Category: news_sub

ගල්අඟුරු වාර්තාවේ දත්ත වෙනස් කිරීමට බලපෑම්?

ප්‍රමිතියෙන් තොර බවට චෝදනා එල්වන ගල්අඟුරු තොගවල ගුණාත්මකභාවය පිරික්සන පරීක්ෂණ වාර්තාවේ දත්ත වෙනස් කිරීමට ආණ්ඩුව බලපෑම් එල්ල කිරීම, මෙතෙක් එම වාර්තාව නිකුත් නොකිරීමට හේතුව බවට පාර්ශ්ව කිහිපයක් රජයට චෝදනා කරයි.

මේ අතර නොරොච්චෝලේ බලාගාරය සම්බන්ධයෙන් ලංකා විදුලිබල මණ්ඩලය අද (19) පැවැත්වීමට නියමිතව තිබූ ප්‍රවෘත්ති සාකච්ඡාවක් ද එම මණ්ඩලය අවලංගු කර තිබුණි.

එම මණ්ඩලයේ අභ්‍යන්තර ආරංචි මාර්ග සඳහන් කළේ එම ප්‍රවෘත්ති සාකච්ඡාවේදී මෙම ගල් අඟුරු අර්බුදය සම්බන්ධයෙන්ද කරුණු දැක්වීමට නියමිතව තිබූ බවය.

නොරොච්චෝලේ ලක්විජය බලාගාරය සඳහා ප්‍රමිතියෙන් තොර ගල්අඟුරු ගෙන්වීමෙන් රුපියල් කෝටි දහසකට ආසන්න පාඩුවක් සිදුව ඇති බවට ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රි ඩී.වී.චානක මහතා පසුගියදා පාරිලිමේන්තුවේදී ප්‍රකාශ කළේය.

මේ ප්‍රකාශයත් සමඟ රට තුළ ඇතිවූයේ ආන්දෝලනාත්මක තත්ත්වයකි.

කෙසේ වෙතත් බලශක්ති අමාත්‍යාංශය පසුගියදා නිවේදනයක් නිකුත් කරමින් පැවසුවේ ගොඩබෑම් වරායේ තත්ත්ව පරීක්ෂණ වාර්තාව මෙතෙක් නිකුත් වී නොමැති නිසා ගල්අඟුරුවල ගුණාත්මකභාවය පිළිබඳ නිවැරදි අදහසක් පළ කිරීමට නොහැකි බවය.

එසේම ගිවිසුමට අනුව ගල්අඟුරුවල ගුණාත්මකභාවය පහත මට්ටමක ඇත්නම් දඩමුදල් අයකරන බවත් එම නිවේදනයේ දැක් වේ.

හෘද සැත්කම් සඳහා පැමිණෙන රෝගීන්ගේ ශීඝ්‍ර වර්ධනයක්…..

හෘද සැත්කම් සඳහා පැමිණෙන රෝගීන්ගේ ශීඝ්‍ර වර්ධනයක් නිරීක්ෂණය වන බව මෙරට හෘද, උරස් ශල්‍ය වෛද්‍යවරුන්ගේ සංගමය පවසයි.

එහි ලේකම් විශේෂඥ ශෛල්‍ය වෛද්‍ය නාලක දිසානායක මහතා අද (14) පැවති ප්‍රවෘත්ති සාකච්ඡාවකදී සඳහන් කළේ, ඒ අතරින් සැලකියු යුතු පිරිසක් තරුණ ප්‍රජාව වන බවය.

