මත්ද්රව්ය ප්රවාහනය කළ බවට සැකපිට පොලිස් මත්ද්රව්ය කාර්යාංශ නිලධාරීන් කණ්ඩායමක් මීගමුව ප්රදේශයේදී අද (30) පස්වරුවේ මෝටර් රථයකට වෙඩිතැබීමක් සිදුකර තිබේ.
ඒ එම රථය පරීක්ෂාව සඳහා නැවැත්වීමට සංඥාකිරීමේදී එය නොනවත්වා ඉදිරියට ධාවනය කිරීම හේතුවෙන්ය.
වෙඩිතැබීමත් සමග මෝටර් රථය අනතුරට ලක්ව ඇති අතර සිද්ධියේදී පොලිස් මත්ද්රව්ය කාර්යාංශයේ නිලධාරියෙකු ද තුවාල ලබා තිබේ.
අනතුරුව මෝටර් රථයේ සිටි දෙදෙනෙකු අයිස් මත්ද්රව්ය ග්රෑම් 500කට අධික ප්රමාණයක් සමග අත්අඩංගුවට ගත් බව පොලීසිය පැවසීය.
කහවත්ත, නීලගම ප්රදේශයේදී අතුරුදන්වූ මැණික් ව්යාපාරිකයාගේ මළ සිරුර පතල් වළක තිබී අද (30) හමුවී තිබේ.
කහවත්ත, නීලගම මාර්ගයේ දී මැණික් ව්යාපාරිකයෙකු අබිරහස් ලෙස අතුරුදන්වීමේ සිද්ධියක් සම්බන්ධයෙන් කහවත්ත පොලීසිය විමර්ශනයක් ආරම්භ කර තිබුණි.
මෙලෙස අතුරුදන්ව සිටියේ කහවත්ත කට්ටංගේ ප්රදේශයේ පදිංචි 61 හැවිරිදි දෙදරු පියෙකි.
පසුගිය 28 වනදා දහවල් කාලයේ දී මෙම මැණික් ව්යාපාරිකයා කහවත්ත – නීලගම මාර්ගයේ යතුරුපැදියකින් ගමන් කර ඇති බව මූලික විමර්ශනවල දී අනාවරණය වී තිබුණි.
පසුව ඔහුගේ එම යතුරුපැදිය කහවත්ත නීලගම මාර්ගයේ වංගුවක් අසළ නවතා තිබියදී හමු වූ අතර ඊයේ (29) දිනයේදී ඔහුගේ ජංගම දුරකථනය ද එම මාර්ගය ආසන්නයේම තේ වතුයායක තිබී සොයාගෙන තිබුණි.
රජයේ ඉඩමක් අධි ආදායම්ලාභී පුද්ගලයන් වෙත ගොවි පන්තිය යටතේ ලබාදීමට ව්යාජ ආදායම් සහතිකයක් නිකුත් කිරීම සම්බන්ධයෙන් විශ්රාමික ග්රාම නිලධාරිවරයෙකු අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගෙන ඇත.
සැකකරු අද (30) අත්අඩංගුවට ගෙන ඇති අතර, ඔහු විසින් තම ධූර බලය භාවිත කර ව්යාජ ආදායම් සහතිකයක් නිකුත් කිරීම මගින් රජයට රුපියල් 10,625,000ක පාඩුවක් සිදු කර ඇති බව විමර්ශනවලදී අනාවරණය වී ඇත.
එමෙන්ම, මෙම ක්රියාව මගින් බාහිර පාර්ශ්වයකට අයථා වාසි ලබාදී ඇති බවද සඳහන් වේ.
අත්අඩංගුවට ගත් සැකකරු කොළඹ ප්රධාන මහේස්ත්රාත් අධිකරණය වෙත ඉදිරිපත් කිරීමෙන් අනතුරුව ඇප මත මුදා හැර තිබේ.
හෝමූස් සමුද්ර සන්ධිය අවහිර වීමෙන් ආහාර මිල ගණන් ඉහළ ගොස් වඩාත් බලපෑමට ලක්විය හැකි රටවල් අතර දෙවැනි ස්ථානයට ශ්රී ලංකාව පත්ව ඇතැයි පර්යේෂණ වාර්තාවකින් අනාවරණ වී තිබේ.
