නව මහාධිකරණ විනිසුරුවරයකු ලෙස එස්. සතීස්තරන් මහතා පත් කර තිබේ.
ඊට අදාළ පත්වීම් ලිපිය ජනාධිපති අනුර කුමාර දිසානායක මහතා විසින් අද (13) පෙරවරුවේ ජනාධිපති කාර්යාලයේදී එස්. සතීස්තරන් මහතා වෙත භාර දෙන ලදී.
අධිකරණ සේවයේ විශේෂ ශ්රේණියේ නිලධාරියකු වන එස්. සතීස්තරන් මහතා, චාවක්කච්චේරී දිසා විනිසුරුවරයෙකු ලෙස ද කටයුතු කළේය.
විදුලි වෘත්තීය සමිති අද (13) දහවල් ජනාධිපති අනුර කුමාර දිසානායක මහතා හමුවී සිය ගැටලු පිළිබඳ සාකච්ඡා පවත්වා ඇති අතර, එම සාකච්ඡා සාර්ථක බව ඔවුන් පවසයි.
ජනාධිපතිවරයා සිය ගැටලුවලට සාධාරණය ඉටුකරනු ඇතැයි බලාපොරොත්තු විය හැකි බවත් විදුලි වෘත්තීය සමිති සඳහන් කරයි.
ආණ්ඩුව පරාජය කිරීමේ කිසිදු අවශ්යතාවයක් තම සමිතිවලට නොමැති බවත් විදුලි වෘත්තීය සමිති සාමාජීකයින් මෙහිදී අවධාරණය කළේය.
නව සමාගම්වල සභාපතිවරුන් සහ අධ්යක්ෂ මණ්ඩලය සමඟ ජනාධිපතිවරයා අද සවස විශේෂ සාකච්ඡාවක් පවත්වන බවත් එහිදී විදුලිබල වෘත්තීය සමිතිවල ගැටලූන්ට විසඳුම් ලබාදීමට ජනාධිපතිවරයා මෙහිදී එකඟත්වය පළ කර බවත් වෘත්තීය සමිති සාමාජිකයින් පැවසීය.
නව සමාගම්වලට බාහිරින් බඳවා ගැනීමට නියමිත විදුලි අධිකාරී සහ විදුලි ඉංජිනේරු පත්වීම් වහාම නැවැත්වීමට ජනාධිපතිවරයා නියෝග කළ බවද විදුලිබල වෘත්තීය සමිති වැඩිදුරටත් සඳහන් කළේය.
අල්ලස් හා දූෂණ චෝදනා විමර්ශන කොමිෂන් සභාවේ නිලධාරීන්ගේ සහ කාර්ය මණ්ඩලයේ වැටුප් සම්බන්ධ යෝජනාවට රජයේ මුදල් පිළිබඳ කාරක සභාවේ අනුමැතිය හිමිව තිබේ.
ඒ, එම සභාව පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතීත්වයෙන් පසුගිය 10 වෙනිදා පාර්ලිමේන්තුවේදී රැස්වූ අවස්ථාවේදීය.
මෙහිදී අදහස් දැක්වූ අල්ලස් හා දූෂණ චෝදනා විමර්ශන කොමිෂන් සභාවේ අධ්යක්ෂ ජනරාල් රංග දිසානායක මහතා ප්රකාශ කළේ, 2023 වසරේදී සම්මත වූ දූෂණ විරෝධී පනත අනුව අල්ලස් හා දූෂණ චෝදනා විමර්ශන කොමිෂන් කොමිෂන් සභාව නව ආයතනයක් ලෙස ක්රියාත්මක වන බවය.
කොමිෂන් සභාවට අවශ්ය නිලධරයන් හා සේවකයන් කොමිෂන් සභාව විසින් පත් කර ගත යුතු බවත් ඔවුන්ගේ පාරිශ්රමික සහ සේවා කොන්දේසි මුදල් අමාත්යවරයාගේ එකඟතාව සහිතව පාර්ලිමේන්තුවේ අනුමතිය මත තීරණය කළ යුතු බවට විධිවිධාන සලසා ඇති බවත් ඔහු පෙන්වා දුන්නේය.
