Category: business

Business

2026 වසරේදී ශ්‍රී ලංකා රුපියල සියයට 1.6කින් අවප්‍රමාණය වෙයි….

2026 වසරේ ගතවූ කාලය තුළ ශ්‍රී ලංකා රුපියල අමෙරිකානු ඩොලරයට සාපේක්ෂව සියයට 1.6 කින් අවප්‍රමාණය වී ඇති බව ශ්‍රී ලංකා මහ බැංකුව තහවුරු කරයි.

මහ බැංකු දත්ත වලට අනුව, ඊයේ (31) දින වෙළෙඳපොළ ගනුදෙනු අවසානයේදී අමෙරිකානු ඩොලරයක,

ගැනුම් මිල – රු. 311.76

විකුණුම් මිල – රු. 319.31

2026 පෙබරවාරි අග භාගයේදී මැදපෙරදිග කලාපයේ ඇති වූ ගැටුම්කාරී තත්ත්වයත් සමඟ මතුවූ බාහිර අංශයේ පීඩනයන්, රුපියල මෙලෙස අවප්‍රමාණය වීමට හේතු වූ බව මහ බැංකුව පෙන්වා දෙයි.

රුපියලේ අගය පහත වැටුණද, 2025 නොවැම්බර් මාසයේ සිට දක්නට ලැබුණු ප්‍රවණතාවය අඛණ්ඩව පවත්වාගනිමින් 2026 පෙබරවාරි මාසයේදී ද ජංගම ගිණුමේ අතිරික්තයක් වාර්තා වී ඇත.

ඒ අනුව 2026 ජනවාරි-පෙබරවාරි කාලසීමාව තුළ වාර්තා වී ඇති සමුච්චිත අතිරික්තය ඇමෙරිකානු ඩොලර් මිලියන 487 කි.

කෙසේවෙතත්, 2026 පෙබරවාරි මස “බාහිර අංශයේ ක්‍රියාකාරීත්වය” පිළිබඳ වාර්තාවට අනුව වෙළඳ හිඟය පසුගිය වසරේ අදාළ කාලයට සාපේක්ෂව පුළුල් වී ඇත.

2025 මුල් මාස දෙකේ පැවති ඩොලර් බිලියන 1.1 ක හිඟය, 2026 එම කාලය තුළ ඩොලර් බිලියන 1.4 ක් දක්වා ඉහළ ගොස් තිබේ.

පුද්ගලික සහ වාණිජ වාහන ආනයනය සඳහා පෙබරවාරි මාසයේදී පමණක් ඩොලර් මිලියන 194 ක් වැය වී ඇති අතර, වසරේ මුල් මාස දෙක තුළ සමස්ත වාහන ආනයන වියදම ඩොලර් මිලියන 418 කි.

චීන මහජන බැංකුව (PBOC) සමඟ ඇති හුවමාරු පහසුකම (Swap facility) ද ඇතුළුව, ශ්‍රී ලංකාවේ නිල විදේශ සංචිතය 2026 පෙබරවාරි අවසානය වන විට අමෙරිකානු ඩොලර් බිලියන 7.3 ක් දක්වා ඉහළ ගොස් ඇත‍.

විදේශ ණය සේවාකරණය අඛණ්ඩව සිදු කළද, මහ බැංකුව විසින් වෙළඳපොළෙන් විදේශ විනිමය මිලදී ගැනීම ඉහළ නැංවීම හේතුවෙන් සංචිත මට්ටම මෙලෙස වර්ධනය වී ඇති බව මහ බැංකුව වැඩිදුරටත් සඳහන් කරයි.

රයිස් – කොත්තු – ප්ලේන්ටි මිල ඉහළට…..

අද (31) මධ්‍යම රාත්‍රියේ සිට ෆ්‍රයිඩ් රයිස් සහ කොත්තු මිල රු 30කින් ඉහළ දමා ඇති බව ආපනශාලා හිමියන්ගේ සංගමය පවසයි.