ජර්මනියේ කියෙල් ආර්ථික පර්යේෂණ ආයතනය සිදුකළ මෙම පර්යේෂණයෙන් හෙළි වී ඇත්තේ ආහාර, ඖෂධවල සිට ස්මාර්ට්ෆෝන් දක්වාම භාණ්ඩ රැසක මිල ගණන් මෙලෙස ඉහළ යා හැකි බවය.
එම පර්යේෂණයට අනුව ආහාර මිල ඉහළ යාමෙන් වඩාත් බලපෑමට ලක්විය හැකි රටවල් අතර දෙවැනි තැන ඇත්තේ ශ්රී ලංකාවයි.
එය ප්රතිශතාත්මක වශයෙන් 15%ක වර්ධනයක් බවද සඳහන්.
එම දරුණු බලපෑමට ලක්වන රටවල් අතර පළමු තැන සැම්බියාව (31%) වන අතර තායිවානය (12%), පකිස්තානය (11%) සහ ඉන්දියාව (10%) ඇතුළු රටවල් ද ඊට අයත් වේ.
ඉන්ධන ගෑස් ඇතුළු බලශක්ති සහ පොහොර ආනයනය කරන සංවර්ධනය වෙමින් පවතින රටවල් මෙම ආහාර මිල බලපෑමට දැඩිව ලක්වන බව ද එහි සඳහන් වේ.
හෝමූස් සමුද්ර සන්ධිය සම්පූර්ණයෙන් නැවත විවෘත කළ ද ආහාර සුරක්ෂිතතාවට එල්ල වන බලපෑම බොහෝ කාලයක් පවතිනු ඇති බව Kiel ආයතනයේ පර්යේෂකයින්ගේ පුරෝකථනය වේ.
මේ අතර හෝමූස් සමුද්ර සන්ධිය සම්පූර්ණයෙන් වසා දැමීමෙන් ගෝලීය තිරිඟු පිටි මිල 4.2%කින් සහ පලතුරු සහ එළවළු මිල 5.2%කින් ඉහළ යා හැකි බව ද අනාවරණ වී තිබේ.
හෝමූස් අවහිරතාවයේ ප්රතිවිපාක ලෙස ස්මාර්ට්ෆෝන්වල සිට දත්ත මධ්යස්ථාන දක්වා වන අතිනවීන තාක්ෂණික උපකරණ රාශියක මිල ඉහළයාමක් සිදුවිය හැකි බවට විශ්ලේෂකයින් අනතුරු අඟවා තිබුණි.
හෝමූස් සමුද්ර සන්ධියේ ඇති වූ බාධාව හේතුවෙන් ඖෂධ මිල ඉහළ යාමේ හැකියාව පිළිබඳ ඇතැම් විශ්ලේෂකයින් අනතුරු අඟවා ඇත.
අමෙරිකා – ඊශ්රායල – ඉරාන යුද්ධය තුළ එම බල අරගලය දැන් කේන්ද්රගත වී ඇත්තේ හෝමූස් සමුද්ර සන්ධිය මතය.
ලොව අතිශය වැදගත් නැව් ගමනාගමන මාර්ගයක් වන හෝමූස් සමුද්ර සන්ධිය වසාදැමූ බවත් ඒ හරහා යාමට උත්සාහ කරන ඕනෑම යාත්රාවකට එරෙහිව දැඩි පියවර ගන්නා බවත් ඉරානය ඊයේ (27) නිවේදනය කළේය.
ලොව ඛනිජ තෙල් ප්රවාහනයෙන් 20%ක් පමණ සිදුවන හෝමූස් සමුද්ර සන්ධිය මෙලෙස අවහිර වීම තුළ ලෝකයට දැඩි බලශක්ති අර්බුදයකට මුහුණ දීමට සිදු වේ.
ඒ අනුව ගෝලීය ඉන්ධන හා ගෑස් මිල ඉහළ යාම මේ වන විටත් දැකගත හැකියි.
එම බලශක්ති මිල ඉහළ යාම තුළ සෙසු භාණ්ඩ හා සේවාවල මිල ඉහළ යාම වැළැක්විය නොහැකි කරුණකි.
රට තුළ ඉන්ධන සැපයුම සම්පූර්ණයෙන් සහතික කර ඇති බව ලංකා ඛනිජ තෙල් නීතිගත සංස්ථාවේ සභාපති ඩී.ජේ.ඒ.එස් ද එස්. රාජකරුණා මහතා ප්රකාශ කරයි.
