Politics
බාල ගල්අඟුරු ආනයනය හේතුවෙන් රුපියල් බිලියන 100ක පමණ පාඩුවක් සිදුව ඇති බව පාර්ලිමේන්තු මන්ත්රී ඩී.වී.චානක මහතා අණාවරණය කළේය.
ඔහු පවසන්නේ නෙරොච්චෝලේ ගල් අඟුරු බලාගාරය ඉදි කිරීමෙන් පසු මෙවැනි විශාල පාඩුවක් සිදු වූ පළමු අවස්ථාව මෙය බවය.
හෙට දිනයේ විවාදයට ගැනීමට නියමිත බලශක්ති අමාත්ය කුමාර ජයකොඩි මහතාට එරෙහි විශ්වාසභංග යෝජනාව පිළිබඳව අද පාර්ලිමේන්තු සංකීර්ණයේදී විපක්ෂය නියෝජනය කරන මන්ත්රීවරුන්ගේ සහභාගිත්වයෙන් පැවති මාධ්ය හමුවකදී ඩී.වී. චානක මන්ත්රීවරයා මේ බව කියා සිටියේය.
ශ්රී ලංකාව වෙනුවෙන් පත්ව සිටින අරාබි තානාපතිවරුන්ගේ කවුන්සිලය සහ ජනාධිපති අනුර කුමාර දිසානායක මහතා අතර හමුවක් අද (08) පෙරවරුවේ ජනාධිපති කාර්යාලයේදී පැවැත්විණි.
යුදමය තත්ත්වයත් සමග මැදපෙරදිග කලාපයේ රටවල් මුහුණ දී ඇති අභියෝග සහ විශේෂයෙන් එම රටවල සාමයට, ආරක්ෂාවට සහ ස්ථාවරත්වයට එල්ල වී ඇති තර්ජන පිළිබඳව තානාපතිවරුන් විසින් මෙහිදී ජනාධිපතිවරයා දැනුවත් කර තිබේ.
මැදපෙරදිග කලාපයේ කඩිනමින් සාමය ස්ථාපිත වීම ශ්රී ලංකාවේ අපේක්ෂාව බව මෙහිදී සඳහන් කළ ජනාධිපතිවරයා, යුද්ධයට සම්බන්ධ වී නොමැති මැදපෙරදිග කලාපීය රටවලට එල්ල වන ප්රහාර පිළිබඳව සිය කනස්සල්ල පළ කළ අතර, එම ප්රහාර කිසිසේත් අනුමත නොකරන බවද ප්රකාශ කළේය.
එමෙන්ම, මැදපෙරදිග කලාපීය රටවල් ශ්රී ලංකාවට ලබා දෙන සහාය මෙහිදී අගය කළ ජනාධිපති අනුර කුමාර දිසානායක මහතා, විශේෂයෙන් බලශක්ති අවශ්යතාව සපුරා ගැනීමට මෙන්ම, විදේශ රැකියා සහ සංචාරක කර්මාන්තයට අදාළව ලබා දෙන දායකත්වයද ඇගයීමට ලක්කළේය.
ශ්රී ලාංකික ශ්රමිකයන් විශාල පිරිසක් මැදපෙරදිග කලාපයේ රටවල රැකියාවල නිරත වන අතර, පවතින යුදමය තත්ත්වය හමුවේ ඔවුන්ගේ ආරක්ෂාව තහවුරු කිරීමට අවධානය යොමු කර කටයුතු කිරීම පිළිබඳවද ජනාධිපතිවරයා මෙහිදී ස්තූතිය පළ කළේය.
එසේම, මැදපෙරදිග කලාපයේ රටවල සාමය, ආරක්ෂාව සහ ස්ථාවරත්වය වෙනුවෙන් තනි රටක් ලෙස සහ සාමුහිකවත්, ජාත්යන්තර නීතියට අනුකූලව ශ්රී ලංකාවට ලබා දිය හැකි උපරිම සහාය ලබා දීමට කටයුතු කරන බවද ජනාධිපති අනුර කුමාර දිසානායක මහතා මෙහිදී ප්රකාශ කළේය.
