Breaking News
විදුලි වෘත්තීය සමිති ආරම්භ කළ වැඩවර්ජනය අත්හිටුවා තිබේ.
අද (11) පස්වරුවේ කම්කරු කොමසාරිස්වරයා මෙන්ම නව විදුලි සමාගම්වල සභාපතිවරුන් සමග පැවති සාකච්ඡාවකින් අනතුරුව ඔවුන් මෙම තීරණයට එළැඹ ඇත.
එහිදී ජනාධිපතිවරයා සමග සාකච්ඡාවක් පැවැත්වීම සඳහා හෙට (12) දිනයේ වෘත්තීය සමිතිවලට අවස්ථාව ලබාදෙන බව ද කම්කරු කොමසාරිස්වරයා ප්රකාශ කර තිබේ.
පසුගිය 09 වැනිදා පස්වරුවේ සිට ආරම්භ කළ විදුලි වෘත්තීය ක්රියාමාර්ගය හේතුවෙන් ප්රදේශ රැසක විදුලි බිඳවැටීම් වාර්තා වූ අතර සේවා නඩත්තු කටයුතු ද සඳහා ද බාධා එල්ල විය.
ආසියානු සංවර්ධන බැංකුවේ නිල ආරාධනය මත පිලිපීනයේ සංචාරයක නිරත අග්රාමාත්ය ආචාර්ය හරිනි අමරසූරිය අද (11) පිලිපීනයේ ලොස් බැනෝස් හි පිහිටි ජාත්යන්තර වී පර්යේෂණ ආයතනයේ (IRRI) ප්රධාන කාර්යාලයේ නිරීක්ෂණයක නිරත විය.
එහිදී ආයතනයේ අධ්යක්ෂ ජනරාල් යොන් පින්ටෝ (Yvonne Pinto) මහත්මිය හමු වූ අග්රාමාත්යවරිය, ශ්රී ලංකාවේ වී වගාව සහ කෘෂිකාර්මික ක්ෂේත්රයේ තිරසාර සංවර්ධනය උදෙසා දෙපාර්ශවය අතර පවතින සහයෝගිතාව තවදුරටත් ශක්තිමත් කරගැනීම පිළිබඳව දීර්ඝ වශයෙන් සාකච්ඡා කළාය.
ශ්රී ලාංකීය වී ගොවීන් මුහුණ දෙන අභියෝග පිළිබඳව විශේෂ අවධානයක් මෙහිදී යොමු කළ අතර විශේෂයෙන්ම, වී නිෂ්පාදනයට බලපාන බාධාවන්, දේශගුණික විපර්යාසයන්ගේ බලපෑම් සහ ගොවි ජනතාව නවීන තාක්ෂණික ක්රමවේද වෙත යොමු කිරීමේ අවශ්යතාව අග්රාමාත්යවරිය විසින් පෙන්වා දුන්නාය.
ශ්රී ලංකාවේ වී අස්වැන්න ඉහළ නැංවීමට සහ ආහාර සුරක්ෂිතතාව තහවුරු කිරීමට අවශ්ය නවීන තාක්ෂණයන් සහ පර්යේෂණ දායකත්වය ලබා ගැනීමේ හැකියාව පිළිබඳව ද මෙහිදී කරුණු සාකච්ඡා විය.
ඒ අනුව, දේශගුණික විපර්යාසයන්ට ඔරොත්තු දෙන නව වී ප්රභේද හඳුන්වා දීම සහ තිරසාර ගොවිතැන් ක්රම ප්රවර්ධනය කිරීම සඳහා IRRI ආයතනය විසින් ක්රියාත්මක කරන ගෝලීය පර්යේෂණ අත්දැකීම් ශ්රී ලංකාව සමඟ හුවමාරු කර ගැනීමට එකඟතාව පළ කෙරිණි.
තවද, ශ්රී ලංකාවේ කෘෂිකාර්මික ආයතනවල ධාරිතාව වර්ධනය කිරීම, පර්යේෂණ හවුල්කාරිත්වයන් ඇති කර ගැනීම සහ දැනුම හුවමාරු කර ගැනීමේ වැඩසටහන් තවදුරටත් පුළුල් කිරීම කෙරෙහි ද දෙපාර්ශවයේ අවධානය යොමු විය.
