වතු කම්කරු වැටුප් වැඩිකිරීම රජයට අභියෝගයක් වී ඇති බව ප්රවාහන,මහාමාර්ග, වරාය හා සිවිල් ගුවන් සේවා අමාත්ය බිමල් රත්නායක මහතා පවසයි.
වැවිලි කර්මාන්ත අමාත්යංශය සහ මුදල් අමාත්යංශය අඛණ්ඩය මේ සම්බන්ධයෙන් මැදිහත් කිරීම් සිදුකරමින් සිටින බවද බිමල් රත්නායක අමාත්යවරයා පෙන්වා දෙයි.
නානුඔය දුම්රිය ස්ථානයේ නිරීක්ෂණ චාරිකාවකට එක්වීමෙන් අනතුරුව මාධ්ය වෙත අදහස් දක්වමින් ඔහු මේ බව පැවසීය.
එහිදී වැඩිදුරටත් අදහස් දැක්වූ අමාත්යවරයා කියා සිටියේ ලාබ ලබන ඩිපෝ සඳහා ඉදිරියේදී බෝනස් ලබාදීමට කටයුතු කරන බවය.
විද්යා හා තාක්ෂණ අමාත්යාංශය යටතේ ඇති ජාතික නව්යකරණ නියෝජිතායතනයේ (NIA – National Innovation Agency) මෙහෙයවීම යටතේ, ගෝලීය නව්යකරණ දර්ශකයට (Global Innovation Index) අදාළ දත්ත අවශ්යතා පිළිබඳ උපදේශාත්මක රැස්වීමක්, විද්යා, තාක්ෂණ, අධ්යාපනික, සහ කාර්මික ආදී ක්ෂේත්ර නියෝජනය කරමින් රාජ්ය සහ පෞද්ගලික අංශවල ජ්යේෂඨ නිලධාරීන්ගේ සහභාගිත්වයෙන් අද (14) කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී පැවත්විණි.
ප්රධාන පද්ධති 7ක් යටතේ දර්ශක 80ක් යොදා ගෙන රටවල නව්යකරණ කාර්ය සාධනය මනින ජාත්යන්තරව පිළිගත් ගෝලීය නව්යකරණ දර්ශකයෙහි ශ්රේණිගත කිරීම තුළ ශ්රී ලංකාවේ ස්ථානය ඉහළට ඔසවා තැබීම සඳහා සියලු පාර්ශ්වයන් දායක කර ගැනීම මෙහි අරමුණ වී ඇත.
ඒ සඳහා ගෝලීය වශයෙන් මෙරට තරගකාරිත්වය ඉහළ නැංවීම, ආයෝජන ආකර්ෂණය කර ගැනීම මෙන්ම, දැනුම, තාක්ෂණය සහ ව්යවසායකත්වය සඳහා කේන්ද්රස්ථානයක් බවට පත් වීම ආදී කරුණු පිළිබඳව අවධානය යොමු තිබේ.
පර්යේෂණ සහ සංවර්ධන සංස්කෘතියක් පෝෂණය කිරීම, රාජ්ය-පෞද්ගලික සහයෝගීතාව ශක්තිමත් කිරීම සහ ජාතික ප්රමුඛතාවන්ට අනුකූලව ශක්තිමත් නව්යකරණ පරිසර පද්ධතියක් ගොඩනැගීමත් පර්යේෂණ, තාක්ෂණය, නිර්මාණශීලිත්වය සහ නව්යකරණ මුල් කර ගත් ආර්ථිකයක් කරා මෙරට මෙහෙයවීම පිණිස වූ රජයේ කැපවීම මෙමගින් පිළිබිඹු වේ.
මෙම රැස්වීම සදහා අවශ්ය දත්තවල ප්රධාන භාරකරුවන් වන ප්රධාන අමාත්යාංශ, ජාතික ආයතන, විශ්ව විද්යාල සහ ප්රමුඛ පෞද්ගලික අංශයේ නියෝජිත ප්රධානීහු රැසක් එක් වූහ.
