Author: Shashi Maduranga

IPL විකාශනය බංග්ලාදේශය තුළ තහනම්….

ඉදිරියේදී පැවැත්වීමට නියමිත ඉන්දීය ප්‍රිමියර් ලීග් (IPL) තරගාවලිය බංග්ලාදේශය තුළ විකාශනය කිරීම තහනම් කිරීමට එරට රජය පියවර ගෙන තිබේ.

බංග්ලාදේශ ක්‍රිකට් කණ්ඩායමේ ප්‍රධාන වේගපන්දු ක්‍රීඩකයෙකු වන මුස්තාෆිසුර් රහ්මාන් IPL තරගාවලියෙන් ඉවත් කිරීමට ඉන්දියානු ක්‍රිකට් පාලක මණ්ඩලය ගත් තීරණයට ප්‍රතිචාර ලෙස මෙම පියවර ගෙන ඇති බව වාර්තා වෙයි.

BCCI ගත් මෙම තීරණය බංග්ලාදේශ ජනතාව අතර දැඩි කනස්සල්ලක් ඇති කර ඇති අතර, මුස්තාෆිසුර් රහ්මාන් IPL තරගාවලියෙන් ඉවත් කිරීමට හේතුවක් මේ දක්වා නිල වශයෙන් ප්‍රකාශ කර නොමැති බවද සඳහන් වේ.

මෙම සිදුවීම බංග්ලාදේශය සහ ඉන්දියාව අතර ක්‍රීඩා සබඳතා තුළ නව උණුසුම් තත්ත්වයක් උද්ගත කළ හැකි බව විශ්ලේෂකයන් පෙන්වා දෙති.

මේ අතර, එළැඹෙන විස්සයි20 ලෝක කුසලාන ක්‍රිකට් තරගාවලියේ ඉන්දියාවේ පැවැත්වීමට නියමිත තරග සඳහා බංග්ලාදේශ කණ්ඩායම ඉන්දියාවට යාම ප්‍රතික්ෂේප කර ඇති බව ‘Cricinfo’ වෙබ් අඩවිය වාර්තා කරයි.

දෙරට අතර පවතින දේශපාලනික නොසන්සුන්කාරී වාතාවරණය හමුවේ, බංග්ලාදේශ ක්‍රීඩකයින්ගේ ආරක්ෂාව සහ යහපැවැත්ම සැලකිල්ලට ගනිමින් මෙම තීරණය ගත් බවද සඳහන් වේ.

ඒ අනුව, එම තරගාවලියේදී ඉන්දියාවේ පැවැත්වීමට නියමිත බංග්ලාදේශ තරග ශ්‍රී ලංකාවේදී පැවැත්වීමට ඉල්ලීමක් කර ඇති බවද වාර්තා වේ.

ශ්‍රී ලංකාව සහ ඉන්දියාව සම සත්කාරකත්වය යටතේ ලබන මාසයේ ආරම්භ වීමට නියමිත විස්සයි20 ලෝක කුසලාන තරගාවලියේදී, බංග්ලාදේශ කණ්ඩායම කොල්කටාහිදී තරග තුනක් ක්‍රීඩා කිරීමට නියමිතව තිබුණි.

එම අතර, ඉදිරියේදී පැවැත්වෙන IPL තරගාවලියේදී කොල්කටා කණ්ඩායම වෙනුවෙන් ක්‍රීඩා කිරීමට නියමිතව සිටි මුස්තාෆිසුර් රහ්මාන් හදිසියේම කණ්ඩායමෙන් නිදහස් කිරීම මෙම නොසන්සුන්තාවට ප්‍රධාන වශයෙන් බලපා ඇති බව සඳහන්ය.

බංග්ලාදේශයේ වෙසෙන සුළු ජාතීන්ට සිදුවන බවට වාර්තා වන හිරිහැරවලට විරෝධය පළ කිරීමක් ලෙස මුස්තාෆිසුර් රහ්මාන් එලෙස ඉවත් කර ඇති බවටද වාර්තා පළවෙයි.

