ශ්රී ලංකාව ආගන්තුක සත්කාරකත්වයෙන් ඉහල රටක් බව නැවතත් සනාථ කරමින් රට තුල සිටින විදේශීය සංචාරකයින්ට, තෙල් අර්බුදයෙන් පීඩා නොවිද ලාංකේය සංස්කෘතික හා කර්මාන්ත අත්දැකීම් තිලිණ කරමින් , ලෙහෙසියෙන් ගමන් කිරීමට හැකි කොළඹ 07 මහවැලි කේන්ද්ර පරිශ්රයේදී මෙම වැඩසටහන පැවැත්වේ. මහවැලි උපදේශක කාර්යංශය , මහවැලි අධිකාරිය ,මහවැලි කේන්ද්රය හා ජාතික තරුණ සේවා සභාව එක්ව වැඩසටහන ක්රියාත්මක කරයි.
Author: Shashi Maduranga
ආසියානු සංවර්ධන බැංකුවේ සභාපති නිල සංචාරයක් සඳහා දිවයිනට…..
ආර්ථික සහයෝගීතාව ශක්තිමත් කිරීම, ප්රධාන පාර්ශවකරුවන් සමඟ සාකච්ඡා පැවැත්වීම සහ දිට්වා සුළි කුණාටුවෙන් පීඩාවට පත් ප්රදේශවල හානිය නිරීක්ෂණය කිරීමේ අරමුණින් තෙදින නිල සංචාරයක් සඳහා ආසියානු සංවර්ධන බැංකුවේ (ADB) සභාපති Masato Kanda මහතා අද (23) උදෑසන ශ්රී ලංකාවට පැමිණියේය.
කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය අනිල් ජයන්ත ප්රනාන්දු මහතා විසින්
කටුනායක බණ්ඩාරනායක ජාත්යන්තර ගුවන් තොටුපොළේදී සභාපතිවරයාව පිළිගන්නා ලදී.
මේ අතර ආසියානු සංවර්ධන බැංකු සභාපතිවරයා අද (23) පෙරවරුවේ කොළඹ වරාය පරිශ්රයේ නිරීක්ෂණ චාරිකාවකට එක්වීමට නියමිත අතර, කොළඹදී පෞද්ගලික අංශයේ නියෝජිතයන් සමඟ සාකච්ඡාවකට සහභාගී වීමටද නියමිතය. එමෙන්ම Masato Kanda මහතා ආසියානු සංවර්ධන බැංකුවේ ශ්රී ලංකා නේවාසික මෙහෙයුම් කාර්යාලය (SLRM) වෙත යාමටද නියමිතව තිබේ.
හෙට (24) දින සභාපතිවරයා ඇතුළු දූත පිරිස “දිට්වා” සුළි කුණාටුවෙන් පීඩාවට පත් ප්රදේශවල නිරීක්ෂණ චාරිකාවක නිරත වීමට නියමිතය. මීට අමතරව, සුළි කුණාටුවෙන් පීඩාවට පත් අම්බලන්කන්ද ප්රදේශයේද නිරීක්ෂණ චාරිකාවකට එක්වීමට නියමිත අතර එහිදී ජනතාව සමඟ අදහස් හුවමාරු කර ගැනීමටත්, සිදුව ඇති හානිය සෘජුවම දැක බලා ගැනීමටත් සැලසුම් කර ඇත.
අනතුරුව ආසියානු සංවර්ධන බැංකු සභාපතිවරයා ජනාධිපති ලේකම් කාර්යාලයේදී ජනාධිපති අනුර කුමාර දිසානායක මහතා හමු වීමට නියමිතය. මෙම හමුවේදී ආර්ථික පුනර්ජීවනය, සංවර්ධන මූල්යකරණය සහ ශ්රී ලංකාව හා ආසියානු සංවර්ධන බැංකුව අතර ද්විපාර්ශ්වික සහයෝගීතාවය ශක්තිමත් කිරීම පිළිබඳව අවධානය යොමු කෙරෙනු ඇතැයි අපේක්ෂා කෙරේ.
