Author: Shashi Maduranga

ගිනිඅවි හා පතොරම් සමග සැකකරුවෙකු කඩුවෙලදී අත්අඩංගුවට….

කඩුවෙල පොලිස් වසමේ වැලිවිට ප්‍රදේශයේදී ගිනිඅවි සහ පතොරොම් සමඟ සැකකරුවෙකු අත්අඩංගුවට ගෙන තිබේ.

ඊයේ (13) උදෑසන කාලයේ කොළඹ අපරාධ කොට්ඨාසයේ නිලධාරීන් කණ්ඩායමකට ලද තොරතුරකට අනුව සිදුකළ වැටලීමකදී අදාළ සැකකරු අත්අඩංගුවට ගත් බව පොලිසිය පවසයි.

එහිදී බලපත්‍ර නොමැතිව තබාගෙන සිටි බෝර 12 ගිනි අවියක්, රයිෆල් අවියක්, බෝර 12 පතොරොම් 15 ක්, රයිෆල් පතොරොම් 02 ක්, මැගසින් 01 ක් සහ මිලිමීටර් 7.62 ජීව පතොරොම් 50 ක් ද සොයාගෙන ඇත.

අත්අඩංගුවට ගත් සැකකරු කඩුවෙල ප්‍රදේශයේ පදිංචි 48 හැවිරිදි පුද්ගලයෙකි.

මෙම සිද්ධිය සම්බන්ධයෙන් කොළඹ අපරාධ කොට්ඨාසය විසින් වැඩිදුර විමර්ශන සිදුකරමින් පවතී.

දිවුලපතාන ග්‍රාමයේ පදිංචිකරුවන් ඉවත් කිරීමට පෙර විධිමත් පරීක්ෂණයක් – නීතිපති ශ්‍රේෂ්ඨාධිකරණයට දැනුම් දෙයි…..

නැගෙනහිර පළාතේ සිංහල වැසියන් බහුතරයක් වාසය කරන, මහවැලි අධිකාරිය යටතට පවරාගෙන තිබෙන දිවුලපතාන ග්‍රාමයේ පදිංචිකරුවන් ඉවත් කිරීමට පෙර ඒ සම්බන්ධයෙන් විධිමත් පරීක්ෂණයක් සිදුකර ඔවුන්ට සුදුසු සහන ලබාදීමට කටයුතු කරන බව නීතිපතිවරයා විසින් ශ්‍රේෂ්ඨාධිකරණයට දැනුම් දී තිබේ.

අද දෙරණ අධිකරණ වාර්තාකරු සඳහන් කළේ, එම පදිංචිකරුවන් ඉවත් කිරීම අභියෝගයට ලක් කරමින් පූජ්‍ය බෙංගමුවේ නාලක හිමියන් සහ අදාළ ග්‍රාමයේ පදිංචිකරුවන් පිරිසක් විසින් ගොනු කළ මූලික අයිතිවාසිකම් පෙත්සම ඊයේ (13) කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් විකුම් ද ආබෲ මහතා මෙම දැනුම්දීම සිදුකළ බවය.

මෙම පෙත්සම අගවිනිසුරු ප්‍රීතිපද්මන් සුරසේන, ශිරාන් ගුණරත්න සහ අචල වෙංගප්පුලි යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවා තිබුණි.

එහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් විකුම් ද ආබෲ මහතා අධිකරණය හමුවේ කරුණු දක්වමින්, මෙම සිද්ධිය සම්බන්ධයෙන් විධිමත් පරීක්ෂණයක් සිදු කර ගමේ මුල් පදිංචිකරුවන් හඳුනා ගැනීම සහ ඔවුන්ට විකල්ප ඉඩම් ලබාදීම හෝ වන්දි ලබාදීමට කටයුතු කරන බව සඳහන් කළේය.

