Breaking News
අම්බලන්තොට හුංගම, පිංගම ප්රදේශයේ අද (02) පස්වරුවේ වෙඩි තැබීමක් සිදුව තිබේ.
පොලීසිය පැවසුවේ කුඹුරක ආරවුලක් මත අදාළ වෙඩි තැබීම සිදුව ඇති බවය.
බලපත්ර සහිත ගිනි අවියකින් මෙම වෙඩි තැබීම සිදුකර ඇති අතර වෙඩි වැදුණු පුද්ගලයා එම ස්ථානයේදීම ජීවිතක්ෂයට පත්ව තිබේ.
අනතුරුව වෙඩි තැබීම සිදුකළ පුද්ගලයා ගිනි අවිය සමග හුංගම පොලිසියට භාර වී ඇත.
තංගල්ල කොට්ඨාස භාර ජ්යෙෂ්ඨ පොලිස් අධිකාරී උපුල සෙනෙවිරත්න මහතාගේ උපදෙස් මත හුංගම පොලීසිය වැඩිදුර විමර්ශන සිදුකරයි.
වාද්දුව, පොතුපිටිය ප්රදේශයෙන් මුහුදු ගිය එක්දින ධීවර යාත්රාවක් පෙරළීමෙන් අනතුරක් සිදුව තිබේ.
ධීවරයින් තිදෙනෙකු රැගත් ”නෙත්දුල පුතා” නමැති අදාළ ධීවර යාත්රාව අද (02) අලුයම මුහුදු ගොස් ඇති අතර මසුන් අල්ලා නැවත ගොඩබිමට එමින් සිටියදී මෙම අනතුරට මුහුණ පා ඇතැයි අප වාර්තාකරු පැවසීය.
අනතුරින් ධීවරයින් තිදෙනා දිවි ගලවාගෙන ඇති අතර ඔවුන් පොතුපිටිය ප්රදේශයේම පදිංචිකරුවන්ය.
තවත් ධීවර යාත්රාවකින් ඔවුන් තිදෙනා මුදාගෙන වස්කඩුව වෙරළ තීරයට ගෙනැවිත් තිබුණි.
මෙරට සිටින චීන ජාතිකයන්ට රාත්රී සමාජ ශාලාවල හා කැසිනෝ ශාලාවල අයිස් මත්ද්රව්ය අලෙවි කරන ප්රධාන පෙළේ ජාවරම්කරු කොළඹ දකුණ කොට්ඨාස අපරාධ විමර්ශන කාර්යංශය මගින් අත්අඩංගුවට ගෙන තිබේ.
බම්බලපිටියේදී අත්අඩංගුවට ගනු ලැබූ මෙම පුද්ගලයා දිගු කලක සිට මෙරට නීතිවිරෝධීව රැඳී සිටින චීන ජාතිකයෙකු බව පොලීසිය පැවසීය.
චීන ජාතිකයන්ට අයිස් මත්ද්රව්ය අලෙවි කිරීමේ ජාවාරමක් පිළිබඳ කොළඹ දකණ කොට්ඨාස අපරාධ විමර්ශන කාර්යාංශයට ලද තොරතුරක් අනුව සිදුකළ විමර්ෂනයේදී මෙම අත්අඩංගුවට ගැනීම සිදුකිරීමට හැකිව තිබේ.
සැකකරු අත්අඩංගුවට ගන්නා විටත් ඔහු සතුව තිබී අයිස් මත්ද්රව්ය ග්රෑම් 50කට අධික ප්රමාණයක් ද පොලිසිය විසින් සොයාගෙන ඇත.
මාලදිවයින් ජාතිකයෙකුගෙන් හා ලාංකිකයෙකුගෙන් තමා මත්ද්රව්ය ලබාගන්නා බවත්, ඒවා රාත්රී සමාජශාලාවලට හා කැසිනෝ ශාලාවලට පැමිණෙන චීන ජාතිකයන්ට අලෙවිකරන බවත් ඔහුගෙන් සිදුකළ ප්රශ්න කිරීම්වලදී අනාවරණ වී තිබේ.
2019 වසරේ දී මෙරටට පැමිණ ඇති මෙම චීන ජාතිකයා මේ දක්වා මෙරට තුළ රැඳී සිට ඇත්තේ ද නීතිවිරෝධීවය.
සැකකරු අධිකරණයට ඉදිරිපත් කර රඳවා තබා ප්රශ්න කිරීමට නියමිතය.
