Latest News
ශ්රී ලංකා රජය සහ ඉන්දියානු රජය අතර අත්සන් කෙරුණු අවබෝධතා ගිවිසුම් 07 ක් බල රහිත කිරීමේ නියෝගයක් නිකුත් කරන ලෙස ඉල්ලා ගොනු කරන ලද මූලික අයිතිවාසිකම් පෙත්සම් දෙකක් විභාගයට නොගෙන නිෂ්ප්රභ කිරීමට ශ්රේෂ්ඨාධිකරණය තීන්දු කළේය.
දීර්ඝ කරුණු සලකා බැලීමකින් අනතුරුව අචල වෙංගප්පුලි සහ ප්රියන්ත ප්රනාන්දු යන මහත්වරුන්ගෙන් සමන්විත ශ්රේෂ්ඨාධිකරණ විනිසුරු මඩුල්ල විසින් මෙම නියෝගය නිකුත් කළේය.
දොස්තර ගුණදාස අමරසේකර ඇතුළු පිරිසක් සහ විනිවිද පෙරමුණ විසින් මෙම පෙත්සම් ඉදිරිපත් කර තිබුණි.
තම සගයෙකු අත්අඩංගුවට ගැනීම සම්බන්ධයෙන් සංවිධානාත්මක අපරාධ කල්ලි නායකයෙකු වන කෙහෙල්බද්දර පද්මේ නැමැත්තා බස්නාහිර උතුර අපරාධ කොට්ඨාසයේ ස්ථානාධිපති, ප්රධාන පොලිස් පරීක්ෂක ලින්ටන් සිල්වා මහතාට දුරකථනයෙන් මරණ තර්ජන එල්ල කර තිබේ.
ඊයේ (03) රාත්රී8.45ට පමණ කෙහෙල්බද්ද පද්මේ විසින් මෙම ඇමතුම ලබාදී තිබුණි.
කෙහෙල්බද්දර පද්මේගේ සමීපතමයෙක් වන 39 හැවිරිදි ගම්පහ දේවා නැමැත්තා ඊයේ (03) ගුවන්තොටුපොළ අපරාධ පරීක්ෂණ ඒකකය මඟින් අත්අඩංගුවට ගනු ලැබීය.
සැකකරු අවස්ථා කිහිපයකදී කෙහෙල්බද්දර පද්මේ නැමැත්තාව රුසියාවේදී හා තායිලන්තයේදී හමු වී ඇති අතර, මෙවරද ඔහු තායිලන්තයට යාමට සූදානම් වී ඇත්තේ පද්මේ හමුවීම සඳහා බවට පොලීසිය සැකපළ කළේය.
අදාළ සැකකරු මනුෂ්ය ඝාතන ඇතුළු අපරාධ රැසකට සම්බන්ධ බවට චෝදනා එල්ල වන අතර, ඔහු සම්බන්ධයෙන් වැඩිදුර විමර්ශන බස්නාහිර උතුර අපරාධ කොට්ඨාසය භාර සහකාර පොලිස් අධිකාරි රොහාන් ඕලුගල මහතා සහ ස්ථානාධිපති ලින්ටන් සිල්වා මහතාගේ ප්රධානත්වයෙන් සිදුකෙරෙමින් පවතී.
එවන් පසුබිමක දුරකථන ඇමතුමක් ලබාදෙමින් කෙහෙල්බද්දර පද්මේ කියා සිටියේ, “ඔයත් ප්ලේ කරන්නේ ගේම් එකක්…අපිත් ප්ලේ කරන්නේ ගේම් එකක්නේ. හරිවිදියට මේක කරන්න කියන්න. ඔබතුමාට ළමයෙක් ඉන්නවා නේද? කරන්න ඕන දේ ඔබතුමත් දන්නවා නේ. අපි කොහොමත් මරණ සහතිකය අතේ තියාගෙන ඉන්නේ අපි මැරෙන්න බය නෑ.” යනුවෙනි.
