Author: Shashi Maduranga

පාස්කු ප්‍රහාර සිද්ධියෙන් පසු තරුණයෙකු අත්අඩංගුවට ගැනීම නීතියට පටහැනි බවට තීන්දුවක්…..

2019 වසරේ පාස්කු ඉරුදින ත්‍රස්ත ප්‍රහාර සිද්ධියෙන් පසුව ISIS ත්‍රස්ත ක්‍රියාකාරකම්වලට සම්බන්ධ බව පවසමින් අලුත්ගම ප්‍රදේශයේ පදිංචි මොහොමඩ් මිල්හාන් නමැති තරුණයෙකු සැකපිට ත්‍රස්තවාදය වැළැක්වීමේ පනත යටතේ අත්අඩංගුවට ගැනීම තුළින් පොලීසිය ඔහුගේ මූලික මිනිස් අයිතිවාසිකම් උල්ලංඝනය කර ඇතැයි ශ්‍රේෂ්ඨාධිකරණය තීන්දු කළේය.

ඒ අනුව අදාළ අත්අඩංගුවට ගැනීම සම්බන්ධව වගකිය යුතු ගල්කිස්ස පොලීසියේ උපපොලිස් පරීක්ෂකවරයා සිය පෞද්ගලික මුදලින් රුපියල් 30,000ක වන්දියක් සහ රජය විසින් රුපියල් 20,000ක වන්දියක් පෙත්සම්කරුට ගෙවිය යුතු බවත් එම තීන්දුවේ සඳහන්ව ඇත.

අදාල පෙත්සම්කරු විසින් ඉදිරිපත් කළ මූලික අයිතිවාසිකම් පෙත්සමක් විභාග කිරීමෙන් අනතුරුව අර්ජුන ඔබේසේකර, ප්‍රියන්ත ප්‍රනාන්දු සහ සෝභිත රාජකරුණා යන මහත්වරුන්ගේ සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම තීන්දුව ලබා දුන්නේය.

සෙසු විනිසුරුවරුන්ගේ එකඟත්වය ඇතිව තීන්දුව ප්‍රකාශයට පත් කළ විනිසුරු සෝභිත රාජකරුණා මහතා 2019 මැයි 05 වනදා අත්තිඩිය ප්‍රදේශයේදී පෙත්සම්කරු අත්අඩංගුවට ගෙන ඇති අතර, පසුව ත්‍රස්තවාදය වැළැක්වීමේ පනත යටතේ රඳවාගෙන ප්‍රශ්න කර තිබෙන බව සඳහන් කළේය.

පෙත්සම්කරු කියා සිටින්නේ ත්‍රස්තවාදය වැළැක්වීමේ පනත යටතේ පුද්ගලයෙකු අත්අඩංගුවට ගන්නා අවස්ථාවේ ඊට බලපාන හේතු එම සැකකරුට පොලිසිය විසින් දිය යුතු බවය.

එහෙත් වගඋත්තරකරුවන් තමන්ව අත්අඩංගුවට ගැනීමේදී ඊට හේතු වූ කරුණු තමන්ට දැනුම් නුදුන් බව ඔහු කියා සිටියේය.

වගඋත්තරකාර පොලිස් නිලධාරීන් අධිකරණයට ඉදිරිපත් කළ විරෝධතා මගින් දැනුම් දී තිබුණේ, ISIS සංවිධානයේ මතවාදය අනුගමනය කරන පුද්ගලයින්ගේ ලැයිස්තුවේ මෙම පෙත්සම්කරුගේ නම 84 වන ස්ථානයේ තිබූ බවය.

දෙපාර්ශවය විසින් ඉදිරිපත් කළ කරුණු සලකාබැලූ විනිසුරු මඩුල්ල සිය තීන්දුව තුළින් සඳහන් කර තිබුණේ පෙත්සම්කරු අත්අඩංගුවට ගන්නා අවස්ථාවේදී  ප්‍රමාණවත් කරුණු පැවැති බවට අධිකරණය හමුවේ තහවුරු කිරීමට වගඋත්තරකරුවන් අපොහොසත් වී ඇති බවයි.

ඒ අනුව පෙත්සම්කරු අපරාධ ක්‍රියාවලට සම්බන්ධ බවට සාධාරණ සැකයකින් තොරව තහවුරු කළ හැකි තොරතුරු අධිකරණය හමුවේ ඉදිරිපත් වී නොමැති බවත් විනිසුරුවරු සඳහන් කළේය.

