ජාත්යන්තර මූල්ය අරමුදලේ නියෝජිත පිරිසක් මාර්තු 26වැනිදා ශ්රී ලංකාවට පැමිණෙ බව IMF සන්නිවේදන දෙපාර්තමේන්තුවේ අධ්යක්ෂ ජූලි කොසැක් අද (19) ප්රකාශ කළාය.
අදාළ නියෝජිත පිරිස අප්රේල් 9වැනිදා ශ්රී ලංකාව තුළ රැඳී සිටීමට නියමිතව ඇත.
ශ්රී ලංකාව සඳහා වන විස්තීර්ණ ණය වැඩසටහනේ 5වන හා 6වන සමාලෝචන සම්පූර්ණ කිරීම මෙහි ප්රධාන අරමුණ බව ජූලි කොසැක් මහත්මිය පවසයි.
ජාතික ඉන්ධන බලපත්ර පද්ධතිය සම්බන්ධ ගැටලු විසඳාගැනීමට නව ක්ෂණික සහාය සේවාවක් ආරම්භ කර ඇති බව ඩිජිටල් ආර්ථික අමාත්යාංශය දැනුම් දී තිබේ.
පාරිභෝගිකයින් ලියාපදිංචි වීමේදී හෝ පද්ධතිය භාවිතා කිරීමේදී මුහුණ දෙන තාක්ෂණික ගැටලු සහ බාධාවන් කඩිනමින් විසඳා දීම මෙහි අරමුණ බව සඳහන්ය.
ඒ අනුව, වාහන ලියාපදිංචි කිරීමේදී ඇතිවන ඕනෑම ගැටලුවක් සඳහා සහාය ලබා ගැනීමට 076 019 1919 යන අංකයට WhatsApp ඔස්සේ පණිවිඩයක් යොමු කළ හැකි බව සඳහන් වේ.
මෙම සේවාව හරහා පද්ධතිය භාවිතය පිළිබඳ මඟපෙන්වීම් සහ තාක්ෂණික සහාය ලබා දෙන අතර, වංචනික ක්රියාකාරකම් හෝ පද්ධතිය අවභාවිත කරන පුද්ගලයින් පිළිබඳ තොරතුරුද දැනුම් දීමට හැකි වේ.
එමෙන්ම, ඉන්ධන ලබා ගැනීම සඳහා ලියාපදිංචි වීමට රජය විසින් අනුමත කළ නිල වෙබ් අඩවිය https://fuelpass.gov.lk/ පමණක් භාවිත කරන ලෙසද ජනතාවට දැනුම් දී ඇත.
රට තුළ පවතින ඉන්ධන අර්බුදය හේතුවෙන් මහජන සෞඛ්ය පරීක්ෂකවරුන් දැඩි අපහසුතාවයකට පත්ව ඇති බව ශ්රී ලංකා මහජන සෞඛ්ය පරීක්ෂකවරුන්ගේ සංගමය පවසයි.
සෞඛ්ය අමාත්යවරයා වෙත ලිපියක් යොමුකරනිමින් එම සංගමය සඳහන් කරන්නේ, ක්ෂේත්ර මට්ටමේ රාජකාරි සිදුකරන මහජන සෞඛ්ය පරීක්ෂකවරුන් සඳහා විශේෂ ඉන්ධන කෝටාවක් වෙන් කර නොමැති බවය.
ඉන්ධන බෙදාහැරීම සඳහා ක්රියාත්මක කර ඇති QR ක්රමවේදය පිළිබඳව කෘතඥතාව පලකරන බවද මහජන සෞඛ්ය පරීක්ෂකවරුන්ගේ සංගමය පවසයි.
කෙසේ නමුත් ඔවුන් සිය ලිපියෙන් සඳහන් කරන්නේ, ලබාදෙන කුමන හෝ ඉන්ධන ප්රමාණයක් රස්තියාදුවකින් තොරව පෝලීම්වල නොසිට ප්රමුඛතාවයකින් ලබා ගැනීමට ක්රමවේදයක් නොමැතිවීම ඔවුන්ට ගැටලුවක් වී ඇති බවය.
මෙම තත්ත්වය හේතුවෙන් බෝවන රෝග විමර්ශන හා පාලන කටයුතු, වෙළෙඳසැල් පරීක්ෂා කිරීම, පාසල් සෞඛ්ය සේවා වැනි අත්යාවශ්ය රාජකාරි නියමිත කාලසීමාවන් තුළ සිදු කිරීමට නොහැකි වීමේ අවදානමක් පවතින බව සංගමය අවධාරණය කරයි.