මෙහිදී ප්රධාන පොලිස් පරීක්ෂක ලින්ටන් සිල්වා මහතා පවසා සිටියේ, “මොකද්ද ළමයෙක් ගැන කියලා කියන්නේ. මොකද්ද කෙරෙන්න ඕනේ. අපිත් බය නෑ. තමුසේ හිතන්න එපා තමුසේගේ මරණ වරෙන්තුවට මම බය වෙයි කියලා. ලංකාවට ඇවිත් කතා කරමු අපි දෙන්නා. නීතිය තමා ක්රියාත්මක වෙන්නේ.” යනුවෙනි.
මුදල් විශුද්ධිකරණය වැළැක්වීමේ පනත යටතේ හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ ඔහුගේ මිත්තණිය වන ඩේසි ෆොරස්ට් යන අයට එරෙහිව ගොනුකර ඇති නඩුව ඔක්තෝබර් මස 29 වන දක්වා කල්තැබීමට කොළඹ මහාධිකරණය නියම කළේය.
මෙම නඩුව අද (04) කැඳවූ අවස්ථාවේදී විත්තිකරුවන් අධිකරණය හමුවේ පෙනී සිටියේය.
එහෙත් එම නඩුව විභාග කරන කොළඹ මහාධිකරණ විනිසුරු ප්රදීප් අබේරත්න මහතා අද දින රාජකාරි නිවාඩු ලබා සිටීම හේතුවෙන් එම නඩුව යළි ඔක්තෝබර් මස 29 වනදා කැඳවන ලෙස එම අධිකරණය විසින් නියම කරනු ලැබීය.
2009 වසරේ මාර්තු මස 31 වනදා සහ 2013 වසරේ දෙසැම්බර් මස 12 වන දා අතර කාලසීමාව තුළ නීතිවිරෝධී ලෙස උපයාගත් රුපියල් මිලියන 59කට අධික මුදලක් පෞද්ගලික බැංකු ගිණුම් තුනක ස්ථාවර තැන්පතු ගිණුම්වල තැන්පත් කිරීම තුළින් මුදල් විශුද්ධිකරණය වැළැක්වීමේ පනත යටතේ වරදක් සිදුකළේ යයි චෝදනා කරමින් නීතිපතිවරයා විසින් මෙම විත්තිකරුවන්ට එරෙහිව චෝදනා තුනක් යටතේ මෙම නඩුව ගොනුකර තිබුණි.
ජාතික තරුණ සේවා සභාවේ ශ්රී ලංකා යෞවන සමාජ සම්මේලන කළුතර දිස්ත්රික් සම්මේලනය අද(03) කළුතර දිස්ත්රික් ලේකම් කාර්යාල ශ්රවණාගාරයේදී පැවැත්විණි.
තරුණ සමුළුව ආරම්භ කිරීමට ප්රථම බේරුවල යොවුන් බලමණ්ඩලයේ හිටපු උප සභාපතිවරයා පූර්ණ සච්චදිත් අලහකෝන් මාධ්යයට අදහස් පල කරමින් සිටියදී ජාතික ජන බලවේගයේ පිරිසක් එයට බාධා කරමින් අදහස් පල කිරීමත් සමග උණුසුම්කාරී තත්ත්වයක් ඇති විය
එම උණුසුම්කාරී තත්ත්වයත් සමඟ හිටපු උප සභාපතිවරයා කළුතර දකුණ පොලිසිය මගින් අත්අඩංගුවට ගන්නා ලදී.
ඉදිරි 2025-2026 වසර සඳහා නව දිස්ත්රික් නිලධාරී මණ්ඩලය සභාපති කවිදු පියුමාල් -මදුරාවල
භාණ්ඩාගාරික විකුම් වින්දීප කළුතර, සංවිධායක දිනූ බිම්සර බේරුවල, උප සභාපති විශ්ව තරංග මතුගම, පත්විය. මෙම පත්වීම් සියල්ල මාධ්යට ආවරණය කිරීමට අවස්ථාව ලබා නොතිබිණි.
