ගනේමුල්ල සංජීව ඝාතනයට සම්බන්ධ ඉෂාරා සෙව්වන්දිට නවාතැන් පහසුකම් ලබා දුන් මතුගම ප්රදේශයේ කාන්තාව එළැඹෙන 24 වැනිදා දක්වා රක්ෂිත බන්ධනාගාරගත කිරීමට කොළඹ මහේස්ත්රාත් අධිකරණය නියෝග කර තිබේ.
අදාළ කාන්තාව අධිකරණ වෛද්ය නිලධාරීවරයා හමුවට ඉදිරිපත් කිරීමෙන් අනතුරුව කොළඹ අපරාධ කොට්ඨාසයේ සිට කොළඹ මහේස්ත්රාත් අධිකරණයට ඉදිරිපත් කරනු ලැබීය.
සැකකාර ඉෂාරා සෙව්වන්දිට නවාතැන් පහසුකම් ලබා දීම සම්බන්ධයෙන් මතුගම වැලිපැන්න නිවසේ හිමිකාරිය වූ 52 හැවිරිදි වූ මෙම කාන්තාව පසුගියදා පොලීසිය විසින් අත්අඩංගුවට ගනු ලැබීය.
නේපාලයේදී අත්අඩංගුවට ගෙන මෙරට රැගෙන එන ලද සංවිධානාත්මක අපරාධ කල්ලි සාමාජිකයෙකු වන ‘ගම්පහ බබා’ නැමති සැකකරුගෙන් අනාවරණ කර ගත් තොරතුරකට අනුව T – 56 උණ්ඩ 50ක් සොයා ගෙන තිබේ.
කැලණිය කොට්ඨාස අපරාධ විමර්ශන කාර්යාංශයේ රඳවාගෙන ප්රශ්න කරන ගම්පහ බබා නැමැත්තා ඊයේ (18) පෑලියගොඩ කොට්ඨාස අපරාධ විමර්ශන කාර්යංශය වෙත රැගෙනවිත් තිබුණි.
එහිදී කළ ප්රශ්න කිරීම්වලදී අනාවරණ වූ තොරතුරු අනුව මෙම ජීව උණ්ඩ 50ක පමණ ප්රමාණයක් කඳාන කෙරවලපිටිය අධිවේගි පිවිසුමේ කණුවක් අසල තිබි සොයා ගෙන ඇත.
අදාළ පතොරම් තොගය වැලිසර අධිකරණයට ඉදිරිපත් කිරීමට නියමිත අතර ඔහුට ඒවා ලබාදී ඇත්තේ කෙහෙල්බද්දර පද්මේ විසින් බව අනාවරණ කර තිබුණි.
වාලච්චේන කාවත්තමුන ප්රදේශයේ ත්රීරෝද රථයක් ට්රැක්ටරයක ගැටී සිදු වූ අනතුරකින් 9 හැවිරිදි දරුවෙකු මියගොස් තිබේ.
ඊයේ දහවල් කාලයේදි අතුරු මාර්ගයක ධාවනය වූ අදාල ත්රීරෝද රථය මාර්ගය අයිනේ නතර කර තිබූ අත් ට්රැක්ටරයක ගැටී අනතුර සිදුව ඇති අතර ඉන් බරපතළ තුවාල ලැබූ ත්රිරෝද රථයේ පිටුපස අසුනේ ගමන්ගත් පිරිමි දරුවෙකු වාලච්චේන රෝහලට ඇතුළත් කිරීමේදී මියගොස් ඇති බව පොලිසිය පැවසුවේය.
මෙලෙස මියගොස් ඇත්තේ වාලච්චේන කාවත්තමුන ප්රදේශයේ පදිංචි දරුවෙකි.
මෘත ශරීරය පශ්චාත් මරණ පරීක්ෂණයෙන් පසු ඥාතීන්ට භාර දී ඇති අතර සිද්ධියට සම්බන්ධ ත්රීරෝද රථයේ රියදුරු අත්අඩංගුවට ගෙන ඇත.