විද්යාත්මක පදනමක් සහිත කෘෂිකාර්මික නවෝත්පාදනයන් මගින් ශ්රී ලංකාවේ ගොවි ජනතාවගේ ජීවනෝපාය නංවාලීමටත්, ජාතික ආහාර සුරක්ෂිතතාව තහවුරු කිරීමටත් මෙම අන්තර්ජාතික සහයෝගිතාව බෙහෙවින් ඉවහල් වනු ඇති බව අග්රාමාත්යවරිය වැඩිදුරටත් අවධාරණය කළාය.
අද (11) මධ්යම රාත්රියේ සිට ක්රියාත්මක වන පරිදි ලාෆ්ස් ගෑස් මිල ඉහළ දමා තිබේ.
ඒ අනුව රු. 4,330ක්ව පැවති කිලෝග්රෑම් 12.5 ලාෆ්ස් ගෘහස්ථ ගෑස් සිලින්ඩරයක මිල රුපියල් 300කින් ඉහළ දමා තිබේ.
මිල සංශෝධනයට අනුව නව මිල රු. 4,630ක් වේ.
එමෙන්ම කිලෝග්රෑම් 5 ගෑස් සිලින්ඩරයක මිලද රුපියල් 120කින් ඉහළ දමා තිබේ.
ඒ අනුව රු. 1742ක්ව පැවති එහි නව මිල රු. 1,862කි.
පාස්කු ඉරුදින ත්රස්ත ප්රහාරය සම්බන්ධයෙන් සිදුකෙරෙන විමර්ශනවලට අදාළව රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජෙනරාල් සුරේෂ් සලේ මහතා ත්රස්තවාදය වැළැක්වීමේ පනත ප්රකාරව සැකකරුවෙකු ලෙස රැඳවුම් භාරයට ගෙන ඇත්තේ ප්රධාන චෝදනා 03ක් සම්බන්ධයෙන් බව අපරාධ පරීක්ෂණ දෙපාර්තමේන්තුව අද (11) කොටුව මහේස්ත්රාත් අධිකරණය හමුවේ සඳහන් කළේය.
ඒ වව්නතිව් පොලිස් නිලධාරින් ඝාතන සිදුවීම සහ මඩකලපුව සයින්දමරුදු පිපිරීම පිළිබඳ වූ විමර්ශන නොමඟ යැවීමසම්බන්ධයෙන් කොටුව මහේස්ත්රාත් අධිකරණය හමුවේ පවතින නීති කෘත්යය අද කැඳවූ අවස්ථාවේදීය.
2018 වසරේ නොවැම්බර් 29 වනදා වව්නතිව්හි පොලිස් නිලධාරින් දෙදෙනෙකු ඝාතනයවීම සහ පාස්කු ඉරුදින ත්රස්ත ප්රහාරයට පසු 2019 අප්රේල් 26 වනදා සයින්දමරුදුහි නිවසක සිදුවූ පිපිරීම සම්බන්ධයෙන් සිදුකළ විමර්ශන නොමඟ යැවීම සම්බන්ධයෙන් වූ නඩුව කොටුව මහේස්ත්රාත් ඉසුරු නෙත්තිකුමාර මහතා ඉදිරියේ අද කැඳවනු ලැබීය.
එහිදී විමර්ශනයට අදාළව පිටු 25කින් යුත් වැඩිදුර වාර්තාවක් ගොනුකරමින් අපරාධ පරීක්ෂණ දෙපාර්තමේන්තුව කියා සිටියේ, නඩුවේ පළමු සැකකරුවන් දෙදෙනා මේ වනවිට රක්ෂිත බන්ධනාගාරගත කර ඇති බවය.
එහි තෙවන සැකකරුවන රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජෙනරාල් සුරේෂ් සලේගෙන් මේවනවිට අපරාධ පරීක්ෂණ දෙපාර්තමේන්තුව රැඳවුම් භාරයේ ප්රශ්න කරමින් සිටින බවත්ය.
තෙවන සැකකාර සුරේෂ් සලේ පාස්කු ඉරුදින ත්රස්ත ප්රහාරයට සෘජුව සම්බන්ධ බවට කරුණු විමර්ශනයේදී අනාවරණය වී ඇත්දැයි මෙහිදී මහේස්ත්රාත්වරයා විමර්ශන නිලධාරින්ගෙන් ප්රශ්න කළේය.