මෙම අවස්ථාවට දිස්ත්රික් ලේකම් එස්.තිරිමාන්න මහතා ඇතුළු ජාතික තරුණ සේවා සභාවේ අධ්යක්ෂ මණ්ඩල නිලධාරීන් හා දිස්ත්රික් නිලධාරීන්ගේ සහභාගිත්වයෙන් youth club යෞවන සමාජය දිස්ත්රික් සම්මේලනය හා නිල වර්ණය පැවැත්විය.
2025 වර්ෂයට අදාළව ප්රමාද වූ වත්කම් සහ බැරකම් ප්රකාශ ලබා දිය යුතු නිලධාරීන් විසින් එකී ප්රකාශ ලබා නොදෙන්නේ නම් ඔවුන්ට විරුද්ධව නඩු පැවරීමට කටයුතු කරන බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.
නිවේදනයක් නිකුත් කරමින් එම කොමිෂන් සභාව පැවසුවේ පසුගිය මාර්තු 31 වැනි දිනට වත්කම් සහ බැරකම් ප්රකාශ ලබා දිය යුතු නිලධාරීන් විසින් අදාළ වත්කම් සහ බැරකම් ප්රකාශ අල්ලස් හෝ දූෂණ චෝදනා විමර්ෂන සභාවට භාර දීම සඳහා ආයතන ප්රධානියා වෙත භාරදිය යුතු අවසාන දිනය පසුගිය ජුනි මස 30 වැනි දින වන බවය.
කෙසේ නමුත් මේ මස 31 දින වන විටත් වත්කම් සහ බැරකම් ප්රකාශ ආයතන ප්රධානියා වෙත භාර දීමට අපොහොසත් වන නිලධාරීන් හට 2023 අංක 09 දරන දූෂණ විරෝධී පනතේ 90 වැනි වගන්තිය ප්රකාරව නඩු පැවරීමට කටයුතු කරන බව එම කොමිෂන් සභාව පවසයි.
2025.06.30 දින සිට 2025.08.31 දින දක්වා භාරදෙනු ලබන ප්රමාද වූ වත්කම් සහ බැරකම් ප්රකාශ සම්බන්ධයෙන් පනතේ ප්රතිපාදන ප්රකාරව දඩ අය කිරීමක් සිදුකරන බවත් ඒ අනුව මෙතෙක් තම වත්කම් සහ බැරකම් ප්රකාශ භාර නොදුන් නිලධාරීන් සිටී නම් හැකි ඉක්මනින් එම ප්රකාශ තම ආයතන ප්රධානියාට භාරදී තමන්ට නියම විය හැකි පරිපාලන දඩ මුදල අවම කර ගැනීමට කටයුතු කරන ලෙසද එම කොමිසම නිවේදනය කර තිබේ.
එමෙන්ම තවදුරටත් ජුනි පස 30 දිනට පසුව ඉදිරිපත් කරන වත්කම් සහ බැරකම් ප්රකාශ ආයතන ප්රධානී විසින් භාරගත යුතු බවත් යම් හෙයකින් ආයතන ප්රධානීන් විසින් එසේ භාර ගැනීම ප්රතික්ෂේප කරන්නේ නම් ඒ පිළිබඳව අල්ලස් හෝ දූෂණ චෝදනා විමර්ශන කොමිෂන් සභාව වෙත දන්වා සිටින ලෙසත් එම කොමිෂන් සභාව සිය නිවේදනයේ සඳහන් කර ඇත.
ශ්රී ලාංකේය ආර්ථික සංවර්ධනයේ සුවිශේෂී සන්ධිස්ථානයක් සනිටුහන් කරන City of Dreams Sri Lanka සමාරම්භක අවස්ථාව සඳහා පසුගියදා ජනාධිපති අනුර කුමාර දිසානායක මහතා සහභාගී විය.