වාලච්චේන පොලිසිය සිද්ධිය සම්බන්ධයෙන් වැඩිදුර විමර්ශන සිදු කරයි.
මේ අතර, මිහින්තලය සීප්පුකුලම ගලෙන්බිඳුනුවැව පාළුවැව ප්රදේශයේ සිදුවු අනතුරකින් පුද්ගලයෙකු මියගොස් තිබේ.
ගලෙන්බිඳුනුවැව පාළුවැව ප්රදේශයේදී ගලෙන්බිඳුනුවැව දෙසට ධාවනය වූ යතුරුපැදියක් මාර්ගය අයිනේ නවතා තිබූ කැබ් රථයක ගැටී අදාළ අනතුර සිදුව ඇති අතර අනතුරින් බරපතළ තුවාල ලැබූ යතුරුපැදිකරු තම්මැන්නාව රෝහලට ඇතුළත් කිරීමේදී මියගොස් ඇති බව සදහන් වේ.
මෙලෙස මියගොස් ඇත්තේ 43 හැවිරිදි සීප්පුකුලම, මිහින්තලය ප්රදේශයේ පදිංචිකරුවෙකි.
සිද්ධියට සම්බන්ධ කැබ් රථයේ රියදුරු පලාගොස් ඇති අතර සැකකරු අත්අඩංගුවට ගැනීම සඳහා මිහින්තලය පොලිසිය වැඩිදුර විමර්ශන සිදු කරයි.
විමර්ශන කටයුත්තක් සඳහා ඉෂාරා සෙව්වන්දි අදත් කොළඹ අපරාධ කොට්ඨාසයෙන් පිටතට රැගෙන ගොස් තිබේ.
මේ අතර පොලිසිය පැවසුවේ, ඇයට සැඟවී සිටීමට ආධාර අනුබලදුන් පොලිස් කොස්තාපල්වරයා තොරතුරු වසන් කිරීම හේතුවෙන් අත්අඩංගුවට ගත් බවය.
අපරාධකරුවකු වන ගණේමුල්ල සංජීව ඝාතනය කිරීමේ සිද්ධියේ ප්රධාන සැකකරුවන ඉෂාරා සෙව්වන්දිගෙන් කොළඹ අපරාධ කොට්ඨාසය මේ වන විටත් රඳවාගෙන ප්රශ්න කරනු ලබයි.
මේ අතර කැලණිය කොට්ඨාස අපරාධ විමර්ශන කාර්යාංශයේ රඳවාගෙන ප්රශ්න කරන ගම්පහ බබා නැමැත්තා කෙහෙල්බද්දර පද්මේගේ පියාගෙන් පද්මේව හඳුනාගත් බව සිදුකළ ප්රශ්න කිරිම්වලදී අනාවරණ වී ඇත.
ඔහු විමර්ශන නිලධාරින් හමුවේ පවසා ඇත්තේ, තමන් කෙහෙල්බද්දර පද්මේගේ මත්ද්රව්ය ජාලයටද සම්බන්ධ වී සිටි බවය.
ගම්පහ ඔස්මන් නැමැත්තා ඝාතනය කිරීම සඳහා වෙඩික්කරුවන් පැමිණි කැබ් රථය පද්මේගේ උපදෙස් මත තමන් සතුව තබාගත් බවද සැකකරු පවසා තිබේ.
නීතිඥ ගුණරත්න වන්නිනායක මහතා සහ ඔහුගේ පුත්රයා ප්රකාශයක් ලබාදීම සඳහා අද (18) ගල්කිස්ස පොලිස් ස්ථානය වෙත පැමිණ තිබේ.
ගල්කිස්ස මහෙස්ත්රාත් අධිකරණ භූමියේ පසුගියදා සිදුවු සිදුවීමට මුහුණදුන් නීතීඥවරයාගේ පැමිණිල්ලට අදාළව සාක්ෂි ලබාදීම වෙනුවෙන් වන්නිනායක මහතා සහ ඔහුගේ පුත්රයා පොලීසිය වෙත පැමිණ ඇති බව සඳහන්ය.