ශ්රී ලංකාවේ එක්සත් අරාබි එමීර් රාජ්යයේ තානාපති සහ අරාබි තානාපතිවරුන්ගේ කවුන්සිලයේ ප්රධානී Khaled Nasser Sulaiman AlAmeri, ශ්රී ලංකාවේ සෞදි අරාබි තානාපති Khalid Hamoud Nasser Alkahtani, ශ්රී ලංකාවේ ඕමාන තානාපති Ahmed Ali Saeed Al Rashdi, ශ්රී ලංකාවේ ඊජිප්තු තානාපති Adel Ibrahim, ශ්රී ලංකාවේ පලස්තීන තානාපති Ihab I.M. Khalil, ශ්රී ලංකාවේ කටාර් රාජ්යයේ තානාපති Hamad Mohammed Abdullah Al – Sanad Al – Dosari, කොළඹ පිහිටි ඉරාක තානාපති කාර්යාලයේ කාර්යභාර නිලධාරී Anmar A.A. Al-Emin, කොළඹ පිහිටි කුවේට් තානාපති කාර්යාලයේ වැඩබලන කාර්යභාර නිලධාරී Abdullah A.M.A. Almuhana, කොළඹ පිහිටි ලිබියානු තානාපති කාර්යාලයේ කාර්යභාර නිලධාරී Faek B.T. Aboud යන මහත්වරු මෙම අවස්ථාවට සහභාගි වූ අතර කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු, බස්නාහිර පළාත් ආණ්ඩුකාර හනීෆ් යූසුෆ්, ජනාධිපති ජ්යෙෂ්ඨ අතිරේක ලේකම් රෝෂන් ගමගේ යන මහත්වරුද එක්ව සිටියහ.
බදාදා දිනයේ නිවාඩුව අවලංගුවීම හේතුවෙන් පාර්ලිමේන්තුව හෙට (08) රැස්වීමට කථානායක වෛද්ය ජගත් වික්රමරත්න මහතාගේ ප්රධානත්වයෙන් අද (07) පැවති පාර්ලිමේන්තු කටයුතු පිළිබඳ කාරක සභා රැස්වීමේදී තීරණය කර තිබේ.
නිවේදනයක් නිකුත් කරමින් පාර්ලිමේන්තුවේ මහ ලේකම් කුෂානි රෝහණදීර මහත්මිය මේ බව සඳහන් කළේය.
පවතින තත්ත්වය හේතුවෙන් සෑම බදාදා දිනයක්ම රජයේ නිවාඩු දිනයක් බවට පත් කිරීම හේතුවෙන් හෙට (08) පාර්ලිමේන්තුව රැස් නොවීමට මීට පෙර පැවති පාර්ලිමේන්තු කටයුතු පිළිබඳ කාරක සභාවේදී තීරණය වී තිබිණි.
නමුත් අද දින එළැඹි තීරණයට අනුව හෙට පෙ.ව 9.30 – පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත.
පෙ.ව 10.00 – පෙ.ව 10.30 කාලය වාචික පිළිතුරු අපේක්ෂා කරන ප්රශ්න සඳහා වෙන් කර ඇත.
ඉන්පසු පෙ.ව 10.30 – පෙ.ව 11.00 කාලය ස්ථාවර නියෝග 27(2) යටතේ ප්රශ්න සඳහා වෙන්කර තිබේ.
අනතුරුව පෙ.ව 11.00 සිට ප.ව 5.30 දක්වා ආණ්ඩු පක්ෂය විසින් ගෙනෙනු ලබන වර්තමාන තත්ත්වය පිළිබඳව සභාව කල්තැබීමේ යෝජනාවට අනුව විවාදය පැවැත්වීමටත් මෙහිදී තීරණය කර ඇත.
තවද ලබන 9 වෙනි බ්රහස්පතින්දා සහ 10 වෙනි සිකුරාදා යන දෙදිනට නියමිත පාර්ලිමේන්තු කටයුතුවල කිසිදු වෙනසක් සිදු නොවේ.