මෙය වෘත්තීය සමිති ක්රියාමාර්ගයක් නොවන බව පෙන්වා දෙන එම සංගමය, ඉදිරියේදී මෙම තත්ත්වය හේතුවෙන් නිලධාරීන්ට පීඩනයක් හෝ දඩුවම් ක්රියාමාර්ග ගනු ලැබුවහොත් වෘත්තීය සමිති ක්රියාමාර්ගවලට යාමට සිදුවිය හැකි බවට එම ලිපියෙන් අනතුරු අඟවා තිබේ.
බලපත්ර නොමැතිව පෙට්රල් ලීටර 65ක් සන්තකයේ තබා ගනිමින් ලොරි රථයකින් ඉන්ධන ප්රවාහනය කළ පුද්ගලයකුට රුපියල් 2,500ක දඩයක් සහා මාස 2ක අනිවාර්යය සිරදඬුවමක් නියම කිරීමට ගල්කිස්ස මහෙස්ත්රාත් පසන් අමරසේන මහතා අද (19) නියෝග කළේය.
මෙලෙස අනිවාර්ය සිරදඬුවම් නියමව ඇත්තේ ගල්කිස්ස බඩෝවිට ප්රදේශයේ පදිංචිකරුවෙකුටය.
වැල්ලවත්ත ප්රදේශයේ ඉන්ධන පිරවුම්හලකින් ඉන්ධන තොඟයක් ලබා ගත් බවට වැල්ලවත්ත පොලීසියට ලද තොරතුරකට අනුව ඊයේ (18 ) රාත්රීයේදී අදාළ ඉන්ධන පිරවුම්හල අසලදී මෙම පුද්ගලයා වැල්ලවත්ත පොලීසිය විසින් අත්අඩංගුවට ගෙන ගල්කිස්ස මහේස්ත්රාත් අධිකරණයට ඉදිරිපත් කර තිබිණි.
අත්අඩංගුවට ගන්නා අවස්ථාවේ දී ලොරි රථයේ තිබී ඉන්ධන සහිත කෑන් 4ක් පොලිසිය විසින් සොයා ගෙන ඇත.
ඉන්ධන තොඟයේ මුළු වටිනාකම රුපියල් 20,000ක් පමණ බව සඳහන්ය
ද්රව පෙට්රෝලියම් ගෑස් (LPG) රැගත් නෞකා දෙකක් අද (18) උදෑසන උස්වැටකෙයියාව තල්දියවත්ත, ගෑස් ගොඩබාන බෝයාව වෙත පැමිණ තිබුණි.
“අද දෙරණ” වාර්තාකරු පැවසුවේ ඉන් ගෑස් ගොඩබෑමේ කටයුතු මේ වනවිට ආරම්භ කර ඇති බවය.
මේ අතර ඉන්ධන නෞකාවක් ද අද උදෑසන දිවයිනට පැමිණ තිබුණි.
මේ අතර ඊයේ (17) දිනයේ දී විශේෂ මාධ්ය හමුවක් අමතමින් ජනාධිපති අනුර කුමාර දිසානායක මහතා පවසා සිටියේ, මාර්තු මාසය තුළ ලිට්රෝ ගෑස් මෙට්රික්ටොන් 38,000ක් දැනටමත් රටට ගෙනවිත් ඇති බවය.
ඉදිරි දින දෙකක් ඇතුළත මෙට්රික් ටොන් 33,000ක් ගෑස් තොග රටට ලැබීමට නියමිත බව ද ජනාධිපතිවරයා එහිදී පැවසීය.
ඒ අනුව, රට තුළ ගෑස් සැපයුම ස්ථාවර කර ගැනීමට සහ පවතින අවශ්යතා සපුරාලීමට හැකි වනු ඇති බවද ජනාධිපතිවරයා වැඩිදුරටත් සඳහන් කළේය.
“අපිට මාර්තු මාසයේ ගෑස් අවශ්යතාව තිබුණේ මෙට්රික් ටොන් 33,000යි. එහෙත් පෞද්ගලික සමාගමක් ගෑස් සැපයුම අඩපණ කර තිබෙන නිසා මාර්තු මාසයට අපි 38,000ක් ඇනවුම් කළා. ඊට අවශ්ය වන ගෑස් තමයි අපේ ලිට්රෝ සමාගම ආනයනය කරන්නේ. ඒ මෙට්රික් ටොන් 38,000ම දැන් ලැබී තිබෙනවා.