පසුගිය 10 වැනිදා ගල්කිස්ස අධිකරණ පරිශ්රයේදී පොලිස් කොස්තාපල්වරයෙකු විසින් නීතීඥවරයෙකුට පහරදුන් බවට චෝදනා කරමින් නීතීඥ ගුණරත්න වන්නිනායක මහතා අදාළ පොලිස් කොස්තාපල්වරයාට පරුෂ වචනයෙන් බැනවැදුන වීඩියෝවක් සමාජ මාධ්යයේ සංසරණය විය.
අදාළ පොලිස් කොස්තාපල්වරයා විසින් අධිකරණ පරිශ්රයේ තිබූ මෝටර් රථයක් ඉන් පිටතට ගන්නා ලෙස පවසා ඇති අතර එහිදි ඇති වු බහින් බස්වීමක් හේතුවෙන් මෝටර් රථයේ සිටි නීතීඥවරයෙකුට ඔහු විසින් පහරදුන් බවට වාර්තා වුණි.
එම අවස්ථාවේදී නීතීඥ ගුණරත්න වන්නිනායක මහතා සහ ඔහුගේ පුත්රයා ද අදාළ මෝටර් රථයේ සිට ඇති බව වාර්තා වෙයි.
සිද්ධියට මුහුණදුන් නීතීඥවරයා ගල්කිස්ස පොලිස් ස්ථානයට පැමිණිල්ලක් සිදුකර ඇති අතර ඊට අදාළව සාක්ෂි ලබාදීම සඳහා ගුණරත්න වන්නිනායක මහතා සහ ඔහුගේ පුත්රයා අද දින ගල්කිස්ස පොලීසිය වෙත කැඳවා තිබුණි.
මේ අතර සිද්ධියට මුහුණදුන් පොලිස් කොස්තාපල්වරයාට ගල්කිස්ස පොලිස් ස්ථානයේ සිට පිළියන්දල පොලිස් ස්ථානයට ස්ථාන මාරුවක් ලබා දී තිබු නමුත් ඔහු මේ දක්වාත් රාජකාරියට වාර්තා කර නොමැති බව සඳහන්ය.
අසනීප නිවාඩු වාර්තා කරමින් ඔහු මෙලෙස නිවාඩු ලබා ඇති අතර නීතීඥවරයාගේ පැමිණිල්ලට අදාළව ඔහුගෙන් ද ප්රකාශයක් සටහන් කරගැනීම සඳහා ගල්කිස්ස පොලිස් ස්ථානය වෙත කැඳවීමක් සිදුකර ඇති බව පොලීසිය වැඩිදුරටත් සඳහන් කළේය.
මත්ද්රව්ය ජාවාරමෙන් උපයාගන්නා ලද රුපියල් 30,24,900ක මුදලක් සන්තකයේ තබාගෙන සිටි සැකකරුවෙකු පොලීසිය විසින් අත්අඩංගුවට ගෙන තිබේ.
අත්අඩංගුවට ගන්නා අවස්ථාවේ සැකකරු සන්තකයේ හෙරොයින් ග්රෑම් 2 මිලිග්රෑම් 300ක් තිබී ඇත.
ඊයේ (17) දින දහවල් කාලයේ පොළොන්නරුව පොලිස් වසමේ මාඔය, බැඳිවැව ප්රදේශයේදී පොළොන්නරුව පොලිස් ස්ථානයේ නිලධාරීන්ට ලද තොරතුරකට අනුව මනම්පිටිය නිල සුනඛ ඒකකයේ නිලධාරීන් සමග ඒකාබද්ධව සිදුකළ වැටලීමකදී මෙම සැකකරු අත්අඩංගුවට ගෙන තිබේ.
සැකකරු වයස අවුරුදු 28ක් වන බැඳිවැව ප්රදේශයේ පදිංචිකරුවෙකි.
