Author: Shashi Maduranga

දිවයින පුරා ක්‍රියාත්මක අපරාධ හා මත්ද්‍රව්‍ය නිවාරණ මෙහෙයුම් මගින් ඊයේ (18) දින වාර්තාවට අනුව අපරාධ සම්බන්ධයෙන් සෘජුව හඳුනාගත් පුද්ගලයින් 26ක් අත්අඩංගුවට ගෙන තිබේ.

මෙහෙයුම් මගින් බීමත්ව රිය පැදවූ පුද්ගලයින් 309ක් අත්අඩංගුවට ගෙන ඇති බව පොලිස් මාධ්‍ය කොට්ඨාසය පවසයි.

මේ අතර, සැකපිට පුද්ගලයින් 549 දෙනෙකු අත්අඩංගුවට ගෙන ඇති අතර අත්අඩංගුවට ගත් විවෘත වරෙන්තුකරුවන් ගණන 185ක් බව වාර්තාවේ සඳහන් වෙයි.

බුදුදහමට අපහාස කළේ යැයි කියමින් එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳ සම්මුති පනත යටතේ ප්‍රහසන ශිල්පිනියක වන නතාෂා එදිරිසූරිය අත්අඩංගුවට ගැනීම සම්බන්ධයෙන් අපරාධ පරීක්ෂණ දෙපාර්තමේන්තුවේ පරිගණක අපරාධ අංශයේ හිටපු ස්ථානාධිපතිවරයා අද (19) ශ්‍රේෂ්ඨාධිකරණය හමුවේ කනගාටුව පළකර සිටියේය.

මෙම කනගාටුව පළකිරීමට අදාළ ලිපියක් ද රජයේ නීතිඥවරයා විසින් අධිකරණයට ඉදිරිපත් කළේය.

ඊට අමතරව මෙම පනත යටතේ අත්අඩංගුවට ගැනීමේදී සිදුවිය හැකි අනීතිය ක්‍රියා වළක්වා ගැනීම සඳහා අනුගමනය කළ යුතු උපදෙස් ඇතුළත් මාර්ගෝපදේශ මාලාවක් නිකුත් කිරීමට පොලිස්පතිවරයා තීරණය කර ඇති බවත් රජයේ නීතිඥවරයා පැවසුවේය.

ඉන් අනතුරුව පෙත්සම් විභාගය අවසන් කිරීමට ද අධිකරණය නියෝග කළේය.

අනවසර විදුලි රැහැනකට හසුව මියගිය යුද හමුදා සෙබළාගේ මරණය වසන් කිරීමේ චෝදනාව මත රක්ෂිත බන්ධනාගාරගත කෙරුණු ඇඹිලිපිටිය, කුට්ටිගල කඳවුරේ යුද හමුදා සැරයන්වරයාගේ වැඩ තහනම් කිරීමට පියවර ගන්නා බව යුද හමුදා මාධ්‍ය ප්‍රකාශක බ්‍රිග්‍රේඩියර් වරුණ ගමගේ මහතා පවසයි.

මෙම සිදුවීමට අදාළව යුද හමුදා සැරයන්වරයා ඇතුළු සිව්දෙනෙකු අපරාධ පරීක්ෂණ දෙපාර්තමේන්තුව මගින් ඉකුත් සඳුදා අත්අඩංගුවට ගැනුණේ සිද්ධියෙන් වසරකට පසුවය.

මාතලේ මල්ගම්මන පදිංචි 31 හැවිරිදි දෙදරු පියෙකු වූ හෙට්ටිආරච්චිගේ චාලක මධුශාන් ජයසිංහ, ඇඹිලිපිටිය, කුට්ටිගල ශ්‍රී ලංකා යුද හමුදා පොදු සේවා බලකා පුහුණු කඳවුරට අනියුක්තව සේවය කළ යුද හමුදා සෙබළෙකි.

සක්‍රිය සේවයේ නිරතව සිටියදී ඔහු 2025 වසරේ ජනවාරි 26 වනදා සිට අතුරුදන්ව තිබුණි.

