Category: news_main

‘Rebuilding Sri Lanka’ යටතේ ජන ජීවිතය නැවත ගොඩනැගීම සඳහා දිස්ත්‍රික් මට්ටමින් සැලසුම් කෙරෙන වැඩපිළිවෙළ සහ එහිදී මතුව ඇති ගැටලු පිළිබඳ සොයා බැලීමේ විශේෂ සාකච්ඡාවක් ජනාධිපති අනුර කුමාර දිසානායක මහතාගේ ප්‍රධානත්වයෙන් අද (20) ජනාධිපති කාර්යාලයේදී පැවැත්විණි.

ආරක්ෂක, කෘෂිකර්ම, වාරිමාර්ග, ජල සම්පාදන, ධීවර, ප්‍රවාහන, නිවාස සහ ඉදිකිරීම් ආදී විෂයයන්ට අයත් අමාත්‍යාංශවල ලේකම්වරුන්, අදාළ ආයතනවල ප්‍රධානීන් සහ සියලු දිස්ත්‍රික් ලේකම්වරුන් ද මේ සඳහා සහභාහී වී තිබේ.

නිවාස පිරිසිදු කර ගැනීම සඳහා රජයෙන් ලබා දෙන රුපියල් 25,000 සහ ගෘහ උපකරණ මිලදී ගැනීමට ලබා දෙන රුපියල් 50,000ක දීමනාව මෙම දෙසැම්බර් 31 දිනට පෙර ලබා දීමට කටයුතු කරන ලෙස මෙහිදී ජනාධිපතිවරයා උපදෙස් දුන්නේය.

එමෙන්ම නිවාස සහ වගා හානි සඳහා වන්දි ගෙවීම්, දිවයින පුරා පවත්වා ගෙන යන සුරක්ෂිත මධ්‍යස්ථානවල කටයුතු, ජනතාව නැවත පදිංචි කිරීම, ජීවනෝපාය මාර්ග යළි ගොඩ නැගීම සහ යටිතල පහසුකම් සංවර්ධනය සඳහා දිස්ත්‍රික් මට්ටමින් ක්‍රියාත්මක වැඩ පිළිවෙළ සහ එහි ප්‍රගතිය පිළිබඳව මෙහිදී විමසා බලන ලදී.

වන්දි ලබා දීමේ ක්‍රියාදාමයේදී මතුව ඇති ගැටලු පිළිබඳව විශේෂ අවධානයක් යොමු කෙරුණු අතර, එම කටයුතු කාර්යක්ෂම කිරීම සහ කිසිවෙක් අත්නොහැරෙන පරිදි වන්දි හිමි විය යුතු සියලු දෙනාටම එම ප්‍රතිලාභය ලබා දීමේ අවශ්‍යතාව ජනාධිපතිවරයා මෙහිදී අවධාරණය කළේය.

එමෙන්ම ජනතාව නැවත පදිංචි කිරීම් සහ ඒ සඳහා අවශ්‍ය ඉඩම් හඳුනා ගැනිම පිළිබඳවද පුළුල් ලෙස සාකච්ඡා කෙරුණු අතර, ප්‍රධාන දිස්ත්‍රික්කවල ක්‍රියාත්මක කළ යුතු නිවාස ව්‍යාපෘති පිළිබඳ වෙනම සැලැස්මක් සකස් කිරීමටත්, ඊට අදාළව සියලු පාර්ශ්වයන්ගේ සහභාගිත්වයෙන් සාකච්ඡාවක් යළි කැඳවීමටත් කටයුතු කරන බව ජනාධිපතිවරයා පැවසීය.

එමෙන්ම අධි අවදානම් සහිත ප්‍රදේශවල ජනතාව කඩිනමින් එම ස්ථානවලින් ඉවත් කර සුරක්ෂිත ස්ථානවල පදිංචි කිරීමේ අවශ්‍යතාව පෙන්වා දුන් ජනාධිපතිවරයා නිවාස හානි සඳහා වන්දි ලබාදීමේදී සාධාරණ සහ විනිවිද භාවයෙන් යුතුව එම කටයුතු ක්‍රියාත්මක කිරීමේ අවශ්‍යතාවද පැහැදිලි කළේය.

මහ කන්නයට ගොවි ජනතාව සූදානම් කිරීම සඳහා අවශ්‍ය වාරිමාර්ග ප්‍රතිසංස්කරණය, වන්දි ලබාදීම සහ බිත්තර වී ඇතුළු පහසුකම් ලබාදීමේ වැඩසටහන්හි ක්‍රියාකාරිත්වයද ජනාධිපතිවරයා විමසා බැලීය.

