Breaking News
2025 අගෝස්තු මසට අදාළ අස්වැසුම ප්රතිලාභීන්ගේ දීමනාව හෙට (15) අස්වැසුම ප්රතිලාභීන්ගේ බැංකු ගිණුම් වෙත බැර කිරීමට කටයුතු කරන බව මුදල්, ක්රම සම්පාදන සහ ආර්ථික සංවර්ධන අමාත්යාංශය නිවේදනය කර තිබේ.
රු.11,275,973,750.00 (එකොලොස් බිලියන දෙසිය හැත්තෑපස් මිලියන නවලක්ෂ හැත්තෑ තුන්දහස් හත්සිය පනහයි) ක මුදලක් ප්රතිලාභී පවුල් 1,421,745ගේ ගිණුම්වලට බැරකිරීමට නියමිතය.
ඒ අනුව අදාල ප්රතිලාභීන්ට හෙට සිට තමාට හිමි ප්රතිලාභී මුදල තම අස්වැසුම ප්රතිලාභී බැංකු ගිණුමෙන් ලබාගත හැකිය.
” මුත්තු නගර් අක්කර 800ක ගොවි ඉඩම් කොල්ලය නවතනු ! – ඉන්දීය සමාගම් සිදු කරන ඉඩම් හා සම්පත් කොල්ලයට එරෙහි සටන අරඹමු ! ” මැයෙන් ත්රිකුණාමලය මුත්තු නගර් ගොවි ජනතාව සහ ජන අරගල ව්යාපාරය එක්ව සංවිධානය කළ විරෝධතාවක් අද ( 2025.08. 14 ) දින කොළඹ ජනාධිපති ලේකම් කාර්යාලය ඉදිරිපිටදී පැවැත්විණි.
එහිදී අදහස් දැක්වූ ජන අරගල ව්යාපාරයේ ජාතික විධායක සභික වසන්ත මුදලිගේ.
අද දවසේ ත්රීකුණාමල මුත්තු නරගර් ප්රදේශයේ ජනතාව එක්ක අපි ජනතාධිපති ලේකම් කාර්යාලයට ආවේ බරපතළ ප්රශ්නයක් ගැන සාකාච්ඡා කරන්න. අද වෙද්දි මුත්තු නගර් ප්රදේශයේ පවුල් 351ක ජනතාවගේ ඉඩම් බලහත්කාරයෙන් පැහර අරගෙන සමාගම්වලට විකුණමින් යනවා. මීට සති දෙකකට කලින් අපි ලිඛිතව මේ සම්බන්ධයෙන් ජනාධිපති ලේකම් කාර්යාලය දැනුවත් කළා. නමුත් කිසිඳු විසඳුමක් අපිට ලැබුණේ නෑ. මේ බලහත් කාරයෙන් පැහැරගන්නේ මුත්තු නගර් වැසියන් පාරම්පරිකව වගා කරපු ඉඩම්. ඡන්ද කාලේ මේ ප්රශ්නෙට විසඳුම් දෙනවා කියලා කියපු මන්ත්රීලා අද මේ ජනතාවට පස්ස හරවලා. මෙ ඉඩම් ප්රශ්නය ගැන ආණ්ඩුවේ කාගෙවත් ඇස් හැරෙන්නේ නෑ.
ඊයේ ජනාධිපති අනුර දිසානායක කිව්වා සංවර්ධන ව්යාපෘති සැලසුම් කිරීමේදී සියලු පාර්ශවයන් එක්ක සාකාච්ඡා කරනවා කියලා. ඒ අදහස එක්ක තමයි මන්නාරමේ සුළං බලාගාර ව්යාපෘතිය මාසෙකට කල් දාලා තියෙන්නෙත්. අපි කියනවා ඒක හොඳයි. සියලු දෙනාගේ එකඟතාවය ඇතුව තමයි සංවර්ධන ව්යාපෘති කෙරෙන්න ඕන. හැබැයි අපි අහන්නේ ඇයි ඒ තීරණය මුත්තු නගර් ජනතාදට අදාළ නැත්තේ. ඇයි මුත්තු නගර් වැසියන්ට විතරක් කුඩම්මගේ සැලකිලි. මන්නාරමේ ඉන්නෙත් මුත්තු නගර් ඉන්නෙත් මේ රටේ මිනිස්සු. ඒ නිසා මන්නාරමේ හරි මුත්තු නගර්වල හරි ඉන්න ජනතාව බලහත්කාරයෙන් පන්නලා ඉඩම් පැහැරගන්න ආණ්ඩුව උත්සහා කරන්වනං ඒකට අපි විරුද්ධයි.