ආසියානු සංවර්ධන බැංකු සභාපතිවරයා සමඟ එහි දකුණු ආසියානු කලාපීය දෙපාර්තමේන්තුවේ අධ්යක්ෂ ජනරාල් Sona Shrestha, සභාපති කාර්යාලයේ ප්රධාන උපදේශක Keiichiro Inui, සභාපති කාර්යාලයේ ජ්යෙෂ්ඨ උපදේශක Manisha Pradhananga යන මහත්ම මහත්මීන් ඇතුළු ජ්යෙෂ්ඨ නිලධාරීහූ පිරිසක් මෙම සංචාරයට එක්ව සිටී.
අර්ජුන රණතුංගට හා ධම්මික රණතුංගට අධිචෝදනා…
දූෂණ චෝදනාවක් සම්බන්ධයෙන් හිටපු ඇමති අර්ජුන රණතුංගට හා ඛනිජ තෙල් නීතිගත සංස්ථාවේ හිටපු සභාපති ධම්මික රණතුංගට කොළඹ මහාධිකරණය හමුවේ අද (23) අධිචෝදනා භාර දුන්නේය.
ඉන් අනතුරුව විත්තිකරුවන් මිලියන 5 බැඟින් වූ ශරිර ඇප 2ක් මත මුදා හැරීමට අධිකරණය නියෝග කළේය.
අනතුරුව මෙම නඩුව පූර්ව නඩු විභාග සම්මන්ත්රණය සඳහා මැයි මස 15 වනදා කැඳවන ලෙස නියෝග කළේය.
2017 – 2018 වර්ෂයේ මාස හයක කාලයක් සඳහා ලංකා ඛනිජ තෙල් නීතිගත සංස්ථාව මඟින් මෙරටට අවශ්ය ඉන්ධන මිල දී ගැනීමට නියමිතව තිබූ දිගු කාලීන ටෙන්ඩර් 03ක් අවලංගු කර ඒ වෙනුවට වැඩි මිල ගණන් යටතේ ස්ථානීය ටෙන්ඩර් 27ක් ක්රියාත්මක කිරීමට කටයුතු සැලැස්වීම තුළින් ඛනිජ තෙල් නීතිගත සංස්ථාවට රුපියල් මිලියන 800කට ආසන්න පාඩුවක් සිදුකිරීම සහ ඊට ආධාර අනුබල දුන්නේ යැයි කියන චෝදනාව විත්තිකරුවන්ට එරෙහිව චෝදනා ගොනුකර තිබේ.
ශ්රී ලංකාවට තෙල් දෙන්න ඉරානය සුදානම් – මෙරට ඉරාන තානාපතිගෙන් විශේෂ ප්රකාශයක්…..
ශ්රී ලංකාව සිය මිතුරෙකු බවත් ඕනෑම අවස්ථාවක මෙරටට උදව් කිරීමට ඉරානය සුදානම් බවත් ශ්රී ලංකාවේ ඉරාන තානාපති අලිරේසා ඩෙල්කෝෂ් (Alireza Delkhosh) මහතා පවසයි.
මෙරට ඉරාන තානාපති කාර්යාලයේ පැවැත්වෙන විශේෂ මාධ්ය හමුවකට එක්වෙමින් ඔහු වැඩිදුරටත් පවසා සිටියේ, ශ්රී ලංකාව තෙල් හෝ වෙනත් ඕනෑම අත්යවශ්ය භාණ්ඩ ඉල්ලා සිටියහොත්, ඉරානය එම භාණ්ඩ ශ්රී ලංකාවට ලබාදීමට සුදානම් බවය.
හෝමූස් සමුද්ර සන්ධිය ඉරානය සිය මිත්ර රටවලට වසා දමා නොමැති බවද අලිරේසා ඩෙල්කෝෂ් මහතා මෙහිදී අවධාරණය කළේය.
ශ්රී ලංකාව කරදරයක වැටෙනු දැකීමට තම රටට අවශ්යතාවයක් නොමැති බවත්, ශ්රී ලංකාව ඉරානයට ඉතා ගෞරවනීය රටක් වන බවද ඉරාන තානාපති අලිරේසා ඩෙල්කෝෂ් මහතා වැඩිදුරටත් පැවසීය.