එසේම 2023 අංක 03 දරන දූෂණ විරෝධී පනත සම්මත වීමෙන් අනතුරුව මෙම කටයුතු වසර දෙකක් දක්වා ප්රමාදවීම පිළිබඳව කනගාටු වන බවත් ඒ මහතා එහිදී සඳහන් කළේය.
අල්ලස් හා දූෂණ චෝදනා විමර්ශන කොමිෂන් සභාවේ සේවක සංඛ්යාව සඳහා අවශ්ය තනතුරු 971 සහ විශේෂ දීමනා ඇතුළුව ඔවුන්ගේ වැටුප් ව්යුහයන් කළමනාකරණ සේවා දෙපාර්තමේන්තුව හරහා මුදල් අමාත්යාංශය විසින් අනුමත කර තිබිණි.
කොමිෂන් සභාවට අනුයුක්ත නීති නිලධාරීන්ට, නීතිපති දෙපාර්තමේන්තුවට අනුයුක්ත නීති නිලධාරීන්ට සාපේක්ෂව අඩු වැටුපක් යෝජනා කර තිබීම පිළිබඳව කාරක සභාවේ අවධානය යොමුවිය.
කෙසේ වෙතත් තවදුරටත් ප්රමාදයන් වළක්වා ගෙන බඳවා ගැනීමේ ක්රියාවලිය ඉදිරියට ගෙන යාමේ අවශ්යතාව මත මේ සඳහා කාරක සභාවේ අනුමතිය හිමිවිය.
මෙම ආයතනය ශක්තිමත් ආයතනයක් ලෙස ඉදිරියට ගෙන යාම සඳහා ඉදිරියේදී හෝ නිසි වැටුප් තලවල පිහිටුවීමේ අවශ්යතාව කාරක සභාව විසින් අවධාරණය කරන ලදී.
අල්ලස් හා දූෂණ චෝදනා විමර්ෂණ කොමිෂන් සභාවේ සභාපතිවරයා ඇතුළු කොමසාරිස්වරුන්ගේ සහ අධ්යක්ෂ ජනරාල්වරයාගේ වැටුප්තල සම්බන්ධයෙන් යෝජනාව ඉදිරියේදී ගෙන ඒමට නියමිත බවත්, එහිදී රජයේ මුදල් පිළිබඳ කාරක සභාව විසින් මීට පෙර නිර්දේශ කරන ලද පරිදි, ඔවුන්ගේ වැටුප්තල අභියාචනාධිකරණ විනිසුරුවරුන්ගේ වැටුප් තල හා අනුකූල වනු ඇතැයි අපේක්ෂා කරන බවත් කාරක සභාව විසින් සඳහන් කරන ලදී.
කොමිෂන් සභාව ඉතා සංවේදී කාර්යක් ඉටු කිරීමත්, වෙනත් කිසිදු පෞද්ගලික ඉපයීමක් හෝ උපදේශනයක් භාර ගැනීමට නොහැකි වීමත්, ලැබැඳියාවන් අතර ගැටුම් ඇති වීමටත් ඇති හැකියාව නිසා කොමිසමේ කාර්ය මණ්ඩලය, කොමසාරිස්වරුන් සහ අධ්යක්ෂ ජනරාල්වරයාට රාජ්ය අංශයේ වැටුපට සාපේක්ෂව ඉහළ වැටුපක් ගෙවීම සාධාරණ බව කාරක සභාව විසින් පෙන්වා දෙන ලදී.
මෙම කොමිෂන් සභාව කොළඹ පමණක් කේන්ද්ර කරගනිමින් ක්රියාත්මක කිරීමට සිදුවීම ගැටලුවක් බව කොමිෂන් සභාවේ අධ්යක්ෂ ජනරාල්වරයා පැවසීය.
රට පුරා විමර්ශන සහ වැටලීම් කොළඹ සිට සිදු කළ යුතු වීමත් සාක්ෂිකරුවන් සාක්ෂි සැපයීම සඳහා කොළඹට ගෙන්වීමට සිදුවීම ගැටලුවක් බවත් ඔහු පෙන්වා දුන්නේය.