පාස්කු ඉරුදින ත්‍රස්ත ප්‍රහාර සිද්ධියට සම්බන්ධ බවට සැකපිට පෙත්සම්කරුවත් අත්අඩංගුවට ගෙන තිබුණත්, ඔහු අත්අඩංගුවට ගැනීමට අදාළව නිකුත් කර තිබූ රිසිට් පතේ පාස්කු ප්‍රහාරය පිළිබඳව හෝ බුද්ධ ප්‍රතිමා විනාශ කිරීම සම්බන්ධ සිද්ධීන්වලට අදාල තොරතුරු ඇතුළත් වී නොතිබූ බව අධිකරණය නිරීක්ෂණය කරන බවත් තීන්දුවේ සඳහන් විය.

ඉදිරිපත් වූ කරුණු සලකා බැලීමේදී මෙම අත්අඩංගුවට ගැනීම තුළින් පෙත්සම්කරුගේ මූලික මිනිස් අයිතිවාසිකම් උල්ලංඝනය වී ඇතැයි තීන්දු කළ ශ්‍රේෂ්ඨාධිකරණය අනතුරුව මෙම තීන්දුව ප්‍රකාශයට පත්කළේය.

යුදමය තත්ත්වයෙන් ශ්‍රී ලංකාවේ ආර්ථිකයට සිදු විය හැකි බලපෑම සහ එය කළමනාකරණයට ගත යුතු කඩිනම් පියවර සොයා බැලීමේ සාකච්ඡාවක් ජනපති ප්‍රධානත්වයෙන්…..

මැදපෙරදිග කලාපයේ මේ වන විට ඇති වී තිබෙන යුදමය තත්ත්වය හේතුවෙන් ශ්‍රී ලංකාවේ ආර්ථිකයට සිදු විය හැකි බලපෑම සහ එය කළමනාකරණය කර ගැනීම වෙනුවෙන් ගත යුතු කඩිනම් ක්‍රියාමාර්ග පිළිබඳ සොයා බැලීමේ සාකච්ඡාවක් ජනාධිපති අනුර කුමාර දිසානායක මහතාගේ ප්‍රධානත්වයෙන් අද (04) පෙරවරුවේ ජනාධිපති කාර්යාලයේදී පැවැත්විණි.

 ඉදිරියේදී ඇති විය හැකි තත්ත්ව උපකල්පනය කළ නොහැකි වුවත්, සෑම ක්ෂේත්‍රයකම මතු වන නව වර්ධනයන් පිළිබඳ නිරන්තර අවධානයෙන් කටයුතු කරමින් සාමුහිකව මෙම අභියෝගය ජය ගැනීමට කටයුතු කළ යුතු බව ජනාධිපතිවරයා මෙහිදී පෙන්වා දුන්නේය.

 ඉන්ධන සහ ගෑස් සම්බන්ධව ඉදිරියේදී මතු විය හැකි අභියෝග සහ අවශ්‍ය තොග කළමනාකරණය කර ගැනීම පිළිබඳව මෙන්ම, සංචාරක, අපනයන, ආයෝජන ආදී අංශවලද ආහාර සුරක්ෂිතතාව සම්බන්ධව මතු විය හැකි තත්ත්ව සහ එමඟින් මෙරට උද්ධමනයට ඇති විය හැකි බලපෑමත් එය කළමනාකරණය කර ගැනීමට ගත යුතු පියවර පිළිබඳවත් මෙහිදී දීර්ඝ ලෙස සාකච්ඡා කෙරිණි. ශ්‍රී ලංකාව මේ වන විට අත්පත් කර ගෙන තිබෙන ආර්ථික ස්ථාවරත්වයට සහ සාමාන්‍ය ජන ජිවිතයට ඇති වන බලපෑම අවම කර ගනිමින් උද්ධමනය පාලනය කිරීමේ ක්‍රමවේද පිළිබඳ අවධානය යොමු කරන ලෙස ජනාධිපතිවරයා නිලධාරීන්ට උපදෙස් දුන්නේය.

