Author: Shashi Maduranga

ගොඩනැගිල්ලක ඉදිකිරිම් අතරතුර ඔයිස්ට්‍ර යන්ත්‍රයක් කඩා වැටීමෙන් තරුණයෙක්ට දිවි අහිමි වෙයි….

කළුතර කළුතර දකුණ පොලිස් වසමේ දෙමහල් ගොඩනැගිල්ලක ඉදිකිරිම් කටයුතු සිදු කරමින් සිටි යොවුන්ගම ,ගල්ගොඩවත්ත, හල්කදවිල ,පයාගල ලිපිනයේ පදිංචිව සිටි වයස අවු 24 පමණ වන වැලිවිට මුදලිගේ විශ්ව ප්‍රබුද්ධ යන අය දෙවන මහලේ සිට ඔයිස්ට්‍ර ( තාවකාලික ලෙස ගොඩනැගිලි ද්‍රව්‍ය ඉහල ගැනිම සදහා යොදා ගන්නා ) යන්ත්‍රය කඩා වැටිම හේතුවෙන් රොහල් ගත කිරිමෙන් පසු මිය ගොස් ඇත.

මෙම තරුණයා කොන්ක්‍රීට් මික්ෂරය සහිත දෙමහල් ගොඩනැඟිල්ලේ එම මිච්රයෙන් සිමෙන්ති සහිත ඔබදාම ඉහ ඉහලට ගනිමින් සිටියදී එකවරම එම මික්සර යන්ත්‍රය සමඟ පහත මාලට කඩා වැටී ඇත ඉන්පසු බිමට වැටුණු තරුණයා එකවරම කොන්ක්‍රීට් මික්සරයේ ට යටවීමෙන් හිසට බරපතළ හානි සිදුවීමෙන් අනතුරුව ඔහු එම ස්ථානයේ සේවය කරන සේවකයින් විසින් කළුතර ශික්ෂණ රෝහලට ඇතුළත් කළ අතර ඉන්පසුව ඔහු මියගොස් ඇත.

කළුතර – සම්පත් කුලරත්න

සඟවා තිබූ පිස්තෝලයක් පොලිස් භාරයට……

දෙහිවල, වෛද්‍ය පාර ප්‍රදේශයේ සඟවා තිබී පිස්තෝල අවියක් සහ පතොරොම් තුනක් සොයාගෙන තිබේ.

ලද තොරතුරක් මත ඊයේ (05) පස්වරුවේ දෙහිවල පොලිස් ස්ථානයේ නිලධාරින් කණ්ඩායමක් සිදු කළ මෙහෙයුමකදී මෙම පිස්තෝලය සොයාගත් බව පොලීසිය නිවේදන කරයි.

සැකකරුවන් සම්බන්ධයෙන් මෙතෙක් තොරතුරු අනාවරණවී නොමැති අතර සිද්ධිය සම්බන්ධයෙන් වැඩිදුර විමර්ශන ආරම්භ කර ඇත.

මහින්දානන්ද සහ නලින් ප්‍රනාන්දුගේ නඩුවක නියෝගය ප්‍රකාශ කිරීම කල්යයි…

2015 වසරේ පැවැති ජනාධිපතිවරණය සමයේ හිටපු ජනාධිපති මහින්ද රාජපක්ෂ මහතාගේ දේශපාලන කාර්යාලවලට බෙදාදීම සඳහා කැරම්බෝඩ් සහ දාම් ලෑලි ආනයනය කර බෙදා හැරීම තුළින් රජයට පාඩුවක් සිදු කළේ යැයි චෝදනා කරමින් හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දු සහ ක්‍රීඩා අමාත්‍යාංශයේ හිටපු ලේකම් විශ්‍රාමික  මේජර් ජෙනරාල් නන්ද මල්ලවාරච්චි යන මහත්වරුන්ට විරුද්ධව නීතිපතිවරයා විසින් ඉදිරිපත් කර තිබෙන නඩුවේ මූලික විරෝධතා පිළිබඳ නියෝගය ප්‍රකාශ කිරීම මාර්තු මස 25 වන දා දක්වා කල් තැබීමට  කොළඹ මහාධිකරණය තීරණය කර තිබේ.

මෙම නඩුව අද(05) කැඳවූ අවස්ථාවේදී විත්තිකාර හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දු යන අය බන්ධනාගාර නිළධාරීන් විසින් අධිකරණයට ඉදිරිපත් කර තිබුණි.