එම සංගමයේ සභාපති, හර්ෂණ රුක්ෂාන් මහතා පවසා සිටියේ, කෙටි කෑම මිලද රුපියල් 10කින් ඉහළ නංවා ඇති බවය.

මේ අතර ප්ලේන්ටියක් සහ කිරි තේ එකක මිල ද රුපියල් 5කින් ඉහළ දමා තිබේ.

අප්‍රේල් මස 1 වෙනිදා සිට විදුලි බිල ඉහළ යෑම හේතුවෙන් මෙලෙස ආහාර ද්‍රව්‍ය මිල ගණන් ඉහළ දැමීමට සිදුවන බවද ආපනශාලා හිමියන්ගේ සංගමය පෙන්වා දෙයි.

ඔවුන් වැඩිදුරටත් පෙන්වා දෙන්නේ ආපනාශාලා පවත්වාගෙන යනු ලබන සෑම ස්ථානයකම විදුලි බිල ඒකක 180 ඉක්මවා යනු ඇති බවත් එවැනි තත්ත්වයක් තුළ විශාල විදුලි බිලක් දැරීමට සිදුවීම හේතුවෙන් කර්මාන්තය ඉදිරියට පවත්වාගෙන යෑම සඳහා මෙලෙස මිල ගණන් ඉහළ දැමීමට තීරණය කළ බවද හර්ෂණ රුක්ෂාන් මහතා වැඩිදුරටත් පැවසීය.

මාර්තු මාසයේ කොළඹ උද්ධමනය සියයට 2.2ක් දක්වා ඉහළට…..

අද (31) දින, ජනලේඛන සහ සංඛ්‍යාලේඛන දෙපාර්තමේන්තුව 2026 මාර්තු මාසය සඳහා කොළඹ පාරිභෝගික මිල දර්ශකය සහ කොළඹ නාගරික ප්‍රජාවගේ පාරිභෝගික උද්ධමන අනුපාතය ප්‍රකාශයට පත් කර තිබේ.

ඒ අනුව  කොළඹ නාගරික ප්‍රජාවගේ පාරිභෝගික උද්ධමන අනුපාතය 2026 මාර්තු මාසය සඳහා 2.2% ක් දක්වා වැඩි වී ඇත.

එය 2026 පෙබරවාරි මාසය සඳහා 1.6% ක් ලෙස වාර්තා වී තිබුණි.

2026  මාර්තු මාසයේ දී ආහාර කාණ්ඩයේ වාර්ෂික උද්ධමනය(ලක්‍ෂ්‍යමය)  0.7% දක්වා  වැඩි වී ඇති  අතර  2026 පෙබරවාරි මාසයේ දී එය වාර්තා වූයේ 0.2 % ක් ලෙසයි.

එමෙන්ම, 2026 මාර්තු මාසය සඳහා ආහාර නොවන කාණ්ඩයේ වාර්ෂික උද්ධමනය (ලක්‍ෂ්‍යමය)  2.9%  ක් දක්වා වැඩි වී ඇති අතර,2026 පෙබරවාරි මාසයේ දී 2.3% ක් ලෙස වාර්තා වී තිබේ.

මාර්තු ගෙවුණු දින 29ට සංචාරකයින් 175,661ක් මෙරටට ඇවිත්….

මාර්තු මාසයේ ගෙවී ගිය දින 29 තුළදී ශ්‍රී ලංකාවට සංචාරකයින් 175,661ක් පැමිණ ඇති බව ශ්‍රී ලංකා සංචාරක සංවර්ධන අධිකාරිය පවසයි.

නිකුත් කළ නවතම දත්ත අනුව, එම කාලය තුළ ඉන්දියාවෙන් සංචාරකයින් 45,650ක් පැමිණ ඇති අතර, එය සමස්තයේ 26%ක් වේ.