මෙම අති උත්කර්ෂවත් අවස්ථාව සඳහා ජෝන් කීල්ස් සමූහයේ සභාපති ක්රිශාන් බාලේන්ද්ර, Melco Resorts & Entertainment හි සභාපති සහ ප්රධාන විධායක නිලධාරී ලෝරන්ස් හෝ යන මහත්වරුන්, දෙපාර්ශවය නියෝජනය කරමින් ජ්යෙෂ්ඨ විධායක නිළධාරීන්, වත්මන් හා හිටපු රජයේ නිලධාරීන් මෙන්ම ව්යාපාරික නායකයින් ඇතුළුව දෙස් විදෙස් සම්භාවනීය අමුත්තන් රැසක් සහභාගී විය.
මේ අතර අගෝස්තු 2 වන දින රාත්රිය නිමාවට පත් වූයේ සුපිරි ඉන්දීය නළු රිතික් රෝෂන්ගේ රංගනයෙන් වර්ණවත් කරමින් මෙරට සුවහසක් ජනතාවට අද්විතීය මෙන්ම අමතක නොවන ජාත්යන්තර තලයේ විනෝදාස්වාද අත්දැකීමක් ද ලබා දෙමිනි.
ඇමරිකානු ඩොලර් බිලියන 1.2 කට අධික වටිනාකමින් යුතු මෙම සුවිශේෂී ව්යාපෘතිය දකුණු ආසියාවේ පළමු පූර්ණ ඒකාබද්ධ සංචාරක හෝටල් සංකීර්ණය මෙන්ම පෞද්ගලික අංශය විසින් සිදු කරනු ලබන විශාලතම ආයෝජනය ලෙස සැලකෙයි. ශ්රී ලංකා ආර්ථිකයේ හදවත බඳු කොළඹ නගර මධ්යයේ පිහිටා ඇති City of Dreams Sri Lanka මගින් ශ්රී ලංකාව ගෝලීය සංචාරක සිතියමේ කේන්ද්රස්ථානයක් බවට පත් කිරීමට අරමුණු කරයි.
City of Dreams Sri Lanka, Cinnamon Life හි කාමර 687 ක් සහ Nüwa සන්නාමය යටතේ අධි සුඛෝපභෝගී කාමර 113 ක් ඇතුළුව කාමර හා සුඛෝපභෝගී කාමර 800 කින් සමන්විත වෙයි. තවද මෙහි පාරිභෝගිකයින්ට උසස් තත්වයේ සාප්පු සවාරි අත්දැකීමක් ලබා දීම සඳහා Shoppes නමින් ශ්රී ලංකාවේ නිෂ්පාදිත ඉහළ පෙළේ සිල්ලර සන්නාමවලින් සමන්විත සුඛෝපභෝගී වෙළඳ සංකීර්ණයක් ද ඇත.
මීට අමතරව ජාත්යන්තර ප්රමිතියෙන් හා පාලන ක්රමවේදයන්ට අනුකූලව මෙල්කෝ විසින් මෙහෙයවනු ලබන සියලු පහසුකම්වලින් සමන්විත කැසිනෝ හා විනෝදාස්වාද කලාපයක් තුලින් දෙස් විදෙස් සංචාරකයින් වෙත අසමසම සේවාවක් ලබා දීමට City of Dreams Sri Lanka කටයුතු කර ඇත. එමෙන්ම විශේෂ උත්සව, රැස්වීම්, සම්මන්ත්රණ හා ප්රදර්ශනයන් පැවැත්වීම සඳහා වන MICE කාණ්ඩයේ සියලු පහසුකම්වලින්ද එය සමන්විත වේ.
