නීතිවිරෝධී අයුරින් ඉන්ධන රැස්කර ඇති ස්ථාන කොන්දේසි විරහිතව වටලන ලෙසට මහජන ආරක්ෂක නියෝජ්ය අමාත්ය නීතිඥ සුනිල් වටගල මහතා පොලීසියට උපදෙස් ලබාදී තිබේ.
නියෝජ්ය අමාත්යවරයා මේ බව ප්රකාශ කළේ, තිඹිරිගස්යාය ප්රාදේශීය සම්බන්ධීකරණ රැස්වීමට එක්වෙමිනි.
රට තුළ ඉන්ධන අරපිරිමැස්මෙන් භාවිත කළ යුතු බවත් ජනාධිපතිවරයාගේ සිට සෑම කෙනෙකුම එම ආදර්ශය ලබාදී ඇති බවත් ඔහු වැඩිදුරටත් කීය.
2002 වසරේ තණමල්විල ප්රදේශයේ සිදු වූ පංච පුද්ගල ඝාතන සිද්ධියක් සම්බන්ධයෙන් චෝදනා ලැබූ සැකකරුවන් දෙදෙනෙකුට මොනරාගල මහාධිකරණය විසින් මරණ දඬුවම නියම කර තිබේ.
2002 ජුනි 6 වන දින තණමල්විල, කිතුල්කොටේ ප්රදේශයේදී ටී-56 ගිනිඅවි සහ බෝර 12 තුවක්කු භාවිතා කරමින් පුද්ගලයින් කිහිපදෙනෙකුට වෙඩි තබා ඝාතනය කිරීමේ සිද්ධියක් වාර්තා වී තිබුණි. එහිදී 13 හැවිරිදි දැරියක් ඇතුළු පුද්ගලයින් පස්දෙනෙකු ජීවිතක්ෂයට පත්විය.
සිද්ධිය සම්බන්ධයෙන් අපරාධ පරික්ෂණ දෙපාර්තමේන්තුවේ නිලධාරින් විසින් විමර්ශන සිදුකර අදාළ නඩුව මොනරාගල මහාධිකරණයෙහි විභාගයට ගෙන තිබුණි.
එහිදී සැකකරුවන් ලෙස හඳුනාගෙන තිබූ තණමල්විල ප්රදේශයේ පදිංචි ගමගේ බංදුල හරිස්චන්ද්ර සහ කෝන්තැටිආර සහ සූරියවැව ප්රදේශයේ පදිංචි රුවන් ප්රසන්න යන පුද්ගලයින් දෙදෙනාට එරෙහිව අධිචෝදනා සනාථ වීමෙන් පසුව අධිකරණය විසින් මරණ දඬුවම නියම කර ඇත.
මහත් ආන්දෝලනයකට තුඩු දුන් දෙමළ ජාතික සන්ධානයේ හිටපු පාර්ලිමේන්තු මන්ත්රී නඩරාජා රවිරාජ් ඝාතන සිද්ධිය සම්බන්ධයෙන් චෝදනා ලබා සිටි නාවික හමුදා සාමාජිකයින් ඇතුළු විත්තිකරුවන් පස් දෙනෙකු නිදොස් කොට නිදහස් කරමින් කොළඹ මහාධිකරණය දුන් තීන්දුවක් ඉවත දැමූ අභියාචනාදීකරණය එම නඩුව යළි විභාග කරන ලෙස නියෝගයක් නිකුත් කළේය.
අදාළ විත්තිකරුවන් නිදොස් කොට නිදහස් කරමින් කොළඹ මහාධිකරණය විසින් ලබාදුන් තීන්දුව අභියෝගයට ලක් කරමින් නීතිපතිවරයා ඉදිරිපත් කළ අභියාචනයක් විභාග කිරීමෙන් අනතුරුව සශී මහේන්ද්රන් සහ අමල් රණරාජා යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල මෙම තීන්දුව ලබා දුනි.