අද  දිනයේ එම නියෝගය  ප්‍රකාශයට පත් කිරීමට නියමිතව තිබුණද විනිසුරු බුද්ධික සී රාගල මහතා ප්‍රකාශ කළේ අදාල නියෝගය සූදානම් නොමැති බවත් එය මාර්තු මස 25 වනදා ප්‍රකාශයට පත් කරන බවත්ය.

පිරිසක් යද්දි තවත් පිරිසක් ජනපති ලේකම් කාර්යාලය ඉදිරිපිට විරෝධතාවක….

දිවයිනේ විවිධ ප්‍රදේශවල ජාතික පාසල් අධ්‍යයන හා අනධ්‍යයන කාර්ය මණ්ඩලවලින් සමන්විත ජාතික පාසල් ගුරු දරු එකමුතුව ජනාධිපති ලේකම් කාර්යාලයේ ප්‍රධාන පිවිසුම අසළ අද උදෑසන විරෝධතාවක් ආරම්භ කළේය.

ඔවුන් පවසන්නේ ජාතික පාසල්වල වසර 3ක් සේවය සම්පූර්ණ කළ අධ්‍යයන හා අනධ්‍යයන කාර්ය මණ්ඩලවලට තම දරුවන් එම පාසල්වලටම ඇතුළත් කරගැනීම සඳහා වූ වරප්‍රසාදය කිසිඳු හේතුවක් නොදන්වා 2025 සිට නවතා දමා ඇති බවය.

මේ සම්බන්ධයෙන් අග්‍රාමාත්‍ය ආචාර්ය හරිනි අමරසූරිය මෙනවිය, අධ්‍යාපන ලේකම් ඇතුළු නිසි බලධාරීන් හමුවී විමසුවද විසඳුමක් නොදුන් බවත් විරෝධතාකරුවන් පවසයි.

එවන් පසුබිමක සිය ගැටලුවට ලිඛිත විසඳුමක් ඉල්ලා ජාතික පාසල් ගුරු දරු එකමුතුව මෙලෙස විරෝධතාවයේ නිරතව සිටියි.

ඒ ඔවුන්ගේ දරුවන්ද සමඟය.

විරෝධතාවය සඳහා ජාතික පාසල්වල ගුරුවරුන් මෙන්ම අනධ්‍යයන කාර්ය මණ්ඩල සේවකයින්ද එක්ව සිටියි.

අපරාධ කල්ලි සාමාජිකයන් 4කගේ රහස් සංවාදයක් එළියට….

විදෙස්ගතව සිටින ප්‍රධාන පෙළේ පාතාල සාමාජිකයන් සිව්දෙනකු විසින් ඔවුන්ගේ ඉදිරි සැලසුම්, අපරාධ හා මත්ද්‍රව්‍ය ජාවාරමට අදාළ කරුණු සම්බන්ධයෙන් සිදුකරන සමූහ දුරකථන සංවාදයක් ඇතුළත් හඬපටයක් සමාජ මාධ්‍ය ඔස්සේ සංසරණය වීමත් සමග පොලීසියේ අවධානය ඒ වෙත යොමුව තිබේ.

විනාඩි විසි දෙකක පමණ කාලයක් සිදුවන මෙම සංවාදයේ අදහස් හුවමාරු කරගන්නේ රසල් ස්මිත්, ප්‍රංශ රූබන්, එංගලන්තයේ කුඩු ලාල් හා වැල්ලේ සාරංග යන අපරාධකරුවන් සිව්දෙනාය.

ඩුබායිහි සිටියදී අත්අඩංගුවට පත්වූ වැල්ලේ සාරංග නැමැත්තාට එරට පොලීසිය විසින් දැක්වූ අඩු සැලකිලි මුල් කරගනිමින් එක්සත් අරාබි එමීර් රාජ්‍යයේ සිට මෙරටට පැමිණෙන එරට පුරවැසියන්ට පහරදීම සඳහා මෙරට සිටින සිය සහචරයන් පෙළඹවීමක් ගැන රසල් ස්මිත් මෙම සංවාදයේදී වෛරීසහගත ප්‍රකාශයක් කර තිබේ.

2025දී මත්තල ගුවන් තොටට වාර්තාගත ගුවන් මගීන් සංඛ්‍යාවක්….