 දැනට පවතින ඉන්ධන සංචිත ප්‍රමාණවත් වුවද, ඉදිරියේදී මතු විය හැකි අවදානම හමුවේ අවශ්‍ය තොග පවත්වා ගැනීම සහ එය කළමනාකරණයත්, ලෝක වෙළෙඳපොළේ සිදුවීමට නියමිත ඉන්ධන මිල උච්ඡාවචනයත් පිළිබඳව මෙහිදී අවධානය යොමු වූ අතර, මෙම තත්ත්වයන් කළමනාකරණය කර ගැනීම පිළිබඳ අවධානය යොමු කළ ජනාධිපතිවරයා ඒ වෙනුවෙන් ගත යුතු ක්‍රියාමාර්ග පිළිබඳවද සොයා බැලීය.

 ගෑස් සංචිත පවත්වාගෙන යාමේදී ගබඩා පහසුකම් ප්‍රමාණවත් නොවීම නිසා මතුව ඇති ගැටලු සහ ඊට විසඳුම් සෙවීම පිළිබඳව මෙන්ම, ඒ වෙනුවෙන් කෙටිකාලීනව අනුගමනය කළ හැකි උපායමාර්ග පිළිබඳවද මෙහිදී අවධානය යොමු කෙරිණි.

 සූවස් ඇළ සහ  හෝමුස් සමුද්‍ර සන්ධිය වැනි ස්ථාන වසා දැමීමෙන් නාවුක ගමනාගමනයට සිදු විය හැකි බාධා හේතුවෙන් කොළඹ වරායට ඇතිවිය හැකි බලපෑම අවමව තබා ගැනීම වෙනුවෙන් දීර්ඝකාලයක්     ශ්‍රී ලංකාව සමඟ කටයුතු කරන නාවුක සමාගම්වල ඉල්ලීම පරිදි ඔවුන්ට අවශ්‍ය පහසුකම් සලසා දීමේ හැකියාව පිළිබඳවද මෙහිදී අවධානය යොමු කෙරිණි…

හබරණ බිහිසුණු බස් අනතුරක් – 10කට තුවාල…..

හබරණ, පොළොන්නරුව මාර්ගයේ මින්නේරිය ප්‍රදේශයේදී සිදුවූ බස් අනතුරකින් පුද්ගලයින් දස දෙනෙකු තුවාල ලබා තිබේ.

පොලීසිය පැවසුවේ ඇඟලුම් සේවකයින් ප්‍රවාහනය කරන බස් රථයක් තවත් බස්රථයක සහ ගොයම් කපන යන්ත්‍රයක් ප්‍රවාහන කරමින් තිබූ ට්‍රැක්ටරයක ගැටීමෙන් මෙම අනතුර සිදුව ඇති බවය.

අනතුරින් බස්රථවල ගමන් ගත් හත් දෙනෙකු ඇතුළු පුද්ගලයින් 10 දෙනෙකු තුවාල ලබා හබරණ සහ පොළොන්නරුව රෝහල්වලට ඇතුළත් කර තිබේ.

ඉන් එක් අයෙකුගේ තත්ත්වය බරපතළ බැවින් දඹුල්ල රෝහල වෙත මාරු කර යවා ඇති බව පොලීසිය පැවසුවේය.

අතපය ගැට ගසා ඝාතනය කළ බවට සැක මළ සිරුරක්…..

අතපය ගැට ගසා ඝාතනය කර තිබූ පුද්ගල මළ සිරුරක් අද (03) උදෑසන පානදුර කොළඹ පරණ පාරේ තිබී පානදුර දකුණ පොලීසිය විසින් සොයා ගෙන ඇත.

එලෙස මියගොස් ඇත්තේ පානදුර උතුර ඥානසේන මාවතේ පදිංචිව සිටි 37 හැවිරිදි අයෙකු බවට අනාවරණය වී තිබේ.

මෙම ඝාතනය කෙසේ වූවාද යන්න පිළිබඳව මතෙක් තොරතුරු අනාවරණය වී නොමැති අතර, සිද්ධිය සම්බන්ධයෙන් පොලීසිය විසින් සිදුකරනු ලබයි.

මත්ද්‍රව්‍ය සමග කාන්තාවන් දෙදෙනෙකු අත්අඩංගුවට…..

හෙරොයින් සහ අයිස් මත්ද්‍රව්‍ය සමග සැකකාරියන් දෙදෙනෙකු අත්අඩංගුවට ගෙන තිබේ.

