ඉල්ලීම් කිහිපයක් මුල් කරගනිමින් අද (29) මධ්යම රාත්රියේ සිට ක්රියාත්මක කිරීමට නියමිතව තිබූ දුම්රිය වර්ජනය අත්හිටුවීමට තීරණය කර තිබේ.
දුම්රිය බලධාරීන් සමග පැවැති සාකච්ඡාවකින් අනතුරුව තීරණය ගෙන තිබේ.
Author: Shashi Maduranga
බීඩි සඳහා දුම්කොළ බද්ද වැඩි කිරීමට මුදල් පිළිබඳ කාරක සභාවේ අනුමැතිය….
බීඩි සඳහා දුම්කොළ බද්ද වැඩි කිරීමේ ගැසට් පත්රයට රජයේ මුදල් පිළිබඳ කාරක සභාවේ අනුමැතිය හිමව තිබේ.
ශ්රී ලංකාවේ නිෂ්පාදනය කරන සෑම බීඩි වර්ගයක් සඳහාම අය කරනු ලබන දුම්කොළ බද්ද 2025 අප්රේල් 02 වන දින සිට බලපැවැත්වෙන පරිදි රු. 2 සිට රු. 3 දක්වා වැඩි කිරීම සඳහා වන 2025 අප්රේල් 01 දිනැති අංක 2430/16 දරන අතිවිශේෂ ගැසට් නිවේදනය රජය විසින් නිකුත් කර තිබුණි.
මේ පිළිබඳ සලකා බලනු ලැබුයේ රජයේ මුදල් පිළිබඳ කාරක සභාව සභාපති පාර්ලිමේන්තු මන්ත්රී හර්ෂ ද සිල්වා මහතාගේ සභාපතිත්වයෙන් පසුගියදා පාර්ලිමේන්තුවේදී රැස්වූ අවස්ථාවේදීය.
අදාළ බදු ඉහළ නැංවීම 2025 අයවැය මගින් ප්රකාශයට පත් කරන ලද අතර, එය 1999 අංක 8 දරන දුම්කොළ බදු පනත යටතේ, 2 වන වගන්තියට අනුකූලව මුදල් අමාත්යවරයා විසින් කරන ලද නියෝගයක් මගින් ක්රියාත්මක කිරීමට නියමිතය.
මෙහිදී අදහස් දැක්වූ සුරාබදු කොමසාරිස් ජනරාල්වරයා සඳහන් කළේ පසුගිය වසරේ බීඩි නිෂ්පාදකයින් සඳහා බලපත්ර 1,140ක් නිකුත් කර ඇති නමුත්, බදු ඉහළ නැංවීමේන් අනතුරුව මෙම වසරේ බලපත්ර අලුත් කර ඇත්තේ 840ක් පමණක් බවය.
බීඩි නිෂ්පාදන බදු ආදායමද අපේක්ෂා කළ මට්ටමට වඩා පහත වැටී ඇති අතර, පසුගිය වසරේ අපේක්ෂිත ඉලක්කය රුපියල් බිලියන 2ක් වුවද ලැබී ඇත්තේ රුපියල් මිලියන 1,055ක් පමණක් බවත්, මෙම වසරේ මේ දක්වා රැස් කර ඇත්තේ රුපියල් මිලියන 469ක් පමණක් බවත් මෙහිදී අනාවරණය විය.
මෙහිදී සුරාබදු කොමසාරිස් ජනරාල්වරයා පෙන්වා දුන්නේ මහා පරිමාණ අනීතික බීඩි ජාවාරම සහ එවැනි ක්රියා සඳහා ප්රමාණවත් නෛතික ක්රියාමාර්ග නොගැනීම මෙම අඩුපාඩු සඳහා හේතු වී ඇති බවය.
මෙහිදී කාරක සභා සාමාජිකයින් විමසා සිටියේ බලපත්ර අලුත් කිරීම් අඩුවීම සහ බීඩි නිෂ්පාදකයන් නීතිවිරෝධී වෙළෙඳපොළවල් වෙත ආකර්ෂණයවීම බදු බර වැඩිවීමේ ප්රතිඵලයක්ද යන්නයි.
