Author: Shashi Maduranga

2026 ජනවාරි සිට මාර්තු මාසය දක්වා වන කාලය සඳහා අපේක්ෂිත පිරිවැය රුපියල් මිලියන 137,016ක් වන බවත්, පවතින ගාස්තු යටතේ ලැබෙන ආදායම රුපියල් මිලියන 113,161ක් ලෙස ඇස්තමේන්තුගත කර ඇති බවත් විදුලිබල මණ්ඩලය සිය යෝජනාවලිය මගින් පෙන්වා දී ඇත.

ඒ අනුව රුපියල් මිලියන 13,094ක ආදායම් හිඟයක් පවතින බැවින් සමස්ත විදුලි ගාස්තුව 11.57%ක ප්‍රතිශතයකින් ඉහළ නැංවිය යුතු බව විදුලිබල මණ්ඩලය යෝජනා කර ඇත.

2026 වසරේ පළමු කාර්තුව සඳහා වූ විදුලි ගාස්තු සංශෝධන යෝජනාවලිය ලංකා විදුලිබල මණ්ඩලය මහජන උපයෝගිතා කොමිසම වෙත භාරදී තිබේ.

එහිදී ස්ථාවර ගාස්තු සහ ඒකක ගාස්තු යන දෙකම ඉහල දැමීමට විදුලි බල මණ්ඩලය යෝජනා කර තිබේ.

යෝජිත සංශෝධනයට අනුව ගෘහස්ථ කාණ්ඩයේ පළමු විදුලි ඒකක 60 දක්වා අදියර දෙකක් යටතේ ගාස්තු සංශෝධනය වේ.

මුල් ඒකක 30ට අදාළව එක් විදුලි ඒකකයක් සඳහා දැනට අය කරන රුපියල් 4.50ක ගාස්තුව රුපියල් 5.29ක් දක්වා වැඩිවීමට යෝජිතය.

එම කාණ්ඩයේ මාසික ගාස්තුවද රුපියල් 80 සිට රුපියල් 94.11 දක්වා රුපියල් 14.11කින් ඉහළ යනු ඇත.

ඒකක 31 සිට 60 දක්වා, එක් ඒකකයකට අයකෙරෙන රුපියල් 8ක ගාස්තුව රුපියල් 9.41 දක්වා ඉහළ නැංවීමට යෝජනා කර ඇත.

එහි මාසික ස්ථාවර ගාස්තුව රුපියල් 37.03 කින් ඉහළ යන අතර එහි යෝජිත  ගාස්තුව රුපියල් 247.03කි.

ඒකක 61 සිට 90 දක්වා කාණ්ඩයේ ඒකකයකට දැනට අයකරන රුපියල් 18.50ක ගාස්තුව රුපියල් 21.76 දක්වා වැඩි කිරීමට යෝජිතය.

එමෙන්ම ඒකක 91 සිට 120 දක්වා ඒකකයකට අය කරන රුපියල් 24ක ගාස්තුව ද රුපියල් 28.23 දක්වා ඉහළ නැංවීමට යෝජනා කර තිබේ.

ඒකක 121 සිට 180 දක්වා කාණ්ඩයේ ඒකකයක් සඳහා අයකරන රුපියල් 41ක ගාස්තුවද රුපියල් 48.23ක් දක්වා ඉහළ දැමීමට යෝජිතය.

ඒකක 181 හෝ ඊට වැඩි ඒකකයක් සඳහා පැවති රුපියල් 61ක ගාස්තුව ඉහළ නැංවීමට යෝජනා කර ඇත්තේ රුපියල් 71.76 දක්වාය.

මෙම කාණ්ඩවල මාසික ස්ථාවර ගාස්තු ද මීට සමගාමීව ඉහළ නැංවීමට යෝජනා කර ඇත.

මීට සමගාමීව ආගමික ස්ථාන හා පුණ්‍යායතන සඳහා විදුලි ගාස්තුද ඉහළ දැමීමට විදුලිබල මණ්ඩලය මහජන උපයෝගිතා කොමිසමට යෝජනා කර තිබේ.

එහි පළමු ඒකක 30 සඳහා ඒකකයකට අයකරන රුපියල් 4.50ක ගාස්තුව රුපියල් 5.29 දක්වා ඉහළ දැමීමට යෝජිත අතර, රුපියල් 75 ක්ව පැවති මාසික ගාස්තුව ද , රුපියල් 88.23 දක්වා ඉහළ නැංවීමට යෝජිතය.

ඒකක 31 සිට 90 දක්වා ඒකකයක මිලද ඉහළ දැමීමට යෝජනා කර ඇති අතර එම කාණ්ඩයේ මාසික ගාස්තුව ද රුපියල් 35.27 කින් ඉහළ නැංවීමට ඉල්ලා තිබේ.

ඒකක 91 සිට 120 දක්වා කාණ්ඩයේ ඒකකයක මිල රුපියල් 9.41 දක්වාත්, ඒකක 121 සිට 180 දක්වා කාණ්ඩයේ ඒකකයක මිල රුපියල් 22.35 දක්වාත් ඉහළ නැංවීමට යෝජිතය.

ඒකක 181 හෝ ඊට වැඩි නම් ඒකකයක මිල ඉහළ නැංවීමට ඉල්ලා ඇත්තේ රුපියල් 26 සිට 30.59 දක්වාය.

මීට සමගාමීව කර්මාන්ත සහ හෝටල් සඳහා විදුලි ගාස්තුද ඉහළ දැමීමට ද යෝජනා කර ඇත.