රජයේ ප්රවෘත්ති දෙපාර්තමේන්තුවේ පැවැති විශේෂ මාධ්ය හමුවකදී අදහස් දක්වමින් ඔහු සඳහන් කළේ, දැවි තෙල් සැපයුමද ස්ථාවර කර ඇති බැවින් විදුලි කප්පාදුවක අවශ්යතාවක් නොමැති බවය.
ඉදිරි දිනවලදී තවත් ඉන්ධන නැව් රැසක් මෙරටට පැමිණීමට නියමිත බව ලංකා ඛනිජ තෙල් නීතිගත සංස්ථාවේ සභාපතිවරයා සඳහන් කළේය.
එහිදී සභාපතිවරයා පවසා සිටියේ, ඩීසල් සැපයුම ලබන මාසයේ මැද දක්වා ගැටලුවකින් තොරව පවත්වාගෙන යා හැකි බවත් 92 හා 95 පෙට්රල් සැපයුම ජුනි මස ආරම්භය දක්වා සුරක්ෂිත බවත්ය.
එහිදී වැඩිදුරටත් අදහස් දැක්වූ ලංකා ඛනිජ තෙල් නීතිගත සංස්ථාවේ සභාපති ඩී.ජේ.ඒ.එස් ද එස්. රාජකරුණා මහතා,
“නැව් දෙකක් ගොඩ බානවා 27 වනදා නැවක් එනවා එකේ එනවා 92 පෙට්රල් මෙට්රික් ටොන් 30000ක් 95 පෙට්රල් මෙට්රික් ටොන් 5000ක් ඊට පස්සේ හෙට එනවා IOC නැවක් එකේ එනවා ඩීසල් මෙට්රික් ටොන් 18000ක් 92 පෙට්රල් මෙට්රික් ටොන් 18000යි. ඊට පස්සේ අපිට 28, 29 නැවක් එන්න නියමිතව තිබුණා. ඒක කලින් ආවා දැන් ඒක ගොඩබාලා ඉවරයි. එකේ ඩීසල් මෙට්රික්ටොන් 37000ක්.
අපිට ගැටලුව වුණේ අර පිරිපහදුවට අවශ්ය තෙල්. පිරිපහදුවෙන් තමයි අපිට වැඩිපුර ඩීසල් සහ දැවි තෙල් හදන්නේ. එතකොට දැවිතෙල් නැති වුණොත් අනිවාර්යෙන් අපිට විදුලි කප්පාදුවකට යන්න වෙනවා. ඒ නිසා අපි දැවි තෙල්වලට ලංසු කැඳව්වා ඒකටත් අවිල්ලා තියෙනවා. එතකොට 2 වනදා සහ 4 වනදා අතර අපිට එනවා ඩීසල් මෙට්රික්ටොන් 32000ක්, ගුවන් යාන ඉන්ධන මෙට්රික්ටොන් 8000ක්
ඊට පස්සේ ආපහු 6 සහ 7 එන්න නියමිතයි ඩීසල් මෙට්රික් ටොන් 37500ක්, 7 සහ 8 එනවා ඩීසල් මෙට්රික්ටොන් 32000කුත් සුපර් ඩීසල් මෙට්රික් ටොන් 5000කුත්. ඊට පස්සේ 10, 11 එනවා ගුවන්යානා ඉන්ධන මෙට්රික් ටොන් 30000ක්, ඊට පස්සේ සිනොපෙක් එකේ නැවක් එනවා 18, 19 එකේ එනවා ඩීසල් මෙට්රික්ටොන් 20000ක් 92 පෙට්රල් මෙට්රික්ටොන් 20000කුත්.
ඊට පස්සේ 12, 13 විදුලි උත්පාදනය සඳහා එන නැව එනවා. දැවිතෙල් මෙට්රික්ටොන් 30000ක නැවක්. ඊට පස්සේ 92 පෙට්රල් එනවා 16, 17 දිනවල මෙට්රික්ටොන් 35000ක නැවක්. අපහු අර් එම් පාර්ක් නැවක් එනවා 21, 22ක එකේ එනවා ඩීසල් මෙට්රික්ටොන් 20000ක් 92 පෙට්රල් මෙට්රික්ටොන් 17000ක් 95 පෙට්රල් මෙට්රික්ටොන් 3000ක්.
