කල් ඉකුත් වූ පානීය ජල බෝතල් උපරිම සිල්ලර මිලට වඩා වැඩි මිලකට අලෙවිකළ දඹුල්ල ප්රදේශයේ අවන්හලකට, දඹුල්ල මහෙස්ත්රාත් අධිකරණය විසින් රුපියල් 510,000ක දඩ මුදලක් අද දින (29) නියම කළේය.
පාරිභෝගික කටයුතු පිළිබඳ අධිකාරියේ මාතලේ දිස්ත්රික් කාර්යාලය විසින් සිදු කරන ලද වැටලීමකට අනුව අදාළ අවන්හල, රුපියල් 70ක උපරිම සිල්ලර මිලක් නියම කර ඇති ජල බෝතලයක් රුපියල් 100කට අලෙවි කර ඇති බව අනාවරණය වී ඇත.
එමෙන්ම එම ජල බෝතල් කල් ඉකුත්වී තිබී ඇති බවද එහිදී අනාවරණය වී තිබේ.
මිල්ලනිය ප්රාදේශීය සභාවේ වැඩ අංගනයට හියුම් පයිප්ප බාමින් සිටි බූම් ට්රක් රථයකක් අධි බලැති විදුලි රැහැනක ගැටී දෙදෙනෙකු තුවාල ලබා රෝහල් ගතකර තිබේ.
මිල්ලනිය ප්රාදේශීය සභාවට අඹතලේ ප්රදේශයෙන් හියුම් පයිප්ප රැගෙන ඒමෙන් පසු, ගොඩබාමින් සිටියදී අද (29) මෙම අනතුර සිදුව ඇත.
බූම් ට්රක් රථයේ ඉහළ කොටස වෝල්ට් 33,000ක අධි බලැති විදුලි රැහැනක ගැටී ඇති අතර, එහිදී එහි ක්රියාකරු සහ ප්රාදේශීය සභා සේවකයෙකු පිළිසුම් තුවාල ලබා හොරණ මූලික රෝහලට ඇතුළත් කර තිබේ.
මෙහිදී රථය විදුලි රැහැන්වල ගැටීමත් සමග එහි ක්රියාකරුට මෙන්ම එම රථය අසල සිටි ප්රාදේශීය සභාවේ සේවකයාට විදුලි සැර වැදී ඇති බව පොලිස් විමර්ශනවලදී අනාවරණය වී ඇත.
මෙම අවස්ථාවේ බූම් රථයේ ටයර් පුපුරාගොස් ඇති බවද සඳහන්ය.
8වෙනි පාර්ලිමේන්තුවේ සහ 9වෙනි පාර්ලිමේන්තුවේ මුදල් භාවිතය සම්බන්ධයෙක් සියලුම අංශ නියෝජනය වන පරිදි සම්පූර්ණ විගණනයක් සිදුකර එම වාර්තා පාර්ලිමේන්තුවට ඉදිරිපත් කිරීමට බලාපොරොත්තු වන බව කථානායක වෛද්ය ජගත් වික්රමනායක මහතා පවසයි.
අද (29) පෙරවරුවේ මහනුවරදී මාධ්යයට අදහස් දක්වමින් කථානායකවරයා මේ බව පැවසීය.
එහිදී ඔහු පැවසුවේ, තවත් මාසයක් පමණ කාලයක් අතුලදී එම විගණන වාර්තා පාර්ලිමේන්තුවට ලබා දීමට විගණකාධිපතිවරිය පොරොන්දු වූ බවය.
“රටේ තියෙන මුදල් සියලූම දේවල් විගණනයට භාජනය විය යුතුයි. පාර්ලිමේන්තුවේ අපි දැක්ක දෙයක් තමයි යම් යම් අංශයන් විගණකාධිපති තුමාගේ විගණනයට මීට පෙර ලක්වෙලා නෑ. ඒ නිසා අපි කල්පනා කළා, මුදල් භාවිතය පිළිබඳ පාරදුෂ්යභාවය මේ රටේ ජනතාව දැනගන්න අවශ්යයි. ඒ සඳහා මම හිටපු විගණකාධිපති තුමා වික්රමරත්න මහත්මයාව ගෙන්නලා ඉල්ලා සිටියා මේ වන විට 8වන පාර්ලිමේන්තුවත් 9වන පාර්ලිමේන්වත් මට සම්පූර්ණ විගණනයක් කරලා දෙන්න කියලා. එතනදී අපිට ජනතාවට කියන්න පුළුවන් ජනතාවගේ මුදල්, පාර්ලිමේන්තුව සඳහා යොදවන මුදල්වල භාවිතයන් පිළිබඳව මේ රටේ ජනතාවට දැන ගැනීමට අයිතියක් තියෙනවා. ඒ සඳහා තමයි අපි පාර්ලිමේන්තුව විගණනයකට ලක් කරන්නේ. ඉදිරියේදී 10 වන පාර්ලාමේන්තුවටත් ඒ විගණනය කරන්න බලාපොරොත්තු වෙනවා.
මාස 6ක් පමණ වෙනවා මේ ගැන විගණකාධිපතිට කියලා විගණනය කරන්න කියලා. මේ ළඟදිත් අපේ අලුත් විගණකාධිපති තුමිය ජයරත්න මැතිනියට මම කිව්වා හැකි ඉක්මනින් ඒ වාර්තාව ලබා දේන්න කියලා. එතුමියත් පොරොන්දු වුණා මාසයක් වගේ කාලයක් අතුලත දී 8වන පාර්ලිමේන්තුවේත්, 9වන පාර්ලිමේන්තුවෙත් එම විගණන වාර්තා පාර්ලිමේන්තුවට ලබාදෙනවා කියලා.”
ශ්රී ලංකා පාර්ලිමේන්තුව, ශ්රී ජයවර්ධන පුර කෝට්ටේ දිනවන්නා පරීශ්රයේ ස්ථාපිත කර අදට වසර 44ක් සැපිරීම නිමිත්තෙන් ශ්රී දළදා මාලිගය වැදපුදා ගැනීම සඳහා කාථානායකවරයා අද එක්විය.
පසුව කථානායක වෛද්ය ජගත් වික්රමනායක මහතා අද පෙරවරුවේ මල්වතු සහ අස්ගිරි මහානාහිමිවරු බැහැදැක ආශීර්වාද ලබාගගෙන තිබුණි.
හැටන් – දික්ඔය ප්රධාන මාර්ගයේ, බඩල්ගල ප්රදේශයේ දී මගී ප්රවාහන බස් රථයක් මාර්ගයෙන් ඉවතට පැන ප්රපාතයකට පෙරළී අද (29) පස්වරුවේ සිදුවූ අනතුරෙන් එක් අයෙකු ජීවිතක්ෂයට පත්ව තිබේ.