එමෙන්ම, රුසියාවෙන් 15,579ක්, ජර්මනියෙන් 12,603ක්, එක්සත් රාජධානියෙන් 17,030ක්, චීනයෙන් 13,449ක් සහ ඔස්ට්‍රේලියාවෙන් 10,219ක් ද මෙම කාලය තුළ ශ්‍රී ලංකාවට පැමිණ ඇත.

තවද, 2026 ජනවාරි 01 සිට මාර්තු 29 දක්වා සමස්ත සංචාරක පැමිණීම් සංඛ්‍යාව 732,316ක් ලෙස වාර්තා වී තිබේ.

ඒ අතරින් ඉන්දියාවෙන් 145,390ක්, රුසියාවෙන් 65,812ක් සහ එක්සත් රාජධානියෙන් 77,358ක් සංචාරකයින් පැමිණ ඇති බවද එම අධිකාරිය සඳහන් කළේය.

2025 දී රාජ්‍ය ණය රු. ට්‍රිලියන 1.25කින් වැඩිවෙලා…..

මධ්‍යම රජයේ සමස්ත නොපිය වූ රාජ්‍ය ණය ප්‍රමාණය 2025 වසර අවසානයේ දී රු. බිලියන 29,994.69ක් ලෙසින් වාර්තා වී ඇති බව ශ්‍රී ලංකා මහ බැංකුවේ නවතම සංඛ්‍යාලේඛන වාර්තාවක් අනාවරණය කර සිටී.

2024 වසර අවසානයේ දී මධ්‍යම රජයේ සමස්ත නොපිය වූ රාජ්‍ය ණය ප්‍රමාණය රු. බිලියන 28,738.70ක් ලෙසින් සටහන් ව තිබුණු අතර, ඒ අනුව රු. බිලියන 1,255.99කින් හෙවත් රු. ට්‍රිලියන 1.25කින් 2025 වසර තුළ දී රජයේ ණය වැඩි වී තිබේ.

එහිදී සමස්ත දේශීය ණය ප්‍රමාණය රු. බිලියන 18,309.66 සිට රු. බිලියන 18,675.32ක් දක්වා රු. බිලියන 365.66 කින් ඉහළ ගොස් ඇත.

සමස්ත විදේශීය ණය ප්‍රමාණය රු. බිලියන 10,429.04 සිට රු. බිලියන 11,319.69ක් දක්වා රු. බිලියන 890.32 කින් වැඩි වී තිබේ.

අලුත් සතිය ආරම්භයේදී ම කොටස් වෙළෙඳපොළේ පසුබැස්මක්….

කොළඹ කොටස් වෙළෙඳපොළ මිල දර්ශකවල සැලකිය යුතු පහළ යාමක් අද (30) ගනුදෙනු අවසානයේ දී දක්නට ලැබුණි.

එහි දී සියලු කොටස් මිල දර්ශකය ඒකක 283.49කින් පහළ ගොස් ඒකක 21,092.24ක් ලෙසින් සටහන් වූ අතර S&P SL20 මිල දර්ශකය ඒකක 91.03කින් පහළ ගොස් ඒකක 5,908.96ක් ලෙසින් දිනයේ ගනුදෙනු අවසානයේ දී වාර්තා විය.

අද ගනුදෙනු පිරිවැටුම දැක්වුනේ රු. බිලියන 2.17ක් ලෙසයි

උත්සව සමයේ හිඟයකින් තොරව කුකුළු මස් වෙළෙඳපොළට….

උත්සව සමයේ කිසිදු හිඟයකින් තොරව කුකුළු මස් තොග වෙළෙඳපොළට යොමු කිරීම සඳහා පියවර ගෙන ඇති බව ශ්‍රී ලංකා සත්ත්ව නිෂ්පාදකයින්ගේ සංගමය පවසයි.