T20 ලෝක කුසලානයේ බංග්ලාදේශ තරග පැවැත්වෙන තැන් ගැන ICCයෙන් දැනුම්දීමක්….

බංග්ලාදේශ කණ්ඩායමේ විස්සයි20 ලෝක කුසලාන තරග පැවැත්වෙන ස්ථාන සම්බන්ධයෙන් මේ වනවිට කිසිදු වෙනසක් සිදුකර නොමැති බව ජාත්‍යන්තර ක්‍රිකට් කවුන්සිලය පවසයි.

ජාත්‍යන්තර ක්‍රිකට් කවුන්සිලය සඳහන් කළේ, අදාළ තරග පැවැත්වීමට ආරක්ෂක අවදානමක් මෙතෙක් හඳුනාගෙන නොමැති බවය.

කෙසේ වෙතත්, මෙම කරුණ සම්බන්ධයෙන් අවසන් තීරණය ජනවාරි 10 වැනිදාට පෙර ගනු ලබන බවද ICC වැඩිදුරටත් සඳහන් කර ඇත.

වික්‍රම් රතෝර් ශ්‍රී ලංකා පිතිකරණ පුහුණුකරු ලෙස පත් කිරීමට තීරණයක්….

T20 ලෝක කුසලානය වෙනුවෙන් හිටපු ඉන්දීය පිතිකරු වික්‍රම් රතෝර් ශ්‍රී ලංකාව විස්සයි 20 පිතිකරණ පුහුණුකරු ලෙස පත් කිරීමට නියමිත බව වාර්තා වෙයි.

ඒ අනුව ඔහු ජනවාරි 15 වනදා ශ්‍රී ලංකා කණ්ඩායම සමග සම්බන්ධ වෙනු ඇති බව සඳහන්ය.

2024 දක්වා ඉන්දියාවේ පිතිකරණ පුහුණුකරු ලෙස කටයුතු කර තිබෙන රතෝර් දැනට IPL රාජස්ථාන් රෝයල්ස් කණ්ඩායමේ සහාය පුහුණුකරු ලෙස කටයුතු කරයි.

කෝටි 7ක කුෂ් සමඟ ව්‍යාපාරිකයෙක් කටුනායක ගුවන් තොටේ දී මාට්ටු…..

රුපියල් කෝටි හතක් පමණ වටිනාකමින් යුත් ‘කුෂ්’ මත්ද්‍රව්‍ය තොගයක් රැගෙන කටුනායක ගුවන්තොටුපොළ වෙත පැමිණි ශ්‍රී ලාංකික ගුවන් මගියෙකු අත්අඩංගුවට ගෙන තිබේ.

මත්ද්‍රව්‍ය තොගය ගුවන්තොටුපොළ ‘හරිත මාවත’ ඔස්සේ පිටකර ගෙන යාමට තැත් කරමින් සිටියදී අද (07) උදෑසන රේගු මත්ද්‍රව්‍ය පාලන අංශයේ නිලධාරීන් පිරිසක් විසින් මෙලෙස අත්අඩංගුවට ගෙන ඇත.

මීගමුව, කුඩාපාඩුව ප්‍රදේශයේ සංචාරක හෝටලයක් පවත්වා ගෙන යන ව්‍යාපාරිකයෙක් වන සැකකරු අවුරුදු 24ක ජා ඇළ ප්‍රදේශයේ පදිංචිකරුවෙකි.

මොහු මෙම  ‘කුෂ්’ මත්ද්‍රව්‍ය තොගය තායිලන්තයේ බැංකොක් නුවරින් රැගෙන ඉන්දියාවේ නවදිල්ලි නුවර වෙත පැමිණ ඇති අතර එතැන් සිට ඉන්දීය ගුවන් සේවයේ ඒ.අයි. 277 දරණ ගුවන් යානයෙන් අද උදෑසන 07.33ට පමණ කටුනායක ගුවන්තොටුපොළ වෙත පැමිණ ඇත.

