Category: news_main

පෑලියගොඩ මාළු වෙළෙඳසැලේ සේවකයෙකු පෑලියගොඩදී අද (19) වෙඩි තබා ඝාතනය කර තිබුණි.

වෙඩික්කරුවන්ගේ ඉලක්කය වූ තැනැත්තා පමණක් නොව මහමඟ ගමන් කරමින් සිටි පුද්ගලයෙක් ද මෙම වෙඩි ප්‍රහාරයට ලක්වී තුවාල ලැබීය.

පෑලියගොඩ, ඥාණරතන මාවත ප්‍රදේශයේදී අද උදෑසන 9:30ට පමණ මෙම වෙඩිතැබීම සිදුකර තිබුණි.

යතුරුපැදියකින් පැමිණි දෙදෙනෙක් මාර්ගයේ ගමන් කරමින් සිටි අයෙකු ඉලක්ක කර T56 වර්ගයේ ගිනිඅවියකින් වෙඩිතැබීම සිදුකර ඇති බව පොලිසිය පවසයි.

වෙඩිවැදීමෙන් තුවාල ලැබූ දෙදෙනා කොළඹ ජාතික රෝහලට ඇතුළත් කෙරුණු අතර එහිදී වෙඩික්කරුවන්ගේ ඉලක්කය වූ පුද්ගලයා අද දහවල් ජීවිතක්ෂයට පත් විය.

අනෙක් පුද්ගලයාගේ තත්ත්වය බරපතළ නොවන බව පොලිසිය පවසයි.

වෙඩි තැබීමෙන් ඝාතනය වූ පුද්ගලයා අයියප්පන් ප්‍රභූ නම් 40 හැවිරිදි අයෙකි.

ඔහු පෑලියගොඩ මාළු වෙළඳසැලේ සේවය අවසන් කර නිවස බලා පැමිණෙමින් සිටියදී වෙඩි ප්‍රහාරයට ලක්වී තිබුණි.

ඝාතනය වූ පුද්ගලයා මෝදර ප්‍රදේශයේ පදිංචිකරුවකු වන අතර වැල්ලේ සාරංග නම් අපරාධකරුගෙන් එල්ල වූ මරණ තර්ජන හමුවේ ඔහු පෑලියගොඩට පැමිණ සිට ඇති බව පොලීසිය පැවසීය.

මොහු ඝාතනය කරන බවට වැල්ලේ සාරංග මරණ තර්ජන කර ඇත්තේ, සාරංගගේ සහෝදරයා ඝාතනය කිරීමට මෙම පුද්ගලයා උත්සාහ කර ඇති බවට චෝදනා එල්ලවීමත් සමග බව පොලිසිය පවසයි.

ඝාතනය වූ තැනැත්තා පූකුඩුකන්නා නම් අපරාධකරුගේ සමීපතමයෙක් බවද පොලීසිය සඳහන් කරයි.

පලනි රිමෝෂන් හා කංජිපානි ඉම්රාන් නමැති අපරාධකරුවන් ද මෙම ඝාතනයට සහාය දී ඇතැයි පොලීසිය සැක පළ කරයි.
.

2024 වසරේ අල්ලස් ලබා ගැනීමේ සිද්ධියක් සම්බන්ධයෙන් අත්අඩංගුවට ගෙන රක්ෂිත බන්ධනාගාරගත කර සිටින හිටපු බන්ධනාගාර සෞඛ්‍ය සේවා නියෝජ්‍ය අධ්‍යක්ෂ නයනජිත් හේමන්ත රණසිංහ මහතා ලබන 26 වනදා දක්වා තවදුරටත් රක්ෂිත බන්ධනාගාරගත කරන ලෙස කොළඹ මහෙස්ත්‍රාත් අධිකරණය නියම කර තිබේ.

අල්ලස් කොමිසම සහ විත්තිය නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ ප්‍රධාන මහෙස්ත්‍රාත් තනූජා ලක්මාලී ජයතුංග මහත්මිය විසින් මෙම නියෝගයක් නිකුත් කළාය.