සමහර ඒවා වෙළෙඳපොළට නිකුත් කර තිබෙනවා. සමහර ඒවා දේශීය ගබඩාවල තිබෙනවා. අනෙක් ඒවා මාලදිවයිනේ පාවෙන ගබඩාවල තැන්පත් කර තිබෙනවා. අපි තව ගෑස් නැවක් ඇනවුම් කර තිබෙනවා. ඒ අනුව හෙට හෝ අනිද්දා මෙට්රික් ටොන් 33,000ක ගෑස් නැවක් ලැබීමට නියමිතව තිබෙනවා. ඒ නිසා ගෑස් වෙළෙඳපොළෙහි අර්බුදයක් මතු වන්නේ නැහැ.
ඊළඟට ගෑස් සපයන්න තිබෙන්නේ අප්රේල් 21-23 කාලයේ. ඒ කාලයේදී ඊළඟ නැව ඔවුන් අපට ලබා දේවි කියල අපට විශ්වාසයක් තිබෙනවා. ගෑස් වෙළෙඳපොළේ අර්බුදයක් ඇති වීමේ අනතුර අඩුයි.”
ශ්රී ලංකාව තුළ දේශීය හා විදේශීය පුද්ගලයින් විසින් නිසි අවසරයකින් තොරව ඩ්රෝන යානා පියාසර කිරීම තහනම් බව ශ්රී ලංකා ගුවන් හමුදාව විසින් මහජනතාවට දැනුම් දී තිබේ.
ඒ අනුව, මීට පෙරද අධි ආරක්ෂිත කලාපයන් තුළ අවසර රහිතව ඩ්රෝන යානා ක්රියාත්මක කළ පුද්ගලයින්ට නීත්යානුකූල ක්රියාමාර්ග ගෙන ඇති බවද සඳහන් වේ.
එබැවින්, ශ්රී ලංකාව තුළ ඩ්රෝන යානා පියාසර කිරීමට අදහස් කරන සියලු පුද්ගලයින් අදාළ නීති හා රෙගුලාසි පිළිපදිමින්, නිසි අවසර ලබාගෙන පමණක් එම ක්රියාකාරකම් සිදුකරන ලෙස ශ්රී ලංකා ගුවන් හමුදාව අවධාරණය කරයි.
මෙම දැනුම්වත් කිරීම, ජාතික ආරක්ෂාව තහවුරු කිරීම සහ ඩ්රෝන යානා භාවිතාකරුවන්ට ඇතිවිය හැකි නීතිමය ගැටලු හා අපහසුතා වළක්වා ගැනීම අරමුණු කරගෙන සිදුකරනු බව ගුවන් හමුදාව වැඩිදුරටත් සඳහන් කරයි.
ජාතික ඉන්ධන බලපත්රය හෙවත් QR ඛේතය ලබා ගැනීම සදහා ලියාපදිංචි කිරීමට සහයක් ලෙස විශේෂ WhatsApp අංකයක් හඳුන්වාදීමට ඩිජිටල් ආර්ථික අමාත්යාංශය කටයුතු කර තිබේ.
ලිංයාපදිංචි වීමේදී ගැටලු පවතින පුද්ගලයින්ට 076 000 19 19 යන WhatsApp අංකය වෙත වාහනයේ අංකය යොමු කිරීමෙන් පවතින ගැටළු නිරාකරණය කර ගත හැකි බව සඳහන්ය.
ඒ සමගම ජාතික හැඳුනුම්පත, රියදුරු බලපත්රය හෝ විදේශ ගමන් බලපත්රයේ ඡායාරූපයක් වලංගු ආදායම් බලපත්රය සහ වාහන ලියාපදිංචි සහතිකය ද යොමු කර යුතු වෙයි.
මේ සඳහා ඉල්ලුම් කිරීමට වාහනයේ ලියාපදිංචි හිමිකරු පමණක් සුදුසුකම් ලබන අතර ලබා දෙන සියලුම තොරතුරු සහ පෞද්ගලික දත්ත, 2022 අංක 9 දරණ පෞද්ගලික ආරක්ෂන පනතට අනුකූලව ආරක්ෂා කරන බව ඩිජිටල් ආර්ථික අමාත්යාංශය වැඩිදුරටත් සඳහන් කළේය.
සංචාරක කර්මාන්තය සඳහා ඉන්ධන අවශ්යතා වෙනුවෙන් ලියාපදිංචි විය යුතු ආකාරය සම්බන්ධයෙන් විදේශ කටයුතු, විදේශ රැකියා සහ සංචාරක අමාත්යාංශය නිවේදනයක් නිකුත් කර තිබේ.