මෙම අතුරුදන්වීම සම්බන්ධයෙන් කරුණු විමසූ සෙබළාගේ නිවැසියන්ට කඳවුර මගින් ලිඛිතව දැනුම්දී ඇත්තේ ඔහු යුද හමුදා සේවයෙන් පළාගොස් ඇති බවය.

කෙසේවෙතත්, සෙබලා අතුරුදන් වී දින 07කට පසු ඔහුගේ සිරුර කඳවුරු භූමියේ කැලෑබද ප්‍රදේශයක තිබියදී හමුවී තිබුණි.

මෙම සිද්ධිය සම්බන්ධයෙන් පවුලේ ඥාතින්ගෙන් ලැබුණු පැමිණිල්ලකට අනුව අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශය මගින් විමර්ශනයක් ආරම්භ කෙරුණි.

ඒ අනුව, කඳවුරු භූමියේ දීර්ඝ කාලයක සිට ගවයින් බැඳීමේ නිරත වූ පුද්ගලයෙකුගෙන් ප්‍රශ්න කිරීමේදී හෙළිවූ තොරතුරු මත, කඳවුරේ සැරයන්වරයෙකු ඇතුළු තවත් සිව්දෙනෙකුගෙන්ද ප්‍රශ්න කර සිද්ධියට අදාළ වැදගත් තොරතුරු රැසක් අනාවරණ කරගැනීමට විමර්ශකයින් සමත්ව තිබේ.

ඔවුන් පවසා ඇත්තේ වගාවන් ආරක්ෂා කරගැනීම සහ මස් පිණිස ඌරන් දඩයම් කිරීමේ අරමුණින් 2025 වසරේ ජනවාරි 26 කඳවුර තුළ ස්ථානයක විදුලි කම්බියක් ඇටවීමට පියවර ගත් බවය.

පැය කිහිපයකට පසුව එම ස්ථානයට ගොස් බැලීමේදී විදුලි කම්බියෙහි පැටළී කඳවුරේ සෙබළෙකු බිම වැටී සිටිනු දුටු බවත්, සෝදිසි කිරීමේදී ඔහු මියගොස් ඇති බව තහවුරුවූ බවත් ඔවුන් පවසා ඇත.

පසුව මෘතදේහය කැලෑබද ප්‍රදේශයකට ගෙනගොස් දමා මියගිය සෙබළාගේ ජංගම දුරකථනය හා විදුලිය ඇද තිබූ කම්බි රෝල අසළ පිහිටි වැවකට දැමූ බවට ඔවුන් පාපෝච්ඡාරණය කර තිබුණි.

ඒ අනුව අපරික්ෂාකාරී ක්‍රියාවක් සිදුකිරීම, සාවද්‍ය මනුෂ්‍ය ඝාතනයක් සිදුකිරීම, සාක්ෂි වසන් කිරීම සම්බන්ධයෙන් ඔවුන් සිව්දෙනා අත්අඩංගුවට ගෙන ඇත.

එලෙස අත්අඩංගුවට ගැනුණේ නිට්ටඹුව ප්‍රදේශයේ පදිංචි 44 හැවිරිදි යුද හමුදා සැරයන්වරයෙකු,  යුද හමුදා සිවිල් සේවා නිලධාරියෙක්, යුද හමුදා කඳවුරේ කරණවෑමියා සහ පෑස්සුම් ශිල්පියාය.

මියගිය සෙබලාගේ ජංගම දුරකථනය හා විදුලිය ඇද තිබූ කම්බිරෝල අසල පිහිටි වැවකටදැමූ බවට සිදුකළ ප්‍රකාශය අනුව අත්අඩංගුවේ පසුවූ කරණවෑමියා සහ පෑස්සුම් ශිල්පියා පසුගිය අඟහරුවාදා එම ස්ථානයට රැගෙන ගොස් තිබේ.

කෙසේවෙතත්, අදාළ වැව මේ වනවිට සිඳීගොස් ඇති අතර එහි කැණීම් සිදුකළද කිසිවක් හමුවී නැත.

ඒ අනුව සැකකරුවන් සිව්දෙනා ඇඹිලිපිටිය මහෙස්ත්‍රාත් අධිකරණයට ඉදිරිපත් කිරීමෙන් අනතුරුව මාර්තු 03 වනදා දක්වා රක්ෂිත බන්ධනාගාරගත කෙරුණි.

