Latest News
ස්වර්ගස්ථ වු මෙරට කතෝලික සභාවේ සිටි විද්වත් ගෞරවනීය පූජා ප්රසාදීන් වහන්සේනමක් වූ ගරු ආචාර්ය කැමිලස් ප්රනාන්දු පියතුමන්ගේ අවමංගල්ය කටයුතු එළඹෙන 22 වෙනිදා සිදුකිරීමට නියමිතයි.
එදින පස්වරුවේ කළුතර කුඩා පයාගල සාන්ත මරියා දේවස්ථාන සුසාන භූමියේදී සිදුකිරීමට නියමිත බව දැනුම් දී තිබේ.
උන්වහන්සේගේ දේහය හෙට (20) පෙරවරුවේ කොළඹ අගරදගුරු මැදුරේ තැන්පත් කිරීමට නියමිතව ඇත.
උන්වහන්සේ ස්වර්ගස්ථ වුයේ අද (19)පෙරවරුවේ දීය.
මෙරට දෙදින නිල සංචාරයක නිරත ඉන්දියානු උප ජනාධිපති ශ්රී සී.පී. රාධක්රිෂ්ණන් මහතා සහ ජනාධිපති අනුර කුමාර දිසානායක මහතා අතර ද්විපාර්ශ්වික සාකච්ඡාවක් අද (19) පෙරවරුවේ ජනාධිපති කාර්යාලයේදී පැවැත්විණි.
ජනාධිපති කාර්යාලය වෙත පැමිණි ඉන්දීය උප ජනාධිපතිවරයා ජනාධිපති අනුර කුමාර දිසානායක මහතා විසින් උණුසුම් ලෙස පිළිගනු ලැබූ අතර ඉන්දියානු උප ජනාධිපති ධුරයට පත්වීම පිළිබඳවද ශ්රී සී.පී. රාධක්රිෂ්ණන් මහතා වෙත සිය සුබපැතුම් එක් කළේය.
ශ්රී ලංකාවේ සිදු කරන තම ප්රථම නිල සංචාරය මෙය බව මෙහිදි සඳහන් කළ ඉන්දියානු උප ජනාධිපතිවරයා ශ්රී ලංකාවේදී හිමි වූ විශේෂ පිළිගැනීම සහ ආගන්තුක සත්කාර පිළිබඳවද සිය ස්තූතිය පිරිනැමීය.
අනතුරුව, නායකයන් අතර ද්විපාර්ශ්වික සාකච්ඡා ආරම්භ කෙරණු අතර ඉන්දියාව සහ ශ්රී ලංකාව අතර පවතින දිගුකාලින මිත්රත්වය සහ සහයෝගීතාව තවදුරටත් වර්ධනය කර ගැනීම පිළිබඳ එහිදී දීර්ඝ ලෙස සාකච්ඡා කෙරිණි.
ආර්ථික, අධ්යාපන, සෞඛ්ය, සංචාරක, ආයෝජන සහ වෙළෙඳ ක්ෂේත්රයන්හි මෙන්ම විශේෂයෙන් බලශක්ති සුරක්ෂිතතාව සහ වරාය සංවර්ධනයට අදාළ දෙරට අතර සහයෝගීතාව තවදුරටත් ශක්තිමත් කර ගැනීමට අපේක්ෂා කරන බව ඉන්දීය උප ජනාධිපතිවරයා මෙහිදී සඳහන් කළේය.
ඉන්දීය රජයේ සහාය ඇතිව මෙරට ක්රියාත්මක නිවාස ව්යාපෘති මෙන්ම දිට්වා සුළි කුණාටුවෙන් පීඩාවට පත් ප්රදේශ වෙනුවෙන් ලබා දුන් ඇමෙරිකානු ඩොලර් මිලියන 450ක පැකේජය යටතේ ක්රියාත්මක වන ව්යාපෘති පිළිබඳව මෙහිදී පුළුල් ලෙස සාකච්ඡා කෙරිණි.