ඊට පිළිතුරු දුන් අපරාධ පරීක්ෂණ දෙපාර්තමේන්තුවේ විමර්ශන නිලධාරියා කියා සිටියේ, ප්රධාන පැතිකඩ 03ක් ඔස්සේ සුරේෂ් සලේගේ සැකකාරභාවය පිළිබඳ කරුණු අනාවරණය වී ඇති බවය.
“ස්වාමිනි, ත්රස්ත ප්රහාරයට පෙර සමයේ යුධ හමුදා බුද්ධි අංශය විසින් මීගමුව ප්රදේශයේ පුද්ගලයෙකු දිගුකාලීනව තොරතුරු කරුවෙක් ලෙස පවත්වාගෙන ගොස් තිබෙනවා.
මේ තුන්වන සැකකරු එම ඔත්තුකරු යොදාගනිමින් කටුවපිටිය දේවස්ථානය මුස්ලිම් අන්තවාදින්ට පෙන්වා තිබෙනවා. ඒ වගේම යුධ හමුදා බුද්ධි අංශය පානදුර ප්රදේශයේ පවත්වාගෙන ගිය තවත් තොරතුරුකරුවෙකු මෙවැනි ප්රහාරයක් සිදුවේවියැයි පෙර දැනුම්දීමක් කරලා තියෙනවා.
නමුත් ඊට සුදුසු පියවරක් බුද්ධි අංශය අරගෙන නැහැ. ප්රහාරයෙන් පස්සේ එම ඔත්තුකරු බුද්ධි අංශයට පවසා තිබෙනවා “යුධ හමුදාවේ වසර 20ක්වත් පළපුරුද්ද තිබෙන ඉහළ නිලධාරියෙක් මේ පිටිපස්සේ ඉන්න ඕනේ කියලා.
පස්සේ යුධ හමුදා බුද්ධි අංශයම එම ඔත්තුකරුව අත්අඩංගුවට ගෙන ත්රස්ත විමර්ශන කොට්ඨාසය භාරදීමක් සිදුකර තිබෙනවා. පසුව නීතිපති උපදෙස් මත ඒ ඔත්තුකරු නිදහස්වෙලා තියෙනවා.
නිදහස් වෙලා ආවාට පස්සේ මේ තුන්වන සැකකාර සුරේෂ් සලේ ඔත්තුකරුව හෝටලයකට ගෙන්වා ස්තූතියි කරලා තියෙනවා. මේ කරුණු සම්බන්ධයෙන් එම පුද්ගලයෝ මහේස්ත්රාත් ඉදිරියේ ප්රකාශ දී තිබෙනවා” යැයි පැවසීය.
මෙහිදී සාරා ජෙස්මින් නැමැත්තිය මියගිය බවක් DNA පරීක්ෂණ දෙකකදී අනාවරණය වී නොතිබූ පසුබිමක තුන්වන වරටත් DNA පරීක්ෂණයක් කිරීමට සුරේෂ් සලේ විමර්ශන නිලධාරින්ට බලපෑම් කර ඇති බවටද අපරාධ පරීක්ෂණ දෙපාර්තමේන්තුව අධිකරණයට කරුණු දැක්වීය.
“ස්වාමිනි පාස්කු ප්රහාරයෙන් පසු දිනක සෙයින්දමරුදු නිවසේ පිපිරීම සිදුවීම වන අවස්ථාවේ එම ස්ථානයේ සිටී සාරා ජෙස්මින්ගේ මෘත ශරීරයක් මේවන තුරු සොයාගෙන නැහැ. පළමු DNA පරීක්ෂණ දෙකේදීම ඇයගේ මෘත ශරීරයක් හඳුනාගැනුණේ නැහැ. එහෙම තියෙද්දි තෙවන DNA පරීක්ෂණයක් සිදුකරන ලෙස මේ සැකකාර සුරේෂ් සලේ දිගින් දිගටම විමර්ශන නිලධාරින්ට බලපෑම් කරලා තියෙනවා.
හිටපු පොලිස්පති සී.ඩී. වික්රමරත්න සහ විමර්ශන නිලධාරි නිශාන්ත සොයිසා ප්රකාශ දී ඇති අන්දමට ආරක්ෂක කවුන්සලය තුලත් මේ බලපෑම සිදුකරලා තියෙනවා” යැයි පැවසීය
අනතුරුව සැකකාර රාජ්ය බුද්ධි සේවයේ හිටපු අධ්යක්ෂ සුරේෂ් සලේ වෙනුවෙන් ජනාධිපති නීතිඥ අනුජ ප්රේමරත්න මහතා අධිකරණයට කරුණු දැක්වීය.