පොලීසිය සඳහන් කළේ මෙලෙස මරණයට පත්ව ඇත්තේ වයස අවුරුදු 70ක් වූ හැටන් ප්රදේශයේ පදිංචිකරුවෙකු බවය.
අනතුර සිදුවන අවස්ථාවේ බස් රථයේ මගීන් 40ක් පමණ ගමන්කර තිබේ.
එහිදී රියැදුරු ඇතුළු 34 දෙනෙකු තුවාල ලබා දික්ඔය රෝහලට ඇතුළත් කිරීමේදී ඔහු මියගොස් ඇත.
පොලීසිය සඳහන් කළේ තුවාලකරුවන් අතර පිරිමි පුද්ගලයින් 17ක්, කාන්තාවන් 14ක්, අවුරුදු 12 පිරිමි ළමයෙකු හා අවුරුදු 4 ගැහැණු දරුවෙකු සිටින බවය.
ඉන් බරපතළ තත්ත්වයේ පසුවන එක් පුද්ගලයෙකු වැඩිදුර ප්රතිකාර සඳහා මහනුවර රෝහල වෙත යොමු කර ඇත.
අනතුරට ලක්වූ බස් රථය, තවත් බස් රථයකට ඉඩදීමට යෑමේදී එම බස් රථය මාර්ගයෙන් ඉවතට පැන අඩි 35ක් පමණ ප්රපාතයට පෙරළී මෙම අනතුර සිදුවිය.
සම්මන්ත්රණයක් සඳහා පැමිණ නාරාහේන්පිට පෞද්ගලික හෝටලයක නවාතැන්ගෙන සිටි වෛද්යවරියන් කිහිපදෙනෙකු නාන කාමර තුළ දිය නාමින් සිටියදී, ජංගම දුරකථන මගින් රූගත කළ බවට සැකපිට තරුණයක් දෙදෙනෙකු අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ ශ්රී ලංකා වයස අවුරුදු 19න් පහළ ජාතික ක්රිකට් කණ්ඩායමේ සාමාජිකයින් දෙදෙනෙකු බව නාරාහේන්පිට පොලීසිය පැවසීය.
ඔවුන් මෙලෙස පිරිමි පුද්ගලයින්ගේ වීඩියෝ දර්ශනද ලබාගෙන ඇති අතර, එලෙස ලබාගන්නා දර්ශන අන්තර්ජාලයට මුදාහැර ඇත්ද යන්න පිළිබඳ විමර්ශන ක්රියාත්මක බවද සඳහන් කළේය.
අදාළ තරුණයින් දෙදෙනා අළුත්කඩේ මහේස්ත්රාත් අධිකරණය වෙත ඉදිරිපත් කිරීමෙන් අනතුරුව රුපියල් ලක්ෂ 5ක ශරීර ඇප මත මුදාහැර තිබේ.
භාණ්ඩාගාර ලේකම් හර්ෂණ සූරියප්පෙරුම මහතා රජයේ මුදල් පිළිබඳ කාරක සභාව (COPF) හමුවේ පෙනී සිටීම ප්රතික්ෂේප කර නොමැති බව ජනමාධ්ය නියෝජ්ය අමාත්ය කෞෂල්යා ආරියරත්න පැවසීය.
හර්ෂණ සූරියප්පෙරුම මහතා හෙට දිනයේ (30) දිනයේ ‘COPF’ හමුවේ පෙනී සිටීමට නොහැකි බව දන්වමින් ලිපියක් යොමුකර ඇති බවට එහි සභාපති ආචාර්ය හර්ෂ ද සිල්වා මහතා සිදුකළ ප්රකාශයට ප්රතිචාර දක්වමින් ඇය මේ බව සඳහන් කළාය.
අමෙරිකානු ඩොලර් මිලියන 2.5ක මුදලක් අස්ථානගතවීමේ සිද්ධිය සම්බන්ධයෙන් කරුණු විමසීම සඳහා භාණ්ඩාගාර ලේකම් හර්ෂණ සූරියප්පෙරුම මහතා ඇතුළු මුදල් අමාත්යාංශයේ උසස් නිලධාරීන් පිරිසක් රජයේ මුදල් පිළිබඳ කාරක සභාව හමුවට කැඳවීමේ තීරණයක් ගෙන තිබෙන පසුබිමක අදාළ ලිපිය මෙලෙස යොමුකර තිබේ.
කෙසේ නමුත් ඒ සම්බන්ධයෙන් ‘අද දෙරණ’ සමග අදහස් දක්වමින් නියෝජ්ය අමාත්ය කෞෂල්යා ආරියරත්න සඳහන් කළේ, අදාළ සයිබර් ප්රහාරය සම්බන්ධයෙන් ජනාධිපති අනුර කුමාර දිසානායක මහතා ඉදිරි දිනකදී පාර්ලිමේන්තුව හමුවේ විශේෂ ප්රකාශයක් සිදුකිරීමට නියමිතව ඇති බවය.
ජනාධිපතිවරයාගේ එම ප්රකාශය සිදුකිරිමට පෙර අදාළ සිදුවීම සම්බන්ධයෙන් භාණ්ඩාගාර ලේකම්වරයා ‘COPF’ හමුවේ කරුණු ඉදිරිපත් කිරීමට සුදුසු නොවන බව නියෝජ්ය අමාත්යවරිය මෙහිදී සඳහන් කළාය.
එමනිසා භාණ්ඩාගාර ලේකම් හර්ෂණ සූරියප්පෙරුම මහතා ‘COPF’ කමිටුව හමුවේ පෙනී සිටීම ප්රතික්ෂේප කර නොමැති බවත්, ජනාධිපතිවරයාගේ ප්රකාශයෙන් අනතුරුව ඔහු ඒ සම්බන්ධයෙන් කරුණු දැක්වීම සඳහා පෙනී සිටින බවත් ඇය වැඩිදුරටත් පැවසීය.
පක්ෂ ප්රතිපත්තිය අනුව පක්ෂ සාමාජිකත්වයෙන් ඉල්ලා අස්වන ලෙස සමගි ජන බලවේගය මහලේකම් රංජිත් මද්දුම බණ්ඩාර මහතා ඉරාන් වික්රමරත්නට මහතා වෙත අද (29) ලිපියක් යොමුකරමින් දන්වා තිබේ.
සජබ කෘත්යාධිකාරී මණ්ඩලයෙන් සහ කළමනාකරණ කමිටුවෙන් ඉල්ලා අස්වීමට වික්රමරත්න මහතා ගනු ලැබූ තීරණය භාරගනිමින් ඊට පිළිතුරු ලිපියක් යොමුකරමින් මේ බව දැනුම්දී ඇත.
සෑම අවස්ථාවකදීම පක්ෂයේ ප්රතිපත්තිය වූයේ සියළුම ක්රීඩා සංගම් නිර්දේශපාලනය විය යුතු බවත්, එහි තනතුරු දේශපාලනයට සම්බන්ධ අය විසින් නොදැරිය යුතු බවත් එම ලිපියේ වැඩිදුරටත් සඳහන් කර තිබේ.