හදිසි අවස්ථාවලට අමතරව පසුගියදා තමා ඉන්දියාවේ සිදු කළ නිල සංචාරයේදී මෙන්ම නරේන්ද්ර මෝදි අගමැතිතුමා මෙරට සිදු කළ සංචාරයේදීද ඇති කරගත් අවබෝධතාව අනුව ඉන්දියාව මේ වන විට ශ්රී ලංකාවට ලබා දෙන ආර්ථික සහ සමාජයීය ආදී සෑම ක්ෂේත්රයකම සහයෝගීතාව පුළුල් වී තිබෙන බවත්, ඒ අනුව දැනට වැඩසටහන් රැසක් ක්රියාවට නංවා ඇති බවත් මෙහිදී පෙන්වා දුන් ජනාධිපතිවරයා ඒ තුළ ඉදිරියේදී දෙරට අතර සහයෝගීතාව තවදුරටත් ශක්තිමත් වනු ඇති බවද සඳහන් කළේය.
එමෙන්ම දිට්වා සුළි කුණාටුව හමුවේ ඉන්දියාව ශ්රී ලංකාවට ලබා දුන් සුවිශේෂි සහාය මෙහිදී අගය කළ ජනාධිපතිවරයා ඉන්දියානු අයවැයෙන් ශ්රී ලංකාව වෙනුවෙන් මුදලක් වෙන් කිරීමද කෘතවේදීව අගය කළේය.
එසේම, මැදපෙරදිග යුදමය තත්ත්වය සමඟ ඇති වූ බලශක්ති අර්බුදය හමුවේ ඉන්දියාවෙන් ඉන්ධන මෙට්රික් ටොන් 38,000ක් මෙරටට එවීමට ගත් පියවරද ජනාධිපතිවරයා කෘතවේදීව සිහිපත් කළේය.
තාක්ෂණික වශයෙන් ඉන්දියාව අත්පත් කරගෙන තිබෙන සුවිශේෂි ජයග්රහණ මෙහිදී සිහිපත් කළ ජනාධිපති අනුර කුමාර දිසානායක මහතා එම ක්ෂේත්රයන්හිදී ඉන්දියාව සමඟ සහයෝගයෙන් කටයුතු කිරීමට ශ්රී ලංකාව අපේක්ෂා කරන බවත් විශේෂයෙන් මානව සම්පත් සංවර්ධනයේදී සහ රාජ්ය අංශය ඩිජිටල්කරණය කිරීමේ වැඩපිළිවෙළෙහිදී ඉන්දියාවේ සහාය අපේක්ෂා කරන බවත් පැවසීය.
ධීවර ගැටලු කෙරෙහිද මෙහිදී විශේෂ අවධානය යොමු කෙරුණු අතර දෙපාර්ශ්වයම සහයෝගීතාවයෙන් කටයුතු කර ඒ සඳහා දීර්ඝකාලීන ස්ථිරසාර විසඳුමක් සෙවීමේ අවශ්යතාවද සාකච්ඡාවට ලක් විය.
