Category: news_sub

මඩකලපුව නෙල්ලික්කාඩු ප්‍රදේශයේදී පාළු ළිඳක වැටී සිටියදී කාන්තාවක් සොයාගත් සිද්ධියේ තවත් කරුණු කිහිපයක් මේ වනවිට අනාවරණය වී තිබේ.

ප්‍රදේශවාසියෙකුට එම ළිඳ තුළින් ඇසුණු කෙඳිරිලි හඬක් හේතුවෙන් සිදුකළ සෝදිසියකදී අදාළ කාන්තාව ඊයේ (20) හමුවිය.

මේ වනවිට එම කාන්තාව මඩකලපුව ශික්ෂණ රෝහලට ඇතුළත්කර, හදිසි ප්‍රතිකාර ඒකකයේ ප්‍රතිකාර ලබමින් සිටී.

වයස අවුරුදු 26ක්වූ එම කාන්තාව කිසියම් පිරිසක් පසුගිය 19 වැනිදා ඇය පැහැරගන්නට ඇති බවට පොලීසිය සැකකරයි.

එම කාන්තාව පැහැරගන්නා අවස්ථාවේ දිවි බේරාගෙන පලාගොස් සිටි ඇගේ දියණිය කොතියපුලෙයි වෙල්යායේ සිටියදී සොයාගෙන ඇත.

ඇයද වෛද්‍ය පරීක්ෂණයක් සඳහා මඩකලපුව ශික්ෂණ රෝහලට ඇතුළත් කෙරුණි.

මේ අතර අදාළ කාන්තාව මුදාගන්නා අවස්ථාවේදී එම ළිඳ තුළ තිබී සොයාගත් කාන්තා මළ සිරුර මේ වනවිට මඩකලපුව ශික්ෂණ රෝහලේ තබා තිබේ.

එහි පශ්චාත් මරණ පරීක්ෂණය අද සිදුකිරීමට නියමිතය.

කෙසේ නමුත් මෙම සිදුවීම සම්බන්ධයෙන් මෙතෙක් කිසිවෙකුත් අත්අඩංගුවට ගෙන නොමැති අතර, කොක්කඩිචෝලෙයි පොලිසිය විසින් ඉදිරි විමර්ශන සිදුකරනු ලබයි.

ගිනිඅවි දෙකක් සහ උණ්ඩ සමග පුද්ගලයින් දෙදෙනෙකු පයාගල මැටියමුල්ල ප්‍රදේශයේදී අත්අඩංගුවට ගෙන තිබේ.

පොලිසිය පැවසුවේ අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශයේ නිලධාරීන් කණ්ඩායමක් විසින් මෙම වැටලීම සිදුකර ඇති බවය.

සැකකරුවන් සතුව තිබී විදේශීය රටක නිෂ්පාදිත රිවොල්වර් වර්ගයේ ගිනිඅවි දෙකක්, උණ්ඩ 10ක් සහ අත්විලංගුවක් සොයා ගෙන තිබේ.

ඔවුන් 55 හා 61යන වයස් සීමාවේ පසුවන පයාගල සහ කලගෙඩිහේන යන ප්‍රදේශවල පදිංචිකරුවන් බව ද පොලිසිය පැවසීය.

යාල වනෝද්‍යානයට අයත් කිරින්ද, හීන්වල වනජීවි මුරපොළ ආසන්නයේ වෙඩිතැබීමක් සිදුව තිබේ.

අද (21) පෙරවරුවේ මෝටර් රථයකින් පැමිණි පිරිසක් විසින් මෙම වෙඩිතැබීම සිදුකර ඇති බව වාර්තා වෙයි.

වෙඩි ශබ්දය පිළිබඳ වාර්තා වීමත් සමග හීන්වල වනජීවි මුරපොළේ රාජකාරියේ නිරතව සිටි නිලධාරීන් එම ස්ථානයට ගොස් තිබූ අතර, එහිදී මෝටර් රථයක නැගී පලාගොස් ඇති බව පොලීසිය සඳහන් කළේය.

සතුන් දඩයම් කිරීම සඳහා මෙම වෙඩි තැබීම සිදු කරන්නට ඇති බවට පොලිසිය සැක පළ කරයි.

පලාගිය මෝටර් රථය සහ සැකකරුවන් සොයා කිරින්ද පොලීසිය මෙහෙයුම් ආරම්භ කර ඇති අතර, ඒ සම්බන්ධයෙන් අවට පොලිස් ස්ථාන දැනුවත් කිරීමටද පියවර ගෙන ඇති බව සඳහන්ය.