Category: breaking_news

මේ වනවිට ශ්‍රී ලංකාවට පැමිණ සිටින ඊශ්‍රායලයේ සේවයේ නියුතු පිරිස් සඳහා එරට ශ්‍රී ලංකා තානාපති කාර්යාලය දැනුම්දීමක් සිදුකර තිබෙනවා.

ඒ අනුව පවතින යුදමය වාතාවරණයත් සමග ගුවන්තොටුපොළවල් වසා දැමීම හේතුවෙන් ඔවුන්ට යළි නියමිත දිනවලදි ඊශ්‍රායලයට පැමිණීමට නොහැකි තත්ත්වයක් ඇත්නම් ඒ පිළිබදව ඊශ්‍රායලයේ ශ්‍රී ලංකා තානාපති කාර්යාලය දැනුවත් කරන ලෙසයි එරට ශ්‍රී ලංකා තානාපති කාර්යාලය දැනුම්දෙන්නේ.

නැවත ඇතුළුවීමේ වීසා කල්ඉකුත් වුවහොත් ඔවුන්ට යළි ඊශ්‍රායලයට පැමිණීමට නොහැකි බැවින් ඒ පිළිබඳව අද (15) දිනය තුළ තානාපති කාර්යාලය වෙත දැනුම් දෙන ලෙසයි  ඊශ්‍රායලයේ ශ්‍රී ලංකා තානාපති නිමල් බණ්ඩාර ඉල්ලා සිටිනනේ.

මෙරටට පැමිණ සිටින සියලු ශ්‍රී ලාංකිකයින් අද දිනය තුළ අදාළ විස්තර 071 – 844 73 05, 071 – 683 35 13 හෝ 071-974 2095 යන දුරකථන අංක වෙත WhatsApp මාර්ගයෙන් යොමුකරන ලෙස දැනුම් දෙන බව ඊශ්‍රායලයේ ශ්‍රී ලංකා තානාපති නිමල් බණ්ඩාර වැඩිදුරටත් ඉල්ලා සිටින්නේ.

කොහුවල පොලිස් වසමේ කළුබෝවිල පන්සල පාරේ පිහිටි නිවසකට වෙඩි තැබීමක් සිදුකර තිබෙනවා.

ඒ අනුව අද (15) අලුයම් කාලයේදී එම වෙඩි තැබීම සිදුකර ඇති අතර සැකකරුවන් විසින් නිවසේ ගේට්ටුවට හා නිවස දෙසට වෙඩි තබා ඇති බවයි සඳහන් වෙන්නේ.

යතුරු පැදියකින් පැමිණි නාඳුනන පුද්ගලයින් දෙදෙනෙකු විසින් මෙම වෙඩි තැබීම සිදුකර ඇති අතර වෙඩි තැබීමෙන් ජිවිත හානි හෝ තුවාල කිසිවක් සිදුව නොමැති බව පොලීසිය සඳහන් කළේ.

ගල්කිස්ස කොට්ඨාස අපරාධ විමර්ශන කාර්යංශය හා කොහුවල පොලීසිය වැඩිදුර විමර්ශන සිදු කරනවා.

තද සුළං සහ රළු මුහුද පිළිබඳව අනතුරු ඇඟවීමේ රතු නිවේදනයක් කාලගුණ විද්‍යා දෙපාර්තමේන්තුව විසින් නිකුත් කර තිබෙනවා.

ඒ අනුව හලාවත සිට පුත්තලම මන්නාරම හරහා කන්කසන්තුරය දක්වා වෙරළට ඔබ්බෙන් වන මුහුදු ප්‍රදේශය සහ ගාල්ල සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශය සඳහා මෙම අනතුරු ඇඟවීම නිකුත් කර ඇති බවයි සඳහන් වන්නේ.

එම ප්‍රදේශවලට ඔබ්බෙන් වන මුහුදු ප්‍රදේශවල සුළංගේ වේගය විටින් විට පැ.කි.මී 60-70 පමණ දක්වා වැඩි වන අතර, මුහුදු ප්‍රදේශ විටින් විට ඉතා රළු විය හැකි බවත්, එම මුහුදු ප්‍රදේශවලට නැවත දැනුම්දෙන තුරු යාත්‍රා නොකරන ලෙසයි කාලගුණ විද්‍යා දෙපාර්තමේන්තුව දැනුම් දෙන්නේ.

අදාළ නිවේදනය පහතින්.

අනතුරට පත්වු එයාර් ඉන්දියා ගුවන් යානයේ සිටි එක් මගියෙකු දිවි බේරා ගැනීමට සමත් වී ඇති බව ඉන්දීය මාධ්‍ය වාර්තා කරනවා.