“මොනවාද ස්වාමිනි මේ විමර්ශන නිලධාරීන් කියන කතා? රාජ්ය බුද්ධි සේවයේ අධ්යක්ෂවරයා ලෙස සිටි මගේ සේවාදායකයා කොහොමද ආරක්ෂක කවුන්සලය කැඳවලා පොලිස්පතිවරයා ඇතුළු විමර්ශන නිලධාරින්ට බලපෑම් කරන්නේ ?.
රාජ්ය බුද්ධි සේවය තියෙන්නෙත් පොලිස්පති යටතේයි. ඔය කියන පොලිස්පතිවරයා ඇතුළු නිලධාරින් ඒ කාලේ නිල ඇඳුම් ඇඳලාද රස්සාව කරලා තියෙන්නේ ? ලැජ්ජයි.
මට කියන්න තියෙන්නේ ස්වාමිනි පාස්කු ප්රහාරය සිද්ධවෙන අවස්ථාවේ මේ තුන්වන සැකකරු ලංකාවේ හිටියෙත් නැහැ. ඔහු හිටියේ මැලේසියාවේ. 2018 ජනවාරි මාසයේයි ඔහු ලංකාවෙන් පිටත්වෙලා තියෙන්නේ.
අනික ස්වාමිනි මේ වෙද්දි පාස්කු ප්රහාරය ගැන විමර්ශන 25කට වඩා වෙලා තියෙනවා. මුලින්ම කිව්වා ඉන්දියාවෙන් පෙර දැනුම්දීමේ තොරතුරක් ආවා, ඒකට අදාළව අවශ්ය පියවර නොගත්තා කියලා හිටපු පොලිස්පතිවයි, ආරක්ෂක ලේකම්ටයි එරෙහිව නඩුත් දැම්මා. දැන් කියනවා බුද්ධි අංශයේ කව්ද ප්රහාරය ගැන පෙර දැනුම්දීමක් කළා කියලා.
ස්වාමිනි, ඔය කවුරුන් තොරතුරු දුන්නත් තොරතුරු ලැබිලාත් ප්රහාරය වළක්වා ගන්න බැරිවුණ එදා CID එකේ ඉඳපු අයමයි අද මේ විමර්ශන මෙහෙයවන්නේ. ඔය මොන විමර්ශනත් අවශ්ය නැහැනේ ඒ අය එදා ප්රහාරයට පෙර සහරාන්ව අල්ලගත්තා නම්.
මේක කියවන්න ස්වාමිනි, මේ ජයකි ද අල්විස් වාර්තාව. ඕක කියවපුවාම තේරෙයි වගකිවයුතු අය පිළිබඳව. මේ අය විමර්ශනය මෙහෙයවද්දි කොහොමද ස්වාමිනි මේක අපක්ෂපාති විමර්ශනයක් වෙන්නේ “.
මෙහිදී රාජ්ය බුද්ධි සේවයේ හිටපු අධ්යක්ෂවරයාව මේවනවිට රැඳවුම්භාරයේ තබාගෙන සිටින ආකාරය සම්බන්ධයෙන්ද ජනාධිපති නීතිඥවරයා කරුණු දැක්වුවා.
“ස්වාමිනි මට උපදෙස් ලැබෙන විදිහට මේ වෙද්දි මගේ සේවාදායකයාව රඳවා තබාගෙන ඉන්නේ ඉතාම පහත් හා කෘෘර විදිහට. පුතා තාත්තාව බලන්න ගියාමත් පොලිස් සහතික අරන් එන්න කියනවා. නීති කෘත්යයට අදාළව අපිට ඔහුව හමුවෙලා උපදෙස් ගන්නත් බැහැ.
නීතිඥවරුන්ට පවා දැනුම්දී තිබෙන්නේ ඔහුව හමුවීම අපරාධ පරීක්ෂණ දෙපාර්තමේන්තුවේ නිලධාරින් ඉදිරියේ කරන්න කියලා. අන්තීම දවසේ නීතිඥවරුන් ඔහු හම්බෙන්න ගියාම නිලධාරින් දෙපැත්තේ ඉඳලා කතා කරන දේවල් Record කරලා.
ඉතිං කොහොමද ස්වාමිනි අපි උපදෙස් ගන්නේ. මේක ආණ්ඩුක්රම ව්යවස්ථාවේ ලිඛිතව සඳහන් මූලික අයිතිවාසිකම් පවා උල්ලංඝනය කිරීමක්.”