එහිදී වැඩිදුරටත් අදහස් දැක්වූ විශේෂඥ ශෛල්‍ය වෛද්‍ය නාලක දිසානායක මහතා,

‍”ලෝකේ වැඩිහිටියන්ගේ මරණවලින් බහුතරයක් සිදුවන්නේ හෘදය වස්තුව ආශ්‍රිතව සිදුවන්නාවූ හෘදයාබාධවලින්. හෘදයාබාධ ඇතිවන්නේ කිරීටක ධමනිවල අවහිරතාවලින්.  කිරීටක ධමනිවල සංකීර්ණ අවහිරතාවලට තියෙන මූලික විසඳුම හෘද ශල්‍යකර්මයක්. මේකේ නම බයිපාස් සැත්කම. දැන් බයිපාස් සැත්කම් සඳහා පැමිණෙන රෝගීන්ගේ ගොඩාක් වැඩි වෙලා තියෙනවා. තරුණ කට්ටියට වැළඳෙන ප්‍රමාණය ගොඩක් වැඩි වෙලා තියෙනවා. ඉස්සර අපි දැක්කොත් අවුරුදු 60-70 වයසේ අය තමා එන්නේ. දැන් අවුරුදු 25-30 සිට කට්ටිය එනවා. ශල්‍යකර්ම කරන්න අපිට ලොකු පොරොත්තු ලේඛණයක් තියෙනවා. ශ්‍රී ලංකාවේ සියලුම වර්ගවල බයිපාස් සැත්කම් සිදුකරනු ලබනවා. අපිට ගැලපෙනම දේ මෙවැනි රෝගී තත්ත්වයන් වළක්වා ගැනීම. ඒ සඳහා ශාරීරික ව්‍යායාම කිරීම, නිවැරදි ආහාර රටාව, මානසික ආතතිය පාලනය කර ගැනීම, රුධිරයේ කොලොස්ටරෝල් පාලනය කර ගැනීම බොහෝ වැදගත් වෙනවා.”

ඊශ්‍රායලයේ සේවය කරන ශ්‍රී ලාංකිකයින්ට දැනුම්දීමක්….

මැදපෙරදිග කලාපයේ වර්ධනය වන නොසන්සුන්තාවය හේතුවෙන් ඊශ්‍රායලයේ සේවය කරන ශ්‍රී ලාංකිකයින්ට උපදෙස් මාලාවක් එරට ශ්‍රී ලංකා තානාපති කාර්යාලය මඟින් නිකුත් කර තිබේ.

මාධ්‍ය සහ ඇතැම් කණ්ඩායම් විසින් පතුරුවන වැරදි තොරතුරු හේතුවෙන් ඊශ්‍රායලයේ සිටින පිරිස් ආරක්ෂාව පිළිබඳව අනිසි බියක් ඇතිකරගත් යුතු නැති බවද ඊශ්‍රායල හමුදාව පවතින ඕනෑම තත්ත්වයක් පාලනය කිරීමට කටයුතු කරනු ඇති බවද ශ්‍රී ලංකා තානාපති කාර්යාලය වැඩිදුරටත් නිවේදනය කරයි.

එබැවින් යම් හෙයකින් හදිසි මිසයිල ප්‍රහාරයක් හෝ ත්‍රස්තවාදී ක්‍රියාවන් ඇතිවුවහොත් පහත දැක්වෙන ක්‍රියාමාර්ග අනුගමනය කරන ලෙස ද ඔවුන්ට දැනුම්දී ඇත.

2025 ජුනි මස එල්ල කරන ලද ඉරාන මිසයිල ප්‍රහාරවලින් කිසිදු ශ්‍රී ලාංකිකයෙක් ජීවිතක්ෂයට පත් නොවුණේ, ඊශ්‍රයිල් ආරක්ෂක අංශ හා තත්පති කාර්යාලය නිරන්තරයෙන් සිදුකරන දැනුවත් කිරීම් මෙන්ම හදිසි සයිරන් නාදයන් සමඟ සියලුදෙනාම පාහේ තමන් පදිංචි ස්ථානවල හෝ ඒ ආසන්නයේ ඇති ආරක්‍ෂිත නිවස්නවල රැකවරණය ලබා ගත්  බැවිනි.

* ඊශ්‍රායිල් මාධ්‍යය හා ආරක්ෂක අංශවලින් කරන දැනුවත් කිරීම පිළිබඳව විමසිලිමත් වන ලෙස දැනුම් දී තිබේ.

* අසනීප සඳහා බෙහෙත් භාවිතා කරන පිරිස් තම බෙහෙත් ඉතා ආසන්නයේ තබා ගත යුතුය.

*විදුලිය විසන්ධි වීමකින් හෝ අන්තර්ජාල පද්ධති අක්‍රීයවිමකින් දුරකථන ක්‍රියාවිරහිත වුවහොත් ශ්‍රී ලංකාවේ සිටින පිරිස අනවශ්‍ය ලෙස කලබල වීමෙන් වළකින්න.

