රජයේ වෛද්ය නිලධාරීන්ගේ සංගමය (GMOA) හෙට (02) උදෑසන 8 සිට යළිත් පැය 24ක සංකේත වැඩ වර්ජනයක් ආරම්භ කිරීමට තීරණය කර තිබේ.
එම සංගමය සඳහන් කළේ, සෞඛ්ය අමාත්යාංශය ගෙන ඇති අනීතික ස්ථානමාරු ක්රමවේදයට විරෝධය පළ කරමින් මෙලෙස නැවත වැඩවර්ජනයේ නිරත වන බවය.
Category: news_main
Latest News
නිල සංචාරයක් සඳහා රුසියානු නියෝජ්ය විදේශ කටයුතු ඇමති දිවයිනට…..
රුසියානු රජයේ නියෝජ්ය විදේශ කටයුතු පිළිබද අමාත්ය අන්ද්රේ රුඩෙන්කෝ ශ්රී ලංකාවේ නිල සංචාරයක් සදහා අද (31) දින පස්වරුවේ කටුනායක ගුවන් තොටුපොළ වෙත පැමිණියේය.
ඒ මහතා සමග එරට විදේශ කටයුතු අමාත්යංශයේ උසස් නිලධාරීවරයෙකු ද දූත පිරිස ලෙස පැමිණ සිටියහ.
ඔවුන් අද දින සවස 04.20 ට ඉන්දියාවේ නවදිල්ලි නුවර සිට ඉන්දීය ගුවන් සේවයේ ඒ.අයි.- 281 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියහ.
ඔවුන් පිළිගැනීම සදහා වරාය සහ සිවිල් ගුවන් සේවා නියෝජ්ය අමාත්ය ඉංජිනේරු ජනිත රුවන් කොඩිතුවක්කු , ශ්රී ලංකාවේ රුසියානු තානාපති ලෙවාන් ජගාරෙයාන් මහතා ඇතුළු පිරිසක් කටුනායක ගුවන් තොටුපොළ විශේෂ අමුත්තන්ගේ මැදිරිය වෙත පැමිණ සිටියහ.
දිවයිනට පැමිණි ඔවුන් දින 05ක් මෙරට රැදී සිටීමටද නියමිතය.
උසස් පෙළ ප්රතිඵල නිකුත් කෙරේ…..
2025 උසස් පෙළ විභාගයේ ප්රතිඵල විභාග දෙපාර්තමේන්තුව විසින් නිකුත් කර තිබේ.
එම දෙපාර්තමේන්තුව පැවසුවේ ඒ අනුව www.doenets.lk හෝ www.results.exams.gov.lk වෙත පිවිසීමෙන් මෙම ප්රතිඵළ පරීක්ෂා කළ හැකි බවය.
2025 උසස් පෙළ විභාගය දිවයින පුරා විභාග මධ්යස්ථාන 2,362කදී පැවැත්වුණි.
විභාගය සඳහා සමස්ත අයඳුම්කරුවන් 281,810ක් පෙනී සිටි අතර ඊට පාසල් අයදුම්කරුවන් 221,413ක් සහ පෞද්ගලික අයදුම්කරුවන් 60,397ක් ඇතුළත්ය.
ඒ අනුව විශ්වවිද්යාල ප්රවේශය සඳහා අයදුම් කිරීමට 176,527ක් සුදුසුකම් ලබා තිබේ.
ඊට පාසල් අයදුම්කරුවන් 146,405ක් සහ පෞද්ගලික අයදුම්කරුවන් 30,122ක් ඇතුළත් බවද විභාග දෙපාර්තමේන්තුව සිය නිවේදනයේ සඳහන් කර තිබේ.
සමස්ත විදුලි ගාස්තුව සියයට 10කින් ඉහළට – ඒකක අනුව ප්රතිශතයේ වෙනසක්….
2026 වසරේ දෙවන කාර්තුව සඳහා විදුලි බිල 10%කින් ඉහළ දැමීමට මහජන උපයෝගීතා කොමිසම ඒකමතික තීරණයක් ගෙන තිබේ.
එසේ වුවද පාරිභෝගිකයින් පාවිච්චි කරන විදුලි ඒකක අනුව මෙවර විදුලි ගාස්තුව ඉහළ යන ප්රතිශතය වෙනස් වී ඇත.
මෙම වසරේ දෙවන කාර්තුවට අදාළව ලංකා විදුලිබල මණ්ඩලය විසින් 13.56%ක විදුලි ගාස්තු සංශෝධනයක් මහජන උපයෝගීතා කොමිසම් සභාවෙන් ඉල්ලා තිබුණු නමුත් ඉදිරිපත් වූ මහජනතාවගේ අදහස් හා යෝජනා අනුව මහජන උපයෝගීතා කොමිසම මෙලෙස විදුලි ගාස්තු ඉහළ සංශෝධනය කර තිබේ.
ඒ අනුව විදුලි ගාස්තු සංශෝධනය අප්රේල් මස 1 වන දින සිට ක්රියාත්මක වේ.
මේ යටතේ ඒකක 0 සිට 30 දක්වා වූ කාණ්ඩය සඳහා විදුලි ගාස්තුව 04.3%කින් ඉහළ යන අතර ඒ අනුව මාසිකව බිල්පතේ වැඩිවීම රුපියල් 15කි.