පොලීසිය පැවසුවේ වැලිවේරිය ඇඹරලුව උතුර ප්‍රදේශයේදී හෙරොයින් ග්‍රෑම් 25ක් සමග කාන්තාවක් අත්අඩංගුවට ගෙන ඇති බවය.

මෙලෙස අත්අඩංගුවට ගෙන ඇත්තේ 45 හැවිරිදි වැලිවේරිය ප්‍රදේශයේ පදිංචි කාන්තාවක් බව ද සඳහන්.

එම කාන්තාවගෙන් සිදුකළ ප්‍රශ්න කිරීම්වලට අනුව, අයිස් මත්ද්‍රව්‍ය ග්‍රෑම් 25ක් සහ ජාවාරමෙන් උපයාගත් බවට සැකකෙරෙන රුපියල් 410,470 මුදලක් සමග තවත් කාන්තාවක් අත්අඩංගුවට ගෙන ඇත.

මෙලෙස අත්අඩංගුවට ගෙන ඇත්තේ 60 හැවිරිදි කොළඹ 12 ප්‍රදේශයේ පදිංචි කාන්තාවකි.

හිටපු ඇමති ජි. එල් ගෙන් ජනපතිට ලිපියක්…

මැදපෙරදිග කලාපයේ උද්ගතව තිබෙන යුදමය ගැටුම්කාරී තත්ත්වය හමුවේ ශ්‍රී ලංකාවට මුහුණ දීමට සිදුවන අභියෝග සහ එහි බරපතලකම සම්බන්ධයෙන් හිටපු විදේශ අමාත්‍ය ජි. එල් පීරිස් මහතා විසින් ජනාධිපති අනුර කුමාර දිසානායක මහතා වෙත ලිපියක් යොමු කර තිබේ.

එම ලිපිය මගින් ප්‍රධාන වශයෙන් කරුණු කිහිපයක් හුවාදක්වමින් ජී. එල් පිරීස් මහතා ඉල්ලා ඇත්තේ ඒ සම්බන්ධයෙන් ජනාධිපතිවරයාගේ අවධානය වහාම යොමුකරණ ලෙසෙටය.

ලෝක වෙළෙඳපොළේ ඉහළ යන තෙල් මිල නුදුරු අනාගතයේදීම දේශීය වෙළෙඳපොළටද බලපානු ඇති බැවින් ඒ හරහා මෙරට ජීවන වියදම ඉහළ යන බවත්, දැනටමත් ආර්ථික දුෂ්කරතාවලින් පීඩා විඳින මෙරට ජනතාවගේ පීඩනය තවදුරටත් දැඩි වන බවත් ඒ මහතා පෙන්වා දී ඇත.

මැදපෙරදිග කලාපයේ පවතින යුදමය වාතාවරණය හේතුවෙන් විශේෂයෙන්ම මෙරට තේ වැනි අපනයන භාණ්ඩ සඳහා වෙළෙඳපොළට ප්‍රවේශ වීම අහිමි වී යා හැකි බවත් එමගින් අපනයන ආදායම පහත වැටීමේ අවදානමක් පවතින බවත් එම ලිපියේ සඳහන් වේ.

එමෙන්ම පවතින ගුවන් ගමන් අවහිරතා හේතුවෙන් යුරෝපය, උතුරු අමෙරිකාව සහ ගල්ෆ් කලාපයෙන් පැමිණීමට නියමිතව සිටි සංචාරකයින් විශාල වශයෙන් මේ වන විට, වෙන් කරවාගත් නවාතැන් පහසුකම් ද අවලංගු කරමින් සිටින වාතාවරණයක සංචාරක හෝටල් ක්ෂේත්‍රයට එයින් දැනටමත් බලපෑම එල්ල වී ඇති බව ඒ මහතා සිය ලිපියෙන් පෙන්වා දී තිබේ.

තවද සමස්ත ගල්ෆ් කලාපය පුරා සේවය කරන ශ්‍රී ලාංකික ශ්‍රමිකයින් මෙරටට එවන විදේශ විනිමය අඛණ්ඩව පවත්වාගෙන යාම මෙම තත්ත්වය හමුවේ දැඩි අවදානමකට ලක්ව ඇති බවත් ඒ මහතා සිය ලිපියෙන් වැඩිදුරටත් පෙන්වා දී ඇත.