එම අවස්ථාවේදී පෙත්සම්කරුවන් වෙනුවෙන් පෙනී සිටි නීතිඥ කනිෂ්ක විතාරණ මහතා අධිකරණය හමුවේ කරුණු දක්වමින්, මෙම පරීක්ෂණය අවසන් වන තුරු එම ගමේ පදිංචිකරුවන්ට ඔවුන් දැනට සිටින ස්ථානයේම රැඳී සිටීමට අවසර ලබාදෙන ලෙසත්, ඔවුන්ට පිළිගත හැකි සහනයක් හිමි විය යුතු බවත් සඳහන් කළේය.

ඉදිරිපත් වූ කරුණු සලකා බැලූ විනිසුරු මඩුල්ල පාර්ශවකරුවන්ගේ එකඟතාවය ඇතිව පෙත්සම විභාගය අවසන් කිරීමට තීරණය කළේය.

අදාළ පරීක්ෂණයෙන් අනතුරුව නිසි සහන නොලැබුණහොත් මෙම නඩු කටයුත්ත මෝසමක් මාර්ගයෙන් යළි කැඳවිය හැකි බවද විනිසුරු මඩුල්ල පෙත්සම්කාර පාර්ශවයට දැනුම් දුන්නේය.

මෙරට ඉන්ධන සැපයුම අඛණ්ඩව පවත්වාගෙන යන බවට IOC සහතික වෙයි…..

ශ්‍රී ලංකාවේ බලශක්ති සුරක්ෂිතතාව සහතික කරන බවත්, ඒ වෙනුවෙන් ඉන්ධන සැපයුම අඛණ්ඩව පවත්වාගෙන යන බව  ලංකා  IOC සමාගම පවසයි.

මාධ්‍ය හමුවකදී අදහස් දක්වමින් එම සමාගමයේ කළමණාකාර අධ්‍යක්ෂ කේ. රගු මහතා මේ බව පැවසීය.

ඒ සම්බන්ධයෙන් තවදුරටත් අදහස් දැක්වූ කේ. රගු මහතා,

“ලංකා IOC සමාගමයේ කළමනාකාර අධ්‍යක්ෂවරයා ලෙස මට ජනතාවට කියන්න තියෙන්නේ අපි ඉන්ධන සැපයුම අඛණ්ඩව පවත්වාගෙන යන බව. රටට ඉතා වැදගත් වන බලශක්ති සුරක්ෂිතතාව අපි සහතික කරනවා.

පවතින තත්ත්වය ඉතා යහපත් කියලා මම කියන්නේ නෑ. නමුත් රට තුළ ඉන්ධන සැපයුම අඛණ්ඩව පවත්වාගෙන යෑම සඳහා ලංකා IOC ආයතනය සහ රජය තම උපරිමය ඉටු කරමින් සිටිනවා.

අපි රටේ ප්‍රගතිය වෙනුවෙන් අඛණ්ඩව ඉන්ධන සපයනවා” යැයි පැවසීය.

පේරාදෙණිය යකා පාලමේ ඉදිකිරිම් කටයුතු නියමිත දිනට අවසන් කරයිද?

පේරාදෙණිය යකා පාලමේ ඉදිකිරීම් කටයුතු නියමිත දිනට අවසන් කිරීමට හැකියාවක් නොමැති බව දුම්රිය ස්ථානාධිපතිවරුන්ගේ සංගමය පවසයි.

එහි සභාපති සුමේධ සෝමරත්න මහතා පැවසුවේ පාලමේ ඉදිකිරීම් කටයුතු විධිමත් නොවීම හේතුවෙන් එය යළිත් අබලන් තත්ත්වයට පත්ව ඇති බවය.