මේ අතර එළඹෙන සිංහල – දමිල අලුත් අවුරුදු උත්සවය හේතුවෙන් අප්රේල් දෙවන පාර්ලිමේන්තු සතිය නොපැවැත්වීමටත් මෙහිදී තීරණය වූ බව මහලේකම්වරිය පැවසුවාය.
කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති මහතා සහ ජාත්යන්තර මූල්ය අරමුදලේ නියෝජිත පිරිස අතර විශේෂ සාකච්ඡාවක් අද (06) පවත්වා තිබේ.
එහිදී මෙරට කාර්මික අංශය සතු විභවතාවන් සහ ආර්ථික ස්ථාවරත්වය ඇති කිරීම සඳහා කර්මාන්ත ක්ෂේත්රය ලබා දෙන දායකත්වය පිළිබඳව දීර්ඝ වශයෙන් අදහස් හුවමාරු කරගෙන ඇත.
කුඩා හා මධ්ය පරිමාණ ව්යවසායකයන් මුහුණ දෙන ගැටලු සහ ඔවුන් නගාසිටුවීම සඳහා රජය ගෙන ඇති ප්රතිපත්තිමය තීන්දු පිළිබඳව මෙහිදී අමාත්යවරයා නියෝජිත පිරිස දැනුවත් කළේය.
ශ්රී ලංකාව දැනට ක්රියාත්මක කරන ආර්ථික ප්රතිසංස්කරණ ක්රියාවලිය තුළ කාර්මික අංශයේ වර්ධනය කෙරෙහි ඇති වැදගත්කම මෙහිදී IMF නියෝජිතයන්ගේ ඇගයීමට ලක්විය.
නිෂ්පාදන ආර්ථිකයක් කරා යන ගමනේදී පවතින බාධක ඉවත් කිරීම, අපනයන ක්රියාවලිය සරල කිරීම සහ විදේශීය ආයෝජන සඳහා හිතකර වටපිටාවක් නිර්මාණය කිරීම සම්බන්ධයෙන් ද මෙහිදී අවධානය යොමු කෙරිණි.
ජාත්යන්තර මූල්ය අරමුදලේ වැඩසටහන සමඟ සමගාමීව දේශීය කර්මාන්තකරුවන්ට ලබාදිය හැකි සහන සහ මූල්ය පහසුකම් පිළිබඳවද දෙපාර්ශවය අතර සාකච්ඡා වූ බව කර්මාන්ත හා ව්යවසායකත්ව සංවර්ධන අමාත්යාංශය වැඩිදුරටත් නිවේදනය කළේය.
රජයේ වෛද්ය නිලධාරීන්ගේ සංගමය (GMOA) ආරම්භ කර තිබෙන වර්ජනයේ ගැටලු ගැන අවධානය යොමුකරමින් එළැඹෙන බ්රහස්පතින්දා (9) ඔවුන්ට සාකච්ඡාවක් ලබාදීමට සූදානම් බව සෞඛ්ය අමාත්ය වෛද්ය නලින්ද ජයතිස්ස මහතා පැවසීය.
මේ සම්බන්ධයෙන් ‘අද දෙරණ’ කළ විමසීමකදී ඔහු මේ බව පැවසීය.
ලෝක සෞඛ්ය සංවිධානයේ සමුළුවකට සහභාගීවීමට තමන් හෙට (6) ඉන්දියාව බලා පිටත්ව යන බවත්, යළි පැමිණීමෙන් පසු අදාළ සාකච්ඡාව ලබාදීමට බලාපොරොත්තුවන බව බවත් හෙතෙම පැවසීය.
වෛද්යවරයෙකු බිහි කිරීමට ජනතා බදු මුදලින් රුපියල් ලක්ෂ 60කට වඩා වැය කරන බව ග්රාමීය සංවර්ධන සමාජ ආරක්ෂණ හා ප්රජා සවිබලගැන්වීම් අමාත්ය මහාචාර්ය උපාලි පන්නිලගේ මහතා පවසයි.
අමාත්යවරයා මේ බව ප්රකාශ කළේ, අද (04) දින පෙරවරුවේ කිරිබත්ගොඩ, පෞද්ගලික රෝහලක් විවෘත කිරීමේ අවස්ථාවට එක්වෙමිනි.