තවදුරටත් සිය පක්ෂයේ සාමාජිකයෙකුව සිටීම පක්ෂ ප්රතිපත්තියට පටහැනි බැවින් සදාචාරාත්මකව කළ යුතු වන්නේ, පක්ෂ සාමාජිකත්වයෙන් ද ඉල්ලා අස්වීම ද බවත් එහි සඳහන්ය.
ඒ අනුව එසේ කටයුතු කරන ලෙසත් අදාල ලිපියෙන් ඉරාන් වික්රමරත්න මහතාට දැනුම් දී තිබේ.
දිට්වා ආපදා තත්ත්වය හේතුවෙන් පූර්ණ හානි වූ නිවාස සඳහා නව ඉඩම් ලබා ගැනීම පිළිබඳ විශේෂ සාකච්ඡාවක් වැවිලි සහ ප්රජා යටිතල පහසුකම් අමාත්යාංශයේදී ඊයේ (27) පැවැත්විණි.
සාකච්ඡාව සඳහා වැවිලි සහ ප්රජා යටිතල පහසුකම් අමාත්ය සමන්ත විද්යාරත්න සහ වැවිලි සහ ප්රජා යටිතල පහසුකම් නියෝජ්ය අමාත්ය සුන්දරලිංගම් ප්රදීප් යන අමාත්යවරුන් එක්ව තිබුණි.
මෙම සාකච්ඡාවේ ප්රධාන අරමුණ වී ඇත්තේ අවතැන් වූ පවුල් සඳහා ස්ථිර නිවාස ඉදිකිරීමට අවශ්ය ඉඩම් ප්රාදේශීය වැවිලි සමාගම්වලින් (RPC) ලබා ගැනීම සම්බන්ධයෙන් එකඟතාවයකට පැමිණීමය.
මෙහිදී, ආපදාවෙන් පූර්ණ හානි වූ නිවාස සඳහා සහ ජාතික ගොඩනැගිලි පර්යේෂණ සංවිධානය විසින් නායයෑමේ අවදානම් සහිත ඉඩම් ලෙස තහවුරු කරන ලද නිවාස වෙනුවෙන් නැවත නව නිවාස ඉදිකිරීම සඳහා රජය මගින් ලබාදීමට සැලසුම් කර ඇති ඉඩම්වලට අමතරව, ප්රාදේශීය වැවිලි සමාගම් සතු සුදුසු ඉඩම් ද මේ සඳහා යොදා ගැනීම පිළිබඳව මෙහිදී දීර්ඝ වශයෙන් සාකච්ඡා විය.
තවද, ආපදා තත්ත්වයෙන් දැඩි ලෙස පීඩාවට පත් වතු ප්රජාව දැනට පදිංචිව සිටින වතු ආශ්රිත ප්රදේශවලින්ම ඔවුන්ට නව ඉඩම් ලබාදීම කෙරෙහි අමාත්යවරයාගේ විශේෂ අවධානය යොමු විය.
ආපදාවෙන් පීඩාවට පත් ජනතාවට කඩිනමින් ස්ථිර නිවාස ලබාදීම රජයේ ප්රමුඛතම කාර්යයක් බවත්, ඒ සඳහා වැවිලි සමාගම්වල සහයෝගය උපරිමයෙන් අපේක්ෂා කරන බවත් අමාත්යවරයා මෙහිදී අවධාරණය කළේය.
මෙම අවස්ථාවට වැවිලි සහ ප්රජා යටිතල පහසුකම් අමාත්යාංශ ලේකම් ගුණදාස සමරසිංහ මහතා, අමාත්යාංශයේ අතිරේක ලේකම්වරුන් සහ වැවිලි කළමනාකරණ අධීක්ෂණ අංශයේ නිළධාරින්ද, ප්රාදේශීය වැවිලි සමාගම්වල ප්රධාන විධායක නිලධාරීන් පිරිසක් ද සහභාගී වූහ.
ලෝකවාසී ජනතාවට සාමයේ පණිවිඩය බෙදා හරිමින් සහ බුදු දහමේ උරුමය ජාත්යන්තරය වෙත රැගෙන යමින් දින 07ක් පුරා මෙරටදී පැවැත්වුණු “එහිපස්සිකෝ” සාම පාගමනේ සමාප්ති රාජ්ය උත්සවය ජනාධිපති අනුර කුමාර දිසානායක මහතාගේ සහභාගිත්වයෙන් අද (28) පස්වරුවේ කොළඹ නිදහස් චතුරශ්රයේදී පැවැත්විණි.
“චරථ භික්ඛවෙ චාරිකං බහුජන හිතාය බහුජන සුඛාය ලෝකානුකම්පාය” යන බුදුරජාණන් වහන්සේගේ දේශනාව පදනම් කරගනිමින් කරුණාවේ සහ මෛත්රීයේ පණිවිඩය රැගෙන වියට්නාම ජාතික පූජ්ය පඤ්ඤාකර ස්වාමීන් වහන්සේ ඇතුළු විදෙස් භික්ෂුන්වහන්සේ දොළොස් නමකගේ සහභාගිත්වයෙන් පසුගිය 22 වනදා දඹුල් රජමහා විහාරස්ථානය අසළින් ආරම්භ කෙරුණු සාමයේ පා ගමන කි.මි 210කට වැඩි දුරක් ගෙවා අද (28) පස්වරුවේ කොළඹ නිදහස් චතුරශ්ර පරිශ්රයට ළඟා විය.
මෙහිදී ශ්රී සර්වඥධාතුන් වහන්සේ සහ ජය ශ්රී මහා බෝධි ශාඛාව ජනාධිපති අනුර කුමාර දිසානායක මහතා විසින් නිල වශයෙන් පූජ්ය පඤ්ඤාකර ස්වාමීන්වහන්සේ වෙත භාරදීම සිදු කෙරිණි.
මෙහිදී අදහස් දැක්වූ ජනාධිපති අනුර කුමාර දිසානායක මහතා සඳහන් කළේ පඤ්ඤාකර ස්වාමීන්වහන්සේ ඇතුළු කණ්ඩායම මෙරට සිදු කළ පාද චාරිකාව අප රට තුළ නව ධර්ම උද්යෝගයක් නිර්මාණය කළ බවත්, එමෙන්ම විනයධර සහ ධර්මධර ස්වාමීන්වහන්සේ කෙරෙහි මෙරට පොදු ජනතාව තුළ තිබෙන මහත් භක්තිය සහ ගෞරවය එමඟින් පෙන්නුම් කළ බවත්ය. උන්වහන්සේගේ දේශනාව වූ සතිමත් බව පුහුණු කරමින් සාමයේ දිවයින මනුෂ්යත්වයේ දිවයින බවට පත් කිරීමට කැපවෙමුයි සියලුදෙනාට ආරාධනා කළේය.