ඒ අනුව සංචාරක කර්මාන්ත කටයුතු සඳහා අවශ්ය ඉන්ධන ලබාගැනීමට https://tourismfuel.sltda.gov.lk/ යන සබැඳිය ඔස්සේ තොරතුරු ලබා දිය යුතුයි.
පෝරමය පිරවීම සඳහා Gmail ගිණුමක් භාවිත කිරීම අනිවාර්ය වේ.
6 ශ්රේණියේ අධ්යාපන ප්රතිසංස්කරණය 2027 ආරම්භ කිරීමට සූදානම් බවත් ඊට අදාළ සියලු මොඩියුල විශේෂ කමිටු හරහා ගැඹුරින් යළි සළකා බලමින් පවතින බවත් අධ්යාපන ප්රතිසංස්කරණය පිළිබඳ පාර්ලිමේන්තු අනු කමිටුවේ දී අවධාරණය කර තිබේ.
අධ්යාපන ප්රතිසංස්කරණය පිළිබඳ පාර්ලිමේන්තු අනු කමිටුව ඊයේ (17) පාර්ලිමේන්තුවේදී අග්රාමාත්ය ආචාර්ය හරිනි අමරසූරියගේ ප්රධානත්වයෙන් රැස්ව ඇති අතර එම අවස්ථාවේ දී මේ බව සාකච්ඡා කළ බව සඳහන් වේ.
එමෙන්ම නව අධ්යාපන ප්රතිසංස්කරණ ක්රියාවලියේ වත්මන් ප්රගතිය සහ ඉදිරි ක්රියාමාර්ග පිළිබඳ මෙහිදී සාකච්ඡා කර ඇත.
මේ අතර, 2026 වසරේ ආරම්භ කළ පළමු ශ්රේණිය නව අධ්යාපන ප්රතිසංස්කරණ ක්රියාවලිය ප්රගතිය පිළිබඳ අධික්ෂණය කිරීම ඉදිරියේදී සිදු කරන බව එහිදී නිලධාරීන් පවසා ඇත.
එමෙන්ම ඇගයීම් සහ තක්සේරු කිරීම් සම්බන්ධයෙන් නිර්දේශ ලබා ගැනීම සඳහා විදෙස් සම්පත්දායකයින්ගේ සහභාගීත්වයෙන් විශේෂ කමිටුවක් පත් කර ඇති අතර අදාළ සම්පත්දායකයින් ඉදිරියේදී ලංකාවට පැමිණිමට නියමිතව ඇත.
ජනාධිපතිවරයාගේ උපදෙස් මත අධ්යාපනය සම්බන්ධයෙන් ජාතික මෙහෙයුම් කමිටුව පත්කිරීමට අදාළ කැබිනට් පත්රිකාව මේ වනවිට අමාත්ය මණ්ඩලයට යොමු කර ඇති අතර දිස්ත්රික් සහ ප්රාදේශීය මට්ටමේ මෙහෙයුම් කමිටු පත්කිරීමට ඉදිරියේදී කටයුතු කරන බවද එහිදී අනාවරණය වී තිබේ.
තවද, පළමු ශ්රේණියේ දෙවන සහ තෙවන වාරය සඳහාවන ක්රියාකාරකම් පාදක පොත් මුද්රණය කිරීමට සුදානම් කර ඇති අතර දෙවන වාරය සඳහා වන ප්රායෝගික ක්රියාකාරකම් පොත් අප්රේල් පාසල් නිවාඩුවෙන් පසු දරුවන් වෙත ලබාදීමට සැලසුම් කර ඇති බවත් අධ්යාපන අමාත්යංශයේ ලේකම් නාලක කලුවැව මෙහිදී පවසා ඇත.
ප්රසිද්ධ ආයතනයක නියෝජිතයන් ලෙස පෙනී සිටිමින්, අදාළ ආයතනයේ සේවාවන් ලබා ගැනීම සඳහා විශේෂ ජංගම යෙදවුමක් (App) ස්ථාපනය කළ යුතු බවට පවසමින් වංචනිකයින් විසින් සිදුකරන අන්තර්ජාල මූල්ය වංචා පිළිබඳව වාර්තා වන බව පොලීසිය පවසයි.
අන්තර්ජාලය සහ නවීන තාක්ෂණය භාවිතා කරමින් සිදු කරනු ලබන වංචනික ක්රියාවන් සහ මූල්ය අක්රමිකතා සම්බන්ධව ශ්රී ලංකා පොලීසිය විසින් නිරන්තරයෙන් ජනතාව දැනුවත් කලද මෙම වංචාවන් පිළිබඳ ලැබෙන පැමිණිලි සංඛ්යාව දෛනිකව ඉහළ යමින් පවතින බව පොලීසිය සඳහන් කරයි.