සෙසු අංශ හා සැසදීමේදී වෛද්ය පීඨයකට ඇතුළත්ව වෛද්යවරයෙකු ලෙස පිටවන ශිෂ්යයෙකු වෙනුවෙන් රජය ඉතා ඉහළ මුදලක් වැය කරයි.
ඉංජිනේරුවෙකු බිහි කිරීමට රුපියල් ලක්ෂ 30ක පමණ මුදලක් රජය දරණ බව ද අමාත්ය මහාචාර්ය උපාලි පන්නිලගේ මහතා වැඩිදුරටත් අවධාරණය කළේය.
“අපේ රටේ සෞඛ්ය ක්ෂේත්රය ගත්තාම, අපේ ආණ්ඩුවත් නිදහසෙන් පසුව බලයට පත් වුණ හැම ආණ්ඩුවක්ම කල්පනා කළේ, නිදහස් සෞඛ්ය සේවයක් ලබා දෙන්න. දැනටත් අපි කල්පනා කරන්නේ නිදහස් සෞඛ්ය සේවය ජනතාවට පුළුවන් ප්රමාණයක් ලබා දෙන්න. පුද්ගලයෙක්ගේ පර්ස් එකේ තියෙන සල්ලි මත ඒ පුද්ගලයා ජීවත් වෙනවා ද මිය යනවා ද කියන එක තීරණය කරන්න හොඳ නැහැ කියන එක අපි නිතරම කියන දෙයක්. ඒ නි සා අපි හැකිතාක් උත්සහ කරනවා නිදහස් සෞඛ්ය සේවය ශක්තිමත් කරන්න.
බටහිර වෛද්ය විද්යාලව ලෝකයේ වේගයෙන් දියුණු වෙනවා. ලංකාවේ වැඩිම බදු මුදලක් වැය කරන්නේ වෛද්යවරයෙක් බිහි කරන්න. අපේ රටේ ජනතාව විශ්වවිද්යාලයට ඇතුළත් වෙන වෛද්ය සිසුවා අවුරුදු පහකට පස්සේ ඉන් පිට කිරීම සඳහා රුපියල් ලක්ෂ 60ක් වැය කරනවා. ඉංජිනේරුවරයෙක් බිහි කරන්න අපි වැය කරන්නේ ලක්ෂ 30යි. ඒ වගේ දෙගුණයක් මේ රටේ බදු ගෙවන ජනතාව වැය කරනවා. අපේ රටේ ඉන්නවා 35,000ත් 38,000ත් අතර වෛද්යවරු ඉන් 25,000ක් 28,000ක් පමණ රජයේ රෝහල්වල සේවය කරනවා. මේ අය සමාජයේ සුවිශේෂි වගකීමක් දරන අයයි. ඔවුන්ගෙන් සුවිශේෂි සේවාවක් මේ සමාජය අපේක්ෂා කරනවා.”
රජයේ වෛද්ය නිලධාරීන්ගේ සංගමය අද (04) උදෑසන 8.00 සිට දිවයින පුරා පිහිටි රජයේ රෝහල්වල වැඩ වර්ජනයක් ආරම්භ කර තිබේ.
ඒ වෛද්යවරුන්ගේ පශ්චාත් සීමාවාසික අනුයුක්ත කිරීමේ ලැයිස්තුව සහ සේවා ස්ථාන මාරු ලැයිස්තුව දේශපාලනීකරණය කිරීමට සෞඛ්ය අමාත්යවරයා මැදිහත්වන බව පවසමිනි.
මෙම අනීතික හා අත්තනෝමතික ක්රියාවන් නිවැරදි කිරීමට සෞඛ්ය අමාත්යවරයා පියවර නොගැනීම තුළ මෙලෙස යළි වැඩ වර්ජනයකට අවතීරණ වූ බව රජයේ වෛද්ය නිලධාරීන්ගේ සංගමය පවසයි.
වෛද්යවරු ඉකුත් අඟහරුවාදා සහ බ්රහස්පතින්දා දිනවල ද මෙලෙස වැඩ වර්ජනයේ නිරත වූ අතර ඒවා ක්රියාත්මක වූයේ එක් දිනකට පමණකි.