එමෙන්ම පසුගිය දා අමෙරිකානු සම්මැරීනයක් මඟින් එල්ලකළ ටෝපිඩෝ ප්රහාරයකින් මුහුදුබත් වූ ඉරානයේ ‘IRIS Dena’ යුද නෞකාවේ සිටි පිරිස මුදාගැනීමට ශ්රී ලංකාව කටයුතු කළේ ඉරාන ඉල්ලීමක් කිරීමට පළමුව බවද පැවසු අලිරේසා ඩෙල්කෝෂ් මහතා ශ්රී ලංකාව විසින් සිදුකළ එම උපකාරය ද මෙහිදී සිහිපත් කළේය.
මේ අතර ඉරානයේ සිටින ශ්රී ලාංකිකයින්ට මෙරටට පැමිණීමට අවශ්ය නම් ඒ සඳහා අවශ්ය පහසුකම් ලබාදීමට ඉරාන රජය සුදානම් බවද ඉරාන තානාපති අලිරේසා ඩෙල්කෝෂ් මහතා වැඩිදුරටත් පැවසීය.
ඉරානය තුළ පදිංචිව සිටින විදේශිකයන් ආරක්ෂා කිරීම සඳහා පුළුල් යටිතල පහසුකම් ස්ථාපිත කර ඇති බවත් තානාපතිවරයා මෙහිදී ප්රකාශ කළේය. අද වන විට ඔවුන්ට බලපාන කිසිදු ගැටලුවක් වාර්තා වී නොමැති බවත්, ඔවුන්ගේ යහපැවැත්ම සහතික කිරීම සඳහා අවශ්ය සියලු පියවර ගෙන ඇති බවත් ඔහු අවධාරණය කළේය.
ඔහු තවදුරටත් පවසා සිටියේ, “ඔවුන් තම රටවලට ආපසු යාමට කැමති නම්, තුර්කිය වැනි අසල්වැසි රටවල් හරහා ඔවුන්ගේ ගමන් පහසුකම් සැලසිය හැකියි” යනුවෙනි.
සලේ අත්අඩංගුවට ගැනීමට එරෙහි පෙත්සම සලකා බැලීමට දිනදෙයි…..
රාජ්ය බුද්ධි සේවයේ හිටපු ප්රධානී විශ්රාමික යුද හමුදා මේජර් ජෙනරාල් සුරේෂ් සලේ මහතා ත්රස්තවාදය වැළැක්වීමේ පනත යටතේ අත්අඩංගුවට ගෙන රඳවා ගැනීම අභියෝගයට ලක් කරමින් ගොනු කෙරුණු මූලික අයිතිවාසිකම් පෙත්සමක් සලකා බැලීම සඳහා ලබන සැප්තැම්බර් මස 25 වනදා කැඳවන ලෙස ශ්රේෂ්ඨාධිකරණය නියෝග කර තිබේ.
ශ්රී ලංකා ගුවන් හමුදාවේ විශ්රාමික නිලධාරියෙකු වන ශාන්ත ජයතිලක මහතා විසින් මෙම පෙත්සම ගොනු කර තිබුණි.
මෙම පෙත්සම අද (23) අගවිනිසුරු ප්රීති පද්මන් සූරසේන, ජනක් ද සිල්වා සහ සම්පත් විජේරත්න යන මහත්වරුන්ගෙන් සමන්විත ත්රී පුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී පෙත්සම්කාර විශ්රාමික ගුවන් හමුදා නිලධාරි ශාන්ත ජයතිලක මහතා විවෘත අධිකරණය හමුවේ කරුණු දක්වමින් මෙම පෙත්සම සම්බන්ධයෙන් කරුණු තහවුරු කිරීම සඳහා එළඹෙන අධිකරණ නිවාඩුවට පෙර දිනයක් ලබා දෙන ලෙස ඉල්ලා සිටියේය.
එහෙත් අගවිනිසුරුවරයා ප්රමුඛ ත්රිපුද්ගල ශ්රේෂ්ඨාධිකරණ විනිසුරු මඩල ප්රකාශ කළේ මෙම පෙත්සම කරුණු තහවුරු කිරීම සඳහා ලබන සැප්තැම්බර් මස 25 වනදා කැඳවන බවය.
අදාළ පෙත්සමේ වග උත්තරකරුවන් ලෙස ආරක්ෂක අමාත්යවරයා, ආරක්ෂක අමාත්යාංශයේ ලේකම්වරයා, මහජන ආරක්ෂක අමාත්යාංශයේ ලේකම්වරයා, පොලිස්පතිවරයා සහ අපරාධ පරීක්ෂණ දෙපාර්තමේන්තුව නම් කර ඇත.