ඔහු විසින් රැගෙන ආ ගමන් මලු දෙකක් තුළ, කාබන් කොළ වල ඔතා වායුව කාන්දු නොවන ආකාරයට සකස් කර, එවැනි ඇසුරුම් 15ක් තුළ මෙම ‘කුෂ්’ මත්ද්‍රව්‍ය කිලෝ ග්‍රෑම් 07යි ග්‍රෑම් 070ක ප්‍රමාණය අසුරා ගෙන ඒවා මත රසකැවිළි අඩංගු පැකට් විශාල ප්‍රමාණයක් ද දමා සඟවා ගෙන පැමිණ ඇති බව සඳහන් වෙයි.

සැකකරුට මෙම මත්ද්‍රව්‍ය තොගය ඔහු හඳුනන, දැනට තායිලන්තයේ පදිංචි ශ්‍රී ලාංකික කාන්තාවක විසින් මෙරටට රැගෙන ඒම සඳහා භාර දී ඇති බව රේගුව සිදුකළ මූලික විමර්ශනවලදී අනාවරණය කර ගෙන තිබේ.

මේ පිළිබඳ වැඩිදුර විමර්ශන කටයුතු සඳහා මත්ද්‍රව්‍ය තොගය සමඟ ඒවා රැගෙන ආ ගුවන් මගියා ද කටුනායක ගුවන්තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාරදීමට පියවර ගෙන තිබේ.

ගණේමුල්ල සංජීව ඝාතනයේ සැකකරුවන් දෙදෙනෙකු රිමාන්ඩ්….

පාතාල කල්ලි නායකයෙකු බව කියන ගණේමුල්ල සංජීව ඝාතන සිද්ධියේ ප්‍රධාන සැකකාරියක වන ඉෂාරා සෙව්වන්දි නමැත්තියට ආධාර අනුබලදීම සහ නවාතැන් පහසුකම් සැපයීමේ සිද්ධියක් සම්බන්ධයෙන් අත්අඩංගුවට ගෙන රැඳවුම් භාරයේ සිටි ‘නන්ද කුමාර් තක්ෂි’ සහ තවත් සැකකරුවෙකු ජනවාරි මස 9වනදා දක්වා රක්ෂිත බන්ධනාගාර ගත කරන ලෙස කොළඹ මහෙස්ත්‍රාත් අධිකරණය නියම කළේය.

දින 90ක රැඳවුම් නියෝග මත රඳවා සිටි මෙම සැකකරු සහ සැකකාරිය  අද (7) කොළඹ අපරාධ කොට්ඨාශය විසින් කොළඹ ප්‍රධාන මහෙස්ත්‍රාත් අසංග එස්. බෝදරගම මහතා හමුවට පමුණුවනු ලැබීය.

කොළඹ අපරාධ කොට්ඨාශයේ නිලධාරීන් අධිකරණය හමුවේ කරුණු දක්වමින් ත්‍රස්තවාදය වැළැක්වීමේ පනත යටතේ දින අනුවක් රඳවාගෙන සිටි මෙම සැකකරු සහ සැකකාරිය අධිකරණයට ඉදිරිපත් කරන බවත්, ඔවුන් රක්ෂිත බන්ධනාගාර ගත කිරීමේ නියෝගයක් නිකුත් කරන ලෙසත් ඉල්ලා සිටියේය.

ගණේමුල්ල සංජීව ඝාතන සිද්ධියේ ප්‍රධාන සැකකාරියක වන ඉෂාරා සෙව්වන්දි නැමැත්තියට නවාතැන් පහසුකම් සැලසීම සහ ආධාර අනුබලදීම සම්බන්ධයෙන් මෙම සැකකාරිය හා සැකකරු අත්අඩංගුවට ගෙන රඳවාගෙන ප්‍රශ්න කරනු ලැබීය.