එමෙන්ම හානි වූ සත්ව ගොවිපොළ සඳහා වන්දි ලබා දෙමින් එම ජනතාවගේ ජීවනෝපාමාර්ග යළි ආරම්භ කිරීම, ආපදවෙන් හානි වූ කුඩා වෙළෙඳ ව්‍යාපාර යළි ආරම්භ කිරීමට සහාය වීම, ධීවර කර්මාන්තය යථාවත් කිරීම සහ පාසල් දරුවන් වෙනුවෙන් රජයෙන් ලබා දෙන රුපියල් 15,000ක දීමනාව කඩිනමින් ලබාදී අවසන් කිරීමේ වැඩසටහන්හි ප්‍රගතියද සාකච්ජා කෙරිණි.

දිට්වා සුළි කුණාටුවෙන් විපතට පත්වූවන්ගේ මානසික සුවතාවය ඉහළ නැංවීමේ අරමුණින් ආරම්භ කළ ‘Beyond Recovery’ නව වැඩසටහන යටතේ රාජ්‍ය නිලධාරීන් පුහුණු කිරීමේ මූලික වැඩමුළුව ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් පැවැත්විණි.

ආපදාවට ලක්වූ ප්‍රධාන දිස්ත්‍රික් 6ක මානසික සුවය සම්බන්ධව අවබෝධයක් තිබෙන දිස්ත්‍රික් ලේකම් සහ ප්‍රාදේශීය ලේකම් කාර්යාලවල නිලධාරීන් තෝරාගෙන ඔවුන් පුහුණු කිරීම මේ යටතේ සිදු කරනු ලබයි.

එම පුහුණු වැඩසටහන් මෙරට මානසික සුවතාවය පිළිබඳ ප්‍රවීනයන් විසින් සිදු කරන බව සඳහන් වේ.

ආපදාවට ලක්වූ දිස්ත්‍රික්කවල සුරක්ෂා මධ්‍යස්ථාන තුළ ක්‍රියාත්මක කළ යුතු විද්‍යාත්මක වැඩසටහන් සැකසීම මෙන්ම උපදේශන මාලාවන් නිර්මාණය කිරීම ඇතුළු මානසික උපදේශන වැඩසටහන් සම්බන්ධවද මෙම මූලික වැඩසටහනේදී සාකච්ඡා කෙරිණි.

ක්ලීන් ශ්‍රී ලංකා වැඩසටහනේ මුඛ්‍ය පරමාර්ථය වන්නේ මෙරට සමාජයීය ආචාරධර්ම සහ පාරිසරික යහපැවැත්ම උසස් මට්ටමකට ගෙන ඒම වන අතර, එය යථාර්ථයක් බව පත් කිරීමේ අරමුණින් මෙම ‘Beyond Recovery’ මානුෂීය මෙහෙයුම ආරම්භ කර තිබේ.

මෙම වැඩමුළුවට සහභාගි වී පුහුණුව ලබන රාජ්‍ය නිලධාරීන් නුදුරේදීම සුරක්ෂා මධ්‍යස්ථාන හරහා ආපදාවට ලක්වූ ජනතාවගේ මානසික සුවතාවය ඉහළ නැංවීම උදෙසා වැඩසටහන් ක්‍රියාත්මක කරනු ඇත.

හදිසි ආපදා තත්ත්වය හේතුවෙන් අඩාල වූ ජන ජීවිතය යථා තත්ත්වයට පත්කිරීම සඳහා පාර්ලිමේන්තුවට ඉදිරිපත් කළ රුපියල් බිලියන 500ක පරිපූරක ඇස්තමේන්තුව ඡන්ද විමසීමකින් තොරව අනුමත වී තිබේ.

මෙම පරිපුරක ඇස්තමේන්තුව අග්‍රාමාත්‍යවරිය විසින් ඊයේ (18) දින පාර්ලිමේන්තුවට ඉදිරිපත් කළාය.

ඒ අනුව අද (19) දින පෙ.ව10.00 සිට ප.ව 6.10 දක්වා ඒ සඳහා වූ විවාදය පැවැත්වීමෙන් අනතුරුව මෙම පරිපූරක ඇස්තමේන්තුව අනුමත විය.