අද රට තුළ ඉදහිට සිදුවන ඇතැම් සිදුවීම් ආගමික ප්රබෝධය පිළිබඳ ජනතාව තුළ බිඳ වැටීමක් ඇති කරන බවද මෙහිදී සඳහන් කළ ජනාධිපතිවරයා ආගමික සංස්ථාවන්හි ගෞරවය සහ වටිනාකමත්, ධර්මයේ හරයත් ආරක්ෂා කර ගැනීමට සියලු ආගමික නායකයන්ට මහඟු වගකීමක් පැවරී තිබෙන බවත්, ඒ වෙනුවෙන් අවශ්ය සෑම සහායක්ම ලබා දීමට රජය කටයුතු කරන බවත් සඳහන් කළේය.
මෙහිදි විශේෂ අනුශාසනාවක් සිදු කළ පූජ්ය මෙල්පිටියේ විමලකිත්ති ස්වාමීන් වහන්සේ සඳහන් කළේ අනාගතයේ කෙදිනක හෝ ඇමරිකාවේ බුදු දහම පිළිබඳ කතා කරන තැනක ලංකාවෙන් වැඩම කළ බෝධින් වහන්සේ සහ ධාතුන් වහන්සේ පිළිබඳ මෙම ඓතිහාසික අවස්ථාව සිහිපත් කරනු ඇති බවයි. එය ශ්රී ලාංකික ජාතිය ලෙස ඇමරිකාවේ බුදු දහම පිළිබඳ ආඩම්බර විය හැකි ඓතිහාසික අවස්ථාවක් බවද උන්වහන්සේ පෙන්වා දුන්හ.
මෙහිදී වැඩිදුරටත් අදහස් දැක්වූ ජනාධිපති අනුර කුමාර දිසානායක මහතා
අපගේ ආරාධනාව පිළිගෙන ශ්රී ලංකාවට වැඩම කොට එම සාම මෙහෙවරේ යෙදීම පිළිබඳ මම පළමුකොටම අපේ පඤ්ඤාකර ස්වාමීන්වහන්සේ වෙත ස්තූතිය පිරිනමනවා. එමෙන්ම එහි සම්බන්ධීකරණ කටයුතු සිදු කළ පූජ්ය මෙල්පිටියේ විමලකිත්ති ස්වාමීන්වහන්සේ වෙත ස්තූතිය පිරිනැමිය යුතුයි.
සාමයේ වටිනාකම පිළිබඳව ශ්රී ලංකාවට බොහෝ අත්දැකීම් තිබෙනවා. අපි දිගුකාලීන යුද්ධයේ විනාශාකාරීත්වය පිළිබඳ ඉතා ඛේදනීය අත්දැකීම්වලින් යුත් පිරිසක්. එනම් සාමය කෙතරම් වැදගත්ද, ලෝක සාමය මොනතරම් කාර්යයක් ලෝකය වෙනුවෙන් ඉටු කරයිද කියන බලාපොරොත්තුව අපි සියලුදෙනා තුළ තිබෙනවා. ඒ සඳහා පඤ්ඤකර ස්වාමීන්වහන්සේ ඇතුළු ස්වාමීන්වහන්සේ දරන වෙහෙස පිළිබඳ අපේ කෘතඥතාව සහ ගෞරවය පුද කළයුතුයි.
ධර්ම පාද චාරිකා ශ්රී ලංකාවේ අපිට අලුත් දෙයක් නොවෙයි. එය අපේ සංස්කෘතියේම කොටසක්. බුදුරජාණන් වහන්සේ තමන්ගේ පළමු අග්ර ශ්රාවකයන්ට දේශනා කළේ “ චරථ භික්ඛවෙ චාරිකං බහුජන හිතාය බහුජන සුඛාය” යනුවෙන්. මම හිතනවා එම බුදු වදන පෙරදැරි කරගනිමින් ලෝකය පුරා වෙසෙන අපේ ගරුතර මහා සංඝරත්නය වසර දහස් ගණනක් එම ධර්ම චාරිකාවේ පොදු ජන හිත සුව පිණිස වැඩම කර තිබෙනවා.
මහිදු මහා රහතන් වහන්සේගේ ශ්රී ලංකාගමනය අපේ රටේ මහා සංස්කෘතියක් නිර්මාණය කිරීමට දායක වුණා. අනතුරුව අපි දන්නවා 17 වන සියවස පමණ වන විට අපේ උපසම්පදා භික්ෂුව අපිට අහිමි වී තිබුණා. ඒ නිසා නැවත ශාසනය පිහිටුවීමේ අභියෝගයට අපි මුහුණ දී තිබුණා. එහිදී අපේ සරණංකර සංඝරාජ මහා හිමියන්ගේ නායකත්වය සහ මැදිහත්වීම මත සියම් දේශයෙන් වැඩම කළ උපාලි නායක හිමිපාණන් වහන්සේ විසින් අපේ රටේ නැවත භික්ෂු ශාසනය ස්ථාපිත කළා. එය තායිලන්තයේ සිට සිදුකළ චාරිකාවේ ප්රතිඵලයක්. ඒ වගේම වැලිවිට සරණංකර සංඝරාජ හිමිපාණන් වහන්සේ විශාල ධර්ම චාරිකාවක නිරත වුණා. ධර්ම පොත් පත් ගවේෂණය කරමින්, සංඝයා වහන්සේ පිළිබඳ පැතිරි තිබු දුර්මත ඉවත් කරමින් පොදු ජනයා වෙත ධර්මයේ තිබෙන හරය ගෙන යාමට කටයුතු කළා. ඒ නිසා මේ චාරිකා සහ වැඩම කරවීම් පිළිබඳ අපිට දිගු ඉතිහාසයක් අපිට තිබෙනවා.
අපේ හාමුදුරුවන් වහන්සේලා ගම්, නියම්ගම් කරා අවුරුදු දෙදහසකට වැඩි කාලයක්, තමන්ගේ දෙපා ගෙවෙනවා නම් ගෙවෙන තරමට, තමන්ගේ හඩ වියැකි යනවා නම් වියැකෙන තරමට දේශනා කරමින් ධර්ම චාරිකාවේ යෙදුණා. මම හිතනවා අපේ පඤ්ඤාකාර ස්වාමීන්වහන්සේ ඇතුළු කණ්ඩායමේ මෙම පාද චාරිකාව අප රට තුළ අලුත් ධර්ම උද්යෝගයක් නිර්මාණය කළා. විනයධර සහ ධර්මධර ස්වාමීන්වහන්සේ කෙරෙහි අපේ පොදු ජනතාව පිළිබඳ මොනතරම් භක්තියක් සහ විශ්වාසය තිබෙනවාද කියලා මෙම චාරිකාවෙන් සනාථ වුණා. බෞද්ධ ජනතාව ඉතා පිබිදීමකින් මඟ දෙපස රැදි සිටිමින් උන්වහන්සේ කෙරෙහි තමන්ගේ ගෞරවය සහ ආදරය ප්රකාශයට පත් කරන අයුරු අපි දුටුවා. එය බුදු දහමේ විමුක්තියේ හරය පොදු ජනතාව තුළ කා වැද්දීමට විශාල ව්යායාමයක් වුණා කියලා අපි විශ්වාස කරනවා.