ගණේමුල්ල සංජීව ඝාතන සිද්ධිය සම්බන්ධයෙන් සැකපිට රැඳවුම් නියෝග මත රඳවාගෙන සිටින නීතිඥ තමරා අබේරත්න විසින් ව්‍යාජ ලේඛන ඉදිරිපත් කර ආරම්භ කළ බැංකු ගිණුම් 08ක් ගැන විමර්ශන සිදු කරන බව අපරාධ පරීක්ෂණ දෙපාර්තමේන්තුව කොළඹ මහෙස්ත්‍රාත් අධිකරණයට දැනුම් දී තිබේ.

මෙම පැමිණිල්ල කොළඹ ප්‍රධාන මහෙස්ත්‍රාත් අසංග එස් බෝදරගම මහතා ඉදිරියේ කැඳවනු ලැබුවා අවස්ථාවේදී මෙම දැනුම් දීම සිදුකළේය.

පොලීසිය අධිකරණය හමුවේ කරුණු දක්වමින් සඳහන් කළේ එම නීතිඥවරිය සම්බන්ධයෙන් සිදුකළ විමර්ශනවලදී අදාල බැංකු ගිණුම් පිළිබඳ තොරතුරු අනාවරණය වූ බවය.

වැඩිදුර විමර්ශන සිදු කිරීමේදී මෙම බැංකු ගිණුම් ව්‍යජ ජාතික හැඳුනුම්පතක් ඉදිරිපත් කර මෙම බැංකු ගිණුම් විවෘත කර තිබෙන බවට තොරතුරු අනාවරණය වී ඇති බවත් පොලීසිය කියා සිටියේය.

මෙම බැංකු ගිණුම් හරහා විශාල ලෙස මුදල් හුවමාරු වී ඇති අතර ඒ පිළිබඳව වැඩිදුර විමර්ශන සිදුකරන බවත් පොලීසිය අධිකරණයට දැනුම්දුන් බව “අද දෙරණ” අධිකරණ වාර්තාකරු පැවසීය.

ඉදිරිපත් වූ කරුණු සලකා බැලූ මහෙස්ත්‍රාත්වරයා මෙම බැංකු ගිණුම් සම්බන්ධයෙන් විමර්ශන සිදුකර එහි ප්‍රගතිය අධිකරණයට වාර්තා කරන ලෙස අපරාධ පරීක්ෂණ දෙපාර්තමේන්තුවට නියෝග කළේය.

ශ්‍රීපාද කඳු මුදුන ඉදිරිපිට පිහිටි ශ්‍රීපාද රක්ෂිතයට අයත් කඳුයායක අද (19) දින හදිසි ගින්නක් හටගෙන තිබේ.

ගින්න හටගැනීමට නිශ්චිත හේතුව මෙතෙක් අනාවරණවී නොමැති වුවද, ප්‍රදේශයට බලපා ඇති දැඩි වියළි කාලගුණය සහ පවතින තද සුළං තත්ත්වය හේතුවෙන් ගින්න ඉතා සීඝ්‍රයෙන් වර්ධනය වෙමින් පවතින බව වාර්තා වේ.

මෙම ප්‍රදේශය දුර්ලභ සත්ත්ව විශේෂ සහ ශාක පද්ධතීන්ගෙන් පිරිපුන් මෙම සංවේදී කලාපය ජෛව විවිධත්වයෙන් ඉතා ඉහළ ප්‍රදේශයකි.

පවතින තත්ත්වය හමුවේ මෙම වටිනා පරිසර පද්ධතියට සහ ජීවීන්ට දැඩි තර්ජනයක් එල්ලවී ඇති බව පරිසරවේදීහු පෙන්වා දෙති.

ගින්න හටගෙන ඇත්තේ ඉතා දුෂ්කර කඳු මුදුනක බැවින්, එම ස්ථානයට ළඟාවී ගින්න නිවීමට මෙතෙක් කිසිදු කණ්ඩායමකට හැකියාවක් ලැබී නොමැති බව අද දෙරණ වාර්තාකරු වැඩිදුරටත් පැවසීය.