මේ ආණ්ඩුවට ජනතාව ඡන්දෙ දුන්නේ වෙනසක් බලාපොරොත්තුවෙන්. ඒ වෙනස කියන්නේ පරණ ආණ්ඩුවල ව්යාපෘති කිසිඳු සෙවිල්ලක් නැතුව නැවත ක්රියාත්මක කරන එක නෙවෙයි. නමුත් ආණ්ඩුව දැන් සූදානම් වෙන්නේ ඡන්දය දීපු ජනතාවට පයින් ගහලා සමාගම්වලට උවමනාවන් අනුව නැටවෙන්න. අපි ඉඩම් දෙන්නේ නෑ පුලුවන් දෙයක් කරගනිල්ලා වගේ ප්රවේශයකින් තමයි ආණ්ඩුව දැන් මුත්තු නගර් ගොවියන්ට උත්තර දෙන්නේ. නමුත් අද අපි මෙතනට ආවේ ඒ උත්තරේ අරගෙන ඔළුව පහත් කරගෙන ගෙදර යන්න නෙවෙයි. මේ අහිසක ජනතාවගේ ඉඩම්වල අයිතිය නැවත ඔවුන් වෙත ලබාදෙන තුරු අපි අඛණ්ඩව අරගල කරන්න සූදානම්. ඒ නිසා අපි ආණ්ඩුවට කියන්නේ බොරු විසඳුම් පෙන්නලා ප්රශ්නය මගහරින්න සූදානම් වෙන්න එපා. මුත්තු නගර් වැසියන්ගෙන් පැහරගත් ඉඩම් ඔවුන්ට නැවත ලබා දීමට ආණ්ඩුව කටයුතු කළ යුතුයි. ඒ වෙනුවෙන් දිගින් දිගටම අරගල කරන්න ජන අරගල සන්ධානය විදිහට අපි සූදානම්. “
බලශක්ති අමාත්ය ඉංජිනේරු කුමාර ජයකොඩි මහතා සහ ශ්රී ලංකාවේ ඕමාන තානාපති අහමඩ් අලි සයීද් අල් රාශිඩ් (Ahmed Ali Said Al Rashid) මහතා අතර හමුවක් බලශක්ති අමාත්යංශයේදී අද (14) පස්වරුවේ පැවැත්විණි.
මෙහිදී දෙරට අතර බලශක්ති ක්ෂේත්රයේ ද්විපාර්ශවික සබදතා තර කරගැනීම පිළිබදව අවධානය යොමුකරමින් කලාපයේ බලශක්ති අවශ්යතා සපුරාලීම සහ ක්ෂේත්රයේ නව ප්රවණතා මෙන්ම ගෝලීය අර්බුද අවස්ථාවන්වල එක්ව කටයුතු කරමින් ඒවා විසදා ගැනීමට ගතහැකි ක්රියාමාර්ග ගැනද සාකච්ඡා කර ඇත.
එහිදී අදහස් දක්වමින් බලශක්ති අමාත්යවරයා සඳහන් කළේ සමීප මිත්ර රටක් ලෙස ඕමානය සමග සම්බන්ධතා ඉතා ඉහළින් අගය කරන බවත් මෙරට තුළ ඇති විවිධ ආයෝජන අවස්ථා සැළකිල්ලට ගෙන බලශක්ති ක්ෂේත්රයේ ආයෝජනය සදහා එක්වන ලෙසය.