ඩිජිටල් ගනුදෙනු ප්රවර්ධනය කරනවා හා සමානවම බැංකු හා මූල්ය ආයතන ඊට අදාළ යටිතල පහසුකම් ගමේ සිටින ජනතාව දක්වාම රැගෙන යා යුතු බව මහබැංකු අධිපති ආචාර්ය නන්දලාල් වීරසිංහ මහතා පවසයි.
දඹුල්ලේ පැවති උත්සවයක් අමතමින් අධිපතිවරයා මේ බව ප්රකාශ කළේය.
ශ්රී ලංකා මහබැංකුව සංවිධාන කරන ඩිජිටල් ගනුදෙනු ප්රවර්ධන වැඩසටහනක් මහබැංකු අධිපති ආචාර්ය නන්දලාල් වීරසිංහ මහතාගේ ප්රධානත්වයෙන් දඹුල්ල ආර්ථික මධ්යස්ථානය කේන්ද්ර කරගනිමින් ඊයේ පැවැත් වුණි.
එහිදී අදහස් දැක්වූ මහ බැංකු අධිපති ආචාර්ය නන්දලාල් වීරසිංහ මහතා,
“ඩිජිටල් ගනුදෙනුවලදී විශේෂයෙන් අපේ රටේ ගෙවීම් සහ පියවීම් සඳහා විශාල වශයෙන් අවශ්ය කරන යටිතල පහසුකම් කාලයක් තිස්සේ සම්පූර්ණ කරලා තියෙනවා. Online Banking, QR code එක පාවිච්චි කරලා ගෙවන ඒවා රජයේ ගෙවීම්වලටත් රජය විසින් දැන් GovPay කියලා එකකින් යම්කිසි රජයේ සේවාවන්වලට ගෙවන්න පහසුකම් හදලා තියෙනවා. බදු ගෙවීමට පුළුවන් ඒ ආකාරයට. පහසුකම් තියෙනවා. නමුත් අපි දකින්නේ භාවිතය ඉතාම අඩුයි. විශේෂයෙන් බස්නාහිර පළාතෙන් පිටතට යනකොට අපි දකිනවා විශාල වශයෙන් තවමත් මුදල් විශේෂයෙන් නෝට්ටු සහ කාසි භාවිතයට තමයි හුඟදෙනෙක් පුරුදු වෙලා තියෙන්නේ. ඒක තමයි පහසු විදිහට දකින්නේ. නමුත් ඇත්ත වශයෙන්ම කල්පනා කරලා බැලුවොත් ව්යාපාරයක් කරන කෙනෙක්ට සහ පාරිභෝගිකයා පැත්තෙන් ගත්තොත් හැමෝටම මේ මුදල් පරිහරණය ඇත්ත වශයෙන්ම අමතර කාලයක් මුදලක් වැය වෙන කාරණයක් හිතලා බැලුවොත්. විශේෂයෙන් බැංකු පද්ධතිය සහ මූල්ය ආයතන ඩිජිටල් ගනුදෙනු ප්රවර්ධනය කරන ආයතනවලට තියෙනවා විශේෂ කාර්යයභාර්යක් මේ වගේ තැන්වලට ඇවිත් ප්රවර්ධනය කරනවාට අමතරව මේක යන්න ඕන ගමටම. එහෙම ගියොත් විතරයි මේ ගැන විශ්වාසයක් ඇතිවෙන්නේ. මේකේ අනිසි බියක් තියෙනවා මේ බදුවලට අහුවෙයි කියලා. එහෙම එකක් නැහැ බදුවලට අහුවෙනවා නම් සල්ලිවලින් ගනුදෙනු කළත් බදුවලට අහුවෙනවා නම් අහුවෙනවා. ඒක වළක්වන්න කාටවත් බැහැ.”
පිළියන්දල, බෝකුන්දර ප්රදේශයේ පදිංචි කාන්තාවක් මත්ද්රව්ය ජාවාරමෙන් උපයා ගන්නා ලද මුදලින් දේපොළ හා වත්කම් මිලදී ගැනීම සම්බන්ධයෙන් අත්අඩංගුවට ගෙන තිබේ.
පසුගිය 29 වනදා මෙම සැකකාරිය නීතිවිරෝධි වත්කම් විමර්ශන කොට්ඨාසයට ලද පැමිණිල්ලක් මත මුදල් විශුද්ධිකරණ පනත යටතේ අත්අඩංගුවට ගෙන ඇත.