මේ හේතුවෙන් ඉදිරියේදී දිස්ත්රික්ක මට්ටමින් කාර්යාල පිහිටුවීමේ අපේක්ෂාව ඇති බවත් පළමුව අවම වශයෙන් පළාත් කාර්යාල 9 ක් පිහිටුවීමට අදහස් කරන බවත් ඒ අල්ලස් හා දූෂණ චෝදනා විමර්ශන කොමිෂන් සභාවේ අධ්යක්ෂ ජනරාල් රංග දිසානායක මහතා වැඩිදුරටත් සඳහන් කළේය.
වෛද්යවරුන්ගේ සහ සමස්ත සෞඛ්ය පද්ධතියේ දත්ත ඇතුළත් සෞඛ්ය අමාත්යංශයේ වෙබ් අඩවියට අනවසර ඇතුළුවීමක් සිදුවි ඇති බවට සැකයක් පවතින බව රජයේ වෛද්ය නිලධාරීන්ගේ සංගමය පවසයි.
මේ වනවිට සෞඛ්ය අමාත්යංශයේ වෙබ් අඩවියේ විශේෂඥ වෛද්යවරුන්ට අදාළව සේවා ව්යවස්ථාවක් (Service Minutes) ස්ථාපිත කිරීමට සම්බන්ධ යැයි පවසමින් ලිපියක් ඇතුළත් කර ඇති අයුරු දක්නට ලැබෙන බව එම සංගමය සඳහන් කරයි.
මෙම ලිපිය රාජ්ය ආයතනයක් මඟින් නිකුත් කරන නිල ලේඛනයක් යැයි බැලු බැල්මට නොපෙනෙන අතර ලිපි ශිර්ෂයක් නොමැතිව, දිනයක් නොමැතිව, යොමු කරන ලද පාර්ශ්වයක් හෝ පාර්ශ්වයන් නොමැතිව, සම්බන්ධීකරණ නිලධාරියෙක් සඳහන් කර නොමැතිව සකස් කර ඇති අවිධිමත් ලේඛනයක් පමණක් බව නිරික්ෂණය වෙන බවද රජයේ වෛද්ය නිලධාරීන්ගේ සංගමය පවසයි.
ඒ අනුව සෞඛ්ය අමාත්යංශයේ වෙබ් අඩවියේ ඇති මෙම ලිපියේ නිත්යානුකූලභාවය සහ නිලභාවය පිළිබඳව අවිනිශ්චිත තත්ත්වයක් මතුවී ඇති බව එම සංගමය පෙන්වා දෙයි.
මේ පිළිබඳ පැහැදිලි කරගැනිම සඳහා අදාළ ලේඛනයේ කැඳවුම්කරු ලෙස සඳහන් කර ඇති සෞඛ්ය අමාත්යංශයේ නියෝජ්ය අධ්යක්ෂ ජනරාල්වරයා සමග සන්නිවේදනය කිරීමට කිහිප වතාවක් උත්සාහ කළද ඔහුවද සම්බන්ධ කරගත නොහැකි තත්ත්වයක් මතු වී ඇති බවත් රජයේ වෛද්ය නිලධාරීන්ගේ සංගමය සඳහන් කරයි.
රජයේ වෛද්ය නිලධාරීන්ගේ සංගමය නිකුත් කළ නිවේදනයේ දැක්වෙන්නේ,
“මීට ඉහතදීත් සෞඛ්ය අමාත්යංශයේ දත්ත පද්ධතීන්ට අනවසර ඇතුල්වීම් නිසා සිදුවූ ගැටලු රාශියක් පිළිබඳව අප දැනුවත්ය. එම නිසා මෙසේ වගකීම් විරහිත ලෙස සහ අවිධිමත් ලෙස පළවීමක් සිදුවීම රජය සහ සෞඛ්ය අමාත්යංශය අපහසුතාවයට පත් කිරීමට කළ උත්සාහයක් ද යන්න සෞඛ්ය අමාත්යංශය විසින් විමර්ශනයක් කළ යුතු අතර, රජයේ වෛද්ය නිලධාරීන්ගේ සංගමය විසින් ද එය සෞඛ්ය අමාත්යංශ ලේකම්තුමා වෙත ලිඛිතව දන්වා ඇත.” යනුවෙනි.