“දිට්වා කුණාටුවෙන් පස්සේ මේ වෙනකොට මාස තුනක් පහුවෙලා තියෙනවා. දුම්රිය මාර්ග සම්පූර්ණ වශයෙන් යථාවත් කිරීම දිනෙන් දින ප්‍රමාද වෙනවා. පේරාදෙණියේ පාලම රජය මගින් දින නියම කරලා අප්‍රේල් 28 වෙනකොට අවසන් කරනවා කියලා නමුත් මේ වෙනකොට ඒකේ වැඩ නැවතිලා තියෙනවා. හැබැයි ඒකට වෙන වෙන කතා රජයට හිතවාදී වෘත්තීය සමිති සම්බන්ධ කරගෙන වෙනම ප්‍රචාරන යනවා. නමුත් සත්‍ය කතාන්දරය පාලම මේ වෙනකොට නැවතත් ඇදවීමකට ලක්වෙලා තියෙන්නේ. ඒ පිළිබඳව කටයුතු කරන්නේ නෑ. නුවර සිට දිනපතා රාජ්‍ය සේවයට හා පුද්ගලික අංශයේ සේවයට එන මගීන් දැඩි අපහසුතාවයකට පත්වෙලා තියෙන්නේ. මාස තුනක් තිස්සේ උලපනේ – නාවලපිටිය අතර දුම්රිය මාර්ගයේ දුම්රියක් තියෙනවා. ඒ දුම්රිය බොහොම පහසුවෙන් ගෙනියන්න හැකියාව තියෙද්දිත් ඒකටවත් දෙපාර්තමේන්තුව තීන්දු කරලා නැහැ”

රජයට දුන් කාලය අවසන් – සර්වජන බලය අවුරුදු නැකැත් සීට්ටුව සකස් කරයි…..

සර්වජන බලයේ මැදිහත්වීමෙන් අද (14) ජනතාවට අවුරුදු නැකැත් සීට්ටුවක් සකස් කරදීමට පියවර ගෙන තිබේ.

ඒ, රාජ්‍ය නැකැත් කමිටුව පිහිටුවීමට රජය කඩිනම් පියවර නොගන්නේනම් සිය පක්ෂයේ මැදිහත්වීමෙන් ජනතාවට අවුරුදු නැකැත් සීට්ටුව සකස් කරදෙන බවට සර්වජන බලය මීට පෙර ලබාදුන් පොරොන්දුවකට අනුවය.

ඒ අනුව අද වනවිට සර්වජන බලය රජයට ලබාදුන් කාලය ඉක්මවා ගොස් ඇති බැවින් පොරොන්දු වු පරිදි සියලුදෙනාට එකඟ විය හැකි නැකැත් සීට්ටුවක් සකස් කරදෙන ලෙස සර්වජන බලයේ නායක පාර්ලිමේන්තු මන්ත්‍රී දිලිත් ජයවීර මහතා ඇතුළු පිරිසක් පැපිලියාන සුනේත්‍රා මහාදේවි පිරිවෙන් රාජමහා විහාරයට පැමිණ පරිවේණාධිපති මහාචාර්ය පූජ්‍ය මැදගොඩ අභයතිස්ස හිමියන් හමුවී ඉල්ලීමක් කළේය.

පසුව මහාචාර්ය පූජ්‍ය මැදගොඩ අභයතිස්ස හිමියන්ගේ ආරාධනයට අනුව ජ්‍යෝතිර්වේදීන් 17 දෙනෙකු අද සුනේත්‍රා මහාදේවි පිරිවෙනට පැමිණ සාකච්ඡා කර සියලුදෙනාට එකඟ විය හැකි නැකැත් සීට්ටුවක් සකස් කිරීමට පියවර ගත්තේය.

ඒ අනුව සියලුදෙනාගේ එකඟතාවෙන් පසු එය ප්‍රකාශයට පත් කෙරුණි.

මේ අතර සංස්කෘතික දෙපාර්තමේන්තුව 2024 වසරේදී ‘රාජ්‍ය නැකැත් කමිටුව’ විසුරුවා හැරි අතර මේ දක්වා රජය නැවතත් නැකැත් කමිටුවක් පත් කර නොමැත.

