කිසිදු සාධාරණ හේතුවක් නොමැතිව තමන්ව අත්අඩංගුවට ගෙන රිමාන්ඩ් භාරයට පත් කිරීමට කොළඹ අපරාධ කොට්ඨාසය විසින් කරනු ලැබූ තීරණය අභියෝගයට ලක් කරමින් අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර ඇතුළු තිදෙනෙකු විසින් ඉදිරිපත් කළ මූලික අයිතිවාසිකම් පෙත්සම් පිළිබඳ විභාගය අවසන් කළ ශ්රේෂ්ඨාධිකරණය එහි තීන්දුව ප්රකාශයට පත් කිරීම කල් තැබීය.
අගවිනිසුරු ප්රීති පද්මන් සූරසේන, අචල වෙංගප්පුලි සහ ගිහාන් කුලතුංග යන මහත්වරුන්ගෙන් සමන්විත ත්රි පුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් කැඳවනු ලැබීය.
පෙත්සම්කරුවන් වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් කෝටිපති ව්යාපාරික මොහොමඩ් සියාම් ඝාතන සිද්ධියට අදාළව සිදුකළ විමර්ශනවලදී ව්යාජ ලෙස සාක්ෂි නිර්මාණය කළ බවට චෝදනා කරමින් තම සේවාදයකයින් කොළඹ අපරාධ කොට්ඨාශය මගින් අත්අඩංගුවට ගෙන රිමාන්ඩ් භාරයට පත් කිරීම නීතියට පටහැනි බව තර්ක කළේය.
මේ තුළින් සිය සේවාදායකයින්ගේ මූලික මිනිස් අයිතිවාසිකම් උල්ලංඝනය වී ඇති බවත් නීතිඥවරු පෙන්වා දී තිබුණි.
අදාළ පෙත්සම්වල වග උත්තරකරුවන් වශයෙන් නම් කර සිටි කොළඹ අපරාධ කොට්ඨාසයේ නිලධාරීන් වෙනුවෙන් පෙනීසිටි නීතිඥවරයා කියා සිටියේ පෙත්සම්කරුවන්ව අත්අඩංගුවට ගැනීම සිදුකළේ අධිකරණය විසින් කළ නියෝගයකට අනුව බවය.
සියලු පාර්ශව ඉදිරිපත් කළ කරුණු සලකා බැලූ ශ්රේෂ්ඨාධිකරණය පෙත්සම් විභාගය අවසන් කිරීමට තීන්දු කළ අතර ලිඛිත දේශන තිබේ නම් ඒවා අද සිට මාසයක් තුළ ඉදිරිපත් කිරීමට පියවර ගන්නා ලෙස නියම කළේය.
ඉන් අනතුරුව එහි තීන්දුව ප්රකාශයට පත් කිරීම පසුවට කල් තබන බවත් විනිසුරු මඩුල්ල විසින් නිවේදනය කළේය.
මේ අතර හිටපු ජනාධිපති ගෝඨාභය රාජපක්ෂ මහතා බලයට පත්වීමෙන් පසුව කිසිදු සාධාරණ හේතුවක් නොමැතිව තමන්ව ස්ථාන මාරු කිරීම අභියෝගයක් කරමින් ශානි අබේසේකර මහතා විසින් ඉදිරිපත් කළ විභාගය ද අවසන් කළ ශ්රේෂ්ඨාධිකරණය එහි තීන්දුව ප්රකාශයට පත් කිරීමද පසුවට කල් තැබීය.
මෙම පෙත්සම් ඉදිරිපත් කර තිබුණේ ශානි අබේසේකර සහ අපරාධ පරීක්ෂණ දෙපාර්තමේන්තුවේ සේවය කළ උප පොලිස් පරීක්ෂකවරුන් වන සුදත් මෙන්ඩිස් සහ එන්.ප්රේමසිංහ යන අය විසින්ය.