දත්ත පරතරයන් පියවීම, සම්බන්ධීකරණය වැඩිදියුණු කිරීම සහ රටේ නව්යකරණ කාර්ය සාධනයට සහාය වීම සඳහා සියලුම පාර්ශ්වකරුවන් සඳහා පැහැදිලි භූමිකාවන් නිර්වචනය කිරීම මෙම වැඩසටහනේ අවධානයට ලක් විය.
සමාරම්භක සැසියෙන් පසුව, ශ්රී ලංකාවේ නව්යකරණ විභවය ගෝලීය වේදිකාවේ නිවැරදිව නිරූපණය වන බව සහතික කරමින්, දත්ත රැස් කිරීම සහ වාර්තා කිරීම සඳහා තිරසාර ජාතික යාන්ත්රණයක් සිතියම්ගත කිරීම සඳහා නිර්මාණය කරන ලද ක්රියාකාරී සැසියක්ද පැවැත්විණි.
නව්යකරණය ප්රතිපත්තිමය ප්රමුඛතාවයක් පමණක් නොව ජාතික ප්රගතියේ ප්රායෝගික ධාවකයක් බවට පත් කිරීමට රජයේ කැපවීම මෙම මුලපිරීම මගින් පිළිබිඹු කෙරේ.
මෙම අවස්ථාවට විද්යා හා තාක්ෂණ අමාත්ය ක්රිෂාන්ත අබේසේන, NIA පාලක සභාවේ සභාපති සහ ජනාධිපති ලේකම් ආචාර්ය නන්දික සනත් කුමානායක, මහ බැංකු අධිපති ආචාර්ය නන්දලාල් වීරසිංහ, විද්යා හා තාක්ෂණ අමාත්යාංශයේ ලේකම් වයි. එල්. එම්. නවාවි යන මහත්වරු සහ රටේ විවිධ ප්රධාන ආයතන නියෝජනය කරමින් ආරාධිත පිරිසක් එක්ව සිටියහ.
ෆොන්ටෙරා බ්රෑන්ඩ්ස් ලංකා (Fonterra Brands Lanka) සමාගම තෘතීක සහ වෘත්තීය අධ්යාපන කොමිෂන් සභාව (TVEC), ජාතික ආධුනිකත්ව සහ කාර්මික පුහුණු අධිකාරිය (NAITA), කම්කරු දෙපාර්තමේන්තුව සහ කිරි කර්මාන්තයට සම්බන්ධ තවත් සමාගම් 8 ක් සමග එක්ව සකස් කරන ලද, ශ්රී ලංකාවේ කිරි නිෂ්පාදන ක්ෂේත්රයේ යන්ත්ර ක්රියාකරුවන් සඳහා වන ප්රථම ජාතික වෘත්තීය නිපුණතා සම්මුතිය පසුගියදා නිල වශයෙන් වෘත්තීය අධ්යාපන නියෝජ්ය අමාත්ය නලින් හේවගේ මහතා වෙත භාරදෙන ලදි. ෆොන්ටෙරා බ්රෑන්ඩ්ස් ලංකා සමාගමට අමතරව මිල්කෝ (පුද්ගලික) සමාගම, මැලිබන් මිල්ක් ප්රඩක්ට්ස් (පුද්ගලික) සමාගම, රිච්ලයිෆ් ඩේරීස් සමාගම, සිලෝන් කෝල්ඩ් ස්ටෝර්ස් පීඑල්සී, චෙලෝ ඩේරි ප්රඩක්ට්ස් (පුද්ගලික) සමාගම, නෙස්ලේ ලංකා සමාගම, පැල්වත්ත ඩේරි ඉන්ඩස්ට්රීස් සමාගම සහ ලයන් බෲවරි (සිලෝන්) පීඑල්සී යන සමාගම් මෙම නිපුණතා සම්මුතිය සකස් කිරීම සඳහා දායක විය.
