2026 වර්ෂයේ පළමු කාර්තුව තුළ වාර්තාගත සුරාබදු ආදායමක් උපයාගෙන ඇති බව සුරාබදු දෙපාර්තමේන්තුව සඳහන් කරයි.
එම දෙපාර්තමේන්තුව සඳහන් කරන්නේ, 2026 මාර්තු 31 වන විට සුරාබදු ආදායම රුපියල් බිලියන 70.4ක් ලෙස වාර්තා වී ඇති අතර, එම කාලසීමාව සඳහා නියමිතව තිබූ රුපියල් බිලියන 61.95ක ඉලක්කයද ඉක්මවා ගොස් ඇති බවය.
ඒ අනුව ඉලක්කගත ආදායමට සාපේක්ෂව 113.6%ක ඉහළ ප්රතිශතයක් වාර්තා වී තිබේ.
තවද, මෙම ආදායම 2025 වර්ෂයේ පළමු කාර්තුවට සාපේක්ෂව 114.8%ක වර්ධනයක් බවද සුරාබදු දෙපාර්තමේන්තුව පවසයි.
නව රජයේ නිසි මගපෙන්වීම හා සියලු ශ්රේණිවල සුරා බදු නිලධාරීන්ගේ පුර්ණ කැපවීම හේතු වෙන් මෙලෙස වාර්තාගත සුරාබදු ආදායමක් උපයාගැනීමට හැකිවූ බව සුරා බදු කොමසාරිස් ජනරාල් එම්. බී. එන්. ඒ. පේමරත්න මහතා ප්රකාශ කර සිටියි.
මත්පැන් නිෂ්පාදනාගාර සහ ස්කාගාර නිරන්තරයෙන් දැඩිව අධීක්ෂණය කිරීම, මත්පැන් බෝතල් මත ආරක්ෂිත මුද්රා යෙදීම, නීතිවිරෝධී මත්පැන් නිෂ්පාදනයට එරෙහිව වැටලීම් වැඩි කිරීම සහ බලපත්ර ස්ථාන නිරන්තර පරීක්ෂාවට ලක් කිරීම වැනි ක්රියාමාර්ග මෙම ආදායම් වර්ධනයට දායක වී ඇතැයිද ඔහු පැවසීය.
රාජ්ය ආදායම උපයන ආයතන අතර තෙවන ස්ථානය හිමි මෙම දෙපාර්තමේන්තුව, 2026 වර්ෂය සඳහා රුපියල් බිලියන 245ක ආදායම් ඉලක්කයක් සපුරා ගැනීමට අපේක්ෂා කරන බවද සුරාබදු දෙපාර්තමේන්තුව පවසයි.