වර්ජනය හේතුවෙන් මෙරට සියලුම රජයේ රෝහල් සහ සෞඛ්ය ආයතනවල සාමාන්ය හා දෛනික ප්රතිකාර සම්පූර්ණයෙන්ම ඇනහිටින අතර හදිසි හා අත්යවශ්ය ප්රතිකාර සේවා පමණක් සිදුකරන බව රජයේ වෛද්ය නිලධාරීන්ගේ සංගමය සඳහන් කළේය.
ඒ අනුව රජයේ සියලු රෝහල්වල කටයුතුවලට දැඩි බලපෑමක් එල්ල වී ඇති අතර රෝගීන් පත්ව ඇත්තේදැඩි අපහසුතාවකටය.
රජයේ වෛද්ය නිලධාරීන්ගේ සංගමය පැවසුවේ වර්ජනය අවසන් කරන දිනය සම්බන්ධයෙන් විධායක සභාව අද (04) දහවල් 12ට රැස්වී තීරණය කරන බවය.
මේ අතර විශේෂඥ වෛද්යවරුන්ගේ සංගමය පැවසුවේ රජයේ වෛද්ය නිලධාරීන්ගේ සංගමය ආරම්භ කර ඇති වර්ජනයට සහාය ලබා නොදෙන බවය.
එහි ලේකම් විශේෂඥ වෛද්ය ආර්. ඥානසේකරම් මහතා සඳහන් කර සිටියේ ඔවුන් සාමාන්ය පරිදි සිය රාජකාරී කටයුතු සිදු කරන අතර රෝහල්වල විශේෂ වෛද්ය සේවා අඛණ්ඩව පවත්වා ගෙන යන බවය.
එමෙන්ම පශ්චාත් පුහුණු විශේෂඥ වෛද්යවරුන් ද මෙම වර්ජනය සඳහා සහාය නොදක්වන බව ඔහු වැඩිදුරටත් සඳහන් කර සිටියේය.
විශේෂඥ වෛද්යවරුන්ගේ සංගමය තුළ වෛද්යවරුන් 2,300ක් පමණ සිටින අතර සියලු දෙනාම සාමාන්ය පරිදි රාජකාරීවල නිරත වන බවත් ප්රතිපත්තියක් ලෙස විශේෂඥ වෛද්යවරුන් වැඩවර්ජන සඳහා සහභාගී නොවන බවත් ඥානසේකරම් මහතා පැවසීය.
එමෙන්ම ඒ මහතා වැඩිදුරටත් සඳහන් කළේ විශේෂඥ වෛද්යවරුන්ට ද විවිධ ගැටලු පවතින නමුත් රෝගී ජීවිත අවදානමේ හෙළා වරජනයේ නිරත වීම සිය ප්රතිපත්තියක් නොවන බවය.
එම ගැටලු පිළිබඳව ආණ්ඩුව සමග සාකච්ඡා පවත්වන බවත් සමහර ගැටලු සඳහා මෙතෙක් විසඳුම් ලබා දී නොමැති බවත් එහිදී ඔහු කියා සිටියේය.
ශ්රී ලංකාව තුළ අර්බුද ඇතිවුවත් නැතත් ඉන්ධන, ගෑස්, ගල්අඟුරු ඇතුළු බලශක්ති ප්රභවයන් මෙරටට ලබාදීමට රුසියාව සිය කැමැත්ත පළකර තිබේ.
නිවේදනයක් නිකුත් කරමින් ප්රවාහන, මහාමාර්ග සහ නාගරික සංවර්ධන අමාත්යාංශය සඳහන් කළේ, අමාත්ය බිමල් රත්නායක මහතා සිදුකළ රුසියානු සංචාරයේ එරට බලශක්ති නියෝජ්ය අමාත්ය රමන් මර්ශාවින් මේ බව සහතික වී ඇති බවය.