මෙවර අවුරුදු නැකැත් ප්‍රකාශයට පත් කෙරුණේ පෝය කමිටුවේ සාමාජිකයන් විසින් බවත්, රාජ්‍ය නැකත් කමිටුවක් පත්කිරීමට රජය වහා කටයුතු කළ යුතු බවත් පවසමින් ජ්‍යෝතිර්වේදීන් පිරිසක් ද ඉකුත් අඟහරුවාදා (10) රජයට සිය අප්‍රසාදය පළ කර තිබුණි.

ඒ අතර ජ්‍යෝතිර්වේදීන් සහ සමාජ ක්‍රියාකාරීන් පිරිසක් ද බුද්ධශාසන අමාත්‍යාංශයට ගොස් රාජ්‍ය නැකැත් කමිටුව වහා සක්‍රීය කරන ලෙස ඉල්ලා තිබුණි.

මෙවන් පසුබිමක සර්වජන බලයේ මැදිහත්වීමෙන් ජනතාවට අවුරුදු නැකැත් සීට්ටුවක් සකස් කරදීමට කටයුතු කළේය.

රජයේ ආයතනවල විෂමාචාර පරීක්ෂා කිරීමට නව විමර්ශන නිලධාරී සංචිතයක්….

රජයේ ආයතනවල සිදුවන විෂමාචාර සම්බන්ධයෙන් මූලික විමර්ශන සිදු කිරීම සඳහා නව විමර්ශන නිලධාරී සංචිතයක් පිහිටුවීමට රජය කටයුතු කර තිබේ.

රාජ්‍ය පරිපාලන, පළාත් සභා සහ පළාත් පාලන අමාත්‍යාංශයට අයත් ආයතන පද්ධතිය තුළ සිදුවන විෂමාචාර සම්බන්ධයෙන් මෙන්ම රාජ්‍ය සේවා කොමිෂන් සභාව, පාර්ලිමේන්තු ගිණුම්කාරක සභාව සහ පාර්ලිමේන්තු ව්‍යවසාය කාරක සභාව වැනි ආයතනවලින් ලැබෙන පැමිණිලි සම්බන්ධයෙන් මූලික විමර්ශන සිදු කිරීම එම අමාත්‍යාංශයේ විමර්ශන ඒකකය වෙත පැවරී ඇත.

කෙසේවෙතත්, රජයේ ආයතන ගණනාවකින් පැමිණෙන පැමිණිලි සංඛ්‍යාව ඉහළ යෑමත් සමඟ එම ඒකකයේ සේවය කරන විමර්ශන නිලධාරීන් 20 දෙනෙකු පමණක් වීම හේතුවෙන් සියලුම පැමිණිලි සම්බන්ධයෙන් විමර්ශන සිදු කිරීමට ඇති ධාරිතාව ප්‍රමාණවත් නොවන බව සඳහන් වේ.

එම හේතුවෙන්, රාජ්‍ය පරිපාලන අමාත්‍යාංශයේ මැදිහත් වීම මත විවිධ අමාත්‍යාංශ, දෙපාර්තමේන්තු, රාජ්‍ය සංස්ථා හා මණ්ඩලවලින් අයදුම්පත් කැඳවා නිලධාරීන් තෝරාගෙන, වෙනත් ආයතනවල සේවය කරන රාජ්‍ය නිලධාරීන්ගෙන් සමන්විත මූලික විමර්ශන නිලධාරීන් සහ පැමිණිල්ල මෙහෙයවන නිලධාරීන්ගේ සංචිතයක් පිහිටුවීමට තීරණය කර තිබේ.

මෙහි ප්‍රධාන අරමුණු වන්නේ එම නිලධාරීන් සේවය කරන ආයතනවලට මනා පුහුණුවකින් යුත් විමර්ශන නිලධාරීන් පිරිසක් ලබාදීම සහ බාහිර ආයතනවලින් රාජ්‍ය පරිපාලන අමාත්‍යාංශයේ විමර්ශන ඒකකයට යොමු කෙරෙන ඉල්ලීම් සම්බන්ධයෙන් කටයුතු කිරීම සඳහා මෙම නිලධාරීන් යොමු කිරීමයි.