එලෙස අත්අඩංගුවට ගත් සැකකාරිය බෝකුන්දර, පිළියන්දල ප්රදේශයේ වයස 36 හැවිරිදි කාන්තාවකි.
විමර්ශනයට අදාළව සැකකාරියගේ පෙර වැරදි සම්බන්ධව විමර්ශනයේදී හෙරොයින් මත්ද්රව්ය සමඟ පොලිස් අත්අඩංගුවට පත්වී අධිකරණයේ නඩු පවරා ඇති බවට අනාවරණය වී ඇතැයි පොලීසිය.
තවද සැකකාරිය නීතිවිරෝධී ආකාරයට උපයා ගන්නා ලද රුපියල් කෝටි 03ක පමණ මුදලින් මිලට ගත් පිලියන්දල ප්රදේශයේ පිහිටි ඉඩමක් පසුගිය 09 වනදා සිට දින 07ක කාලයක් මුදල් විශුද්ධිකරණ පනත ප්රකාරව ක්රියා විරහිත කර තිබූ අතර මේ සම්බන්ධව හෝමාගම මහාධිකරණය වෙත කරුණු වාර්තා කිරීමෙන් පසු එම ක්රියා විරහිත කිරීමේ නියෝගය 2025.10.15 වන දින දක්වා දීර්ඝ කර බලාත්මක කර තිබේ.
මේ අතර සැකකාරිය ජුලි 29 වන දින කැස්බෑව මහෙස්ත්රාත් අධිකරණයට ඉදිරිපත් කිරීමෙන් පසු රුපියල් පනස්දහසක මුදල් ඇපයක් හා රුපියල් ලක්ෂ 05 බැගින් වූ ශරීර ඇප දෙකක් මත මුදා හැර ඇත.
නීතිවිරෝධී වත්කම් විමර්ශන කොට්ඨාසය වැඩිදුර විමර්ශන සිදුකරනු ලබයි.
මෙරට වෙරළ ආශ්රිත ප්රදේශවල ඉදිකර ඇති අනවසර ගොඩනැගිලි සඳහා වාර්ෂික දඩ මුදලක් අය කිරීමට නීති සකස්කරමින් පවතින බව වෙරළ සංරක්ෂණ හා වෙරළ කළමනාකරණ දෙපාර්තමේන්තුව පවසයි.
එහි අධ්යක්ෂ ජනරාල් මහාචාර්ය ටර්නි ප්රදීප් කුමාර මහතා පැවසුවේ දිවයින පුරා මෙවැනි අනවසර ඉදිකිරීම් 2500 කට අධික ප්රමාණයක් පවතින බවට හඳුනාගෙන ඇති බවය.
“පසුගිය වසර 10ක් හෝ 15ක් තුළ විශාල වශයෙන් වෙරළ කලාප තුළ අනවසර ඉදිකිරීම් සිදුකරලා තියෙනවා. අපි සමහර ඒවා කඩා දමනවා. ඇතැම් ඒවාට වාර්ෂිකව ඉතා වැඩි දඩයකට යටත් කරනවා. මේ අවිධිමත්භාවය විධිමත් භාවයට පත් කිරීමට අවශ්ය නීතිමය කටයුතු කරනවා.”
කථානායකවරයාගේ නිල නිවස “පාර්ලිමේන්තු අධ්යයන සහ පර්යේෂණ මධ්යස්ථානයක්” බවට පරිවර්තනය කිරීම පිළිබඳව යෝජිත වැඩපිළිවෙළට පාර්ලිමේන්තු කාර්ය මණ්ඩල උපදේශක කාරක සභාවේ ප්රතිපත්තිමය එකඟතාව හිමිව තිබේ.
ඒ අනුව මාස හයක ආරම්භක කාලයක් සඳහා මධ්යස්ථානයේ පදනම් රාමුව සැලසුම් කිරීම සහ ව්යුහගත කිරීම සම්බන්ධීකරණය, උපදෙස් දීම සහ මෙහෙයවීම සඳහා විශ්රාමික ජ්යෙෂ්ඨ රජයේ නිලධාරියෙකු ව්යාපෘති කළමනාකරුවෙකු ලෙස පත්කිරීමටද කාරක සභාවේ අනුමතිය හිමිව ඇත.
පසුගිය 24 වැනිදා කථානායක වෛද්ය ජගත් වික්රමරත්න මහතාගේ ප්රධානත්වයෙන් රැස්වූ පාර්ලිමේන්තු කාර්ය මණ්ඩල උපදේශක කාරක සභාවේදී එම යෝජනාව සළකා බැලූ අවස්ථාවේදී මේ පිළිබද සාකච්ඡා කෙරිණි.