ඉන්දියානු දූත පිරිස නියෝජනය කරමින් ධීවර, සත්ව පාලන සහ කිරි නිෂ්පාදන රාජ්ය අමාත්ය මහාචාර්ය එස්.පී. සිං බාගෙල්, පාර්ලිමේන්තු මන්ත්රීවරුන් වන ආචාර්ය කේ. ලක්ෂ්මන්, ආචාර්ය මේධා විශ්රම් කුල්කර්ණි, විදේශ කටයුතු අමාත්යාංශයේ විදේශ ලේකම් වික්රම් මිස්රි, ශ්රී ලංකාවේ ඉන්දීය මහ කොමසාරිස් සන්තෝෂ් ජා යන මහත්ම මහත්මීහු ඇතුළු පිරිසක් සහ ශ්රී ලංකා රජය නියෝජනය කරමින් විදේශ කටයුතු, විදේශ රැකියා සහ සංචාරක අමාත්ය විජිත හේරත්, කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය අනිල් ජයන්ත ප්රනාන්දු, ජනාධිපති ලේකම් ආචාර්ය නන්දික සනත් කුමනායක, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, මුදල් හා ආර්ථික කටයුතු පිළිබඳ ජනාධිපති ජ්යෙෂ්ඨ අතිරේක ලේකම් සහ බලශක්ති අමාත්යාංශයේ ලේකම් ජී.එම්.ආර්.ඩී. අපොන්සු, විදේශ කටයුතු, විදේශ රැකියා සහ සංචාරක අමාත්යාංශයේ ලේකම් අරුණි රණරාජා, විදේශ කටයුතු, විදේශ රැකියා සහ සංචාරක අමාත්යාංශයේ අතිරේක ලේකම් එම්.ආර්.කේ. ලෙනගල යන මහත්ම මහත්මීහු ඇතුළු පිරිසක් මෙම අවස්ථාවට සහභාගී වූහ.
ජනතාවගේ තිබෙන නොසැලකිල්ල හේතුවෙන් නිකරුනේ ජීවිත හානි සිදුවන බව අස්ගිරි පාර්ශවයේ අනුනායක නාරම්පනාවේ ආන්නද හිමි පවසයි.
පොලිස්පති නීතිඥ ප්රියන්ත වීරසූරිය මහතා අද (18) පෙරවරුවේ උන්වන්සේව බැහැදැකීමට පැමිනි අවස්ථාවේදී පසුගිය දින කිහිපයේදී දියේ ගිලි සිදු වූ ජීවිත හානි සම්බන්ධයෙන් අදහස් දක්වමින් උන්වහන්සේ මේ බව පැවසුවහ.
මාධ්ය මගින් සිදුවන අනතුරු සම්බන්ධයෙන් ජනතාව කෙතරම් දැනුම්වත් කළද ඒ සම්බන්ධයෙන් කිසිදු තැකීමක් නොමැතිව ජනතාව කටයුතු කරමින් අනතුරුවලට ලක් වන බව උන්වහන්සේ වැඩිදුරටත් ප්රකාශ කළහ.
එහිදී පොලිස්පති නීතිඥ ප්රියන්ත වීරසූරිය මහතා අස්ගිරි පාර්ශවයේ මහා නායක වරකාගොඩ ශ්රී ඥානරතන නාහිමි, මල්වතු පාර්ශවයේ මහා නායක තිබ්බටුවාවේ ශ්රී සුමංගල නාහිමි සහ මල්වතු පාර්ශවයේ අනුනායක දිඹුල්කුඹුරේ විමලධම්ම හිමි ද බැහැදැක ආශිර්වාද ලබා ගත්තේය.
එහිදි අදහස් දැක්වූ පොලිස්පති නීතිඥ ප්රියන්ත වීරසූරිය මහතා පැවසුවේ ආරක්ෂක අංශවලින් යොදවා ඇති ජීවිතාරක්ෂක නිලධාරීන් ද පසුගිය දින කිහිපයේ දී දියේ ගිලි සිදුවීමට ගිය ජීවිත හානි රැසක් වළක්වා ගැනීමට කටයුතු කර ඇති බවය.
මිනී මැරුම්, කප්පම් ගැනීම්, අවි ජාවාරම් සම්බන්ධයෙන් පොලිසියට අවශ්ය කර සිටි දරුණු ගණයේ අපරාධකරුවකු වන සෝබනහන්දි සනත් ද සිල්වා හෙවත් එස්. එෆ්. රාජු මේ වනවිට පොලිස් මධ්යම අපරාධ විමර්ශන කාර්යාංශයේ රඳවාගෙන ප්රශ්න කරමින් තිබේ.
ඒ, පැය 72ක කාලයකට ලබාගත් රැඳවුම් නියෝග මතය.