අපේ රටේ ඉතිහාසය දෙස බැලුවොත් ආර්ථික සමෘද්ධිය අත්පත් කරගත් සෑම අවස්ථාවකම ආගමික ප්රබෝධය අත්පත්කරගෙන තිබෙනවා. ආගමික ප්රබෝධය බිඳ වැටුණු සෑම අවස්ථාවකම ආර්ථිකය සහ සමාජය බිඳ වැටී තිබෙනවා. ඒ නිසා අපේ ආර්ථිකය, සමාජය උසස් ලෙස වර්ධනය කරවා නම් ඒ හා සමාන ලෙස නව ආගමික ප්රබෝධයක් අවශ්යයි.
අද අපිට දකින්න තිබෙන දේ, විශාල පරිමාවෙන් නොවුණත් ඉදහිට සිදුවන සිදුවීම් අපේ ආගමික ප්රබෝධය පිළිබඳ ජනතාව තුළ බිඳ වැටීමක් ඇති කරනවා. ඒ නිසා විශේෂයෙන් අපේ සියලුම ආගමික නායකයන්ට එම ආගමික සංස්ථාවන්වල ගෞරවය සහ වටිනාකම, ඓතිහාසික උරුමය, ධර්මයේ හරය මේ සියල්ල ආරක්ෂා කර ගැනීමේ වගකීම තිබෙනවා. රජයක් ලෙස අපි ඒ වෙනුවෙන් ලබා දිය හැකි සෑම සහායක්ම ලබා දීමට සූදානම්.
අපේ රට නිවුණු රටක්, ගැටුම් නොමැති රටක් බවට පත් කර ගැනීමට නම් නීතිය පමණක් ප්රමාණවත් වන්නේ නැහැ. අපි ඇතිතරම් පාර්ලිමේන්තුව තුළ නීති සම්පාදනය කර තිබෙනවා. නීතිය ක්රියාත්මක කිරීම සඳහා ආයතන ස්ථාපිත කර තිබෙනවා. ඒ ආයතන සඳහා පහසුකම් සපයා දී තිබෙනවා. හැබැයි රට දැහැමි වී තිබෙනවද? නීතිගරුක වී තිබෙනවද? අපි විශ්වාස කරනවා රට දැහැමි සහ නීතිගරුක කිරීමේදී අපේ ආගමික සංස්ථාවන්වලට විශාල කාර්යභාරයක් පැවරී තිබෙනවා.
අපේ රට සංවර්ධනය සහ සාමකාමී සමාජයක් කරා ගෙන යන ගමනේදී ආගමික ප්රබෝධයක සහ ආගමට නැඹුරු වූ සමාජයක් අවශ්ය වී තිබෙනවා. ඒ සඳහා එක්වන ලෙස මම සියලුදෙනාට ආරාධනා කරනවා. සාමය පිළිබඳ කතිකාවේදී අපේ රට ලෝකයට විශාල උදාහරණ ලබා දිය හැකි භූමියක්. යුද ගැටුම්, එකිනෙකා අතර වෛරය, ක්රෝධය අවිශ්වාසය ගොඩනැගී තිබුණා. නමුත් අපි රටක් ලෙස ක්රමානූකූලව එකිනෙකා අතර වෛරය ක්රෝධය. අවිශ්වාසය සමනය කර ගනිමින් සාමකාමී රාජ්යයක් සහ එකිනෙකාගේ සංස්කෘතින්වලට ගරුකරන සමාජයක් නිර්මාණය කිරීමට අවශ්ය පියවර රැසක් අත්පත් කරගෙන තිබෙනවා.
ශ්රී ලංකාවේ වගේම ලෝකය පුරා බහුතර ජනතාවගේ අපේක්ෂාව සාමයයි. බහුතර ජනතාව සාමය අපේක්ෂා කර තිබියදී ගැටුම් ඇතිවන්නේ කෙසේද, මේ මොහොතේත් ලෝකයේ රාජ්යයන් ගණනාවක යුද්ධය පැතිරී තිබෙනවා. අපි සිතුවොත් තාවකාලිකව යුද්ධයේ ජයග්රාහී පාර්ශ්වයක් සිටිනවා කියලා, යුද්ධය තාවකාලීකව ජයග්රහණය කළ රටක් පවා කියන්නේ අපිට අවශ්ය සාමය කියලයි. එයයි යථාර්ථය. හැබැයි පොදු ජනයා සාමය කෙරෙහි විශ්වාස තබා තිබියදී ඇයි යුද්ධය ඇති වන්නේ. එක පැත්තකින් සාමය ගැන පොදු ජනතාව අපේක්ෂා තබන අතරම, යුද්ධය පිළිබඳ බලඅධිකාරීන් විශ්වාස කරනවා.
සැකයෙන්, අවිශ්වාසයෙන්, වෛරයෙන්, ක්රෝධයෙන් තොර රාජ්යයක් ජන සමාජයක් පොදු ජනතාව අපේක්ෂා කරන අතර අන්තවාදීන්, කුමන්ත්රණකරුවන් අසමගියේ සහ ජාතිවාදයේ ගැටුම් අපේක්ෂා කරනවා. එනම් සාමයට ලැදි මහා ජනතාවක් අභිබවා අතළොස්සක් යුද්ධයේ න්යාය පත්රය අතට ගෙන මෙහෙයවමින් සිටිනවා. ඒ නිසා අපේ මාතෘ භූමියත්, ලෝකයත් බහුජනයා අපේක්ෂා කරන සාමයේ මාවතට අවතීර්ණ විය යුතුයි.
