Category: politics_sub

තෙල් මිල ගැන ඇමති නලින්දගෙන් ඉඟියක්…

පවතින මැදපෙරදිග යුදමය තත්ත්වය හමුවේ වුවද මෙරට තෙල් සහ විදුලි සැපයුම අඛණ්ඩව ලබාදෙන බව සෞඛ්‍ය සහ ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පවසයි.

කළුතර ප්‍රදේශයේ දී මාධ්‍ය වෙත අදහස් දක්වමින් අමාත්‍යවරයා පවසා සිටියේ, ලෝක වෙළෙඳපොළේ තෙල් මිලෙහි සිදුවන උච්ඡාවචනයන් සමඟ තෙල් මිලේ යම් ඉහළයෑමක් සිදුවිය හැකි බවය.

එසේ සිදුවුවත් සමස්ත මිල ඉහළ දැමීමක් නොව එයින් සැලකිය යුතු කොටසක් භාණ්ඩාගාරය මඟින් දරාගන්නා බවද අමාත්‍යවරයා මෙහිදී පැවසීය.

මේ වනවිට ඉහළ දමා ඇති තෙල් මිල ගණන් යුදමය තත්ත්වය පහව ගිය පසු හැකි ඉක්මනින් අඩුකිරීම රජයේ අපේක්ෂාව බවද අමාත්‍යවරයා මෙහිදී සඳහන් කළේය.

ඉදිරියේ දී ලංගම බස් ගාස්තු ගෙවීම කාඩ් ක්‍රමවේදයට පමණයි – ලංගම සභාපති….

ලංගම බස් ගාස්තු සඳහා ගෙවීම් සිදුකිරීම ඉදිරියේදී කාඩ් පත් මගින් පමණක් සිදුකිරීමට අවශ්‍ය සියලු කටයුතු සූදානම් කර ඇති බව ශ්‍රී ලංකා ගමනාගමන මණ්ඩලයේ සභාපති සජීව කනකරත්න මහතා පවසයි.

ඔහු පැවසුවේ ඉදිරි මාස කිහිපය අතුලත මෙය ලංගම සේවය සඳහා ක්‍රියාත්මක කරන බවය.

අද (16) දිනයේදී මාතර සිට කොළඹ බලා ගමන්ගන්නා මගීන්ගේ ගමනාගමන පහසුකම් පිළිබඳව සොයා බැලීමට එක්වීමෙන් අනතුරුව මාධ්‍යවේදීන්  කළ ප්‍රශ්න කිරීම් සඳහා පිලිතුරු ලබාදෙමින් ඒ මහතා මේ බව පැහැදිලි කළේය.

ලංගමය ඩිජිටල්කරණය වීම ඇතුළු පොදු ප්‍රවාහන සේවයේ වෙනස්වීම් ඉදිරි වසර 3 ඇතුලත දී ජනතාවට දැක ගැනීමට හැකිවන බවද ඒ මහතා වැඩිදුරටත් පවසයි.

ලාල්කාන්තට රු.කෝටි 6.7ක නිෂ්චල දේපොළ – වත්කම් ප්‍රකාශයෙන් හෙළිවෙයි…..

රුපියල් කෝටි  6.7කට අධික නිෂ්චල දේපොළ තමාට අයත් බවට කෘෂිකර්ම අමාත්‍ය කේ. ඩී. ලාල්කාන්ත මහතා සිය වත්කම් ප්‍රකාශය මගින් දන්වා තිබේ.

අමාත්‍යවරයාගේ වත්කම් සම්බන්ධව පසුගිය දිනවල සමාජය තුළ කතාබහක් නිර්මාණය වූ අතර ඔහු සිය වත්කම් ප්‍රකාශය භාරදී ඇත්තේ පසුගිය වසරේ දෙසැම්බර් මස අවසන් සතියේදීය.

2023 අංක 09 දරන දූෂණ විරෝධි පනත ප්‍රකාරව සියලු දේශපාලනඥයින් සිය වත්කම් බැරකම් ප්‍රකාශ ඉදිරිපත්කළ යුතු වෙයි.