ඉන්දියාවේදී අත්අඩංගුවටගත් සැකකරු ඊයේ (18) රාත්රියේ දිවයිනට රැගෙන එනු ලැබීය.
සෝබනහන්දි ජයලත් ද සිල්වා හෙවත් කරන්දෙණියේ සුද්දාගේ සහෝදරයා වන සෝබනහන්දි සනත් ද සිල්වා හෙවත් එස්.එෆ්. රාජු ඉන්දියාවේ නවදිල්ලි ගුවන්තොටුපොළේදී පසුගියදා අත්අඩංගුවට ගනු ලැබීය.
ඒ පොලිස් මධ්යම අපරාධ විමර්ශන කාර්යාංශයේ පොලිස් පරීක්ෂකවරයෙකුට ලද තොරතුරකට අනුව ශ්රී ලංකා පොලිසිය ඉන්දිය බුද්ධි අංශ වෙත ලබාදුන් තොරතුරකට අනුවය.
එස්.එෆ්. රාජු ඉන්දියාවට පැමිණ ග්රිසියට හෝ ඉතාලියට පලායාමට සූදානමින් සිට ඇති බව එම තොරතුරේ සඳහන්ව තිබී ඇත.
ඒ අනුව එස්.එෆ්. රාජු කටුනායක ගුවන්තොටුපොළින් ඊයේ රාත්රියේ මෙරටට රැගෙන එනු ලැබීය.
සැකකරු වැඩිදුර විමර්ශන සඳහා භාරදෙනු ලැබුවේ පොලිස් මධ්යම අපරාධ විමර්ශන කාර්යාංශය වෙතයි.
එහි අධ්යක්ෂ ජ්යෙෂ්ඨ පොලිස් අධිකාරී කමල් ආරියවංශ මහතා ඇතුළු නිලධාරීන් කණ්ඩායමක් විසින් ඊයේ රාත්රියේම ඔහු රැගෙන එනු ලැබීය.
පොලිස් මධ්යම අපරාධ විමර්ශන කාර්යාංශය භාර ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු මහතාගේ සෘජු අධීක්ෂණයෙන්, නියෝජ්ය පොලිස්පති චන්දන කොඩිතුවක්කු මහතාගේ මෙහෙයවීමෙන් සැකකරු පිළිබඳ වැඩිදුර විමර්ශන සිදුකරමින් සිටියි.
එස්.එෆ්. රාජු පොලිස් විශේෂ කාර්ය බලකායේ සිට පසුව යුද හමුදා විශේෂ බලකායේ සෙබළෙකු ලෙස කටයුතු කර තිබේ.
තම සොහොයුරා වන කරන්දෙණියේ සුද්දා සමග එක්ව හිත හොඳ දොස්තර ඝාතනය කිරීමත් සමග මොහු පාතාලයට අත්පොත් තබා ඇති බව පොලිසිය පැවසුවේය.
කරන්දෙණියේ සුද්දා ලබා ගන්නා කොන්ත්රාත් ඝාතන බහුතරයක් මොහු මෙහෙයවා ඇති බවද වාර්තාවේ.
එමෙන්ම මිනී මැරුම්, කප්පම් ගැනීම්, අවි ආයුධ ජාවාරම් කිරීම් හා පාතාල ක්රියාදාම මෙහෙයවීම සම්බන්ධයෙන් ද මොහුට චෝදනා එල්ලවී තිබේ.
අකුරේගොඩදී පසුගියදා නීතීඥවරයෙකු සහ ඔහුගේ බිරිඳ ඝාතනය කිරීම මෙහෙයවා ඇත්තේ ද SF රාජු බවට සැක කෙරේ.
කරන්දෙණියේ සුද්දාගේ කල්ලිය දකුණු පළාතේ මේ වන විට ක්රියාත්මක දරුණුතම අපරාධ කල්ලියක් වන අතර මොහු අත්අඩංගුවට පත්වීමත් සමග දකුණේ අපරාධ රැසක් පාලනය කරගැනීමට හැකිවනු ඇති බවට පොලිසිය අපේක්ෂා කර ඇත.