ඔවුන් අධිකරණ වෛද්‍ය නිලධාරී හමුවට ඉදිරිපත් කර ඉන් පසුව අධිකරණයට ඉදිරිපත් කළ බව පොලීසිය පැවසීය.

මෙහිදී ප්‍රධාන මහෙස්ත්‍රාත්වරයා විත්ති කූඩුවේ සිටි සැකකරුවන් අමතමින් තමන්ට තුවාලවීමක් හිරිහැර සිදුවී තිබේදැයි විමසීය.

ඊට පිළිතුරු දෙමින් සැකකරු හා සැකකාරිය ප්‍රකාශ කළේ එවැනි කිසිවක් නොමැති බවය.

මෙහිදී කොළඹ අපරාධ කොට්ඨාශයේ නිලධාරීන් තවත් ඉල්ලීමක් කරමින් මෙම නඩුවේ ප්‍රධාන සැකකාරියක වන ඉෂාරා සෙව්වන්දි නමැත්තිය හඳුනාගැනීම පිළිබඳ පරීක්ෂණයක් සිදුකිරීම සඳහා ඇය රජයේ රස පරීක්ෂකවරයා වෙත යොමු කිරීමේ නියෝගයක් නිකුත් කරන ලෙස අධිකරණයෙන් ඉල්ලා සිටියේය.

මෙහිදී අදාළ සැකකරු වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින් මෙම සිද්ධිය සම්බන්ධයෙන් රිමාන්ඩ් භාරයේ පසුවන ‘ආනන්දන්’ නමැති සැකකරුවකුට දුරකථන ඇමතුම් ලබා ගැනීම සම්බන්ධයෙන් සිය සේවා දායකයා අත්අඩංගුවට ගෙන තිබෙන බව පැවසීය.

අදාළ අපරාධයට ආධාර අනුබලදීම සම්බන්ධයෙන් ඔහුට එරෙහිව සාක්ෂි ඉදිරිපත් වී නොමැති බවත් නීතිඥවරයා පැවසුවා.

ඉන් අනතුරුව මහෙස්ත්‍රාත්වරයා පොලිසිය වෙත ප්‍රශ්නයක් යොමු කරමින් ත්‍රස්තවාදය වැළැක්වීමේ පනත යටතේ රැඳවුම් භාරයේ පසුවන සැකකාරියක් සම්බන්ධයෙන් තමන් නියෝගයක් නිකුත් කරන්නේ කෙසේදැයි විමසීය.

තම අධිකරණයේ නොමැති සැකකාරියක් සම්බන්ධයෙන් නියෝග නිකුත් කිරීමට තමන්ට බලයක් නොමැති බව කී ප්‍රධාන මහෙස්ත්‍රාත්වරයා, ඒ අනුව පොලිසියේ ඉල්ලීම ප්‍රතික්ෂේප කරන බවත් කියා සිටියේය.

ඉදිරිපත් වූ කරුණු සලකා බැලූ මහෙස්ත්‍රාත්වරයා අනතුරුව සැකකරුවන් ජනවාරි මස 09 වනදා දක්වා රක්ෂිත බන්ධනාගාර ගත කිරීමට නියම කළේය.

වසර දෙකකට ආසන්න කාලයකට පසුව ඩොලරය රු. 310 පනී….

ශ්‍රී ලංකා මහ බැංකුවට අනුව අද (07) දිනයේ දී එක්සත් ජනපද ඩොලරයක නිරූපිත එතැන් විනිමය අනුපාතිකය (Indicative Rate of the USD/LKR Spot Exchange Rate) රු. 310.02ක් ලෙස වාර්තා වී තිබේ.

2024 පෙබරවාරි 29 දිනෙන් පසු ඩොලරයේ මධ්‍ය අගය මෙලෙස රු. 310 සීමාව ඉක්මවා ගිය පළමු අවස්ථාව මෙයයි.