31-60 අතර කාණ්ඩය සඳහා විදුලි ගාස්තු 6.9%කින් ඉහළ දමා ඇති අතර ඒ අනුව එහි මාසික ගාස්තුව රුපියල් 45කින් ඉහළ ගොස් තිබේ.
61-91 අතර කාණ්ඩය සඳහා 6.9%කින් ඉහළ දමා ඇති අතර ඒ අනුව එහි මාසික වැඩිවීම රුපියල් 120කි.
91-180 දක්වා වූ කාණ්ඩය සඳහා 7.2%කින් ඉහළ ගොස් ඇති අතර එහි මාසික වැඩිවීම 420ක්ද වේ.
180ට වැඩි ඒකක සඳහා ඉහළ විදුලි ගාස්තු ප්රතිශතයකින් වැඩි වී ඇති අතර එය 25.3%කින් විදුලි ගාස්තු වැඩිවීමක් ද සිදුකර තිබේ.
මාසික ඒකක පරිභෝජනය ඒකක 180ට අඩු ආගමික සහ පුණ්ය ආයතන සඳහා විදුලි ගාස්තු ඉහළ නොදැමීමට පියවර ගෙන ඇති අතර එම අංශයේම ඒකක 180ට වැඩි විදුලි පරිභෝජනයක් සඳහා පමණක් 9.6%ක විදුලි ගාස්තු ඉහළ නැංවීමක් සඳහාද අනුමැතිය ලබා දීමට ශ්රී ලංකා මහජන උපයෝගීතා කොමිසම තීරණය කර ඇත.
මේ අතර පොදු කාර්ය සහ පාරිභෝගික කාණ්ඩය සඳහා විදුලි ගාස්තුව 8%කින් ඉහළ දැමීමටද තීරණය කර ඇති අතර කර්මාන්ත අංශය සඳහා විදුලි ගාස්තුව 8.7ක් දක්වා පමණක් සීමා කිරීමටද එම කොමිෂන් සභාව තීරණය කර ඇත.
රාජ්ය ආයතන සඳහාද විදුලි ගාස්තුව 14.4%කින් ඉහළ දැමීමටද උපයෝගීතා කොමිසම තීරණය කර ඇත.
CCD යේදී ඉෂාරා සෙව්වන්දි වෙනුවෙන් සූදානම් කළ උපන්දින සාදය…..
ගනේමුල්ල සංජීව ඝාතනය සම්බන්ධයෙන් චෝදනා එල්ලව කොළඹ අපරාධ කොට්ඨාසයේ රඳවාගෙන ප්රශ්න කරමින් සිටින ඉෂාරා සෙව්වන්දි වෙනුවෙන් උපන්දින සාදයක් සූදානම් කිරීමේ පුවතක් වාර්තා විය.
සැකකාරියගේ උපන්දිනය පසුගිය ඉරිදා (29) යෙදී තිබී ඇති අතර ඒ වෙනුවෙන් කොළඹ දිසා අපරාධ කොට්ඨාසය තුළ කේක් කපා සැමරුමක් සූදානම් කර ඇති බවට කොළඹ දිසාව භාර නියෝජ්ය පොලිස්පති නිශාන්ත සොයිසා මහතාට පෞද්ගලික ඔත්තුකරුවකුගෙන් තොරතුරක් ලැබී තිබේ.
එම තොරතුර එම කොට්ඨාසයේ බුද්ධි අංශ නිලධාරියෙකුගෙන් තහවුරු කරගැනීමෙන් පසු එහි ස්ථානාධිපතිවරයාට දුරකථන ඇමතුමක් ගෙන එම ක්රියාව වහාම නවත්වන්නැයි නියෝජ්ය පොලිස්පතිවරයා දැඩිව පවසා ඇති බව සඳහන් වේ.
අනතුරුව කොළඹ මධ්යම කොට්ඨාසය භාර ජ්යෙෂ්ඨ පොලිස් අධිකාරී මහේෂ් කුමාරසිංහ මහතාව කොළඹ දිසා අපරාධ කොට්ඨාසයට යවා ඒ පිළිබඳ සොයාබලන ලෙස උපදෙස් ලබාදී ක්ෂණිව නියෝජ්ය පොලිස්පති නිශාන්ත සොයිසා මහතාද එම ස්ථානයට ගොස් තිබේ.
එහිදී සිදුකළ සොයාබැලීමේදී අනාවරණ වී ඇත්තේ, ඉෂාරා සෙව්වන්දිගේ සොහොයුරා කේක් ගෙඩිය එහි ගෙනැවිත් ඇති බවය.
උපන්දින සැමරුමට සෙව්වන්දිගේ ලොකු අම්මා හා ඇයගේ පුත්රයාද කොළඹ දිසා අපරාධ කොට්ඨාසයට පැමිණ තිබේ.
අනතුරුව ඉෂාරා සෙව්වන්දි, ඇය රඳවා සිටින සිර කුටියෙන් පිටතට ගෙන ඒ අසල වූ ස්ථානයක කේක් ගෙඩිය කැපීමට සියල්ල සූදානම්කර තිබී ඇති බවත් මෙතෙක් සිදුකළ විමර්ශනවලදී අනාවරණ වී තිබුණි.
උසස් පොලිස් නිලධාරියෙකු සඳහන් කළේ ඒ සඳහා කොළඹ අපරාධ කොට්ඨාසයේ ස්ථානාධිපතිවරයා අවසර ලබාදී ඇති බවද අනාවරණ වන බවය.