ඉන්දියාවේදී අත්අඩංගුවට පත්වූ දරුණු ගණයේ අපරාධකරුවකු වන ‘කරන්දෙණියේ රාජු’ නමැත්තා අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් විසින් මීට සුළු වේලාවකට පෙර මෙරටට රැගෙන එනු ලැබුවා.
ඝාතන ඇතුළු අපරාධ සිද්ධි 15කට අධික සංඛ්යාවකට පොලිසියට අවශ්යව සිටින රාජු, ඉන්දියාවේදී එරට ආරක්ෂක අංශ පසුගියදා අත්අඩංගුවට ගෙන තිබුණි.
ඔහු තවත් සංවිධානාත්මක අපරාධකරුවෙකු වන කරන්දෙණිය සුද්දාගේ සහෝදරයෙකු වේ.
ගල්අඟුරු ආනයනයට අදාළ ක්රියාවලිය පරීක්ෂා කර බැලීමේ විශේෂ ජනාධිපති කොමිසම විසින් ඉදිරියේ පවත්වනු ලබන අපක්ෂපාතී හා ස්වාධීන විමර්ශනයකට ඉඩ සලසමින් බලශක්ති අමාත්ය කුමාර ජයකොඩි මහතා සහ ලේකම් මහාචාර්ය උදයංග හේමපාල මහතා අද (17) පස්වරුවේ ජනාධිපති අනුර කුමාර දිසානායක මහතා වෙත ලිපි ඉදිරිපත් කරමින් සිය ධුරයන්ගෙන් ඉල්ලා අස්වී තිබේ.
අද (17) දින ජනාධිපති අනුර කුමාර දිසානායක මහතා විසින් ගල්අඟුරු ආනයනයේදී හා ඒ ආශ්රිත විදුලිය නිෂ්පාදනයේදී අක්රමිකතා සහ නීතිවිරෝධී ක්රියා සිදු වී ඇත්ද යන්න විමර්ශනය කිරීම සඳහා විශේෂ ජනාධිපති පරීක්ෂණ කොමිෂන් සභාවක් පත් කරන ලද අතර බලශක්ති අමාත්යවරයා සහ අමාත්යාංශ ලේකම්වරයා සිය ධුරයන්ගෙන් ඉල්ලා අස්වී ඇත්තේ එම කොමිසමේ අපක්ෂපාතී හා ස්වාධීන ක්රියාවලියට සහය පළ කිරීමක් ලෙසය.
ජනාධිපතිවරයා වෙත සිය ඉල්ලා අස්වීමේ ලිපිය ඉදිරිපත් කරමින් බලශක්ති අමාත්ය කුමාර ජයකොඩි මහතා සඳහන් කර ඇත්තේ ගල්අඟුරු සැපයුම සම්බන්ධයෙන් විශේෂ ජනාධිපති විමර්ශන කොමිෂන් සභාවක් පත් කිරීමට ගත් තීන්දුවත්, 2009 වසරේ සිට ගල්අඟුරු ආනයනයන් පිළිබඳව විධිමත් පරීක්ෂාවක් කරන ලෙස ජනාධිපති ලේකම්වරයා විසින් අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කිරීමත් මගින් ජනාධිපතිවරයා වෙත ඇති දූෂණයට එරෙහි සහ ජන වරමට කැපවුණු නිර්භීත අධිෂ්ඨානය තමන් අගය කරන බවය.
ඒ අනුව ඉදිරියේදී සිදු කිරීමට නියමිත විමර්ශන කටයුතු ඉතා ස්වාධීනව සහ කිසිදු පක්ෂපාතීත්වයකින් තොරව සිදුවිය යුතු බවට තමන් විශ්වාස කරන බවත් විමර්ශනය සිදු වන අතරතුර තමා එම තනතුරේ රැඳී සිටීම පවා ඊට බාධාවක් වනු ඇත යන ස්ථාවරය මත පිහිටා අද (17) දින සිට ක්රියාත්මක වන පරිදි අමාත්ය ධුරයෙන් ඉල්ලා අස්වන බවත් ඔහු වැඩිදුරටත් සඳහන් කර ඇත.