ආපහු 24 සහ 25 දිනවල නැවක් එනවා ඩීසල් මෙට්රික්ටොන් 37000ක්, ආපහු 29 සහ 30 දිනවල නැවක් එනවා 92 පෙට්රල් මෙට්රික්ටොන් 30000කුත් 95 පෙට්රල් මෙට්රික් ටොන් 5000කුත් අප්රේල් මාසයේ මේ නැවු සම්පූර්ණයෙන්ම අපිට ලැබෙනව එකේ ගැටලුවක් නෑ. ඒ එකකවත් යුද්ධය තියෙන කලාපයෙන් නෙමයි නැව්ගත කරන්නේ.”
ඉන්ධන ගැටලු පිළිබඳව සොයා බැලීමට සහ අවශ්ය මැදිහත්වීම් සිදු කිරීමට සියලු අමාත්යාංශ ආවරණය වන පරිදි ඛනිජ තෙල් නිතීගත සංස්ථාවෙන් නිලධාරීන් පස් දෙනෙක් පත් කිරීමට අත්යවශ්ය භාණ්ඩ බෙදාහැරීම් අධීක්ෂණය සඳහා පත් කළ කමිටුවේදි තීරණය විය.
සෑම අමාත්යාංශයක්ම යටතේ පවතින ආයතනවල මතුවන ඉන්ධන ගැටලු පිළිබඳව සොයා බලා සංස්ථාව සමඟ සම්බන්ධීකරණය පවත්වා ගනිමින් විසඳුම් ලබා දීමට මැදිහත් වීම මෙම නිලධාරීන්ගේ වගකීම බවද එහිදී සාකච්ඡා කෙරිණි.
ප්රවාහන මහාමාර්ග සහ නාගරික සංවර්ධන අමාත්ය බිමල් රත්නායක මහතාගේ ප්රධානත්වයෙන් අත්යවශ්ය භාණ්ඩ බෙදාහැරීම් අධීක්ෂණය සඳහා පත් කළ කමිටුව ඊයේ (27) පස්වරුවේ ජනාධිපති ලේකම් කාර්යාලයේදී රැස් වූ අවස්ථාවේදී මේ පිළිබඳ කරුණු සාකච්ඡා විය.
කර්මාන්තකරුවන්ට තමන්ගේ නිෂ්පාදන රට පුරා බෙදාහැරීම සඳහා වාහනවලට දැනට ලබා දී ඇති ඉන්ධන කෝටාව ප්රමාණවත් නොවන බවට ඉල්ලීම් ඉදිරිපත්ව ඇති බවද, ඒ ඉල්ලීම් නොසලකා හැරියහොත් භාණ්ඩ මිල ඉහළ දැමීමේ ඉඩකඩක් පවතින බවද, එසේ වුවහොත් උත්සව සමයේ ජනතාව දැඩි අසීරුතාවයකට පත්විය හැකි බවටද මෙහිදි වැඩි අවධානයකින් සාකච්ඡාවට ගනු ලැබීය.
කර්මාන්ත, සතොස ඇතුළු අත්යවශ්ය ආහාර ද්රව්ය බෙදා හරින රාජ්ය සහ පෞද්ගලික ආයතන, තොග ආනයනකරුවන්, සංචාරක ක්ෂේත්රයේ සේවා ආයතන හෝ හෝටල් සඳහාත් වෙනත් සේවා සැපයුම් ආයතන සඳහාත් ඉන්ධන නිකුත් කිරීම පිළිබඳවද මෙම කමිටුවේදි සාකච්ඡා විය.
ඒ අනුව, එම ආයතනවලින් ඉදිරිපත් වන ඉන්ධන කෝටාවන් පිළිබඳ ඉල්ලීම් සළකා බලා අවශ්ය ක්රියාමාර්ග කඩිනමින් ගැනීමටත්, එම ඉල්ලීම් අදාල අමාත්යාංශ මගින් බලශක්ති අමාත්යාංශයට ඉදිරිපත් කළ යුතු බවටත් මෙහිදී සාකච්ඡා කෙරිණි.