ශ්රී ලංකාව තුළ උදාවී ඇති යහපත් වාතාවරණය පිළිබදව තමන් දැනුවත් බවත් බලශක්ති ක්ෂේත්රයේ ආයෝජන පිළිබදව අවධානය යොමුකරමින් තම රජයට හා පෞද්ගලික අංශයට ඒ පිළිබදව දැනුවත් කිරීම් කිරීමට පියවර ගන්නා බවත් දෙරට අතර සබදතාව තවදුරටත් වර්ධනය කරගැනීමට ඕමානයේද අපේක්ෂාව වන බවත් මෙහිදී අදහස් දැක්වූ ඕමාන තානාපති අහමඩ් අලි සයීද් අල් රාශිඩ් මහතා ද පවසා සිටියේය.
සූදු නියාමන අධිකාරිය පිහිටුවීම සඳහා වූ පනත් කෙටුම්පතට රජයේ මුදල් පිළිබඳ කාරක සභාවේ අනුමතිය හිමිව තිබේ.
රජයේ මුදල් පිළිබඳ කාරක සභාවේ සභාපති පාර්ලිමේන්තු මන්ත්රී ආචාර්ය හර්ෂ ද සිල්වා මහතා විදේශ ගතවීම හේතුවෙන් එම කාරක සභාවේ තාවකාලික සභාපති ලෙස පත් කරගන්නා ලද පාර්ලිමේන්තු මන්ත්රී නීතිඥ රවුෆ් හකීම් මහතාගේ ප්රධානත්වයෙන් 12 වැනිදා පැවති රජයේ මුදල් පිළිබඳ කාරක සභා රැස්වීමේදී මෙම පනත් කෙටුම්පත සලකා බලා අනුමතිය ලබා දී ඇත.
මෙම පනත් කෙටුම්පත සම්බන්ධයෙන් අවස්ථා කිහිපයකදීම රජයේ මුදල් පිළිබඳ කාරක සභාවේදී සාකච්ඡා කෙරිණි.
මෙහිදී ශ්රී ලංකාව තුළ ඔට්ටු ඇල්ලීම සහ සූදු අායතන ප්රමිතිකරණය කිරීමට, සමාජ හානි අවම කිරීමට, සංචාරක ක්ෂේත්රය සංවර්ධනය කිරීමට හා ආර්ථිකය වර්ධනය කිරීම සඳහා පුළුල් හෝ පූර්ණ විෂය පථයක් සහිත ස්වාධීන නියාමන ආයතනයක් ලෙස සූදු නියාමන අධිකාරිය පිහිටුවීම සඳහා විධිවිධාන සැලැස්වීම සිදු වේ.
ඊයේ (13) දින දහවල් කාලයේදී තම කුඹුර වෙත පැමිණි පුද්ගලයෙකු කුඹුරට ගොස් ඔහුගේ කකුල සේදීම සදහා ගැටලාව වැවට බැස ඇති අතර එම අවස්ථාවේ දී වැවෙහි ජලයේ තිබී උණ්ඩ කිහිපයක් දැක ඇති අතර මේ පිළිබඳව එම පුද්ගලයා විසින් කඩිනිමනි මේ පිළිබඳව 118 හදිසි ඇමතුම් අංකය හරහා විසින් ගලෙන්බිඳුණුවැව පොලිස් ස්ථානය දැනුවත් කර තිබෙනවා.පසුව මේ පිළිබඳව කඩිනමින් ක්රියාත්මක වු ගලෙන්බිඳුණුවැව පොලිස් ස්ථානයේ ස්ථානාධිපති ඩබ්.එම්.එම්.ඩී.එන් චතුරංග මුරමුදලි මහතා ඇතුළු පොලිස් නිළධාරින් පිරිසක් විසින් සිදුකළ පරීක්ෂා කිරීමේදී ගලෙන්බිඳුණුවැව පොලිස් වසමේ ගැටලාව වැවෙහි එක් ස්ථානයක ජලයේ තිබී විවිධ වර්ගයේ ජීව පතොරම් විශාල ප්රමාණයක් ඊයේ (13) දින සොයාගැනීමට හැකිවුණා.
සොයාගත් පතොරම් තොගය (5038) පන්දහස් තිස්අටක ප්රමාණයක් බවයි පොලිසිය සදහන් කළේ.