ඒ අනුව ලැබුණු අයදුම්පත් අතරින් තෝරාගත් නිලධාරීන් 150 දෙනෙකුගෙන් යුත් සංචිතයක් පිහිටුවා ඔවුන් කණ්ඩායම් තුනක් ලෙස වෙන් කර එක් කණ්ඩායමකට දින 14ක පුහුණු වැඩසටහනක් පැවැත්වීමට කටයුතු කර ඇත.

එහි පළමු කණ්ඩායම සඳහා පුහුණු වැඩසටහන 2026 පෙබරවාරි 05 දින ආරම්භ කළ අතර එය සාර්ථකව අවසන් කළ නිලධාරීන් 42 දෙනෙකු සඳහා සහතිකපත් ප්‍රදානෝත්සවය රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ නියෝජ්‍ය අමාත්‍ය රුවන් සෙනරත් මහතාගේ ප්‍රධානත්වයෙන් නාරාහේන්පිට නිල මැදුරු ශ්‍රවණාගාරයේදී පැවැත්වුණි.

කෘත්‍රීම බුද්ධිය භාවිතය පිළිබඳව රජයේ විධායක නිලධාරීන් දැනුවත් කිරීමේ වැඩමුළුවක්….

කෘත්‍රිම බුද්ධිය භාවිතය පිළිබඳව රජයේ විධායක නිලධාරීන් වෙනුවෙන්  සංවිධානය කළ විශේෂ වැඩමුළුවක් රත්නපුර දිස්ත්‍රික් ලේකම් කාර්යාලයීය ශ්‍රවණාගාරයේදී පසුගිය 12 වනදා පවත්වා තිබේ.

රාජ්‍ය සේවය ඵලදායි සහ කාර්යක්ෂම සේවාවක් බවට පරිවර්තනය කිරීමේ අරමුණෙන් මෙය සංවිධාන කර තිබූ බව ජනාධිපති මාධ්‍ය අංශය සඳහන් කරයි.

‘AI for Transforming Public Service’ යන මැයෙන් ජනාධිපති ලේකම් කාර්යාලයේ සහ ඩිජිටල් ආර්ථික අමාත්‍යාංශයේ මූලිකත්වයෙන් සබරගමුව පළාත් සභාව විසින් රත්නපුර දිස්ත්‍රික් ලේකම් කාර්යාලයේ සහාය ඇතිව සංවිධානය කරන ලද මෙම වැඩමුළුවට සබරගමුව පළාතේ විධායක ශ්‍රේණියේ රාජ්‍ය නිලධාරීන් එක්ව සිටියහ.

රාජ්‍ය සේවය ඩිජිටල්කරණය කිරීමේ රජයේ වැඩපිළිවෙළෙහි විශේෂ පියවරක් ලෙස රාජ්‍ය නිලධාරීන් දැනුවත් කිරීම සහ සුදානම් කිරීම, කෘත්‍රිම බුද්ධිය පිළිබඳව රාජ්‍ය සේවය තුළ ධනාත්මක ආකල්පයක් ඇති කිරීම යන අරමුණු ඇතිව මෙම වැඩමුළුව සංවිධානය කර තිබේ.

ජනාධිපති කාර්යාලය මගින් ක්‍රියාත්මක වන ඩිජිටල්/කෘත්‍රීම බුද්ධිය සම්බන්ධ ධාරිතා සංවර්ධන වැඩසටහන් සම්පත් දායක, ශ්‍රී ලංකා තොරතුරු සහ සන්නිවේදන තාක්‍ෂණ නියෝජිතායතනයේ (ICTA) හිටපු අධ්‍යක්ෂකවරුන් වන හර්ෂ පුරසිංහ සහ සමිස අබේසිංහ යන මහත්වරුන් මෙම වැඩමුළුවට සම්පත්දායකත්වය සැපයූ බව ජනාධිපති මාධ්‍ය අංශය වැඩිදුරටත් සඳහන් කරයි.