කිරි කර්මාන්ත ක්ෂේත්රයේ නිපුණතා විධිමත් රාමුවක් තුළට කේන්ද්රගත කිරීම සහ දීර්ඝ කාලයක් පුරා කිරි කර්මාන්තය තුළ සේවය කර අත්දැකීම් ලැබූ, එහෙත් තම නිපුණතා සඳහා විධිමත් වෘත්තීමය සහතිකයක් නොමැති යන්ත්ර ක්රියාකරුවන්ට එම සුදුසුකම් ලබාගැනීමට උපකාරී වීම මෙම වැඩසටහනෙහි ප්රධානතම අරමුණ විය. කිරි නිෂ්පාදන කර්මාන්තයට සම්බන්ධ පාර්ශ්ව රැසක දායකත්වය සහ අරමුදල් සම්පාදනය ඔස්සේ වසරක අධික කාලයක් වැය කරමින් මෙම නිපුණතා සම්මුතිය සකස් කරන ලදි. මෙය රටේ ජාතික මට්ටමේ නිපුණතා සංවර්ධනයට දායක වීම සඳහා කිරි කර්මාන්තය දක්වන උනන්දුව හා කැපවීම මැනැවින් පිළිබිඹු කළ සාමූහික ප්රයත්නයක් ලෙසද හැඳින්විය හැක.
මින් ඉදිරියට ජාතික ආධුනිකත්ව සහ කාර්මික පුහුණු කිරීමේ අධිකාරිය සමග සම්බන්ධ වී සිටින පුහුණු ආයතනවල මෙම නිපුණතා සම්මුතිය ක්රියාවට නැංවෙනු ඇති අතර, එමගින් රට පුරා වෙසෙන කිරි නිෂ්පාදන ක්ෂේත්රයේ යන්ත්ර ක්රියාකරුවන්ට තම නිපුණතා සඳහා විධිමත් පිළිගැනීමක් හිමිකරගෙන තම වෘත්තීය ජීවිත වැඩිදියුණු කරගැනීමට අවස්ථාව උදා වනු ඇත.
“ෆොන්ටෙරා බ්රෑන්ඩ්ස් ලංකා යනු මෙරට කිරි කර්මාන්තය තුළ සුවිශේෂී පිළිගැනීමක් හිමි දැවැන්ත සමාගමක්. ඔවුන් රට වෙනුවෙන් සුවිශාල මෙහෙවරක් ඉටුකර තිබෙනවා. ෆොන්ටෙරා සමාගම කිරි කර්මාන්තයට සම්බන්ධ තවත් සමාගම් කිහිපයක් සමග එක්ව මෙම වටිනා ප්රයත්නය සාර්ථක කරගැනීමට පුරෝගාමී දායකත්වයක් ලබාදුන්නා. අමාත්යාංශය වෙනුවෙන් අප එය බෙහෙවින් අගය කරනවා.” වෘත්තීය අධ්යාපන නියෝජ්ය අමාත්ය ගරු නලින් හේවගේ මහතා පැවසීය.
“මෙය අතිශය කාලෝචිත පියවරක් ලෙස හැඳින්වීමට පුළුවන්. දැනටමත් කිරි කර්මාන්තය තුළ සේවය කරන්නන්ට මෙන්ම අලුතින් කර්මාන්තයට ප්රවේශ වන්නන්ටත් මෙය බෙහෙවින් වැදගත් වේවි. මෙම වැඩසටහන ක්රියාවට නංවනු ලැබුවේ ඒ සඳහා ඉල්ලීම් රැසක් ඉදිරිපත් වී තිබුණු නිසයි. මෙය සාර්ථක කරගැනීමට නන් අයුරින් දායක වූ සියලුම දෙනාට අප ස්තූතිවන්ත වනවා.” තෘතීය හා වෘත්තීය අධ්යාපන කොමිසමේ අධ්යක්ෂ ජෙනරාල් ආචාර්ය කේ. ඒ. ලලිතධීර මහතා පැවසීය.
මෙම නිපුණතා සම්මුතිය කිරි කර්මාන්තයේ වෘත්තීය පුහුණුව සම්බන්ධයෙන් ජාතික මට්ටමේ ආදර්ශයක් බවට පත්වනු ඇති අතර, එමගින් ප්රායෝගික පළපුරුද්දට ගැළපෙන විධිමත් වෘත්තීය සුදුසුකම් පිරිනැමීමට හැකියාව ලැබෙනු ඇත. එමෙන්ම මෙය ශ්රම බලකායේ තිරසාර සංවර්ධනය උදෙසා රාජ්ය හා පෞද්ගලික අංශ අතර හවුල්කාරීත්වයන් ගොඩනංවා ගැනීමේ වැදගත්කම මැනැවින් පෙන්වා දෙන වැඩසටහනක් ලෙසද හැඳින්විය හැකි වේ.