මත්තල රාජපක්ෂ ජාත්‍යන්තර ගුවන් තොටුපොළ 2025 වසර තුළ වාර්තාගත ගුවන් මගීන් සංඛ්‍යාවක් මෙහෙයවීමට සමත් වී ඇති බව ගුවන්තොටුපළ හා ගුවන් සේවා සමාගම පවසයි.

2013 වසරේ ගුවන්තොටුපොළ ආරම්භයෙන් අනතුරුව වාර්තා වූ ඉහළම ගුවන් මගී සංචලන සංඛ්‍යාව මෙය වන අතර, 2025 වසර තුළ ගුවන් මගීන් 140,614 දෙනෙකු මෙහෙයවීමට හැකි වී ඇති බව එම සමාගම සඳහන් කරයි.

ගුවන්තොටුපොළ හා ගුවන් සේවා සමාගමේ දත්ත අනුව, 2025 වසර තුළ මත්තල ජාත්‍යන්තර ගුවන්තොටුපොළ ජාත්‍යන්තර ගුවන්යානා 703ක් සාර්ථකව මෙහෙයවීමටද හැකි වී ඇත.

එමෙන්ම පසුගිය වසර තුන පුරා මත්තල ගුවන්තොටුපොළ ගුවන් මගී හැසිරවීමේ අඛණ්ඩ වර්ධනයක් පෙන්නුම් කර ඇති බවද වාර්තා වෙයි.

නව රජය බලයට පැමිණීමෙන් අනතුරුව මත්තල ගුවන්තොටුපොළ කෙරෙහි විශේෂ අවධානයක් යොමු කිරීම මෙම වාර්තාගත වර්ධනයට ප්‍රධාන හේතුවක් බව ගුවන් තොටුපළ හා ගුවන් සේවා සමාගම පෙන්වා දෙයි.

අතීතයේදී මත්තල ගුවන් තොටුපොළ ආශ්‍රිත වනජීවී ගැටලු හේතුවෙන් ආරක්ෂක කරුණු මත ගුවන් සමාගම් මෙහි ගුවන් ගමන් ක්‍රියාත්මක කිරීමට මැලිකමක් දක්වා තිබුණි.

එම ගැටලු විසඳීමට නව රජය ගත් සාධනීය ක්‍රියාමාර්ග හේතුවෙන් 2025 වසරේදී ගුවන්යානා පැමිණීමේ ද සැලකිය යුතු වර්ධනයක් දක්නට ලැබේ.

මත්තල ජාත්‍යන්තර ගුවන්තොටුපොළ පිළිබඳ විශ්වාසය පළ කරමින් 2025 වසර තුළ යුරෝපය, මැදපෙරදිග සහ දකුණු ආසියාව සම්බන්ධ කරමින් ගුවන්සමාගම් කිහිපයක් මෙහි ගුවන් වාර ක්‍රියාත්මක කර ඇත.

ඒ අනුව රුසියාවේ Red Wings, බහරේන් හා පාකිස්තානයේ සිට SkyUp, ඩුබායි සිට Fly One, උස්බෙකිස්තානයේ සිට Centrum Air සහ Uzbekistan Airways, බල්ගේරියාවේ සිට Bulgaria Air යන ගුවන් සමාගම් මත්තල දක්වා ගුවන් ගමන් ක්‍රියාත්මක කර ඇත.

එමෙන්ම බෙලරූස්හි මින්ස්ක් නගරයෙන් Belavia ගුවන් සේවය 2025 වසරේදී ප්‍රථමවරට මත්තල ජාත්‍යන්තර ගුවන්තොටුපොළ වෙත ගුවන් ගමන් ආරම්භ කිරීමද විශේෂත්වයකි.

මත්තල ජාත්‍යන්තර ගුවන් තොටුපොළෙන් දේශීය සංචාරක ගමනාන්ත රැසකට පහසුවෙන් ළඟා විය හැකි වීම හේතුවෙන් ශ්‍රී ලංකාවේ සංචාරක කර්මාන්ත ප්‍රවර්ධනය සඳහාද එය වැදගත් භූමිකාවක් ඉටු කරයි.

එසේම බණ්ඩාරනායක ජාත්‍යන්තර ගුවන්තොටුපොළේ පවතින අධික තදබදයට විකල්පයක් ලෙස මත්තල ගුවන් තොටුපොළ උපායමාර්ගික වශයෙන්ද විශේෂ වැදගත්කමක් දරයි.

