කොළඹ වරාය ආසන්නයේ පිහිටා ඇති බොරතෙල් ගොඩබෑමේ බෝයාවක අද (14) අලුයම පිපිරීමකින් සිදු වූ ඉන්ධන කාන්දුව මේ වනවිට පාලනය කර තිබේ.
කෙසේ වෙතත් විනාඩි 20කට ආසන්න කාලයක් අදාළ කාන්දුව සිදුව ඇති අතර, ඒ හේතුවෙන් බොරතෙල් මෙට්රික්ටොන් 200ක පමණ ප්රමාණයක් මුහුදු ජලය සමග මිශ්ර වී ඇති බව සඳහන්.
ඒ හේතුවෙන් සමුද්රීය පරිසර ආරක්ෂණ අධිකාරිය, වෙරළ ආරක්ෂක දෙපාර්තමේන්තුව, නාවික සහ ගුවන් හමුදාවේද සහාය ඇතිව මුහුදු ජලයට මිශ්ර වු බොරතෙල් ඉවත්කර තත්ත්වය පාලනය කිරීමට කටයුතු කර ඇත.
අම්බලන්ගොඩ, මෝදර දේවාල කමිටු සභාපති මිරන්ත වරුසවිතාන නමැත්තා ඝාතනයට ආධාර අනුබලදීම සම්බන්ධයේ පසුගියදා අත්අඩංගුවට ගත් ‘බටු මීයා’ නම් සැකකරුගේ බිරිඳ සහ තවත් සැකකරුවන් තිදෙනෙකු පොළොන්නරුව ප්රදේශයේදී පොලීසිය විසින් ඊයේ (13) රාත්රියේ අත්අඩංගුවට ගෙන ඇත.
ඔවුන් සන්තකයේ තිබී හෙරොයින් ග්රෑම් 20කට අධික ප්රමාණයක්ද පොලීසිය විසින් සොයාගෙන තිබේ.
සැකකරුවන් පිරිස පොළොන්නරුව මහෙස්ත්රාත්වරයා හමුවට ඉදිරිපත් කිරීමෙන් අනතුරුව පැය 72ක් රදවාගෙන ප්රශ්න කිරීමට පොලීසියට අවසර හිමිව ඇත.
” දිට්වා ” සුළි කුණාටුවෙන් විපතටපත් ජනතාව වෙනුවෙන් එක්සත් අරාබි එමීර් රාජ්යයේ හමුදා භටයන් විසින් මෙරට තුළ ක්රියාත්මක කළ ගලවා ගැනීම් සහ සෝදිසි කිරීමේ මෙහෙයුම් නිමාවට පත් කර තිබේ.
ඒ අනුව, එම භටයන්ගෙන් පිරිසක් ඒ සඳහා යොදා ගත් වාහන සහ උපකරණ කීපයක් රැගෙන අද (14) පස්වරුවේ එරට ගුවන් හමුදාවට අයත් විශේෂ භාණ්ඩ ප්රවාහන ගුවන් යානයක් මගින් අබුඩාබි නුවර වෙත පිටත්ව ගොස් තිබේ.
මේ සඳහා එක්සත් අරාබි එමීර් රාජ්යයේ ගුවන් හමුදාව සතු සී.- 17 වර්ගයේ විශාලතම භාණ්ඩ ප්රවාහන ගුවන් යානයක් කටුනායක ගුවන් තොටුපොළ වෙත පැමිණ තිබුණි.
එම ගුවන් යානයට විශාල ට්රක් රථ 04 ක්, විදුලි ජනක යන්ත්ර සහ තවත් උපකරණ මෙන්ම, මෙම මෙහෙයුම් සඳහා දායක වූ , ඒවායේ ක්රියාකරුවන් 16 දෙනෙකු ද එක්වී සිටියහ.
මහරගම පන්නිපිටිය හයිලෙවල් මාර්ගයේ පීඩාකාරී අන්දමින් අවදානම් සහගත ලෙස යතුරුපැදි සහ ත්රිරෝද රථ පැදවූ තරුණයන් 18 දෙනෙකු මහරගම පොලීසිය විසින් අද (14) අත්අඩංගුවට ගෙන ඇත.
අදාළ තරුණයක් මුදල් ඔට්ටු අල්ලමින් මෙය සිදුකර ඇති බව සඳහන්.
මේ සඳහා යොදාගත් යතුරුපැදි 11ක් හා ත්රීරෝද රථයක්ද පොලිස් භාරයට ගෙන තිබේ.
ශ්රී ලංකා මහ බැංකුව විසින් ප්රකාශයට පත් කරන ලද දෛනික විනිමය අනුපාතික සටහනට අනුව අද (12) දිනයේ දී එක්සත් ජනපද ඩොලරයක ගැනුම් මිල රු. 305.32 ක් හා විකුණුම් මිල රු. 312.91ක් ලෙසින් සටහන් වී තිබේ.