අපේ පඤ්ඥාකාර ස්වාමීන්වහන්සේත්, අපිත් මේ ව්යසනය දකිනවා. මේ ව්යසනය ඇතිවීමට හේතුව ලෙස උන්වහන්සේ දේශනා කරනවා සතිය අහිමි වීම. සම්මා සතියේ පිහිටුවා කටයුතු කිරීමට අසමත්වීම. ඒ නිසා උන්වහන්සේගේ දේශනාවන්හි හරය වන්නේ සම්මා සතියේ පිහිටුවා කටයුතු කිරීමයි. ඒ සඳහා අපි සියලු දෙනා සමත් වුවහොත් කවර පීඩාවක් මධ්යයේ හෝ කවර තර්ජන හෝ අවදානම් මධ්යයේ වුවද මිනිසුන් ලෙස සම්මා සතියෙන් කටයුතු කිරීමට සූදානම් නම් අපිට හොඳම දේ කරන්න පුළුවන්. සාමයේදී පළමුවෙන්ම උඩට එන්නේ මනුෂ්යත්වයයි. යුද්ධයේදි පළමුව මිය යන්නේ මනුෂ්යත්වයයි. ඒ නිසා යළි මනුෂ්යයන් ලෙස සම්මා සතියෙන් යුතුව කටයුතු කිරීමට අධිෂ්ඨාන කරගත යුතුව තිබෙනවා. එම සම්මා සතිය පිළිබඳ අලුත් කථිකාවක් පඤ්ඤාකාර ස්වාමීන්වහන්සේ අපේ රට තුළ ආරම්භ කර තිබෙනවා. මම උන්වහන්සේට අපේ කෘතඥතාව පිරිනමනවා.
මේ රට තමයි ලෝකයේ සාමයේ දිවයින. අපි උත්සාහ කරමින් සිටිනවා මේ රට ලෝකයේ ආදර්ශමත් දිවයින බවට පත් කිරීමට. ධනය, යන්ත්රසූත්රවලින් අපිට අංක එකට පත්විය නොහැකි වුවත් මනුෂ්යත්වයෙන් ලෝකයේ අංක එක බවට පත් විය හැකියි. ඒ සදහා අපේ මහා සංඝරත්නය ප්රමුඛ ආගමික නායකයන් නිරන්තරයෙන් සිදු කරන දේශනා ඉවහල් වෙනවා. ඒ තුළින් අපි සාමයේ දිවයින මනුෂ්යත්වයේ දිවයින බවට පත්කරමු’යි සියලුදෙනාට ආරාධනා කරමින් අපේ පඤ්ඤාකාර ස්වාමීන් වහන්සේ ඇතුළු මහා සංඝරත්නයට නැවත ස්තූතිය පුද කරනවා.
මෙහි ප්රධාන අනුශාසනාව සිදු කළ පූජ්ය පඤ්ඤාකර ස්වාමීන්වහන්සේ
අද දින අප සැම එක්ව සිටින්නේ සාමය උදෙසා ශ්රී ලංකාවේ පැවැත් වූ මෙම පාගමන සාර්ථකව නිමා කරන අවස්ථාවටයි. මෙය හුදෙක් ඔබේ දේශය හරහා භෞතිකව ගිය ගමනක් පමණක් නොවේ. එය එක් හදවතක සිට තවත් හදවතකට බැඳුණු සම්බන්ධතාවයක්. පියවරෙන් පියවර, නගරයෙන් නගරය පසු කරද්දී, ශ්රී ලංකාව තුළ ජීවමානව පවතින මෛත්රියේ සහ දයාවේ ප්රබලත්වය අපි අත්දැක්කෙමු.
අපි වර්ෂාව මැද ඇවිද ගියෙමු, දැඩි හිරු රශ්මිය මැද ඇවිද ගියෙමු, ශරීරයට මෙන්ම මනසටද අභියෝගයක් වූ රළු තාර පාරවල් මත පාවහන් රහිතව ඇවිද ගියෙමු. එහෙත්, සෑම දුෂ්කරතාවකදීම මේ සුන්දර රටේ ජනතාව අප නොසලකා හැරියේ නැත. ඔවුන් ප්රතිචාර දැක්වූයේ දයාවෙනි.
අපගේ මාවත සුවපහසු කිරීමටත්, වේදනාව සමනය කිරීමටත් පාරවල් පුරා ජලය ඉස, කෙසෙල් කොළ සහ මල් ඇතිරිලි අතුරා තිබිණි.
ඔබ පෙන්වූ ගෞරවය, මුවඟ රැඳි සිනහව සහ විවෘතව ලබාදුන් රැකවරණය සැබෑ ශක්තිය කුමක්දැයි පෙන්වා දෙයි. සාමකාමී ජාතියක් යනු මෙවැන්නකි. මේ වෙනුවෙන් මගේත්, සාම පා ගමන් කණ්ඩායමේත්, මෙම ගමන අත්වින්ද සැමගේත් හෘදයාංගම ස්තූතිය පුද කරමි.
අද දින මම ඉතා වැදගත් කරුණක් සිහිපත් කිරීමට කැමැත්තෙමි. අප තථාගත ගෞතම බුදුරජාණන් වහන්සේ පුද්ගලයෙකුට සාමකාමීව ජීවත්වන ආකාරය පමණක් නොව, ජාතියක් ලෙස සාමය ස්ථාපිත කර පවත්වා ගන්නේ කෙසේද යන්න පිළිබඳවත් මඟ පෙන්වා ඇත.
සමාජයක සහජීවනය පවත්වා ගැනීම සඳහා අත්යවශ්ය වන ගුණාංග හතක් පවතී. ඒවා අතීතයේ දේශනා කළද අදටත් ඉතාමත් වලංගු වේ.
පළමුව, සාමය ප්රවර්ධනය කිරීම සඳහා නිවැරදි සහ වැදගත් දෑ පිළිබඳව සාකච්ඡා කිරීමට ජාතියක් නිරන්තරයෙන් සාමූහිකව රැස්විය යුතුය. ප්රඥාවෙන් සහ අවබෝධයෙන් යුතුව සන්නිවේදනය කිරීම නැවැත්වූ විට බෙදීම් ආරම්භ වේ.
දෙවනුව, එසේ රැස්වන විට සමගි සම්පන්නව රැස්විය යුතුය. සමගියෙන් කටයුතු කළ යුතුය. සමගියෙන් විසිර යා යුතුය. රැස්වීම පමණක් ප්රමාණවත් නොවේ; අප එකිනෙකාට සලකන ආකාරයද වැදගත් වේ.
තෙවනුව, සාමකාමී ජාතියක් යුක්තියට සහ සදාචාර මූලධර්මයට ගරු කළ යුතුය. ආවේගශීලී හෝ කිසිදු ජීවියෙකුට හානිකරන ක්රියා මගින් අක්රමිකතා ඇති නොකළ යුතුය.
සිව්වනුව, ජීවන අත්දැකීම් සහ ප්රඥාව ඇති වැඩිහිටියන්ට ගරු කළ යුතුය. වැඩිහිටියන් නොසලකා හරින සමාජයක වටිනාකම් ගිලිහී යයි.
පස්වනුව, කාන්තාවන් සහ දරුවන් ආරක්ෂා කළ යුතුය. ආරක්ෂාව සහ ගෞරවය ඇති තැන ස්ථාවරභාවය සහ වර්ධනය පවතී.