ගෑස් ප්‍රශ්නයට ජනපතිගෙන් පිළිතුරු…

පවතින තත්ත්වය තුළ රට තුළ එකවර ගෑස් සඳහා ඉල්ලුම වැඩිවීම හේතුවෙන් අර්බුදයක් නිර්මාණය වී ඇති බව ජනාධිපති අනුර කුමාර දිසානායක මහතා පවසයි.

අද (03) පාර්ලිමේන්තුවේ දී රට තුළ මතුව තිබෙන ගෑස් හිඟයට විසඳුම් ඉදිරිපත් කරමින් ජනාධිපතිවරයා පැවසුවේ, ගෑස් ගබඩා කිරීමේ අර්බුදයක් ඇති බැවින් ඒ සඳහා අවශ්‍ය විසඳුම් මේ වනවිට සකස් කරමින් පවතින බවය.

රට තුළ උපරිමයෙන් ගෑස් ගබඩා කළ හැක්කේ සතියක පමණ කාලයකට පමණක් බවද ජනාධිපතිවරයා මෙහිදී අවධාරණය කළේය.

ඉදිරියේදී ගෑස් සහ තෙල්වල අර්බුදයක් ඇති වීමේ ඉඩකඩ බෙහෝම අවම බවද සඳහන් කර සිටි ජනාධිපතිවරයා මාර්තු මස 12 වෙනිදා වන විට අලුත් ගෑස් සිලින්ඩර 100,000ක් රැගත් නැවක් මෙරටට පැමිණීමට නියමිත බවද පැවසීය.

“අපි මුහුණදෙන විශේෂ ප්‍රශ්නයක් තමා ගෑස් ප්‍රශ්නය. අපේ මුළු ගබඩා ධාරිතාවය තියෙන්නේ මෙට්‍රික් ටොන් 8,000ක. අපේ දෛනික ගෑස් අවශ්‍යතාවය ලිට්‍රෝ සමාගමේ 1,000 – 1,200ත් අතර. අපිට උපරිම ගෑස් ගබඩා කරන්න පුළුවන් වෙන්නේ සතියකට විතරයි. ඉතින් හිදෙනකල්ම ඉඳලා ගේන්නත් බෑනේ. දවස් දෙක ඇර දවස් දෙකක් ඇර 8,000 ගානේ වරායට ගේනවා. මේකයි තත්ත්වය. මේක වෙනස් කරන්න ඕනේ. දැනුත් මාලදිවයිනේ නැවක් නතර කරගෙන තියෙනවා. ඒ නැවෙන් පොඩි පෙඩි නැව්වලින් 8,000 ගානේ ගේනවා. රටවල් ද මේවා. මේවා තමා හුණ්ඩු. මේවා වෙනස් කරන්න ඕනේ. ලිට්‍රෝ ගෑස් අලුත් සිලින්ඩර් ලක්ෂයක් ඇණවුම් කරලා තියෙනවා. 12 වෙනිදා එනවා නැව. මොකද සිලින්ඩර් හිඟයක් තිබුණා. කහ පාට අයට නිල් පාට එකට මාරු වෙන්න ඕනකම තිබුණා. නමුත් ටැංකි නෑ. මෙහෙමයි හදන්නේ. ගෑස් හිඟයි ගෑස් හිඟයි කියලා කෑ ගැහුවා. අර්බුදය තේරුම් ගන්න…

මෙට්‍රික් ටොන් 8,000ක නම් ගබඩා තියෙන්නේ, ලිට්‍රෝ එකට සපයන්න පුළුවන් 1000 – 1200 අතර නම්, 1800ක ඉල්ලුමක් එකපාර ආවනම් සපයන්න පුළුවන්කම තියෙන්නේ දින 5කට වඩා අඩුවෙන් නම් අර්බුදයක් ඇති විය හැකියි. ඒ අර්බුදයට විසඳුම් සෙවිය හැකියි.”

සංචාරක පැමිණීමේ ඉලක්කවලට බාධා – සතියකට පාඩුව ඩොලර් මිලියන 10ත් 12ත් අතර අගයක්….