මේ අතර එ. ජ. ඩොලරයේ නිරූපිත එතැන් විනිමය අනුපාතිකය (Indicative Rate of the USD/LKR Spot Exchange Rate) රු. 309.02 ක් ලෙසින් වාර්තා වන අතර එය 2024 මාර්තු 04 දිනෙන් පසු ඩොලරයක් වෙනුවෙන් වාර්තා වී තිබෙන ඉහළම රුපියල් අගය වේ.
අයහපත් කාලගුණය හේතුවෙන් දිවයිනේ දිස්ත්රික්ක 02ක් සඳහා තවදුරටත් නායයෑම් රතු නිවේදන නිකුත් කර ඇති බව ජාතික ගොඩනැගිලි පර්යේෂණ සංවිධානය පවසයි.
ඒ අනුව මහනුවර දිස්ත්රික්කයේ මැදදුම්බර, පාතදුම්බර, ගඟ ඉහළ කෝරළේ, දොළුව, පන්විල, දෙල්තොට, උඩුදුම්බර, මිනිපේ සහ උඩපළාත යන ප්රාදේශීය ලේකම් කොට්ඨාස සඳහා නායයෑමේ රතු නිවේදන නිකුත් කර තිබේ.
එමෙන්ම කුරුණෑගල දිස්ත්රික්කයේ රිදීගම ප්රාදේශීය ලේකම් කොට්ඨාස සඳහා ද ඉවත්වීමේ රතු නිවේදන නිකුත් කර ඇත.
තවත් ප්රාදේශීය ලේකම් කොට්ඨාස කිහිපයක් සඳහා ජාතික ගොඩනැගිලි පර්යේෂණ සංවිධානය නායයෑම් දෙවන මට්ටමේ අනතුරු ඇඟවීම් නිකුත් කර ඇත.
ඒ අනුව බදුල්ල දිස්ත්රික්කයේ ඌව පරණගම, බදුල්ල, කන්දෙකැටිය, බණ්ඩාරවෙල, සොරණතොට, හාලිඇල, මීගහකිවුල, ලුණුගල, වැලිමඩ, හල්දුම්මුල්ල, පස්සර, ඇල්ල සහ හපුතලේ යන ප්රාදේශීය ලේකම් කොට්ඨාස සඳහා මෙසේ දෙවන මට්ටමේ අනතුරු ඇඟවීම් නිකුත් කර තිබේ.
මහනුවර දිස්ත්රික්කයේ තුම්පනේ, හාරිස්පත්තුව, උඩුනුවර, යටිනුවර, පූජාපිටිය, පස්බාගේ කෝරළේ, කුණ්ඩසාලේ, හතරලියැද්ද, පාතහේවාහැට යන ප්රාදේශීය ලේකම් කොට්ඨාස ද මීට ඇතුළත්.
එමෙන්ම කෑගල්ල දිස්ත්රික්කයේ මාවනැල්ල, රඹුක්කන, අරණායක, ගලිගමුව, කෑගල්ල, බුලත්කොහුපිටිය, යටියන්තොට සහ වරකාපොල යන ප්රාදේශීය ලේකම් කොට්ඨාසවලට ද කුරුණෑගල දිස්ත්රික්කයේ මල්ලවපිටිය, අලව්ව, පොල්ගහවෙල සහ මාවතගම යන ප්රාදේශීය ලේකම් කොට්ඨාසවලට මෙසේ දෙවන මට්ටමේ අනතුරු ඇඟවීම් නිකුත් කර ඇත.
මාතලේ දිස්ත්රික්කයේ ලග්ගල පල්ලේගම, මාතලේ, පල්ලේපොල, රත්තොට, යටවත්ත, අඹන්ගඟ කෝරළය, විල්ගමුව, උකුවෙල සහ නාඋල යන යන ප්රාදේශීය ලේකම් කොට්ඨාස සඳහා ද නුවරඑළිය දිස්ත්රික්කයේ අඹගමුව කෝරළය, කොත්මලේ නැගෙනහිර, මතුරට, නෝර්වුඩ්, හඟුරන්කෙත, නුවරඑළිය, කොත්මලේ බටහිර, වලපනේ, තලවාකැලේ සහ නිල්දණ්ඩාහින්න මෙන්ම රත්නපුර දිස්ත්රික්කයේ කහවත්ත, කොළොන්න සහ ගොඩකවෙල ප්රාදේශීය ලේකම් කොට්ඨාස ද මීට ඇතුළත් වේ.
අනතුරු ඇඟවීමේ මට්ටම 1
——————————-
ගම්පහ දිස්ත්රික්කයේ: දිවුලපිටිය, මීරිගම සහ අත්තනගල්ල
කෑගල්ල දිස්ත්රික්කයේ : දැරණියගල, රුවන්වැල්ල සහ දෙහිඕවිට
ආපදා තත්ත්වය හේතුවෙන් නිශ්කාෂන කටයුතුවල ඇතිවූ ප්රමාදයත් සමග මේ වනවිට බහාලුම් නිශ්කාෂනය කිරීමේ යම් ප්රමාදයක් මතුව තිබේ.