ඒ අනුව 2025 වර්ෂයට අදාළව දේශපාලනඥයින් රැසක් මේ වනවිටත් සිය වත්කම් බැරකම් ප්‍රකාශ ඉදිරිපත්කර අවසන් ය.

මෙම වත්කම් බැරකම් ප්‍රකාශයට අදාළ ප්‍රකාශය සිදුකරන තැනැත්තාගේ වත්කම් හා බැරකම්, එම පුද්ගලයාගේ කලත්‍රයාගේ වත්කම් හා බැරකම්, යැපෙන දරුවන්ගේ වත්කම් බැරකම් මෙන්ම එම පුද්ගලයාගෙන් යැපෙන වෙනත් අය වේ නම් ඔවුන්ගේ වත්කම් හා බැරකම් ද ඇතුළත් කිරීම අනිවාර්යයි.

මේ යටතේ 2024 හා 2025 වර්ෂ සඳහා කෘෂිකර්ම, පශු සම්පත්, ඉඩම් හා වාරිමාර්ග අමාත්‍ය කේ.ඩී.ලාල්කාන්ත මහතා භාරදී ඇති ඔහුගේ වත්කම් බැරකම් ප්‍රකාශය පිළිබඳ පසුගිය දිනවල සමාජ මාධ්‍ය ඔස්සේ කතාබහක් නිර්මාණය වුණි.

ලාල්කාන්ත මහතා සිය වත්කම් ප්‍රකාශය 2025 දෙසැම්බර් 26 වැනිදා භාර දී ඇති අතර, එය සහතික කර ඇත්තේ මහජන ආරක්ෂක නියෝජ්‍ය අමාත්‍ය නීතිඥ සුනිල් වටගල මහතාය.

මෙම වත්කම් බැරකම් ප්‍රකාශයට අනුව කේ.ඩී. ලාල් කාන්ත මහතා තමා සතුව ඇති නිශ්චල දේපළ ලෙස දක්වා ඇත්තේ,

තෑගි ඔප්පු මගින් අත්පත් කරගත් රුපියල් මිලියන හයක පමණ වටිනාකමකින් යුත් වර්ග අඩි 2500ක නේවාසික ගොඩනැගිල්ලක්, පර්චස් 10ක ඉඩමක්.

රුපියල් මිලියන දෙකයි දශම පහක් වටිනා වර්ග අඩි 750ක ස්ථිර ගොඩනැගිල්ලක්, පර්චස් 20ක ගෙවත්තක්.

රුපියල් මිලියන පනස් හයක පමණ වටිනාකමකින් යුත් වර්ග අඩි 4500ක නේවාසික ගොඩනැගිල්ලක් හා පර්චස් 14ක ඉඩමක් හා පසු උරුමය යටතේ අත්පත්කර ගත් රුපියල් මිලියන දෙකයි දශම පහක වටිනාකමකින් යුත් වර්ග අඩි 1500ක නේවාසික හා වාණිජ ගොඩනැගිල්ලකි.

මීට අමතරව රුපියල් මිලියන එකයි දශම 6ක වටිනාකමකින් යුත් පවුම් 08ක රන් ආභරණ, රුපියල් මිලියන තුනක වටිනාකමකින් යුත් රන් පවුමක්, රුපියල් මිලියන 4.5ක වටිනාකමකින් යුත් මෝටර් රථයක් චංචල දේපළ ලෙස දක්වා තිබේ.

වාර්ෂික වැටුප් ලෙස රුපියල් 738,918.16 ක්, දේපළ බදු දීමෙන් ලැබෙන ආදායම ලෙස රුපියල් 400,000ක් , ස්ථාවර තැන්පතු වාර්ෂික ආදායම ලෙස රුපියල් 2,755,851.97ක්, වර්තමාන රැකියාව ලෙස දක්වමින් වාර්ෂිකව රුපියල් 1,800,000 ක මුදලක් අමාත්‍යවරයාගේ වත්කම් බැරකම් ප්‍රකාශයේ සඳහන් ය.

අමාත්‍ය කේ.ඩී ලාල් කාන්ත මහතා ඉදිරිපත් කර ඇති ඔහු සතු නිෂ්චල දේපොළවල පමණක් මුළු වටිනාකම රුපියල් කෝටි 6.7 ඉක්මවයි.