මැදපෙරදිග ඇති වූ යුදමය වාතාවරණය හමුවේ මාර්තු මාසයේ දී බලාපොරොත්තු වූ සංචාරකයින්ගේ පැමිණීමේ ඉලක්කයන් සපුරාගැනීමට නොහැකි වූ බව සංචාරක කටයුතු නියෝජ්‍ය අමාත්‍ය රුවන් රණසිංහ මහතා පවසයි.

අද (03) කෙළඹදී මාධ්‍යවේදීන් ඇසු ප්‍රශ්න කිහිපයකට පිළිතුරු දෙමින් නියෝජ්‍ය අමාත්‍යවරයා මේ බව පැවසීය.

කෙසේවෙතත් ශ්‍රී ලංකාවේ වැඩිම සංචාරක වෙළෙඳපොළ වන්නේ ඉන්දියාව බවත් ඉන්දියාවෙන් පැමිණෙන සංචාරකයින්ගේ පැමිණිමට කිසිදු බලපෑමක් සිදුව නොමැති බවත් නියෝජ්‍ය අමාත්‍යවරයා පවසයි.

එමෙන්ම යුරෝපා රටවල් සඳහා ශ්‍රී ලන්කන් ගුවන් සමාගම හරහා සෘජුවම ගුවන් ගමන් ඇරඹීමට මේ වන විට කටයුුතු යොදා ඇති බැවින් ඉදිරියේදී යුරෝපයෙන් පැමිණෙන සංචාරකයින්ට කිසිදු ගැටලුවකින් තොරව ශ්‍රී ලංකාවට පැමිණීමට සහ නැවත පිටත්ව යාමට හැකි බව ඒ මහතා වැඩිදුරටත් පවසයි.

“මාර්තු මාසේ තමයි අපි ඉතිහාසයේ වැඩිම ලක්ෂ 3ක් වැනි සංචාරකයින් සංඛ්‍යාවක් ශ්‍රී ලංකාවට ආකර්ශනයකර ගන්න බලාපොරොත්තුවෙන් හිටියා. නමුත් යම් අඩුවීමක් තියෙනවා. යුරෝපාකරයෙන් සංචාරකයින් පැමිණෙන්නේ මැදපෙරදිග හරහා. ඉතින් ඩුබායි, අබුඩාබි, කාටර් වැනි ගුවන්තොටුපොළවල් වසා දැමීමත් එක්ක අඩුවක් තියෙනවා. නමුත් වැඩිම වෙළෙඳපොළ අපේ ඉන්දියාව නිසා අපේ විශාලම වෙළෙඳපොළට ගැටලුවක් නෑ. එවගේම චීනය, ඔස්ට්‍රේලියාව,නවසීලන්නය, අමෙරිකාව මේ වගේ රටවලින් පැමිණෙන සංචාරකයින් සාමාන්‍ය ලෙස පැමිණෙනවා. යුරෝපයටත් සෘජු ගුවන් ගමන් දැන් ශ්‍රී ලන්කන් ආරම්භ කරලා තියෙනවා අනෙකුත් ගුවන් මාර්ග හරහා. ඒ අනුව එහෙන් පැමිණෙන අයටත් මෙහෙන් යන්න ඉන්න අයටත් යම් පහසුවක් අපි සලසල තියෙනවා ශ්‍රී ලන්කන් හරහා. තවමක් ඉතිහාඩ්, කටාර් වැනි ගුවන් සමාගම් සිය මෙහෙයුම් ආරම්භ කරලා නෑ.”

“දවසකට 25ක් 30ක් අතර සංඛ්‍යාවක් මැදපෙරදිග හරහා එනවා. මේ වෙනකොට පැමිණෙන්නේ නෑ. ශ්‍රී ලංකාවේ සතියකට සංචාරක කර්මාන්තයට අදාළව ඩොලර් මිලියන 10ක 12ක වගේ අහිමිවීමක් අපිට සිදුවෙනවා. අපි බලාපොරොත්තු වෙනවා මේ යුද්ධය අදාළ පාර්ශව විසින් සාකච්ඡා කරලා අවසාන වෙයි කියලා. “

“එමෙන්ම මැදපෙරදිග ඉන්න ශ්‍රී ලාංකිකයින් සම්බන්ධයෙනුක් අපි ඉතාම අවධානයෙන් ඉන්නවා. මෙරටට ඒමට අවශ්‍යතාවයක් තියෙන අයට තානාපති කාර්යාල හරහා සම්බන්ධවෙලා ඒ කටයුතු කරගන්න. රජයක් විදියට අපි ඒකට මැදිහත් වෙලා කටයුතු කරන්න සූදානමෙන් ඉන්නවා.”  