සහල්වලින් අතුරු නිෂ්පාදන සිදු කිරීමට පනවා ඇති සීමාවන් ඉදිරියේදී ලිහිල් කිරීමට අවධානය යොමු කර ඇති බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතා පවසයි.
අමාත්යවරයා මේ බව ප්රකාශ කළේ, මහවැලි ජල කලමනාකරණ කමිටුව අද (13) රැස්වූ අවස්ථාවේදීය.
මෙරට බඩඉරිඟු අවශ්යතාවයෙන් සියයට 50ක් පමණක් රට තුළ නිෂ්පාදනය කර බවත් සෙසු තොග ආනයනය කරන බවත් අමාත්යවරයා පෙන්වා දෙයි.
කෙසේවෙතත් මෙරට තුළ බඩඉරිඟු නිෂ්පාදන ඉහළ දැමීමට ප්රමාණවත් වගා බිම් නොමැතිවීම හේතුවෙන් සහල් නිෂ්පාදනය වැඩි කිරීමට කටයුතු කළ යුතු බව කේ.ඩී. ලාල්කාන්ත මහතා අවධාරණය කළේය.
මේ සඳහා කුඹුරු ඉඩම් වැඩි කිරීමට අපේක්ෂා නොකරන බවත් කෘෂිකර්ම දෙපාර්තමේන්තුවේ ක්රමවේදයට අනුව වගා කටයුතුවල නිරත වන ලෙසත් ඒ මහතා එහිදී ගොවීන්ගේ ඉල්ලා සිටියේය.
“වී ටික එකපාර වෙළඳපොළට එනවා වෙනුවට සතියක් දෙකක් තියාගන්න පුළුවන් වෙන තත්ත්වයට ගොවිජනතාව අරන් එන එක අපේ ඉලක්කයක්. වී වේලීම සහ ගබඩා කිරීමට අපිට ක්රමයක් සකස් කරගන්නම වෙනවා. ගොවියාගේ කාර්යය ගොයම් කපලා දුන්නම අවසන් වෙනවා. එතනට තව කෑලි දෙකක් එකතු වෙන්න ඕනේ. වී වේලීම සහ ගබඩා කිරීම කියන කෑලි දෙකත් එතනට එකතු වෙන්න ඕනේ. ඒ සඳහා අපි වැඩසටහනකට යමින් ඉන්නේ.
අපිට තියෙනවා ප්රධාන කාරණා දෙකක්. එකක් ගොවිජනතාවගේ ජීවිතය නඟා සිටුවන එක. අනික ආහාර සුරක්ෂිතතාවය. සාධාරණ ලාභයක් ගොවියාට දෙන්නේ නැත්නම් ගොවිතැන කරන්න බැහැ. අපි වී මිල ගැසට් කරලා නීතියක් කරලා නැහැ. අපේ අරමුණ පෞද්ගලික අංශය වී අඩුවට ගන්න එක වැළැක්වීම. වී අලෙවි මණ්ඩලයේ මැදිහත්වීම මදි කියන කාරණය අපි පිළිගන්නවා. ගබඩා ප්රශ්න, කාර්ය මණ්ඩල ප්රශ්න තියෙනවා.
අපි බය වුණා දිට්වා එක්ක කෘෂිකර්මාන්තය ගොඩගන්න යම් කාලයක් යයි ද කියලා. නමුත් අපි වන්දි ගෙවලා නැවත වගා කරන්න පටන්ගත්තා. ඒකට අපි ගොවි මහතුන්ට ස්තූතිවන්ත වෙන්න ඕනේ. ඒවගේම ගොවීන් එක්ක වැඩ කරන රාජ්ය නිලධාරීන්ටත් ස්තූතිවන්ත වෙන්න ඕනේ. අපිට කීරි සම්බා පිටරටින් ගේන්න වෙනවා. ඒ නිසා අපි ගොවීන්ගෙන් ඉල්ලනවා කීරි සම්බා වැඩියෙන් වගාකරන්න.”
