩා ඊඩිස් ඊජිප්ටයි ගහනය වැඩිවෙලා.”
අමෙරිකා එක්සත් ජනපද රජය විසින් ශ්රී ලංකා ගුවන් හමුදාව වෙත පරිත්යාග කළ TH-57 ‘සී රේන්ජර්’ බහුකාර්ය හෙලිකොප්ටර් යානා 10ක් නිල වශයෙන් භාර ගැනීම අද (23) ජනාධිපති අනුර කුමාර දිසානායක මහතාගේ ප්රධානත්වයෙන් රත්මලාන ගුවන් හමුදා කඳවුරේදී සිදු කෙරිණි.
රත්මලාන ගුවන් හමුදා කඳවුරට පැමිණි ජනාධිපතිවරයා ගුවන් හමුදා උත්තමාචාර සහිතව පිළිගැනුණු අතර, අනතුරුව නව හෙලිකොප්ටර් යානා නිරීක්ෂණය කර කාර්ය මණ්ඩලය සමඟ සමූහ ඡායාරූපයකටද එක් විය.
මෙහිදී ශ්රී ලංකා ගුවන් හමුදාව සහ අමෙරිකානු පැසිෆික් ගුවන් හමුදාව අතර ද්විපාර්ශ්වික ගිවිසුමකටද අත්සන් තැබුණු අතර, ගුවන් හමුදාපති එයාර් මාර්ෂල් බන්දු එදිරිසිංහ මහතා සහ අමෙරිකානු පැසිෆික් ගුවන් හමුදා ආඥාපති ජෙනරාල් කෙවින් ෂ්නයිඩර් මහතා ඊට අත්සන් තැබූහ.
මෙම TH-57 යානා මගින් ශ්රී ලංකා ගුවන් හමුදාවේ ගුවන් නියමු පුහුණු හැකියාව වැඩිදියුණු කිරීම, මෙහෙයුම් ධාරිතාව පුළුල් කිරීම මෙන්ම ආපදා සහන, සෙවීම් හා මුදාගැනීම් සහ හදිසි මහජන සේවා කටයුතු සඳහා සහාය ලබාදීමට අපේක්ෂා කෙරේ.
එමෙන්ම එක්සත් ජාතීන්ගේ සාමසාධක මෙහෙයුම් සඳහා අවශ්ය ගුවන් කාර්ය මණ්ඩල පුහුණුවටද මෙම යානා යොදා ගැනීමට නියමිත බව සඳහන් වේ.
අමෙරිකාවේ සිට විශේෂ භාණ්ඩ ප්රවාහන පහසුකම් ඔස්සේ 2026 ජූනි 01 වනදා ශ්රී ලංකාවට රැගෙන ආ මෙම යානා රත්මලාන ගුවන් හමුදා කඳවුරේදී එකලස් කර ඇති අතර, ශ්රී ලංකාවේ දේශගුණික හා ගුවන් මෙහෙයුම් තත්ත්වයන්ට ගැළපෙන තාක්ෂණික පරීක්ෂණ සහ අත්හදා බැලීම්වලින් අනතුරුව නිල මෙහෙයුම් සඳහා යොදා ගැනීමට නියමිතය.
මෙම අවස්ථාවට ආරක්ෂක අංශ ජ්යෙෂ්ඨ නිලධාරීන් සහ අමෙරිකානු තානාපති කාර්යාලයේ නියෝජිතයින් ඇතුළු පිරිසක් එක්ව සිටියහ.