එමෙන්ම “කේක් එක කපලා ෆොටෝ ගන්න එපා. පස්සේ ඔවා ඉන්ටර්නේට් එකේ යයි” යනුවෙන් ඔහු පවසා ඇති බවත් සඳහන් වේ.
ඒ අනුව ඉෂාරා සෙව්වන්දිගේ සොහොයුරා, ඇයගේ ලොකු අම්මා හා ඇයගේ පුත්රයාගෙන් මෙන්ම අදාළ සිදුවීම සිදුවන අවස්ථාවේ රාජකාරියේ නිරත පොලිස් නිලධාරීන්ගෙන් ද ඇතුළුව 15 දෙනෙකුගෙන් පමණ ප්රකාශ ලබාගෙන තිබේ.
එමෙන්ම කොළඹ අපරාධ කොට්ඨාසයේ ස්ථානාධිපතිවරයාගේ ක්රියාකලාපය සම්බන්ධයෙන් කඩිනමින් විමර්ශනයක් සිදුකරන ලෙස පොලිස් විශේෂ විමර්ශන ඒකකයට කොළඹ දිසාව භාර නියෝජ්ය පොලිස්පතිවරයා විසින් ලිඛිතව දැනුම්දී තිබුණි.
උසස් පොලිස් නිලධාරියෙකු සඳහන් කළේ මෙම කේක් ගෙඩිය රැගෙන ඒම සම්බන්ධයෙන් ඉෂාරා සෙව්වන්දිගේ සහෝදරයා සමග අදාළ ස්ථානාධිපතිවරයා දුරකථනය ඔස්සේ කතාබහකර ඇති බවත් කලක සිට ඔවුන් දෙදෙනා දුරකථනය ඔස්සේ කතාබහ කර ඇති බවත් විමර්ශනවලදී අනාවරණ වී ඇති බවය.
ඒ අනුව පොලීසිය පවසන්නේ ස්ථානාධිපතිවරයා විසින් අදාළ උපන්දින සාදය සැලසුම්කර අවස්ථාව ලබාදී ඇති බවය.
පොලිස් ආරංචිමාර්ග පවසන්නේ බොහෝදුරට අදාළ ස්ථානාධිපතිවරයාගේ වැඩ ඉදිරියේදී තහනම් කිරීමට නියමිත බවය
සිද්ධිය සම්බන්ධ වැඩිදුර විමර්ශන කොළඹ දිසාව භාර නියෝජ්ය පොලිස්පති නිශාන්ත සොයිස්සා මහතාගේ සෘජු අධීක්ෂණයෙන් ක්රියාත්මකය.
ඉන්දීය මහ කොමසාරිස්වරයා සහ වෙළෙඳ අමාත්යවරයා අතර සාකච්ඡාවක්….
ඉන්දීය මහ කොමසාරිස් සන්තෝෂ් ජා මහතා සහ වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්ය වසන්ත සමරසිංහ මහතා අතර හමුවක් සිදුව තිබේ.
වෙළෙඳ අමාත්යංශයේදී ඊයේ (27) පැවති එම හමුවට ඉන්දීය මහකොමසාරිස් කාර්යාලයේ සංවර්ධන සහයෝගීතා උපදේශක Maitrey Kulkarni මහතා ඇතුළු පිරිසක් එක්ව ඇති අතර වෙළෙඳ අමාත්යංශය නියෝජනය කරමින් වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්යංශ ලේකම් කේ.ඒ. විමලේන්තිරරාජා මහතා, ආචාර්ය ශාන්ත ජයරත්න මහතා, සමූපකාර තොඟ වෙළෙඳ සංස්ථාවේ සභාපති කෝසල විල්බාව මහතා සහභාගි වී ඇත.
මෙහිදී දෙරට අතර පවතින මේ ද්විපාර්ශ්වික වෙළෙඳ ගනුදෙනු තවදුරටත් පුළුල් කිරීම, ආයෝජන සබඳතා ප්රවර්ධනය, නව ආයෝජන අවස්ථා හඳුනා ගැනීම සහ ඒවා දිරිමත් කිරීම, දෙරටේම ආහාර සුරක්ෂිතතාව තහවුරු කිරීම සඳහා සහයෝගීතාවයෙන් කටයුතු කිරීම මෙන්ම සමුපකාර ක්ෂේත්රයේ දියුණුව වෙනුවෙන් අන්යෝන්ය සහයෝගීතාව ශක්තිමත් කිරීම පිළිබඳ සාකච්ඡාවට ගැනුණි.
මෙහිදී ඉන්දියානු මහකොමසාරිස්වරයා පැවසුවේ ශ්රී ලංකා නිෂ්පාදන ඉන්දියානු වෙළෙඳපොළට හඳුන්වාදීම සඳහා ප්රදර්ශන සහ වෙළෙඳපොළ අවස්ථා ඇති කිරීමට අපේක්ෂා කරන බවය. එමෙන්ම තේ සහ ඇඟලුම් වැනි ක්ෂේත්ර කෙරෙහි එහිදී වැඩි අවධානයක් යොමු කරන බවත් ශ්රී ලංකාවේ උසස් තත්වයේ ඇඟලුම් සඳහා ඉන්දියාවේ විශාල ඉල්ලුමක් පවතින බැවින් එම අවස්ථාවන්ගෙන් ප්රයෝජන ගැනීමට අපනයනකරුවන්ට මඟපෙන්වීම තම අරමුණ බවත් සඳහන් කෙරිණි.