“මෙම නිපුණතා සම්මුතිය වසරක් පුරා දැරූ සාමූහික ප්රයත්නයක ප්රතිඵලයක්. නිපුණතා සහිත පුද්ගලයන්ට ඒ සඳහා විධිමත් පිළිගැනීමක් හිමි විය යුතු බවට අප තුළ දැඩි විශ්වාසයක් තිබුණා. එය යථාර්ථයක් බවට පත් කරගැනීම සඳහා ජාතික ආධුනිකත්ව සහ කාර්මික පුහුණු කිරීමේ අධිකාරිය, තෘතීය හා වෘත්තීය අධ්යාපන කොමිසම, කම්කරු දෙපාර්තමේන්තුව සහ කිරි කර්මාන්තයට සම්බන්ධ ප්රමුඛ පෙළේ සමාගම් ඇතුළු පාර්ශ්ව රැසක් සමග එක්ව කටයුතු කිරීමට හැකි වීම සතුටට කරුණක්. මෙය අපගේ සේවක සේවිකාවන්ට පමණක් නොව සමස්ත කර්මාන්තයටම වැදගත් පියවරක් බව අප විශ්වාස කරනවා. ඉදිරියේදී සමාගමක් වශයෙන් මෙන්ම කිරි නිෂ්පාදන ක්ෂේත්රයේ සාමාජිකයෙකු සහ ශ්රී ලංකාවේ දියුණුවට කැපීපෙනෙන දායකත්වයක් ලබාදෙන ආයතනයක් වශයෙන් ශ්රම බලකායේ නිපුණතා වැඩිදියුණු කරමින් රටේ සංවර්ධනයට අත්වැලක් වීම අපගේ අරමුණයි.” ෆොන්ටෙරා සමාගමේ සාමාන්යාධිකාරී ෆස්ලාන් ෆයිසාල් මහතා පැවසීය.
මෙය හුදෙක් ව්යාපාර ක්ෂේත්රයේ යහපත වෙනුවෙන් පමණක් නොව, සමස්ත ශ්රී ලාංකීය වෘත්තීය අධ්යාපන පද්ධතියට අර්ථවත් පූර්වාදර්ශයක් ලෙස හැඳින්විය හැක. පොදු අරමුණක් මුල්කර ගනිමින් ක්රියාවට නංවනු ලැබූ මෙම සාමූහික ප්රයත්නය, මෙරට කිරි කර්මාන්තය තුළ වඩාත් දක්ෂ, තරගකාරී සහ අනාගත අභියෝගවලට මුහුණ දිය හැකි ශ්රම බලකායක් නිර්මාණය කිරීමට සුවිශාල දායකත්වයක් ලබා දෙනු නිසැකය.
ලෝක ක්රිකට් ඉතිහාසයේ ශ්රේෂ්ඨතම පිතිකරුවා ලෙස අවිවාදයෙන් පිළිගත හැකි ක්රීඩකයා වන ශ්රීමත් ඩොනල්ඩ් බ්රැඩ්මන්ට පිතිකරණ සාමාන්ය සියයට 100ක් කරගැනීමට නොහැකි වූ එම තීරණාත්මක තරගය පැවැත් වී අදට (14) වසර 77ක් සම්පූර්ණ විය.
1948 වසරේ දී අදවන් දිනක ඔහු එංගලන්තයට එරෙහිව සිය ටෙස්ට් ක්රිකට් දිවියේ අවසන් තරගය ක්රීඩා කළේය.
ලන්ඩන් ඕවල් ක්රීඩාංගණයේ පැවති මෙම තරගයේ දී ඔහුගේ පිතිකරණ සාමාන්ය සියයට 100ක් කරගැනීමට ලකුණු 4ක් පමණක් අවශ්ය වී තිබුණි.
කෙසේ නමුත් එම ඓතිහාසික තරගයේ දී පන්දු 2කට පමණක් මුහුණදුන් බ්රැඩ්මන්, විලියම් එරික් හොලීස්ගේ පන්දුවක් කෙළින්ම කඩුල්ලේ වැඳී ලකුණු නොලබාම පිටියෙන් ඉවත්ව ගියේය.