සොයාගත් උණ්ඩ තොගය මේ වන විට පොලිස් භාරයේ ඇති අතර අද (14) දින විශේෂ පොලිස් කණ්ඩායම් කිහිපයක් යොදවා එම ස්ථානය තවදුරටත් පරීක්ෂා කිරීමට නියමිතයි
මේ සම්බන්ධයෙන් වැඩිදුර පරීක්ෂණ උතුරුමැද පළාත් ජේෂ්ඨ නියෝජ්යය පොලිස්පති බුද්ධික සිරිවර්ධන මහතාගේ විශේෂ උපදෙස් අනුව කැබිතිගොල්ලෑව කොට්ඨාස භාර ජේෂ්ඨ පොලිස් අධිකාරී ප්රසන්න බ්රාහ්මණගේ මහතාගේ මෙහෙයවීම යටතේ ගලෙන්බිඳුණුවැව පොලිස් ස්ථානයේ ස්ථානාධිපති එම්.එම්.ඩී.එන් චතුරංග මුරමුදලි මහතා වැඩිදුරටත් පරීක්ෂණ සිදුකරනු ලබනවා.
මොරටුව පිළියන්දල මාර්ගයේ කොස්පෑලෑන පාලම අසල බොල්ගොඩ ගඟේ පාවෙමින් තිබියදී පුද්ගල මළසිරුරක් සොයා ගෙන තිබේ.
මෙලෙස මියගොස් ඇත්තේ වයස අවුරුදු 46ක් වන සිව් දරු පියෙකි.
බොල්ගොඩ ගඟේ මළ සිරුරක් ඇතැයි පොලිස් හදිසි ඇමතුම් ඒකකයට ලැබුණු පණිවිඩයකට අනුව මෙම මළ සිරුර සොයා ගෙන ඇත.
මෙම පුද්ගලයා මීට දින දෙකකට ඉහත දී සිට නිවසින් අතුරුදන්ව සිට ඇති අතර පවුලේ ඥාතීන් විසින් ඒ පිළිබඳව පොලිසියටද පැමිණිලි කර තිබේ.
මියගිය පුද්ගලයාගේ සහෝදරයෙකු පොලිසියට පවසා ඇත්තේ ඔහු දීර්ඝ කාලයක සිට මානසික රෝගී තත්ත්වයකින් සහ තවත් රෝග ගණනාවකින් පීඩා විඳි පුද්ගලයෙකු බවය.
සිද්ධිය සම්බන්ධයෙන් පිළියන්දල පොලිසිය වැඩිදුර පරීක්ෂණ සිදු කරයි.
අල්ලස් කොමිසම මඟින් අත්අඩංගුවට ගත් පොලිස් ක්ෂේත්ර බළකා මූලස්ථානයේ සංස්කෘතික අංශයේ, ජ්යෙෂ්ඨ පොලිස් අධිකාරි සතිෂ් ගමගේ මහතා ලබන 19 වනදා දක්වා රක්ෂිත බන්ධනාගාරගත කරන ලෙස කොළඹ මහෙස්ත්රාත් අධිකරණය නියම කළේය.
අල්ලස් කොමිසමේ නිලධාරීන් හා විත්තියේ නීතිඥවරු විසින් ඉදිරිපත් කළ කරුණු සලකා බැලීමෙන් අනතුරුව කොළඹ අතිරේක මහෙස්ත්රාත් පවිත්රා සංජීවනී පතිරණ මහත්මිය විසින් මෙම නියෝගය නිකුත් කළාය.