පෙත්සම්කරු සිය පෙත්සම තුළින් කියා සිටින්නේ ත්රස්තවාදය වැළැක්වීමේ පනත යොදා ගත හැක්කේ රටේ ඒකීයභාවය සහ භෞමික අඛණ්ඩතාවය බිඳ හෙළීමේ ක්රියාවල නිරත වන පාර්ශවයන්ට සහ නීත්යානුකූලව පත් වූ ආණ්ඩු පෙරළා දැමීමට ඍජුව හෝ වක්රව දායකත්වය දැක්වූ පුද්ගලයින්ට එරෙහිව පමණක් බවය.
නමුත් සුරේෂ් සලේ මහතාට එවැනි වැරදි ක්රියා සම්බන්ධයෙන් චෝදනා එල්ල වී නොමැති බවත් පෙත්සම්කරු පෙන්වා දී ඇත.
එසේම සුරේෂ් සලේ මහතාට එරෙහිව ත්රස්තවාදය වැළැක්වීමේ පනත යටතේ එල්ල වී ඇති චෝදනා සහ සාක්ෂි කිසිවක් අපරාධ පරීක්ෂණ දෙපාර්තමේන්තුව මේ දක්වා අධිකරණයට ඉදිරිපත් කර නැති බවත් ඔහු කියා සිටියේය.
ඒ අනුව ත්රස්තවාදය වැළැක්වීමේ පනත යටතේ සුරේෂ් සලේ මහතාට එරෙහිව ඉදිරිපත් වී තිබෙන චෝදනා අධිකරණයට ඉදිරිපත් කරන ලෙස අපරාධ පරීක්ෂණ දෙපාර්තමේන්තුවට නියෝගයක් නිකුත් කරන ලෙසත් ඔහුට එරෙහිව ප්රමාණවත් චෝදනා නොමැති නම් අධිකරණයට සුදුසු නියෝගයක් නිකුත් කරන ලෙසත් පෙත්සම්කරු වැඩිදුරටත් අධිකරණයෙන් ඉල්ලා සිටියේය.
දත්ත ආරක්ෂණ අධිකාරියට නව අධ්යක්ෂ ජනරාල්වරයෙක්….
දත්ත ආරක්ෂණ අධිකාරියේ නව අධ්යක්ෂ ජනරාල් ලෙස දිමුත් භාෂිත අතපත්තු මහතා පත් කර තිබේ.
අදාළ පත්වීම මාර්තු මස 05 වෙනිදා සිට බලපැවැත්වෙනු ඇත.
මෙම පත්වීමට පෙර භාෂිත අතපත්තු මහතා ඩිජිටල් ආර්ථික අමාත්යංශයේ වාණිජකරණය සහ හවුල්කාරීත්වය කටයුතු භාර අධ්යක්ෂවරයා ලෙස සේවය කළේය.
ඔහු ශ්රී ලංකා පරිගණක හදිසි ප්රතිචාර සංසදයේ සහ LK Domain Registry අධ්යක්ෂ මණ්ඩලයේ සාමාජිකයකු ලෙස ද කටයුතු කළ බව සඳහන්ය.
මෙරට පුද්ගලික දත්ත ආරක්ෂාව සම්බන්ධ නියාමනය ශක්තිමත් කිරීමේ සහ මෑතකදී සංශෝධනය කරන ලද 2022 අංක 9 දරන පෞද්ගලික දත්ත ආරක්ෂණ පනතේ දක්වා ඇති පෞද්ගලිකත්ව ආරක්ෂණ රාමුව බලාත්මක කිරීමේ වැදගත් පියවරක් ලෙස මෙය හඳුන්වාදිය හැකිය.
මොහු විසින් අධිකාරියේ උපායමාර්ගික සහ පරිපාලනමය කාර්යයන් සඳහා නායකත්වය සැපයීම සිදු කළ යුතුය.
ඒ අනුව පෞද්ගලික දත්ත ආරක්ෂණ පනතේ විධිවිධාන බලාත්මක කිරීමේ දිනයන් ප්රකාශයට පත් කිරීම, දත්ත ආරක්ෂණ නීති ක්රියාත්මක කිරීම සඳහා මාර්ගෝපදේශ සංවර්ධනය කිරීම සහ රජයේ සහ රාජ්ය නොවන අංශයන්හි දත්ත පාලකයින් සහ සැකසුම්කරුවන්ගේ ධාරිතා වර්ධනය ඔහුට පැවරෙන කාර්යයන් වේ.