මෙම තරගයෙන් ඔස්ට්රේලියාව ඉනිමකින් හා ලකුණු 149ක දැවැන්ත ජයක් ලැබීම හේතුවෙන් ඔහුට දෙවනවරට පන්දුවට පහරදීමේ අවස්ථාවක්ද නොලැබුණි.
ඒ හේතුවෙන් ඔහුගේ ටෙස්ට් පිතිකරණ සාමාන්ය 99.94 සීමාවෙන් නැවතුණි.
බ්රැඩ්මන්ගෙන් පසු ටෙස්ට් ක්රිකට් ක්රීඩාවෙන් සචින් ටෙන්ඩුල්කාර්, බ්රයන් ලාරා, කුමාර් සංගක්කාර වැනි ලෝක පූජිත පිතිකරුවන් බිහි වුවද, ඒ කිසිවෙකුට හෝ බ්රැඩ්මන්ගේ පිතිකරණ සාමාන්යයට ළඟවීමට හෝ නොහැකි වී ඇත.
1928 වසරේ දී එංගලන්තයට එරෙහිව ටෙස්ට් වරම් දිනාගත් බ්රැඩ්මන් 1948 වසරේ දී ක්රීඩාවෙන් සමුගන්නා විට ලකුණු 6,996ක් රැස්කරගෙන සිටියේය.
ඊට ශතක 29ක් හා අර්ධ ශතක 13ක් ඇතුළත්ය.
ටෙස්ට් පිතිකරණ වාර්තා අනුව කමිඳු මෙන්ඩිස් ලෝක ක්රිකට් පිටියේ දෙවන හොඳම සාමාන්යයක් (62.66) ඇති පිතිකරුවා වන අතර, තෙවන ස්ථානයේ ඔස්ට්රේලියානු හිටපු පිතිකරු ඇඩම් වෝගස් (61.87) රැඳී සිටියි.
කුමාර් සංගක්කාර (57.40) මෙහි 13වන ස්ථානයේද, සචින් තෙන්ඩුල්කාර් (53.78) හා බ්රයන් ලාරා (52.88) පිළිවෙළින් මෙහි 25වන හා 26වන ස්ථානයන්හි රැඳී සිටියි.
මෙරටදී ඇසුරුම් කිරීම සඳහා ආනයනය කළ ලුණු මෙට්රික් ටොන් 28,000කට ආසන්න ප්රමාණයක් අඩංගු බහාලුම් 400ක් නිදහස් කරගැනීමට නොහැකිව මේ වන විටත් කොළඹ වරායේ සිරවී ඇතැයි ශ්රී ලංකා ලුණු නිෂ්පාදකයින්ගේ සංගමය පවසයි.
ඔවුන් පෙන්වා දෙන්නේ රාජ්ය නිලධාරීන්ගේ අකාර්යක්ෂමතාව මීට හේතු වී ඇති බවය.
වසරේ ලුණු අස්වැන්න බලාපොරොත්තු වූ පරිදි නොලැබීම හා කාලගුණ වෙනස්කම් වැනි හේතූන් මේ වසර මුලදී මෙරට ලුණු නිෂ්පාදනය ශීඝ්රයෙන් පහත වැටුණි.
මේ හේතුවෙන් වෙළෙඳපොළේ ලුණු හිඟයක් නිර්මාණය වූ අතර ලුණු මිලද ඉහළ ගියේය.
ඊට පිළියමක් ලෙස ගෘහස්ථ පරිභෝජනයට අවශ්ය ලුණු ආනයනය කිරීමට දෙවරක්ම පියවර ගැනුණි.
2025 අගෝස්තු මසට අදාළ අස්වැසුම ප්රතිලාභීන්ගේ දීමනාව හෙට (15) අස්වැසුම ප්රතිලාභීන්ගේ බැංකු ගිණුම් වෙත බැර කිරීමට කටයුතු කරන බව මුදල්, ක්රම සම්පාදන සහ ආර්ථික සංවර්ධන අමාත්යාංශය නිවේදනය කර තිබේ.