තවද City of Dreams Sri Lanka දෙස් විදෙස් අමුත්තන් හට ලොව සුපතල සූපවේදීන් විසින් නිර්මාණය කරනු ලබන අද්විතීය හා ප්රණීත ආහාර හා පාන වර්ග රැසක් පිරිනමනු ලබන අතර ප්රසංග, සංස්කෘතික උත්සව සහ සුවිශේෂී සංදර්ශන සඳහා වෙන් වූ විශේෂ ස්ථාන ද එයට ඇතුළත් වේ. City of Dreams Sri Lanka හි සෑම අංශයක්ම තිරසාරභාවය කෙරෙහි දැඩි අවධානයක් යොමු කරමින්, උසස් පරිසර හිතකාමී තාක්ෂණයන් භාවිතා කරමින් සහ ශ්රී ලංකාව කෙරෙහි දිගුකාලීන ධනාත්මක බලපෑමක් ඇති කිරීමට සහාය වෙමින් නිර්මාණය කර තිබීම විශේෂයෙන් කැපී පෙනේ.
024/2025 තක්සේරු වර්ෂය සඳහා ආදායම් වාර්තා ඉදිරිපත් කිරීම සඳහා දැනටමත් නිකුත් කර ඇති පුද්ගලික හඳුනාගැනීම් අංකය (PIN) වලංගු කාලය දීර්ඝ කිරීමට දේශීය ආදායම් බදු දෙපාර්තමේන්තුව පියවර ගෙන තිබේ.
ඒ අනුව එහි වලංගු කාලය එළැඹෙන නොවැම්බර් මස 30 වැනිදා දක්වා දීර්ඝ කිරීමට එම දෙපාර්තමේන්තුව පියවර ගෙන ඇත.
මාතර කපුගම ප්රදේශයේ අද (03) උදෑසන 6.35ට පමණ වෙඩි තැබීමක් සිදුව තිබේ.
පොලීසිය පැවසුවේ නාඳුනන පුද්ගලයින් දෙදෙනෙකු යතුරුපැදියකින් පැමිණ ටී 56 ගිනි අවියක් භාවිත කරමින් නිවසක සිටි පුද්ගලයෙකු ඉලක්ක කර මෙම වෙඩි තැබීම සිදුකර ඇති බවය.
වෙඩි වැදීමෙන් 48 හැවිරිදි පුද්ගලයෙකු තුවාල ලබා ඇති අතර වෙඩි වැදීමෙන් ඔහුගේ පාදයකට සුළු තුවාල සිදුව තිබේ
තුවාලකරු බස් රථ හිමිකරුවෙක් සහ බහුදින ධීවර යාත්රා හිමි ව්යාපාරිකයෙක් බවද පොලීසිය පැවසීය.
පසුගිය මාර්තු 21 දින දෙවිනුවර ශ්රී විෂ්ණු දේවාලයේ දකුණු වාහල්කඩ අසල සිදුවූ වෙඩි තැබීමෙන් ඝාතනයට ලක්වූ පසිඳු තාරක සහ යොමේස් නදීෂාන් දෙදෙනාගේ පවුලේ පුද්ගලයින් සහ වෙඩි තැබීමෙන් තුවාල ලැබූ පුද්ගලයා අතර ඇති හිතවත්කම හේතුවෙන් සංවිධානාත්මක හා මත්ද්රව්ය ජාවාරම්කරුවෙකු වන දැනට ඩුබායි රාජ්යයේ සිටින ෂෙහාන් සත්සර නොහොත් දෙහිබාල මල්ලීගේ මෙහෙයවීමෙන් මෙම වෙඩි තැබීම සිදුකර ඇතැයි පොලීසිය සැකපළ කරයි.
වෙඩි තැබීම සිදුව ඇති ස්ථානයේ තිබී ටී 56 උණ්ඩ 03ක්ද පොලීසිය විසින් සොයාගෙන තිබේ.
සිද්ධිය පිළිබඳ වැඩිදුර විමර්ශන ගන්දර පොලීසිය මගින් සිදුකරති.