ඒ අනුව රමේෂ් විශ්වස්කුමාර් බුචර්වාද නම් පුද්ගලයා මෙලෙස මාරාන්තික අනතුරෙන් ආශ්චර්යමත් ලෙස දිවි ගලවාගෙන ඇති බවයි සඳහන් වෙන්නේ.

ගුවන් යානයේ අසුන්ගෙන සිටි 38 හැවිරිදි රමේෂ් සිද්ධිය අතරතුර ගුවන් යානයෙන් පැන අතර පසුව ඔහු මුද‍ාගෙන රෝහල් ගත කිරීමට කටයුතු කර ඇති බවයි ඉන්දීය මාධ්‍ය වාර්තා වැඩිදුරටත් සඳහන් කරන්නේ.

එම අනතුරෙන් ගුවන් යානයේ ගමන් ගත් අනෙකුත් මගීන් සියලු දෙනා ජීවිතක්ෂයට පත්ව ඇති බවයි ඉන්දීය මාධ්‍ය වැඩිදුරටත් සඳහන් කරන්නේ.

මගීන් 232 ක් හා කාර්ය මණ්ඩලයේ 12 ක් සමඟ සමඟ ඉන්දියාවේ අහ්මදාබාද් හිදී ගුවන් යානයක් අද පස්වරුවේ අනතුරට ලක්වී තිබුණා.

නවතම තත්ත්වය පහතින් :

* ගුවන් යානය වෛද්‍ය නේවාසිකාගාරයක ගැටී ඒ මතට කඩා වැටී තිබෙනවා.

* වෛද්‍යවරුන් කිහිප දෙනෙකුගේ මහල් නිවාසවලට හානි සිදුවී ඇති අතර, බොහෝ පිරිසක් බේරා ගැනීමට කටයුතු කර තිබෙනවා.

* ගුවන් අනතුරෙන් දිවි ගලවා ගත් කිසිවෙකු නොමැති බවයි අහමදාබාද්හි පොලිස් ප්‍රධානියා සඳහන් කරන්නේ.

* එසේම ගුවන් යානාව කඩා වැටුණු ප්‍රදේශයේද ඇතැම් පුද්ගලයින් මියගොස් ඇති බවද ඔහු පවසනවා.

* ඉන්දීය විදේශ අමාත්‍යාංශයේ ප්‍රකාශක රන්දීර් ජයිස්වාල් සඳහන් කරන්නේ මෙම අනතුරෙන් බොහෝ පිරිසක් අහිමි වූ බවත්, ගලවා ගැනීමේ මෙහෙයුම් තවදුරටත් ක්‍රියාත්මක බවයි.

* ගුවන් යානයේ බ්‍රිතාන්‍ය ජාතිකයින් 53 ක් ගමන් කර ඇති අතර ඉන්දීය ජාතිකයින් 169 ක් ගමන් කර තිබෙනවා.

* අනතුර සිදුවු අහමදාබාද් හි ‘සර්දාර් වල්ලභභායි පටෙල්’ ජාත්‍යන්තර ගුවන්තොටුපළේ මෙහෙයුම් තාවකාලිකව නතර කර තිබෙනවා.

* අනතුර සම්බන්ධයෙන් X පණිවිඩයක් නිකුත් කරමින් එයාර් ඉන්දියා සභාපති නටරාජන් චන්ද්‍රසේකරන් පවසන්නේ මෙම ඛේදනීය අනතුරට මුහුණදුන් පවුල්වලට ශෝකය ප්‍රකාශ කරන බවත්, මේ මොහොතේ මූලික අරමුණ වන්නේ බලපෑමට ලක් වූ සියලුම පුද්ගලයින්ට සහ ඔවුන්ගේ පවුල්වලට සහාය වීම බවයි.

බලංගොඩ රජවක මහ විද්‍යාලයේ ගොඩනැගිල්ලක් මතට ගසක් කඩා වැටී එක් සිසුවෙක් මියගොස් තවත් සිසුන් 17 ක් තුවාල ලබා තිබෙනවා.

ඒ අනුව අද දහවල් පැවති සුළං තත්ත්වයත් සමඟ ගසක් කඩා වැටීම නිසා මෙම අනතුර සිදුව ඇති බවයි සඳහන් වෙන්නේ.

තුවාල ලැබූ සිසුන් රෝහල්ගත කර ඇති බවයි වැඩිදුරටත් සඳහන් වෙන්නේ.