හිටපු පාර්ලිමේන්තු මන්ත්‍රී චන්දන කත්‍රිආරච්චි අත්අඩංගුවට…..

හිටපු පාර්ලිමේන්තු මන්ත්‍රී චන්දන කත්‍රිආරච්චි මහතා කොළඹ අපරාධ කොට්ඨාසය මඟින් අත්අඩංගුවට ගෙන තිබේ.

පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යු වුට්ලර් මහතා පැවසුවේ, කැස්බෑව මහෙස්ත්‍රාත් අධිකරණයෙන් ලබාගත් සෝදිසි වරෙන්තුවක් මත ඔහුගේ නිවස පරීක්ෂා කිරීමේදී ටී 56 මැගසින් දෙකක්, පතොරම් 221ට වැඩි ප්‍රමාණයක් සහ ජීව අත්බෝම්බ දෙකක් සොයාගැනීමට හැකි වූ බවය.

ඒ අනුව හිටපු පාර්ලිමේන්තු මන්ත්‍රීවරයා පොලිස් අත්අඩංගුවට පත්ව තිබේ.

 

Update

හිටපු පාර්ලිමේන්තු මන්ත්‍රී චන්දන කත්‍රිආරච්චි මහතා සතුව අවි ආයුධ ඇති බවට කොළඹ අපරාධ කොට්ඨාසය කැස්බෑව අධිකරණයට කරුණු වාර්තා කිරීමෙන් පසු ලබාගත් සෝදිසි වරෙන්තුවකට අනුව අද (16) ඔහුගේ නිවස පරීක්ෂා කෙරුණි.

එහිදී T56 උණ්ඩ 221ක්, T56 මැගසින් 2ක්, 7.2 උණ්ඩ 31ක්, 0.2 උණ්ඩ 103ක් සහ ජීව අත්බෝම්බයක් සොයා ගැනීමට විමර්ශන නිලධාරීන්ට හැකිවිය.

‍අදාළ ජීව අත්බෝම්බය චෙකොස්ලෝවැකියාවේ නිෂ්පාදිත එකක් බවද අනාවරණය වී තිබේ.

ඒ අනුව කොළඹ අපරාධ කොට්ඨාසයේ නිලධාරීන් චන්දන කත්‍රිආරච්චි මහතාගේ නිවසේ තවදුරටත් සෝදිසි කිරීම් සිදුකර ඇති අතර එහිදී  ලියාපදිංචි ගිනිඅවි 4ක් ද සොයාගැනීමට හැකිවී ඇත.

ඉන් එක් ගිනිඅවියක් චන්දන කත්‍රිආරච්චි මහතාගේ නමට ලියාපදිංචි කර තිබෙන අතර අනෙක් ගිනිඅවි 3 චන්දන කත්‍රිආරච්චි මහතාගේ බිරිඳගේ නමට ලියාපදිංචි කර තිබූ බව අනාවරණය වී තිබේ.

මෙලෙස සොයාගෙන ඇත්තේ ෂොට්ගන් වර්ගයේ ගිනිඅවි 2ක් සහ 9mm වර්ගයේ ගිනිඅවි 2කි.

ඒ අනුව චන්දන කත්‍රිආරච්චි මහතා සතුව මෙතරම් ගිනිඅවි ප්‍රමාණයක් සන්තකයේ තබාගැනීමට හේතුව අනාවරණය කරගැනීම සඳහා වෙනම විමර්ශනයක් ආරම්භ කිරීමට කොළඹ අපරාධ කොට්ඨාසයේ නිලධාරීන් පියවර ගෙන ඇති බවද වාර්තා වෙයි.

කොළඹ දිසාව භාර නියෝජ්‍ය පොලිස්පති නිශාන්ත සොයිසා මහතාගේ අධීක්ෂණය යටතේ කොළඹ අපරාධ කොට්ඨාසය සිද්ධිය සම්බන්ධයෙන් වැඩිදුර විමර්ශන සිදුකරයි.

හිසතෙල් ගෑමේ රාජ්‍ය මහෝත්සවයට ජනපති එක්වෙයි….