රු.11,275,973,750.00 (එකොලොස් බිලියන දෙසිය හැත්තෑපස් මිලියන නවලක්ෂ හැත්තෑ තුන්දහස් හත්සිය පනහයි) ක මුදලක් ප්රතිලාභී පවුල් 1,421,745ගේ ගිණුම්වලට බැරකිරීමට නියමිතය.
ඒ අනුව අදාල ප්රතිලාභීන්ට හෙට සිට තමාට හිමි ප්රතිලාභී මුදල තම අස්වැසුම ප්රතිලාභී බැංකු ගිණුමෙන් ලබාගත හැකිය.
නුවරඑළිය ඩිපෝවට අයත් ගාල්කර තිබූ බස් රථයක එංජිමට යූරියා පොහොර දැමීමක් සම්බන්ධයෙන් නුවරඑළිය හයිෆොරස්ට් පොලීසිය මගින් විමර්ශනයක් ආරම්භ කර ඇත.
නුවරඑළියේ සිට හයිෆොරස්ට් දක්වා දිනපතා ධාවනය වන බස් රථයකට මෙලෙස යූරියා පොහොර දමා තිබේ.
එම බස් රථය හයිෆොරස්ට් ප්රදේශයේ ගාල් කර තිබියදී ඉකුත් 12වනදා රාත්රියේ කිසියම් පුද්ගලයෙකු විසින් එංජිම තුළට මෙලෙස යූරියා පොහොර දමා ඇත.
බස් රථය උදෑසන ධාවනය කිරීමට ප්රථම, එංජිමේ තෙල් පරික්ෂා කිරීම සඳහා ආවරණය විවෘත කර බැලීමේදී එංජිමේ මූඩිය ගලවා තිබූ බව අනාවරණය වී තිබේ.
එමෙන්ම ඒ අසළ සුදු පාට යූරියා පොහොරවලට සමාන රසායනික ද්රව්යයක් එංජිම වටා වැටී ඇති අතර, ඒ සම්බන්ධයෙන් සැකසිතා එම බස් රථයේ රියදුරා සහ කොන්දොස්තරවරයා විසින් පොලීසියට පැමිණිලි කර ඇත.
මේ සම්බන්ධයෙන් කළ විමසීමකදී නුවරඑළිය ඩිපෝ කළමණාකාරවරයා පවසා සිටියේ, බස් රථයට කිසියම් පුද්ගලයෙක් හෝ පිරිසක් එක්ව එංජිම තුළට යූරියා පොහොර දමා ඇති බවය.
ඒ අනුව බස් රථය පණ නොගන්වා ඇඳගෙන නුවරඑළිය ඩිපෝව වෙත රැගෙන විත් එංජිම ගලවා පරීක්ෂා කිරිමට පියවර ගන්නා බව හෙතෙම සඳහන් කළේය.
” මුත්තු නගර් අක්කර 800ක ගොවි ඉඩම් කොල්ලය නවතනු ! – ඉන්දීය සමාගම් සිදු කරන ඉඩම් හා සම්පත් කොල්ලයට එරෙහි සටන අරඹමු ! ” මැයෙන් ත්රිකුණාමලය මුත්තු නගර් ගොවි ජනතාව සහ ජන අරගල ව්යාපාරය එක්ව සංවිධානය කළ විරෝධතාවක් අද ( 2025.08. 14 ) දින කොළඹ ජනාධිපති ලේකම් කාර්යාලය ඉදිරිපිටදී පැවැත්විණි.
එහිදී අදහස් දැක්වූ ජන අරගල ව්යාපාරයේ ජාතික විධායක සභික වසන්ත මුදලිගේ.
අද දවසේ ත්රීකුණාමල මුත්තු නරගර් ප්රදේශයේ ජනතාව එක්ක අපි ජනතාධිපති ලේකම් කාර්යාලයට ආවේ බරපතළ ප්රශ්නයක් ගැන සාකාච්ඡා කරන්න. අද වෙද්දි මුත්තු නගර් ප්රදේශයේ පවුල් 351ක ජනතාවගේ ඉඩම් බලහත්කාරයෙන් පැහර අරගෙන සමාගම්වලට විකුණමින් යනවා. මීට සති දෙකකට කලින් අපි ලිඛිතව මේ සම්බන්ධයෙන් ජනාධිපති ලේකම් කාර්යාලය දැනුවත් කළා. නමුත් කිසිඳු විසඳුමක් අපිට ලැබුණේ නෑ. මේ බලහත් කාරයෙන් පැහැරගන්නේ මුත්තු නගර් වැසියන් පාරම්පරිකව වගා කරපු ඉඩම්. ඡන්ද කාලේ මේ ප්රශ්නෙට විසඳුම් දෙනවා කියලා කියපු මන්ත්රීලා අද මේ ජනතාවට පස්ස හරවලා. මෙ ඉඩම් ප්රශ්නය ගැන ආණ්ඩුවේ කාගෙවත් ඇස් හැරෙන්නේ නෑ.