ශ්රී ලංකාවේ සමූපකාර තොග වෙළෙඳ සංස්ථාව සහ ඉන්දියාවේ NCL ආයතනය අතර සහයෝගීතා ගිවිසුමක් ඇති කර ගැනීමට අවධානය යොමු කර තිබෙන බවත් එය සෘජු සැපයුම් බැඳීමකට වඩා පුළුල් සහයෝගීතාවක් ලෙස හැඳින්විය හැකි බවත් ඉන්දීය නියෝජිතයන් මෙහිදී පෙන්වා දුන්නේය.
ශ්රී ලංකාවේ සහල් වෙළෙඳපොළ තත්ත්වය සහ මිල පාලනය පිළිබඳව ද මෙහිදී දීර්ඝ වශයෙන් සාකච්ඡා කෙරුණු අතර එහිදී සහල් මිල පාලනය කර තිබුණද සම්බා වැනි විශේෂ සහල් වෙළෙඳපොළ හිඟයක් පවතින බව මෙහිදී වෙළෙඳ අමාත්යවරයා විසින් පෙන්වා දුන්නේය.
ශ්රී ලංකා රජයට සහල් මෙට්රික් ටොන් 300,000ක් පමණ කළමනාකරණය කර ගැනීමට හැකිනම් අනිවාර්යයෙන්ම මිල පාලනය කළ හැකි බව මෙහිදී වෙළෙඳ අමාත්ය වසන්ත සමරසිංහ මහතා සඳහන් කළේය.
ඉන්දියාවේ ගොවින්ගේ ආදායම සුරක්ෂිත කිරීම සඳහා ඉන්දීය රජය විසින් නියම කරන ලද අවම සහතික මිලක් යටතේ වී මිලදී ගැනීම් සිදුකෙරෙන බව ඉන්දීය මහකොමසාරිස් සන්තෝෂ් ජා මහතා මෙහිදී පෙන්වාදුන් අතර එරට අත්යවශ්ය භාණ්ඩ පනතේ බලතල යොදාගෙන අසීමිත තොග රැස් කිරීම් රජය විසින් වළක්වා ඇති බවත් සදහන් කෙරිණි.
එමෙන්ම ඉන්දියාවේ FCI හෙවත් ෆුඩ් කෝපරේෂන් ඔෆ් ඉන්දියා නම් ආයතනය සතුව පවතින දැවැන්ත ගබඩා පද්ධතිය සම්බන්ධයෙන් ද මහ කොමසාරිස්වරයා මෙහිදී වෙළෙඳ අමාත්ය වසන්ත සමරසිංහ මහතා දැනුවත් කිරීමටද කටයුතු කළේය.
රුසියානු විදේශ කටයුතු නියෝජ්ය අමාත්ය ඇන්ඩ්රි රුඩෙන්කෝ දිවයිනට…
රුසියානු සමූහාණ්ඩුවේ විදේශ කටයුතු නියෝජ්ය අමාත්ය ඇන්ඩ්රි රුඩෙන්කෝ සංචාරයක් සඳහා මෙරටට පැමිණීමට නියමිතව තිබේ.
ලබන 31 වෙනිදා ඔහු දිවයිනට පැමිණෙනු ඇති බව විදේශ කටයුතු අමාත්යංශය සඳහන් කරයි.
රුසියානු නියෝජ්ය අමාත්යවරයා ශ්රී ලංකාව සහ රුසියාව අතර 11 වන ද්විපාර්ශ්වික දේශපාලන උපදේශන රැස්වීමට සහභාගීවීමට නියමිතය.
වන්දි ගෙවන කෙහෙළිය – මිලියන 75ක් රජයට ගෙවීමට නියෝග….
2022 වසරේදී ඉන්දීය ණය යෝජනා ක්රමය යටතේ ලියාපදිංචි නොකළ සමාගමකින් ප්රසම්පාදන ක්රියාවලියෙන් පරිබාහිරව වෛද්ය සැපයුම් මිලදී ගැනීම තුළ හිටපු සෞඛ්ය අමාත්ය කෙහෙළිය රඹුක්වැල්ල ඇතුළු වගඋත්තරකරුවන් මූලික අයිතිවාසිකම් උල්ලංඝනය කර ඇති බවට ශ්රේෂ්ඨාධිකරණය අද (27) තීන්දු කළේය.
ඒ අනුව හිටපු සෞඛ්ය අමාත්ය කෙහෙළිය රඹුක්වැල්ලට රුපියල් කෝටි හත හමාරක් සහ සෙසු වගඋත්තරකරුවන් සිව්දෙනා රුපියල් කෝටි 5 බැගින් රජයට වන්දි ගෙවන ලෙසයි අධිකරණය නියෝග කළේ.
කෙහෙළිය රඹුක්වැල්ල සෞඛ්ය අමාත්යවරයා ලෙස කටයුතු කළ 2022 වර්ෂයේදී ආර්ථික අර්බුදයට මුවාවී ඉන්දීය ණය යෝජනා ක්රමය යටතේ ලියාපදිංචි නොකළ සමාගමකින් ප්රසම්පාදන ක්රියාවලියෙන් පරිබාහිරව වෛද්ය සැපයුම් මිලදී ගැනීම සම්බන්ධයෙන් චෝදනා එල්ල විය.