එමෙන්ම ශ්රී ලංකාව තුළ සිදුකරන අනෙකුත් සංවර්ධන ව්යාපෘති සඳහා කරනු ලබන සහාය අඛණ්ඩව ලබාදීමටත් නියෝජ්ය අමාත්යවරයා සහතික වී තිබේ.
මේ අතර මැදපෙරදිග යුධ තත්ත්වය හේතුවෙන් මෙරට බලශක්ති සැපයුමට අදාළව පැන නැගී ඇති ගැටළු නිරාකරණයට සිය රටේ උපරිම සහය ලබාදෙන බව පැවසූ රුසියානු බලශක්ති නියෝජ්ය අමාත්යවරයා, ශ්රී ලංකාවට දැනට අවශ්ය ඉන්ධන සැපයීමත් ඉදිරියේදී ඇතිවිය හැකි හිඟතාවන් පියවීමටත් සිය සහය නොඅඩුව ලබාදෙන බවත්ටත් එකඟවී ඇත.
ඒ අනුව අප්රේල් සහ මැයි මාසවලට අවශ්ය ඉන්ධන සැපයීම සිදුකල හැකි බවත් ඔහු පවසා තිබේ.
අවශ්ය ඉන්ධන තොග කඩිනමින් නිදහස් කරගැනීමේ ක්රියාවලිය විධිමත් කිරීමේ අවශ්යතාව පෙන්වා දුන් නියෝජ්ය අමාත්යවරයා, ඒ සඳහා රුසියානු සමාගම් සහ ලංකා ඛණිජ තෙල් තීනිගත සංස්ථාව සමග ගිවිසුම්ගතව ඉදිරි කටයුතු ක්රියාවට නැංවීමට අවශ්ය පහසුකම් සපයන බවද පැවසීය.
එමෙන්ම ශ්රී ලංකාවේ බලශක්ති අවශ්යතාව සඳහා භාවිතකරන ගල්අඟුරු සැපයීමට සිය රට සූදානම් බවද හෙතෙම මෙහිදී වැඩිදුරටත් අවධාරණය කර ඇත.
ශ්රී ලංකාවේ සංවර්ධන මාවත යතාර්ථයක් වනු දැකීම සිය රටේ කැමැත්ත බවත්, වත්මන් රජය ගෙනයන තිරසර සංවර්ධන ව්යාපෘති සඳහා රුසියානු රාජ්යයේ අඛණ්ඩ සහය ලබාදෙන බවත් මෙහිදී ප්රකාශ වී තිබේ.
1999 වසරේ පැවති ජනාධිපතිවරණ සමයේ සිදුවූ මිනිස් ඝාතනයක් සම්බන්ධයෙන් හිටපු අමාත්ය ජනක බණ්ඩාර තෙන්නකෝන් මහතාට එරෙහිව නීතිපතිවරයා විසින් ගොනු කළ අධිචෝදනා පත්රයක් බලරහිත කරමින් අභියාචනාධිකරණය විසින් ලබාදුන් තීන්දුවක් ශ්රේෂ්ඨාධිකරණය අද (31) ඉවත දැමීමට තීන්දු කර තිබේ.
අදාළ අභියාචනාධිකරණ තීන්දුවට එරෙහිව නීතිපතිවරයා විසින් ඉදිරිපත් කළ ඇපෑලක් විභාග කිරීමෙන් අනතුරුව ශ්රේෂ්ඨාධිකරණය මෙම තීන්දුව ලබා දී තිබුණි.
ප්රියන්ත ප්රනාන්දු, සම්පත් අබේකෝන් යන විනිසුරුවරුන්ගේ එකඟතාවය ඇතිව ශ්රේෂ්ඨාධිකරණ විනිසුරු මහින්ද සමයවර්ධන මහතා විසින් මෙම තීන්දුව ප්රකාශයට පත් කළේය.
1999 වසරේ පැවති ජනාධිපතිවරණය සමයේ පුද්ගලයෙකු වෙඩි තබා ඝාතනයක් සිදුකිරීමේ චෝදනාවක් සම්බන්ධයෙන් 2015 වසරේ හිටපු ඇමති ජනක බණ්ඩාර තෙන්නකෝන් මහතාට එරෙහිව නීතිපතිවරයා විසින් මහනුවර මහාධිකරණය හමුවේ අධි චෝදනා ගොනු කර තිබුණි.