සිද්ධිය සම්බන්ධයෙන් පොළොන්නරුව පොලීසිය වැඩිදුර විමර්ශන සිදු කරයි.
කළුතර බන්ධනාගාර තුළ රඳවා සිටින රැඳවියෙකුට මත්ද්රව්ය සහ ජංගම දුරකථන ලබාදීම සඳහා කාන්තාවකට ආධාර අනුබල දුන්බව කියන බන්ධනාගාර ජේලර්වරයෙකු කළුතර උතුර පොලීසිය විසින් අත්අඩංගුවට ගෙන ඇත.
මෙසේ අත්අඩංගුවට ගෙන ඇත්තේ වස්කඩුව ප්රදේශයේ පදිංචි 53 හැවිරිදි ජේලර්වරයෙකු බව පොලීසිය පැවසීය.
පානදුර, හිරණ ප්රදේශයේ කාන්තාවක පසුගිය දිනක කළුතර බන්ධනාගාරයේ රැඳවියෙකුට අයිස් මත්ද්රව්ය, හෙරොයින් සහ ජංගම දුරකථනයක් ලබාදීම සඳහා සූදානම්වීමේදී අත්අඩංගුවට ගෙන තිබුණි.
එම කාන්තාවගෙන් ප්රශ්න කිරීමේදී සැකකාර ජේලර්වරයා රුපියල් 35,000ක මුදලක් ලබාගෙන ඇති බව හෙළි වී ඇත.
සැකකරු ජේලර්වරයා කළුතර මහෙස්ත්රාත් අධිකරණයට ඉදිරිපත් කිරීමට නියමිත අතර, කළුතර උතුර පොලීසිය වැඩිදුර පරීක්ෂණ පවත්වති.
ක්ලබ් වසන්ත ඝාතනය සම්බන්ධයෙන් මේවන විට බූස්ස බන්ධනාගාරයේ රඳවා සිටින ලොකු පැටීගේ සමීපතමයෙක් මූල්ය අපරාධ විමර්ශන කොට්ඨාසය මගින් අත්අඩංගුවට ගෙන තිබේ.
එහිදී සැකකරු සතුව තිබී ටී-56 ගිනිඅවියක්, ෂොට් ගන් දෙකක් සහ ජීව උණ්ඩ තොගයක් පොළොව යට සඟවා තිබියදී සොයා ගෙන ඇත.
මෙම අවිආයුධ ලොකුපැටී විසින් ඊයේ දිනයේදී ටිපර් රථයක සූක්ෂ්ම ලෙස සඟවා සැකකරු වෙත එවා ඇති බව ද මූලික විමර්ශනවලදී අනාවරණය වී තිබේ.
අදාළ ටිපර් රථයෙන් මත්ද්රව්ය කොළඹට එවීම සඳහා ලොකු පැටී සූදානමින් සිට ඇති බවට ද විමර්ශනවලදී හෙළිවූ බව පොලිසිය සඳහන් කළේය.
අත්අඩංගුවටගත් පුද්ගලයා යුද හමුදා විශේෂ බලකායේ හිටපු සෙබලෙක් වන අතර ඔහුව තවත් හිටපු එස්.එෆ් සෙබලෙකු විසින් ලොකු පැටීට සම්බන්ධ කර තිබේ.
අදාළ සැකකරු අත්අඩංගුවට ගෙන සිටින විටත් බූස්ස අධිආරක්ෂිත බන්ධනාගාරයේ රඳවා සිටින ලොකු පැටී ඔහුට දුරකතන ඇමතුම් ලබාදී ඇති බවයි වාර්තා වේ.
මේ අතර ලොකු පැටී හිටපු යුද හමුදා විශේෂ බලකා නිලධාරීන්ගෙන් සමන්විත අපරාධ කල්ලියක් සකසාගෙන සිටින බවටද විමර්ශනවලදී හෙළිවී ඇත.
අපරාධ පරීක්ෂණ දෙපාර්තමේන්තුව භාර ජ්යෙෂ්ඨ නියෝජ්ය පොලිස්පති අසංක කරවිට මහතාගේ සෘජු අධීක්ෂණයෙන් අදාළ වැටලීම සිදුකර තිබේ.