ඉහළ බදු පැනවීමෙන් නීත්යානුකූල ව්යාපාර නීතිවිරෝධී තත්ත්වයට යොමුවිය හැකි බවට වන ආර්ථික මූලධර්මය හුවා දක්වමින් කමිටු සාමාජිකයන් පෙන්වා දුන්නේ බීඩි බදු අඩු කිරීමෙන් කර්මාන්තය සඳහා නීත්යානුකූල නිෂ්පාදකයන්ගේ සහභාගීත්වය වැඩි කළ හැකි අතර එමගින් සමස්ත ආදායම් රැස් කිරීම ඉහළ නැංවිය හැකි බවය.
ආදායම් ඉලක්ක සපුරා ගැනීමේදී අනාගත බදු ගැලපීම් සඳහා ඒවායේ කාර්යක්ෂමතාව පෙන්නුම් කිරීමට අදාළ විද්යාත්මක සාක්ෂි මත තීරණ ගන්නා ලෙස කමිටුව මෙහිදී දැනුම් දුන්නේය.
නාමල්ගේ වරෙන්තුව ආපසු කැඳවයි……
පාර්ලිමේන්තු මන්ත්රී නාමල් රාජපක්ෂ මහතාට හම්බන්තොට මහෙස්ත්රාත් අධිකරණය මගින් නිකුත් කර තිබූ වරෙන්තුව ආපසු කැඳවා පෙර ඇප මත නිදහස් කිරීමට අද (29) එම අධිකරණය නියෝග කළේය.
ඒ, මාලදිවයිනේ සංචාරය නිමා කරමින් අද උදෑසන දිවයිනට පැමිණි පාර්ලිමේන්තු මන්ත්රී නාමල් රාජපක්ෂ මහතා මෝසමක් මාර්ගයෙන් හම්බන්තොට මහෙස්ත්රාත් අධිකරණය වෙත ඉදිරිපත්වීමෙන් අනතුරුවය.
2017 වසරේ දී හම්බන්තොට වරාය විදෙස් රටවලට පැවරීමට එරෙහිව පැවති විරෝධතාවකදී අධිකරණ නියෝග නොතකමින් කටයුතු කිරීම සම්බන්ධයෙන් නාමල් රාජපක්ෂ මන්ත්රීවරයා ඇතුළු පිරිසකට එරෙහිව මෙම නඩුව ගොනු කර තිබේ.
මෙම නඩුව ඊයේ (28) කැඳවූ අවස්ථාවේදී මන්ත්රීවරයා අධිකරණය හමුවේ පෙනී නොසිටීම හේතුවෙන් මෙලෙස ඔහු අත්අඩංගුවට ගෙන අධිකරණයට ඉදිරිපත් කරන ලෙස හම්බන්තොට මහෙස්ත්රාත් අධිකරණය පොලීසියට නියෝගයක් නිකුත් කර තිබුණි.
එවන් පසුබිමක් තුළ නාමල් රාජපක්ෂ මහතා අද මෝසමක් මාර්ගයෙන් හම්බන්තොට මහෙස්ත්රාත් අධිකරණය හමුවේ පෙනීසිට තිබුණි.
හම්බන්තොට කුරුලු උයනේ හිමිකරුගෙන් අධිකරණයට පෙත්සමක්
හම්බන්තොට කුරුලු උද්යානයේ තිබී සොයා ගන්න ලද නීති විරෝධී ලෙස ආනයනය කරන ලද සුඛෝපභෝගී මෝටර් බයිසිකල් 21 ක් සන්තකයේ තබාගත්තේ යැයි සැකපිට තමන්ව අත්අඩංගුවට ගෙන රක්ෂිත බන්ධනාගාර ගත කිරීමට ගෙන තිබෙන තීරණයට එරෙහිව එම උද්යානයේ හිමිකරු වූ අජිත් ගාල්ලගේ මහතා වෙනුවෙන් ඔහුගේ නීතිඥවරු ඉදිරිපත් කළ රිට් පෙත්සම කරුණු තහවුරු කිරීම සඳහා අගෝස්තු මස 05 වනදා කැඳවන ලෙස අභියාචනාධිකරණය නියම කළේය.