මේ අතර ශ්‍රී ලංකා මහ බැංකුව විසින් ප්‍රකාශයට පත් කරන ලද දෛනික විනිමය අනුපාතික සටහනට අනුව අද (07) දිනයේ දී එක්සත් ජනපද ඩොලරයක ගැණුම් මිල රු. 306.28ක් හා විකුණුම් මිල රු. 313.81ක් ලෙසින් සටහන් වී තිබේ.

ශ්‍රී ලංකා මහ බැංකුව මීට පෙර සඳහන් කර සිටියේ පසුගිය 2025 වසර තුළ දී ශ්‍රී ලංකා රුපියල, එක්සත් ජනපද ඩොලරය හමුවේ 5.6%කින් අවප්‍රමාණය වී ඇති බවයි.

විෂයමාලා, පෙළපොත් සහ සමාලෝචනය සිදුකරන නිලධාරීන්ට මාර්ගෝපදේශන සංග්‍රහයක්…

විෂයමාලා, පෙළපොත් සකස් කරන සහ සමාලෝචනය සිදුකරන නිලධාරීන් සඳහා සයිබර් ආරක්ෂණය වෙනුවෙන් මාර්ගෝපදේශන සංග්‍රහයක් සකස් කිරීමට පියවර ගෙන ඇත.

6-13 ශ්‍රේණි සඳහා අධ්‍යාපනය ඩිජිටල්කරණය කිරීමේ කාර්ය සාධන බළකායේ මාර්ගගත ආරක්ෂණය, ඩිජිටල් යහපැවැත්ම  සයිබර් ආරක්ෂණයට අදාළ කාර්ය කන්ඩායම (work group) සමඟ සාකච්ඡාවක් අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් ඊයේ (06)  අරලිය ගහ මන්දිරයේදී පවත්වා තිබේ.

එහිදී අදහස් දක්වමින් අග්‍රාමාත්‍යවරිය මේ බව පවසා ඇත.

පාසල් සිසුන් සඳහා විෂයමාලා සකස් කිරීම, පෙළපොත් සකස් කිරීම සහ සමාලෝචනය සිදුකිරීම යන කාර්යයන් සිදුකරන නිලධාරීන් සඳහා මාර්ගගත ආරක්ෂණය, ඩිජිටල් යහපැවැත්ම, සයිබර් ආරක්ෂණය (Online Safety, Digital Wellbeing, Cyber Security) වෙනුවෙන්  මාර්ගෝපදේශන සංග්‍රහයක් සකස් කිරීමට අග්‍රාමාත්‍යවරිය එහිදී වැඩිදුරටත් උපදෙස් ලබා දී තිබේ.

විදේශ රැකියා වංචනිකයින්ට එරෙහිව පැවරූ නඩුවලින් රු. ලක්ෂ 3,743ක් යළි වින්දිතයින්ට….

2025 වර්ෂය තුළ විදේශ රැකියා වංචනික ක්‍රියාවල නිරත වූ පුද්ගලයින් හා බලපත්‍ර රහිත රැකියා නියෝජිත ආයතනවලට එරෙහිව නඩු පවරන ලද වින්දිතයින්ට රුපියල් ලක්ෂ 3,743කට අධික මුදලක් යළි අයකරදීමට කටයුතු කළ බව ශ්‍රී ලංකා විදේශ සේවා නියුක්ති කාර්යාංශය පවසයි.

කාර්යාංශයේ නියෝජ්‍ය සාමාන්‍යාධිකාරී නීතීඥ නෙළුම් සමරසේකර මහත්මියගේ උපදෙස් පරිදි ක්‍රියාත්මක කරන ලද විශේෂ වැටලීම් හා කාර්යාංශයට ලැබුණු පැමිණිලි මත මෙම නඩු පැවරීම් සිදුකර තිබේ.

මේ අනුව පසුගිය වසර තුළ විදේශ රැකියා වංචාකරුවන්ට එරෙහිව අධිකරණයේ පවරා ඇති නඩු ප්‍රමාණය 791ක් වන අතර, එම කාලය තුළ විවිධ පැමිණිලි 4,734ක් කාර්යාංශයට ලැබී ඇත.

