නාවලපිටිය, පන්විල මංසන්ධියේ සිට ගලබොඩ දක්වා කිලෝ මීටර් 6ක් දුරින් තවත් දිරාපත් වූ කඩා වැටීමේ අවදානම් සහිත විශාල ගස් ඇති බව ඉඩම් හිමියෝ පවසති.
මේ සම්බන්ධයෙන් කතා බහක් ඇති වීමට ප්රධාන හේතුව වූයේ පසුගිය 04 වන දින නාවලපිටිය මාපාකන්ද ප්රදේශයේ ත්රීරෝද රථයක් මතට ගසක් කඩා වැටීමෙන් ජීවිත තුනක් අහිමිවීමත් සමඟය.
මෙම තත්ත්වය තුළ පන්විල මංසන්ධියේ සිට ගලබොඩ දක්වා මාර්ගය දෙපස කිලෝමීටර් 6ක් දුරට දිරාපත් වූ කඩා වැටීමේ අවදානමක් සහිත නුග, කොස්, යුකැලිප්ටිස් ඇතුළු දැව ගස් ගණනාවක් පිළිබඳව මේ වනවිට ගම්මුන් බියට පත්ව සිටී.
එම අවදානම් සහිත ගස් කපා ඉවත් කරන ලෙසට ප්රදේශයේ ග්රාමසේවා නිලධාරිවරයා හරහා පස්භාගේ කෝරලයේ ප්රාදේශීය ලේකම් රම්ය ජයසුන්දර මහත්මිය දැනුවත් කර ඇතත්, එයට මෙතෙක් විසඳුම් ලැබී නොමැති බව ඉඩම් හිමියන් පවසයි.
මේ අතර, මේ සම්බන්ධයෙන් පස්භාගේ කෝරලයේ ප්රාදේශීය ලේකම්වරියගෙන් සිදුකළ විමසුමකට ඇය පවසා ඇත්තේ, ප්රදේශයේ ග්රාම සේවා නිලධාරිවරයාගේ නිර්දේශ සහිතව කපා ඉවත් කළ යුතු ගස් සම්බන්ධයෙන් කඩිනමින් පියවර ගන්නා ලෙසට තමන් ගම්පොළ ඇත්ගාල දැව සංස්ථාව වෙත ලිඛිතව උපදෙස් ලබා දී ඇති බවය.
ඒ අනුව මේ සම්බන්ධයෙන් ඇත්ගාල දැව සංස්ථාවේ සහකාර ප්රාදේශීය කළමණාකාර අබේරත්න මහතාගෙන් සිදුකළ විමසීමකදී ඔහු කියා සිටියේ, තමන් දැන් රැස්වීමක සිටින බවත්, එවැනි ඉල්ලීමක් කර ඇත්ද යන්න පිළිබඳව ලිපිගොනුව පරීක්ෂා කර බලා පිළිතුරක් ලබා දෙන බවය.
පසුගිය දා නාවලපිටිය මාපාකන්ද ප්රදේශයේ සිට නාවලපිටිය දක්වා ධාවනය වෙමින් පැවති ත්රිරෝද රථයක් මතට ප්රධාන මාර්ගය අසල තිබූ විශාල ගසක් කඩාවැටී තිදෙනෙකු ජීවිතක්ෂයට පත්විණි.
අනතුරින් පාසල් සිසුවෙකු, ඔහුගේ මව සහ තවත් කාන්තාවක් මෙම අනතුරින් එලෙස ජීවිතක්ෂයට පත්ව තිබුණි.
අනතුරින් මියගිය පාසල් සිසුවා සහ ඇගේ මවගේත් අසල්වාසී කාන්තාවගේත් අවසන් කටයුතු ඊයේ (06) පස්වරුවේ නාවලපිටිය ගලබොඩ වතුයායේ පොදු සුසාන භූමියේදි සිදුකෙරිණි.