එහි සභාපති අජිත් ගුණසේකර මහතා පැවසුවේ පවතින තෙල් අර්බුධයත් සමඟ කුකුළු මස් මිල ඉහළ යාමේ අවදානමක් පැවතිය ද එය රුපියල් 1,250ක මිල යටතේ පවත්වාගෙන යාමට සැලසුම් කර බවය.

මේ අතර ඔහු වැඩිදුරටත් පැවසුවේ ලෝක වෙළෙඳපොළේ සත්ත්ව ආහාර මිල ගණන් සීඝ්‍රලෙස ඉහළ ගොස් ඇති බවය.

එහිදී අදහස් දැක්වූ ශ්‍රී ලංකා සත්ත්ව නිෂ්පාදකයින්ගේ සංගමයේ සභාපති අජිත් ගුණසේකර මහතා,

” අප්‍රෙල් මාසේ වෙද්දී සියලුම ගොවිපොළවල් උපරිම ධාරිතාවයෙන් නිෂ්පාදන කටයුතු සිදු කරනවා.. හිඟයකින් තොරව මස් හා බිත්තර ලබා දෙන්න තමා අපේ උත්සාහය තිබ්බේ. නමුත් රටේ උද්ගත වෙලා තියෙන තත්ත්වය නිසා පවතින ඉන්ධන හිඟය නිසා ප්‍රවාහන වි‍යදම් අධික වෙලා තියෙනවා. ඒකේ පිරිවැය අපිට දරන්න වෙනවා.. එතකොට කුකුල් මස්වලට අධික ඉල්ලුමක් ආවොත් ඒ ප්‍රමාණය දෙන්න පුලුවන් ද කියන එක මත මිල උච්චාවචනය වෙනවා.. වෙළෙඳපොල තමා මිල තීරණය කරන්නේ අපි නෙමෙයි.. අපි බලාපොරොත්තු වෙනවා හිඟයකින් තොරව සැපයුම ලබා දෙන්න මොකද හිඟයක් ඇති වුණොත් ඒ තත්ත්වය ඇති වෙන්න පුලුවන්.. හදිසියේ ඩීසල් නැති වුණොත් ප්‍රවාහනය නැති වුණොත් ඉදිරිය කියන්න බෑ අපිට”

හෝමූස් වසා දැමුවහොත් ශ්‍රී ලංකාවට දැඩි බලපෑම්….

හෝමූස් සමුද්‍ර සන්ධිය අවහිර වීමෙන් ආහාර මිල ගණන් ඉහළ ගොස් වඩාත් බලපෑමට ලක්විය හැකි රටවල් අතර දෙවැනි ස්ථානයට ශ්‍රී ලංකාව පත්ව ඇතැයි පර්යේෂණ වාර්තාවකින් අනාවරණ වී තිබේ.

ජර්මනියේ කියෙල් ආර්ථික පර්යේෂණ ආයතනය සිදුකළ මෙම පර්යේෂණයෙන් හෙළි වී ඇත්තේ ආහාර, ඖෂධවල සිට ස්මාර්ට්ෆෝන් දක්වාම භාණ්ඩ රැසක මිල ගණන් මෙලෙස ඉහළ යා හැකි බවය.

එම පර්යේෂණයට අනුව ආහාර මිල ඉහළ යාමෙන් වඩාත් බලපෑමට ලක්විය හැකි රටවල් අතර දෙවැනි තැන ඇත්තේ ශ්‍රී ලංකාවයි.

එය ප්‍රතිශතාත්මක වශයෙන් 15%ක වර්ධනයක් බවද සඳහන්.

එම දරුණු බලපෑමට ලක්වන රටවල් අතර පළමු තැන සැම්බියාව (31%) වන අතර තායිවානය (12%), පකිස්තානය (11%) සහ ඉන්දියාව (10%) ඇතුළු රටවල් ද ඊට අයත් වේ.

ඉන්ධන ගෑස් ඇතුළු බලශක්ති සහ පොහොර ආනයනය කරන සංවර්ධනය වෙමින් පවතින රටවල් මෙම ආහාර මිල බලපෑමට දැඩිව ලක්වන බව ද එහි සඳහන් වේ.