ඊයේ ජනාධිපති අනුර දිසානායක කිව්වා සංවර්ධන ව්යාපෘති සැලසුම් කිරීමේදී සියලු පාර්ශවයන් එක්ක සාකාච්ඡා කරනවා කියලා. ඒ අදහස එක්ක තමයි මන්නාරමේ සුළං බලාගාර ව්යාපෘතිය මාසෙකට කල් දාලා තියෙන්නෙත්. අපි කියනවා ඒක හොඳයි. සියලු දෙනාගේ එකඟතාවය ඇතුව තමයි සංවර්ධන ව්යාපෘති කෙරෙන්න ඕන. හැබැයි අපි අහන්නේ ඇයි ඒ තීරණය මුත්තු නගර් ජනතාදට අදාළ නැත්තේ. ඇයි මුත්තු නගර් වැසියන්ට විතරක් කුඩම්මගේ සැලකිලි. මන්නාරමේ ඉන්නෙත් මුත්තු නගර් ඉන්නෙත් මේ රටේ මිනිස්සු. ඒ නිසා මන්නාරමේ හරි මුත්තු නගර්වල හරි ඉන්න ජනතාව බලහත්කාරයෙන් පන්නලා ඉඩම් පැහැරගන්න ආණ්ඩුව උත්සහා කරන්වනං ඒකට අපි විරුද්ධයි.
මේ ආණ්ඩුවට ජනතාව ඡන්දෙ දුන්නේ වෙනසක් බලාපොරොත්තුවෙන්. ඒ වෙනස කියන්නේ පරණ ආණ්ඩුවල ව්යාපෘති කිසිඳු සෙවිල්ලක් නැතුව නැවත ක්රියාත්මක කරන එක නෙවෙයි. නමුත් ආණ්ඩුව දැන් සූදානම් වෙන්නේ ඡන්දය දීපු ජනතාවට පයින් ගහලා සමාගම්වලට උවමනාවන් අනුව නැටවෙන්න. අපි ඉඩම් දෙන්නේ නෑ පුලුවන් දෙයක් කරගනිල්ලා වගේ ප්රවේශයකින් තමයි ආණ්ඩුව දැන් මුත්තු නගර් ගොවියන්ට උත්තර දෙන්නේ. නමුත් අද අපි මෙතනට ආවේ ඒ උත්තරේ අරගෙන ඔළුව පහත් කරගෙන ගෙදර යන්න නෙවෙයි. මේ අහිසක ජනතාවගේ ඉඩම්වල අයිතිය නැවත ඔවුන් වෙත ලබාදෙන තුරු අපි අඛණ්ඩව අරගල කරන්න සූදානම්. ඒ නිසා අපි ආණ්ඩුවට කියන්නේ බොරු විසඳුම් පෙන්නලා ප්රශ්නය මගහරින්න සූදානම් වෙන්න එපා. මුත්තු නගර් වැසියන්ගෙන් පැහරගත් ඉඩම් ඔවුන්ට නැවත ලබා දීමට ආණ්ඩුව කටයුතු කළ යුතුයි. ඒ වෙනුවෙන් දිගින් දිගටම අරගල කරන්න ජන අරගල සන්ධානය විදිහට අපි සූදානම්. “
කොළඹ බේරේ වැව ආශ්රීතව ඉතාමත් නුදුරේදීම ජල ගුවන්තොටුපළක් (Water Aerodrome) ක්රියාත්මක කිරීමට කටයුතු කරන බව ශ්රී ලංකා සිවිල් ගුවන් සේවා අධිකාරියේ අධ්යක්ෂ (ගගන යාත්රාංගනය) රංගන සමන්ප්රිය මහතා පවසයි.