මෙම පෙත්සම අද (29) අභියාචනාධිකරණයේ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී පෙත්සම්කරු වෙනුවෙන් පෙනී සිටි ජනාධිපති නීතිඥ එරාජ් ද සිල්වා මහතා අධිකරණය හමුවේ කරුණු දක්වමින් මෙම මෝටර් බයිසිකල් මහා මාර්ගයේ භාවිතා කිරීමේ චේතනාවෙන් ගෙන්වන ලද බයිසිකල් නොවන බව ප්රකාශ කළේය.
මෝටර් රථ පනතට අනුව මෙම චෝදනාව ඇප ලබා දිය හැකි වරදක් බවත් ඔහු මෙහිදී කියා සිටියේය.
මෙම සිද්ධියට අදාළ නඩුව හෙට දින හම්බන්තොට මහෙස්ත්රත් අධිකරණය හමුවේ කැඳවීමට නියමිතව තිබෙන බවත් එහිදී සිය සේවාදායකයා වෙනුවෙන් ඇප ඉල්ලීමක් ඉදිරිපත් කිරීමට අපේක්ෂා කරන බවත් ජනාධිපති නීතිඥවරයා සඳහන් කළේය.
ඒ අනුව අදාළ ඇප ඉල්ලීම හෙට දින මහෙස්ත්රාත් අධිකරණය හමුවේ සිදු කරන ලෙස දැනුම් දුන් විනිසුරු මඩුල්ල මෙම පෙත්සම කරුණු තහවුරු කිරීම සඳහා අගෝස්තු මස 05 වනදා කැඳවන ලෙසත් නියම කළේය.
මෙම පෙත්සමේ වග උත්තරකරුවන් ලෙස වැඩබලන පොලිස්පති ප්රියන්ත වීරසූරිය මහතා ඇතුළු පිරිසක් ද නම් කර ඇත.
මාලදිවයිනට ගිය මන්ත්රී නාමල් දිවයිනට පැමිනෙයි….
පාර්ලිමේන්තු මන්ත්රී නාමල් රාජපක්ෂ මහතා මාලදිවයිනේ සංචාරය නිමා කරමින් අද (29) උදෑසන කටුනායක ගුවන්තොටුපොළ වෙත පැමිණියේය.
එහිදී ඔහුගේ පැමිණීම බලාපොරොත්තුවෙන් නීතීඥවරුන් කිහිප දෙනෙකු සහ දේශපාලන ආධාරකරුවන් පිරිසක් ද කටුනායක ගුවන්තොටුපොළ පරිශ්රය වෙත පැමිණ සිටි බව අද දෙරණ වාර්තාකරු පැවසීය.
හම්බන්තොට අධිකරණය මගින් නිකුත් කර තිබෙන වරෙන්තුවකට අනුව නාමල් රාජපක්ෂ මහතාව කටුනායකදී අත්අඩංගුවට ගැනීමේ සූදානමක් පවතින බවට පළවූ වාර්තා පදනම් කරගෙන මෙලෙස ඔහුගේ ආධාරකරුවන් පිරිසක් ගුවන්තොටුපොළ පරිශ්රයට පැමිණ තිබුණි.
එවන් පසුබිමක් තුළ අද (29) උදෑසන 11:30ට පමණ මාලදිවයිනේ මාලේ නුවර සිට ශ්රීලන්කන් ගුවන් සේවයේ යූ.එල්. 102 දරන ගුවන් යානයෙන් නාමල් රාජපක්ෂ මහතා කටුනායක ගුවන්තොටුපොළ වෙත පැමිණ තිබුණි.
පසුව නාමල් රාජපක්ෂ මහතා දහවල් 12:30ට පමණ කටුනායක ගුවන්තොටුපොළ විශේෂ අමුත්තන්ගේ මැදිරිය ඔස්සේ පිටව ගියේය.
2017 වසරේ දී හම්බන්තොට වරාය විදෙස් රටවලට පැවරීමට එරෙහිව පැවති විරෝධතාවකදී අධිකරණ නියෝග නොතකමින් කටයුතු කිරීම සම්බන්ධයෙන් නාමල් රාජපක්ෂ මන්ත්රීවරයා ඇතුළු පිරිසකට එරෙහිව නඩුවක් ගොනු කර තිබේ.