හෝමූස් සමුද්‍ර සන්ධිය සම්පූර්ණයෙන් නැවත විවෘත කළ ද ආහාර සුරක්ෂිතතාවට එල්ල වන බලපෑම බොහෝ කාලයක් පවතිනු ඇති බව Kiel ආයතනයේ පර්යේෂකයින්ගේ පුරෝකථනය වේ.

මේ අතර හෝමූස් සමුද්‍ර සන්ධිය සම්පූර්ණයෙන් වසා දැමීමෙන් ගෝලීය තිරිඟු පිටි මිල 4.2%කින් සහ පලතුරු සහ එළවළු මිල 5.2%කින් ඉහළ යා හැකි බව ද අනාවරණ වී තිබේ.

හෝමූස් අවහිරතාවයේ ප්‍රතිවිපාක ලෙස ස්මාර්ට්ෆෝන්වල සිට දත්ත මධ්‍යස්ථාන දක්වා වන අතිනවීන තාක්ෂණික උපකරණ රාශියක මිල ඉහළයාමක් සිදුවිය හැකි බවට විශ්ලේෂකයින් අනතුරු අඟවා තිබුණි.

හෝමූස් සමුද්‍ර සන්ධියේ ඇති වූ බාධාව හේතුවෙන් ඖෂධ මිල ඉහළ යාමේ හැකියාව පිළිබඳ ඇතැම් විශ්ලේෂකයින් අනතුරු අඟවා ඇත.

අමෙරිකා – ඊශ්‍රායල – ඉරාන යුද්ධය තුළ එම බල අරගලය දැන් කේන්ද්‍රගත වී ඇත්තේ හෝමූස් සමුද්‍ර සන්ධිය මතය.

ලොව අතිශය වැදගත් නැව් ගමනාගමන මාර්ගයක් වන හෝමූස් සමුද්‍ර සන්ධිය වසාදැමූ බවත් ඒ හරහා යාමට උත්සාහ කරන ඕනෑම යාත්‍රාවකට එරෙහිව දැඩි පියවර ගන්නා බවත් ඉරානය ඊයේ (27) නිවේදනය කළේය.

ලොව ඛනිජ තෙල් ප්‍රවාහනයෙන් 20%ක් පමණ සිදුවන හෝමූස් සමුද්‍ර සන්ධිය මෙලෙස අවහිර වීම තුළ ලෝකයට දැඩි බලශක්ති අර්බුදයකට මුහුණ දීමට සිදු වේ.

ඒ අනුව ගෝලීය ඉන්ධන හා ගෑස් මිල ඉහළ යාම මේ වන විටත් දැකගත හැකියි.

එම බලශක්ති මිල ඉහළ යාම තුළ සෙසු භාණ්ඩ හා සේවාවල මිල ඉහළ යාම වැළැක්විය නොහැකි කරුණකි.

රටේ ඉන්ධන සැපයුම ගැන තෙල් සංස්ථාවෙන් සහතිකයක්…..

රට තුළ ඉන්ධන සැපයුම සම්පූර්ණයෙන් සහතික කර ඇති බව ලංකා ඛනිජ තෙල් නීතිගත සංස්ථාවේ සභාපති ඩී.ජේ.ඒ.එස් ද එස්. රාජකරුණා මහතා ප්‍රකාශ කරයි.

රජයේ ප්‍රවෘත්ති දෙපාර්තමේන්තුවේ පැවැති විශේෂ මාධ්‍ය හමුවකදී අදහස් දක්වමින් ඔහු සඳහන් කළේ, දැවි තෙල් සැපයුමද ස්ථාවර කර ඇති බැවින් විදුලි කප්පාදුවක අවශ්‍යතාවක් නොමැති බවය.