ඉදිරිපත් වූ කරුණු සලකා බැලූ කොටුව මහේස්ත්රාත් ඉසුරු නෙත්තිකුමාර මහතා දෙපාර්ශවයේ කරුණු දැක්වීම සම්බන්ධයෙන් සිය නිරීක්ෂණ විවෘත අධිකරණය හමුවේ ප්රකාශ කළේය.
“මා විසින් මෙම නඩුකරයට අදාළව පෙර නඩුවාරයේ ලබාදුන්නු නියෝග විමර්ශන නිලධාරින් විසින් සැලකියයුතු මට්ටමකට ක්රියාත්මක කර ඇති බව පෙනීයනවා. තුන්වන සැකකරුට අදාළව ඉදිරිපත්වෙලා තියෙන කරුණු පාස්කු ප්රහාරයට සෘජුව අදාළ කරුණු. එම සාක්ෂි ප්රමාණවත්ද යන්න ඉදිරි විමර්ශන මත තීරණය කළ යුතුයි.
තුන්වන සැකකරු සම්බන්ධයෙන් කිරීමට ඇති සියලුම ඉල්ලීම් ලිඛිතව කරන්න. පසුව ඒ පිළිබඳ සලකා බලා නියෝගයක් නිකුත් කරන්නම්”.
ඒ අනුව නඩුව වැඩිදුර විමර්ශන වාර්තා සඳහා මාර්තු 25 කැඳවීමට කොටුව මහේස්ත්රාත් ඉසුරු නෙත්තිකුමාර මහතා නියෝග කළේය.
මැදපෙරදිග යුද ගැටුම් හමුවේ උද්ගතව ඇති බලශක්ති අර්බුදයට මුහුණදීම සඳහා හැකි පමණින් ඉන්ධන අරපිරිමැස්මකින් යුතුව පරිභෝජනය කරන්නැයි ලංකා ඛනිජ තෙල් නීතිගත සංස්ථාවේ සභාපති ඩී.ජේ රාජකරුණා මහතා ජනතාවගෙන් ඉල්ලීමක් කරයි.
අද (10) මාධ්ය වෙත අදහස් දක්වමින් ඒ මහතා පැවසුවේ තමන්ට හැකි පමණික් ඉන්ධන පරිභෝජනය අවම කිරීම සඳහා කටයුතු කරන ලෙසටය.
ඉන්ධන මිල ඉහළ යාම සම්බන්ධයෙන් අදහස් දක්වමින් ඒ මහතා පැවසුවේ පසුගිය දින කිහිපයේ තෙල් හිඟයක් පවතින බවට බියෙන් ජනතාව විසින් ඉන්ධන වැඩි වශයෙන් මිලදී ගැනීම, මෙම මිල ඉහළ යාමට බෙහෙවින් බලපෑ බවය.
එසේ නොවුණානම් මේ මස අගවන තුරු පැවති මිල ගණන් යටතේ ඉන්ධන මිල දී ගැනීමට හැකියාවක් තිබූ බවද ඒ මහතා පවසයි.
කෙසේ වෙතත් පවතින ඉන්ධන අර්බුදය ලෝකයටම බලපෑම් එල්ල කරන බැවින් ඒ සඳහා සාමූහිකව කටයුතු නොකළහොත් දැඩි අවධානමකට මුහුණ දීමට සිදුවන බැවින් පරිභෝජනය සීමා කරන ලෙසට ඒ මහතා නැවතත් ජනතාවගෙන් ඉල්ලීමක් කරයි.
පේරාදෙණිය විශ්වවිද්යාලයේ මහා ශිෂ්ය සංගමය විසින් අද රාත්රියේ ගලහ මංසන්ධියේදී පන්දම් විරෝධතාවයක් පැවැත්විය.
ඔවුන් ගලහ මංසන්ධියට පැමිණ පෝස්ටර් සහ බැනර් ප්රදර්ශනය කරමින් පැයකට ආසන්න කාලයක් උද්ඝෝෂණයක නිරත වූ බව අද දෙරණ වාර්තාකරු පැවසීය.
උද්ඝෝෂණය පැවැති අවස්ථාවේ නුවර-කොළඹ ප්රධාන මාර්ගයෙහි හි එක් මංතීරුවක් වසා දැමීමට පොලීසිය කටයුතු කළ අතර, එම අවස්ථාවේ තරමක වාහන තදබදයක්ද දක්නට ලැබුණු බව වාර්තා වෙයි.