සැකකරු ගාල්ල සහ ඇඹිලිපිටිය පොලිස් කොට්ඨාශ භාරව ජ්යෙෂ්ඨ පොලිස් අධිකාරිවරයා වශයෙන් කටයුතු කළ සමයේ වෙනත් පුද්ගලයෙකු නමින් පුද්ගලික බැංකු තුනක ගිණුම් 03 ක් විවෘතකර, එම ගිණුම්වලට සංවිධානාත්මක අපරාධකරුවන් ගෙන්, පොලීසියට සේවා ලබා ගැනීමට පැමිණෙන පුද්ගලයින්ගෙන් හා වෙනත් අපරාධකරුවන්ගෙන් අල්ලස් වශයෙන් ලබාගත් රුපියල් එක් කෝටි හතළිස් ලක්ෂයකට ආසන්න මුදලක් අල්ලස් වශයෙන් ලබා ගැනීම සහ මුදල් විශුද්ධිකරණ චෝදනා යටතේ මෙම පුද්ගලයා අත්අඩංගුවට ගෙන අධිකරණයට ඉදිරිපත් කර තිබුණි.
පාතාලය හා මත්ද්රව්ය ජාවාරම්කරුවන්ට සහාය දුන් දේශපාලනඥයින් මේ වනවිටත් හඳුනාගෙන ඇති බව පොලිස්පති නීතිඥ ප්රියන්ත වීරසූරිය මහතා පවසයි.
ඔවුන්ට එරෙහිව ඉදිරියේදී නීතිමය ක්රියාමාර්ග ගන්නා බවත් පොලිස්පතිවරයා සඳහන් කළේය.
37 වැනි පොලිස්පතිවරයා ලෙස ධුරයේ වැඩ ආරම්භ කරමින් ඔහු අද (14) මේ බව පැවසීය.
හංවැල්ල, පහත්ගම ප්රදේශයේ දී සිදුකර ඇති වෙඩිතැබීම ” හිටපු ප්රාදේශීය සභා මන්ත්රී ශාන්ත මුදුන්කොටුව හෙවත් ‘බනා මන්ත්රී’ ඝාතනයට පළිගැනීමක් බවට පොලීසිය සැක පළ කරයි.
හංවැල්ල පහත්ගම ප්රදේශයේදී ඊයේ (13) රාත්රියේ පුද්ගලයෙකු ඉලක්ක කර වෙඩි තැබීමක් සිදුකර තිබුණි.
ඊයේ රාත්රී 9.50ට පමණ පැමිණි පුද්ගලයන් දෙදෙනෙකු විසින් එහි සිටි පුද්ගලයෙකු ඉලක්ක මෙම වෙඩි තැබීම සිදුකර ඇත.
පොලීසිය පැවසුවේ, පිස්තෝලයකින් වෙඩි ප්රහාරය එල්ල කර ඇති අතර ඉන් අදාළ පුද්ගලයාගේ වම්පාදයට තුවාල සිදුව ඇති බවය.
වෙඩිතැබීම සිදුකර වෙඩික්කරුවන් දෙදෙනා පලාගොස් තිබේ.
වෙඩි ප්රහාරයෙන් තුවාල ලැබුවේ ලලිත් කන්නංගර හෙවත් බස් ලලිත් නැමැත්තාගේ සමීපතයෙකු වන ‘කන්ද උඩ ඉරේෂ් ‘ නමැත්තාගේ 56 හැවිරිදි පියායි.
පසුගිය 12 වැනිදා මීගොඩ, ආටිගල මාර්ගයේදී හිටපු ප්රාදේශිය සභා මන්ත්රී ශාන්ත මුදුන්කොටුව හෙවත් ‘බනා මන්ත්රී’ නැමැත්තා වෙඩි තබා ඝාතනය කර තිබුණි.
ඝාතනය වූ ‘බනා මන්ත්රී’ නැමැත්තාගේ මස්සිනා වන ‘ගගන’ සහ ‘හඳපාන්ගොඩ හඳයා’ නම් අපරාධකරුවන් විසින් මෙම වෙඩිතැබීම මෙහෙයවූ බවට තොරතුරු ලැබී ඇති බවත් පොලීසිය සඳහන් කළේය.
උසස් පොලිස් නිලධාරියෙක් සඳහන් කළේ, හඳපාන්ගොඩ හඳයාගේ පාර්ශ්වයෙන් ලලිත් කන්නංගර පාර්ශ්වයේ අයෙකු ඉලක්ක කර වෙඩි තැබීමක් සිදුවිය හැකි බවට බුද්ධි අංශ මඟින් තොරතුරුද ලැබී තිබූ බවය.