“සංචාරක පැමිණීමෙන් 30%ක් පමණ තමා මැදපෙදිගින් පැමිණෙන්නේ. එමෙන්ම මැදපෙරදිග වැසියන් එන්නේ නෑ එයාල රාමදාන්වල ඉන්න නිසා. මැදපෙරදිග හරහා යුරෝපයෙන් එන අයට තමා මේ බලපෑම ඇති වෙලා තියෙන්නේ. අනිත් එවාගේ කිසිදු ගැටලුවක් නෑ සාමාන්‍ය පරිදි ක්‍රියාත්මක වෙනවා.”

මැදපෙරදිග අර්බුදය හේතුවෙන් විදෙස් රටවලට තෑපැල හරහා භාණ්ඩ යැවීමේ ප්‍රමාදයක් – තැපැල්පති….

මැදපෙරදිග කලාපයේ පවතින යුධමය තත්ත්වය හේතුවෙන් විවිධ රටවල් වෙත භාණ්ඩ යැවීමේ කටයුතු වලට බාධා එල්ල වී ඇති බව තැපැල්පති එස්.ආර්.ඩබ්.එම්.ආර්.පී. සත්කුමාර මහතා පැවසීය.

අද මාධ්‍ය වෙත අදහස් දක්වමින් ඔහු සඳහන් කළේ, පසුගිය සිකුරාදා භාරගත් භාණ්ඩ කිහිපයක් මේ වනවිටත් යැවීමට නොහැකි වී ඇති බවයි.

මැදපෙරදිග කලාපයේ පවතින අස්ථාවර තත්ත්වය හේතුවෙන් ඇතැම් ප්‍රදේශවලට භාණ්ඩ යැවීම සීමා වී ඇති අතර, ඇතැම් භාණ්ඩ යැවීමේදී බාධා ඇතිවිය හැකි බවද ඔහු පැවසීය.

විශේෂයෙන්ම එම කලාපය වෙත සිදුකරන ගුවන් ගමන් විශාල සංඛ්‍යාවක් අවලංගු වී ඇති බැවින් ජාත්‍යන්තර තැපැල් සේවා කටයුතු සෘජුවම බලපෑමට ලක්ව තිබේ.

ප්‍රමාදවීම් පිළිබඳව මහජනතාව දැනුවත් කිරීමට ද පියවර ගත් බව සඳහන් කළ තැපැල්පතිවරයා, ඒ ඒ රටවල තැපැල් පරිපාලන සමඟ අඛණ්ඩව සම්බන්ධතා පවත්වා ගෙන යන බවද පැවසීය.

යථා තත්ත්වය යළි ස්ථාපිත වූ වහාම ජාත්‍යන්තර තැපැල් සේවා සාමාන්‍ය පරිදි ආරම්භ කිරීමට බලාපොරොත්තු වන බවද ඔහු සඳහන් කළේය.

මෙවැනි තත්ත්වයක් තුළ භාණ්ඩ ප්‍රමාද වීම හේතුවෙන් විශේෂයෙන්ම නරක් වීමට ඉඩ ඇති භාණ්ඩ සම්බන්ධයෙන් අවදානම් පවතින බැවින්, ඒවා පාලනයෙන් තොර විය හැකි බවද ඔහු අවධාරණය කළේය.

එබැවින්, මේ අවස්ථාවේ පවතින තත්ත්වය පිළිබඳ අවබෝධයෙන් කටයුතු කරමින් විදේශයන් වෙත භාණ්ඩ යැවීමට පියවර ගන්නා ලෙස මහජනතාවගෙන් ඉල්ලා සිටී.

භාණ්ඩ අදාළ ගමනාන්ත වෙත යැවීම සම්බන්ධයෙන් මේ අවස්ථාවේ අපහසුතා පවතින්නේ ශ්‍රී ලංකාවට පමණක් නොව, අනෙකුත් රටවලටද වන බව ඔහු වැඩිදුරටත් පැවසීය.

පාර්ලිමේන්තුවේ නියෝජ්‍ය මහ ලේකම්ගේ වැඩ තහනම් කිරීමට එරෙහි පෙත්සම කැඳවීමට දින දෙයි….