ඔහු මේ බව පවසා සිටයේ අද (14) දින විකාශ්ය වූ දෙරණ “BIG FOCUS” වැඩසටහනට එක් වූ අවස්ථාවේ දී යි.
මේ වන විටත් ශ්රී ලංකා සිවිල් ගුවන්සේවා සංවිධානය විසින් ජලාශ ආශ්රිත ගුවන් පථ 22ක් පමණ අනුමත කර ඇති බව ද ඔහු පවසා සිටියේ ය.
තව ද ඔහු වැඩි දුරටත් පවසා සිටියේ පෞද්ගලික ආයතනයක් වන Cinnamon Air ආයතනය විසින් මෙහෙයුම් සක්රීයව කරන එබදු ස්ථාන 7ක් මේ වන විටත් පවත්වාගෙන යන බවයි.
“ජලාශ ආශ්රිතව ගුවන් පථ ශ්රී ලංකා සිවිල් ගුවන්සේවා සංවිධානය විසින් 22ක් පමණ අනුමත කරලා තියනවා. ඒකෙන් දැනට පෞද්ගලික ආයතනයක් වන Cinnamon Air එක විසින් මෙහෙයුම් සක්රීයව කරන එබදු ස්ථාන 7ක් පවත්වාගෙන යනවා. මේ ඉතාම නුදුරේදී බෙරේ ලේක් එකේ ඒ වගේ Water Aerodrome එකක් අපි operate කරනවා. ඉතාම මෑතකදී.”
ADA DERANA
කොළඹ කොටස් වෙළෙඳපොළ මිල දර්ශකවල පහළ යාමක් අද (14) දිනයේ දී වාර්තා වුණි.
එහිදී සියලු කොටස් මිල දර්ශකය ඒකක 46.83කින් පහළ ගොස් ඒකක 19,928.67ක් ලෙසින් සටහන් වූ අතර S&P SL20 දර්ශකය ඒකක 35.06කින් පහළ ගොස් ඒකක 5,780.58ක් ලෙසින් වාර්තා විය.
මිල දර්ශකවල පහළ යාමට හේලීස්, සම්පත් බැංකුව, සෙන්ට්රල් ෆිනෑන්ස්, කාර්ගිල්ස් සහ NDB යන සමාගම්වල කොටස් මිල පහළ යාම් ප්රධාන වශයෙන් බලපාන ලදී. ඒ ඇතුළුව සමාගම් 123ක කොටස් මිල ගණන් පෙර දිනයට සාපේක්ෂව අද දින පහළ ගොස් තිබේ.
මිල ඉහළ ගිය සමාගම් සංඛ්යාව 98ක් ලෙසින් වාර්තා වන අතර PickMe සහ Co-operative Insurance Company PLC සමාගම් සියලු කොටස් මිල දර්ශකයට ඉහළ ධනාත්මක දායකත්වයක් ලබා දීමට සමත්විය.
අද දින ගනුදෙනු පිරිවැටුම රු. බිලියන 7 සීමාව ඉක්මවූ අතර එය රු. බිලියන 7.08ක් ලෙසින් සටහන්ව තිබුණි.
එහිදී කැපීපෙනුනු කාරණය වූයේ DIGITAL MOBILITY SOLUTIONS LANKA PLC හෙවත් PickMe සමාගමේ හි කොටස් ගනුදෙනුවල ඉහළ සක්රීයභාවයක් දක්නට ලැබීමයි. අද දිනය PickMe කොටස් මිල 16.31% කින් ඉහළ ගොස් තිබුණු අතර දෛනික පිරිවැටුමට ඉහළම දායකත්වය ලබා දෙමින් රු. බිලියන 1.4ක වටිනාකමකින් යුතු කොටස් හුවමාරු වී තිබුණි. එහිදී සාමාන්ය ගනුදෙනු හරහා රු. මිලියන 932ක හා ගිවිසාගනු ලැබූ ගනුදෙනු හරහා රු. මිලියන 452ක වටිනාකමකින් යුතු PickMe කොටස් දින තුළ ගනුදෙනු වී ඇත.