මත්ද්රව්ය සහ ආයුධ සමග අත්අඩංගුවට ගත් ධීවර යාත්රා දෙකේ සිටි සැකකරුවන් 10 දෙනා සම්බන්ධයෙන් රැඳවුම් නියෝග ලබාගැනීමට නියමිත බව පොලිසිය පවසයි.
ශ්රී ලංකා නාවික හමුදාව විසින් දිවයිනට දකුණු දෙසින් වූ මුහුදේ දී මෙම බහුදින ධීවර යාත්රා දෙක සිය භාරයට ගත් අතර එහි තිබී මත්ද්රව්ය කිලෝග්රෑම් 654ක් සොයාගැනුණි.
ඒ අනුව නාවික හමුදාව විසින් පොලිස් මත්ද්රව්ය කාර්යංශය වෙත මත්ද්රව්ය හා ගිනිඅවි සමග අදාළ සැකකරුවන් 10 දෙනා භාරදී තිබේ.
නාවික හමුදාව මගින් ගැඹුරු මුහුදේ දී මත්ද්රව්ය හා ගිනි අවි සමඟ සැකකරුවන් 05 දෙනෙකු ගමන් කරමින් තිබු ධීවර යාත්රාවක් හා ඊට සමගාමීව සැකකරුවන් 05 දෙනෙකු ගමන් කරමින් තිබූ ධීවර යාත්රාවක් සිය භාරයට ගෙන ඊයේ (12) දික්ඕවිට ධීවර වරායට රැගෙන ආවේය.
සිද්ධිය සම්බන්ධයෙන් වැඩිදුර විමර්ශන සිදුකරන පොලිස් මත්ද්රව්ය කාර්යංශයේ නිලධාරීන් සඳහන් කළේ සැකකරුවන් අවුරුදු 22 ත් 49ත් අතර වයස්වල පසුවන ඉරණවිල, මහවැව, මැල්සිරිපුර, වෙන්නප්පුව, මීගමුව, නාකුළුගම, තංගල්ල, නෙටොල්පිටිය හා ගන්දර ප්රදේශවල පදිංචිකරුවන් බවය.
ඒ අනුව විමර්ශන නිලධාරීන් වැඩිදුරටත් සඳහන් කළේ, අත්අඩංගුවට ගන්නා ලද සැකකරුවන් හෙරොයින් කිලෝග්රෑම් 176 ග්රෑම් 568ක්, අයිස් මත්ද්රව්ය කිලෝග්රෑම් 478 ග්රෑම් 326ක් සන්තකයේ තබාගැනීම, ආනයනය හා ජාවාරම් කිරීම පිස්තෝල අවි 8ක්, මැගසින් 15ක්, ටී56 අවි 2ක්, M16 වර්ගයේ ගිනි අවියක් හා එම මැගසින් 04ක් ආනයනය කිරීම හා සන්තකයේ තබාගැනීම, එම වැරදි සඳහා ආධාර අනුබල දීම සම්බන්ධයෙන් කොළඹ ප්රධාන මහේස්ත්රාත් අධිකරණයට ඉදිරිපත් කිරීමෙන් පසු රැඳවුම් නියෝග ලබා ගැනීමට නියමිත බවය.
ඝාතනයට ලක්වූ අපරාධ කල්ලි නායකයෙකු වන ගනේමුල්ල සංජීවගේ සමීපතමයෙකු වන දැනට විදෙස්ගතව සැඟව සිටින මනෝජ් සුරංග නොහොත් බටුවත්ත චාමර යන අයගේ බිරිඳගේ නමින් මිලදී ගෙන ඇති ජා ඇළ වැලිගම්පිටියේ රුපියල් ලක්ෂ 400ක වටිනාකමකින් යුත් තෙමහල් නිවසක් දින 7ක කාලයක් සඳහා තහනම් කිරීමට නීතිවිරෝධී වත්කම් විමර්ශන කොට්ඨාසය අද (13) පියවර ගෙන තිබේ.