ඒ අනුව ඒකක 300 හෝ 300ට අඩු කාණ්ඩය සඳහා රුපියල් 8ක් ලෙස පවතින ඒකකයක මිල රුපියල් 9.41 දක්වාත්, ඒකක 300ට වැඩි ඒකකයක මිල රුපියල් 17 සිට රුපියල් 20 දක්වාත් ඉහළ නැංවීමට විදුලිබල මණ්ඩලය ඉල්ලා ඇත.

කෙසේවෙතත් ලංකා විදුලිබල මණ්ඩලය විසින් පවත්වාගෙන යනු ලබන විදුලි මෝටර් රථ ආරෝපණ මධ්‍යස්ථානවල ගාස්තු ඉහළ නැංවීමක් සිදු නොවන බවද වාර්තා වේ.

මේ අතර විදුලිබල මණ්ඩලයේ මෙම යෝජනාවලිය අධ්‍යයනය කොට ඒ පිළිබඳ මහජන අදහස් විමසීමට පියවර ගන්නා බව මහජන උපයෝගිතා කොමිසම සඳහන් කළා.

ඒ අනුව ජනවාරි දෙවන වන සතිය වන විට මහජන අදහස් ලබාගැනීම ආරම්භ කෙරෙන අතර සති 6ක කාලයක් තුළ ගාස්තු සංශෝධනය පිළිබඳ මහජන උපයෝගිතා කොමිසමේ අවසන් තීරණය දැනුම්දීමට නියමිතයි.

ආන්දෝලනයට තුඩුදුන් 6 ශ්‍රේණිය ඉංග්‍රීසි විෂයේ මොඩියුලය මුද්‍රණය කිරීම සඳහා රුපියල් මිලියන 61කට ආසන්න මුදලක් වියදම් වී ඇති බව අධ්‍යාපන අමාත්‍යාංශයේ ලේකම් නාලක කලුවැව මහතා පවසයි.

එබැවින් එය යළි මුද්‍රණය කරනවාද, නැතිනම් වියදම අවම විකල්ප ක්‍රියාමාර්ගයකට යොමුවනවාද යන්න පිළිබඳ මේ වනවිට අවධානය යොමු වී ඇති බව අප කළ විමසීමකදී අමාත්‍යාංශ ලේකම්වරයා වැඩිදුරටත් සඳහන් කළේය.

එහිදි අනුගමනය කළ හැකි එක් විකල්පයක් ලෙස අදාළ මොඩියුලයේ ප්‍රශ්නගත පිටුව ඉවත්කර බෙදාහැරීම කෙරෙහිද අවධානය යොමු වී ඇති බව කලුවැව මහතා වැඩිදුරටත් පැවසුවේය.

මේ අතර වත්මන් ආණ්ඩුවේ නව අධ්‍යාපන ප්‍රතිසංස්කරණ යටතේ පාසල පැවැත්වෙන වේලාව මිනිත්තු 30කින් දීර්ඝ කිරීම 2026 වසරේ සිට ක්‍රියාත්මක වන බව දැනුම්දී තිබුණ ද අධ්‍යාපන අමාත්‍යාංශය අද (02) නිවේදනය කළේ පාසල් පවත්වන වේලාව දීර්ඝ කිරීම ක්‍රියාත්මක නොකිරීමට තීරණය කර ඇති බවය.

රට තුළ උද්ගතවූ ආපදා තත්ත්වය නිසා පළාත් කිහිපයක පාසල් පද්ධතියට සහ ප්‍රවාහන පද්ධතියට සිදුව ඇති හානි සැලකිල්ලට ගෙන මෙම තීරණය ගෙන ඇති බව වාර්තා වේ.

ඒ අනුව 2026 වසරේ ද 5 ශ්‍රේණියේ සිට 13 ශ්‍රේණිය දක්වා පාසල් පවත්වන කාලය පෙ.ව. 7.30 සිට පස්වරු 1.30 දක්වා නොවෙනස්ව පවතිනු ඇත.

2026 පළමු වාරය සඳහා රජයේ පාසල්, රජයේ අනුමත පෞද්ගලික පාසල් සහ පිරිවෙන් ජනවාරි 05වන දින ආරම්භ කිරීමට නියමිතය.

එසේම නව අධ්‍යාපන ප්‍රතිසංස්කරණ ක්‍රියාවලිය මෙම වසරේදී 1 ශ්‍රේණියට සහ 6 ශ්‍රේණියට ක්‍රියාත්මක කිරීමටද සැලසුම් කර ඇත.

ඒ යටතේ 6 ශ්‍රේණියේ අධ්‍යාපන කටයුතු විධිමත් ලෙස ආරම්භ කිරීම ජනවාරි 21වැනිදා සිදුකෙරෙනු ඇත.

පළමු ශ්‍රේණිය සඳහා දරුවන් හඳුනාගැනීම ජනවාරි 05 වැනිදා ආරම්භ වන අතර විධිමත් ලෙස අධ්‍යාපන කටයුතු ආරම්භ කිරීම ජනවාරි 29 වනදා ද සිදුකිරීමට නියමිතය.

ඒ අනුව පළමු ශ්‍රේණියට සහ 6 ශ්‍රේණියට අදාළ ඉගෙනුම් මොඩියුල එම ශ්‍රේණිවල අධ්‍යාපන කටයුතු ආරම්භ කිරීමට පෙර සිසුන්ට බෙදාදී අවසන් කරන බව ද අධ්‍යාපන අමාත්‍යාංශය වැඩිදුරටත් පැවසීය.

මේ අතර දිට්වා සුළි කුණාටුව නිසා අතරමඟ නැවතුණු 2025 උසස්පෙළ විභාගයේ ඉතිරි අදියර මෙම වසරේ ජනවාරි 12 සිට 20 දක්වා පැවැත්වෙන බවත් අධ්‍යාපන අමාත්‍යාංශය නිකුත් කළ නිවේදනයේ සඳහන් වේ.