එම චෝදනා පත්ර බලරහිත කිරීමේ රිට් ආඥාවක් නිකුත් කරන ලෙස ඉල්ලා හිටපු ඇමතිවරයා විසින් අභියාචනාධිකරණය හමුවේ පෙත්සමක් ඉදිරිපත් කළ අතර එම පෙත්සම විභාග කළ අභියාචනාධිකරණය 2020 වසරේ නොවැම්බර් මස 20 තීන්දුවක් ලබාදෙමින් නීතිපතිවරයා විසින් ජනක බණ්ඩාර තෙන්නකෝන් මහතාට එරෙහිව මහනුවර මහාධිකරණය හමුවේ ගොනු කර තිබූ අධි චෝදනා පත්රය බලරහිත කරමින් රිට් ආඥාවක් නිකුත් කර තිබුණි.
අභියාචනාධිකරණයේ එම තීන්දුවට එරෙහිව නීතිපතිවරයා විසින් ශ්රේෂ්ඨාධිකරණයට ඇපෑලක් ඉදිරිපත් කර ඇත.
ඇපෑල ඉදිරිපත් කරමින් නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල් ජනක බණ්ඩාර මහතා ශ්රේෂ්ඨාධිකරණය හමුවේ කරුණු දක්වමින් සඳහන් කර තිබුණේ අභියාචනාධිකරණයේ තීන්දුව දෝෂ සහගත බවය.
ඒ අනුව සියලු කරුණු පරීක්ෂා කිරීමෙන් පසුව ශ්රේෂ්ඨාධිකරණ ත්රිපුද්ගල විනිසුරු මඩුල්ල අද සිය තීන්දුව ප්රකාශයට පත් කළේය.
තීන්දු ප්රකාශයට පත් කරමින් විනිසුරු මඩුල්ල සඳහන් කළේ නීතිපතිවරයා විසින් ඉදිරිපත් කළ අභියාචනය බලරහිත කරමින් අභියාචනාධිකරණය විසින් ලබාදුන් තීන්දුව වැරදි සහගත බවය.
ඒ අනුව අභියාචනාධිකරණය විසින් ලබාදුන් තීන්දුව ඉවත දමන බවත් නීතිපතිවරයාගේ අභියාචනය ගාස්තුවට යටත්ව පිළිගන්නා බවත් ශ්රේෂ්ඨාධිකරණය සිය තීන්දුවේ වැඩි දුරටත් සඳහන් කර සිටියේය.
රජයේ මුදල් සාවද්ය පරිහරණය කළේ යැයි චෝදනා කරමින් හිටපු අමාත්යවරුන් වන මහින්දානන්ද අලුත්ගමගේ සහ නලින් ප්රනාන්දු විසින් ඉදිරිපත් කළ මූලික විරෝධතා ප්රතික්ෂේප කිරීමට කොළඹ මහාධිකරණය තීන්දු කළේය.
2015 වසරේ පැවති ජනාධිපතිවරණය සමයේ එවක ජනාධිපති අපේක්ෂක මහින්ද රාජපක්ෂ මහතාගේ දේශපාලන කාර්යාලවලට බෙදාදීම සඳහා සතොස ආයතනය හරහා කැරම් බෝඩ් 14,000 ක් සහ දාම් ලෑලි 11,000 ක් ආනයනය කර බෙදා හැරීම තුළින් රුපියල් මිලියන 39 ක් රජයේ මුදල් සාවද්ය පරිහරණය කළේ යැයි චෝදනා කරමින් හිටපු අමාත්යවරුන් වන මහින්දානන්ද අලුත්ගමගේ, නලින් ප්රනාන්දු විසින් ඉදිරිපත් කළ මූලික විරෝධතා ප්රතික්ෂේප කිරීමට කොළඹ මහාධිකරණය මෙලෙස තීන්දු කර ඇත.