*විවෘත ස්ථානවල සේවය කරන පිරිස් තම සේවා කාලය අතරතුර අනතුරු ඇඟවීමක් ලදහොත් තමන්ට ආසන්නයේ ම ඇති  ආරක්‍ෂිත ස්ථානයේ රැකවරණය ලබන්න.

* වාහනවල ගමන් කරන අවස්ථාවක හදිසි තත්ත්වයක් ඇති වුවහොත් තම වාහනය ඉන් බැස ළඟම ඇති ආවරණයක් කරා ගමන් කරන්න.

* ඉදිරි දිනවල ඊශ්‍රායලයට පැමිණීමට අපේක්ෂාකරන පිරිස පවතින තත්ත්වය පිළිබඳව විමසිලිමත්වන ලෙස දන්වමි.

* අද (15) දින තෛපොංගල් දිනය වෙනුවෙන් හා හෙට (16) මෙන්ම අනිද්දා (17) ඊශ්‍රායිල් රජයේ සතිඅන්ත නිවාඩු හේතුවෙන් තානාපති කාර්යාලය වසා තැබුව ද අනපේක්ෂිත හදිසි තත්ත්වයක් ඇතිවුවහොත් තානාපති කාර්යාලය හදිසි සේවා සඳහා විවෘත කර තබන බව කරුණාවෙන් සලකන්න.

මේ වන විට ඉන්දියන් රජය ඉරානයේ සිටින තම පුරවැසියන් හා ඉන්දියානු සම්භවයක් ඇති පිරිස වෙත නිවේදනය කරමින් හැකි ඉක්මනින් ඉරානයෙන් පිටවන ලෙස දැනුම්දී ඇත.

එයට අමතරව දෝහා රාජ්‍යයේ ඇමරිකානු යුද කඳවුරුවල සිටින පිරිස් ඒවායින් ඉවත් කරගැනීමට කටයුතු කරන බව ජාත්‍යන්තර  මාධ්‍ය වාර්තා කොට තිබේ. ඒ සමඟම කලාපය හරහා ගමන් කරන සමහර ගුවන් ගමන් අත්හිටවීමට හෝ සීමාකිරීමට කටයුතු සිදුවෙමින් පවතින බව පෙනී යන බවද ඊශ්‍රායලයේ ශ්‍රී ලංකා තානාපති කාර්යාලය සඳහන් කරයි.

ඊශ්‍රායල ආරක්ෂක හමුදා ඇතිවන ඕනෑම තත්ත්වයකට මුහුණදීමට සුදානම් අතර මිසයිල ආරක්ෂක පද්ධතිය මනා ලෙස සුදානම් කොට ඇති බවද වාර්තා වේ.

2025දී ඉලක්කය ඉක්මවා ගිය දේශීය ආදායම් නිලධාරීන්ට 2026දී ලැබුණු ඉලක්කය….

දේශීය ආදායම් දෙපාර්තමේන්තුව සඳහා මෙම වසර තුළ රුපියල් බිලියන 2402ක ආදායම් ඉලක්කයක් හිමිවී ඇති බව එහි කොමසාරිස් නන්දන කුමාර මහතා පවසයි.

ඔහු පවසන්නේ, දේශීය ආදායම් දෙපාර්තමේන්තුව සහ රේගු දෙපාර්තමේන්තුව ඒකාබද්ධව විගණන කටයුතු සිදුකිරීම සඳහා මේ වනවිට ගිවිසුමක් අත්සන් කර ඇති අතර එමගින් ලබාදී ඇති ඉලක්කය සම්පූර්ණ කරගැනීමට අපේක්ෂා කරන බවය.

පසුගිය වසරේදී දේශීය ආදායම් දෙපාර්තමේන්තුව සඳහා රුපියල් බිලියන 2202ක ඉලක්කයක් හිමිව තිබූ අතර එම ඉලක්කය පසු කරමින් රුපියල් බිලියන 2244ක ආදායමක් උපයා ගැනීමට හැකිවූ බවද දේශීය ආදායම් කොමසාරිස් නන්දන කුමාර මහතා පැවසීය.