“හියුමන් ඉමියුනෝග්ලොබියුලින්” සහ “රිටොක්සිමැබ්” යන ප්රමිතියෙන් තොර එන්නත් සිද්ධි පිළිබඳ ඇරඹි විමර්ශන ද එහි එක් අවස්ථාවකි.
අදාළ ප්රමිතියෙන් තොර එන්නත් සම්බන්ධයෙන් මාළිගාකන්ද මහේස්ත්රාත් අධිකරණය හමුවේ නීති කෘත්යයක් ආරම්භ කෙරුණු අතර ඊට අදාළව හිටපු සෞඛ්ය අමාත්ය කෙහෙළිය රඹුක්වැල්ල ඇතුළු විත්තිකරුවන් 12 දෙනෙකු රක්ෂිත බන්ධනාගාරගත කර පසුව ඇප මත මුදා හැරුණි.
අනතුරුව මෙම සිදුවීමට අදාළව රජයේ මුදල් රුපියල් ලක්ෂ 1,444ක් සාපරාධී සාවද්ය පරිහරණය ඇතුළු චෝදනා සම්බන්ධයෙන් නීතිපතිවරයා විසින් හිටපු සෞඛ්ය අමාත්යවරයා ඇතුළු විත්තිකරුවන් 12 දෙනාට එරෙහිව අධිචෝදනා ගොනුකරනු ලැබීය.
ඒ අනුව එම නඩුව මේ වනවිට කොළඹ ස්ථිර ත්රිපුද්ගල මහාධිකරණ විනිසුරු මඩුල්ලක් ඉදිරියේ දිනපතා විභාග වෙමින් පවතියි.
ඒ අතර ඉන්දියානු ණය යෝජනා ක්රමය යටතේ ලියාපදිංචි නොකළ සමාගමකින් ප්රසම්පාදන ක්රියාවලියෙන් බැහැරව වෛද්ය සැපයුම් මිලදී ගැනීමේ සිද්ධියට අදාළව, ඒ හරහා ආණ්ඩුක්රම ව්යවස්ථාවේ මූලික අයිතිවාසිකම් උල්ලංඝනය කළේ යැයි හිටපු සෞඛ්ය අමාත්ය කෙහෙළිය රඹුක්වැල්ල ඇතුළු වගඋත්තරකරුවන් පිරිසකට එරෙහිව ට්රාන්ස්පේරන්සි ඉන්ටර්නැෂනල් ශ්රී ලංකා ආයතනය ඇතුළු පාර්ශ්ව දෙකක් ශ්රේෂ්ඨාධිකරණයට මූලික අයිතිවාසිකම් පෙත්සම් ගොනුකර තිබුණි.
ඒ අනුව එම පෙත්සම් සම්බන්ධයෙන් සිදුකළ දීර්ඝ නඩු විභාගයකින් අනතුරුව කුමුදුනි වික්රමසිංහ සහ ජනක් ද සිල්වා යන ශ්රේෂ්ඨාධිකරණ විනිසුරුවරුන්ගේ එකඟත්වය ඇතිව අගවිනිසුරු ප්රීති පද්මන් සූරසේන මහතා එහි තීන්දුව අද (27) ප්රකාශයට පත් කළහ.
අගවිනිසුරුවරයා සඳහන් කළේ “සේවොරිට් ෆාමසූටිකල් ප්රයිවට් ලිමිටඩ්” නමැති සමාගමකින් වෛද්ය සැපයුම් මිලදී ගැනීම සඳහා 2022 වසරේ සැප්තැම්බර් 26 වනදා අමාත්ය මණ්ඩලයට ඉදිරිපත් කළ සංදේශය සකස් කර ඇත්තේ වගඋත්තරකාර හිටපු සෞඛ්ය ලේකම් ජනක ශ්රී චන්ද්රගුප්ත බවය.
අනතුරුව කෙහෙළිය රඹුක්වැල්ල හිටපු අමාත්යවරයා ඊට අමාත්ය මණ්ඩල අනුමැතිය ලබාගෙන ඉන්දිය ණය යෝජනා ක්රමය යටතේ වගඋත්තරකාර සමාගමෙන් එම වෛද්ය සැපයුම් මිලදී ගැනීමට ක්රියාකොට ඇතැයි තීන්දුවේ සඳහන් විය.
එමෙන්ම මෙම වෛද්ය සැපයුම් මිලදී ගෙන ඇත්තේ ජාතික ඖෂධ නියාමන අධිකාරිය යටතේ ලියාපදිංචි නොකළ සමාගමකින් බවත් එම අධිකාරියේ වගඋත්තරකාර නිලධාරින් දැන දැනම ප්රසම්පාදන මාර්ගෝපදේශ හා ජාතික ඖෂධ නියාමන අධිකාරි පනතේ ප්රතිපාදන උල්ලංඝනය කර මෙම වෛද්ය සැපයුම් මිලදී ගැනීම සඳහා අනුමැතිය ලබාදී තිබෙන බවත් නඩු තීන්දුව තුළ සඳහන්ය.