වත්මන් පාලකයන් විසින් විශ්වවිද්යාලය “මොන්ටිසෝරි”යක් ලෙස සලකා නීති සම්පාදනය කර චක්රලේඛ නිකුත් කරමින් ශිෂ්ය නිදහස සීමා කිරීමට උත්සාහ කරන බවත්, එයට එරෙහිව දිගින් දිගටම සටන් කරන බවත් ශිෂ්ය නායකයන් පැවසීය.
එසේම, ශිෂ්ය නැගිටීම සහ එකමුතුව වැළැක්වීම සඳහා මෙවැනි චක්රලේඛ නිකුත් කරමින් ශිෂ්ය මර්ධනයක් සිදුකරන බවට ද ඔවුන් චෝදනා කළහ.
ලංකා විදුලිබල මණ්ඩලයට අදාළ ප්රධාන සමාගම් 04හි අධ්යක්ෂක මණ්ඩල සමග වෘත්තීය සමිති පැවැත්වූ සාකච්ඡාවෙන් අනතුරුව ඉල්ලීම් 64න් ඉල්ලීම් 62ක් ලබාදීමට අධ්යක්ෂක මණ්ඩල එකඟ වී තිබේ.
එම සමාගම් 4 සභාපතිවරුන්ගෙන් යුතුව නිකුත් කර ඇති ඒකාබද්ධ නිවේදනයක මේ බව සඳහන් කර තිබේ.
එමෙන්ම ජනතාව අපහසුතාවයට පත්වෙන වැඩවර්ජනය අවසන් කොට සේවයට වාර්තා කරන ලෙස වෘත්තීය සමිතිවලින් එම සමාගම්වල සභාපතිවරුන් 04 දෙනා විසින් ඉල්ලා තිබේ.
එලෙස සේවය වාර්තා කරන්නේ නම් ඉතිරි ඉල්ලීම් 02 සම්බන්දයෙන් ජනාධිපතිවරයා සමග සාකච්ඡාවක් ලබා දීමටද එකඟ වී තිබේ.
අද (10) මධ්යම රාත්රියේ සිට බලපැවැත්වෙන පරිදි ලිට්රෝ ගෑස් මිල ඉහළ නංවන බව එම සමාගම නිවේදනය කර තිබේ.
ඒ අනුව කිලෝග්රෑම් 12.5 ගෘහස්ථ ගෑස් සිලින්ඩරයක මිල රුපියල් 300කින් ඉහළ දැමෙන අතර එහි නව මිල රුපියල් 3990කි.
කිලෝග්රෑම් 5 ගෑස් සිලින්ඩරයක මිල රුපියල් 120කින් ඉහළ නැංවෙන අතර එහි නව මිල රුපියල් 1602ක් වේ.
එමෙන්ම කිලෝග්රෑම් 2.3ක ගෑස් සිලින්ඩරයක මිල රුපියල් 56කින් ඉහළ නැංවෙන අතර එහි නව මිල රුපියල් 750කි.
කුමන බාහිර බලපෑම් එල්ලවුවද බලශක්ති සැපයුම අඛණ්ඩව ලබාදීමට අවශ්ය පියවර ගන්නා බව ජනාධිපති අනුර කුමාර දිසානායක මහතා පවසයි.
අද පස්වරුවේ කොළඹ පැවති උත්සවයක් අමතමින් ජනාධිපතිවරයා මේ බව සඳහන් කළේය.