මහනුවර ශ්‍රී දළදා මාළිගා පරිශ්‍රයේ ශ්‍රී නාථ දේවාල භූමියේදී ආරම්භ වූ රාජ්‍ය හිස තෙල් ගෑමේ මහෝත්සවයට ජනාධිපති අනුර කුමාර දිසානායක මහතා සහභාගී වී තිබේ.

සිංහල අවුරුදු නැකැත් සීට්ටුවේ සඳහන් පරිදි හිස තෙල් ගෑමේ නැකත අද (15) පෙරවරු 6.55ට යෙදී ඇත.

පච්ච වර්ණ හෙවත් කොළ පැහැති වස්ත්‍රාභරණයෙන් සැරසී නැගෙනහිර දිශාව බලා හිසට කොහොඹ පත් ද පයට කොලොන් පත් ද තබා කොහොඹ පත් යුෂ මිශ්‍ර නානු හා තෙල් ගා ස්නානය කිරීම මැනවි යැයි නැකැත් සීට්ටුවේ සඳහන් වෙයි.

මල්වතු සහ අස්ගිරි මහා නා හිමිවරුන් ප්‍රමුඛ මහා සංඝරත්නයේ ආශිර්වාදයෙන් ආරම්භ වූ මෙම හිසතෙල් ගෑමේ රාජ්‍ය මහෝත්වය සඳහා සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ඇතුළු දේශපාලනඥයින් රැසක් එක්වූහ.

ජනපති රාමඤ්ඤ මහා නිකායේ මහා නාහිමි බැහැදකී…..

ජනාධිපති අනුර කුමාර දිසානායක මහතා ශ්‍රී ලංකා රාමඤ්ඤ මහා නිකායේ මහානායක අග්ගමහා පණ්ඩිත අතිපූජ්‍ය මකුලෑවේ විමල නායක හිමිපාණන් වහන්සේ බැහැදැක කෙටි පිළිසඳරක නිරත විය.

උන්වහන්සේ වැඩ වසන මීරිගම, මිණිඔළුව, ශ්‍රී විද්‍යාවාස පිරිවෙන් මහා විහාරය වෙත අද (15) පස්වරුවේ ගිය ජනාධිපතිවරයා මෙලෙස මහානායක හිමිපාණන් වහන්සේ බැහැදැක සුව දුක් විමසීය.

උන්වහන්සේ මෙහිදී සෙත් පිරිත් සජ්ජායනා කර උදා වූ සිංහල සහ දෙමළ අලුත් අවුරුද්ද වෙනුවෙන් ජනාධිපතිවරයා වෙත සිය ආශිර්වාදය පළ කළහ.

පූජ්‍ය මකුලෑවේ ධම්මරතන ⁣ස්වාමීන්වහන්සේ සහ ගම්පහ දිස්‌ත්‍රික් පාර්ලිමේන්තු මන්ත්‍රීවරුන් වන ධර්මප්‍රිය විජේසිංහ, චමින්ද ලලිත් කුමාර , මීරිගම ප්‍රාදේශීය සභාවේ සභාපති සුමින් මහින්දලාල් මහතා ඇතුළු පිරිසක් මෙම අවස්ථාවට එක්ව සිටියහ.

දිවයිනට ආ ඉන්දුනීසියානු රුවල් නෞකාව…..

ඉන්දුනීසියානු නාවික හමුදාවට අයත් ‘KRI BIMA SUCI – 945’ රුවල් නෞකාව සුහද සංචාරයක් සඳහා අද (15) දිවයිනට පැමිණි තිබේ.

ඒ ASEAN Plus Cadet Sail (APCS) – 2026 වැඩසටහන යටතේ ඉන්දුනීසියානු නාවික හමුදාවේ ශිෂ්‍යභට නිලධාරීන් ඇතුළුව විදේශීය රටවල් විසිහයක ශිෂ්‍යභට නිලධාරීන් සමඟය.

මෙම නෞකාව ශ්‍රී ලංකා නාවික හමුදාව විසින් එම නෞකාව, නාවික හමුදා සම්ප්‍රදායානුකුලව පිළිගැනීම කොළඹ වරායේදී සිදුකෙරිණි.