ගල්කිස්ස පොලිස් වසමේ අරලිය නිවාස ප්රදේශයේදී දෙපිරිසක් අතර ඇතිවූ ගැටුමකින් පුද්ගලයෙකු මියයාමේ සිද්ධියට අදාළ සැකකරුවන් ප්රදේශයෙන් පළා ගොස් ඇති බව පොලීසිය පවසයි.
ඝාතනයට සම්බන්ධ සැකකරුවන් පස්දෙනෙක් හඳුනාගෙන ඇති අතර ඒ අතර කාන්තාවන් දෙදෙනෙකු ද වන බව පොලිසිය සඳහන් කළේය.
මේ වන විට ප්රදේශයෙන් පලාගොස් ඇති සැකකරුවන් අත්අඩංගුවට ගැනීම සඳහා ගල්කිස්ස පොලිසිය වැඩිදුර විමර්ශන සිදුකරයි.
ඊයේ (01) සවස් කාලයේදී මෙම සිදුවීම සිදුව ඇති අතර තියුණු ආයුධවලින් පහරදීම හේතුවෙන් අදාළ පුද්ගලයින් දෙදෙනා බරපතළ තුවාල සහිතව ලුනාව රෝහලට ඇතුලත් කර තිබුණි.
ගල්කිස්ස පොලීසිය සඳහන් කළේ, තුවාලකරුවන්ගෙන් එක් පුද්ගලයෙකු ලුනාව රෝහලේ ප්රතිකාර ලබමින් සිටියදී මියගොස් ඇති බවත් තුවාල ලැබූ අනෙක් පුද්ගලයා වැඩිදුර ප්රතිකාර සඳහා කළුබෝවිල රෝහලට ඇතුලත් කෙරුණු බවත් ය.
මෙසේ පහර කෑමට ලක්ව ඇත්තේ එකම පවුලේ සහෝදරයින් දෙදෙනෙක් වන අතර එහිදී මිය ගොස් ඇත්තේ 28 හැවිරිදි වැඩිමහල් සොහොයුරා ය.
එම පහරදීමෙන් තුවාල ලැබූ පහලොස් හැවිරිදි පාසල් සිසුවාද මේ වන විට රෝහල්ගතව ප්රතිකාර ලබන බව සඳහන් වේ.
පාසලක එකම පන්තියේ ඉගෙනුම ලබන මිතුරන් දෙදෙනෙකු අතර ඇති වූ බහින්බස්වීමක් පිළිබඳ විමසීම සඳහා පාසල් සිසුවා සිය වැඩිමහල් සොහොයුරාද සමඟින් අදාළ නිවසට ගිය අවස්ථාවේදී ඇති වූ ගැටුමකින් මෙම ඝාතනය සිදුව ඇති බව මූලික පොලිස් විමර්ශනවල දී අනාවරණය වී ඇත.
අම්බලන්තොට හුංගම, පිංගම ප්රදේශයේ අද (02) පස්වරුවේ වෙඩි තැබීමක් සිදුව තිබේ.
පොලීසිය පැවසුවේ කුඹුරක ආරවුලක් මත අදාළ වෙඩි තැබීම සිදුව ඇති බවය.
බලපත්ර සහිත ගිනි අවියකින් මෙම වෙඩි තැබීම සිදුකර ඇති අතර වෙඩි වැදුණු පුද්ගලයා එම ස්ථානයේදීම ජීවිතක්ෂයට පත්ව තිබේ.
අනතුරුව වෙඩි තැබීම සිදුකළ පුද්ගලයා ගිනි අවිය සමග හුංගම පොලිසියට භාර වී ඇත.
තංගල්ල කොට්ඨාස භාර ජ්යෙෂ්ඨ පොලිස් අධිකාරී උපුල සෙනෙවිරත්න මහතාගේ උපදෙස් මත හුංගම පොලීසිය වැඩිදුර විමර්ශන සිදුකරයි.