බහාලුම් ප්රවාහන රථ හිමියන්ගේ සංගමයේ සභාපති සනත් මංජුල මහතා සඳහන් කළේ මෙම ආපදා තත්ත්වයත් සමග විශාල බහාලුම් තොගයක් රට තුළට ආනයනය වෙන නමුත් එම බහාලුම් නිශ්කාෂනය කර ගැනීමට හැකියාවක් නොමැති බවය.
වරාය පරිශ්රය තුළ දින 4ක් 5ක් පුරා බහාලුම් පටවා ගත් ලොරි රථ 700කට වැඩි ප්රමාණයක් ඇති බව ද ඒ මහතා වැඩිදුරටත් පැවසීය.
මේ සම්බන්ධයෙන් මැදිහත් වී කෙලවරපිටිය අංගනය කඩිනමින් සකස් කර දෙන ලෙස ද ඔහු මෙහිදී ජනාධිපතිවරයාගෙන් ඉල්ලීමක් ද සිදු කළේය.
කෙසේ වෙතත්, මේ සම්බන්ධයෙන් කළ විමසීමකදී රේගු අධ්යක්ෂ ජනරාල් සීවලී අරුක්ගොඩ මහතා ප්රකාශ කළේ, මේ සති අන්තය වනවිට බහාලුම් තදබදය අවසන් කිරීමට හැකිවනු ඇති බවය.
ශ්රී ලංකාවේ ඉන්දියානු මහකොමසාරිස් සංතෝෂ් ජා මහතා අද (12) මහියංගනයේ ස්ථාපිත කර ඇති ඉන්දියානු ජංගම රෝහලේ නිරික්ෂණ චාරිකවට එක්විය.
මෙම ජංගම රෝහල ඉන්දියානු රජයෙන් ලබා දී ඇති අතර එය ගංවතුරින් හානියට පත් මහියංගන රෝහල යථා තත්ත්වයට පත්වන තුරුම ක්රියාත්මක විය.
මේ වනවිට මහියංගන රෝහලේ ප්රතිකාර කටයුතු ආරම්භ කර ඇති අතර ඒ අනුව මෙම ජංගම රෝහලේ වැඩ කටයුතු අද පස්වරුවෙන් අවසන් කෙරිණි.
මෙම අවස්ථාව සඳහා ඌව පළාත් ආණ්ඩුකාර නිතිඥ කපිල ජයෙස්කර මහතා, ඉන්දියානු නියෝජ්ය මහ කොමසාරිස් වී. එස්. සරන්යා මහත්මිය, මහියංගන ප්රාදේශිය සභා සභාපති නිතිඥ උපේක්ෂා විජේතුංග මහත්මිය ඇතුළු පිරිසක් ද එක්ව සිටියහ.
මෙම වසරේදී මෙන්ම පසුගිය වසරේදී මෙරට සංවිධානාත්මක අපරාධකරුවන් විසින් අනීතිකව උපයාගත් දේපල තහනම් කිරීමටත් එම දේපොළ රජය සතු කර ගැනීම සඳහා වූ මූලික පියවර මේ වන විට ලබාගෙන ඇති බව පොලිස් මාධ්ය ප්රකාශක, සහකාර පොලිස් අධිකාරී එෆ්.යූ. වුට්ලර් මහතා පවසයි.
අද (12) පැවැති මාධ්ය හමුවේදී අදහස් දක්වමින් පොලිස් මාධ්ය ප්රකාශකවරයා පැවසුවේ පසුගිය සහ මෙම වසර දෙක ඇතුළත රත්රං පවුම් 354ක්, වාහන 77ක්, මුදලින් රුපියල් තිස් පන් කෝටියක්, රුපියල් එක්කෝටි එකසිය හයක වටිනාකමකින් යුත් දේපොළ රැසක්ද රජය සතු කර ගැනීමට මූලික ක්රියාමාර්ග මේ වන විට ලබා ගෙන ඇති බවය.
එහිදී 2024 වසරේදී රත්රං පවුම් 150ක්, වාහන 64ක්, මුදලින් රුපියල් කෝටි 6ක්, සහ රුපියල් කෝටි 61ක දේපොළ රජය සතු කර ගැනීම සඳහා තාවකාලිකව තහනම් කළ බවත් පොලිස් මාධ්ය ප්රකාශකවරයා සඳහන් කළේය.
එමෙන්ම මෙම වසරේදී රත්රං පවුම් 204ක්, වාහන 13ක්, රුපියල් හැට හත් කෝටි හැත්තෑ අට ලක්ෂයක ඉඩම් සහ දේපොළ සහ නිවාස 18ක අනීතිකව උපයා ගත් දේපොළ රජය සතු කර ගැනීම සඳහා මේ වන විට ක්රියාමාර්ග ගෙන ඇති බවත් ඒ මහතා වැඩිදුරටත් අදහස් දක්වමින් සඳහන් කළේය.