මේ අතර මිලියන 12ක පිරිසකට මේ වන විට ‘ටින්‘ අංක නිකුත් කර ඇති බව ද දේශීය ආදායම් කොමසාරිස්වරයා එහිදී වැඩිදුරටත් සඳහන් කළේය.

“2005 වසරේදී දේශීය ආදායම් දෙපාර්තමේන්තුවට දුන්න ආදායම් ඉලක්කය වුණේ රුපියල් බිලියන 2202ක්. එම ආදායම් ඉලක්කය අදාළ වර්ෂයේදී සපුරා ගැනීමට හැකි වුණා. එහිදී අපිට පුළුවන් වුණා රුපියල් බිලියන 2244ක් එකතු කරගන්න.”

“එය දේශීය ආදායම් දෙපාර්තමේන්තුවට දුන්නු ඉලක්කය ඉක්මවා රු. බිලියන 42ක අතිරේක ආදායමක්. දේශීය ආදායම් දෙපාර්තමේන්තු ඉතිහාසයේ උපයාගත් වැඩිම ආදායම තමයි මේක. 2026 වසර සඳහා දී තිබෙන ඉලක්කය රුපියල් බිලියන 2402ක්.”

“මෙම ඉලක්කය ළඟා කරගන්න අපි බලාපොරොත්තුවෙන්නේ දේශීය ආදායම් කොමසාරිස් ජනරාල්වරයා සහ රේගු අධ්‍යක්ෂ ජනරාල්වරයා අත්සන් කරපු අවබෝධතා ගිවිසුමක් හරහා. ඒකාබද්ධව විගණන කටයුතු කරන්න මෙම ගිවිසුම අත්සන් කළා.”

“මේ වෙද්දී දේශීය ආදායම් දෙපාර්තමේන්තුව මිලියන 12කට TIN අංක ලබාදී තිබෙනවා. මිලියන 17ක් අපේක්ෂා කරනවා.”

කස්සප හිමි බන්ධනාගාරයෙන් දුන් දාන වේල ප්‍රතික්ෂේප කරයි….

රක්ෂිත බන්ධනාගාරගත කෙරුණු පූජ්‍ය බලංගොඩ කස්සප හිමියන්ට බන්ධනාගාරයෙන් දිවා ආහාරය සඳහා ලබාදෙන දාන වේල උන් වහන්සේ විසින් ප්‍රතික්ෂේප කර තිබෙන බව වාර්තා වෙයි.

ත්‍රිකුණාමලය කොටුව පාරේ පිහිටි ශ්‍රී සම්බුද්ධ ජයන්ති බෝධිරාජ විහාරයට අයත් භූමියේ බුද්ධ ප්‍රතිමාවක් තැන්පත් කිරීමේදී ඇතිවූ නොසන්සුන්කාරී සිදුවීමට අදාළව පූජ්‍ය බලංගොඩ කස්සප හිමියන් ඇතුළු ස්වාමින් වහන්සේ සිව්නමක් සහ තවත් සැකකරුවන් 05 දෙනෙකු රක්ෂිත බන්ධනාගාරගත කිරීමට ත්‍රිකුණාමලය මහේස්ත්‍රාත් අධිකරණය ඊයේ (14) නියෝග කර තිබුණි.

ත්‍රිකුණාමලය කොටුව පාරේ පිහිටි ශ්‍රී සම්බුද්ධ ජයන්ති බෝධිරාජ විහාර භූමියේ දහම් පාසල ඉදිකිරීම සඳහා මුල්ගල තැබීමෙන් පසු විහාරාධිපති හිමියන් හා දායක සභාව එම ස්ථානයේ බුද්ධ ප්‍රතිමාවක් තැන්පත් කිරීමට ඉකුත් නොවැම්බර් 16 වනදා පියවර ගෙන තිබුණි.

කෙසේවෙතත් අදාළ ඉඩමේ ඉදිකිරීම් අනවසර බවට වෙරළ සංරක්ෂණ දෙපාර්තමේන්තුව පොලිසියට පැමිණිල්ලක් කර ඇතැයි පොලිසිය ස්වාමීන් වහන්සේ දැනුවත් කර තිබූ අතර පසුව එදින රාත්‍රීයේ බුද්ධ ප්‍රතිමාව එම භූමියෙන් ඉවත්කිරීමට පොලිසිය කටයුතු කළේය.