සයවනුව, ආධ්යාත්මික සහ සංස්කෘතික වටිනාකම් සුරැකිය යුතුය. පූජනීය ස්ථාන, සම්ප්රදායන් සහ ඉගැන්වීම් ජාතියක අනන්යතාවේ නැංගුරම් වැනිය.
සත්වනුව, සාරධාර්මික ජීවිතයක් ගත කරන අයට ජාතියක් ගරු කළ යුතුය. මන්ද, ගුණවත් පුරවැසියන් යනු සමාජයක නිදහස, ස්ථාවරත්වය සහ සදාචාරය පවත්වා ගැනීමේ පදනමයි.
මෙම ගුණාංග සුරකින්නේ නම්, සාමය යනු අප හඹා යා යුතු දෙයක් නොවේ. එය අප ස්වභාවිකවම අත්විඳින දෙයක් බවට පත් වේ.
මහා භාණ්ඩාගාරය විදෙස් ණය වාරිකයක් ලෙස ඕස්ටේලියානු රජයට අයත් ආයතනයකට ගෙවූ අමෙරිකානු ඩොලර් මිලියන 2.5ක මුදල වංචනික පාර්ශවයක් අතට බැරවීම සම්බන්ධයෙන් අද (28) අපරාධ පරීක්ෂණ දෙපාර්තමේන්තුව මුල්වරට අධිකරණයට කරුණු වාර්තා කළේය.
අපරාධ පරීක්ෂණ දෙපාර්තමේන්තුව අධිකරණය හමුවේ කියා සිටියේ ප්රශ්නගත ගෙවීම සම්බන්ධයෙන් විදේශ සම්පත් දෙපාර්තමේන්තුවේ, රාජ්ය ණය කළමනාකරණ කාර්යාලයේ
e-mail පද්ධතිය භාර සමාගම පෙර අනතුරු ඇඟවීමක් සිදුකර තිබියදීත්, පසු විපරමකින් තොරව මෙම මුදල් බැහැරකිරීම සිදුකර ඇති බවය.
ඒ අනුව රාජ්ය ණය කළමනාකරණ කාර්යාලයේ නිලධාරීන් 05 දෙනෙකුට කොටුව මහේස්ත්රාත් අධිකරණය අද විදෙස් ගමන් තහනමක් පනවනු ලැබීය.
මෙරට මහා භාණ්ඩාගාරය විදෙස් ණය වාරිකයක් ලෙස ගෙවූ අමෙරිකානු ඩොලර් මිලියන 2.5ක මුදලක් වෙනත් පාර්ශ්වයක් අතට පත්වීමේ සිදූවීම සම්බන්ධයෙන් ආන්දෝලනයක් නිර්මාණයවී ඇති පසුබිමක අපරාධ පරීක්ෂණ දෙපාර්තමේන්තුවේ නිලධාරින් අද මුල්වරට ඒ සම්බන්ධයෙන් අධිකරණයට කරුණු වාර්තා කළේය.
සිදුකෙරෙමින් පවතින විමර්ශනය සම්බන්ධයෙන් කොටුව මහේස්ත්රාත් ඉසුරු නෙත්තිකුමාර මහතාට කරුණු වාර්තා කරමින් අපරාධ පරීක්ෂණ දෙපාර්තමේන්තුවේ විමර්ශන නිලධාරියා ඉල්ලා සිටියේ මෙම විමර්ශනය සංවේදී, සූක්ෂ්ම කරුණු ඇතුළත් ක්රියාවලියක් වන බැවින් ඊට අදාළව අධිකරණයට ඉදිරිපත් කරන පිටු 27කින් යුතු වාර්තාව අධිකරණයේ රෙජිස්ට්රාර්වරයා සතු ආරක්ෂක සේප්පුවෙහි තැන්පත් කරන ලෙසය.
වැඩිදුර වාර්තාවේ විවෘත අධිකරණයේ සඳහන් කරන කරුණුවලට අමතර සංවේදී සියුම් කරුණු ඇතුළත් බැවින් ඒ පිළිබඳ මහේස්ත්රාත්වරයාගේ අවධානය යොමුකරන ලෙසද විමර්ශන නිලධාරියා අධිකරණයෙන් ඉල්ලා සිටියේය.
“ස්වාමිනි, ශ්රී ලංකා මහබැංකුවට අයත් අමෙරිකානු ඩොලර් මිලියන 2.5ක මුදලක් ව්යාජ e-mail ලිපිනයක් හරහා වංචනික පිරිසකට බැහැර කිරීම සම්බන්ධයෙන් 2026 මාර්තු 24 ලද පැමිණිල්ලකට අදාළව මෙම විමර්ශනය සිදුකරනවා. ස්වාමිනි, විවිධ කටයුතුවලට අදාළව මෙරට ක්රියාත්මක වූ ව්යාපෘති 05ක් සඳහා විදේශ සම්පත් දෙපාර්තමේන්තුව හරහා ඔස්ට්රේලියානු රජයෙන් මෙරටට ණය ආධාර ලැබී තිබෙනවා. පසුව ණය ප්රතිව්යුහගත කිරීමේ ක්රියාවලිය යටතේ විදේශ සම්පත් දෙපාර්තමේන්තුව රාජ්ය ණය කළමනාකරණ කාර්යාලය හරහා එම ණය ගෙවීම සිදුකරමින් සිට තිබෙනවා. එහිදී ඔස්ට්රේලියානු රජයේ Export finance australia නැමැති ආයතනයට සිදුකරන ලද ගෙවීමක් සම්බන්ධයෙන් තමයි මේ ප්රශ්න සහගත තත්ත්වය ඇතිවී තිබෙන්නේ. ගනුදෙනු සිදුවෙමින් පවතින එක් අවස්ථාවකදී අදාළ සමාගමේ e-mail ලිපිනයට සමාන e-mail ලිපිනයකින් ගෙවීම්වලට අදාළ ඉන්වොයිසය ඇවිල්ලා තියෙනවා. මෙහිදි මුදල් ගෙවීම සිදුකළ යුතු ආයතනයේ Domain එක කුඩා වෙනසකට තමයි ලක්වෙලා තියෙන්නේ. නිවැරදි domain එක ඕස්ට්රේලියානු රජයට අයත් “exportfinance.gov.au” වෙද්දි, ව්යාජ domain එක “exportfinance.av.com” නමින් වාණිජ අරමුණක් සහිත domain එකක් ලෙස වෙනස්කර තිබෙනවා. එසේ තිබියදී පසු විපරමක් නොකර මුදල් බැර කිරීමකුයි සිදුවී තිබෙන්නේ.”
එහිදී වැඩිදුරටත් කරුණු දැක්වූ විමර්ශන නිලධාරියා මෙම වංචනික සිදුවීමේදී විදේශ සම්පත් දෙපාර්තමේන්තුව රාජ්ය ණය කළමනාකරණ කාර්යාලයේ e-mail පද්ධතියට අනවසර ප්රවේශයක් සිදුවී ඇත්ද යන්න සම්බන්ධයෙන්ද අධිකරණයට කරුණු දක්වනු ලැබීය.