මෙලෙස දිවයිනට පැමිණි SAIL SHIP වර්ගයට අයත් ‘KRI BIMA SUCI – 945’ නෞකාවේ අණදෙන නිලධාරී ලෙස කොමාණ්ඩර් SUGENG HARIYANTO කටයුතු කරනු ලබයි.

නෞකාව දිවයිනේ රැඳී සිටින කාලසීමාව තුළ එම නෞකාව නිරීක්ෂණය සඳහා නාවික හමුදා පුහුණුවන නිලධාරීන් ඇතුළු නාවික පුද්ගලයින් සහභාගී වීමට නියමිතව ඇත.

තවද දෙරටේ නාවික හමුදා අතර සුහදත්වය වැඩිදියුණු කිරීම වෙනුවෙන් සංවිධානය කරනු ලබන  වැඩසටහන් සඳහා සහභාගීවීමට මෙන්ම, දිවයිනේ වැදගත් ස්ථාන නැරඹීම සඳහා ප්‍රදේශ කිහිපයක සංචාරය කිරීමට ද නියමිතය.

ගල්අඟුරු වංචාවක් සම්බන්ධව මුජිබුර්ගෙන් CIDයට පැමිණිල්ලක්…..

සමගි ජනබලවේග පාර්ලිමේන්තු මන්ත්‍රී මුජිබුර් රහුමාන් මහතා ඇතුළු එම පක්ෂයේ කිහිප දෙනෙකු අද (13) අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේය.

ගල්අඟුරු ටෙන්ඩරය ඉදිරිපත් කිරීමේදී සිදුව ඇතැයි කියන අක්‍රමිකතාවක් සම්බන්ධයෙන් විමර්ශනයක් කරන ලෙස ඉල්ලා මෙම පැමිණිල්ල සිදුකර තිබේ.

ඒ අදාළ ටෙන්ඩරය ලබා දීමේදී ජනාධිපතිවරයාට හිතවත් අයෙකුට ලබා දීමට ක්‍රියා කළ ආකාරය හඬපටයකින් හෙළිවී ඇති බව කියමින් මන්ත්‍රීවරයා ඇතුළු පිරිස මෙම පැමිණිල්ල අපරාධ පරීක්ෂණ දෙපාර්තමේන්තුව වෙත ඉදිරිපත් කර ඇත.

“යම් හඬපටයක් නිකුත් වෙලා තිබෙනවා. ඒක ඇහුවාම අපිට තේරෙනවා එතනත් වංචාවක් සිද්ධ වෙලා තියෙනවා කියලා. ජනාධිපතිවරයාගේ ළඟම ඉන්න හිතවතෙක්ට මේ ටෙන්ඩරය ලබා දෙන්න ඕනේ, ලබා දිය යුතුයි කියන සාකච්ඡාවක් සම්බන්ධව මේ හඬපටය නිකුත් වෙලා තිබෙනවා. ඒ සම්බන්ධව තමයි අපි අද ආවේ අපරාධ පරීක්ෂණ දෙපාර්තමේන්තුවට පැමිණිල්ල දාලා මේ ඕඩියෝ එක සම්බන්ධව යන මේ සාකච්ඡාව සම්බන්ධයෙන් වහාම පරීක්ෂණයක් පවත්වන්න කියලා. මේ ඕඩියෝ එකේ යන සාකච්ඡාවෙදි ජනාධිපතිතුමාගේ නම එනවා ජනාධිපතිතුමාගේ ළඟම ඉන්න ව්‍යාපාරිකයින්ගේ නම් එනවා මේක තුළත් පැහැදිළිවම වංචාවක් සිද්ධ වෙලා තිබෙනවා.”

ශ්‍රී ලංකාවට ඕනෑම අවස්ථාවක සහය දෙන්න චීනය සූදානමින් – ශ්‍රී ලංකාවේ චීන තානාපති….

ශ්‍රී ලංකාවට අවශ්‍ය ඕනෑම අවස්ථාවකදී උපකාර කිරීමට චීනය නිරන්තරයෙන් බලාපොරොත්තු වන බව ශ්‍රී ලංකාවේ චීන තානාපති ෂී ෂෙන්ග්හොන්ග් මහතා පවසා තිබේ.