එහිදී නොසන්සුන් තත්ත්වයක් හටගෙන තිබූ අතර පහරකෑමට ලක්වූ බව කියමින් ස්වාමීන්වහන්සේ දෙනමක් රෝහල්ගත කිරීමට පියවර ගෙන තිබුණි.

ඇතිවූ විරෝධතාව මත පසු දිනම නැවතත් බුද්ධ ප්‍රතිමාව එම ස්ථානයේම තැන්පත් කිරීමට පොලිසිය පියවර ගත්තේය.

මෙවන් පසුබිමක ත්‍රිකුණාමලය ශ්‍රී සම්බුද්ධ ජයන්ති බෝධිරාජ විහාරයේ කොටසක් කඩා ඉවත් කරන්නැයි වෙරළ සංරක්ෂණ දෙපාර්තමේන්තුව නිකුත් කර ඇති නියෝගයක් ක්‍රියාත්මක වීම වළක්වන ආඥාවක් නිකුත් කරන ලෙස අභියාචනාධිකරණය හමුවේ ගොනුකර තිබූ පෙත්සමක් ඉකුත් නොවැම්බර් 19 වනදා සලකා බැලුණි.

එහිදී ත්‍රිකුණාමලය ශ්‍රී සම්බුද්ධ ජයන්ති බෝධිරාජ විහාරයේ ගැටලුව සාමකාමී ලෙස විසඳාගන්නැයි අභියාචනාධිකරණය අදාළ පාර්ශ්ව වෙත දැනුම්දුනි.

මෙවැනි පසුබිමක ත්‍රිකුණාමලය සම්බුද්ධ ජයන්ති විහාරස්ථානයේ ඇතිවූ ගැටලුකාරී සිදුවීම සම්බන්ධයෙන් වූ නඩුව ත්‍රිකුණාමලය මහේස්ත්‍රාත් අධිකරණයේදී ඊයේ යළි කැඳවා තිබුණි.

එහිදී අදාළ නඩුවේ සැකකරුවන් ලෙස නම්කර සිටි 11 දෙනා අතරින් 09 දෙනෙකු අධිකරණය හමුවේ පෙනී සිටියේය.

එම පිරිස අතරට ත්‍රිකුණාමලය කොටුව පාරේ පිහිටි ශ්‍රී සම්බුද්ධ ජයන්ති බෝධිරාජ විහාරස්ථානයේ විහාරාධිපති පූජ්‍ය ත්‍රිකුණාමලය කල්‍යාණවංශ තිස්ස හිමියන්, පූජ්‍ය බලංගොඩ කස්සප හිමියන්, පූජ්‍ය ත්‍රිකුණාමලය සුඛිතවංශ තිස්ස හිමියන් සහ පූජ්‍ය නන්ද හිමියන්ද ඇතුළත් විය.

මෙහිදී සිදුවීම සම්බන්ධයෙන් ත්‍රිකුණාමලය වරාය පොලිසිය අධිකරණයට වැඩිදුර වාර්තාවක් ඉදිරිපත් කරමින් සැකකරුවන්ට එරෙහිව වෙරළ සංරක්ෂණ පනත උල්ලංඝනය කිරීම සහ අනවසර ඉදිකිරීම් යන චෝදනා යටතේ කරුණු දක්වා තිබුණි.

ඉදිරිපත් වූ කරුණු සලකා බැලූ ත්‍රිකුණාමලය මහේස්ත්‍රාත්වරයා පූජ්‍ය ත්‍රිකුණාමලය කල්‍යාණවංශ තිස්ස හිමියන් සහ පූජ්‍ය බලංගොඩ කස්සප හිමියන් ඇතුළු ස්වාමින් වහන්සේ සිව් නමද, සෙසු සැකකරුවන් පස්දෙනාද ජනවාරි 19 වනදා දක්වා රක්ෂිත බන්ධනාගාරගත කිරීමට නියෝග කළේය.

වැඩි මිලට සහල් අලෙවි කළ වෙළඳුන් තිදෙනෙකුට වැඩ වරදියි…..

පාලන මිල ඉක්මවා සහල් අලෙවි කළ වෙළඳුන් තිදෙනෙකුට රුපියල් ලක්ෂය බැගින් වූ ලක්ෂ තුනක දඩ මුදලක් වැලිසර මහේස්ත්‍රාත් අධිකරණය නියම කර තිබේ.