කෘෂිකර්මය, ධීවර කර්මාන්තය ඇතුළු වෙනත් ක්ෂේත්ර සඳහා කෘෂිකර්ම පර්යේෂණ නිලධාරීන් ඇතුළු ඒ ඒ ක්ෂේත්රවලට අදාල රාජ්ය නිලධාරීන්ගේ නිර්දේශ මත නිකුත් කළ ලිපියකට ඉන්ධන ලබා දීම වෙනුවට QR කේත ක්රමයක් භාවිතා කිරීමේ වැඩපිළිවෙළ කඩිනම්ව ක්රියාත්මක කිරීමටද මෙහිදී අවධානය යොමු විය.
එළඹෙන සිංහල හින්දු අලුත් අවුරුදු සමයේදී ජනතාවට හිඟයකින් තොරව භාණ්ඩ සැපයීම මෙන්ම භාණ්ඩ මිල අධික ලෙස ඉහළ යාම වළක්වා ගැනීම ඉලක්ක කර ගනිමින් ඉන්ධන සැපයුම අඛණ්ඩව හා නිසි කළමණාකරණයකින් පවත්වාගෙන යාම කෙරෙහි අවධානය යොමු කළ යුතු බවද බිමල් රත්නායක අමාත්යවරයා මෙහිදී අවධාරණය කළේය.
වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ, ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක, බලශක්ති නියෝජ්ය අමාත්ය අර්කම් ඉල්යාස් යන මහත්වරු සහ ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, ඛනිජ තෙල් නීතිගත සංස්ථාවේ සභාපති ඩී. ජේ. රාජකරුණා යන මහත්වරු ඇතුළු රාජ්ය නිලධාරීහු පිරිසක් මෙම සාකච්ඡාවට එක්ව සිටියහ.
කෘෂි කර්මාන්තය සහ තවත් පාර්ශ්ව කිහිපයක් සඳහා ඉන්ධන නිකුත් කිරීමට නව QR ක්රමවේදයක් ක්රියාත්මක කිරීමට අවධානය යොමුව ඇතැයි ලංකා ඛනිජ තෙල් නීතිගත සංස්ථාව පවසයි.
එම සංස්ථාවේ සභාපති ඩී.ජේ.ඒ.එස්. ද එස්. රාජකරුණා මහතා පැවසුවේ මේ සඳහා වාහන රහිත QR ක්රමවේදයක් හඳුන්වාදීමට පියවර ගන්නා බවය.
නව QR ක්රමවේදය මේ වන විට නිර්මාණය කරමින් පවතින බවත් පැවසූ රාජකරුණා මහතා සඳහන් කළේ මෙය ගොවීන්, ධීවරයින් ඇතුළු පාර්ශ්ව කිහිපයක ඔවුන්ගේ ඉන්ධන අවශ්යතා සඳහා නිර්මාණය කරන බවය.
ග්රාමසේවක සහ ප්රාදේශීය ලේකම් කාර්යාලය වෙත තමන්ගේ ඉන්ධන අවශ්යතාවය සම්බන්ධව දැනුවත් කර මෙම නව QR ක්රමවේදය නිර්මාණය කර ගත හැකි බවත් පැවසූ ඒ මහතා පැවසුවේ මෙම නව QR කේතය එම පුද්ගලයින්ගේ ජාතික හැඳුනුම්පත් අංකයට නිර්මාණය වන බවය.
මෙම නව QR කේතය ක්රම කිහිපයක් යටතේ නිර්මාණය වන බවත් ඒ අනුව එහි කාණ්ඩ 7ක් යටතේ ඉන්ධන ලබා ගැනීමේ හැකියාව පවතින බව පෙන්වා දුන් ඒ මහතා පැවසුවේ මෙම කාණ්ඩ සඳහා ඉන්ධන කොපමණ ප්රමාණයක් ලබා දෙන්නේද යන්න ඛනිජ තෙල් නීතිගත සංස්ථාව තීරණය කරන බවය.
මෙම නව ක්රමවේදය ඉදිරියේදී හඳුන්වාදීමට පියවර ගන්නා බවත් මේ හරහා ගොවීන්, ධීවරයින් ආදී වාහන රහිත ඉන්ධන භාවිත කර නොයෙකුත් ව්යාපාර සහ සිය අවශ්යතා සඳහා ඉන්ධන භාවිත කරන සියලු පාර්ශ්වයන්ගේ ඉන්ධන අවශ්යතා සපුරාලීමට හැකියාව ලැබෙනු ඇති බවද ඒ මහතා වැඩිදුරටත් අදහස් දක්වමින් සඳහන් කළේය.