අකුරණ බානාගල චීන භාෂා මධ්‍යස්ථානය විවෘත කිරීම ශ්‍රී ලංකාවේ චීන තානාපති ෂී ෂෙන්ග්හොන්ග් මහතාගේ ප්‍රධානත්වයෙන් ඊයේ (13) සිදුකෙරුණි.

එම අවස්ථාවට සහභාගී වෙමින් එතුමා මේ බව ප්‍රකාශ කර තිබේ.

ශ්‍රී ලංකා චීන බෞද්ධ සංස්කෘතික හුවමාරු මධ්‍යස්ථානයේ අධ්‍යක්ෂ මානාගල පුරාණ විහාරාධිපති පූජ්‍ය පරණගම ඥාණවිමල නාහිමියන්ගේ මෙහෙයවීමෙන් ශ්‍රී ලංකාවේ චීන තානාපති කාර්යාලයේ අනුග්‍රයෙන් අකුරණ බානාගල චීන භාෂා මධ්‍යස්ථානය විවෘත කර ඇත.

මේ අතර, එහිදී ප්‍රදේශයේ ජනතාව සඳහා රුපියල් ලක්ෂ 20ක වටිනාකමින් යුත් වියළි ආහාර බෙදා දීමද මෙහිදී සිදුවූ අතර ශ්‍රී දළදා මාලිගාවේ දියවඩන නිලමේ ප්‍රදීප් නිලංග දෑල මහතා ඇතුළු පිරිසක් මෙම අවස්ථාවට එක් වී තිබේ.

එහදී අදහස් දැක්වූ ශ්‍රී ලංකාවේ චීන තානාපති ෂී ෂෙන්ග්හොන්ග් මහතා,

“ඔබ හැමෝම දන්නවා චීනය සහ ශ්‍රී ලංකාව වසර 2000ක පටන් සමීප සබඳතා පවත්වන කල්‍යාණ මිත්‍ර රටවල් දෙකක්. ලාංකිකයින් මුහුණදෙන ඕනෑම දුෂ්කරතාවයකදී චීනය මුලින්ම ඉදිරිපත්වෙලා ඒ තත්ත්වයෙන් ගොඩ එන්න උදවු කරනවා.වත්මන් යුදමය තත්ත්වයත් එක්ක ලාංකිකයින්ට ඉන්ධන හිඟයක් ඇතිවුණත් විශ්වාසයි චීනය තමයි මුලින්ම ඉන්ධන විශාල ප්‍රමාණයක් පරිත්‍යාග කරන්න ඉදිරිපත් වුණ රට. දිට්වා කුණාටු සමයේදීත් විනාශ වූ පාලම් වැනි දෑ ඉදිකිරීම් සිදුකරලා චීනය සහයෝගය ලබාදුන්නා. ඒ වගේම චීනය බලාපොරොත්තු වෙනවා ලාංකිකයින්ට නිරන්තරයෙන් උදව් උපකාර කරන්න.”

කාන්තාවකට පහර දුන් යුක්‍රේන ජාතික කාන්තාව අත්අඩංගුවට….

ගල්කිස්ස ප්‍රදේශයේ දී යුක්‍රේන ජාතික කාන්තාවක් විසින් ශ්‍රී ලාංකික කාන්තාවකට පහර දී තිබේ.

එම ගැටුම සමතයකට පත්කිරීමට පැමිණි පොලිස් නිලධාරියෙකුට ද අදාළ යුක්‍රේන ජාතික කාන්තාව විසින් පහර දී ඇත.

යුක්‍රේන ජාතික 37 හැවිරිදි කාන්තාව කලත්‍ර වීසා මත වසර 18ක් තිස්සේ රත්මලාන ප්‍රදේශයේ පදිංචිව සිටින බව වාර්තා වේ.

පොලිස් මාධ්‍ය කොට්ඨාසය සඳහන් කළේ පහරදීම, පොලිස් රාජකරියට බාධා කිරීම සහ සොරකම් කිරීම යන චෝදනා මත එම කාන්තාව අත්අංඩගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කළ බවය.