ඒ, පාරිභෝගික කටයුතු පිළිබඳ අධිකාරිය විසින් පැවරූ නඩු සඳහා ඔවුන් වරද පිළිගැනීමෙන් අනතුරුවය.

ජා-ඇල සහ කඳාන ප්‍රදේශයේ වෙළඳුන් විසින් සහල් රුපියල් 308, 275 සහ රුපියල් 280කට අලෙවි කිරීමට කටයුතු කර තිබූ බව එම අධිකාරිය සඳහන් කරයි.

මධ්‍යසාර භාවිතයෙන් දිනකට මියයන ප්‍රමාණය හෙළිදරව්වක්…..

මෙරට දිනකදි මධ්‍යසාර භාවිතයෙන් පුද්ගලයින් 50 දෙනෙකු මිය යන බව ඇඩික් ආයතනය පවසයි.

එම ආයතනයේ විධායක අධ්‍යක්ෂක සම්පත් ද සේරම් මහතා පැවසුවේ එම ප්‍රමාණය නීති විරෝධී සහ නීත්‍යානුකූල මධ්‍යසාර දෙකෙහිම එකතුවක් වන බවය.

මෙරට සමස්ත ජනගහනයෙන් 20%කට අඩු ප්‍රමාණයක් තවමත් මධ්‍යසාර භාවිත කරන බවත් ඉන් අවුරුදු 15ට වැඩි පිරිමි ජනගහනයෙන් 34.8%ක් සහ කාන්තාවන් 0.5%ක් නියෝජනය වන බවත් ඒ මහතා පෙන්වා දුන්නේය.

එමෙන්ම නීතිවිරෝධී මධ්‍යසාර භාවිතයද ඉහළ ගොස් ඇති බවත් ජන හා සංඛ්‍යාලේඛණ දෙපාර්තමේන්තුවේ තොරතුරු අනුව එය 10%ක අගයක් ගන්නා බවද ඒ මහතා සඳහන් කළේය.

එහිදී වැඩිදුරටත් අදහස් දැක්වූ සම්පත් ද සේරම් මහතා,

“අපේ රටේ මධ්‍යසාර භාවිත කරන ප්‍රමාණය ගත්තොත් තාමත් තාමත් 20%කට අඩු ප්‍රමාණයක් තමයි සමස්ත ජනගහනයෙන් මධ්‍යසාර භාවිත කරන්නේ.  එකෙන් අවුරුදු 15ට වැඩි පිරිමි ජනගහනය ගත්තොත් 34.8%ක් මධ්‍යසාර භාවිත කරනවා කාන්තාවන් තාමත් ඉතාම හොඳ තැනක තියෙන්නේ 0‍.5%යි. විශේෂයෙන් මේ කාලයේදී මතුවෙච්ච කාරණයක් තමයි නීතිවිරෝධී මධ්‍යසාර භාවිතය ඉතාම ඉහළ ගිහිල්ලා කියන කාරණය. ජන හා සංඛ්‍යාලේඛණ දෙපාර්තමේන්තුවේ තොරතුරු අනුව 10%ක ප්‍රමාණයක් තමයි නීති විරෝධී මධ්‍යසාර භාවිත කරන්නේ. අපි දැක්කා නීතිවිරෝධී මධ්‍යසාර භාවිත කරලා 5-6ක් මිය යනවා. හැබැයි අද දවසේ මිනිස්සු 50ක් මධ්‍යසාර මිනිස්සු මරලා දානවා. ඒක නීත්‍යානුකූල, නීති විරෝධී දෙකම එකතු වෙලා මිනිස්සු 50 දෙනෙක් මරලා දානවා හැබැයි අපි කවුරුත් ඒ ගැන කතා කරන්නේ නෑ.”

වත්මන් පාලනය තුළ ජාතිවාදී ගැටුම් අවම බව ජනපති තෛපොංගල් දින සැමරුමේදී කියයි…..