බලශක්ති අමාත්යාංශයේ ලේකම් මහාචාර්ය උදයංග හේමපාල මහතා තම ලිපිය මගින් පෙන්වා දී ඇත්තේ ඉදිරියේදී ආරම්භ වීමට නියමිත විමර්ශනවලට අවහිරයක් නොවීම සහ විමර්ශනවල ස්වාධීනත්වය තහවුරු කිරීම සඳහා ඊට පහසුකම් සැලසෙන පරිදි තමන් දරන ලේකම් ධුරයෙන් ඉල්ලා අස්වීම යෝග්ය බවට තමන් විශ්වාස කරන බවය.
දැදුරු ඔයේ දිය නෑමට ගිය පුද්ගලයින් 15 දෙනෙකු අතරින් 10 දෙනෙකු අද (16) පස්වරුවේ දියේ ගිලී අනතුරක් සිදුවී තිබේ.
දියේ ගිලුණු පිරිස අතරින් දෙදෙනෙකු රෝහල්ගත කර ඇති අතර තවත් දෙදෙනෙකුගේ මළසිරුරු සොයාගෙන ඇත.
මෙලෙස සොයාගෙන ඇත්තේ පිරිමි පුද්ගලයෙකුගේ මළසිරුරක් සහ කාන්තාවකගේ මළසිරුරකි.
පොලීසිය පැවසුවේ පුද්ගලයින් 6 දෙනෙකු තවමත් අතුරුදන්ව ඇති බවය.
අනතුර සිදුවී ඇත්තේ කොබෙයිගනේ පොලිස්බල ප්රදේශයේ කුරටියාගහමුල ප්රදේශයේදී ය.
කඩවත ප්රදේශයේ පදිංචිව සිටි 7 දෙනෙකුගෙන් යුත් පිරිසක් කොබෙයිගනේ සිය ඥාති නිවසකට ගොස් ඇති අතර පසුව එම නිවසේ තවත් පිරිසක් සමඟ 15 දෙනෙකුගෙන් යුත් කණ්ඩායමක් දිය නෑම සඳහා මෙලෙස දැදුරු ඔයට ගොස් ඇති බව පොලීසිය පවසයි.
හිටපු පාර්ලිමේන්තු මන්ත්රී චන්දන කත්රිආරච්චි මහතා කොළඹ අපරාධ කොට්ඨාසය මඟින් අත්අඩංගුවට ගෙන තිබේ.
පොලිස් මාධ්ය ප්රකාශක සහකාර පොලිස් අධිකාරී එෆ්.යු වුට්ලර් මහතා පැවසුවේ, කැස්බෑව මහෙස්ත්රාත් අධිකරණයෙන් ලබාගත් සෝදිසි වරෙන්තුවක් මත ඔහුගේ නිවස පරීක්ෂා කිරීමේදී ටී 56 මැගසින් දෙකක්, පතොරම් 221ට වැඩි ප්රමාණයක් සහ ජීව අත්බෝම්බ දෙකක් සොයාගැනීමට හැකි වූ බවය.
ඒ අනුව හිටපු පාර්ලිමේන්තු මන්ත්රීවරයා පොලිස් අත්අඩංගුවට පත්ව තිබේ.
Update
හිටපු පාර්ලිමේන්තු මන්ත්රී චන්දන කත්රිආරච්චි මහතා සතුව අවි ආයුධ ඇති බවට කොළඹ අපරාධ කොට්ඨාසය කැස්බෑව අධිකරණයට කරුණු වාර්තා කිරීමෙන් පසු ලබාගත් සෝදිසි වරෙන්තුවකට අනුව අද (16) ඔහුගේ නිවස පරීක්ෂා කෙරුණි.