“මම හිතන්නේ කිසිදු ජගතෙකුට පුරෝකථනය කරන්න පුළුවන් තත්ත්වයක් ලෝකයේ නැහැ. යුද්ධයට මැදිහත් වෙලා ඉන්න පාර්ශවකරුවන්ටත් පුරෝකථනය කරන්න බැහැ. මාස දෙකකට වඩා වැඩිය යුද්ධය යනවා. ඒ නිසා අපි ඔබට සහතිකයක් දෙන්නම් මේ මාස දෙකේ බලශක්ති සැපයුම අඛණ්ඩව ලබාදෙන්න අපි වගවෙනවා. මිල උච්චාවචනය විය හැකියි. මම තෙල් ළිං අයිතිකාරයෙක්, මට ලාභ ගන්න වැඩිකරනවා නෙමෙයි මේ. එහෙම නැත්නම් තෙල් සමාගමක ඒජන්තයෙක් මට ලාභ ලාබාගනීම සඳහා තෙල් වැඩිකරනවා නෙමෙයි. මම තෙල් සමාගම නෙමෙයි කවර සමාගමකවත් ඒජන්තයෙක් නෙමෙයි. හැබැයි අපිට වගකීමක් තියෙනවා ආණ්ඩුවක් විදිහට මේ බලශක්ති සැපයුම අඛණ්ඩව සිදුකරන්න. ඒ සැපයුම සඳහා අවශ්ය මූල්ය උපායන් සියල්ල අපි සකස් කරනවා. අභ්යන්තරව ඇතිවන කම්මපනයට අපිට මුහුණ දෙන්න පුළුවන්කම ලැබුණා. හැබැයි බාහිර කම්පනයට මුහුණ දෙන්න තව ටිකක් කල් යයි මේ ගොඩනැගෙමින් තිබෙන වෙලාවක් අපිට කම්පනයක් ඇතිකරලා තියෙනවා.”
ඉරාන නැවියන් නැවත එම රටට යැවීම සම්බන්ධයෙන් ශ්රී ලංකාව එක්සත් ජාතීන්ගේ සාගර නීතිය පිළිබඳ සම්මුතිය (UNCLOS) සහ අන්තර්ජාතික නීතියට අනුකූලව කටයුතු කරන බව විදේශ කටයුතු අමාත්ය විජිත හේරත් පවසයි.
නවදිල්ලියේ පැවැති රයිසිනා සංවාද සංසදයේදී මේ සම්බන්ධයෙන් මතුවූ ප්රශ්නයකට පිළිතුරු දෙමින් අමාත්යවරයා මෙම අදහස් පළ කළේය.
එහිදී ඔහු සඳහන් කළේ මෙම කාරණය සම්බන්ධයෙන් කටයුතු කිරීමේදී ශ්රී ලංකාව අන්තර්ජාතික නීති රාමු අනුගමනය කරන බවය.
මේ අතර රොයිටර්ස් පුවත් සේවය සඳහන් කළේ ඉරාන යුද නෞකාවක් වන IRIS Dena නෞකාව මුහුදුබත්වීමෙන් පසු බේරාගත් ඉරාන නාවිකයන් සිය රටට නොයවන ලෙස එක්සත් ජනපදය කේබල් පණිවුඩයක් මගින් ශ්රී ලංකාවෙන් ඉල්ලීමක් කර ඇති බවය.
ඉකුත් බදාදා (04) ගාල්ලේ සිට නාවික සැතපුම් 19ක් පමණ දුරින් ඉන්දියානු සාගරයේදී එක්සත් ජනපද සබ්මැරීනයක් විසින් IRIS Dena යුද නෞකාව ගිල්වා දමන ලදි.
ඉන් නාවිකයන් විශාල පිරිසක් මිය අතර මෙරට නාවික හමුදාවේ සහාය ඇති ජීවතුන් අතර සිටි 32 දෙනෙකු ගොඩබිමට රැගෙන එනු ලැබීය.
අනතුරුව වැඩිදුර ප්රතිකාර සඳහා ඔවුන් රෝහල් ගත කෙරුණි.
මේ අතර ඉන්දියාවේ විශාකාපට්නම් හිදී පැවැති මිලාන් 2026 යුද අභ්යාසය සඳහා සහභාගී වීමට ගිය ඉරාන නෞකා තුනෙන් දෙවෙනි නෞකාව වන ‘IRIS Bushehr යුද නෞකාව ද පානදුරට ඔබ්බෙන් වූ මෙරට අනන්ය ආර්ථික මුහුදු කලාපයට පසුගියදා පැමිණ තිබුණි.
ඒ තමන් ඇතුළු පිරිසට මෙරට සීමාවට පැමිණීමට අවසර දෙන්නැයි ඉල්ලමිනි.
ඒ අනුව නෞකාවේ කාර්ය මණ්ඩලය ඇතුළු නැවියන් 204 දෙනෙකු ශ්රී ලංකා නාවික හමුදාව විසින් කොළඹ වරායට රැගෙන එනු ලැබීය.
එලෙස ගොඩබිමට රැගෙන ආ නාවිකයන් පිරිස වැලිසර නාවික හමුදා කඳවුර වෙත රැගෙනගොස් තිබුණි.