වත්මන් ආණ්ඩුව බලයට පත්වීමෙන් පසු ගෙවුණු කාලය ඉතිහාසයේ ජාතිවාදී ගැටුම් අඩුම හා ජාතිවාදය පෝෂණය කරන ව්‍යාපාර දුර්වලම වූ කාලය බව ජනාධිපති අනුර කුමාර දිසානායක මහතා පවසයි.

ජනාධිපතිවරයා මේ බව ප්‍රකාශ කළේ, යාපනය වේලනෛහි පැවති තෛපොංගල් උත්සවයක් අමතමිනි.

“දෙමළ ජනතාවගේ වැදගත්ම සංස්කෘතික දිනය වන තෛපොංගල් දිනයේදී මටත් ඔබ සමඟ එක් වීමට ලැබීම භාග්‍යයක් කොට  සලකනවා. 

ඒ වගේම දෙමළ ජනතාවගේ සංස්කෘතිය අනුව අද තමයි නව වසර උදා වන්නේ. නව වසරකින් අපි සියලුදෙනාට නව ප්‍රාර්ථනා, නව බලාපොරොත්තු ඇති වෙනවා. විශේෂයෙන් ජනතාව ලෙස ඔබට විශාල බලාපොරොත්තු සහ අපේක්ෂාවන් ඇති. 

ඒ වගේම රටක් ලෙස අපට නව බලාපොරොත්තු සහ අපේක්ෂාවන් තිබෙනවා. අපේ අපේක්ෂාව සහ බලාපොරොත්තුව වන්නේ තිබෙනවාට වඩා සෑම අතින්ම දියුණු පොහොසත් රටක් නිර්මාණය කිරීමයි. 

අපි පොහොසත් රටක් කියන්නේ ධනයෙන් ඉදිකිරීම්වලින් පමණක් පොහොසත් රටක් නොවෙයි. ඊට වඩා විශාල අංශ ගණනාවකින් පොහොසත් රටක් නිර්මාණය කළ යුතුයි. අපි බලයට පත්ව දැන් අවුරුද්දකට වඩා වැඩි කාලයක් ගතව තිබෙනවා. එම වසර ඉතිහාසයේ ජාතිවාදී ගැටුම් අඩුම, ජාතිවාදය පෝෂණය කරන ව්‍යාපාර දුර්වල වූ සහ ජාතික සමගිය වෙනුවෙන් පොරබැදී වසරක්. වෙනදා අපේ රටේ බොහෝ ජාතිවාදී ගැටුම්, ජාතිවාදී ප්‍රවණතා පැන නගිනවා. අපිට අවශ්‍ය ජාතිවාදයෙන් තොර ජාතික සමඟිය පිරුණු පොහොසත් රටක්. 

කුමන තැනක ඉපදුණත්, කුමන භාෂාව කතා කළත්, කුමන ආගමක් ඇදහුවත් මේ සෑම කෙනෙකුටම අපේ රටේ අභිමානවත් පුරවැසියෙක් ලෙස, අයිතින් සමඟ ජීවත්වීමේ වටපිටාව සකස් කිරීම අපගේ අපේක්ෂාවයි. ඒ වගේම අප අතර විවිධ සංස්කෘතීන් තිබෙනවා. රටක් ලස්සන වීමට සහ ජනතාව අතර විශ්වාසය ඇති වීමට සෑම සංස්කෘතියකටම ගරු කිරීම සහ පිළිගැනීම ඉතා වැදගත්. අපි එවන් රටක් ගොඩනැගිය යුතුයි. එය අපේ අපේක්ෂාව බවට පත්ව තිබෙනවා. 

ඒ වගේම ආර්ථික වශයෙන් පීඩාවට පත්ව සිටින ජනතාවට මීට වඩා හොඳ ජීවිතයක් අපි උරුම කර දිය යුතුයි. විශේෂයෙන් හොඳ නිවසක් ලබා දීම, දරුවන්ට හොඳ අධ්‍යාපනයක් ලබා දීම, නිරෝගී සම්පන්න ජීවිතයක් වෙනුවෙන් හොඳ සෞඛ්‍ය සේවාවක් ස්ථාපිත කිරීම, කෘෂිකර්මාන්තය, ධීවර කර්මාන්තය දියුණු කර හොඳ ආදායම් මාර්ගයක් නිර්මාණය කිරීම, තරුණ තරුණියන්ට හොඳ රැකියා අවස්ථා නිර්මාණය කිරීම ආණ්ඩුවක් ලෙස අප තුළ තිබෙන අපේක්ෂාව සහ බලාපොරොත්තුවයි.