අවුරුදු 3-5 දක්වා දරුවන්ට මාර්ගගත අධ්‍යාපනය නුසුදුසුයි – අමාත්‍යාංශයෙන් දැනුම්දීමක්….

වයස අවුරුදු 3 සිට 5 දක්වා දරුවන් සඳහා මාර්ගගත (Online) ක්‍රමය ඔස්සේ ඉගැන්වීම අධ්‍යාපන මනෝවිද්‍යාවට සහ ළමා සංවර්ධන මූලධර්මවලට පටහැනි බව කාන්තා හා ළමා කටයුතු අමාත්‍යාංශය පවසයි.

නිවේදනයක් නිකුත් කරමින් අමාත්‍යාංශය සඳහන් කරනුයේ පෙර පාසල් සහ ප්‍රාථමික අංශයේ දරුවන් ඉලක්ක කර ගනිමින් වර්තමානයේ ක්‍රියාත්මක වන මාර්ගගත සම්මන්ත්‍රණ සම්බන්ධයෙන් කරුණු රැසක් මේ වන විට අනාවරණය වී ඇති බවය.

අධ්‍යාපන මනෝවිද්‍යාවට අනුව වයස අවුරුදු 3-5 අතර පසුවන දරුවෙකුගේ ඉගෙනුම සිදුවිය යුත්තේ ක්‍රියාකාරකම් පාදක කරගත් සහ සමාජීය අන්තර්ක්‍රියා සහිත පරිසරයක බවත් පෙන්වා දෙන අමාත්‍යාංශය සඳහන් කරනුයේ තිරයක් දෙස බලා සිටිමින් අධ්‍යාපනය ලබන දරුවන්ගේ සමාජීය කුසලතා වර්ධනය අඩාල වීම, අවධානය රඳවා ගැනීමේ හැකියාව හීන කිරීම සහ නිර්මාණාත්මක චින්තනයටද බාධා පමුණුවන බවය.

ඒ අනුව රජයේ සහ කාන්තා හා ළමා කටයුතු පිළිබඳ අමාත්‍යාංශයේ ළමා සංවර්ධන ප්‍රතිපත්තිවලට අනුව පූර්ව ළමාවිය සංවර්ධනයේදී දරුවා සජීවීව පරිසරය සමග ගනුදෙනු කළ යුතු බවත් කුඩා දරුවන් අධික ලෙස තාක්ෂණික මෙවලම්වලට නිරාවරණය කිරීම ඔවුන්ගේ මානසික හා කායික සෞඛ්‍යයට විශේෂයෙන් මොළයේ වර්ධනයට අහිතකර බැවින් එවැනි වයස් කාණ්ඩ සඳහා මාර්ගගත පන්ති පැවැත්වීම අනුමත නොකරන බවද අමාත්‍යාංශය සඳහන් කළේය.

වාණිජ පරමාර්ථයෙන් සංවිධානය කරනු ලබන මෙවැනි සම්මන්ත්‍රණ මගින් දරුවාගේ අධ්‍යාපනික ප්‍රමිතිය ඉහළ නොයන බවත් ඔවුන්ගේ ස්වභාවික වර්ධනයට එය බාධාවක් බවත් කාන්තා හා ළමා කටයුතු අමාත්‍යාංශය දෙමාපියන් වෙත දැනුම්දීමක්ද සිදුකර තිබේ.

ඒ හේතුවෙන් දරුවන්ගේ මානසික සෞඛ්‍ය පිළිබඳව සලකා බලා මෙවැනි ක්‍රියාකාරකම්වලට යොමු කිරීමෙන් වැලකී සිටින ලෙසත් ඉල්ලා සිටින අමාත්‍යාංශය දෙමාපියන්ගෙන් වැඩිදුරටත් ඉල්ලා ඇත්තේ දරුවෙකුගේ හොඳම ගුරුවරයා පරිසරය සහ සජීවි අත්දැකීම් මිස ඩිජිටල් තිරයක් නොවන බවය.