ඉදිරි දිනවලදී තවත් ඉන්ධන නැව් රැසක් මෙරටට පැමිණීමට නියමිත බව ලංකා ඛනිජ තෙල් නීතිගත සංස්ථාවේ සභාපතිවරයා සඳහන් කළේය.

එහිදී සභාපතිවරයා පවසා සිටියේ, ඩීසල් සැපයුම ලබන මාසයේ මැද දක්වා ගැටලුවකින් තොරව පවත්වාගෙන යා හැකි බවත් 92 හා 95 පෙට්‍රල් සැපයුම ජුනි මස ආරම්භය දක්වා සුරක්ෂිත බවත්ය.

එහිදී වැඩිදුරටත් අදහස් දැක්වූ ලංකා ඛනිජ තෙල් නීතිගත සංස්ථාවේ සභාපති ඩී.ජේ.ඒ.එස් ද එස්. රාජකරුණා මහතා,

“නැව් දෙකක් ගොඩ බානවා 27 වනදා නැවක් එනවා එකේ එනවා 92 පෙට්‍රල් මෙට්‍රික් ටොන් 30000ක්  95 පෙට්‍රල් මෙට්‍රික් ටොන් 5000ක් ඊට පස්සේ හෙට එනවා IOC නැවක් එකේ එනවා ඩීසල් මෙට්‍රික් ටොන් 18000ක්  92 පෙට්‍රල් මෙට්‍රික් ටොන් 18000යි. ඊට පස්සේ අපිට 28, 29 නැවක් එන්න නියමිතව තිබුණා. ඒක කලින් ආවා දැන් ඒක ගොඩබාලා ඉවරයි. එකේ ඩීසල් මෙට්‍රික්ටොන් 37000ක්. 

අපිට ගැටලුව වුණේ අර පිරිපහදුවට අවශ්‍ය තෙල්. පිරිපහදුවෙන් තමයි අපිට වැඩිපුර ඩීසල් සහ දැවි තෙල් හදන්නේ.  එතකොට දැවිතෙල් නැති වුණොත් අනිවාර්යෙන් අපිට විදුලි කප්පාදුවකට යන්න වෙනවා. ඒ නිසා අපි දැවි තෙල්වලට ලංසු කැඳව්වා ඒකටත් අවිල්ලා තියෙනවා. එතකොට 2 වනදා සහ 4 වනදා අතර අපිට එනවා ඩීසල් මෙට්‍රික්ටොන් 32000ක්, ගුවන් යාන ඉන්ධන මෙට්‍රික්ටොන් 8000ක් 

ඊට පස්සේ ආපහු 6 සහ 7 එන්න නියමිතයි ඩීසල් මෙට්‍රික් ටොන් 37500ක්, 7 සහ 8 එනවා ඩීසල් මෙට්‍රික්ටොන්  32000කුත් සුපර් ඩීසල් මෙට්‍රික් ටොන් 5000කුත්. ඊට පස්සේ 10, 11 එනවා ගුවන්යානා ඉන්ධන මෙට්‍රික් ටොන් 30000ක්, ඊට පස්සේ සිනොපෙක් එකේ නැවක් එනවා 18, 19 එකේ එනවා ඩීසල් මෙට්‍රික්ටොන් 20000ක්  92 පෙට්‍රල් මෙට්‍රික්ටොන් 20000කුත්.

ඊට පස්සේ 12, 13  විදුලි උත්පාදනය සඳහා  එන නැව එනවා. දැවිතෙල් මෙට්‍රික්ටොන් 30000ක නැවක්. ඊට පස්සේ 92 පෙට්‍රල් එනවා 16, 17 දිනවල මෙට්‍රික්ටොන් 35000ක නැවක්. අපහු අර් එම් පාර්ක් නැවක් එනවා  21, 22ක එකේ එනවා ඩීසල් මෙට්‍රික්ටොන්  20000ක්  92 පෙට්‍රල් මෙට්‍රික්ටොන් 17000ක්  95 පෙට්‍රල් මෙට්‍රික්ටොන් 3000ක්.