ශ්රී ලංකා පොලිසියට උපසේවා සහකාර පොලිස් අධිකාරි තනතුරට (නීති නිලධාරීන්) නීතිඥවරුන් බඳවාගැනීමේ කාලය ලබන මස 20 වෙනිදා දක්වා දීර්ඝ කර තිබේ.
එම කාලය දීර්ඝ කිරීමේ ගැසට් පත්රය මාර්තු 27 වෙනිදා නිකුත් කළ බව පොලීසිය නිවේදනය කරයි.
පසුගිය පෙබරවාරි මස 20 වෙනිදා නිකුත් කළ ගැසට් පත්රයට අනුව උපසේවා සහකාර පොලිස් අධිකාරි තනතුරට (නීති නිලධාරින්) නීතිඥවරුන් 100ක් බඳවා ගැනීමට නියමිතය.
මේ සඳහා අයදුම්පත් අධ්යක්ෂ, පොලිස් ආධුනිකයින් බඳවා ගැනීමේ කොට්ඨාසය, අංක 375, ශ්රී සම්බුද්ධ ජයන්ති මාවත, කොළඹ 06 ලිපිනයට යොමු කළ යුතුය.
අයදුම්පත් යොමු කිරීමේදී යම් ගැටලුවක් වෙතොත් අයදුම්කරුවන් හට පොලිස් ආධුනිකයින් බඳවා ගැනීමේ කොට්ඨාසයේ 071 – 859 19 25, 011 – 250 52 02 සහ 011 255 29 53 යන දුරකථන අංක මගින් වැඩිදුර විස්තර දැනගැනීමේ හැකියාව පවතියි.
අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබූ මෝටර් රථ ප්රවාහන කොමසාරිස් ජනරාල් කමල් අමරසිංහ මහතා මාර්තු 30 වැනිදා දක්වා රක්ෂිත බන්ධනාගාරගත කර තිබේ.
ඒ ඔහුව අද (28) පස්වරුවේ කුරුණෑගල, පිලැස්ස මහේස්ත්රාත් අධිකරණයට ඉදිරිපත් කිරීමෙන් අනතුරුවය.
නීති විරෝධීව එකලස් කරන ලද කැබ් රථයක් සම්බන්ධයෙන් ලද තොරතුරකට අනුව වලාන මධ්යම දූෂණ මර්දන ප්රහාරක ඒකකය විමර්ශනයක් ආරම්භ කළේය.
අනතුරුව ඒ පිළිබඳව වැඩිදුර විමර්ශන අපරාධ පරීක්ෂණ දෙපාර්තමේන්තුව විසින් ආරම්භ කරනු ලැබීය.
එහිදී අනාවරණ වී තිබුණේ නීති විරෝධීව එකලස් කිරීම සඳහා කැබ් රථයක ලියාපදිංචි චැසි අංකය වෙනස් කිරීමට අදාළ ලේඛන ඉදිරිපත් කර ”බර සහතික” ලබාගෙන ඇති බවය.
අනතුරුව එම ලේඛන මගින් අදාළ කැබ් රථයට E කාණ්ඩයේ අංකයක් ලබාගැනීම සහ චැසි සංශෝධනයට ඉදිරිපත් කර තිබූ චැසි සංශෝධන ගොණුව නීති විරෝධීව නීති විරෝධී ලෙස සඟවා තබා අසත්ය ප්රකාශ ලබා දෙමින් අදාළ රථය ව්යාජ ලෙස එකලස් කිරීමට මෝටර් රථ ප්රවාහන කොමසාරිස් ජනරාල් කමල් අමරසිංහ මහතා ආධාර අනුබලදී ඇති බවට චෝදනා එල්ල වේ.
ඒ අනුව සැකකරු ඊයේ (27) පස්වරුවේ අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් විසින් අත්අඩංගුවට ගනුලැබීය.
ඒ, කොළඹ 07, හෙක්ටර් කොබ්බෑකඩුව මාවතේදීය.
මේ අතර අදාළ සැකකරු සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාවද විමර්ශනයක් ආරම්භ කර තිබේ.
බිස්කට්, අයිස් ක්රීම්, චොක්ලට් ඇතුළු රස කැවිලි නිෂ්පාදන මිල එළැඹෙන මැයි මාසය දක්වා වැඩි නොකරන බව ලංකා රස කැවිලි හිමියන්ගේ සංගමය පවසයි.