එහිදී T56 උණ්ඩ 221ක්, T56 මැගසින් 2ක්, 7.2 උණ්ඩ 31ක්, 0.2 උණ්ඩ 103ක් සහ ජීව අත්බෝම්බයක් සොයා ගැනීමට විමර්ශන නිලධාරීන්ට හැකිවිය.
අදාළ ජීව අත්බෝම්බය චෙකොස්ලෝවැකියාවේ නිෂ්පාදිත එකක් බවද අනාවරණය වී තිබේ.
ඒ අනුව කොළඹ අපරාධ කොට්ඨාසයේ නිලධාරීන් චන්දන කත්රිආරච්චි මහතාගේ නිවසේ තවදුරටත් සෝදිසි කිරීම් සිදුකර ඇති අතර එහිදී ලියාපදිංචි ගිනිඅවි 4ක් ද සොයාගැනීමට හැකිවී ඇත.
ඉන් එක් ගිනිඅවියක් චන්දන කත්රිආරච්චි මහතාගේ නමට ලියාපදිංචි කර තිබෙන අතර අනෙක් ගිනිඅවි 3 චන්දන කත්රිආරච්චි මහතාගේ බිරිඳගේ නමට ලියාපදිංචි කර තිබූ බව අනාවරණය වී තිබේ.
මෙලෙස සොයාගෙන ඇත්තේ ෂොට්ගන් වර්ගයේ ගිනිඅවි 2ක් සහ 9mm වර්ගයේ ගිනිඅවි 2කි.
ඒ අනුව චන්දන කත්රිආරච්චි මහතා සතුව මෙතරම් ගිනිඅවි ප්රමාණයක් සන්තකයේ තබාගැනීමට හේතුව අනාවරණය කරගැනීම සඳහා වෙනම විමර්ශනයක් ආරම්භ කිරීමට කොළඹ අපරාධ කොට්ඨාසයේ නිලධාරීන් පියවර ගෙන ඇති බවද වාර්තා වෙයි.
කොළඹ දිසාව භාර නියෝජ්ය පොලිස්පති නිශාන්ත සොයිසා මහතාගේ අධීක්ෂණය යටතේ කොළඹ අපරාධ කොට්ඨාසය සිද්ධිය සම්බන්ධයෙන් වැඩිදුර විමර්ශන සිදුකරයි.
සිංහල සහ දෙමළ අලුත් අවුරුද්ද වෙනුවෙන් ගම්බිම් බලා ගිය ජනතාව මේ වනවිට කොළඹට පැමිණෙමින් සිටිති.
ඒ අනුව ජාතික ගමනාගමන කොමිෂන් සභාව මගී ජනතාවගේ අවශ්යතාව පරිදි සැලසුමකට අනුව අද (15) සිට බස්රථ ධාවනයට එක් කර තිබේ.
එම බස් රථ ධාවනය ලබන 20 වෙනිදා දක්වා ක්රියාත්මක කරන බව එහි අධ්යක්ෂ ජනරාල් ආචාර්ය නිලාන් මිරැන්ඩා මහතා කියා සිටියේය.
මගී අවශ්යතාව පවතින්නේ නම් 20 වෙනිදායින් පසුවත් පිට පළාත්වල සිට ගම්බිම් බලා ගිය ජනතාව කොළඹ සහ ප්රධාන නගර බලා රැගෙන ඒමට කටයුතු කරන බව ද ඔහු පැවසුවේය.
මේ අතර දිවයින පුරා හෙට (16) දිනයේ සියයට 50ක පමණ බස් රථ ධාවනයේ යෙදවීමට කටයුතු කරන බව සමස්ත ලංකා පෞද්ගලික බස් රථ හිමියන්ගේ සංගමය පවසයි.
එහි සභාපති ගැමුණු විජේරත්න මහතා සඳහන් කළේ, මේ දිනවල මගී ජනතාවගේ අඩුවක් පැවතීම හේතුවෙන් මෙම තීරණය ගත් බවය.