මහජන මුදල් බිලියන ගණනක් වැය කර ඉදිකර අභාවයට යාමට ඉඩ හැර තිබූ මත්තල රාජපක්ෂ ජාත්‍යන්තර ගුවන්තොටුපොළ 2025 වසරේදී වාර්තාගත ගුවන් මගී පැමිණීමක් වාර්තා කිරීම, ගුවන්තොටුපොළ පිළිබඳ නව බලාපොරොත්තු නංවන වැදගත් සන්ධිස්ථානයක් බවද වාර්තා වේ.

නුවරඑළියත් Agoda ගමනාන්ත ලැයිස්තුවට….

ගෝලීය ඩිජිටල් සංචාරක වෙබ් අඩවියක් වන Agoda වෙබ් අඩවිය මේ වසර සඳහා නම් කළ ”හොඳම ආසියානු කඳුකර ගමනාන්ත ලැයිස්තුවට” ශ්‍රී ලංකාවේ මධ්‍යම කඳුකරයේ පිහිටි නුවරඑළියත් ඇතුළත් කර තිබේ.

මිලියන සංඛ්‍යාත පිරිසක් පරිශීලනය කරන Agoda වෙබ් අඩවිය, ලෝකයේ විශාලතම සංචාරක වෙබ් අඩවි අතරින් එකකි.

ඔවුන් එමගින් නුවරඑළිය හඳුන්වාදී ඇත්තේ පුංචි එංගලන්තය ලෙසය.

සෞම්‍ය කාලගුණයක් ඇති නුවරඑළිය උසස් තත්ත්වයෙන් යුතු තේ වගාකිරීම සම්බන්ධව කීර්තියක් උසුලයි.

එහි හරිත පැහැ තේ වගාවන් සහ යටත්විජිත කාලයට අයත් ගොඩනැගිලි අතර සංචාරය කිරීම තුළින් සංචාරකයින්ට වඩාත් විනෝදාත්මක අත්දැකීමක් විඳගත හැකි බව Agoda වෙබ් අඩවිය පෙන්වා දී ඇත.

Agoda කඳුකර ගමනාන්ත ලැයිස්තුවට නුවරඑළිය නගරයට අමතරව ඉන්දියාවේ ශිම්ලා කලාපයත්, එරට මුන්නාර් කඳුකරයත්, මැලේසියාවේ කැමරූන් උස් කඳුකරයත් ඇතුළත් වේ.

එමෙන්ම ඒ අතරට වියට්නාමයේ සපා කඳුකරය , ප්‍රංශ යටත්විජිත ආභාසය ලත් ඩලාත් , ඉන්දුනීසියාවේ බන්ඩුන් කලාපය මෙන්ම භූතානයේ තිම්පු පුරවරයත් ඇතුළත්ව ඇත.

භාෂා 39කින් සේවා සපයන Agoda වෙබ් අඩවිය ඔස්සේ ලැයිස්තුගත කර ඇති හෝටල් සහ සංචාරක නවාතැන් පොළ සංඛ්‍යාව මිලියන 6කට අධිකය.

ජනපති හෙට මහනුවරට….

දිට්වා සුළි කුණාටුවෙන් මහනුවර දිස්ත්‍රික්කයේ පූර්ණ හා අර්ධ නිවාස හානි සිදු වූ පුද්ගලයන් වෙනුවෙන් නව නිවාස ඉදිකර දීමේ වැඩසටහන ආරම්භ කිරීම, වන්දි ප්‍රදානය කිරීම සහ සංවර්ධන ව්‍යාපෘති කිහිපයක කටයුතු ඇරඹීම ජනාධිපති අනුර කුමාර දිසානායක මහතාගේ ප්‍රධානත්වයෙන් හෙට (06) මහනුවරදී සිදු කිරීමට නියමිතය.

ඒ අනුව, දිට්වා සුළි කුණාටුවෙන් පීඩාවට පත් කුණ්ඩසාලේ, මැදදුම්බර, පාතදුම්බර සහ පන්විල ප්‍රාදේශීය ලේකම් කොට්ඨාසවල කර්මාන්තකරුවන්ට මෙන්ම පූර්ණ හා අර්ධ වශයෙන් නිවාස හානි සිදු වූ පවුල් සඳහා වන්දි ප්‍රදානය කිරීමේ උත්සවය හෙට පෙරවරු 9.00ට කුණ්ඩසාලේ මධ්‍යම පළාත් සභා ශ්‍රවණාගාරයේදී පැවැත්වේ.