එම නඩුව ඊයේ (28) කැදවු අවස්ථාවේදී මන්ත්රීවරයා අධිකරණය හමුවේ පෙනී නොසිටීම හේතුවෙන් මෙලෙස ඔහු අත්අඩංගුවට ගෙන අධිකරණයට ඉදිරිපත් කරන ලෙස හම්බන්තොට මහෙස්ත්රාත් අධිකරණය පොලීසියට නියෝග කර ඇති බව පොලීසිය සඳහන් කළේය.
එවන් පසුබිමක් තුළ විදේශගතවී සිටි නාමල් රාජපක්ෂ මන්ත්රීවරයා මෙලෙස දිවයිනට පැමිණ තිබුණි.
ADA DERANA News…
අත්අඩංගුවට පත්වූ ලහිරු වීරසේකරට පොලිස් ඇප හිමිවෙයි……
තෙබුවන, නාර්තුපාන පිහිටි පෞද්ගලික කර්මාන්ත ශාලාවකට අයුතු ලෙස ඇතුල් වීමක් සම්බන්ධයෙන් එම කර්මාන්ත ශාලාවේ නිලධාරීන් විසින් තිබුවන පොලිසියට කරන ලද පැමිණිල්ලක් මත youth for change සංවිධානයේ ජාතික සංවිධායක ලහිරු වීරසේකර අඩංගුවටගෙන පො ලිස් ඇප මත මුදාහරියි.
තෙබුවන පොලිස් වසමේ නාර්තුපාන පිහිටි පෞද්ගලික කර්මාන්ත ශාලාවක් වෙත අයුතු ලෙස ඇතුල්වී රුපියල් 43000.00 පමණ අලාභයක් කළ බවට එම කර්මාන්තතා ශාලාවේ නිලධාරීන් විසින් තෙබුවන පොලිසියට කරන ලද පැමිණිල්ලකට අනුව අද උදෑසන 10.00 පැමිණිල්ල විභාග කිරීම සඳහා පොලිසියට පැමිණෙන ලෙස ලහිරු වීරසේකර මහතාට පොලිසිය විසින් දන්වා තිබූ අතර අද(29) උදෑසන 11.00ට පමණ ඒ මහතා තෙබුවන පොලිසිය වෙත පැමිණ තිබූ අතර එහිදි ඒ මහතා අත්අඩංගුවට ගෙන ප්රකාශයක් ලබා ගැනීමෙන් අනතුරුවය පොලිස් ඇප මත මුදාහැර ඇත.
ගල්පාත චන්දන පෙරේරා
දොඹකරයේ රියදුරු රිමාන්ඩ් – අයිතිකරුට ඇප
ඊයේ (28) දින බොරැල්ල ප්රදේශයේ සිදුවූ මාරක රිය අනතුරු සිද්ධිය සම්බන්ධයෙන් අත්අඩංගුවට ගත් දොඹකරයේ රියදුරු අගෝස්තු මස 07 වනදා දක්වා රක්ෂිත බන්ධනාගාර ගත කරන ලෙස කොළඹ රථවාහන මහෙස්ත්රාත් අධිකරණය නියම කළේය.
එමෙන්ම අධිකරණයට ඉදිරිපත් කළ අදාළ රථයේ හිමිකරු රුපියල් ලක්ෂ පහක ශරීර ඇප මත මුදා හැරීමටත් මහෙස්ත්රාත්වරයා නියෝග කර ඇත.
බොරැල්ල පොලීසිය විසින් ඉදිරිපත් කළ කරුණු සලකා බැලීමෙන් අනතුරුව කොළඹ රථවාහන මහෙස්ත්රාත් අධිකරණය විසින් මෙම නියෝගය නිකුත් කර තිබේ.
ලහිරු වීරසේකර පොලිස් අත්අඩංගුවට පත්වෙයි…..