“දුර සේවාත් ඇතුළුව බස් රථ 7000ක් පමණ ධාවනයේ යෙදවීමට කටයුතු කරනවා. සිකුරාදා වනවිට බස්රථ සේවාව යථාතත්ත්වයට පත් කරන්න කටයුතු කරනවා. ගම්බිම් බලා ගිය ජනතාවට කල්වේලා ඇතිව කොළඹට පැමිණෙන්න කියලා මගී ජනතාවගෙන් ඉල්ලීමක් කරනවා.”
මේ අතර හෙට (16) සිට කාර්යාල දුම්රිය සේවා සාමාන්ය පරිදි ක්රියාත්ම කිරීමට කටයුතු කරන බව එම දෙපාර්තමේන්තුවේ ගමනාගමන අධිකාරි අසංක සමරසිංහ මහතා කියා සිටියේය.
“බෙලිඅත්ත දුම්රිය ස්ථානයෙන් හෙට (16) දින උදෑසන පැමිණෙන සාගරිකා දුම්රිය සාමාන්ය විදිහට 16 සහ 17 යන දිනවල අලුයම 04.15ට කොළඹ බලා පිටත් වෙනවා. කොළඹ – කොටුවෙන් සවසට සාමාන්ය වෙලාවට ගමන් ආරම්භ කරනවා. 18 සහ 19 දෙදිනත් උදෑසන 08.20 බෙලිඅත්ත දුම්රිය ස්ථානයෙන් පිටත් වෙනවා. මාතර දුම්රිය ස්ථානයේ රුහුණු කුමාරි සහ ගාලු කුමාරි දුම්රිය සාමාන්ය පරිදි පිටත් වෙනවා. ඒ වගේම ගාල්ල දුම්රිය ස්ථානයෙන් අලුයම 03.15ට 04.00ට 04.10ට 05.00ට 05.15ට පැය භාගයෙන් භාගයට කොළඹ කොටුව බලා දුම්රිය පිටත් වෙනවා. ඒ වගේම හෙට දින සිට උදෑසන මහව, ගනේවත්ත, කුරුණෑගල, රඹුක්කන සහ පොල්ගහවෙල සිට සාමාන්ය පරිදි කාර්යාල දුම්රිය ධාවනය කිරීමට සැලැසුම් කරලා තියෙනවා. හලාවතෙන් තව දුම්රිය දෙකක්, අවිස්සාවේල්ලෙන් දුම්රිය තුනකුත්, කොස්ගමින් දුම්රියකුත් හෙට දින උදෑසන කොළඹට ඇවිත් සාමාන්ය පරිදි සවස කාර්යාල දුම්රිය ටික ධාවනය කිරීමට සැලැසුම් කරලා තියෙනවා.”
සිංහල හා දෙමළ අලුත් අවුරුදු සමයේ ගම්බිම් බලා ගොස් ගාල්ල සහ මාතර සිට මාකුඹුරට පැමිණෙන මගී ජනතාවට මාර්ගත ක්රමය ඔස්සේ ප්රවේශ පත්ර ලබාගත හැකි බව ප්රවාහන, මහමාර්ග සහ නාගරික සංවර්ධන අමාත්යංශය පවසයි.
සමාජ මාධ්ය සටහනක් තබමින් අමාත්යංශය සඳහන් කරන්නේ, එහි ඇති QR කේතය ස්කෑන් කිරීමෙන් සිය ආසනය වෙන් කරගත හැකි බවය.
එසේ නොමැති නම් www.busticket.gov.lk හෝ 011 200 1266 යන ක්ෂණික දුරකතනය අංකය හරහා ප්රවේශ පත්ර වෙන් කරගත හැකි බව ප්රවාහන, මහමාර්ග සහ නාගරික සංවර්ධන අමාත්යංශය සඳහන් කරයි.