“ස්වාමිනි අපි මේ වෙද්දි ප්රශ්නගත e-mail ලිපිනවලට අදාළ පද්ධතිය පවත්වාගෙනයාම භාරව කටයුතු කළ ශ්රී ලංකා සමාගම වූ “එනෙබල්” නැමැති සමාගමින් Server login පරික්ෂා කරමින් කරමින් ඉන්නේ. එම පද්ධතියට අනවසර ප්රවේශයක් සිදුවී ඇති බවක් දැනට අනාවරණය වී නැහැ. සාමාන්යයෙන් මේ පද්ධතිය හරහා දිනකට e-mail 15,000ක් පමණ හුවමාරු වෙනවා. ඒ නිසාම එවැනි අනවසර ප්රවේශයක් සිදු වූයේද යන්න සම්බන්ධයෙන් තවදුරටත් විමර්ශන සිදුවෙමින් තියෙනවා. දණ්ඩ නීති සංග්රහයේ 162, 386, 396, 399 සහ 400 වගන්ති යටතේත්, පරිගණක අපරාධ පනත හා පොදු දේපළ පනත යටතේත් වැරදි සිදුවී ඇති බව දැනට අනාවරණය වී තිබෙනවා.”
මෙහිදි මහේස්ත්රාත්වරයා ප්රශ්න කර සිටියේ මෙම සිදුවීමේදී චේතනාන්විතව, සාපරාධි මනස සහිතව අපරාධයක් සිදුවූ බවට කරුණු අනාවරණය වී ඇත්ද යන්නයි.
ඊට පිළිතුරු දුන් විමර්ශන නිලධාරියා,
“ස්වාමිනි, ව්යාජ ලෙස domain එක වෙනස්වීම පිළිබඳ 2025.10.28 දින e-mail ලිපිනවලට අදාළ පද්ධතිය පවත්වාගෙනයාම භාරව කටයුතු කළ සමාගම දැනුවත් කිරීමක් කර තිබෙනවා.” යැයි සඳහන් කළේය.
එහිදි මහේස්ත්රාත්වරයා පෙරළා ප්රශ්නකර සිටියේ මුදල් මුදාහැරීම සිදුකර ඇත්තේ එම අනතුරු ඇඟවීමට පෙරද, පසුවද යන්නයි.
ඊට පිළිතුරු දුන් විමර්ශන නිලධාරියා සඳහන් කළේ අදාළ අනතුරු ඇඟවීම සිදුකිරීමෙන් පසු මුදල මුදාහැරීම සිදුකර ඇති බවයි.
e-mail හුවමාරු කරගැනීම හැර මුදල් බැරකිරීමට පෙර වෙනත් තහවුරු කරගැනීමේ ක්රමවේදයක් භාවිතා කර ඇත්දැයි මහේස්ත්රාත්වරයා විමර්ශන නිලධාරියාගෙන් විමසීය.
එහිදි විමර්ශන නිලධාරියා කියාසිටියේ “සාමාන්යයෙන් මෙම ගනුදෙනු හා තහවුරු කරගැනීම් සිදුවන්නේ e-mail පණිවුඩ හරහායි. අනතුරු ඇඟවීමෙන් පසු, පියවරක් ගත් බව දැනට පෙනීයන්නේ නැහැ. නමුත් ගනුදෙනුව සිදුවන නිශ්චිත මොහොතේ නිවැරදි e-mail ලිපිනයෙන්ද පණිවුඩයක් ඇවිල්ලා තියෙනවා. එබැවින් තවදුරටත් Server login අපි පරික්ෂා කරමින් ඉන්නවා. අපේ පද්ධතියට වගේම ඕස්ට්රේලියාවේ අදාළ ආයතනයේ පද්ධතියටත් අනවසර ඇතුල්වීමක් සිදුවී තිබෙද යන්න විමර්ශනය කරනවා. මේ විමර්ශනයට මේ වෙද්දිත් Interpol එක සහ Australian Federal Police සහාය ලැබෙමින් තිබෙනවා.”
මෙහිදී මහේස්ත්රාත්වරයා විමර්ශන නිලධාරින්ගෙන් ප්රශ්න කළේ නීති කෘත්යයට අදාළව දැනට සැකකරුවන් නම්කර ඇත්ද යන්නයි.
එහිදි විමර්ශන නිලධාරියා මෙසේ පිළිතුරු දුන්නේය.
“දැනට සැකකරුවන් නම් කිරීමක් නැහැ ස්වාමිනි. නමුත් වැඩිදුර වාර්තාවේ දක්වා ඇති මේ e-mail ගනුදෙනුවලට සෘජුව සම්බන්ධ වූ පුද්ගලයින් 05 දෙනෙකුට විදෙස් ගමන් තහනම් පනවන ලෙස අපි අධිකරණයෙන් ඉල්ලා සිටිනවා. ඒ වගේම ඔවුන්ගේ බැංකු ගිණුම් තොරතුරු පරික්ෂා කිරීමට අවසර දෙමින් නියෝග නිකුත් කරන්න. ඒ වගේම මේ විමර්ශනය සඳහා ශ්රී ලංකා පරිගණක හදිසි ප්රතිචාර සංසදය, රජයේ රස පරීක්ෂක, කොළඹ විශ්ව විද්යාලයේ පරිගණක අධ්යයන පීඨයේ නියෝජනය සහිත තාක්ෂණික කමිටුවක් පත්කරන ලෙස අප අධිකරණයෙන් ඉල්ලා සිටිනවා.”
එකී ඉල්ලීම්වලට අවසර ලබාදුන් කොටුව මහේස්ත්රාත් ඉසුරු නෙත්තිකුමාර මහතා වැඩිදුර විමර්ශන සඳහා මෙසේ නියෝග කළේය.
“පළමුව මේ සිදුවීමේදී අපරාධයක් සිදුවී ඇත්දැයි සොයාබැලිය යුතුයි. එසේ වී ඇත්නම් එම අපරාධය සිදුකළේ කවුදැයි දෙවනුව සොයාබැලිය යුතුයි. ඒ වගේම මින් ඉදිරියට මෙවැනි සිදුවීම් වළක්වා රාජ්ය මුදල් ආරක්ෂා කිරීම සම්බන්ධයෙන් ඉක්මන් පියවර ගැනීම අවශ්යයි. එම පියවර සම්බන්ධයෙන් විමර්ශනවල ප්රගතිය කඩිනමින් අධිකරණයට වාර්තා කරන්න.”
ඒ අනුව වැඩිදුර විමර්ශන ප්රගතිය විමසීම සඳහා මෙම නඩුව ජුනි මස 03 වැනිදා යළි කැඳවීමට නියමිතයි.