මම දන්නවා මෙහි සිටින බොහෝ අය පසුගිය මහ මැතිවරණයේදී අප කෙරෙහි විශ්වාසය තැබුවා. මේ යාපනයේ දිස්ත්‍රික්කය ලංකාවේ පළමු වතාවට අපි ජයග්‍රහණය කළා. ඒ කියන්නේ ඔබ අප කෙරෙහි විශ්වාස තබා තිබෙනවා. මම ඔබට සහතික වෙනවා ඔබ අප කෙරෙහි තැබූ විශ්වාසය බිඳකින්වත් බිඳ වැටීමට ඉඩ නොතබා ජාතිවාදයෙන් තොර, ජාතික සමගිය පිරුණු රටක් නිර්මාණය කරනවා කියලා. ඔබේ දරුවන්ට හොඳ අනාගතයක් ගොඩනඟා දෙනවා. අපි කාටත් සතුටින් සිටිය හැකි රටක් අපි හදනවා. ඔබ සියලුදෙනාගේ අපේක්ෂාව එයයි. එම අපේක්ෂාව ඉටු කිරීම වෙනුවෙන් අපි නොපිරිහෙළා වගකීම් ඉටු කරන බවට මම ඔබට සහතික වෙනවා. 

මෙම තෛපොංගල් දිනයේදී අපි එක ප්‍රාර්ථනාවක් කරමු. අපි එක්ව සිටිමු. අපි  දරුවන් වෙනුවෙන් හොඳ රටක් හදමු. ඒ වෙනුවෙන් තිර අධිෂ්ඨානයෙන් යුතුව ඉදිරියට එන ලෙස සියලුදෙනාට ආරාධනා කරනවා.”

ප්‍රවීණ ගායන ශිල්පී රාජු බණ්ඩාර දිවි සැරිය නිම කරයි…..

ප්‍රවීණ ගායන ශිල්පී රාජු බණ්ඩාර මහතා අභාවප්‍රාප්ත වී තිබේ.

මියයන විට ඒ මහතා 65 වැනි වියේ පසුවිය.

මා ආදරෙයි මුළු ලොවටත් වඩා, කඳුලැලි දෑසේ, හද ගී පොතේ, රෝස මල් කුමාරී, රන් මලක්, රන් සීනු නාද, ඇතුළු ගීත රැසක් ගායනා කර ඇති ඒ මහතාගේ ගීත මෙරට ඉමහත් ප්‍රසිද්ධියට පත්විය.

Rebuilding Sri Lanka අරමුදලට මූල්‍ය පරිත්‍යාගයක්….

දිට්වා සුළි කුණාටුවෙන් විපතට පත් ජනතාවට සහන සැලසීමේ රජයේ ‘Rebuilding Sri Lanka’ අරමුදලට ලංකා ඛනිජ තෙල් නීතිගත සංස්ථාවේ සැපයුම්කරුවකු වන සිංගප්පූරුවේ ලියාපදිංචි සමාගමක් විසින් USD 10,000 ක මූල්‍යමය පරිත්‍යාගයක් සිදු කරනු ලැබීය.

දේශය ගොඩනැගීමට සහාය දක්වන ලෙස ලංකා ඛනිජ තෙල් නීතිගත සංස්ථාව ලොව පුරා වෙසෙන තම සැපයුම්කරුවන් ගෙන්  සිදු කළ ඉල්ලීමට ප්‍රතිචාරයක් වශයෙන් මෙම ආධාරය ශ්‍රී ලංකාව වෙත ප්‍රදානය කර ඇත.

ඊට අදාළ චෙක්පත ලංකා ඛනිජ තෙල් නීතිගත සංස්ථාවේ සභාපති ජනක රාජකරුණා සහ කලමණාකාර අධ්‍යක්ෂ ආචාර්ය මයුර නෙත්තිකුමාර යන මහත්වරු විසින් පසුගියදා ජනාධිපති ලේකම් ආචාර්ය නන්දික සනත් කුමානායක මහතා වෙත පිළිගන්වන ලදී.