නීති විරෝධී ලෙස මෙරටට ගෙන්වන විදේශීය දුම්වැටි 1300ක් සමඟ විදේශ ජාතිකයෙකු පොලීසිය විසින් අත්අඩංගුවට ගෙන තිබේ.
සැකකරු තිස්හත් හැවිරිදි චීන ජාතිකයෙක් බව පොලීසිය සඳහන් කරයි.
ලද තොරතුරක් මත කුරුඳුවත්ත පොලිස් ස්ථානයේ නිලධාරීන් කණ්ඩායමක් විසින් මෙම වැටලීම සිදු කර ඇත.
සිද්ධිය සම්බන්ධයෙන් කුරුඳුවත්ත පොලිසිය විසින් වැඩිදුර විමර්ශන සිදු කරනු ලබයි.
විශේෂඥ වෛද්යවරයෙකුගේ නිර්දේශයක් නොමැතිව මානසික රෝගීන් වෙත ලබා දෙනු ලබන ඖෂධ පෙති තරුණයන්ට අලෙවි කළ හැටන් නගරයේ ඔසුසැල් හිමියෙක් අත්අඩංගුවට ගෙන තිබේ.
ඒ, හැටන් කොට්ඨාස දූෂණ මර්දන ඒකකයේ නිලධාරින් විසිනි.
සැකකරු විසින් තරුණ ප්රජාව ඉලක්ක කරමින් ඉතා අධික මිලකට මෙම ඖෂධ අලෙවි කරන බවට තොරතුරක් ලැබී තිබුණි.
ඒ අනුව හැටන් කොට්ඨාස දූෂණ මර්දන ඒකකයේ නිලධාරින් විසින් පොලිස් උපාය දුතයෙකු යොදා ගනිමින් මොහුව අත්අඩංගුවට ගන්නා ලදී.
එහිදී අලෙවි කිරිමට සූදානම් කර තිබූ මත් පෙති 1400කට ආසන්න සංඛ්යාවක් පොලිසිය භාරයට ගත් බව සඳහන්ය.
සැකකරු හැටන් මහේස්ත්රාත් අධිකරණය වෙත ඉදිරිපත් කිරීමට නියමිත බව වැටලීම සිදු කළ හැටන් කොට්ඨාස දූෂණ මර්දන ඒකකයේ නිලධාරින් කියා සිටියහ.
ශ්රී ලංකාවට මත්කුඩු සපයන ප්රභල මත්ද්රව්ය සැපයුම්කරුවන් 29 දෙනෙක් මේ වන විට අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ඇති බව මහජන ආරක්ෂ නියෝජ්ය අමාත්ය නීතිඥ සුනිල් වටගල මහතා පවසයි.
ත්රිකුණාමලය ප්රදේශයේ පැවති රටම එකට ජාතික මෙහෙයුම් වැඩසහටන එක්වෙමින් නියෝජ්ය අමාත්යවරයා මේ බව කියා සිටියේය.
“මේ කළු බිස්නස් එකේ අංග දෙකක් තියෙනවා. එකක් සැපයුම් ජාලය. අනිත් එක ඩිමාන්ඩ් එක. ත්රිකුණාමලය වරායට බෝට්ටුවකින් අරන් එනවා. ඒ ගන්න එක මෙහෙ ඉන්න තරුණයෝ පාවිච්චි කරනවා. ඉතින් අපි කල්පනා කරා මේ ඩිමාන්ඩ් එක නැති කරන්න. මේ සැපයුම් ජාලයට කලින් ආණ්ඩු අත ගැහුවේ නෑ. හැබැයි වත්මන් ආණ්ඩුව තීරණයක් ගත්තා සැපයුම් ජාලය නැමති දාමයේ ඉහළම පුරුක්වලට යන්න ඕනේ. මේ පුරුක් වෙරළෙන් නතර වුණා. මේ පුරක් ගුවන් තොටුපොළෙන් නතර වුණා. අපේ පොලිස් දෙපාර්තමේන්තුව තීරණයක් ගත්තා, අපරාධ පරීක්ෂණ දෙපාර්තමේන්තුවේ නිලධාරින් ඉන්දුනීසියාවට, නේපාලනයට, පාකිස්තානයට ගිහින් මේ වෙද්දි අත්අඩංගුවට ගැනීම් කරලා තියෙනවා ප්රබලතම සැපයුම්කරුවන් 29ක් අපේ අතේ තියෙනවා. විශේෂයෙන් ඉන්දුනීසියාවෙන් ගෙනාපු අපරාධකරුවෝ පාපොච්චාරණය කරනවා. එතකොට සමහර අය කලබල වෙලා නම් තියෙනවා.