තවද මෙම කාලය තුළ කාර්යාංශයේ විශේෂ විමර්ශන අංශය මගින් සිදුකරන ලද වැටලීම් ප්‍රමාණය 20ක් බව විදේශ සේවා නියුක්ති කාර්යාංශය පවසයි.

එම වැටලීම් අතරට නීතිවිරෝධි ක්‍රියාවල යෙදුණු බලපත්‍රලාභී විදේශ රැකියා නියෝජිත ආයතන 2ක් අයත්ය.

එමෙන්ම මෙම කාලය තුළදී වංචනිකයින් 121 දෙනෙකු අත්අඩංගුවට ගෙන ඇති අතර, ඒ අතරට බලපත්‍රලාභී රැකියා නියෝජිත ආයතනවල පුද්ගලයින් 15ක්ද අයත් වන බව සඳහන්.

මේ අතර විදේශ රැකියා වංචා වැළැක්වීම සඳහා විශේෂ පුහුණුව ලත් පොලිස් නිලධාරීන්ගෙන් සමන්විත විශේෂ පොලිස් ඒකකයක්ද පසුගිය වසරේදී කාර්යාංශය තුළ ස්ථාපනය කිරීමට පියවර ගෙන ඇති අතර, එමගින් විනිවිදභාවයකින් යුතුව පැමිණිලි කඩිනමින් විසඳීමට හා වංචාකරුවන්ට දඬුවම් ලබාදීමට අවශ්‍ය පියවර ගැනීමට කටයුතු කර තිබේ.

වර්තමානයේදී සමාජ මාධ්‍ය ජාලා උපයෝගි කරගනිමින් විදේශ රටවල රැකියා ලබාදෙන බව පවසා මුදල් වංචාකිරීම් ඉහළ යමින් පවතින බැවින්, එවැනි පුද්ගලයින්ට මුදල් හෝ ගමන් බලපත්‍ර ලබාදීමට පෙර 1989 ක්ෂණික ඇමතුම් අංකය ඔස්සේ කාර්යාංශය ඇමතීමෙන් තොරතුරු ලබාගන්නා ලෙස කාර්යාංශය විදේශ රැකියා අපේක්ෂිතයින්ගෙන් ඉල්ලා සිටියි.

මහාචාර්ය චරිත හේරත් සජබ කෘත්‍යාධිකාරී මණ්ඩලයට…..

මහාචාර්ය චරිත හේරත් මහතා සමගි ජන බලවේගයේ කෘත්‍යාධිකාරී මණ්ඩලයට පත් කර තිබේ.

ඔහු පසුගිය ජනාධිපතිවරණය සමයේදී සමගිජන බලවේගය සමග එක්ව සජිත් ප්‍රේමදාස මහතා වෙනුවෙන් කටුගම්පල ආසනය සංවිධානය තනතුරේ කටයුතු කරමින් ජනාධිපතිවරණය සඳහා සහයෝගය ලබාදෙනු ලැබිය.

මහාචාර්ය චරිත හේරත් මහතා කළ කැපවීම අගය කරමින් සමගිජන බලවේගයේ පක්ෂ නායක සජිත් ප්‍රේමදාස මහතා විසින් මෙම පත්කිරීම සිදුකර ඇත.

පනත් කෙටුම්පත සම්මත වූ පසු මන්ත්‍රීවරුන්ට විශ්‍රාම වැටුප් ලැබෙන්නේ නෑ – ඇමති හර්ෂණ…..

පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ පනත් කෙටුම්පත සම්මතවීමෙන් පසු කිසිදු මන්ත්‍රීවරයෙකුට විශ්‍රාම වැටුප් හිමි නොවන බව අධිකරණ සහ ජාතික ඒකාබද්ධතා අමාත්‍ය නීතිඥ හර්ෂණ නානායක්කාර මහතා පවසයි.

පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ පනත් කෙටුම්පතෙහි පළමුවර කියවීම අද (07) පාර්ලිමේන්තුවේදී සිදු විය.