දිවයින පුරා ක්රියාත්මක වන පරිදි ශ්රී ලංකා පොලීසිය සිදුකරගෙන යනු ලබන අපරාධ හා මත්ද්රව්ය නිවාරණ මෙහෙයුම් මඟින් දිවයින පුරා අපරාධ වලට සම්බන්ධ සැකකරුවන් අත්අඩංගුවට ගැනීම සිදුකරයි.
ඒ අනුව, පොලිස්පතිවරයාගේ උපදෙස් මත කොට්ඨාස මට්ටමින් සියළුම ප්රාදේශීය පොලිස් ස්ථාන ආවරණය වන පරිදි විශේෂ මෙහෙයුම් ක්රියාත්මක කර ඇත.
ඊයේ (15) දිනයේ වාර්තාව පහත පරිදි වේ.
පරීක්ෂා කල පුද්ගලයින් ගණන – 28,020
සැකපිට අත්අඩංගුවට ගත් පුද්ගලයින් ගණන – 577
අපරාධ සම්බන්ධයෙන් සෘජුව හඳුනාගත් පුද්ගලයින් ගණන – 17
අත්අඩංගුවට ගෙන ඇති දින වරෙන්තුකරුවන් ගණන – 269
අත්අඩංගුවට ගෙන ඇති විවෘත වරෙන්තුකරුවන් ගණන -144
බීමත් රියදුරන් අත්අඩංගුවට ගැනීම් -15
අපරික්ෂාකාරි රිය පැදවීම් වලට අත්අඩංගුවට ගැනීම් -13
රථවාහන වෙනත් වැරදි – 3504
පොලිස් මත්ද්රව්ය නාශක කාර්යාංශයේ අධ්යක්ෂ, ජ්යෙෂ්ඨ පොලිස් අධිකාරී හේමාල් ප්රශාන්ත මහතාට ස්ථානමාරුවක් ලබාදෙනු ලැබුවේ ඔහුට එරෙහිව සිදුකරන විමර්ශනයකට අදාළව බව පොලිස් මූලස්ථාන ආරංචි මාර්ග සඳහන් කරයි.
තොරතුරුකරුවන් ලබාදීමට තිබූ රු ලක්ෂ 50ක මුදලක් අවභාවිත කිරීම, පරිපාලන දුර්වලතා සහ මාස තුනක් තුළ නිසි පරිදි මත්ද්රව්ය වැටලීම් සිදුනොකිරීම ඔහුට එරෙහිව ඇති චෝදනා බව සඳහන්ය.
රු ලක්ෂ 50ක මුදලක් අවභාවිත කිරීම සම්බන්ධයෙන් අපරාධ පරීක්ෂණ දෙපාර්තමේන්තුවට මේ වනවිට පරීක්ෂණයක් ආරම්භ කර තිබේ.
ඒ අනුව මොහු ස්ථානමාරු කිරීම් සිදුකරන ලෙස පසුගිය සැප්තැම්බර් මස 25 වනදා පොලිස් කොමිෂන් සභාවට දැනුම්දී ඇත.
ඒ අනුව ඊට අදාළ නියෝගය ඊයේ (15) දිනයේ දී ලැබී ඇති අතර, ඒ අනුව ඔහුව ස්ථානමාරු කළ බව පොලිස් මූලස්ථාන ආරංචි මාර්ග වැඩිදුරටත් සඳහන් කළේය.
කෙසේවෙතත් ජ්යෙෂ්ඨ පොලිස් අධිකාරී හේමාල් ප්රශාන්ත මහතාගේ ස්ථානමාරුව සම්බන්ධයෙන් සමාජ මාධ්ය තුළ පළ වන වාර්තා සම්පූර්ණයෙන් අසත්ය බවද පොලිස් මූලස්ථාන ආරංචි මාර්ග වැඩිදුරටත් සඳහන් කළේය.