රජයේ සියලු අංශ ඔස්සේ ව්යවස්ථාදායක සහ ආණ්ඩුකරණ හැකියාවන් ශක්තිමත් කිරීමේ මූලික ඉලක්කය ඇතිව මෙම යෝජිත මධ්යස්ථානය මගින්, උසස් පර්යේෂණ පහසුකම්, විශේෂිත පුහුණුව සහ ප්රතිපත්ති විශ්ලේෂණයන් සඳහා ප්රවේශය සැපයීම සිදු කිරීමට අපේක්ෂා කෙරේ.
මෙම වසරේ ජනවාරි සිට ජුලි මාසය දක්වා ගෙවුණු මාස 7 තුළ විදේශ රැකියා වංචනික ක්රියාවල නිරත වූ පුද්ගලයින් හා බලපත්ර රහිත රැකියා නියෝජිතායතනවලට එරෙහිව නඩු පවරා වින්දිතයින්ට රුපියල් ලක්ෂ 1994කට අධික මුදලක් යළි අයකර දීමට කටයුතු කළ බව ශ්රී ලංකා විදේශ සේවා නියුක්ති කාර්යාංශය පවසයි.
කාර්යාංශයේ නියෝජ්ය සාමාන්යාධිකාරී නීති නීතීඥ නෙළුම් සමරසේකර මහත්මියගේ උපදෙස් පරිදි ක්රියාත්මක කරන ලද විශේෂ වැටලීම් හා කාර්යාංශයට ලැබුණු පැමිණිලි මත මෙම නඩු පැවරීම් සිදුකර තිබේ.
ඒ අනුව පසුගිය මාස 7 තුළ විදේශ රැකියා වංචාකරුවන්ට එරෙහිව අධිකරණයේ පවරා ඇති නඩු ප්රමාණය 567ක් වන අතර, එම කාලය තුළ විවිධ පැමිණිලි 2620ක් කාර්යාංශයට ලැබී ඇත.
එමෙන්ම මෙම කාලය තුළ කාර්යාංශයේ විශේෂ විමර්ශන අංශය මගින් සිදු කරන ලද වැටලීම් ප්රමාණය 05ක් වන අතර, ඊට නීති විරෝධි ක්රියාවල යෙදුණු එක් බලපත්ර ලාභී විදේශ රැකියා නියෝජිතායතනයක්ද අයත් වේ.
මෙම කාලය තුළදී වංචනිකයින් 36 දෙනෙකු අත්අඩංගුවට ගෙන ඇති අතර බලපත්රලාභී රැකියා නියෝජිත ආයතනවල පුද්ගලයින් 07ක්ද ඊට අයත් වේ.
මේ අතර, 2024 වර්ෂය තුළදී රුපියල් ලක්ෂ 1825කට අධික මුදලක් විදේශ රැකියා වින්දිතයින්ට යළි අය කර දීමට කාර්යාංශය සමත්වී ඇති අතර, පසුගිය වර්ෂයේදී විදේශ රැකියා ආශ්රිත පැමිණිලි 4658ක් කාර්යාංශය වෙත ලැබී තිබේ.
ඊශ්රායලය, දකුණු කොරියාව, ජපානය, රැමේනියාව හා මැදපෙරදිග රටවල රැකියා ලබාදෙන බව පවසා මුදල් වංචා කිරීම් සිදුවන බැවින් කාර්යාංශයෙන් විමසීම් නොකර එවැනි වංචාකරුවන්ට මුදල් ගෙවීමෙන් වලකින ලෙස කාර්යාංශය මහජනතාවට දැනුම් දී ඇත.
පසුගිය කාලයේදී වංචනිකව එලෙස මුදල් ලබාගත් පුද්ගලයින් වෙතොත් එවැනි පුද්ගලයින් පිළිබඳ තොරතුරු කාර්යාංශයේ 1989 දුරකථන අංකයට දැනුම් දෙන ලෙසද විදේශ සේවා නියුක්ති කාර්යාංශය ඉල්ලා සිටී.
2028 ලොස් ඇන්ජලීස් ඔලිම්පික් උළෙලේ ක්රිකට් ක්රීඩාව ශ්රී ලංකාව ඇතුළු ICC පූර්ණ සමාජික රටවල් කිහිපයකටම අහිමි වනු ඇතැයි වාර්තා වේ.