ඉන් අනතුරව මාධ්‍ය වෙත විශේෂ ප්‍රකාශයක් සිදුකරමින් අමාත්‍යවරයා මේ බව පවසා තිබේ.

එහිදී වැඩිදුර අදහස් දැක්වූ අමාත්‍යවරයා,

“ඉදිරියේදී එය දෙවැනිවර සහ තුන්වනවර කියවීමෙන් පසු එය නීතිය බවට සම්මත කරනවා. එය නීතියක් බවට සම්මත වුණාට පසුව එතැන් සිට කිසිම අයෙකුට එම විශ්‍රාම වැටුප හිමි වෙන්නේ නැහැ. ඒ වගේම ඔවුන් මේ පනත සම්මතවීමට පෙර ලබාගත්ත විශ්‍රාම වැටුප්වලට අගතියක් වෙන්නේ නෑ. ඒවා නැවත ගෙවන්න ඕනි කියලා එකක් මේ පනතේ නෑ. මේ පනත සම්මතවන දිනයේ සිට වෙනදේ තමයි විශ්‍රාම වැටුප් ගෙවන එක නවත්වන එක. අපි මේක ගේන්න හේතුව තමයි දූෂිත දේශපාලන සංස්කෘතිය විසින් හැමවිටම තමන්ට වරදාන වරප්‍රසාද බෙදාගන්නා ක්‍රමවේදයක් තිබුණා. ඒ නිසා විශේෂයෙන් මහජන විරෝධතාවයක් තියනවා මේ අවුරුදු පහක් රැකියාව කරලා ඒකට විශ්‍රාම වැටුප ගන්නේ. මක් නිසාද සාමාන්‍ය රජයේ සේවකයෙක් උනොත් වසර ගණනාවක් සේවය කරලා කොන්දේසි ගණනාවකට මුහුණදීලා තමයි ඔවුන්ට විශ්‍රාම වැටුප හම්බවෙන්නෙ. මේ විශ්‍රාම වැටුප ගැනීමේදී ඔවුන් කිසිම ආකාරයක කන්ට්‍රිබියුෂන් එකක් කරන්නෙත් නැහැ. අපි ප්‍රතිපත්ති ප්‍රකාශයට ඇතුලත් කලේ අපි මේ විශ්‍රාම වැටුප් පාර්ලිමේන්තු මන්ත්‍රීවරුන්ගේ අහෝසි කරනවා කියන කාරණාව. ඒ වගේම විශ්‍රාමික ජනාධිපතිවරුන්ගේ වැටුප හැර වරප්‍රසාද යම් ප්‍රමාණයකටත් ඉවත් කලා. ඉතිං මේකෙන් පෙන්නුම් කරන්නේ ජාතික ජන බලවේගය ආණ්ඩුව ජනතාවට දුන් පොරොන්දු එකෙන් එක ඉටු කරමින් අපේ ගමන යනවා කියන කාරණාව. ඉදිරියටත් අපි ප්‍රතිපත්ති ප්‍රකාශයේ තියෙන තව දේවල් කරනවා. මේකට අධිකරණයට යන්න පුළුවන් මේක ව්‍යවස්ථා විරෝධී නම්. නමුත් අපි රජයක් වශයෙන් ඉන්න ස්ථාවරය තමයි මේ අපි දීපු පොරොන්දුව මත මෙම විශ්‍රාම වැටුප අහෝසි කිරීම. යම් හෙයකින් යම් මන්ත්‍රීවරයකුට මේ විශ්‍රාම වැටුප නැතිව අපහසුතා තියනවානම් ඒ්ක රජයෙන් වෙනම ඉල්ලීමක් කරන්න පුළුවන් ඉන් පසුව ඒ් මන්ත්‍රීවරයා දිහා බලලා ආර්ථීක සහන අවශ්‍ය නම් ඒ්ක කෙරෙන්නේ කොහොමද කියලා විසඳන්න පුළුවන්”