නාර්තුපාන ප්රදේශයේ පිහිටි කර්මාන්ත ශාලාවකට අයුතු ඇතුල්වීමක් සම්බන්ධයෙන් ජන අරගල සන්ධානයේ ලහිරු වීරසේකර තෙබුවන පොලිසිය මගින් අත්අඩංගුවට..පොලිසියෙන් ඇප ලබාදීම හෝ උසාවියෙන් ඇප ලබාදීම පිළිබඳව තවමත් නිශ්චිත නැති බවත් වාර්ථාවෙයි…
හැටන් වික්ටර්න් මාර්ගයේ පාලමක් ගිලාබැසීමේ ප්රවෘත්තිය විකාශනය වීමත් අඹගමු ප්රාදේශීය සභාවේ සභාපති වහාම ක්රියාත්මක වෙයි
හැටන් සිට වික්ටර්න් වත්තට යන පාර පාලමක් ගිලා බැහැලා අවුරුද්දයි අඹගමුව ප්රාදේශීය සභාවෙන් තවමත් විසඳුම් නෑ මහජනතාවගෙන් මැසිවිලි .
ඊයේ දිනය මෙම ප්රවෘත්තිය විකාශනය වීමත් සමගම අඹගමුව ප්රාදේශීය සභා සමගි ජන බලවේග සභාපති කපිල නාකන්දල මහතා අද දින එම ස්ථානය නිරීක්ෂණය කිරීමට පැමිණියාය .
එතුමා වැඩිදුරටත් පවසා සිටියේ මෙම පාලම සුද්දාගේ කාලයේ නිර්මාණය කරන පාලමක් බවත් මෙය නවීකරණය කිරීමට විශාල මුදලක් සභාවෙන් වැය කිරීමට සිදුවන බවත් අගෝස්තු මස පලවන දින දිස්ත්රික් කමිටු රැස්වීම පැවැත්වීමට නියමිත බැවින් මෙම ගැටලුව එම කමිටුවට ඉදිරිපත් කර ඉතා ඉක්මන් විසඳුමක් වික්ටර්න් වතුයායේ ජනතාවට සලසා දෙන බවයි.
ධුරයෙන් ඉවත්ව යන මෙරට නෙදර්ලන්ත තානාපතිනිය සහ අගමැතිනිය අතර හමුවක්
නෙදර්ලන්ත රජයේ මෙරට තානාපති ලෙස කටයුතු කළ Bonnie Harbach මහත්මිය සිය සේවා කාලය අවසන් කර මෙරටින් පිටව යාමට ප්රථම ජුලි 28දින අග්රාමාත්ය කාර්යාලයට පැමිණ අග්රාමාත්ය ආචාර්ය හරිනි අමරසූරිය හමු විය.
ද්විපාර්ශ්වීය සබඳතා තවදුරටත් ශක්තිමත් කිරීම සම්බන්ධයෙන් අවධානය මෙහිදී යොමු වු අතර ලංකාවේ මෙතෙක් පැවති සාමකාමී මැතිවරණ ත්රිත්වය සම්බන්ධයෙන් සතුටට පත් වන බවත්, වත්මන් රජය ගෙන යන වැඩපිළිවෙල අගය කරන බවත් තානාපතිනිය මෙහිදි පැවසුවාය.
ශ්රී ලංකාව මුහුණ දෙන අභියෝග පිළිබඳවත්, අභියෝග ජය ගැනීම සඳහා නෙදර්ලන්ත රජය සහයෝගය ලබා දෙන බවත් තානාපතිනිය මෙහිදී අවධාරණය කළාය.
නෙදර්ලන්ත තානාපතිනිය ලෙස ශ්රි ලංකාවට ලබා දුන් සහය පිලිබඳව සතුටු වන බවත්, ඉදිරියටත් නෙදර්ලන්තයේ සහය ශ්රි ලංකාවට ලබා දීම වෙනුවෙන් කටයුතු කරන ලෙසත්, ඉදිරි කටයුතු වෙනුවෙන් සුභපැතුම් එක් කරන බවත් අග්රාමාත්යවරිය මෙහිදී පවසා සිටියා ය.
අග්රාමාත්ය ලේකම් ප්රදීප් සපුතන්ත්රී නෙදර්ලන්ත තානාපති කාර්යාලයේ දේශපාලන කටයුතු පිළිබඳ උපදේශක නාමල් පෙරේරා, විදේශ කටයුතු අමාත්යංශයේ යුරෝපා සහ උතුරු ඇමරිකානු අංශයේ සහකාර අධ්යක්ෂිකා තිවංකා අතුරලිය ඇතුළු පිරිසක් මෙම අවස්ථාවට සහභාගී වූහ.