Easy Money හොයන්න භාවිත කරන බිස්නස් එකක් මේක. අපි දන්නවා මේකට බිස්නස් තුනක් සම්බන්ධයි. මත්ද්රව්ය එක්ක බැඳුන පාතාලයක් තියෙනවා. පාතාලය එක්ක බැඳුන අවි ජාවාරමක් තියෙනවා. මත්ද්රව්ය, පාතාලය හා නීතිවිරෝධී අවි සමස්ත මේ කළු බිස්නස් එක වෙලාගෙන ඉන්නවා. මේක වැඩුණේ දේශපාලන අධිකාරිය පිටුපස හිටියා. දියවන්නාව තමා මේක පෝෂණය කළේ. තමන්ගේ මැතිවරණ ව්යාපාර පෝෂණය කළේ මේ කළු බිස්නස් එක හරහා එන සල්ලිවලින්.”
කාන්තාවක් සතු මෝටර් රථයක ඉන්ධන QR කේතය ‘Override’ කරමින් අදාළ මෝටර් රථයේ දත්තවලට නව QR කේතයක් සකස් කරමින් ඉන්ධන ලබාගත් පුද්ගලයෙකු CIDය මගින් නිට්ටඹුවේදී අත්අඩංගුවට ගෙන තිබේ.
මේ පිළිබඳ 1919 අංකය ඔස්සේ ලැබී තිබූ තොරතුරකට අනුව ඩිජිටල් ආර්ථික අමාත්යාංශය විසින් අපරාධ පරීක්ෂණ දෙපාර්තමේන්තුව වෙත පැමිණිලි කර තිබුණි.
ඒ අනුව අපරාධ පරීක්ෂණ දෙපාර්තමේන්තුව යටතේ ඇති පරිගණක අපරාධ විමර්ශන ඒකකයේ අන්තර්ජාල ආවේක්ෂණ බුද්ධි ඒකකය විසින් සැකකරු සම්බන්ධයෙන් විමර්ශන සිදුකර ඇත.
විමර්ශන නිලධාරීන් සඳහන් කළේ මෙලෙස අත්අඩංගුවට ගත් සැකකරු පිළියන්දල ප්රදේශයේ පදිංචිකරුවෙකු බවය.
මෙම නීතිවිරෝධී QR කේතය සඳහා ඉන්ධන නිකුත් කළ අය පිළිබඳවද මේ වනවිට විමර්ශන සිදුකෙරෙමින් පවතී.
මේ අතර අපරාධ පරීක්ෂණ දෙපාර්තමේන්තුව පවසන්නේ මෙලෙස QR කේත ‘Override’කරන පුද්ගලයින් සම්බන්ධයෙන් විශේෂ විමර්ශන සිදුකරන බවය.
හලාවත – කුරුණෑගල ප්රධාන මාර්ගයේ අනතුරුදායක ලෙස තිරික්කලයක් පදවමින් සිටියදී, ඉදිරියෙන් පැමිණි කාර් රථයක ගැටී ගවයෙකු අනතුරට ලක්වීමේ සිදුවීමට අදාළව එක් අයෙකු පොලීසිය විසින් අත්අඩංගුවට ගෙන තිබේ.