බන්ධනාගාර රෝහලේ ප්‍රතිකාර සඳහා රඳවා සිටි රඳවියකු ප්‍රතිකාර අවසන් වීමෙන් පසුව බූස්ස බන්ධනාගාරයට නොයවා රෝහලේ රඳවා ගැනීම සඳහා රුපියල් ලක්ෂ 15ක අල්ලසක් ඉල්ලා, ඉන් ලක්ෂ තුනක මුදලක් අල්ලස් වශයෙන් ලබා ගත් බවට සැකපිට මෙම වෛද්‍යවරයා අල්ලස් කොමිසම විසින් පසුගිය දා අත්අඩංගුවට ගෙන තිබුණි.

ජාතික ලොතරැයි මණ්ඩලයේ හිටපු අධ්‍යක්ෂවරයෙකු වන තුසිත හල්ලොලුව මහතා අත්අඩංගුවට ගන්නා ලෙස දන්වා කොළඹ මහෙස්ත්‍රාත් අධිකරණය අද (18) වරෙන්තු නිකුත් කළේය.

කොළඹ අපරාධ කොට්ඨාශය විසින් ඉදිරිපත් කළ කරුණු සලකා බැලූ කොළඹ අතිරේක මහෙස්ත්‍රාත් පසන් අමරසේන මහතා විසින් මෙම වරෙන්තුව නිකුත් කරනු ලැබීය.

මෑතකදී නාරාහේන්පිට ප්‍රදේශයේදී තුසිත හල්ලොලුව මහතාගේ වාහනයට වෙඩි තැබීමේ සිද්ධිය සම්බන්ධයෙන් කොළඹ අපරාධ කොට්ඨාශය විසින් විමර්ශනයක් ආරම්භ කර තිබුණි.

එම විමර්ශනය සම්බන්ධයෙන් පොලිසිය විසින් කළ ඉල්ලීමක් සලකා බැලීමෙන් අනතුරුව මහෙස්ත්‍රාත්වරයා මෙම වරෙන්තුව නිකුත් කළේය.

ගිංතොට දුම්රිය ස්ථානය ආසන්නයේදී පීලි පැනීමකට ලක්වූ ගාලු කුමාරි දුම්රිය පීලිගත කිරීමේ කටයුතු තවදුරටත් සිදුකරමින් පවතින බව දුම්රිය දෙපාර්තමේන්තුව පවසයි.

මරදානේ සිට බෙලිඅත්ත දක්වා ධාවනය වූ ගාලු කුමාරි දුම්රිය ඊයේ (16) දින පස්වරු 5.30ට පමණ ගිංතොට දුම්රිය ස්ථානයේදී පිලී පැනීමකට ලක්විය.

පිලී පැනීමෙන් දුම්රිය මාර්ගයේ සිල්පර කොටන් 250කට ආසන්න ප්‍රමාණයක් සහ දුම්රිය පීලිවලටද දැඩි හානි සිදුවිය.

දුම්රිය පීලි පැනීමෙන් මුහුදුබඩ දුම්රිය මාර්ගයේ දුම්රිය ධාවන කටයුතු අම්බලන්ගොඩ දුම්රිය ස්ථානය දක්වා සීමා කිරීමටද දුම්රිය දෙපාර්තමේන්තුව පියවර ගනු ලැබීය.

හානියට පත්වූ දුම්රිය මාර්ගයේ ප්‍රතිසංස්කරණ කටයුතු ඊයේ රාත්‍රියේම නැවත ආරම්භ කිරීමටද දුම්රිය දෙපාර්තමේන්තුව පියවර ගනු ලැබීය.

ඒ අනුව අද (17) පෙරවරු 11.00ට පමණ එක් මංතීරුවක් දුම්රිය ධාවනය සඳහා විවෘත කිරීමටද දුම්රිය දෙපාර්තමේන්තුව පියවර ගත්තේය.

දුම්රිය දෙපාර්තමේන්තුව පැවසුවේ පීලි පැනීමෙන් හානියට පත්වූ දුම්රිය මාර්ගය නැවත ප්‍රතිසංස්කරණය කර හැකි ඉක්මනින් දුම්රිය ධාවනය සඳහා විවෘත කිරීමට පියවර ගන්නා බවය.