ජනතා සුබසාධනය සඳහා වෙන්කර තිබෙන රාජ්ය අරමුදල් මෙමගින් ඔවුන් අවභාවිත කරමින් එම මුදල් ජනතාවට අහිමි කොට ඇති බවයි අගවිනිසුරුවරයා කියා සිටියේය.
මහජනතාවට සේවය කිරීමට වගඋත්තරකරුවන් බැඳී සිටින අතර එම බැඳීම්වල වගකීම ඔවුන් තේරුම් නොගන්නේ නම් එය මතක්කර දීමට අධිකරණය බැඳී සිටින බවත් තීන්දුවේ සඳහන්වේ.
එබැවින් කෙහෙළිය රඹුක්වැල්ල ඇතුළු වගඋත්තරකරුවන් මෙරට උත්තරීතර ආණ්ඩු ක්රම ව්යවස්ථාවේ 12 (1) ව්යවස්ථාව යටතේ සහතික කර තිබෙන “නීතිය ඉදිරියේ සමාන සැලකිලි ලැබීමට ඇති සර්ව සාධාරණත්වයේ අයිතිවාසිකම”උල්ලංඝනය කර ඇති බව ත්රිපුද්ගල විනිසුරු මඩුල්ල සිය අවසන් තීන්දුව තුළින් ප්රකාශ කළහ.
ඒ අනුව හිටපු සෞඛ්ය අමාත්ය කෙහෙළිය රඹුක්වැල්ල සිය පෞද්ගලික මුදලින් රුපියල් මිලියන 75ක මුදලක් රජයට ගෙවිය යුතු බවයි විනිසුරු මඩුල්ල නඩු නියෝග කර සිටියහ.
ඊට අමතරව එවක සෞඛ්ය ලේකම් ජනක ශ්රී චන්ද්රගුප්ත සහ ජාතික ඖෂධ නියාමන අධිකාරියේ හිටපු සභාපති මහාචාර්ය එස්.ඩී. ජයරත්න රුපියල් මිලියන 50 බැගින් වූ මුදලක් වන්දි වශයෙන් රජයට ගෙවිය යුතු බව නියෝගයේ සඳහන් විය.
එසේම ජාතික ඖෂධ නියාමන අධිකාරියේ හිටපු ප්රධාන විධායක නිලධාරී වෛද්ය විජිත් ගුණසේකර සහ වෛද්ය සැපයුම් අංශයේ හිටපු අධ්යක්ෂ වෛද්ය තුසිත සුදර්ශන ද රුපියල් මිලියන 50 බැගින් රජයට වන්දි ගෙවිය යුතු බව ත්රිපුද්ගල ශ්රේෂ්ඨාධිකරණ විනිසුරු මඩුල්ල නියෝග කර සිටියහ.
මේ අතර මෙම ප්රශ්නගත වෛද්ය සැපයුම් මිලදී ගැනීමේ ක්රියාවලිය තුළින් අල්ලස් පනත යටතේ කිසියම් ප්රතිපාදනයක් උල්ලංඝනය වී ඇත්නම් ඊට අදාළව අවශ්ය විමර්ශන මෙහෙයවීමට කරුණු සලකා බලන ලෙස විනිසුරු මඩුල්ල අල්ලස් හෝ දූෂණ චෝදනා විමර්ශන කොමිෂන් සභාවට නියෝග කළහ.
RMV ලොක්කා CID අත්අඩංගුවට….
මෝටර් රථ ප්රවාහන දෙපාර්තමේන්තුවේ කොමසාරිස් ජනරාල්වරයා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.
සුරේෂ් සලේ ගැන අධිකරණය CIDයට දුන් නියෝගය….
රැඳවුම් භාරයේ ප්රශ්න කරමින් සිටින රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජනරාල් සුරේෂ් සලේ අප්රේල් 22 වැනිදා අනිවාර්යයෙන්ම අධිකරණයට ඉදිරිපත් කරන ලෙස කොටුව මෙහස්ත්රාත් ඉසුරු නෙත්තිකුමාර මහතා අපරාද පරීක්ෂණ දෙපාර්තමේන්තුවට අද (26) නියෝග කළේය.
2018 වසරේ නොවැම්බර් 29 වැනිදා වව්නතිව්හිදී පොලිස් නිලධාරින් දෙදෙනෙකු ඝාතනයවීම සහ පාස්කු ඉරුදින ත්රස්ත ප්රහාරයට පසු සයින්දමරුදු නිවසක සිදුවූ පිපිරීම සම්බන්ධයෙන් සිදුකළ විමර්ශන නොමඟ යැවීම පිළිබඳව වූ නඩුව කොටුව මහේස්ත්රාත් ඉසුරු නෙත්තිකුමාර මහතා ඉදිරියේ අද කැඳවනු ලැබීය.
එහිදී කොටුව මහේස්ත්රාත් ඉසුරු නෙත්තිකුමාර මහතා විමර්ශන නිලධාරීන්ගෙන් ප්රශ්න කළේ තෙවැනි සැකකාර සුරේෂ් සලේ අද දින අධිකරණයට ඉදිරිපත් නොකරන්නේ ඇයිද යන්නය.
සැකකරු රැඳවුම් භාරයේ ප්රශ්න කරමින් සිටින බැවින් අද දිනයේ අධිකරණයට ඉදිරිපත් නොකරන බව විමර්ශන නිලධාරීන් පැවසීය.