ඒ බටුවත්ත චාමර නමැත්තා මත්ද්රව්ය ජාවාරම් කිරීමෙන් උපයාගත් මුදලින් මෙම නිවස මිලදීගෙන ඇති බවට සාධාරණව විශ්වාස කිරීමට තරම් කරුණු අනාවරණ වීම හේතුවෙනි.
මෙම නිවස වෙනත් පිරිසක් මීට මාස දෙකකට පමණ පෙර කුලී පදනම මත ගෙන වැඩිහිටි නිවාසයක් පවත්වාගෙන ගොස් තිබූ අතර එහි සිටි වැඩිහියන් 9දෙනෙකු හා සාත්තු සේවිකාවන් 4දෙනෙකු අද ඉන් පිටව ගියහ.
බටුවත්ත චාමර යන අයගේ බිරිඳ වන චතුරිකා වීරසූරිය මීට පෙර මෙම නිවසේ පදිංචිව සිට ඇති අතර අවස්ථා 3කදි මෙම නිවස ඉලක්ක කරගනිමින් වෙඩි තැබීම් ද සිදුවී තිබේ.
අවසන්වරට පසුගිය 7 වැනිදා ද මෙම නිවසට යතුරුපැදියකින් පැමිණි පුද්ගලයින් දෙදෙනෙකු විසින් වෙඩි තබා පලා ගිය බව පොලීසිය සඳහන් කරයි.
නීතිවිරෝධී වත්කම් විමර්ශන කොට්ඨාසය සඳහන් කළේ මෙම දේපළ සම්බන්ධයෙන් මහාධිකරණය වෙත කරුණු වාර්තා කර තහනම් කිරීමේ නියෝගය දීර්ඝ කිරීමට කටයුතු කරන බවය.
විපක්ෂයේ දේශපාලන නියෝජිතයින්ගෙන් සැදුම්ලත් ‘මහජන හඬ’ සංවිධානයේ නියෝජිතයින් පිරිසක් අද (13) සර්වජන බලය නායක පාර්ලිමේන්තු මන්ත්රී දිලිත් ජයවීර මහතා හමුවිය.
ඒ, සර්වජන බලය ප්රධාන කාර්යාලයේදීය.
රට තුළ අර්බුද රැසක් පැන නැගී ඇති කාලවකවානුවක විපක්ෂයේ නියෝජිතයින් එකට එක්වී වැඩ කිරීමේ අවශ්යතාව සම්බන්ධයෙන් මෙහිදී දීර්ඝ වශයෙන් සාකච්ඡා කර ඇත.
ඊට අමතරව බලශක්ති අර්බුදය, මැදපෙරදිග යුද්ධය ඇතුළු තවත් මාතෘකා රැසක් ඔස්සේ මෙම සාකච්ඡාව සිදුකර තිබේ.
අනන්යතාව රැකගනිමින් පොදු වැඩපිළිවෙළක් සඳහා විපක්ෂය එක්ව වැඩකිරීමේ අවශ්යතාව සනාථ කරමින් ලියවිල්ලක් මේ වනවිටත් සකස් කර ඇති බවත් ඉදිරියේදී සියලු පාර්ශ්වයන්ගේ අදහස් ලබාගැනීමෙන් අනතුරුව පොදු සම්මුතියක් සකස් කිරීමට බලාපොරොත්තුවන බවත් ඊට එක්වූ මහාචාර්ය ජී. එල්. පීරිස් මහතා පවසා තිබේ.
මහනුවර, මහියාව ප්රදේශයේ ජාත්යන්තර පාසලක අධ්යක්ෂ මණ්ඩල සාමාජිකයෙකුගේ වාහනයකට යටවීමෙන් එම පාසලේ හත් හැවිරිදි දරුවෙකු ජීවිතක්ෂයට පත්ව තිබේ.