පාන් ඇතුළු බේකරි නිෂ්පාදන මිල ඉහළට…..
අද (23) මධ්යම රාත්රියේ සිට ග්රෑම් 450 පාන් ගෙඩියක මිල රු.10 කින් ඉහළ නැංවීමට බේකරි හිමියන්ගේ සංගමය තීරණය කර තිබේ.
ඉන්ධන මිල ඉහළ යාමත් සමග මෙම පියවර ගෙන ඇති අතර ඒ අනුව ග්රෑම් 450ක පාන් ගෙඩියක මිල රුපියල් 130ක් දක්වා ඉහළ නංවන බව එම සංගමය සඳහන් කළේය.
එමෙන්ම අනෙකුත් සියලු බේකරි නිෂ්පාදන මිල ගණන්ද අද මධ්යම රාත්රියේ සිට රුපියල් 10කින් මිල ඉහළ නැංවීමටද බේකරි හිමියන්ගේ සංගමය තීරණය කර තිබේ.
ආනයනික කිරිපිටි සහ තිරිඟු පිටි මිලෙහි වෙනසක් නැහැ….
මෙරට ආනයනික කිරිපිටි මිල සහ තිරිඟු පිටි මිල කිසිසේත් ඉහළ නොදමන බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යංශ පවසයි.
කිරිපිටි ආනයනකරුවන් හා තිරිඟු පිටි සමාගම් අද (23) වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතා හමුවූ අවස්ථාවේදී මේ බව සහතිකවී ඇත.
පවතින යුදමය තත්ත්වය හේතුවෙන් සැපයුම් හා බෙදාහැරීමේ ජාලයන්ට එල්ලවී ඇති බලපෑම් හා අඛණ්ඩ සැපයුමක් පවත්වා ගෙන යාම පිළිබඳ සාකච්ඡාවක් මෙම දෙපිරිස අතර පවත්වා තිබේ.
එහිදී ඔවුන් එම පොරොන්දුව ලබා දුන් බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යංශය නිවේදනය කළේය.
ඉන්ධන මිල ඉහළ යාම සහ ඩොලරයේ අගය තම නිෂ්පාදන පිරිවැයට යම් බලපෑමක් එල්ල කළ ද මෙම අසීරු අවස්ථාවේ ජනතාව වෙනුවෙන් රජය සමඟ එක්ව ජනතාවට යම් සහනයක් ලබාදීම අපේක්ෂාව බව එම සමාගම් ප්රකාශ කර ඇත.
තවත් මාස තුනක කාලයකට ප්රමාණවත් ආනයනික කිරි පිටි හා තිරිඟු පිටි තොග සැපයීම පිළිබඳ සහතික විය හැකි බවත්, එළඹෙන අලුත් අවුරුදු සමය අවසන් වන තෙක් කිසිදු ආකාරයක මිල වැඩි කිරීමක් සිදු නොකරන බවත් ආනයනික කිරිපිටි සමාගම් සහ තිරිඟු පිටි සමාගම් අමාත්යවරයා වෙත තහවුරුවක් ලබා දුනි.
එමෙන්ම ඉන්ධන කෝටාව හේතුවෙන් බෙදා හැරීම්වලට බලපෑම් එල්ල වී ඇති බව ආනයනික කිරි පිටි හා තිරිඟු පිටි සමාගම් අමාත්යවරයාට පෙන්වාදෙන ලදී.
ආහාර බෙදා හැරීමේ ක්ෂේත්රයේ නියුතු ප්රවාහන සේවා සපයන්නන්ගේ ඉන්ධන අවශ්යතා හඳුනා ගැනීමට සහ එම අංශයේ සැලසුම්කරණය විධිමත් කිරීම අරමුණු කර ගනිමින් හඳුන්වා දුන් විශේෂ දත්ත රැස්කිරීමේ වැඩසටහනට ලියාපදිංචි වන ලෙස එහිදී අමාත්යවරයා සමාගම් වෙත උපදෙස් ලබා දුන් බව වැඩිදුරටත් සඳහන්ය.