කිසිදු සාධාරණ පරීක්ෂණයකින් තොරව සිය වැඩ තහනම් කිරීමට ගෙන තිබෙන තීරණය බල රහිත කිරීමේ රිට් ආඥාවක් නිකුත් කරන ලෙස ඉල්ලා පාර්ලිමේන්තුවේ හිටපු නියෝජ්‍ය මහ ලේකම් චමින්ද කුලරත්න මහතා විසින් ඉදිරිපත් කළ රිට් පෙත්සම කරුණු තහවුරු කිරීම සඳහා මාර්තු මස 18 වනදා කැඳවන ලෙස අභියාචනාධිකරණය අද (03) නියම කළේය.

මෙම පෙත්සම අද අභියාචනාධිකරණයේ සභාපති විනිසුරු රොහාන්ත අබේසූරිය සහ ප්‍රියන්ත ප්‍රනාන්දු යන මහත්වරුන්ගේ සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජනරාල්වරිය අධිකරණය හමුවේ කරුණු දක්වමින් මෙම නඩුකරයට අදාළව තමන් විසින් නිරීක්ෂණ කීපයක් ලබාගෙන තිබෙන බව සඳහන් කළේය.

එහෙත් මෙම පෙත්සම සම්බන්ධයෙන් කරුණු තහවුරු කිරීමට පෙර මෙම නඩුකරයට අදාලව සමස්ත නිරීක්ෂණ ලබා ගැනීමට අවශ්‍ය බවත් ඒ සඳහා කාලය ලබා දෙන ලෙසත් ඇය අධිකරණයෙන් ඉල්ලා සිටියාය.

ඊට අමතරව සීමිත විරෝධතා ඉදිරිපත් කිරීම අවසර ලබා දෙන ලෙසත් ඇය අධිකරණයෙන් අවසර ඉල්ලා සිටියාය.

එම අවස්ථාවේදී පෙත්සම්කාර පාර්ශ්වය වෙනුවෙන් නීතිඥ රුක්ෂාන් සේනාධිර මහතා සමග පෙනී සිටි ජනාධිපති නීතිඥ සංජීව ජයවර්ධන මහතා අධිකරණය හමුවේ කරුණු දක්වමින් මෙම ඉල්ලීමට තමන් විරුද්ධ නොවන බව පැවසුවේය.

සිය සේවාදායකයාගේ පත්වීම් සහ විනය බලධාරියා පාර්ලිමේන්තු මහ ලේකම් බවත් ඔහුගේ වැඩ තහනම් කිරීමට පාර්ලිමේන්තු උපදේශක කමිටුවට බලයක් නොමැති බවත් ජනාධිපති නීතිඥවරයා පැවසුවේය.

ඔහුගේ වැඩ තහනම් කර තිබෙන්නේ වැටුප් රහිතව බවත් එය සම්පූර්ණයෙන්ම නීතියට පටහැනි බවත් ජනාධිපති නීතිඥ සංජීව ජයවර්ධන මහතා මෙහිදී පෙන්වා දුන්නේය.

ඉදිරිපත් වූ කරුණු සලකා බැලූ විනිසුරු මඩුල්ල මෙම පෙත්සම කරුණු තහවුරු කිරීම සඳහා මාර්තු මස 18 වනදා සහ 19 වනදා කැඳවන ලෙස නියෝග කළේය.

සීමිත විරෝධතා සහ ලේඛන ඉදිරිපත් කරන්නේ ඒවා පෙත්සම්කාර පාර්ශ්වය සහ සෙසු වගඋත්තරකරුවන් වෙත නොතිසි ලබාදී  ඒවා ගොනු කිරීමට පියවර ගන්නා ලෙසත් විනිසුරු මඩුල්ල නියෝජ්‍ය සොලිසිටර් ජෙනරාල්වරියට නියෝග කළේය.

එම රිට් පෙත්සමේ වග උත්තරකරුවන් ලෙස කතානායකවරයා පාර්ලිමේන්තුවේ මහ ලේකම්වරිය, විපක්ෂ නායක සජිත් ප්‍රේමදාස, අමාත්‍ය බිමල් රත්නායක ඇතුළු 14 දෙනකු නම් කර ඇත.