වංචාකරුවන් විසින් මහජනතාව මුලා කිරීම සඳහා,
*ප්රසිද්ධ ආයතනයක නියෝජිතයන් ලෙස පෙනී සිටිමින්, අදාළ ආයතනයේ සේවාවන් ලබා ගැනීම සඳහා විශේෂ ජංගම යෙදවුමක් (App) ස්ථාපනය කළ යුතු බවට ඔබව පොළඹවනු ඇත. එම යෙදවුම ස්ථාපනය කිරීම සඳහා සහාය වන බව පවසමින්, ඔබගේ දුරකථන තිරය ඔවුන් සමඟ හුවමාරු කර ගන්නා ලෙස (Screen Share) උපදෙස් ලබා දෙනු ලබයි.
*මෙහිදී සිදුවනුයේ, ජංගම දුරකථන තිරය හුවමාරු කර ගැනීම හරහා ඔබගේ දුරකථනයට දුරස්ථව ප්රවේශ වීමේ හැකියාව (Remote Access) වංචාකරුවන්ට ලැබීමයි. එමගින් ඔබගේ දුරකථනයේ ඇති බැංකු යෙදවුම් (Online Banking Apps) හරහා ගිණුම්වල ඇති මුදල් ඉතා සූක්ෂම ලෙස වෙනත් ගිණුම්වලට බැර කර ගැනීමට ඔවුන් කටයුතු සිදු කරයි.
*මහජනයාට පවතින තාක්ෂණික කරුණු පිළිබඳ අනවබෝධය මෙවැනි වංචා වලට හසු වීමට ප්රධාන හේතුවක් වී ඇති බවට පෙනී ගොස් ඇති අතර මෙවැනි වංචා වලින් ආරක්ෂා වීම සඳහා පහත සඳහන් කරුණු පිළිබඳව අවධානයෙන් කටයුතු කරන ලෙස පොලිසිය මහජනතාවගෙන් ඉල්ලා සිටියි.
*සමාජ මාධ්ය ඔස්සේ “විවිධ ආදායම් මාර්ග” හෝ ” වැඩි ලාභ ලබා දෙන ආයෝජන” ලෙස පළවන දැන්වීම් පිළිබඳව අතිශයින්ම සැලකිලිමත් විය යුතු අතර මුල් අවස්ථාවේදී සුළු ලාභයක් ලබා දී විශ්වාසය ගොඩනගාගනිමින් පසුව විශාල මුදල් ප්රමාණයක් වංචා කිරීම මොවුන්ගේ ස්වභාවයයි.
*බැංකු ගිණුම් අංක, මුරපද (Passwords), හෝ ජංගම දුරකථනයට ලැබෙන OTP කේතකිසිදු හේතුවක් මත බාහිර පුද්ගලයන් සමඟ හුවමාරු කර නොගත යුතු අතර කිසිදු පිළිගත් බැංකුවක් හෝ ආයතනයක් පාරිභෝගිකයන්ගෙන් දුරකථනය හරහා එවැනි තොරතුරු විමසීම් නොකරන බවට දැනුවත් විය යුතුය.
*නාඳුනන පුද්ගලයන් විසින් යොමු කරනු ලබන සබැඳි (Links) මත ක්ලික් කිරීමෙන් හෝ ඔවුන් ලබාදෙන යෙදවුම් (Apps) ස්ථාපනය කිරීම නොකල යුතු අතර විශේෂයෙන්ම ඔබගේ දත්ත වෙත ප්රවේශ වීමට අවසර (Access Permissions) ඉල්ලා සිටින විට එය ලබා දීමට පෙර ඉතා සැලකිලිමත් විය යුතුය.
*එබැවින් නාඳුනන පුද්ගලයන්ගේ උපදෙස් මත ඔබගේ ජංගම දුරකථන තිරය හුවමාරු (Screen Share) කිරීමෙන් ඔබගේ දුරකථන තිරය ඔවුන්ට පෙන්වීමෙන් වැළකිය යුතුය.
*කිසියම් හේතුවක් මත මෙවැනි මූල්ය වංචාවකට ඔබ හසුවී නම් පළමුව අදාළ බැංකුව හෝ මූල්ය ආයතනය දැනුවත් කර ඔබගේ ගිණුම් ආරක්ෂා කර ගැනීමට කටයුතු කල යුතුය.