ඊට ප්රතිචාර දැක්වූ කොටුව මහේස්ත්රාත්වරයා මෙසේ නියෝග කළේ.
“තෙවැනි සැකකරු මේවෙද්දි හුදෙක් රැඳවුම් භාරයේ සිටින තැනැත්තෙක් නොවෙයි. ඔහු අපරාධ නඩුවක සැකකාරයෙක් ලෙස නම් කළ තැනැත්තෙක්. ඒ නිසා මීළඟ දිනයේ අනිවාර්යයෙන්ම ඔහු අධිකරණයට ඉදිරිපත් කරන ලෙස නියෝග කරනවා.”
තවදුරටත් කරුණු දක්වමින් අපරාධ පරීක්ෂණ දෙපාර්තමේන්තුව කියාසිටියේ පෙර නඩු වාරයට පසුදින නඩුවේ සාක්ෂිකරුවෙකුගේ නිවසට යුද හමුදා බුද්ධි නිලධාරියෙකු යාම සම්බන්ධයෙන් විමර්ශනයක් ආරම්භ කරඇති බවය.
“ස්වාමිනි, සැකකාර සුරේෂ් සලේ පාස්කු ඉරුදින ත්රස්ත ප්රහාරයට පෙර යුද හමුදා බුද්ධි අංශය මීගමුව ප්රදේශයේ පවත්වාගෙන ගිය තොරතුරුකරුවෙකු හරහා මුස්ලිම් අන්තවාදීන් සිව්දෙනෙකුට කතෝලික පල්ලිපෙන්වූ බවට ප්රකාශ ලබාදුන් පුද්ගලයා සම්බන්ධයෙන් පසුගිය නඩුවාරයේ අප අනාවරණ කළා. පසුදින යුද හමුදා බුද්ධි නිලධාරියෙකු එම සාක්ෂිකරුගේ නිවසට ගිහින් තියෙනවා. දැන් ඔහු නිවස අත්හැර ගිහින්. ඒ හරහා සාක්ෂිකරුට යම් බලපෑමක් වෙලා තියෙනවා”
සුරේෂ් සලේ මහතා වෙනුවෙන් නීතිඥ අසිත් සිරිවර්ධන අධිකරණයට කරුණු දැක්වුවේය.
“ස්වාමිනි, මේ ත්රස්ත ප්රහාරයට පසුව ජාත්යන්තර කණ්ඩායම් සිදුකළ විමර්ශනවලදී පවා මාගේ සේවාදායකයාට එරෙහිව කිසිදු කරුණක් අනාවරණය වී නැහැ. ජනාධිපති පරීක්ෂණ කොමිසමේ හෝ මගේ සේවාදායකයාට එරෙහිව නිර්දේශ නැහැ. සැකකාරයෝ 25කට එරෙහිව අධිචෝදනා 23,000ක් තියෙන කොළඹ මහාධිකරණ නඩුවේවත් මගේ සේවාදායකයාගේ නම නැහැ. එහෙම තියෙද්දි මේ ප්රහාරය ගැනම විමර්ශනය කළ ජයකි ද අල්විස් වාර්තාවෙන් නඩු පවරන්න කියලා නියෝග කරපු වත්මන් මහජන ආරක්ෂක අමාත්යාංශයේ ලේකම් රවී සෙනවිරත්න සහ කොන්ත්රාත් පදනමට අපරාධ පරීක්ෂණ දෙපාර්තමේන්තුවේ අධ්යක්ෂ ලෙස කටයුතු කරන ශානි අබේසේකර යටතේ සිදුකරන නඩුවකට මගේ සේවාදායකයාට චෝදනා ගොනුකරලා තියෙනවා.”
මෙහිදී සැකකාර සුරේෂ් සලේට එරෙහිව දැනට ක්රියාත්මක විමර්ශනය පක්ෂග්රාහීව අඩුපාඩු රැසක් සහිතව සිදුවෙමින් පවතින බවටද නීතිඥවරයා විවෘත අධිකරණයේ චෝදනා කළේය.