එළැඹෙන ඔලිම්පික් උළෙලට ක්රිකට් ක්රීඩාවෙන් කණ්ඩායම් 6කට අවස්ථාව ලබාදීමට ජාත්යන්තර ඔලිම්පික් කමිටුව තීරණය කර තිබේ.
ඒ අනුව මහාද්වීපික සුදුසුකම් ක්රමයක් මත එක් එක් කලාපයේ ඉහළම ශ්රේණිගත කිරිමේ හි සිටින කණ්ඩායමට එම අවස්ථාව ලබාදීමට ජාත්යන්තර ක්රිකට් කවුන්සිලය තීරණයක් ගෙන ඇති බව වාර්තා වේ.
එසේ වුවහොත් ආසියාවෙන් ඉන්දියාව, ඕෂනියාවෙන් ඔස්ට්රේලියාව, යුරෝපයෙන් එංගලන්තය, අප්රිකාවෙන් දකුණු අප්රිකාවට එම අවස්ථාව හිමිවනු ඇත.
ඉතිරි කණ්ඩායම් ද්විත්වයෙන් එකක් සත්කාරක අමෙරිකාවට හෝ කැරිබියන් දූපත්වලින් එක් රටකට හිමිවනු ඇත.
මේ හේතුවෙන් සියවසකට වැඩි කාලයකට පසු ඔලිම්පික් උළෙලට පැමිණෙන ක්රිකට් ක්රීඩාව” ශ්රී ලංකාව, පාකිස්තානය, නවසීලන්තය වැනි පූර්ණ සාමාජිකයින්ට අහිමි වනු ඇති බව වාර්තා වේ.
අවසන් වරට ඔලිම්පික් උළෙලකට ක්රිකට් ක්රීඩාව ඇතුළත් වී තිබුණේ 1900 පැරිස් ඔලිම්පික් උළෙලටය.
2028 ඔලිම්පික් උළෙලේ ක්රිකට් තරග එම වසරේ ජූලි 12 සහ 29 කාලසීමාවේ පැවැත්වීමට කටයුතු යොදා තිබේ.
මෙහි කාන්තා ඉසව්වක්ද පැවැත්වෙන අතර, ඒ සඳහාද කණ්ඩායම් 6කට අවස්ථාව සලසා දී ඇත.
තරග විස්සයි20 ආකෘතිය යටතේ පැවැත්වේ.
දූෂණ චෝදනාවක් සම්බන්ධයෙන් අල්ලස් කොමිසම විසින් හිටපු අමාත්ය රෝහිත බෝගොල්ලාගම මහතාට එරෙහිව ගොනුකර තිබෙන නඩුවක් ඔහු නොමැතිව විභාගයට ගැනීම සඳහා දින නියම කිරීමට එම නඩුව ඔක්තෝබර් මස 30 වනදා කැඳවන ලෙස කොළඹ මහාධිකරණය නියම කළේය.
අල්ලස් කොමිසම කළ කරුණු දැක්වීමත් සලකා බැලීමෙන් අනතුරුව කොළඹ මහාධිකරණ විනිසුරු මහේෂ් වීරමන් මහතා මෙම නියෝගය නිකුත් කර ඇත.
විත්තිකරු මේ වන විට විදේශගතව සිටින බවට තොරතුරු හෙළි වී තිබෙන නිසා ඔහු නොමැතිව නඩුව විභාගයට ගැනීමට අවසර දෙන ලෙස අල්ලස් කොමිසම ඉල්ලීම් කළේය.
ඒ අනුව මෙම නියෝගය නිකුත් කර තිබේ.
2006 වසරේ ශ්රී ලංකා ආයෝජන මණ්ඩලය විසින් ලන්ඩන් නුවර සංවිධානය කළ ආයෝජන ප්රවර්ධන ප්රදර්ශනයකට සහභාගි වී හෝටල් ගාස්තු සහ ප්රදර්ශන වියදම් ලෙස රුපියල් ලක්ෂ 15 කට අධික මුදලක් භාණ්ඩාගාර රෙගුලාසිවලට පටහැනිව ගෙවන ලෙස ආයෝජන මණ්ඩලයේ සභාපතිවරයා පෙළඹවීම තුළින් අල්ලස් පනතේ “දූෂණය” නැමැති වරද සිදුකළ බවට චෝදනා කරමින් හිටපු අමාත්යවරයාට විරුද්ධව මෙම නඩුව අල්ලස් කොමිසම විසින් ගොනු කර ඇත.