ආපහු 24 සහ 25 දිනවල නැවක් එනවා ඩීසල් මෙට්‍රික්ටොන් 37000ක්, ආපහු 29 සහ 30 දිනවල නැවක් එනවා 92 පෙට්‍රල් මෙට්‍රික්ටොන් 30000කුත් 95 පෙට්‍රල් මෙට්‍රික් ටොන් 5000කුත් අප්‍රේල් මාසයේ මේ නැවු සම්පූර්ණයෙන්ම අපිට ලැබෙනව එකේ ගැටලුවක් නෑ. ඒ එකකවත් යුද්ධය තියෙන කලාපයෙන් නෙමයි නැව්ගත කරන්නේ.”

ගොවීන් ඇතුළු පාර්ශ්ව කිහිපයක් සඳහා ඉන්ධන නිකුත් කිරීමට නව QR ක්‍රමවේදයක්….

කෘෂි කර්මාන්තය සහ තවත් පාර්ශ්ව කිහිපයක් සඳහා ඉන්ධන නිකුත් කිරීමට නව QR ක්‍රමවේදයක් ක්‍රියාත්මක කිරීමට අවධානය යොමුව ඇතැයි ලංකා ඛනිජ තෙල් නීතිගත සංස්ථාව පවසයි.

එම සංස්ථාවේ සභාපති ඩී.ජේ.ඒ.එස්. ද එස්. රාජකරුණා මහතා පැවසුවේ මේ සඳහා වාහන රහිත  QR ක්‍රමවේදයක් හඳුන්වාදීමට පියවර ගන්නා බවය.

නව QR ක්‍රමවේදය මේ වන විට නිර්මාණය කරමින් පවතින බවත් පැවසූ රාජකරුණා මහතා සඳහන් කළේ මෙය ගොවීන්, ධීවරයින් ඇතුළු පාර්ශ්ව කිහිපයක ඔවුන්ගේ ඉන්ධන අවශ්‍යතා සඳහා නිර්මාණය කරන බවය.

ග්‍රාමසේවක සහ ප්‍රාදේශීය ලේකම් කාර්යාලය වෙත තමන්ගේ ඉන්ධන අවශ්‍යතාවය සම්බන්ධව දැනුවත් කර මෙම නව QR ක්‍රමවේදය නිර්මාණය කර ගත හැකි බවත් පැවසූ ඒ මහතා පැවසුවේ මෙම නව QR කේතය එම පුද්ගලයින්ගේ ජාතික හැඳුනුම්පත් අංකයට නිර්මාණය වන බවය.

මෙම නව QR කේතය ක්‍රම කිහිපයක් යටතේ නිර්මාණය වන බවත් ඒ අනුව එහි කාණ්ඩ 7ක් යටතේ ඉන්ධන ලබා ගැනීමේ හැකියාව පවතින බව පෙන්වා දුන් ඒ මහතා පැවසුවේ මෙම කාණ්ඩ සඳහා ඉන්ධන කොපමණ ප්‍රමාණයක් ලබා දෙන්නේද යන්න ඛනිජ තෙල් නීතිගත සංස්ථාව තීරණය කරන බවය.

මෙම නව ක්‍රමවේදය ඉදිරියේදී හඳුන්වාදීමට පියවර ගන්නා බවත් මේ හරහා ගොවීන්, ධීවරයින් ආදී වාහන රහිත ඉන්ධන භාවිත කර නොයෙකුත් ව්‍යාපාර සහ සිය අවශ්‍යතා සඳහා ඉන්ධන භාවිත කරන සියලු පාර්ශ්වයන්ගේ ඉන්ධන අවශ්‍යතා සපුරාලීමට හැකියාව ලැබෙනු ඇති බවද ඒ මහතා වැඩිදුරටත් අදහස් දක්වමින් සඳහන් කළේය.