ඒ අනුව දරුවන්ගේ මානසික හා කායික සෞඛ්‍යය සම්බන්ධව දෙමාපියන් ලෙස දැඩි අවධානය යොමු කරමින් කටයුතු කරන ලෙස අමාත්‍යාංශ දෙමාපියන්ගෙන් ඉල්ලීමක් ද සිදුකර තිබේ.

පසුගිය වසරේ ශ්‍රී ලංකාවට ඉහළ ආර්ථික වර්ධනයක්….

ලෝක ආර්ථික දත්තයන්ට අනුව ශ්‍රී ලංකාව 2025 වසරේදී ඉහළ වර්ධනයක් ළඟා කරගෙන ඇති බව වෙළඳ, වාණිජ සහ ආහාර සුරක්‍ෂිතතා පිළිබඳ නියෝජ්‍ය අමාත්‍ය ආර්. එම්. ජයවර්ධන මහතා පවසයි.

අමාත්‍යවරයා මේ බව ප්‍රකාශ කළේ, බඩල්කුඹුර ප්‍රාදේශීය ලේකම් බල ප්‍රදේශයේ පිහිටි මාළිගාතැන්න මංසන්දියේ සිට 11 කණුව මඩුගහපිටිය දක්වා මාර්ගය කාපට් අතුරා සංවර්ධනය කිරීමේ ආරම්භක අවස්ථාවට එක්වෙමිනි.

බංකොලොත් රට මේ වනවිට ක්‍රමානුකූලව සංවර්ධනය වෙමින් ඉදිරියට ගමන් කරමින් සිටින බව ද ඔහු කීය.

“රට ස්ථාවර කරමින් ලෝක ආර්ථිකය අභියෝගයන්ටද මුහුණ දෙමින් ඉලක්කගත වැඩ පිළිවෙලක් තුලින් රට ඉදිරියට ගෙනයනවා. ආර්ථික වර්ධන වේගය අනුව සියලු ක්‍ෂේත්‍රවලින් ඉදිරියට ගොස් තිබෙනවා.

ඒ අතරතුර පසුගියදා ඇතිවූ දිට්වා ව්‍යසනයෙන් කෝටි ලක්‍ෂයකට වැඩි පාඩුවක් අපේ රටට සිද්ධවුණා. රටේ සංවර්ධනයට යොදන්න තිබූ සල්ලි එම හානි වෙනුවෙන් යොදවන්න වෙලා තියෙනවා. දැනටමත් දිට්වාවලින් හානිවූ විශාල ප්‍රමාණයකට වන්දි ගෙවීම් සිදු කරමින් රට යථා තත්ත්වයට පත් කිරීමට කටයුතු කර තිබෙනවා.

ලෝකය පිළිබඳ අවබෝධයෙන් හා වංචා දූෂණ නැතිව, මහජන මුදල් නාස්තියෙන් තොරව, පෞද්ගලික වරප්‍රසාද කප්පාදු කර ගනිමින් ‘පොහොසත් රටක් ලස්සන ජීවිතයක්’රටේ ජනතාවට ලබාදෙන්න අපි රජයක් විදියට කැපවෙනවා.”

ප්‍රවාහන, මහාමාර්ග සහ නාගරික සංවර්ධන අමාත්‍යංශය මගින් ක්‍රියාත්මක කර ඇති ග්‍රාමීය මාර්ග සංවර්ධන ජාතික වැඩසටහන යටතේ දෙවන ඒකාබද්ධ මාර්ග ආයෝජන වැඩසටහනේ වැඩ කටයුතු අද (14) ආරම්භ කෙරුණි.

ඒ අනුව ආසියානු සංවර්ධන බැංකුවේ (ADB) මූල්‍යාධාර මත ක්‍රියාත්මක වන දෙවන ඒකාබද්ධ මාර්ග ආයෝජන වැඩසටහනට අනුව (i-Road Project) ඌව පළාතේ මොණරාගල දිස්ත්‍රික්කයේ තවත් මාර්ගයක් සංවර්ධනය කරනු ඇත.