ඉකුත් 22වැනිදා සවස 6.30 ට පමණ තිත්තකඩේ ප්රදේශයේදී මෙම අනතුරුව සිදුව තිබුණි.
එම තිරික්කලයට මාර්ගයේ ධාවනය කිරීම සඳහා කිසිදු අවසරයක් ලබා නොමැති බවත්, එය පැදවූ පුද්ගලයා ගවයාට කෘෘර ලෙස පහරදෙමින් මාර්ගයේ ධාවනය කර ඇති බවත් අනාවරණය වූ බව පොලීසිය පවසයි.
ඒ අනුව හලාවත පොලිස් ස්ථානයේ රථවාහන අංශය, අනතුරුට පත් වූ කරත්තය පැදවූ පුද්ගලයා ඊයේ (24) අත්අඩංගුවට ගෙන ඇත.
සැකකරු විසින් ගවයාව ධාවන තරග සඳහා පුරුදු කිරීමට මෙලෙස තිරික්කලය ධාවනය කිරීමට පෙළඹී ඇති බව අනාවරණය වී තිබේ.
ඒ අනුව ඔහු සත්ත්ව හිංසන නීති වගන්ති ප්රකාරව අද (25) හලාවත මහේස්ත්රාත් අධිකරණය වෙත ඉදිරිපත්කර ඇත.
එහිදී මීලඟ නඩු දිනයට දින නියම කර, ඔහුව රුපියල් ලක්ෂ 2ක ශරීර ඇප මත මුදාහැර තිබේ.
එමෙන්ම මෙම අනතුරට ලක්වූ ගවයා යහපත් සෞඛ්ය තත්ත්වයෙන් පසුවන බව පොලීසිය පවසයි.
මෙම අනතුරට සම්බන්ධ සියළු සැකකරුවන් අත්අඩංගුවට ගැනීම සඳහා හලාවත මූලස්ථාන පොලිසිය වැඩිදුර විමර්ශන සිදුකරනු ලබයි.
එයාර් බස් මිලදී ගැනීමේ සිද්ධියේදී අල්ලස් ලබා ගත්තේ යැයි චෝදනා කරමින් ඉදිරිපත් කර ඇති පැමිණිල්ලේ සැකකරුවන් වශයෙන් නම් කර සිටින එහි හිටපු ප්රධාන විධායක කපිල චන්ද්රසේන මහතාගේ බිරිඳ සහ ශමීන්ද්ර රාජපක්ෂ යන අය සඳහා වරෙන්තු නිකුත් කරනවාද? නැත්ද? යන නියෝගය අප්රේල් මස 02 වනදා ප්රකාශයට පත් කරන බව කොළඹ මහේස්ත්රාත් අධිකරණය නියම කර තිබේ.
අල්ලස් කොමිසමේ නිලධාරීන් ඉදිරිපත් කළ සාක්ෂි සලකා බැලීමෙන් අනතුරුව කොළඹ ප්රධාන මහේස්ත්රාත් අසංග එස් බෝදරගම මහතා මෙම නියෝගය නිකුත් කර ඇත.
අයථා ලෙස වත්කම් උපයා ගැනීමේ සිද්ධියක් සම්බන්ධයෙන් සැකපිට රක්ෂිත බන්ධනාගාර ගත කර සිටි හිටපු පාර්ලිමේන්තු මන්ත්රී සජින් වාස් ගුණවර්ධන මහතාගේ ඇප ඉල්ලීම කොළඹ මහේස්ත්රාත් අධිකරණය අද (24) ප්රතික්ෂේප කර තිබේ.
ඒ අනුව සැකකරු මේ මස 31වනදා දක්වා තවදුරටත් රක්ෂිත බන්ධනාගාර ගත කරන ලෙස අධිකරණය නියෝග කර ඇත.
අල්ලස් කොමිසමේ නිලධාරීන් හා සැකකරුගේ නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ ප්රධාන මහේස්ත්රාත් අසංග එස් බෝදරගම මහතා මෙම නියෝගය නිකුත් කළේය.