ඊයේ (26) එම සංගමයේ නියෝජිතයින් වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතා සමග පැවැති සාකච්ඡාවකදී මේ බව පැවසීය.
මැද පෙරදිග කලාපීය යුධ ගැටුම් හමුවේ වර්තමානයේ රටේ උද්ගතව ඇති තත්ත්වයන් තුළ බිස්කට් ඇතුළු රස කැවිලි නිෂ්පාදන කර්මාන්තයට ඇතිකර තිබෙන බලපෑම් සහ එය කළමනාකරණයට එම කර්මාන්තකරුවන් ගන්නා තීරණ පාරිභෝගිකයාට බලපාන ආකාරය සම්බන්ධව සාකච්ඡා කිරීමට වෙළෙඳ අමාත්යවරයා විසින් මෙම හමුව කැඳවා තිබුණි.
එහිදී අදහස් දක්වමින් අමාත්යවරයා පැවසුවේ පාරිභෝගික භාණ්ඩ මිල ඉහළ යාම මේ මොහොතේ පාරිභෝගිකයාට දරා ගත නොහැකි බවත් ගෝලීය තත්ත්වය විසින් ඇති කර තිබෙන බලපෑම තුළ මෙරට බිස්කට් කර්මාන්තයේ නිරත පිරිස් රැකගනිමින් පාරිභෝගිකයා ද පීඩාවට පත්වීම අවම වන ලෙස කළමනාකරණය කර ගැනීමේ අපේක්ෂාව බවද සඳහන් කළේය.
ඒ අනුව අදහස් දක්වමින් රස කැවිලි හිමිකරුවන්ගේ සංගමයේ සභාපති එස්.එම්.ඩී සූරියකුමාර මහතා පැවසුවේ පසුගිය කාලය පුරාවටම රසකැවිලි අමුද්රව්ය මිල වැඩි වූ නමුත් කොවිඩ් කාලයෙන් පසුවද රස කැවිලි නිෂ්පාදන මිල වැඩි කිරීමක් සිදු නොකළ බවය.
නමුත් සීමා සහිත ලාභ සමගින් මෙම කර්මාන්තය පවත්වාගෙන යන බවත් මාර්තු, අප්රේල්, නොවැම්බර් සහ දෙසැම්බර් යන කාල සීමාවන් යනු රසකැවිලි කර්මාන්තයට වඩා හොඳ කාල සීමාවක් බවද පැවසීය.
ඒ අනුව මේ වන විටත් අලුත් අවුරුදු කාලසීමාව සඳහා රස කැවිලි නිෂ්පාදන බෙදා හරිමින් තිබෙන බවත් පැවසූ ඒ මහතා පැවසුවේ කුමන අර්බුද පැමිණියද අලුත් අවුරුදු කාල සීමාව අවසන් වන තෙක් නිෂ්පාදනයක් හී මිල වැඩි කිරීමක් සිදු නොකිරීමට තීරණය කළ බවත් ඒ මහතා සඳහන් කළේය.
කෙසේ නමුත් මැයි මාසයෙන් පසුව තවදුරටත් ගෑස්, විදුලිය සහ අමුද්රව්ය මිල ඉහළ ගියහොත් පමණක් යම් මිල සංශෝධනයකට යොමුවීමට සිදුවන බවත් පැවසූ ඒ මහතා පැවසුවේ එතෙක් කිසිදු මිල වැඩි කිරීමක් සිදු කිරීමට අපේක්ෂාවක් නොමැති බවද පැවසුවේය.
අමුද්රව්ය රේගුවෙන් නිදහස් කර ගැනීමේදී විශාල ප්රමාදයක් සිදුවන බවත් දැනටමත් නැව්ගත කිරීම් ගාස්ත ලෙස අතිරේක ගාස්තුවක් අයකරන බවට දැනුම්දී ඇති බවත් පෙන්වා දුන් ඒ මහතා වැඩිදුරටත් පැවසුවේ රස කැවිලි නිෂ්පාදන බෙදා හැරීම සඳහා ප්රමාණවත් ඉන්ධන සැපයීමට සුදුසු ක්රමවේදයක් සකසා දෙන ලෙසත් දැනට හඳුන්වාදී ඇති ක්රමවේදයේ ගැටලු විසඳා දෙන ලෙස අමාත්යවරයාගෙන් මෙහිදී ඉල්ලා සිටි බවත්ය.