ඔස්ට්රේලියානු මහකොමසාරිස් සහ ජනාධිපති කාර්ය මණ්ඩල ප්රධානී අතර හමුවක්…
ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති මහතා සහ ඔස්ට්රේලියානු මහකොමසාරිස් මැතිව් ඩක්වත් අතර හමුවක් ජනාධිපති කාර්යාලයේදී අද (23) පෙරවරුවේ පැවැත්විණි.
මෙහිදී දෙරට අතර පවතින ශක්තිමත් සහ දිගුකාලීන සබඳතාව පිළිබඳ අදහස් හුවමාරු වූ අතර, ශ්රී ලාංකිකයන් වෙනුවෙන් ඔස්ට්රේලියාව ලබා දෙන අධ්යාපනික මෙන්ම රැකියා අවස්ථා සම්බන්ධව දීර්ඝ ලෙස සාකච්ඡා කෙරිණි.
අධ්යාපන ක්ෂේත්රයේදී මෙන්ම ක්රිකට් ක්රීඩාවේදීත් ඔස්ට්රේලියාව සහ ශ්රී ලංකාව අතර සමීප සබඳතාවක් පවතින බව ඕස්ට්රේලියානු මහ කොමසාරිස්වරයා මෙහිදී පෙන්වා දුන් බව ජනාධිපති මාධ්ය අංශය නිවේදනය කරයි.
ඉන්දියන් සාගරයේ මිනිස් ජාවාරම සහ මත්ද්රව්ය ජාවාරම්වලට එරෙහිව දෙරටම අවධානයෙන් පසුවන බව ද මෙහිදී සඳහන් කෙරිණි.
ශ්රී ලංකාවේ අධ්යාපන, කෘෂිකර්මාන්ත සහ තිරසර සංවර්ධනය වෙනුවෙන් අවශ්ය ඕනෑම සහායක් ලබා දෙන බව මෙහිදී පැවසූ ඔස්ට්රේලියානු මහ කොමසාරිස්වරයා මැදපෙරදිග පවතින යුදමය තත්ත්වය හමුවේ ශ්රී ලංකාවට මෙන්ම ඕස්ට්රේලියාවටද යම් බලපෑමක් සිදුව තිබෙන බව සඳහන් කළේය.
මෙම අවස්ථාවට ඔස්ට්රේලියාවේ නියෝජ්ය මහ කොමසාරිස් රුත් බයිර්ඩ් (Ruth Baird) සහ දෙවන ලේකම් මැතිව් ලෝඩ් (Matthew Lord) යන ද එක්ව සිටියහ.
බදුල්ල මහ රෝහලෙන් නැවතත් විශ්මිත සැත්කමක්….
යකඩ කම්බියක් උදරය පසාරු කරගෙන කොන්ද පිටුපසින් එළියට පැමිණ තිබූ ඉතා බිහිසුණු අනතුරක් සිදුවු පුද්ගලයෙකුගේ දිවි බේරාගැනීමට බදුල්ල රෝහලේ වෛද්ය කාර්ය මණ්ඩලය සමත්ව තිබේ.
එලෙස අනතුරට ලක්ව ඇත්තේ, 37 හැවිරිදි අයෙකුය.
අනතුරට ලක්වූ පුද්ගලයාව බදුල්ල රෝහලට රැගෙන ඒමෙන් අනතුරුව හදිසි ප්රතිකාර ඒකකයේ ජ්යෙෂ්ඨ වෛද්ය නිලධාරී පාලිත රාජපක්ෂ මහතා ඇතුළු වෛද්ය කාර්ය මණ්ඩලය එම යකඩ කුරේ කොටසක් කපා ඉවත් කර තුවාලකරුව ශල්යකර්මය සඳහා යොමුකර තිබුණි.
පසුව වෛද්යවරු සැත්කම සිදුකරන අතරතුර, සිරුර තුළ වූ යකඩ කොටස් ඉවත් කර ඇත.
මුරුංගා ගසක මුරුංගා කැඩීමට යාමේදී මුරුංගා අත්තක් කැඩි යෑමෙන් මෙම පුද්ගලයා කොන්ක්රීට් තාප්පයක් උඩට වැටී ඇති අතර, එහිදී යකඩකූරක් ඇනී තිබේ.