බදුල්ල – මොණරාගල (A-22) ප්‍රධාන මාර්ගයට සහ පුස්සැල්ලාව මාර්ගයට කඩිනමින් ප්‍රවේශය ලබාගත හැකි මෙම 11 කණුව මඩුගහපිටිය මාර්ගය සංවර්ධනයට රුපියල් ලක්‍ෂ 600 ක මූල්‍ය ප්‍රතිපාදන වැය කෙරේ.

මාර්ග සංවර්ධන අධිකාරියේ සේවා යෝජකත්වයෙන් තරගකාරී විනිවිද ප්‍රසම්පාදන ක්‍රියාවලිය යටතේ තෝරාගත් දේශීය ඉදිකිරීම් ආයතන මගින් මාර්ග සංවර්ධන කටයුතු ක්‍රියාත්මක කිරීමට නියමිතය.

සංචාරක ප්‍රවර්ධනය සඳහා ජපාන දූත කණ්ඩායමක් මෙරටට….

ශ්‍රී ලංකාවේ ප්‍රමුඛ පෙළේ සංචාරක සමාගමක් වන Connaissance De Ceylan ආයතනයේ සම්බන්ධීකරණයෙන් සංචාරක ප්‍රවර්ධනය සඳහා මෙරටට පැමිණි 11 දෙනෙකුගෙන් යුත් ජපාන නියෝජිත පිරිසක් අද (14) පෙරවරුවේ ජනාධිපති කාර්යාලය නැරඹීම සඳහා පැමිණියහ.

ශ්‍රී ලංකාවේ ජන ඉතිහාසය, බුදුදහමේ ආගමනය සහ විකාශනය, පාරම්පරික සංස්කෘතිය, ආයුර්වේදය, සම්ප්‍රදායික චාරිත්‍ර වාරිත්‍ර, ආහාර රටාව, ආර්ථික බෝග ආදිය සම්බන්ධයෙන් අධ්‍යයනය කර ඒ පිළිබඳ අවබෝධයක් ලබා ගැනීම මෙම දූත පිරිසේ අරමුණ වී තිබේ.

එමගින් දෙරට අතර සංචාරක කර්මාන්තය වැඩිදියුණු කර ගැනීම සඳහා සිදු කළ හැකි මැදිහත්වීම පිළිබඳව මෙහිදී සාකච්ඡා කළ ඔවුහු, තමන් ලබා ගත් දැනුම ජපානයේ ජනතාව සමඟ බෙදාහදා ගැනීමට කටයුතු කරන බවද පැවසූහ.

එසේම, ජපානය තුළ ශ්‍රී ලංකාව ප්‍රමුඛපෙළේ සංචාරක ගමනාන්තයක් ලෙස ප්‍රවර්ධනය කිරීම, කොළඹ, අනුරාධපුරය, සීගිරිය, මහියංගණය සහ මහනුවර යන ප්‍රදේශයන් කේන්ද්‍ර කර ගනිමින් ශ්‍රී ලංකාවේ සංස්කෘතික උරුමය ජාත්‍යන්තරයට ගෙන යාම ආදී කරුණු පිළිබඳවද මෙහිදී සාකච්ඡා කෙරිණි.

මෙම අවස්ථාවට ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ මහතා ඇතුළු ජ්‍යෙෂ්ඨ නිලධාරීහු පිරිසක් සහභාගි වූහ.

මෙම දූත කණ්ඩායම ජනාධිපති කාර්යාලයට අමතරව, සපුගස්කන්ද පුරාණ විහාරය, මිහින්තලය, අනුරාධපුරය, සීගිරිය, දඹාන, මල්වතු මහා විහාරය, වරාය නගරය ඇතුළු තවත් සුවිශේෂී ස්ථාන රැසක්ද නැරඹීමට එක් වූහ.