ත්‍රස්‍තවාදයට එරෙහි නව පනත පිළිබඳව ජනතාවගේ මත විමසුමක් සිදු කරන අතර එළැඹෙන පෙබරවාරි 28 දක්වා කාලය තුළ ඒ සඳහා අදහස් දැක්වීම සිදු කළ හැකි බව අධිකරණ සහ ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර මහතා පවසයි.

නව රජය බලයට පත් වීමත් සමග දෙන ලද ප්‍රධාන පොරොන්දුවක් වූයේ පැරණි ත්‍රස්‍තවාදය වැළැක්වීමේ පනත අහෝසි කර මානව හිමිකම් ආරක්ෂා වන පරිදි පුද්ගලයින්ගේ භාෂණයේ නිදහස ආරක්ෂා වන පරිදි නව ත්‍රස්‍තවාදයට එරෙහි පනතක් සැකසීම වන බවද ඒ මහතා වැඩිදුරටත් පැවසීය.

ඒ අනුව ජනාධිපති නීතිඥ රියන්සි අර්සකුලරත්න ප්‍රමුඛ විද්වතුන් 17 දෙනෙකුගෙන් සැදුම්ලත් කමිටුවක් පරණ නීති ඉවත් කර අලුතින්ම ත්‍රස්‍තවාදයට එරෙහි පනතක් ගෙන එනු ලැබූ බවත් එය මේ වන විට භාෂා 3න්ම සකස් කර ඉදිරිපත් කර ඇති බවත් අමාත්‍යවරයා සඳහන් කළේය.

ඔහු වැඩිදුරටත් පැවසුවේ එම කෙටුම්පත් තුන අධිකරණ අමාත්‍යංශයේ වෙබ් අඩවියට උඩු ගත කර ඇති අතර මෙම පනත පාර්ලිමේන්තුවට හෝ කැබිනට්ටුවට ඉදිරිපත් කිරීමට ප්‍රථම මහජනතාවගෙන් අදහස් විමසීම සඳහා කාලය ලබා දී ඇති බවය.

ඒ අනුව මෙම නව නීතිය භාෂා තුනෙන්ම නිල වෙබ් අඩවියේ පල කර ඇති අතර මේ පිළිබඳව ජනතාවගේ අදහස් ගැනීමට, සංශෝධන කිරීමට අවශ්‍ය නම් ඒ කුමක් ද යන්න පිළිබඳව දැනුම්දීමට මේ කාලය විවෘතව පවතියි.

හර්ෂණ නානායක්කාර මහතා ජනතාවගෙන් ඉල්ලා සිටින්නේ මෙම කෙටුම්පත සම්බන්ධයෙන් අධ්‍යනය කර අලුත් අදහස් ලබා දී රජයට සහාය වන ලෙසය.

එමෙන විවිධ පුද්ගලයින්, සිවිල් සංවිධාන, වෘත්තීය සමිති නායකයින් මේ වන විටත් අදහස් ඉදිරිපත් කර ඇති අතර ඒ පිළිබඳව සාධනීය ලෙස සලකා බලන බවද මෙහිදී ඒ මහතා වැඩිදුරටත් පැවසීය.

පෙබරවාරි 28 පසුව නීතිඥ රියන්සි අර්සකුලරත්න ප්‍රමුඛ කණ්ඩායම මගින්ම ඒ යෝජනා සලකා බලමින් ඉතා සාධනීයව මෙම පනත වෙනස් කිරීමට අවශ්‍ය පියවර ගන්නා බව ද ඔහු සඳහන් කළේය.

අමාත්‍යවරයා වැඩිදුරටත් සඳහන් කළේ මෙසේ වෙබ් අඩවියේ පල කර ඇත්තේ අවසන් වූ පනතක් නොව ජනතාවගේ අදහස් ලබා ගැනීමට යොදා ගත් කෙටුම්පතක් පමණක් වන බවය.

ඒ අනුව ඕනෑම අයෙකුට මේ සම්බන්ධයෙන් අදහස් දැක්විය හැකි බවත් මෙම අවස්ථාව ප්‍රයෝජනයට ගෙන මේ සම්බන්ධයෙන් වූ සාධනීය අදහස්, විවේචන ලබා දෙන ලෙසත් ඒවා අධිකරණ අමාත්‍යංශයේ ලේකම් වෙත ඉදිරිපත් කරන ලෙසත් අධිකරණ අමාත්‍යවරයා මෙහිදී පැවසීය.