ඒ අනුව ලලිත් කන්නංගරගේ සමීපතමයන් එම ප්රදේශයෙන් ඉවත් කර පොලිස් ආරක්ෂාව ලබාදී තිබූ බවත් ඒ අතරතුරදී මෙම වෙඩිතැබීම සිදුව ඇති බවත් අදාළ පොලිස් නිලධාරියා වැඩිදුරටත් සඳහන් කළේය.
මාස හතරකට අධික කාලයක් කණ්ඩලම වැව ඉස්මත්තේ වෙඩි වැදීමකින් තුවාල ලබා සිට ජීවිතයට සමුදුන් ‘කණ්ඩලමේ හැඩකාරයා’ නමින් හඳුන්වනු ලැබූ වනඅලියා වෙනුවෙන් පිං අනුමෝදනාවක් සිදුකර තිබේ.
අද (14) පෙරවරුවේ සිට විශාල ප්රදේශවාසීන් පිරිසක් වන අලියාගේ මළ සිරුර දැක බලා ගැනීම සඳහා එහි පැමිණ සිටි අතර ඔවුන් දැඩි සංවේගයට පත් වී සිටි බව අප වාර්තාකරු පැවසීය.
අනතුරුව රන්ගිරි දඹුලු වළගම්බා මහ පිරිවනේ නියෝජ්ය පරිවෙනාධිපති නිකපිටියේ සුනන්ද ස්වාමීන් වහන්සේ ඇතුළු භික්ෂූන් වහන්සේලා පිරිසක් එම ස්ථානයට වැඩම කොට ආගමික වතාවත් සිදුකර පාංශකූල කටයුතු සිදුකරන්නට විය.
මතක වස්ත්ර පූජාකොට පැන් වඩා මියගිය ‘කණ්ඩලමේ හැඩකාරයා’ට බෞද්ධාගමික කටයුතු අනුව නිවන් සුව ප්රාර්ථනා කිරීමද මෙහිදී සිදුකර තිබේ.
මෙම වනඅලියාගේ පශ්චාත් මරණ පරීක්ෂණ කටයුතු අද (14) සිදුකිරීමට නියමිතව තිබේ.
මිට වසරකට ඉහතදී මුලින්ම මෙම අලියාට වෙඩි වැදී සිටියදී වනජීවී නිලධාරීන් ප්රතිකාර කොට පසුව වනයට මුදා හැර තිබිණු අතර මාස කිහිපයකට පසු නැවතත් තුවාල සුව නොවී වැව ඉස්මත්තට පැමිණි විට ජනතාව ආහාර ලබාදෙමින් රැක බලාගත්තේය.
කෙසේවෙතත් වනජීවි නිලධාරීන්ව අවස්ථා කිහිපයක දී දැනුවත් කිරීමෙන් අනතුරුව, වරින් වරින් පශු විද්යා කණ්ඩායම් පැමිණ වනඅලියාට ප්රතිකාර සිදුකර තිබුණි.
මාධ්ය මඟින් දිගින් දිගටම ‘කණ්ඩලමේ හැඩකාරයා’ සම්බන්ධයෙන් ජනතාව සහ බලධාරීන් දැනුවත් කිරීම හේතුවෙන් පරිසර අමාත්යවරයා සහ නියෝජ්ය අමාත්යවරයාද අදාළ ස්ථානයට ගොස් වනඅලියාගේ සුව දුක් සොයා බලා ප්රතිකාර නිසි ලෙස සිදුකිරීමට උපදෙස් ලබා දුනි.
නමුත් ප්රතිකාර හමුවේ වුවත් දිනෙන් දින අසාධ්ය තත්ත්වයට පත්වූ වනඅලියාට අවසාන කාලයේ දී සිංහල වෙදකම සිදුකිරීමට ද අනුමැතිය ලැබී තිබුණි.
ඒ අනුව දින 5ක පමණ කාලයක් වෙදකම් කරමින් සිටිය දී රටම හඬවමින් මහා සද්ධන්තයා ඊයේ සිය ජීවිතයට සමුදුනි.