“ස්වාමිනි, මේ සිදුකෙරෙන විමර්ශනයට පාදකවෙලා තියෙන්නේ චැනල් 4 වාර්තා වැඩසටහන. එහෙම තියෙද්දිත් ඒ පිළිබඳ සොයා බැලීමට පත්කළ කමිටුවේ අවසන් වාර්තාව මේ නඩු ගොනුවේ නැහැ. ඒ වාර්තාවේ තියෙනවා දැනට ස්විට්සර්ලන්තයේ දේශපාලන රැකවරණය ලබමින් ඉන්න අසාද් මව්ලානා නමැත්තා එක්සත් ජාතින්ගේ මානව හිමිකම් කවුන්සිලය හමුවේ සිදුකරන ලද ප්රකාශය මෙරට පත්කරන ලද කමිටුව විසින් ඉල්ලපුවාම එය දෙන්න බැහැ කිව්වා කියලා. මොකද අසාද් මව්ලානා ඒ ප්රකාශය දෙනවාට අකමැත්ත පළකරලා තියෙනවා. එහෙම ප්රකාශය දෙනවාටත් අකමැති පුද්ගලයෙක් කරපු ප්රකාශයක් මත පදනම්වෙලා කොහොමද ස්වාමිනි මේ විමර්ශනය කරන්නේ. අපරාධ පරීක්ෂණ දෙපාර්තමේන්තුවේ හිටපු අධ්යක්ෂවරයෙක් වුණු රෝහාන් ප්රෙමරත්න සාරා ජෙස්මින්ගේ DNA වාර්තා සිදුකිරීම සම්බන්ධයෙන් මේ විමර්ශනයට අදාළව ප්රකාශයක් ලබාදී තිබෙනවා. එම ප්රකාශයේ මගේ සේවාදායකයාට වාසි සහගත කරුණු ඇතුළත් වන බැවින් විමර්ශන නිලධාරීන් එය අධිකරණයට ඉදිරිපත් කරන්නේ නැහැ. ස්වාමිනි, මේ විමර්ශනය සම්පූර්ණයෙන්ම පක්ෂග්රාහිව සිදුකරන්නේ. ප්රධාන විමර්ශන නිලධාරියා වෙච්ච අපරාධ පරීක්ෂණ දෙපාර්තමේන්තුවේ වර්තමාන අධ්යක්ෂවරයා ශ්රෙෂ්ඨාධිකරණයට දුන්නු දිවුරුම් ප්රකාශයකින් පිළිගෙන තිබෙනවා ඔහු එම තනතුරට ඒමට මාස 02කට කළින් දේශපාලනය කළා කියලා. ස්වාමිනි ස්වාභාවික යුක්තියේ මූලධර්මයක් තමයි තමන්ගේ නඩුවේ විමර්ශනය තමන්ම නොකළ යුතුයි කියන එක. ඉතිං ස්වාමිනි මා අධිකරණයෙන් ඉල්ලා සිටිනවා මේ විමර්ශනය වහාම අපරාධ පරීක්ෂණ දෙපාර්තමේන්තුවේ වත්මන් අධ්යක්ෂවරයා යටතේ නොමැති වෙනත් ඕනෑම විමර්ශන කණ්ඩායමකට යොමු කරන්න කියලා. ”
කෙසේවෙතත් විත්තියේ නීතිඥවරයා සිදුකළ මෙම කරුණු දැක්වීමට අපරාධ පරීක්ෂණ දෙපාර්තමේන්තුව යළි විවෘත අධිකරණයේ ප්රතිචාර දැක්වුවේය.
“ස්වාමිනි, විත්තිය කියන විදිහට මේ විමර්ශනය ශානි අබේසේකර මහත්තයාගෙවත් වෙන කාගෙවත් වුවමනාවට සිදුවෙන්නේ නැහැ. මේ තුන්වන සැකකරුව අත්අඩංගුවට ගත්තේ ඔහුගේ සැකකාරභාවය පිළිබඳ පැහැදිලිව ප්රමාණවත් කරුණු තියෙන නිසයි. හැමදේම විවෘත අධිකරණයේ කියන්න බැරිවුනාට අපි මේ වෙද්දිත් සාක්ෂිකරුවන් 05 දෙනෙකුව මහේස්ත්රාත්වරයා හමුවට ඉදිරිපත් කරලා ප්රකාශ ලබා දී තිබෙනවා. මේ විමර්ශනය සිදුවෙන්නේ විශාල සිද්ධින් දාමයක සම්බන්ධතාවයන් ගැන. ඒ සිදුවීම් සියල්ලට යුද්ධ හමුදා බුද්ධි අංශයේ සහ රාජ්ය බුද්ධි සේවයේ ඇතැම් නිලධාරීන්ගේ සම්බන්ධතා තිබුණාද කියලා විමර්ශනය වෙනවා.”
සියලු කරුණු සලකා බැලීමෙන් පසු කොටුව මහේස්ත්රාත් ඉසුරු නෙත්තිකුමාර මහතා මෙසේ නියෝග නිකුත් කළේය.
“රැඳවුම්භාරයේ සිටින තුන්වැනි සැකකරුගෙන් නීතිඥවරයා උපදෙස් ලබාගන්නා අවස්ථාවේ එම සන්නිවේදනයට අපරාධ පරීක්ෂණ දෙපාර්තමේන්තුවේ නිලධාරීන් ඇහුම්කන් නොදිය යුතුයි. චැනල් 4 වැඩසටහනේ අදාළ ප්රකාශ සිදුකරන තැනැත්තාගෙන් ප්රකාශ ලබාගෙන නැහැ කියලා විත්තිය චෝදනා කරනවා. එම ප්රකාශ ලබාගැනීම අතිශයින් වැදගත්. වහාම ඊට උත්සාහ කරන්න. ඒ වගේම විමර්ශකයා මාරු කරන්න කියන එක බරපතළ ඉල්ලීමක්. මේ විමර්ශනය මුලසිටම කරලා තියෙන්නේ ඒ විමර්ශකයා. ඔහුගෙන් විමර්ශනය ඉවත්කිරීම හරහා යම් වරදක් වුවහොත් එය නිවැරදි කරන්න බැහැ. ඉදිරියේදී අවශ්ය වුවහොත් අවධානය යොමු කරන්න පුළුවන්. ඒ නිසා විමර්ශකයා ඉවත්කරන්න කියන ඉල්ලීම මෙම අවස්ථාවේ ඉවතදමනවා. ”
වැඩිදුර විමර්ශන වාර්තා ඉදිරිපත් කිරීම සඳහා මෙම නඩුව අප්රේල් 22 යළි කැඳවීමට නියමිතයි.