මේ අතර අදාළ නඩුවේ විත්තිකරුවකු වශයෙන් නම් කර සිටි ක්රීඩා අමාත්යාංශයේ හිටපු ලේකම් විශ්රාමික මේජර් ජෙනරාල් නන්ද මල්ලවාරච්චි මහතා නීතිපතිවරයා විසින් අපරාධ නඩු විධාන සංග්රහයේ 194 වන වගන්තිය යටතේ කළ ඉල්ලීම මත ඔහු එම නඩුවෙන් මුදා හැරීමටද අධිකරණය තීන්දු කර තිබේ.
මීට පෙර මෙම නඩුව කැඳවනු ලැබූ අවස්ථාවේදී විත්තිකරුවන් වෙනුවෙන් මූලික විරෝධතා මතු කළ ඔවුන්ගේ නීතිඥවරු සිය සේවාදායකයින් දෙදෙනා මේ හා සමාන චෝදනෙවලට අල්ලස් කොමිසම විසින් ගොනු කළ නඩුවකට වරදකරු වී සිර දඬුවමක් නියම වී සිටින බව සඳහන් කළේය.
ඒ අනුව එකම චෝදනාවකට මේ ආකාරයෙන් නැවත නඩු පැවරීම නීතියට පටහැනි බවත් ඒ අනුව මෙම නඩුව පවරා පවත්වාගෙන යාමට නොහැකි බවත් සඳහන් කරමින් විත්තියේ නීතිඥවරු විසින් මූලික විරෝධතා මතු කර තිබුණි.
එම මූලික විරෝධතා ප්රතික්ෂේප කරමින් සිය නියෝගය ප්රකාශයට පත් කළ කොළඹ මහාධිකරණ විනිසුරු බුද්ධික සී රාගල මහතා මෙම විත්තිකරුවන්ට එරෙහිව අල්ලස් කොමිසම විසින් නඩුව ගොනු කර තිබුණේ අල්ලස් පනතේ 70 වන වගන්තිය යටතේ බව සඳහන් කළේය.
එහෙත් නීතිපතිවරයා මෙම නඩුව ගොනු කර තිබෙන්නේ අපරාධ නඩු විධාන සංග්රහයේ 170 වන වගන්තිය යටතේ බව විනිසුරුවරයා පෙන්වා දී තිබේ.
විත්තිකරුවන්ට එරෙහිව අල්ලස් පනත යටතේ ඉදිරිපත් කළ චෝදනා සහ අපරාධ නඩු විධාන සංග්රහය පනතේ ඉදිරිපත් කළ චෝදනා සංසන්දනය කිරීමේදී ඒවායේ සංඝටක එකිනෙකට වෙනස් බව අධිකරණයට නිරීක්ෂණ වුණේ යැයි සඳහන් කළ විනිසුරුවරයා ඒ අනුව නීතිපතිවරයාට මෙම චෝදනා සම්බන්ධයෙන් නඩු පැවරීමට හැකියාව තිබෙන බව සඳහන් කර තිබේ.
ඒ අනුව විත්තිකරුවන්ට එරෙහිව අපරාධ නඩු විධාන සංග්රහය පනතේ ඉදිරිපත් කළ චෝදනා ඉදිරියට පවත්වාගෙන යාමට හැකි බවත් ඒ අනුව මෙම නඩුව ඉදිරියට පවත්වාගෙන යාමට තීරණය කරන බවත් විනිසුරුවරයා ප්රකාශ කළේය.
ඉන් අනතුරුව මෙම නඩුව පූර්ව නඩු විභාග සම්මන්ත්රණය සඳහා ජූනි මස 26 වනදා කැඳවන ලෙසත් විනිසුරුවරයා නියෝග කර තිබේ.
මෙම නඩුව අද කැඳවූ අවස්ථාවේදී අධිකරණ විසින් කළ නියෝගයකට අනුව වෙනත් නඩුවක් සඳහා සිරදඬුවම් නියම වී සිටින විත්තිකාර හිටපු අමාත්යවරුන් වන මහින්දානන්ද අලුත්ගමගේ සහ නලින් ප්රනාන්දු යන අය බන්ධනාගාර නිලධාරීන් විසින් අධිකරණයට ඉදිරිපත් කර තිබුණි.