දිට්වා සුළි කුණාටුවෙන් තම කර්මාන්ත ස්ථාන හෝ යන්ත්‍රෝපකරණ ආදියට හානි සිදු වූ පුද්ගලයන්ට ව්‍යාපාර නැවත ආරම්භ කිරීම සඳහා වන්දි මුදලක් ලෙස රුපියල් ලක්ෂ 02 බැගින් මෙහිදී ලබා දීමට නියමිතය.

කුඩා, මධ්‍යම හෝ මහා පරිමාණ වශයෙන් භේදයකින් තොරව ලියාපදිංචි කර ඇති සියලු ව්‍යාපාර සඳහා මෙම මූල්‍ය ප්‍රදානය ජනාධිපතිවරයාගේ උපදෙස් පරිදි සිදු කෙරේ.

එමෙන්ම, මහනුවර දිස්ත්‍රික්කයේ පූර්ණ නිවාස හානි වූ පවුල් සඳහා නව නිවසක් ඉදිකර ගැනීම වෙනුවෙන් ලබා දීමට නියමිත රුපියල් ලක්ෂ 50ක මුදලින් ප්‍රථම වාරිකය ලෙස රුපියල් ලක්ෂ 20 බැගින් චෙක්පත් ප්‍රදානය කිරීමද මෙහිදී සිදු කෙරේ.

තමන්ටම හිමි ඉඩමක හෝ රජය විසින් ලබා දෙන ඉඩමක නිවස ඉදිකරන පුද්ගලයන් මෙම යෝජනා ක්‍රමයට අයත් වේ.

දිට්වා සුළි කුණාටුව හේතුවෙන් පූර්ණ නිවාස හානි වූ සහ නාය යෑම් අධි අවදානම් ලෙස හඳුනාගෙන ඇති පවුල් නැවත පදිංචි කිරීම සඳහා ඉඩම් ප්‍රදානය සහ වන්දි ලබා දීම හෙට (06) පස්වරුවේ නියංගොඩ පාසල් ක්‍රීඩා පිටියේදී ජනාධිපතිවරයාගේ ප්‍රධානත්වයෙන් සිදු කිරීමට නියමිතය.

එමෙන්ම, නිවාස අර්ධ හානි වූ පවුල් සඳහා කඩිනම් සහන සැලසීමේ අරමුණින් වන්දි මුදල් ප්‍රදානය කිරීමද මෙහිදී සිදු කෙරේ. නව නිවාස ඉදිකිරීමේ වැඩසටහනට සමගාමීව නව නිවසක ඉදිකිරීම් ආරම්භ කිරීමේ අවස්ථාවටද ජනාධිපතිවරයා සහභාගී වීමට නියමිතය.

මේ අතර, මහනුවර – යාපනය ප්‍රධාන මාර්ගයේ (A-009) මහයියාව උමං මාර්ගය ඉදිකිරීමේ කටයුතුද හෙට පෙරවරුවේ ජනාධිපති අනුර කුමාර දිසානායක මහතාගේ ප්‍රධානත්වයෙන් ආරම්භ කිරීමට නියමිතය.

එසේම, දිගු කාලයක් ඉදිකිරීම් නවතා තිබූ ගැටඹේ ගුවන් පාලම ඉදිකිරීමේ කටයුතු නැවත ආරම්භ කිරීමද හෙට පෙරවරුවේ ජනාධිපතිවරයාගේ ප්‍රධානත්වයෙන් සිදු කිරීමට නියමිත බව ජනාධිපති මාධ්‍ය අංශය පවසයි

නව විගණකාධිපති, කථානායක ඉදිරියේ රහස්‍යතාව පිළිබඳ දිවුරුම ලබාදෙයි…..

නව විගණාකාධිපති ලෙසින් තේරී පත්වූ සමුදිකා ජයරත්න මහත්මිය අද (5) පාර්ලිමේන්තුවේදී කථානායක වෛද්‍ය ජගත් වික්‍රමරත්න මහතා ඉදිරියේ රහස්‍යතාව පිළිබඳ දිවුරුම ලබා දුන්නාය.

2018 අංක 19 දරන ජාතික විගණන පනතේ 9 වැනි වගන්තිය ප්‍රකාරව ජාතික විගණන කාර්යාලයේ විගණකාධිපති සහ විගණන සේවා කොමිෂන් සභාවේ සභාපති ලෙස ඇය මෙසේ රහස්‍යතාව පිළිබඳ දිවුරුම ලබාදීම සිදුවිය.