අද (12) උදෑසන 11.30ට පමණ මෙම අනතුර සිදුව ඇත්තේ, අදාළ අධ්යක්ෂවරයා වාහනය නවතා ඉන් බැස යෑමෙන් අනතුරුව වාහනයේ තිරිංග දෝෂයක් හේතුවෙන් වාහනය එක්වරම ක්රියාත්මක වී ඇත.
එහිදී පාසලේ වතුර පානය කරමින් සිටි, පාසල් දරුවන් දෙදෙනෙකු වාහනයට යටවී ඇති අතර, එක් අයෙකු ජීවිතක්ෂයට පත්ව තිබේ.
තුවාල ලැබූ අනෙක් සිසුවා මේ වනවිට මහනුවර රෝහලේ ප්රතිකාර ලබමින් සිටී.
අනතුර සම්බන්ධයෙන් ප්රකාශයක් ලබාදෙමින් වාහනයේ හිමිකාර අධ්යක්ෂවරයා පවසා ඇත්තේ, තමා වාහනය නවතා ඉන් බැසයෑමෙන් අනතුරුව මෙම අනතුර සිදුව ඇති බවය.
විද්යා හා තාක්ෂණ අමාත්ය මහාචාර්ය ක්රිෂාන්ත අබේසේන මහතා තායිලන්තයේ බැංකොක් නුවර පසුගිය 10 වෙනිදා පැවැති විවෘත රාජ්ය හවුල්කාරිත්ව කලාපීය වටමේස සාකච්ඡාවට එක්විය.
ඒ, මෙරට තුළ විවෘත පාලනය, විනිවිදභාවය සහ වගවීම තහවුරු කිරීමේ අරමුණින්ය.
මෙම වටමේස සාකච්ඡාව සංවිධාන කර තිබුණේ, එක්සත් රාජධානියේ ප්රජාතන්ත්රවාදය සඳහා වූ වෙස්ට්මිනිස්ටර් පදනම (Westminster Foundation for Democracy – WFD) විසිනි.
මෙම සමුළුව සඳහා ශ්රී ලංකාව, ඉන්දුනීසියාව, මාලදිවයින සහ තායිලන්තය යන රටවල ජ්යෙෂ්ඨ ප්රතිපත්ති සම්පාදකයින් සහ නියෝජිතයින් සහභාගී වූහ.
ශ්රී ලංකාව මින් පෙර විවෘත රාජ්ය හවුල්කාරිත්ව (OGP) ක්රියාවලියෙන් අක්රීය වී තිබූ අතර, එය නැවත සක්රීය කිරීම සහ ඒ සඳහා වන ජාතික ක්රියාකාරී සැලැස්ම සකස් කිරීමේ මාර්ග සිතියම පිළිබඳව මෙහිදී දීර්ඝ වශයෙන් සාකච්ඡා විය.
කලාපීය අසල්වැසි රටවල් විවෘත පාලන ප්රතිසංස්කරණ ක්රියාත්මක කිරීමේදී ලබා ඇති සාර්ථකත්වයන් සහ අභියෝග පිළිබඳ අත්දැකීම් බෙදාහදා ගැනීම මෙහි ප්රධාන අරමුණක් වේ.
විවෘත පාලන ප්රතිසංස්කරණ සඳහා දේශපාලන නායකත්වයේ සහයෝගය ලබා ගැනීම සහ එම ප්රතිසංස්කරණ හුදෙක් ලේඛනවලට පමණක් සීමා නොවී ප්රායෝගිකව ජනතාව වෙත සමීප කරවන ආකාරය පිළිබඳව අවධානය යොමු කෙරිණි.
මෙම වටමේස සාකච්ඡාව සඳහා ශ්රී ලංකාව නියෝජනය කරමින් පාර්ලිමේන්තු මන්ත්රී ෂානක්කියන් රාසමණික්කම් මහතා, OGP ආසියා පැසිෆික් කලාපීය ප්රධානී ස්වාති මෙහෙතා සහ එක්සත් රාජධානියේ විදේශ, පොදුරාජ්ය මණ්ඩලීය සහ සංවර්ධන කාර්යාලයේ (FCDO) නියෝජිතයින් ද එක්ව සිටියහ.