මෙරට 42 වැනි විගණකාධිපති ලෙස පත්වූ ඇය එම ධුරයට පත් ප්‍රථම කාන්තාව වේ.

පාර්ලිමේන්තුවේ මහලේකම් කුෂානි රෝහණදීර මහත්මිය ඇතුළු නිලධාරීහු පිරිසක් ද මෙම අවස්ථාවට එක්ව සිටියහ.

ගණේමුල්ල සංජීව ඝාතන සිද්ධියේ නීතිඥවරිය ගැන හෙළිවූ අලුත්ම කරුණු…..

ගණේමුල්ල සංජීව ඝාතන සිද්ධියට ආධාර අනුබල දුන්නේ යැයි සැකපිට අත්අඩංගුවට ගෙන රඳවාගෙන සිටින තමරා කුමාරි අබේරත්න නමැති නීතිඥවරිය සම්බන්ධයෙන් අනාවරණය කරගත් කරුණු කිහිපයක් අපරාධ පරීක්ෂණ දෙපාර්තමේන්තුව විසින් අද (5) අධිකරණයට දැනුම් දී තිබේ.

ඇය සම්බන්ධයෙන් වන පැමිණිල්ල කොළඹ ප්‍රධාන මහෙස්ත්‍රාත් අසංග එස්. බෝදරගම මහතා හමුවේ කැඳවනු ලැබූ අවස්ථාවේදී මෙම දැනුම්දීම සිදුකර ඇත.

ඒ අනුව විමර්ශන නිලධාරීන් අධිකරණයට දැනුම්දී ඇත්තේ, ඇය අත්අඩංගුවට ගනු ලැබූ අවස්ථාවේදී පොලිස් භාරයට ගනු ලැබූ රුපියල් කෝටි දෙක හමාරක් පමණ වටිනාකමකින් යුත් හොන්ඩා වෙසල් වර්ගයේ මෝටර් රථය වෙනත් අයෙකුගේ නමින් තිබුණද, එය එම නීතිඥවරියට අයත් වාහනයක් බවය.

එම රථය විල්ප්‍රඩ් දිසානායක යන අයගේ නමින් තිබුණ ද, ඔහු විසින් ලබාදී ඇති ප්‍රකාශවලට අනුව අදාළ රථය මෙම නිතිඥවරිය ඇයගේ මුදල්වලින් මිලදී ගෙන ඇති බවට විමර්ශනවලදී කරුණු අනාවරණය වී ඇත.

සැකකාර නීතිඥවරියට එම වාහනය මිලදී ගැනීම සඳහා මුදල් යොදා ඇත්තේ කුමන ආකාරයෙන්ද යන කරුණ පිළිබඳ විමර්ශන සිදු කරන බව දැනුම්දී ඇති අපරාධ පරීක්‍ෂණ දෙපාර්තමේන්තුවේ නිලධාරින්, ඇයගේ බැංකු ගිණුම්වල සංසරණය වී ඇති මුදල් ගැන විමර්ශන සිදු කරන බවද මෙහිදී අධිකරණයට දැනුම් දී ඇත.

මෙම සැකකාර නීතිඥවරිය ත්‍රස්තවාදය වැළැක්වීමේ පනත යටතේ ලබාගත් රැඳවුම් නියෝග මත රඳවාගෙන විමර්ශන සිදු කරන බවත් අදාළ නිලධාරීන් අධිකරණයට වැඩිදුරටත් කරුණු දක්වා තිබේ.

ගනේමුල්ල සංජීව ඝාතනය සිදුකළ බව කියන වෙඩික්කරුට මෙම නීතිඥවරිය විසින් ආධාර අනුබල දී ඇතැයි පැවසූ අපරාධ පරීක්ෂණ දෙපාර්තමේන්තුවේ නිලධාරීන්, වෙඩික්කරුට අවශ්‍ය ටයි පටි 2ක්, නීතිඥවරුන්ගේ වාහනවල භාවිතා කරන ලාංඡනය සටහන්වූ ස්ටිකරයක්, දණ්ඩ නීති සංග්‍රහය සහ අපරාධ නඩු විධාන සංග්‍රහය යන ග්‍රන්ථ 2ක්, නීතිඥ හැදුනුම්පතක් සකස් කිරීමට අවශ්‍ය ඡායාරූප ආදිය ලබාදී තිබෙන බවටක් කරුණු අනාවරණය වී ඇති බව වැඩිදුරටත් කරුණු දක්වා ඇත.